رواية عشگ أهل الجنوب الفصل الحادي والعشرون 21 - بقلم أسيل

حسيتها ضاجت لان دافعت على نجوى كامت اخذت سعد غيرت اله ملابسه وحفاظته ونيمته بصفها ضحكت لزمت ايدها وبستها....
مر اسبوع نجوى شايله البيت تطبخ وتعزل وتهتم بسعد ما همني شي غيرر سعد ليش هي تهتم بيه وساره هاملته من بده الدوام جانت ساره تتعامل بجفافيه ويه نجوى وحجت وياها على اللبس وميصير تدخل وتضوج منها فجانت نجوى تغير حفاظه سعد وطلعت ونزلت وجنه كلنه كاعدين اريد اطلع اجيب ساره من الكليه فكالت نجوى الي وجنه بالمطبخ وحدنه وكل اهلي بالاستقبال

نجوى :ما تغار على مرتك تروح تدرس وتكعد بمكان كله زلم وسوالف حبجيات و ولد من عمرها ما تخاف احد يخلي عينه عليها

_واثق من مريتي

نجوى :اي زين ديربالك عليها تره جنها فص الماس والزلم كلهم نفسهم دنيه على الحلوات

ومشت للاستقبال تضحك وشافت امي طلعت اريد اطلع من البيت وسمعتها تكول وهي واكفه يم باب الاستقبال

نجوى :خاله هل مكرود امشك واللحم متزلغ شنو محد ينتبه عليه خليت اله دهن وهاي يبجي من الصبح لليل على امه ولأن متوجع تبقه الحفاظات لابسها وتتنكع بول لحد رده امه من الكليه

زينب :ليش تره كلنه مهتمين بيه

نجوى ;ما حجيتي شي تره كلنه ما مقصرات بس تره امه هي أدرى بيه وانتن كل وحده مهمومه برجلها وجهالها وخاله تعبانه

رجعت اخذت سعد منها وسلمت وطلعت وهو بحضني اشتميت عطره وابتسمت هادئ خطيه يمكن من الوجع سوده على ابيك كعدته بحضني  ام موسى ملابسته دشداشه بيضه عود شيخ اروح اله فدوه وبديت اسوق هادئ كلش ومستغرب ما متعود عليه هيج مبين باجي لحد ما تعب وصلت للجامعه اتصلت بساره وكتلها بالباب ضجت كل الي حجته نجوى صحيح هاملتني ساره هسه طبني مرض بس انا كلت الها لا تقصرين ويه وليدي وهذا فرحتي منتضرها جنت من سنين الله عوضني بيه وطلعت من باب الكليه وركض ولد وراها وحجه وياها من بعيد وخله ايده على جتفها وضحك باوع عليه وفات للجامعه وفتحت الباب وضحكت بس شافت سعد وصعدت بس شافها ضحك سعد أخذته ساره من ايدي خلت ايدها على ضهره وهو خله راسه على صدرها وبقه يباوع عليه وكتلها واني اسوق

_الولد ما سكت من البجي فرفح قلبه عليج

ساره :ليش حبيبي ليش قلب ماماتك منو مزعلك

_محد مزعله البيت كله شايل مسؤوليته وحظرتج انتي تتمضحكين ويه الزلم هنا بالكليه وهاملته ومشك مأكول الحم مال زروره

حجيت بعصبيه التفت عليه بقت تباوع عليه بأستغراب وكالت اليه

ساره :شبيك حبيبي صاير شي بالشغل ضايج منه

_لا والله مصاير الي شي بس مال تعوفين البيت و ابني هاملتني انا طبني مرض بس مال وليدي سعد يصير بيه شي لا احرك البيت فوك راسج ومنو هذا الي يلزم بيج

ساره :نووواف

صاحت والدموع تنزل من عينها جنت لازم زندها كل قوتي عفتها بسرعه انتبهت على نفسي الصراحه كلش مغثوث منها وكالت بعصبيه

ساره : مو بس ابنك هذا ابني اني هم ومن ناحيه المشك كالت الي ماما رسميه عادي لان سمين صلاه النبي وكاعد اعالجه و هذا واحد ما اعرفه يكلي عبالي حبيبتي واعتذر مني تشك بيه نواف

ما حجيت شي وصلنه للبيت نزلت بسرعه صار جاسم بوجههة وسلمت عليه وفاتت اجاني وكال

جاسم :شبيها ليش مبجيها

_عصبت عليها وكلت الها لا تهمل سعد وتخلي البنات يتحملون مسؤوليه ولد مو ابنهن

جاسم :خويه شهل حجي

_اي هذا الصدك ما مجبورات

جاسم :شيخ شبيك انت احد حاجي الك شي وحده شاكيه الك من البنات وما بيهن حيل يعتنن بالشنكايه مال بيت تره خويه كلش فرحانات بيه وما مقصرات وياه

_بس ما مجبورات هن يربنه وأمه تفتر ب الكليات

جاسم :ولا الغاليه امي رسميه والي هي امك مجبوره جانت تتحمل تربيني من ماتت امي ولا تحجي هيج ما مقصره ترجع من الدوام تغسل هدوم وتنظيف ويه البنات ما مقصره بشي

استغفرت ربي وطلعنه انا وجاسم ونبيل وهاي مرت ساعات تأخر الوقت رجعت للبيت ما بيه احد  كلهم نايمين كل واحد راح لغرفته ضليت كاعد جان تنزل نجوى بثوب النوم فاتت للمطبخ وكالت

نجوى :اسويلك جاي

وفات جاسم وكال بعصبيه الها وجان منزل راسه

جاسم :شني خيتي ما تستحين انتي عيب البيت اله حرمته وما كاعده بوحدج

نجوى :ها مو مو قصدي عبالي نايمين

جاسم :نايمين ما نايمين ما تنزلين بهيج لبس حرام والبيت بيه زلم وانتي امانه يله صعدي حطي شي على جسمج ستري روحج استغفر الله ناقص النه مصيبه جديده

صعدت بسرعه وسوه جاي ما حجيت شي التفت عليه وكال

جاسم :انتبه منها لا نضراتها ولا سوالفها الي كثرانه خير الك ولا الها

_مرايده شي بس ماخذه راحتها زايد

جاسم :رايده ما رايده خويه فدوه لك اروح لطولك انتبه منها ما بقه شي ويجي خيها

#ساره

مر يومين ما اروح للكليه ماعندي شي مهم فبقيت اعتني بسعد جنه كاعدين اني والبنات ومخليه سعد على صدري جان نايم واطبطب على ضهره فات نواف ما حجيت شي وياه من سمعني هل كلمتين بالسياره واكله تشك بيه مجاوبني ولا برر هذا الكلام شنو قاصد بيه بقه ساكت وهذا الي غث قلبي صعد للغرفه ما حجيت شي وياه ونزل كاشخ اخر كشخه القاط الأسود وعطره ولحيته محددها والسبحه بيده كحيت وجان نجوى رأسا تكول

نجوى :يمه صلاه النبي ابو سعد عين الله ترعاك شهل جمال بس لا رايح تاخذ حرمه وما ندري

ضحك نواف واني ضجت الصراحه شهل حجي كلش نغثيت مرحبا وجسمي كله رجف وسلم على الكل وطلع بيومها رجع متأخر كلش واني سويت نفسي نايمه و بحضني سعد غير لبسه ونزل كعدت بسرعه و بقيت الواب هذا شيسوي نزل جوة وهو راجع متأخر نزلت على كيف وراه وشفته هو ونجوى نجوى كاعده قريبه منه وصبت كهوة اله وتسولف وياه ويضحكون صعدت بسرعه طلع الصبح ومن فات الغرفه وتمدد يله كدرت انام كعدت متأخره ونزلت جوة وسعد بيدي خليت الممه بحلكه وبست كصته وجانو البنات جوه ونجوى لازمه التليفون وتكلب بيه واني فايره دم نداريت عليها وايدي على خاصرتي وكلت الها

_نجوى قلبي ياريت تخلين حدود بينج وبين الشيخ نواف

نجوى :شهل حجي ساره

_اي حبيبي يعني غزلج بشكله ولبسه وكعداتج يمه بتوالي الليل وتسوين جاي وهل سوالف هاي انا الي اهتم بيها مو انتي لأن كلها كم يوم وراح ترحين ويه خيج انا مو علمود شي بس تعرفين البيت اله حرمته وهل سوالف لازم انبهج عليها اذا احنه نعرفج خوش بنيه الغريب من يشوفج يكول عليج غير حجي لهذا بس حبيت اكلج هل شي

نجوى :م.. ما.. ماشي

حجتها بنتره وارتباك وصعدت لغرفتها بقيت اكصكص الزلاطه وفاير دمي وكالت

هند :جيتها سوده هل بنيه

علياء :صوتج لج صوتج

ملاك :اي هل شي صح ما مرتاحه الها كل مره لازكه بعمي ما حبيتها لهل البكتريا

ضحكت وجانت ملاك تلعب ويه سعد مرت ايام عبالك من حجيت وياها كتلها زيدي بعلاقتج من نواف تسويله اكل و شنو مشتهي اطبخ الك باجر وتكعد تشرب كهوة وجاي سويه مسويه اله أجواء واني على كد الامتحانات اروح للكليه جنت اعزل بالغرفه سعد نايم والدنيا ليل خلصت وسبحت كعدت كبال المرايه شويه ضعفت هل فتره هامله اكلي بديت اخلي مرطب لجسمي وبشرتي وعطر لشعري ومشطته طولان صلاه النبي وخليت شويه تنت لخدودي وشفتي خليت عطر و كمت اريد اطلع كتابي فات نواف ابتسمت بس شفته واجه حضني ما اريد الزعل يطول اكثر بينه بسته من ركبته وهو رجع باسني من عيوني وخدي وشفتي وحاضني من خاصرتي ومبتسم فرحان وكتله واني اخلي راسي على صدره

_انت تشك بيه تشك ببنيتك

نواف :ابد والله ابد وداعه عيونج بس كل الموضوع ضجت من شفته مخلي ايده عليج تدرين بيه اغار

_وتعرف بيه اني ما اسمح لهل شي

نواف :حقج عليه يبعد عافيتي

_لا تتقرب منها

نواف :شنو

_لا تتقرب من نجوى

نواف :تعرفين محد يملي عيني غيرج ولا تعيدين سالفه نوره لان حالها حال نوره ما مخليها براسي لان انتي ماخذه كل عقلي وراسي

_ي اعرف بس خلي حدود بينكم

نواف : تأمريني امر حبيبه قلبي

مرت ايام واشو هاي كمت ارجع من الدوام الكاها بغرفتي تلبس لبسي حاجيت عمه رسميه وعمه رسميه حجت وياها اكثر من مره بس ولا دايره بال مثلا تكول الها بعد لا تلبسين دشاديش النوم مال ساره تكوم تلبس بجايمي والله مو سالفه نحيسه بس اني بصوره عامه ما احب احد يلبس من ملابسي وهي سمينه يعني تخرب لبسي واحنه ما مقصرين وياها جبنه الها أشكال وألوان ملابس واغراض انوب بدت تخلي عطري الي يحبه نواف وتتقرب منه لكيتها ادكم بردانه وعاد كبيت كبت وايراتي عليها تسودنت عليها وصحت كبال نواف عليها

_اطلعي بره غرفتي وممنوع تدوس رجلج غرفتي اني موجوده ما موجوده متفوتين لغرفتي وهاي اخر مره تقربين من رجلي يله بره

سحبني نواف بقوه من ايدي حته يسكتني دفعتها وهي كامت تبجي وطلعت وكال

نواف :شبيج تخبلتي عيب

_لا تحجي بالعيب ومره غريبه تلزم بيك وبنص غرفتك ومرتك موجوده تمن شفت مخلي ايده ذاك الولد شكيت بيه وهو كبال الناس اما هاي الي ما تسمه بالغرفه مال نوم

نواف :اها هيج لسانج طولان

دفعني على الجربايه وطلع كام ميحجي وياي وعاد من صدك هل مراه مراح اعتذر منه لو اموت لان هو الغلطان جنت اطبخ وشفت جاسم فايت للبيت وعيونه براسه وكال بعصبيه لعلياء

جاسم : هل ابنيه لموها منو كال الها تغسل الطرمه ومنكعه روحها فوتوها ستروها

مديت راسي واشوفها واكفه ويه نواف تسولف وضحكت وهو منزل راسه لابسه دشداشه حصر ومنكعه محد كال الها تغسل الكراج وتدري الولد هسه على جيه وفوتو نبيل وسيف السياره بالكراج طبكوها وره سياره نواف البنات كلهن يباعن عليها ضاجت ونواف منطيها مجال كلش زياده عاد نزعت الحجاب وخليته على جتفي جاسم نزل راسه وسيف ونبيل تقربو يردون يفوتون للبيت وصحت وايدي على خاصرتي وآني واكفه كبال الباب

_عيني ست نجوده اذا خلصتي الكراج الي محد كال الج غسليه ب هل وقت وتعرفين وقت جيه الزلم فوتي غيري لبسج لان متنكع ولباسج مبين قصدي تروحين تاخذين برد

طبعا مو كلهم جانو واكفين قريبين مني وضايجين كلهم فاتو للبيت جاسم غاص من الضحك نبيل وسيف ضحكتهم فضيحه الي يشوفهم يكول عليهم تؤم بس هم لا و نبيل عيونه سوده وسيف عسليه وفتت وضربتني زينب على جتفي وكلت لجاسم وهو بعده يضحك

_مفوره دم خيتك هل دخيله الي ما تسمه شوكت ترد لهلها ونخلص

علياء :مفوره دمنه كلنه

هند :ولجن صوتجن

_ي هسه من تلزك بسيف عود وكتها كولي صوتج

فات نواف وفتت للمطبخ اكمل طبخ وهي صعدت مسويه نفسها تبجي وفات نواف شمر الأغراض على الميز وكال بعصبيه

نواف :شنو هذا لسانج

_اعوفها تصلخ كبال اخوانك عادي بس لان هي دخيلتك؟

نواف :لج ساره

جاسم :كعدتها طولت وكعدتها مو راحه واخوها ما يكول من وين هم ولا هي تحجي

نواف :وانت شدخلك من وين ما وين

حيدر :شبيكم تتناكرون

جاسم :لا بويه ماكو شي انا واخوي نسولف طمن نفسك

حظرت ويه البنات الاكل وفرشنه السفره وما قبلت الخاتون تنزل تاكل زقنبوت ابطنها فجنه كاعدين ناكل وكالت عمتي

🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤

هااااي فراشات قلبي شونكم ان شاء الله يعجبكم البارت

الي اريده منكم حته انزل بارت جديده وبسرعه ٢٠٠ تصويت يعني نجمه لان الي ديقرون البارت فوك ال ٨٠٠ شخص 🥺 يعني ما معقوله محابين كتابتي لدرجه متصوتون الي ☹️🙂

تره والكعبه اموت ساره لو نواف واني كلت الكم اعتبروه تهديد 😂🥺😂😂😂😂