رواية عشگ الفرات ( عِندما تَهوى القُلوب ) الفصل العاشر 10 - بقلم سحر الدليمي

سـ أكرهُكَ كَثيراً لكني سـ أُحبكَ أكثر .

***

نجاة
گاعدة بالغرفة أعزل بالملابس و دگ التيلفون طلع أخوية بكر فـ جاوبته

- هلا بكر

- بالمهلي خيتي شلونچ ؟

- على الله يخوي بخير ، أنت شلونك

- والله مدري شگلچ يخيه

- خير بكر صاير وياكم شي ؟

- عباس خيه عباس مورم گلبي هالولد

- خير بكر شبيه عباس

- لچ خيتي ما يسمع الكلام و صاير عدواني حيل و يحچيلي سوالف ما أدري منين يجيبها عبالك طفل عمره 10 سنوات

- ميخالف بكر طول بالك عليه عباس شاب و دمه حامي تصير هالشغلات بهالعمر

- زين ما گتلچ شلون صارو ولدچ ؟

- صگر الحمدلله زين و رجع لدوامه أما فرات حتى أذا بيه شي ميفك حلگه و يحچي و يضل 24 ساعة بالمعرض حتى ميرتاح

- ماعليه شي فرات سبع ما ينخاف عليه ، والله خيتي صراحة ما أعرف شگلچ بس أمسيحها بوجهي

- خير أبو عباس شنو هي اللي أمسحها بوجهك شصاير ؟

- سالفة عباس و فرات

- يا سالفة بكر ؟

- يعني فرات ما حاچيلچ شلون أنجرح راسه ؟

- لا حچالي كال تعارك ويه شله هناك بالبصرة و أنصاب

- لا خيتي تعاركو هو و عباس و أبني الأغم هو اللي ضربه

- يااا صخام بوجهي ليش هيچ

- مو أگلچ مورم گلبي هالولد

- ميخالف أبو عباس شباب و تعاركو بيناتهم همه يحلونها بيناتهم

- أي أن شاء الله ، يلا خيه آني رايح رايده شي ؟

- لا يخوي تسلم الله وياك

نهيت المكالمة ويه بكر و آني منصدمة من اللي سواه عباس و ليش فرات ما حچالي رحت بوجهي أسأل علي أكيد عنده علم بالسالفة ، رحتله لگيته گاعد بالحديقة

- علي

- هلا

- أريد أحچي وياك

- أي أحچي

- أنت تعرف فرات شلون أنجرح راسه ؟

- أي متكاون ويه ولد هناك و صار اللي صار

- لا مو هيچ السالفة

- لعد شلون !

- عباس أبن أخوي بكر هو اللي ضاربه

- شنووو ؟؟ ليش يا ستار شصاير بيناتهم

- ما أعرف ، خابرني بكر و گالي هو ، بس ما حچالي السالفة و لا آني سألته ، بس اللي محيرني ليش أبنك ما حچالنه ؟

- شيحچيلچ يگولچ تكاونت ويه أبن خالي ؟ ، تدرين بفرات شگد يحب ولد خواله لذلك أنصدم من تصرف عباس و ما حچالنه ، خلص خلي الموضوع مثل ما هو كأنو منعرف اي شي

- و آني هم أگول هيچ

***

صگر : فرات گوم روح للبيت

- ماريد روح أنت آني عندي شغل

- آني أكمل عنك گوم

- لا أنت روح أرتاح مو بعد يومين عندك روحه لديالى

- ألحگ أرتاح ، گوم شبيك عشق هسه تنتظرك بالجامعة ماضل وكت لا تتأخر عليها خطية

- أي والله صحيح نسيتها هسه طلعت همزين ذكرتني ، يلا آني رايح باي

- أگف

- هااا

- هاي الفلوس مال آخر شهر أخذهن وياك أنطيهن لأبوية هو يتصرف بيهن

- تمام يلا باي

- الله وياك

فرات
طلعت من المعرض و بوجهي للجامعة تأخرت على عشگ والله بس شسوي آني ما متعود ألتزم بتوصيل أحد ، شوي و وصلت الجامعة دزيتلها مسج و طلعت

- خوما تأخرت عليچ ؟

- لا چان باقي للعصر مو أحسن شيخ فرات

- أهووو أگلچ تره آني مو السايق الخاص مالچ هم وراي شغل قابل ماعندي بس توصيلتچ شيخة عشگ

- أسمي عشقققق ياخي ليش متفتهم

- آني ما أفتهم ؟؟؟ ، اسمچ عشگ و ديلا عاد

عشق
شگد مستفز و عنودي يربي ، سكتت عنه ما جاوبته و مشينه ، شوي و وصلنه البيت

فرات : أگفي هاچ أخذي هاي الجنطة وياچ اريد أطبگ السيارة

- ماعندك أوامر ثانية شيخ فرات ؟

- لا حالياً ماعندي

شلت الجنطة و نزلت دخلت للبيت عفتها بالصالة ع القنفة و بوجهي للغرفة ميته تعب أريد أبدل و أطلع أتغده

ريان
دخلت عشق للبيت و خلت بالصالة جنطة ما أعرف مال شنو شكلها لفرات لأن هي من طلعت ما بأيدها غير الكتب ، شوي و دخل فرات للصالة و بعدين رجع طلع ، رحت للصالة بعد ما تأكدت محد أكو ، فتحت الجنطة و لگيت بيها فلوس ، حلووو الفرصة جت ليمچ يا ريان أعرفي أستغليها صح
أخذت الجنطة و صعدت لغرفتي ، أنتظرت عشق لحد ما تنزل جوه دخلت للغرفة مالتها و ذبيت الجنطة جوه الچربايه
تنشوف هسه شلون راح تضلين عايشة هنا أنتي و أمچ

مُهره
گاعده بالغرفة وحدي و ضايجة الدوام و توقف بسبب الأحداث اللي صارت بالبلد من الثورة و كورونا آخخ هاي كورونا لعبة بينه طوبة ، فكرت شسوي وين أنطي وجهي أجت ببالي نروح للأنبار لبيت عمة نجاة صح ما أتوقع بابا يقبل بس أحاول أقنعه ، نزلت جوه أشوفه وين لگيته گاعد بالمطبخ يشرب چاي ، أجيت گعدت بصفه

- بابا حبيبي

- ها بنيتي

- أريد أطلب منك طلب

- أنتي تأمرين حبيبتي

- أنت تعرف أنو توقف دوامنا مو

- أي

- فـ هسه آني گاعدة بالبيت و الضوجة تقره مليون

- و المطلوب

- تاخذنه للأنبار لعمه نجاة فدووة بابا آني ما رايحه و لا مره

- لا بنتي شيودينه بهالأوضاع هاي

- فدووة بابا حباب لخاطري لا تكسر بخاطري تره والله أزعل

- أووف منچ

- راح تقبل ؟؟

- خليني أفكر

عشق
صار الليل و كلنه گعدنه نتعلل بالصالة و متونسين ، بس اباوع لهاي ريان تحوص ما أعرف شبيها كأنها متوترة أو خايفة من شي ما أعرف شنو سالفتها هالبنيه

صگر : فرات أنطيت الجنطة لأبوية ؟

- يا جنطة ؟

- شبيك الفلوس الگتلك عليهن

- هااا أي ، لا والله نسيت ، أصلاً مدري وينهن ، عشق الجنطة النطيتچ ياها الظهر وين

- يا جنطة ؟!

- الجنطة اللي چانت وياي الظهر من جينه آني وياچ و أنطيتچ ياها تفوتينها وياچ بين ما أطبگ السيارة

- هااا أي ، خليتها هنا ع القنفة

- وين ؟

- هنا بمكانك

- ماكو ، يابة ما لاحتلك أنت ؟

- لا ما شفتها ، نجاة و أنتي

- و لا آني ، هي جنطة شنو

صگر : يوم الفلوس مال آخر الشهر مو كل مرة ننطيهن لأبوية هو يتصرف بيهن

عشق
أفتهمت أنو الجنطة چان بيها فلوس يعني مُهمة ، صار الكُل يدور عليها گلبو الصالة گلب حتى فرات طلع شاف السيارة مالته بس ماكو كأنو أحد شالها والله آني خليتها هنا بالصالة

جسام : عشق بنيتي أنتي متأكدة خليتيها هينه ؟

- أي والله خالو من دخلت گبل ذبيتها ع القنفة و صعدت فوگ متأكدة خليتها هنا

ريان : آني أگول لو تدورون بالبيت كله متخلون غرفة أذا متدورون بيها يعني خاف أحد شايلها بالغلط و ناسي أو ميدري بنفسه

بدور : أي صحيح دورو بكُل البيت

طلعت خالة نجاة و رُسل يدورن بكُل البيت و بقينه أحنه ندور بالصالة ، شوي و نزلت رُسل بأيدها الجنطة

رُسل : هاي الجنطة صگر ؟

- أي عفيه هي ، وين لگيتيها ؟

أباوع لـ رُسل تباوعلي و ساكته ما جاوبت صگر

علي : ها بنيتي وين لگيتيها گلبنه الدنيا عليها

- أأأ عمي لگيتها هناك ..

صگر : شبيچ رُسل وين لگيتيها ؟

- لگيتها بغرفة عشق جوه الچرباية

بدور : شنووو ؟

أنصدمت كللش شجاب الجنطة لغرفتي و جوه چربايتي أباوع الكُل عيونهم عليه ، معقولة يفكرون أنو آني أخذت الجنطة حرت شسوي ، بلعت ريگي و حچيت بصوت يرجف ...

- والله ما أعرف شجاب الجنطة لغرفتي صدگوني

ريان : شنصدگ حبيبتي مبينه السالفة بايگة جنطة الفلوس ، يولي مو عيب عليچ تخونين خوالچ اللي فتحولچ بيتهم و ما نقصو عليچ شي

جسام : ررييااان أنتي أسسكتييي ، رُسل أنتي متأكدة لكيتيها بغرفة عشق ؟

- أي متأكدة عمي

هنا أنهاريت آني صرت أبچي و اصيح ..

- مو آني والله ماعليه ما أخذت شي آني ، ماما فدوة أحچيلهم

نجاة : أشش بنتي عشق لا تبچين ، يا جماعة أكو أنَ بالسالفة آني شفت عشق من دخلت للبيت چانت بأيدها الجنطة بس ذبتها ع القنفة و صعدت فوگ

- اييي عفية خالة أحچيلهم

علي : متأكدة نجاة ؟

- أي والله و حتى چانت مستعجلة بوقتها

جسام : خلص عجل سدو السالفة و محد يفتحها مره ثانية ، عشق بنيه مربيه و مستحيل تسوي هالشي

علي : السالفة بيها ملعوب سري بس مصيره ينكشف ، عشق بنيتي أعذرينه ع اللي صار و أمسحيها بوجوهنا

عفتهم و رحت صعدت لغرفتي كللش أنقهرت من اللي صار بس اللي ريحني خوالي ما صدگو و ما حچو و لا كلمة تجرحني و وگفة خالة نجاة لو ما هي چان ما أعرف شصار هسه

***

رافد : فرات شبيك رايح راد دوختني ياخي

- يول راح أتخبل شوده الجنطة لغرفة عشگ و أمي شايفتها و هي تخليها هنا بالصالة

صگر : يعني معقولة أكو أحد راد يبلي عشق بالسالفة و هو ماخذها لغرفتها

فرات : هو ع الأغلب السالفة هيچ ، بس منو هذا و ليش هيچ يسوي

رافد : أهووو أنگلبو محققين براسي عمي دگعدو

صگر : أنت بس أنلصم مالك علاقة

: صار حضرت الضابط أنلصمت

فرات : آني رايح تروحون وياي

صگر : لا والله آني تعبان اريد أروح انام

رافد : وين تولي

- ع الشط

- اوكي جاي وياك

***

مُهره
گاعدة على نار أنتظر رد بابا من الصبح ما حچه شي ، رحتله للديوانية حتى أشوفه

- بابا شصار باللي گتلك عليه

- شنو بنيتي ؟

- روحتنا للأنبار شبيك بابا نسيت

- هااا لا ما نسيت

- أي و شقررت نروح مو بابا ؟

- ليش هو آني أگدر أرفضلچ طلب

- صدُگ بابا يعني حنروح

- أي ، بس سجاد عنده شغل ميروح و آني مگدر أسوق حاير بهالسالفة

- بابا شوف شهم أعتقد أذا گناله نريد نروح يروح ويانه لأن هو من زمان يريد يروح بس ما صارله مجال

- خاف عنده شغل

- ما أدري أنت شوفه

- يلا أحاچيه و أشوفه أذا يروح نطلع باچر أن شاء الله

عفت بابا و صعدت لغرفتي و بقيت رايحه راده ، خاف شهم ميقبل يروح و بابا يكنسل الروحه اوووف يا ربي گعدت و شغلت التلفزيون أشوف المسلسل مالتي تركية كلش حلوه گعدت أتابعها و نسيت الموضوع ، مرت نص ساعة و أجاني بابا گالي تحضري باچر طالعين من فرحتي طفرت على بابا و حضنته ههههه خبله شسوي ، طلع بابا من الغرفة و آني عفت المسلسله و ألتهيت أحضر ملابسي أخذت وياي أحلى ملابس عندي حضرت ملابسي اللي راح ألبسهن باچر قررت ألبس بنطرون لونه ثلجي و وياه قميص وردي يوصل لفوگ الرُكبه و ألبس شال أبيض ، حضرت غراضي و كملت كلشي و أجيت حتى أنام كلش متحمسة للطلعه

عشق
گاعده بالغرفة وحدي و مقهورة كلش ع اللي صار وياي ، أندگ باب الغرفة ..

عشق : تفضل!

أنفتح الباب و طلع خالو علي بقى واگف بمكانه و حچه ..

- عادي أفوت بنيتي؟

- أكيد خالو تفضل

فات و گعد ع القنفه و ناداني أگعد يمه رحت و گعدت يمه ..

علي : بنيتي عشق آني أعتذر منچ ع اللي صار حطيناچ بموقف مو حلو حييل

- لا خالو لا تعتذر أنتو مالكم علاقة ، السالفة ملعوب مبينه

- يعني ما زعلانه من عدنه؟

- بالعكس خالو أصلاً كلش فرحت لأن ما شكيتو بيه ولو للحظة وحدة و ما حچيتو شي أبد

- دحگي بنيتي عشق أمچ هي أختي و أبوچ الله يرحمة من أعز أصدقائي و ثنينهم أعرفهم و أعرف شلون ربوچ و أنتي تربات بدور و زياد يعني لو أشوفچ تسوينها بعيني هم ما أصدگ ، أريدچ تعرفين أنو آني و خالچ جسام بظهرچ دائمًا أحنه ما ردناكم تجون أنتي و أمچ من بغداد علمود نقهرچن لا جبناچن علمود نكون سند ألچن و هالشي مستحيل يتغير

ما عرفت أجاوبه صراحة كلام خالو علي أثر بيه هووايه كلللشش كبر بعيني أكثر من ما هو چبير ، طلع من الغرفة گال راح يروح ينام ، و آني بقيت ما جايني نوم طلعت نزلت جوه قررت أطلع للحديقة طلعت و لگيت فرات گاعد و كالعادة مشغل قصيدة لمأمون النطاح ، چان راچي راسه ع الكرسي و مغمض عيونه و مندمج ويه القصيدة حتى چان يردد وياه الأبيات ، رحت وگفت گدامه و حچبت ..

- عادي أگعد يمك؟

رفع راسه و باوعلي بأستغراب طفه القصيدة و حچه ..

- أي عادي تفضلي

جريت كرسي و گعدت گباله ، أباوعله چان منزل راسه و يلعب بالسبحه اللي بأيده
دگ تيلفونه و جاوب ..

- هلا شهم

- بالمهلي شلونك ضلعي

- بخير حبيبي

- أگلك موجود باچر

- أي موجود وين أروح

- خوش لعد تره باچر جايينكم آني و بيت عمي حسين

- صدُگ والله

- أي والله

- حياكم الله ، و البقيه ميجون؟

- لا والله مشغولين

- اي زين عجل باچر من تطلعون خابرني

- أن شاء الله ، يلا سلم حبيب

- الله يسلمك أنت هم سلم
أحمم ، هذا أبن خالي باچر جايين علينه

- خوالك اللي من البصرة؟

- أي لعد منين

- أيي حلوو

بقينه ساكتين فوگ العشر دقايق الى أن حچيت ..

- مبين كلش تحب مأمون النطاح

- أي صح

- ليش تحبه؟

سكت شوية و بعدين ذب حسره و گال ..

- ميس چانت تحبه

گال هيچ و نزل راسه ما أعرف ليش

- الله يرحمها

سكتته ثنينه وره شويه أندارت ليساري و شفت بزونه واگفه قريب مني و تباوعلي يمممه آني شفتها و طفرت من مكاني و فرات فز على طفرتي

- هاااي شبييچ يولي شكوو؟

من الخوف رحت وگفت وراه و أتمسكت بأيده حييييل

- عشگ هاي شبيچ يولي دحچي شو

أحس أنبلع لساني ما گدرت أحچي آني كلللش هوواي أخاف من البزازين والله من أشوفها عبالك اشوف اسد ، حچيت بالگوه ..

- بـ ببزوونههه بزووونهههه هذيچ شوفهااا عزاااا

- طيح الله حظچ عبالي بيچ شي هي بزونه معوده

- لا مو آني كلش أخاف من البزازين فدوة فرات خليها تروح

- خلص تعاي نفوت جوه ماعليچ بيها

گادني من أيدي و آني أمشي وياه و آني مغمضه و كلساع أريد أوگع و يلزمني ، دخلنه جوه و فتحت عيوني

- عزااا متتت من الخوف

- هههههه ما عباليچ جبانه هالگد ، طلعتي بس لسان

بوزت بوجهه و عفته و صعدت للغرفة و آني لسه مرعوبه يبووو همزين ما چنت وحدي يجوز لو وحدي أموت

رافد
چنت گاعد بالديوانية أگلب بالفون ، دخل فرات خربان ضحك أستغربت هذا شبي؟!

- شبيك؟!
ألووو فرات شبيك يول؟

- ههههههه مابيه شي

- على شنو تضحك؟

- ولا شي

- تخبل الوليد ساعة يضحك ساعة يبچي

- أحترم نفسك

- بعدين

- ولي أريد أنام

- گوم نام بغرفتك تره هاي ديوانية

- مالك شغل ، أطلع و طفي الضو وراك

- ماعندك أوامر ثانية؟

- گلاص مي بلا زحمة

- فرات تنچب لو أجي أكسر هالكرسي على راسك

- أوكي أنچبيت بس سد الباب وراك

طلعت و سديت الباب ، هذا فرات مخبل مابيها مجال

مُهره
صار الصبح و گعدت نزلت لگيت الكُل گاعد و هسه ماما جاي تحضر الريوگ ، حتى شهم واصل ، شنو آني گاعدة متأخرة؟
تريگنه هيچ ع السريع و صعدت لغرفتي أبدل و بابا و شهم طلعو ينتظرونه يم السيارة
بدلت و كملت شلت غراضي و نزلت ، طلعت بره و ماما ورايه ، أول ما طلعت صار شهم بوجهي سلمت عليه و أجيت اصعد بالسيارة بس لزمني من أيدي و رجعني مقابيله ، چان خازرني و يباوعلي بنظرات حاده خوفني أول مره يباوع عليه هيچ

شهم : شنو هاي؟

جاوبته بأرتباك ..

- شـ ششنوو ههاي؟

- شنو هاللبس هذا؟

- شبي لبسي شهم؟

- موزين غيريه

- شنوو؟

- أي غيريه يلا بسرعة گدامي

- حباب شهم والله لبسي مابي شي مو هسه نتأخر

- لا ما نتأخر يلا فوتي غيريه

- والله بس هالمره فدوة شهم

- لا مُهره گتلچ غيريه متروحين للأنبار بهاللبس يا عيني

حسين : يلا بنتي فوتي غيريه ألبسي اي شي غير هاللبس

- أوووف رايحة

رحت لغرفتي غيرت ملابسي و لبست فستان وردي كلوش و لبست وياه نفس الشال الأبيض ما غيرته و لبست حذاء أبيض شويه عالي ، و طلعت و آني مبوزه لأن كلش أنقهرت ملابسي مابيها أي شي ، طلعت و شفت شهم واگف و راچي ظهره للسيارة باوعتله بطرف عيني أول ما شافني أبتسم بس تجاهلته ردت أبينله أني زعلانه من تصرفه هذا ، صعدت بالسيارة ليوره ويه ماما و بابا صعد ليگدام أجه شهم و تحركنه

********

يتبع ...

هااا بروهات شلونكم ، آسفه ع التأخير بس والله أمتحانات و دراسة و ما صارلي مجال ، تخيلو صارلي يومين ما كاتبة كتبت شوية من البارت و عفته
المهم لا تنسون التصويت و التعليق بين الفقرات و متابعة الحساب

18.kij
هذا حسابي ع الأنستا أي شي يصير بخصوص الرواية أبلغكم بي هناك يعني مثلاً ما أنزل بارت او انزللكم تغشوشات كُلشي هناك يعني ضروري تضيفونه + من تضيفونه أكتبولي جينه من الواتباد علمود أعرفكم ، و دمتم بألف خير♥️

سحر الدليمي