رواية عشگ الفرات ( عِندما تَهوى القُلوب ) الفصل التاسع 9 - بقلم سحر الدليمي

شهم يگول :
هي نجمتي المُضيئة التي تُضيئ عالمي المُعتم
هي جوهرتي النادرة التي أخاف أن يسرقها مني أحد
لكنها لا تعلم ...💔!

***

عشق
كاعده أفكر بـ فرات و شنو سالفته اللي گالت عليها أمي
الفضول من البارحة يقرأ عندي مليون أريد اعرف شنو السالفة ، رحت لـ ماما لكيتها گاعده بالغرفة و وحدها الحمدلله دخلت و سديت الباب و رحت كعدت يمها ..

- يلا ماما أحچيلي هسه ماعندچ شي

- شحچيلچ بنيتي شبيچ ؟

- اهوو ماما نسيتي ، سالفة فرات اللي ردتي تحچيلي ياها بس أجت ريان و ما گدرتي تحچين يلا أحچيلي ياها هسه

- يعني ضروري تعرفينها ؟

- أي والله يوم ضروري فدوة أحچي

- زين ، هاي يا حبيبتي فرات قبل 4 سنين چان خاطب بنيه چان حييل يحبها و بمره من المرات و قبل يومين من عرسهم وصلها لبيتهم و نزلت تمشي بين ما جاي تمشي دعمتها سيارة و توفت البنيه و من هذاك اليوم ليومنا هذا فرات أنگلبت اوضاعه و صار كئيب حيل شگد حاولو وياه علي و نجاة يتزوج بس هو ما قبل يگول أحبها و مستحيل أنساها

- ياااا خطية بس معقوله هذا فرات يعرف يحب و لهدرجة هم !

- بنتي أنتي ما تعرفين فرات فـ لا تحكمين عليه گُبل

من سمعت هالحچي كُلش أنقهرت عليه معقوله كل هالشي چان ضامه بگلبه و تصرفاته و عدوانيته هاي من ورا هالشي
بس مهما يكون يضل مغرور و متعجرف و مكرووه هالشي ميغفرله عندي
عفت أمي و رحت لغرفتي حتى أدرس و حاولت أنسى السالفة

فرات
وصلت البيت ساعة 12 بالليل دخلت و گعدت بالصالة بس ما فتحت الضو خاف أحد يحس عليه و يشوفون راسي و أدخل بسين و جيم و مابيه حيل
ضليت گاعد فوگ النص ساعة حسيت بعطش فـ گمت حتى أشرب مي و فجأة ...

عشق
بقيت أتگلب بفراشي مثل السمچه مو گادره انام مع انو عندي دوام باچر و لازم أنام حتى ما آكل خـرا
گمت من فراشي و نزلت جوه صرت أفتر بالبيت مثل المخبله دخلت للصالة چانت ظلمه و فجأة أصتدمت بشخص و وگعت بالگاع أحس رجلي ألتوت من وگعت ما أچذب عليكم توجعت شويه مو هوايه ، راح فتح الضوه و أجه يحچي وياي و آني مدنگه راسي ما شفته بس عرفته من صوته فرات ..

- ألله الله خوما صار بيج شي شو شبيها رجلچ

- آخخ لا مابيها شي ما تأذيت

رفعت راسي باوعت عليه و كالعادة چان لابس بنطرون أسود و فانيله سوده نص ردان ضب بارزه جسمه ، بس أنصدمت من باوعت لراسه چان حاطله لزگه شوي چبيره و الدم ينزل منه ..

عشق : يااا عزاااا راسككك رااااسكك دينزف صخاااام

فرات : أششش صوتچ يالكعبة هسه تلمين علينه أمة لا أله ألا الله كُلها

- آسفه بس أنصدمت من شفت الدم راسك يرادله تضميد

گام وگف على حيله و مدلي أيده حتى أگوم ..
لزمت أيده و گمت ، گال ..

- ميحتاج هسه أغسله

- لا شلون ميصير أوگف لحظة ..

رحت للمطبخ جبت الحبشكلات مال الجروح و هالسوالف
أجيت حتى أشيل اللزكه اللى على راسه بس مجاي ألوحه هو كلش طويل و آني قزمه خررب حضيي

- أأأ ممكن تگعد حتى أگدر أوصل للجرح لأن مجاي ألوحه

گعد ع القنفه و گعدت آني بصفه شلت اللزگه عن الجرح و چان مشگوگ حتى خياط مخيطيه گلبي انمرد آني من أشوف الجروح مدري شيصير بيه بس تحملت
بديت أنظفله بالجرح و هو مغمض ما فتح عيونه أبد

- خوما دتتوجع ؟

- لا

- زين

بين ما دا أنظفله بالجرح شعره نزل على گصته و صار يعيقني حاولت أوخره بس احس اني أستحيت ..

- أأ شسمه شعرك ، شعرك ممكن توخره

- أي

رفعه ليورا و كملت و حطيتله لزگه
ما سألت شنو سالفة هالجرح هو صح صار عندي فضول بس ما تجرأت أسأله

( أي عفيه جاي تتخيلون المشهد مو😂🌚 )

گام و كالي ..

- شكراً تعبتچ

- العفو ما سويت شي

گمنه و كلمن راح لغرفته تمددت بفراشي و سالفة فرات بعدها بأفكاري و بعدين نمت و ما حسيت على شي

فرات
طبيت للغرفة علساس تا أنام بس ما جاني نوم
نزلت جوه بالصالة فتحت التلفزيون أتابع فلم بعدين طفيته و ما أدري شلون نمت ع القنفه

مُهره
صار الصبح و كعدت نفس الروتين مال يوميه طلعت بره حتى أگول لسجاد ينتظرني لأن شوي أتأخر صار بوجهي شهم و بقى صافن بيه حتى سلام ما سلم ..

- هلووو شهومي

- هااا ، هلا ، شسمه اليوم آني آخذچ للجامعة و هم أجيبچ منها لأن سجاد طلع لبغداد عنده شغل

- هااا يلا ماشي بس تره شويه أتأخر

- عادي على راحتچ أنتظرچ العمر كله

- هههه ماشي

رحت أتحضر و بقى شهم ينتظرني بالهول كملت و نزلتله و طلعنه للجامعة و كالعادة چان مشغل أغنية رومانسية و يغني وياها هاي كل ما نطلع سوه يسوي هيچ هههه

( و الغبية ليهسه ما مفتهمه قصده🙂💔 )

علي
گعدت الصبح و نزلت جوه تا أگعد بالصالة دخلت و تفاجأت من شفت فرات نايم ع القنفه شوكت جه و ليش ما خابر و گال آني جاي مدري جيت گعدته ..

- فرات گوم أبني ليش نايم هينه فراات

- أي گعدت هلا يابة

- هلا بيك ، فراات شنو هاي يول شبيه راسك

- أنلاصت

- شنو شگلت ؟

- ما گلت شي أبويه

- دحچي أبني شبيه راسك شصايرلك

- ما صاير شي يابة تكاونت ويه شله سرسريه غادي بالبصرة و أنفجيت براسي

- متأكد ؟!

- أي يابة عجل أچذب

- اي غير تدير بالك وليدي

- صارت بعد حجي

- خوش عجل گوم غسل و تحضر تا توصل بنت عمتك للكلية يلا وليدي

- صار حجي

گمت غسلت و صليت و بدلت و گعدت تا أتريگ جت أمي و الكل و فتحولي تحقيق اله اول ماله تالي بالگوه قنعتهم و سديت السالفة ، كملت ريوگ و گعدت أنتظر عشگ بالصالة اللي ليهسه بعد ما نزلت مادري شجاي تسوي
بين ما آني گاعد أگلب بالفون جتني أخت رُسل ..

ريان : هلو فرات شلونك

- أهلين

- الحمدلله ع السلامة

- الله يسلمچ ، بلا زحمة گولي لعشگ خل تستعجل آني أنتظرها بالسيارة

گمت و عفتها و طلعت ، هالبنيه سبحان الله ما أرتاحلها ما أعرف ليش و لا عبالك رُسل أختها حييل تختلف عنها

عشق
كملت و نزلت جوه ما لگيت فرات بالبيت كلها معقوله هذا عافني و راح ؟! يسويها والله ، جتني ريان گالتلي ينتظرتي بالسيارة عفتها و طلعت لگيته واگف بصف السيارة أجيت حتى أصعد من وره و باعولي بتك عين ..

عشق : اعرف أعرف أنت مو سايق الخلفوني و لازم أگعد ليگدام و أذا ما گعدت متوصلني و ماكو روحة للجامعة

فرات : عفيه صايرة تفتهمين

وگفت و تخوصرت و باوعتله بتك عين و گلت ..

- هييي شتقصد يعني آني ما أفتهم ؟

- يابة ما گلت ما تفتهمين أصعدي فضيني ماضل وكت

صعدت و تحركنه للجامعة ، چان مشغل قصيدة لمأمون النطاح بدوية كلشي ما افتهمت عليها طگت روحي و گتله ..

- هسه هاي شلون تفتهم عليها ؟

- شنيه !

- القصيدة اللي مشغلها

- تره عربية مو هندية تا ما أفتهم عليها

- أعرف بس بدوية مينفهم كلشي منها

- هو أنتي حضرية شمفهمچ بهالسوالف

سكتت ما جاوبته لحد ما وصلنه الجامعة نزلت و هو راح للشغل

صگر
أثناء ما آني بالدوام جتنه أخباريه عن بيت موجودين بيه الأشخاص اللي جاي نلاحگهم ما متأكدين من الأخبارية لذالك ضلينه يومين على حد نشتغل على مصدرها لحد ما تأكدنه انو المعلومات اللي وصلتنه صحيحة و فعلاً موجودين ذوله الأشخاص بهالبيت بس بديالى يعني لازم بعد يومين نروح لديالى ، قررت أرجع للبيت أرتاح و أخلي الولد هم يرجعون لبيوتهم و نلتقي هنا بعد يومين
وصلت البيت دخلت و لگيت رُسل بوجهي ..

- شلونها گلبي

- يااا صگر ، هلا يروحي

تقدمت عليها تا أحضنها و أبتعدت عني ما خلتني ..

رُسل : لا صگر هاي شبيك احنه بره عيب من العالم

- و شنريد من العالم تعااي

- أشو أنت صاير سخيف و متستحي هااا ؟

- هو آني من أشوفج أنسى الاولي و التالي تريديني أضل محافظ على أخلاقي ، هسه ع الأقل دنطيني بوسه شبيچ

- ههههه لا يروحي بعدين شبيك ، هسه ما گتلي شو جاي اليوم ؟

- بعدين أحچيلچ خل نفوت هسه

مُهره
كملت محاظرات و خابرت على شهم گالي آني قريب أطلعيلي بره
طلعت و وگفت أنتظره و أجاني ولد من الطلاب الويانه مو راحة أبد ضل يذب عليه حچي و يتغزل و كل شوي يتقرب عليه و آني أبتعد الى أن جرني من أيدي و آني صحت بأعلى صوتي و هنا وصل شهم و نزل من السيارة هجم عليه و صار يكتل بيه دماه دمايه ما خله عظمه سالمه بجسمه و فوگ كل هذا يغلط و يفشر عليه و آني اصيح اريده يعوفه لا يبتلي بيه ..

- شههمم فدووة گوم عوفه شههمم لا تووصخ أديك بييه گووم فدووة يا الله شههمم

شهم : و الحُسين أذا اشوفك تتعرضلها مرة ثانية انهيك مو بس أكتلك أموتك و الخلقك حيووان سااقط

اجه عليه عيونه صايرات حمر من العصبية و أديه كلهن دم من هذا الساقط
جرني من أيدي و صعدني بالسيارة بدون ميحچي و لا كلمة
چان ساكت و يسوق بسرعة جنونية و آني خايفة و أبچي ..

- شهم فدوة خفف السرعة لا نسوي حادث هاي شبيك

چان معصب و صار يصيح يحچي و يضرب ع الستيرن لدرجة خلاني أخاف منه

- شلون يتقربلچ الساقط شلون يحچي وياچ و يمد أيده عليچ شلللوون والله لو أدري ذابحه صوجي آني ما ذبحته هالساقط

- شهم والله آني مالي علاقة بيه حتى ما أعرفه هو أجه عليه و صار يضوجني وداعتك ماعليه بيه

باوعلي و أنتبه عليه شگد خايفة خفف السرعة و حچه بهدوء ..

- أدري بيچ أنتي مالچ علاقة مُهره آني واثق بيچ و لو أشك بكل العالم بيچ ما أشك بس اللي قهرني و عصبني شلون تجرأ عليچ هالحيوان ، شو باوعي عليه لا تخافين مني مُهره آنى عصبيتي مو عليچ آسف أذا خوفتچ

هدأت من سمعت كلامه و سكتنه ثنينه .

شهم
چنت رايح لمُهره للجامعة خابرتها كتلها أطلعيلي بره آني قريب شوي و وصلت و أشوف ذيچ الشوفه اللي فورت الدم بعروگي و صرت ما أشوف كدامي ، واحد حيوان واگف ويه مُهره و جاي يجرجر بيها فار دمي و نزلتله لعبت بيه طوبه كسرته تكسر شلون يتقرب منها و هي أليه ملكي آني و بس أموت و أفقد أعصابي أذا أشوف أحد يتقربلها ، عفته و رحتلها شفته تبجي عتيتها من ايدها و صعدتها بالسيارة آني چنت معصب حييل أحچي و أصيح أنتبهت عليها چانت كلش خايفة و ترجف هدأتها و حاولت أنسيها السالفة
ما أخذتها للبيت رحنه لكافتريا ..

- هاي وين جبتني ؟

- أنزلي وياي ترتاحين شوي

- لا شهم خلينه نرجع للبيت فدوة تعبانه

- زين راح أنزل اغسل و أجيبلچ شي تشربينه شويه تهدأ أعصابچ

- بكيفك

رُسل
چنت بالغرفة جاي أرتب بالملابس و صگر گبالي مدد ع الجرباية و راچي ظهره ع التاج و صافن عليه أبتسمت و گتله ..

- شبيك تدحگ عليه

صگر : جاي أشوف شگد الله أبدع بيچ من خلقچ

- ههههه لهدرجة آني حلوه

- هو غير تشگين شگ و مُحمد

- هم أنت تشگ شگ حبيبي

- منيلي يحضي شو تراني أچلح أملح

- هههههه كل هالوسامة و الطول و الجسم الحلو و الهيبة و تگول أچلح أملح

- يلا المهم بعيونچ حلو البقية لو يشوفوني بعيونهم ثور ميهمني

- هههههه شعليك سوالف يصگر
هسه ما گتلي ليش جاي اليوم ؟

- تعاي يمي و أحچيلچ

- يعني متكدر تحچي و آني هنا

- نوو

رحت ليمه گعدت بصفه و هو جرني لعنده حضني و خله راسي على صدره و صار يلعب بشعري

رُسل : يلا حبيبي أحچيلي

- جيت لأن بعد يومين رايح لديالى

گمت عنه و دحگت عليه بأستغراب و رجع حضني و كمل ..

- عدنه عملية بديالى و لازم نروح حبيبتي

- صگرر آني ما متعودة تطلع خارج المحافظة هو من تروح لخوالك يضل گلبي نار عليك انوب تروح لديالى و بعملية هم شلون بيه

- شسوي يا عمري غير شغلي هذا

- زين شگد تضل هناك

- مدري ، شوكت ما نخلص نرجع

گمت عنه لميت شعري و لبست شالي تا أطلع

- هااا وين رايحة ؟

- رايحة اشوف ريان

- و تعوفيني ؟

- شوي و أجي

طلعت و آني مقهورة و ضايجة على طلعة صگر لديالى ما أعرف بس گلبي ما مرتاح
رحت لغرفة ريان دخلت. و لكيتها تحوص رايحة راده و تفرك أيد بأيد مبينه متوترة و معصبة من شي ..

- هاي شبيچ خير ؟

- راح أموت رُسل راااحح اموووت

- خير يا ستار شصاير

- هاي هااي عشق ناويه تاخذ فرات مني و تخليه يحبها هالحيه

- ليش شمسويه عشق

- يولي البارحة نزلت تا أشرب مي و شفتهم گاعدين بالصالة وحدهم و جاي تداويله بجرحه لچ تخبلت والله شتفسرينها هاي هااا ؟

- تره عادي و أذا داوتله جرحه يعني ألا تحبه او يحبها لا تضلين تمسلتين

- أوووف رُسل انتي ما جاي تفهميني و مستحيل تفهميني

- والله أنتي اللي ما جاي تفتهمين يولي فرات لا مدحگ عليچ و لا مدحگ على عشق و لا على غيرچن چم مره أگولچ هو رافض هالشي قافل على گلبه بقفل ماله مفتاح افتهمي عاد

عفتها و طلعت هاي أختي هووواي تحلم أحلام ورديه شگد حاولت افهمها بس معانده و ما تفتهم

سناء
أحس گلبي مشتعل بنار على عباس من البارحة طلع و لحد هسه ماكو أدگ عليه يرفضه ميجاوب رحت حتى أحچي ويه بكر بلكي الله يشوفه وين ..

- بكر

- هااا

- وليدك عباس ما رجع من البارحة فدوة كوم شوفه وين

- لا أگوم و لا أشوفه وين خليه يولي الله لا يرده

- لاااا أبو عباس لا تگول هيچ آني وياك عباس غلط ويه أبن عمته بس انت ميصير تعامله هيچ و تقسى عليه هذا يضل وليدك ميخالف عاقبه على غلطه حتى ما يعيده مره ثانية بس لا تگطع بيه

- اوووف زين زين گايم أشوفه وين بس هذا أبنچ يرادله تربية من اول و جديد

ريان
من البارحة افكر باللي شفته شلون فرات و عشق كاعدين سوه و تالي الليل و هاي الحيه لازگه بيه و تداوي بجرحه و هو مكيف بسيطة يعشق أن ما طلعتچ من هالبيت انتي و أمچ ما يكون أسمي ريان آني اعلمچ

رُسل
گاعدة بالصالة و يمي لارين بس تبچي ضوجتني حيل فوگ ما آني ضايجة جربت كلشي وياها و ما سكتت آخر شي عصبت عليها و صحت بيها سكتت و ابتعدت عني كعدت يم التلفزيون و تدحگلي ببرائة ، طلعت عمتي من المطبخ مستغربة

- خير رُسل شبيچ تصيحين ع البنيه

- عمه ضايجة و مقهورة حييل

جت گعدت يمي و دارت وجهي عليها ..

- ليش بنتي خير شبيچ منو مضوجچ أحچي

- صگر عمه

- ليش شمسوي وياچ هذا ، عاد مو ضابط و يشوف نفسه علينه والله ارجع اربيه من جديد ليش مضوجچ احجي

- لا عمه هو ما سوالي شي خطية بس گالي عنده طلعة لديالى عدهم عملية هناك و آني ضجت

- أي ليش تضوجين يا بنتي هذا شغلة و أنتي تعرفينه كلش زين

- عمه والله أعرفه بس آني ما متعودة يطلع خارج المحافظة و يعوفني حتى من يطلع للبصرة گلبي يضل نار عليه الى ما يرجع

- ميخالف حبيبتي أستهدي بالله و سمي بالرحمن و لا تخافين صگر هذا شغلة و ماعليه شي أن شاء الله ، هسه يلا گومي شوفي بنتچ و لا تعصبين عليه أنوب خطية هاي طفلة ما تفتهم أخذيها على ابوها بلكت هو يشوف شبيها

گمت اشوف لولو و أراضيها ادري قسيت عليها بس چنت ضايجة و ليهسه ضايجة شلتها و أخذتها على صگر چان يصلي بالديوانية گعدتها ع القنفه و أنتظرته يكمل ..

صگر : هااا شكو شبيها بنياتي شو چنها زعلانة
شوو دحگي عليه شبيچ بابا ليش زعلانه و تبچين هاا

رُسل : زعلانه لأن ابوها راح يعوفها و يروح لديالى

- ميخالف ارجعلها أن شاء الله

- اي زين

- راح اخذها افررها بالسيارة تتونس و تنسى الزعل كله

- أي بس لا تتأخرون

- بدلي تا تروحين ويانه أنتي هم

- لا مالي خلگ آني

أخذها صگر و طلعو هاي هيچ كل ما تزعل و تعلق بالبچي ياخذها يفررها بالسيارة من هسه يريد يعلمها ع التخامة ( الطلعات الهواية )

********

يتبع ...

لا تنسون التصويت و التعليق و متابعة الحساب و أذا عجبتكم القصة شاركوها

18.kij
هذا حسابي تعالو خنسولف هناك و يجوز أنطيكم تغشوشات هم🌚

سحر الدليمي