رواية عشگ الفرات ( عِندما تَهوى القُلوب ) الفصل الحادي عشر 11 - بقلم سحر الدليمي

مُهره تگــول :
يعين الله گلبي الرچيچ لو شافتك عيوني .

***

عشق
گعدت الصُبح لگيت الكُل مخبوصين و البيت صاير هوسه ، لأن أهل خالة نجاة جايين من البصرة ، صرت أعرف طبع خوالي من يجيهم ضيوف لازم ينخبصون حتى لو ميسون شي بس لازم البيت ينخبص و تصير هوسه ما أعرف ليش ههههه
المهم نزلت جوه لگيت الكُل متريگين الأ فرات هستوه جاي يتريگ ، أجيت گعدت ع السفره

- صباح الخير

فرات : صباح النور

- بلا زحمة بس أنطيني قوري الچاي من يمك

- أي تدللين ، خوما حلمتي بالبزونه الخرعتچ البارحة

گال هيچ و أبتسم ...

- أوووف لا تذكرني ، بالگوه نمت البارحة

- ليش؟

- كُل ما أباوع لمكان أتخيلها بي

- هاي لهدرجة تخافين من البزازين؟!

- أي والله كُلش

بين ما داصب الچاي ما أعرف شلون تحركت أيدي و بدال ما ينصب الچاي بالكوب أنصب على أيدي و چان حاار ..

- آخخ أيدييي

فرات : هاااي شبيييچ؟

جاوبته و الدموع بعيوني ..

- أيدي أحترگت بالچاي

- أي غير على كيفچ ، شو أشوفها
شو گومي وياي

- وييين؟

- أمشي بسرعة

أخذني للمغسله و جاب معجون أسنان و حط على أيدي ، هو صح مكان الحرگ مو چبير بس يوجع

- هسه شوي و معجون الأسنان يبرد عليها لا تخافين

حاچيته و آني أبچي ..

- معجون أسنان ، أنت متأكد؟

- لا تبچين شبيچ فطيره ، أي معجون أسنان ، من چنت صغير أذا أنلچعت أيدي أمي تحطلها معجون أسنان و تبرد عليه ، يعني عن تجربة لا تخافين

صگر : فرات آنـ .. ، سلامات سلامات هاي شبيچ عشق؟

فرات : أحترگت أيدها بالچاي

- حطيتلها معجون أسنان؟

- أي حطيتلها

- أي خوش عجل هسه تهود لا تخافين ، فرات عود وصل أمي للمدرسة آني عندي شغل بالمعرض سابقك

- أن شاء الله
عشگ شلونها أيدچ هسه؟

- أحسها بدت تبرد شوي

- أي زين عجل ، آني رايح تأخرت ، دحگي وره نص ساعة أغسليها و بمي بارد شوي

- تمام

عفت عشگ و رحت للصالة لگيت أمي مكمله

- ها يمه نمشي؟

- أي حبيبي

صعدنه بالسيارة و مشينه

- أي يوم مو گتلچ خل أجيبلچ سيارة و أنتي تروحين و تجين بكيفچ بيها متحتاجين أحد يوصلچ

- ها يعني بزعت مني؟

- لا يا عمري مو قصة بزعت منچ بس سيارة على حسابچ أحسلچ

- ولك آنـه شمفهمني بالسيارات

- هههههه أروح فدوة لبنت الجنوب و سوالفها التنگط عسل

- يمه أسم الله عليك وليدي

شوي و وصلنه المدرسة ..

- و هاي وصلنه ، تفضلي ست نجاة

- يلا يمه مع السلامة

- الله وياچ ، أگفي يوم لحظة

- ها ماما؟

- يوم الأوراق النطيتچ ياهم وين محتاجهن اليوم؟

- والله جوه بالمكتب ، هسه أجيبلك ياهن

- لا لا أگفي جاي وياچ ، زحمة تروحين و تردين عليه

نزلنه آني و أمي للمدرسة ، و هاي أول مره أدخلها ، توجهنا للمكتب

سُهى : ريييااام رييام

- ها و ثول شبيچ

- منو هذا الشيخ الصاك اللي ويه ست نجاة تعرفينه؟

- وينه؟

- هذاك يولي

- هااا هذا أبنها يحضي

- اووويلي يمه شنو هذا ، شوف الطول شوف الجمال و الهيبة وله عيونه العسلية خررب يموتن أنوب لابس زي عربي ، أگلچ ست نجاة ما تريد چنه؟

- أي تريد بس تريد وحدة براسها حظ مو وحدة عايده السنة و گاضيتها تسخت و تدحگ ع الحلوين ، أمشي كدامي لا أشگگ هالكتاب على صماخچ الفارغ

نجاة : هاك ماما ، هذني مو؟

- أي هنه ، يلا آني رايح ، رايده شي؟

- لا يمه سلامتك ، سوق على كيفك عود

- حاضر

طلعت من المدرسة و توجهت گُبل للمعرض ، تأخرت حييل هسه صگر گام يلطم

***

شهم
ماشين في أمان الله ، و آني كلساع أباوع لمُهره بالمراية بس من تصير عينها بعيني تدير وجهها عني ، أعرف يمكن زعلتها بس شسوي آني أغار عليها صح هي متدري بس آني كلش أغار عليها و ماريد أحد يعاينلها بالموزين
وره شوية رجعت باوعتلها شفتها وجهها مگلوب لونه أصفر و أحسها مو تمام

- مُهره أنتي زينة؟

ألتفتلها عمي حسين

حسين : مُهره شبيچ بنيتي

مُهره : شهم فدوة نزلني هنا أريد أتقيأ

بسرعة وگفت السيارة على صفحة و نزلت ، راد ينزل وراها عمي حسين بس ما خليته
نزلت وراها و أخذت وياي بطل مي وگفت أنتظرها
أجتني وجهها أصفر كلش ، أعرف هي متتحمل السفر و دائمًا يصير وياها هيچ ، بس حيييل خفت عليها

- مُهره هااا شبيچ؟

- دايخة شهم

- زين زين هاچ أشربي مي

أخذت المي و شربت ، گدتها و أخذتها للسيارة

- يلا صعدي على كيفچ

حسين : ها بنيتي شلون صرتي هسه؟

- الحمدلله بابا

سليمة : أي يا ماما مو گتلچ لازم تتريگين

- ما أگدر ماما

حسين : يلا تحملي حبيبتي ماضل شي و نوصل

شهم : مُهره أذا تحسين نفسچ موزينة عادي نبقى واگفين لحد ما تصرين زينة

- لا لا آني صرت زينة خلينه نمشي

- زين

سديت الباب و رحت صعدت و كملنه طريقنه

***

عشق
كملت ريوگ بعد ما صارلي سم و لميت المواعين و أخذتهن حتى أغسلهن
أجتني رُسل طايره ..

- أگفي أگفي ، هاي شتسوين؟

- أغسل المواعين

- شلون تغسلينهن أنتي متشوفين أيدچ شلون ، عوفيهن آني أغسلهن

- لا حُبي عادي آني أغسلهن

- عشق لا تعانديني يلا شو وخري

- اوكي لعد آني راح أروح أگعد ويه لولو و أدير بالي عليها

- ماشي عمري براحتچ

رحت لغرفة خالو علي و خالة نجاة لولو گاعده تلعب هناك ، منگدر نخليها وحدها بالغرفة فوگ لأن هي تمشي و نخاف لا توگع
فتحت الباب و دخلت ما چانت موجودة بس ألعابها بالغرفة ، طلعت شفتها بالصالة ماكو ، شفت الباب اللي يطلع للحديقة مفتوح طلعت و لگيتها تلعب بالحديقة ، رحت گعدت يمها و صرنه نلعب سوه
وره شوي و أجت ريان وگفت گبالي و تباوعلي بنظرات غريبة

- شبيچ؟

- مابيه شي بس جاي أفكر شلون الفلوس وصلن لغرفتچ!

- أي صيري محققه و حققي بالسالفة و أعرفي شلون

- ما حاجة أحقق ، أعرف أنتي اللي بگتيهن

- أولاً أحترمي نفسچ آني ما أبوگ ، ثانياً أنتي ليش هيچ تسوين وياي شكو بيني و بينچ؟

- أكـرهــچ

- أوكي لا تحبيني ، بسسس لا توصل بيچ الحقاره تتهميني بشي آني مالي علاقة بي ، تدرين صرت متأكدة أنو أنتي اللي وره السالفة الصارت ، لا تعيدينها مره ثانية و ألا راح أندمچ صدگيني .

نفخت بوجهي و عافتني و راحت ، طبعاً آني حبيت أتشاقه وياها شويه فـ حطيت رجلي گدامها و هي دتمشي تعثرت و وگعت ..

- آخخ رجلي ، هاااي شبيييچ؟!

- شبيه آني كلشي مابيه ، أنتي اللي متشوفين

***

علي : جاي نفكر آني و عمكم نتعاقد ويه خوالكم بما أنو همه شركة نقل

صگر : ليش يابة و الشركة اللي گلتو نتعاقد وياها

جسام : يابة ذوله شو ما أرتاحيتلهم ، خوالكم أحسن نعرفهم عز المعرفه أحسن من الغريب

علي : أي و بما انو همه جايين اليوم فـ نفاتحهم بالموضوع و نشوف رأيهم
بصراحة آني ماريد الشي اللي صار هذيچ المره يتكرر ، شفتو شگد خسرنا من وره ناس وثقنه بيهم و أحنه كلشي منعرف عنهم فـ آني أريد ناس ثقة و أمان نشتغل وياهم

صگر : أي والله يابة صحيح مابينه حيل تتكرر نفس المشكلة ، آني وياكم خوش فكرة

علي : و أنت فرات شتگول شو ساكت؟

فرات : أللي تشوفونه يابه آني عادي ماعندي مشكلة

جسام : خوش عجل أنحسم الموضوع

***

مُهره
نمشي و الطريق كلش طويل صارلنه هوواي نمشي
آني من الملل فتحت الفون و دخلت ع الأنستا رحت على حساب فرات ما چنت أعرف عنده حساب بس من أجه علينه نطاني ياه و نسيت اشوفه دخلت عليه و چان حسابه عالي بي 50k بس تفاعله بي قليل ما منزل ستوري و آخر بوست منزله قبل سنة ، سويتله فولو و صرت أگلب بي ، هواي اله صور هو و شهم سوه و حتى مسويله تاگ و آني أول مره أعرف شهم عنده حساب ع الأنستا ، دخلت عليه و سويتله فولو و أيضاً چان حسابه عالي ، گعدت أگلب بي ألى أن مليت طفيت الجهاز و نمت ما حسيت

شهم
داسوق و أحس أني دخت ما أعرف شبيه خففت السرعة خاف نسوي حادث ، أنتبهلي عمي حسين ..

حسين : شهم ، خير بويه شمالك؟!

- لا مابيه شي عمي بس شويه دخت ع الأغلب لأن تأخرت البارحة بالنومة و گعدت من الصبح

- زين أوگف و أنزل آني أسوق بمكانك

- لا عمي ميحتاج آني أسوق

مُهره
نمت و ما حسيت ألا بعد ساعتين فتحت عيوني و باوعت هاي أحنه وين صايرين ، سألت و گالو وصلنه الأنبار ، وصلنه للسيطرة اللي عند بوابة المحافظة سيطرة الدخول ، وگفونه و سألونه منين جايين و گاللهم شهم من البصرة رحبو بينه ترحيب كلش قوي و أنطونه ضيافة كيك و عصير ، تعاملهم كلش حلو و لطيف ، وگفنه على صفحة و كملنه اجراءآت الدخول بما أنو أحنه عائلة و أول مره ندخل المحافظة
كملنه و طلعنه من السيطرة ، أول مدخلت الأنبار أنتابني شعور غريب و حلو بنفس الوقت ، مو يگولون ممكن تحب مدينة كاملة بسبب شخص فـ آني حبيت الأنبار كلها بسبب فرات

مشينه مسافة هم كلش طويلة و كلساع تلاگينه سيطرة و هم نفس التعامل اللطيف ، بس أكو بعضهم طافره رواحهم و تحسهم يردون يتعاركون ويه أي شخص يحچي وياهم ، و شهم ما شاء الله عليه نفس الشي ميتحمل احد ينتر بيه خفت لا يتعارك وياهم ، بس الحمدلله سيطر على أعصابه
شوي و گال شهم وصلنه القضاء اللي همه بي بس وگف على صفحة گال تيه الطريق و مجاي يندل بيتهم ، أتصل على فرات حتى يدلي ..

- ها ضلعي شلونك

- هلا الحمدلله ، وين صرتو؟

- وصلنه بس تيهت بيتكم مجاي أندله

- زين ضل وياي ع التيلفون آني ادليك

- لا فرات أذا تگدر أنت تعال ، لأن آني دايخ و أذا گمت تشرحلي و اطب بشارع و اطلع من شارع أحتمال تلگاني بالسعودية

- هههههه خرب يومك لهدرجة مقفل ، زين زين وين أنتو هسه؟

- أحنه يم مقهى الـ •••••

- زين جايكم

نهيت المكالمة ويه شهم و گمت

- يابة آني رايح

علي : هاا وين

- بيت خالي وصلو و شهم متيه الطريق فـ رايح أجيبهم

- أي زين آني و عمك هم رايحين للبيت

صگر : و آني رايح أجيب أمي

طلعنه من المعرض سوه و آني توجهت لربعنه

***

مُهره
بقينه واگفين ننتظر و نزل شهم جابلنه عصير
شوي و وصل فرات نزل و أجه يمشي علينه نزلو بابا و شهم و تسالمو ، و أجه سلم علينه ، بعدين صعدو بالسيارات و گال فرات خليكم ورايه
طلع و طلعنه أحنه وراه ، مسافة و وصلنه بيتهم نزلنه و أستقبلونه كُلهم بالباب
الولد نزلو الغراض و آني رحت أركض لـ عمه نجاة حضنتها گُبل و سلمت عليها ، كلش مستاقتلها ، دخلنه جوه و گعدنه و تعرفت ع البنات رُسل زوجة صگر و عشق بنت عمته
بقينه نسولف آني و عشق هواي حبيتها هي محبوبه الصراحة أرتاحيتلها ، بس رُسل ما أعرف شبيها أحس كلامها ثگيل وياي ، هي صح تعاملها حلو وياي بس مو مثل عشق ما أعرف شبيها
شوي و صاحولنه ع الغده گعدنه كُلنه سوه ، همه عادي عدهم الكُل يگعد ع السفره أذا چانو گرايب يعني مثلنه تقريباً ، چان الغده دليمية يعني معروفه ، هو صح أحنه هناك بالبصرة هم نسويها بس مو مثل الطريقة الأنبارية و من أيدين الدليم نفسهم تطلع فد شي روعه
شهم ما قبل يتغده يگول ما أشتهي و راح ينام بالديوانية ، أنتبهتله مبين التعب علي ما أعرف شبي

كملنه غده و الچاي و هالسوالف و اجتي عمه نجاة گالت خل أدليكم على غرفكم حتى ترتاحون چانن غرفتين وحدة لـ ماما و بابا و وحدة لـ شهم

عشق : مُهره عمري أنتي تجين تنامين يمي بالغرفة عادي مو؟ ، أذا ميعجبچ آني أروح أنام يم ماما و أنتي أبقي بغرفتي

- لا يمعودة عادي أنام يمچ حتى نتونس و كذا

- ماشي لعد أمشي نروح

صعدنه للغرفة و تذكرت شهم ، أستأذنت من عشق و نزلت أشوفه ، دخلت للديوانية ، چان نايم ع القنفة و مغطي وجهه بالشماغ مالته هاي عوايده ميحب ينام الا يغطي عيونه
ما أجه من گلبي أگعده خطيه تعبان گلت خلي ينام
دخل فرات للديوانية و آني مدري شصار بيه من دخل مدري أحير بشهم مدري أحير بگلبي الخفيف

فرات : هاا شعندچ هينه

- شسمه أجيت أشوف شهم

- هو صدُگ شبي شهم شو مو على بعضه؟

- ما أعرف والله بس يگول دايخ و تعبان شوي

تقدم علي فرات حتى يگعده ..

فرات : شهم ، گوم أگعد شو ، شهم ألووو

وخر الشماغ من على وجهه و عدل شعره المخربط و باوع لفرات ..

شهم : هااا شكو!

- لا ماكو شي بس گوم نام بالغرفة أحسلك

- لا ميحتاج عادي هنا أنام

- دگوم يول غادي ترتاح أكثر

گام شهم و راح ويه فرات يدلي ع الغرفة

و آني رحت لغرفة عشق گعدنه نسولف شوي و بعدين نمت لأن هواي تعبانه طريق البصرة و الأنبار كلش يتعب

شهم
وصلنه بخير و سلامة الحمدلله ، بس آني اللي ما أعرف شبيه راسي أحسه يريد ينفجر من الوجع ، أول مره بحياتي يوجعني هيچ ، غده ما تغديت دوبني ذبيت نفسي و نمت
گعدت الساعة بالأربعة العصر صليت و رحت گعدت ويه الأهل

حسين : ها شهم شلون صرت بويه؟

- الحمدلله عمي ، أحسن

جسام : خير يابة شبيك؟

- لا عمي مابيه شي بس تعبان شويه من الطريق

علي : وليدي أذا تحس نفسك موزين روح للدكتور

- لا عمي شسالفة ماله داعي الدكتور

رافد : معودين تره كلشي مابي هذا بس يتدلل

- الوادم گاعده چان عرفت شحچي وياك ولك

- هههههه يلا بعدين ترد عليه

مُهره
گعدت العصر ما لگيت عشق بالغرفة گمت و نزلت جوه لگيت الكُل مجتمعين بالصالة و يسولفون و عايفيني نايمة وحدي فوگ مثل الميته
باوعت چان شهم موجود يسولف و يضحك ويه الولد
يبين أحسن الحمدلله
گعدت ويه عمه و البنات و صرنه نسولف ، شوي و گام شهم طلع بره للسيارة ، أستغليت الفرصة و گمت لحگته حتى أطمئن عليه أكثر
طلعت بره لگيته ما أعرف شنو ديدور بالسيارة

- شهم

رفع راسه و ألتفتلي ، سد الباب و أجه عليه ...

- هلا مُهره خير رايده شي؟

- لا بس أجيت أسألك شلون صرت؟

- الحمدلله زين

- الحمدلله ، خوفتني عليك يعني أقصد خوفتنه عليك

أبتسم أبتسامة برزت أسنانة ، و باوعلي بنظرة ما عرفت افسرها ...

- صدگ خفتي عليه؟

- أي والله خفت عليك لأن اول مرة أشوفك هيچ

- و آني هم خفت عليچ هواي اليوم

- عاد آني متعودين عليه كلما أطلع بطريق طويل يصير بيه هيچ

- مو فطيره غير ههههههه

- شههممم عاد لا تبلش تره ازعل

- هههههه زين زين كلشي و لا زعلچ ، يلا تعاي نفوت جوه

دخلنه للبيت و رحت ويه البنات و شهم راح ويه الولد و بابا و عمو جسام و عمو علي ، حسب ما فهمت راحو للمعرض عدهم شغل
بقينه أحنه البنات آني و عشق و رسُل سوه بس ريان ما چانت تجي ويانه نهائياً 24 ساعة بغرفتها ، صار الليل و أجو الولد گالو نطلع نتعشى بره ، طبعاً آني طرت من الفرحة يعني آني ما جايه للأنبار حتى أگعد بالبيت لا أكيد أطلع و أتفرفر
لبسنه و كملنه و طلعنه توزعنه ع السيارات ، ناس بسيارة صگر و ناس بسيارة شهم و ناس ويه رافد ، يعني طلعنه منا 3 سيارات

وصلنه المطعم جان مطعم فخم و حلو ، صگر هو اللي اختاره يگول أكله طيب ، اخذنه طاوله مال عوائل و گعدنه

صگر : من هسه محد يطلب آني اليوم أريد اوكلكم على ذوقي تمام

فرات : لا صگر آني ما آكل على ذوقك لأن اعرفه شلون

- هسه دجرب هالمره شبيك متخسر شي

- ديلا بالله تنشوف

حسين : ولكم بويه أطلبو اللي تطلبونه كلها نعمة الله

صگر : أي خالي بس أستنى شوي و شوف الأكل اللي يخبل

شوي و جابولنه الأكل و گعدنه ناكل و صح مثل ما گال صگر الأكل طيب و الأجواء كلش حلوه چانو مشغلين أغاني هادئه و منصين الصوت طبعاً بابا يكره الأغاني و حسب ما فهمت عمو جسام و عمو علي أيضاً يكرهوها بس غلسو

صگر : رُسل ، شبيچ گلبي شو متاكلين

- ما مشتهيه حبيبي

- شبيچ ، بيچ شي؟!

- لا مابيه شي ، بس أحس لعبانه نفسي شوي ، آني رايحه أغسل

- أي زين

گامت رُسل حتى تغسل و چان وجهها أصفر انتبهتلها من العصر على هالحاله ، راحت بأتجاه الحمامات و هي دتمشي ما حسينه بيها ألا و هي واگعه بالگاع ...

********

يتبع ...

لا تنسون التعليق بين الفقرات هاي أهم شي

هلو يحلوين ، شلونها القفلة🌚+شرايكم ببارت اليوم؟
هو صح مابي أحداث دسمه مجرد أحداث عادية ،
بس لا تستعجلون منتظرتكم أحداث نار بالبارتات
الجاية أن شاء الله + بما أنو كملنه البارت الـ 10
من الرواية فـ أتمنى منكم أذا عجبتكم الرواية
و حابين نستمر بيها ، شاركوها ويه أصدقائكم
و اقترحوها للناس اللي مهتمه بقراءة الروايات و أقترحوها لبيجات الواتباد اللي ع الأنستا او بأي مكان علمود تنتشر الرواية و تاخذ أستحقاقها و حتى نستمر بيها أن شاء الله
و بالنهاية أگلكم لا تنسون التصويت و متابعة الحساب و ترك تعليق حلو مثلكم ، لأن هالأشياء هواي تفرحني

18.kij
هذا حسابي ع الأنستا ، اللي عنده أنستا يجي هناك
نسولف عن الرواية و أجاوب على كُل أسألتكم
بيباي💜

سحر الدليمي