- غَشي عيونچ يـَ حلوة ، تراهن تيهني -
***
سلمنه و گعدنه نرتاح بالصالة ، و خالي جسام حچه من دون مقدمات ...
- علي ، حارث طلع من السجن
- شنووو؟! ، شلووون طلع شنوو بكيفهم يطلعونه و أصلاً حتى محكوميته بعد ما خلصت
- الظاهر واسطاته چثيره و طلعته
- منو گاللكم؟
صگر : خابرني عثمان و گالي
جسام : ديرو بالكم منا و رايح و أخذو حذركم زين أكثر لأن أحنه مندري شراح يصير و شيسوي
- يعني شيريد يسوي مثلاً ، خليه أعلى ما بخيله يركبه
- گوم وياي عندي سالفة وياك
گامو خوالي طلعو بره ، و بقيت آني حيكتلني الفضول منو هذا حارث؟ ، و شنو سالفته!
فرات : صگر هذا شگد صارله من طلع؟
- حسب الحچي الوصلني ، صارله أسبوع
رافد : ما شاء الله عدنة حكومة تطلع المجرمين قبل أنتهاء محكوميتهم ، و نريد العراق يصير براسه خير
جسام : علي أنت لازم تدير بالك و تاخذ حذرك ، أنت تعرف حارث زين و تعرف سوالفه ، إذا مو علمودك علمود الولد ، لأن إذا شافوك أنت مو مهتم و مو ماخذ الموضوع بجدية همه راح يسون مثلك ، و هذا حارث واحد شراني متدري شنو براسه و شاللي ناوي عليه
- صحيح والله ، خلص راح أدير بالي و أوصي الولد يديرون بالهم
***
مُهره
رحت للهول لگيت شهم نايم ع القنفه و مچتف أديه ، رحت جبت غطى و غطيته و طلعت أكعد بالطرمة ، شوي و أجه شهم گعد بصفي بدون ميحچي شي ...
- بسم الله أنت مو قبل شوية عفتك نايم!!
- حسيت عليچ
- راسك خفيف
- مو شرط بس أنتِ أحس عليچ لو أكون بسابع نومة
حسيت من نبرة صوته و عيونه أنه بي شي و مو طبيعي ...
- شهم شبيك؟
تنهد و جر حسرة و جاوبني ...
- بيه عشگ ما ينحچي
- منيه؟
- وحدة ترفه بترافة الوردة بس طاره گلبي نصين
- هالگد تحبها؟!
اندار عليه و باوعلي و حچه بلهفه و العشگ چان واضح وضوح الشمس بعيونه ...
- مو بس أحبها ولچ غير صارت تمشي بعروگي بدال الدم ، وين ما اروح صورتها متفارگ خيالي ، و صوتها دائماً يرن بأذاني و طغى على كل الأصوات الأسمعها ، و تسأليني هالگد تحبها!!
- گلي منيه
- بعدين
- شوكت؟
- أوعدچ أنتِ أول وحدة راح تعرفين
***
فرات
گاعد بالهول و جت عشگ گعدت گبالي ، طفيت الفون و دحگتلها ...
- شبيچ عبالك عندچ حچي
- هااا أيي شسمه
- شنوه؟
- أأأ هذا شسمه
- هو غير أعرف شنوه الشسمه!!
- منو هذا حارث؟
- واحد زايعته الدنيا
- شبي؟
- سالفته طويلة
- أحچيلي ياها أسمع
- يعني ضروري تعرفين؟
- أي فدوة فرات تره آني فضولية
- زين يابة هذا ...
- أوگف أوگف
گامت من مكانها و جت گعدت بصفي
- يلا أحچي
- هذا حارث مره من زمااان تكاونو أبن عمه و أخوه ويه أبوية و أبن عمه ضارب أخوه و چاتله بس رايح گايله أنو أبوية هو الضربه ، فـ هو هد على أبوية بحجة ثاره يمه ، سوو گعده عشائرية و ثبتو انو أبوية ماله علاقة و اللي چتل اخوه هو أبن عمه و جت الشرطة و اخذو ، بس حارث ما سكت صارت مشادة كلامية بينه و بين أبوية أگضب سلاحك يـ حارث و أرمي ابوية طلقتين
- يااااا و صابه؟؟؟
- أي صابه
- و شصار
- بوكتها چانت إصابة ابوية حييل خطرة و ضل نايم بالمستشفى شهرين و نص و حتى گالو الأطباء ممكن يموت بس ...
أنتبهت لـ عشگ حييل مركزة وياي و تدحگ بعيوني بطريقة خلت گلبي يرجف ما أعرف ليش ، بس گلبي رجف من شفت عيونها ، حتى الكلام نسيته ، قاطعة صفنتي من حچت ...
- شبيك متكمل بس شنو!!
- أي ، بس الحمدلله الله فكه منها و رجعلنه ، بس ضل هواي يعاني من إصابته
- و أكيد انتو تأذيتو بذيچ الفترة
- حيييل تأذينه ، جانت من أصعب الفترات المرت علينه ، آني چان عمري 4 سنين و صگر 7 ، حيييل تأذينه على فراگ أبوية ، شهرين و نص أحنه ما شايفينه و لا سامعين صوته ، آني وصلت لحالة صرت أكره البيت
- ما چنت أدري خالو علي منصاب ، يلا الحمدلله فترة و عدت
- الحمدلله
- زين و شصار بيهم حارث و أبن عمه
- أبن عمه گتلچ أنسجن بس مات بالسجن و بعدين حارث من ضرب أبوية هم أنسجن ، و من سمع أبن عمه مات. زاد حقده أكثر ، لأن من الأساس هو ما مصدگ انه چتل أخوه
- و هسه شراح يصير ، أكيد راجع ينتقم يعني أحنه هسه كلنه بخطر
- لا تخافين ميسوي شي سالفة صارلها سنين و نسى هسه
- بس لو ما هو يشكل خطر علينه جان ما خالو جسام حذركم منه
- دحگي عشگ ما دام أنتِ يمي بعون الله محد يگدر يأذيچ ولو شوية
- هاااا ، أحم شسمه أروح أشوف نَفس
عشق
گمت و رحت لغرفة نَفس دخلت و سديت الباب ، حطيت أيدي على گلبي و آني أفكر بكلام فرات من گالي " ما دام أنتِ يمي محد يگدر يأذيچ " من گال هيچ أحس دگات گلبي تسارعت و أكو شي بداخلي تحرك ما أعرف شنو بس حتى الكلام ضيعته ، انتبهت لـ صوت نَفس ...
نَفس : عشقق مو أحچي وياچ شبيچ!!
- هااا لا مابيه شي
- وين چنتي؟
- چنت يم فرات
- هااا من هذا مدتشوفين دربچ
- شلون يعني
- فرات عاميلچ عيونچ ولچ
- لا شلووون شدتحچين أنتِ
- والعباس دشوفي روحچ شلون من جيتي من يمه حتى عيونچ تضحك و دگات گلبچ المتسارعة اللي ما تدگ ع الفاضي
- شمعرفچ گلبي ديدگ بسرعة؟
- من يدگ الگلب يبين ع الوجه
صفنت صحيح آني احوالي تتخربط كُل ما أكون ويه فرات و هسه من أجيت من يمه دگات گلبي و افكاري الملخبطه ، كلام نَفس صحيح ، هاااي شديصيرلي آنييي معقولة أحبه؟! ، لا شلوون!!
نَفس : عشق آني راح أروح أسوي نسكافيه تريدين أسويلچ وياي؟ ، عشق عععشششققق
- هاااا شبيچ
- ولچ داحچي وياچ
- ما سمعتچ
- اي حقچ فرات خربط أمورچ كلها
- اوووف ، هسه گولي شعندچ
- حسوي نسكافيه تردين
- لا ماريد
طلعت أمشي للمطبخ و صادفت صگر بطريقي مبين چان طالع و توه جاي ...
- مرحبا صگر
- هلا نَفس شلونج؟
- الحمدلله بخبر
- شعندچ طالعة وين رايحة
- رايحة للمطبخ أسوي نسكافيه ، تحب أسويلك وياي؟
- لا شُكرًا بالعافية
- الله يعافيك
رحت للمطبخ و هو راح لغرفته ، دخلت المطبخ و طلعت كوب غسلته و أنداريت حتى أطلع النسكافيه ، فزيت من شفت رافد واگف بباب المطبخ مچتف أديه و منتچي ع الحايط ، ويه ما فزيت وگع من أيدي الكوب و تكسر ، أجه رافد يركض عليه ...
رافد : الله الله
- فززتني!
- آسف والله ما قصدي افززچ ، بس شفتچ بالمطبخ و گلت هسه خاف أحچي وياچ و تفزين فـ ألتزمت الصمت
- يلا حصل خير
بقى هو گاعد گبالي و آني ألم بالگزاز ، ضحكت ، و حچه ...
- هاا شو تضحكين؟
- كُل ما أشوفك أو تحچي وياي أفز ما أعرف ليش
- مو هذا حظي شايفتني بعبع گدامچ
- ههههههههه
- أضحكي عسى أيامچ كُلها فرح يـ ...
قطع حچايته و ما كملها ...
- أأأ ، حسوي نسكافيه تشرب؟
- أي أشرب ليش لا
كملت النسكافيه و طلعنه نشربها بالحديقة ، گعدنه و صرنه نحچي هو يحچيلي عن حياته و شغله و شلون من يسخت بشغله يرزله أبوه ، چان عفوي كلش بكلامه و أحسه بس يريد يضحكني و يشوفني فرحانه و أبتسم .
***
رُسل
شفت صگر واگف ويه نَفس و يحچون سويه من شفتهم أشتعلت النار بصدري ، أنتظرته حتى يجي ، شوي و فتح الباب و دخل ، سلم عليه بس ما رديتله ، راح للكنتور طلعله تراك و وگف گبالي و حچه ...
- شبيچ گلبي؟
- چنت واگف ويه نَفس و تسألها وين رايحة ، شعليك أنت بيها؟
- چنتي تتصنتين علينه؟!
- ما تصنتت بس جنتو واگفين قريب من الغرفة و سمعت
- عادي سألتها عن أحوالها
- و ليش تسألها شعليك بيها
نرفزه كلامي و رفع صوته عليه و گال ...
- شبيييچ رُسل البنييه مالهاا غييررنااا صارت من مسؤؤليتنااا و من واجبيي أسأل عليهااا هسه شسويت قاابل شبيييچ أنتِ!!
- ليييشش تصييحح علييههه
- يولييي شوو مدري شلووونن تسوولفيين أنتِ ، تخووطين بصف الستكان
- صرت أخوط بصف الستكان لأن اغار عليك؟
- علييشش تغغاارييين علليهه يالكعبة؟؟؟
- أنت ما جاي تشوف نظراتها الك شلون هي حاطه عينها عليك و تريدك تتزوجها و آني والله يَـ صگر ان سويتها ما أگعد وياك دقيقة وحدة
- يبوووو على حظي المصخم
گال هيچ و أخذ ملابسه و طلع و طبگ الباب حييل وراه ، و آني ضليت أبچي وحدي ، ليش يصيح عليه علمود وحدة ما صارله شهر يعرفها!!
***
فرات
گعدت الصبح متأخر ماكو أحد بالبيت الكُل طالعين ماكو غير رُسل و عشگ و نَفس ، نزلت جوه طلعت للحديقة و صارت گبالي عشگ جاي تسگي بالورد ، أرتچيت ع الدنگه و آني أدحگ عليها ، صارلها أيام نايمة ببالي ما جاي تطلع منه ، افكاري كُلها تروح يمها و من اشوفها افرح شنو السالفة!! ، أندارت عليه و من شافتني أبتسمت و جت عليه ...
- صباح الخير
- يا هلا بـ هالصباح
- كلهم تريگو و طلعو ، تريد أسويلك ريوگ؟
- والله ياريت
- تمام لعد أگعد و آني أجيبلك ياه
- لا راح أروح وياچ لأن أريد أتريگ بالمطبخ
راحت و رحت وياها ، گعدت ع الميز و هي بدت تشتغل بالريوگ و عيوني يتبعنها لا إرادياً ، كملت و حطته گدامي ...
- عاشت أيدچ عشگ تعبتچ
- لا مابيها تعب ، هو عادي أسألك سؤال؟
- اسألي
- ليش تسميني عشگ مو عشق؟
- لأن أسمچ يحمل معنى قوي ، العشق ، و آني أحس من أگول اسمچ بالعامية عشگ يبرز المعنى ماله أكثر ، لأن اللهجة العراقية مُصطلحاتها ذات معنى قوي و عميق
- أمممم حلووو ، بس ما اقتنعت صراحة اريدك تگول عشق
- لا تقتنعين المهم آني مقتنع
- لعد هم آني راح اسميك نهر الفرات ، مو أسمك فرات
- هااا هيچ صارت؟!
- أيي نعم
- أي بس مو هيچ أنتِ لعبتي بأسمي طوبه ، آني ما غيرت بس حرف واحد
- ههههههههه
من ضحكت أحس گلبي رجف ويه ضحكتها ، شبيه آني؟! ، شنو حبيتها لو شسالفة شجاي يصيرلي من أشوفها؟ ، حاولت أشتت أفكاري ، حچيت ...
- شوكت تداومين؟
- ما أعرف علساس يگولون قريبًا
أأأ ، أحم فرات عادي أسألك سؤال؟
- أي أسألي
- داگلب بحسابك و شفت مصور ويه حصان ، هذا ألك؟
- أي ، بس هاي فرس مو حصان
- يعني أنت خيال؟
- يعني تگدرين تگولين هيچ
- بس وينها الفرس و لا مره شايفتها؟
- بالمزرعة مالتنه بالقرية
- أول مره أعرف عدكم مزرعة
- تحبين الخيل؟
- كلللشش أحبها ، بس و لا مره شايفة خيل بالحقيقة
- آخذچ للمزرعة تشوفينها؟
- وحدنه؟
- لا ناخذ أهلنه ويانه ، سفره عائلية يعني
- تمام موافقة
- خوش عجل أسأل أبوية و عمي و ارجعلچ خبر
- أوكي
عشق
گام فرات و راح للمعرض كال عندي شوي شغل و هم حتى يسأل خوالي علمود السفرة ، رحت شفت رُسل بس چانت ضايجة ما اعرف شبيها عفتها ما ردت اضغط عليها ، رحت يم نَفس گلتلها ع السفرة و عجبتها الفكرة بقينه گاعدين و نسولف لحد ما صار الظهر ، أندگ باب غرفة نَفس ...
- تفضل
أنفتح الباب و چان فرات ، دنگ راسه و حچه ..
- عشگ تعاي رايدچ
طلعتله و وگفنه بالممر ...
- اليوم العصر راح نروح حضري نفسچ أنتِ و نَفس و أحسبو حسابكم راح نبات غادي
- أوكي
***
صگر جيت من الدوام و فرات گالي أنُ راح نطلع سفره للمزرعة ، فكرة حلوة حتى بلكت رُسل تتغير نفسيتها شوية ، صعدت للغرفة ، فتحت الباب ، لگيت رُسل گاعده ، گعدت گبالها ع القنفة ...
- شلونچ؟
- ما ردت عليه و حتى ما دحگت بوجهي ، رجعت گلت ...
- اليوم راح نطلع سفره للمزرعة حضري نفسچ
- ما أروح
- ليش؟
- مالي خلگ
- خير أن شاء الله
***
شهم
گاعد بالغرفة و فكرة تجيبني و فكرة توديني ، بالي كُله يم مُهره ، گلبي يگلي أحچيلها و فض السالفة ، و عقلي يگلي لا لتحچيلها ، و آني صاير بين عقلي و گلبي مو گادر أختار و آخذ قرار ، حاولت أتناسه الموضوع و أشغل نفسي بشي ، نزلت جوه لگيت أبويه متحضر يريد يروح للشركة ...
- بويه أنتظرني جاي وياك
- وليدي أبقى ارتاح أنت بعده جرحك طري
- لا يابه أريد أنزل وياك للشركة صارلي هواي گاعد مگدر أگعد أكثر
فاطمة : يمه والله أخاف لا تتخربط هناك
- لا تخافين يوم والله مابيه شي
رحت بدلت ، لبست زي رسمي ، رغم آني مو هواي أحبه أكثر شي ألبس زي عربي بس قررت أغير اليوم ، كملت و نزلت و طلعنه آني و الوالد ، وصلنه الشركة و دخلنه ، و الموظفين كُلهم تحمدولي بالسلامة ...
- يابه شنو خططكم لليوم؟
- أول شي هسه عدنه أچتماع شوي و يبلش
- بس آني ما أعرف عن شنو الأچتماع و ما محضرله شي
- ميحتاج تحضر شي ، راح نچتمع ويه مجموعة مهندسين علمود نتفق على مكان لبناء المستشفى أللي گلنه عليه قبل لا تتمرض
- هاا چا خوش
***
عشق
حضرنه الأكل اللي راح ناخذه ويانه ، سوينه برياني و لحم بعجين و زلاطة نوعين ، بدلت و لبست بينصل وردي قصير بس مو حيل جواه جواريب طوال و فوگاه ستره بيضة خفيفة ، صگر ما راح يروح لأن رُسل متقبل تروح و هو حيبقى وياها ، طلعت للحوش حتى أنتظرهم يكملون ، لگيت فرات واگف يم السيارة و ديگلب بالفون ، لابس دشداشة جوزيه و شماغ منقط بأحمر و عگال ، من شافني طفه التيلفون و گام يباوعلي عيونه مثبتهن بيه ، أستحيت من نظراته و ما گدرت أباوعله درت وجهي بصفحة ، شوي و أجت ماما و نَفس و بعدين أجو الكُل و صعدنه بالسيارات ، صعدنه آني و نَفس و ماما ويه فرات و البقية صعدو ويه رافد ، مشينه و فرات شغل أغنية " هذا الحلو كاتلني يعمه " ، وره نص ساعة و چان نصل المزرعة بعد ما أفترينه بالقرية اللي تجنن ، نزلنه و الولد نزلو الغراض ، و آني صرت افتر بالمكان ، رحت ليوره البيت چانت حديقة كلش چبيرة و بصفها مسوين گعده عربية فوگاها سقيفة و بالنص موجود مكان مخصص لأشعال النار للتدفئة و هالأشياء و بصفه دلال گهوة و فناجين ، گعدنه بهذا المكان و فرات أختفى ما أعرف وين راح ، وره شويه أجه و باوعلي و گال ...
- گومي وياي عشگ
- وين؟
- گومي و ماعليچ
گمت وياه
فرات : من رخصتكم
رحنه نمشي ليورا البيت ، وصلنه غرفة مال خيول ، فتح الباب و طلع الفرس مالته ...
- مو گلتي أريد أشوفها ، هاي گدامچ
- ياااا فدوة شگد حلوه
تقدمت عليها و صرت أمسحلها بس تبتعد عني متقبل أحد يتقربلها غير فرات ...
- أكيد الها اسم مو؟
- أي شلون عجل
- شنوه؟
- غرام
- يجننن هالأسم ، بس ليش سميتها هيچ؟
- لأني مُغرم بالخيل فـ سميتها غرام
باوعت لداخل الغرفة لگيت فرس ثانية صغيره
- هاي الفرس الصغيره بنتها مو؟
- هاي مو فرس مُهره ، اي بنتها
- شلون مُهره لعد هي مو فرس
- بنت الفرس أسمها مُهره من تكبر تصير فرس
- هاااا
دخل جوه جاب السرج مالها و حطه على ظهرها ...
- آني راح أطلع ، أرجعي على أهلنه
- وين حتروح؟
- هنا بالمنطقة
- لا تتأخر
باوعلي شوية و بعدين هزلي براسه ، لف الشماغ على وجهه لأن چان الجو شوي بارد و الوقت قريب المغرب ، صعد الفرس و راح ، و رجع أكد عليه أنو أرجع أگعد ويه الأهل رجعت و گعدت وياهم ، چانو يسولفون و يضحكون و منسجمين ويه بعض ، حچه خالي علي ...
- لعد وين فرات مو چنتو سوه؟
- أي خالو ، بس أخذ الفرس و طلع گال افتر شوية بالمنطقة و أجي
رافد : يفتر شوية و يجي؟ ، هذا ما دام أخذ الفرس وياه منا للـ 12 ميجي
********
يتبع ...
لا تنسون التصويت و التعليق بين الفقرات و متابعة للحساب و مشاركة القصة
18.kij
تعالو أنستا
سحر الدليمي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!