- ما بالي لا أستطيعُ التفكير بغيرك ، هل وقعت بـِ حُبُكَ أم ماذا ؟
***
فرات
أخذت الفرس و صرت أمشي بالقرية لحد ما وصلت النهر ، نهر الفرات ، المكان الوحيد اللي أرتاح بي ، لو گعدت هنا أحس همومي كُلها تروح بالشط ، لذلك كُل ما أحس أني متضايگ أجي هنا ، تذكرت من حچيت سالفة حارث لـ عشگ من چانت مركزه عيونها بيه ما جاي يروحن من بالي عيونها و صوتها دائمًا أسمعه وين ما أروح ، هيچ فجأة أحتلتني كُلي و سيطرت على أفكاري و على گلبي ، نسيت ميس و الفترة الصعبة اللي عشتها وره وفاتها ، نسيت كُل القهر و الألم اللي چان مسيطر عليه من فارگتني ، حاليًا جاي أحس نفسي شخص ثاني غير فرات القديم ، حبيت عشگ أي حبيتها ، حُب عشگ غيرني و نساني كُل جروحي القديمة ، ضليت گاعد ع النهر و فكرة تجيبني و فكرة توديني
***
عشق
بقينه گاعدين لحد ما صارت الساعة بالثمانية ، علگو النار حتى ندفه لأن الجو شوي بارد ، يحچون و آني بالي يم فرات تأخر كلش ، ما أعرف ليش خفت عليه ، گامن ريان و نَفس يحضرن بالعشه و آني گمت رحت للمكان اللي المُهره الصغيره موجودة بي ، وگفت أباوع عليها و أنتظر فرات بلكت يجي
***
فرات
حسيت العين بدت تظلم و المكان مابي لو نفس ، ركبت فرسي و مشيت ، علگت ضو الفون لأن الدنيا ظلمة ، وصلت بيتنه نزلت تا أريد أفتح الباب و لاگاني عمي فؤاد تسالمنه آني وياه و حچه ...
- همزين جيت يـ فرات تره الفرس طلبت خيالها
- والله أدري عمي ما چنت مهتم بيها بس أنت تعرف الضروف المريت بيها
- الله يعوضك وليدي الله يعوضك
- آمين ، أي عمي گُلي شلونها غرام خوما بزعتك
- بالعكس يابة فرسك هدية بس تحتاج أهتمام ، بس ما تخلي أحد يعتلي ظهرها غيرك
- أي عجل شلون غير أصيلة
سلمت عليه و راح و آني دخلت جوه
عشق
بقيت أنتظره فوگ الربع ساعة بلكت هسه يجي ، شوي و سمعت صوت خطوات الفرس ، أيي الحمدلله أجه ، وصل ليمي و حچه ...
- هااا هاي شعندچ هينه؟
- چنت أنتظرك
- تنظريني؟!
- أي تأخرت كلش من العصر طلعت و گلت ما أتأخر ، خفت لا صايرلك شي
- خفتي عليه؟
- هااا أأأ شسمه أمشي دنتعشه يلا
أبتسم بوجهي و حسيت عيونه بيها لمعة من چان يباوع عليه ، هسه آني ليش گتله هيچ أمداچ يـَ عشق ، مشينه للمكان الگاعدين بي هو گعد و عيونه عليه و آني فتت جوه أساعد البنات
***
رُسل
من وكت ما راحو للمزرعة و آني گاعده بالغرفة ، لولو يمي و صگر جوه ما صعدلي أبد و لا جرب يحچي وياي ، مَر الوقت و لولو نامت ، سمعت صوت أغنية عالي من جوه گمت نزلت و وگفت ع الدرج ، شفت صگر مشغل أغنية " أنا أكثر شخص فهالدنيا يحبك "
و معلي البلازمه حيل
- أنا أكثر
شخص فهالدنيا يحبك و أنتِ ما تَدرين
و فيكي أموت أنا و أحيا
- من أول يوم لين الحين
يا أجمل ، أجمل الأشياء
و يا أغلى من نظير العين
- متى گلبك؟
متى مُمكن يصافح بالوله گلبي
متى هالبال يطمن على أحساسي و على حُبي
" راشد الماجد "
چان گاعد ع القنفة و مدنگ راسه و حاط أيده على گُصته ، آني زودتها عليه يمكن هو ماله علاقة بـ نَفس و ماعنده شي وياها يمكن هاي مخاوف و تخيلات من راسي ، ما چان المفروض أحچي وياه و أزيدها عليه ، هو منا مشاكل الدوام و منا سالفة حارث و جيت آني زدتها عليه بغيرتي ، بس شسوي آني لو ما أحبه ما أسوي هيچ والله لو گلبه رَف لـ وحدة غيري أموت ، رحت تمددت ع الچرباية و ضليت أفكر ألى أن غفيت ، شوي و حسيت الباب أنفتح فتحت عيوني و شفته صگر ، رجعت غمضت ، جه هو أنجضع بصفي و حاوط خصري بأديه الثنين و قرب راسه يم راسي ، وخرت أديه عني و أنداريت عليه و حضنته حييل حطيت راسي بصدره ، مشتاگه لحضنه و ريحة عطره رفعت راسي و دحگت عليه چان مغمض عيونه ، حچيت ...
- صگر
- عيونه
- آني آسفه
- أششش مو وكتها
سحبني لحضنه و حضني حيل ، ما أدري شلون نمت
***
عشق
گاعدين كُلنه حوالين النار و الجو بارد بس الگعده تجنن ، آني و نَفس گاعدين وحدة بصف اللخ ، و خالو علي و خاله نجاة گاعدين بصف بعض و متلفلفين بالفروه مالت خالو ، حچه رافد و هو يباوع عليهم ...
- عمي تره ما يصير هيچ أرحمونا گدامكم ناس سناگل و چاتلها الجفاف
ضحكنه كُلنه على حچيه ، ردله خالو ...
- و آني گايلك تضل سنگل و ما تتزوج
- هو شفايتلي آني لو آخذها و تصير حلالي و أصبح و أمسي بوجهها
فرات : هااا لازم عندك وحدة
- و ولا وحدة دخلت گلبي غيرها
جسام : إي عجل گول منيه تا من عين باچر نخطبلك ياها
- لا يابة آني ما أتزوج هسه أريد نتزوج آني و فرات بيوم واحد ، هاا فرات شتگول؟
- يصير خير أن شاء الله
- عليك الله تحچي صدُگ؟
- شبيك مو گلت يصير خير
بقو يسولفون و آني أطگطگ من البرد ، أنتبهت لـ فرات يباوع عليه كأنو حس أني بردانه ، شمرلي الفروه مالته ...
- هاچ ألتفي بيها أنتِ و نَفس
- لا مو بردانين
- تگول مو بردانين دشوفي نفسچ تطگين سن بسن
- و أنت شلون؟
- آني مو بردان
أخذتها و تلفلفنه بيها ، حچت نَفس ...
- كتلنه البرد ، مو وكت تبيعين ثگل على حَبيب الگلب
- ولچ سُكتي لا أحد يسمعچ
- هااا يعني طلع صدگ حَبيب الگلب و خايفة لا أحد يعرف
- لاااا ، هاي أوهام من راسچ أنتِ
- أييي الأيام كفيلة تثبتلنه إذا چانت هاي اوهام من راسي لو حضرتچ صدگ طايحة بعشگ الفرات
بقيت أفكر ، معقولة آني أحب فرات و أعيش وياه قصة حُب و هو هم يحبني ، لااا شنو هالتفكير عشق أصحي شبيچ أصلاً هو ما ناسي خطيبته و راسه و ألف سيف ما يحب غيرها ، بَس آني مديروح عن بالي تفكيري كُله بي و طول الوقت نظراتي تروح عليه و مركزة بي بدون ما أحس ، معقولة أوگع بحب من طرف واحد و يتمرمر گلبي ، لا يا ربي الله لا يگولها .
***
سلام : شبي شهم شو أحسه ضايج و مو على بعضه ، حتى اليوم بالأجتماع أنتبهت عليه فكره مو يمنه أبد
فاطمة : شهم هويان يـ سلام
من سمع هيچ أبتسم و حچه ...
- صدگ تحچين ، چا ما تگليلي حتى نروح نخطبله ياها و أزوجه بأسرع وقت خاطر يفرح گلبي بي هاذ وحيدي
- ياريت السالفة بهالسولة
- چا شلون ، أكو شي ما أعرفه؟
- شهم يحب مُهره بنت أخوك ، و هو حاس أنها مالها خاطر بي و ما يريد ياخذها أله برضاها ، و هذا سبب ضوجته و قهره المكتوم
- و من يمته هالحچي و آنـه ليش ما أدري؟
- من ساعة الطاح اعلينه بهالمرض هو گلي و گال لا تگلين لأحد بس آنـه گتلك خاطر ما ينشغل بالك أعليه من كونك أنتبهتله
- و هو حاچي وياها بهالموضوع و رادته؟
- لا و لا ملمحلها حتى يگول ماريد أفتح الموضوع هسه
***
نجاة
أجه علي حتى ينام ، تمدد ع الچرباية و گعدت بصفه ، حچيت ...
- علي
- هلا
- أنت ملاحظ فرات متغير بهالفترة
- شلون يعني متغير من يا ناحية؟
- حاله متغير عن گبل و دوم صافن ، و الأهم بعد ما يضوج لو أنذكرت سالفة الزواج گدامه مثل ساعة الحچه وياه رافد قبل شوي ، تتوقع ينسى و يرضى يتزوج و يكمل حياته؟
- هو أحنه شنريد غير أنه ينسى و تطيب جروح گلبه و نشوفه فرحان ، خصوصاً بهالسنين الفاتن أنهد حيله و آني گلبي ملچوم عليه ، أنتِ أدعي الله يهديه و يداوي جرحه و ينسيه
- آمين يا رب والله دوم أدعيله
***
عشق
نامت نَفس و آني ما أجاني نوم ، رحت أمشي و طلعت بره وصلت الگعده اللي چنه گاعدين بيها ، باوعت چان فرات نايم و متغطي بالفروه مالته و لاف الشماغ على وجهه النار عالگه يمه بس الجو بارد و هذا نايم و مو داري عن أحد ، خفت عليه لأن إذا بقى نايم هنا راح يتمرض أحتاريت أگعده يروح ينام جوه لو أعوفه نايم هنا بس ما أگدر أعوفه هيچ ، تقربت عليه حتى اگعده ...
- فرات
گلت هيچ و فز من مكانه ..
- أسم الله شبيك؟
- عشگ ، شعندچ هنا؟
- آسفه فززتك
- لا أنتِ مالچ علاقة آني على أدنات صوت أفز ، شعندچ رايده شي؟
- أجيت أگعدك حتى تنام جوه هنا باردة
- لا أريد انام هنا
- بس باردة
- عادي
- حتتمرض
- ميخالف
- تمام لعد تصبح على خير
- و أنتِ من أهله
گمت من يمه و فتت جوه ، يربي شگد عنيد هالرجال
***
شهم
گعدت الصبح ، بدلت و نزلت جوه ، لگيت أبوي و أمي جاي يتريگون گعدت وياهم
- صباح الخير
- صباح النور
أنتبهت لأبوي يباوعلي بطريقة غريبة ...
- خير بوية رايد شي؟
- أي رايد تحضر روحك أريد أخطبلك و أزوجك
- مو وكتها بوية
- چا يمته وكتها يبوي؟
- يابة آنـه ماريد أتزوج هسه
- چا أنت و فرات كاضيلي هالسالفة ياهو الحچه وياكم و گلتو مو هسه و مو هسه شمالكم بوية
- بوية من رخصتك آنـه طالع گبلك
حچيتها و گمت رحت
فاطمة : چا شمالك ع الولد يـَ سلام أله تحاچي بهالموضوع و تسد نفسه
- ماعليج آنـه جاي أجيسن نبضه
- شتجيس چا مو گتلك الولد هويان هاي شوراها
- أنتِ بس أنطيني صَبر
شهم
طلعت و آنـه كلام أبوي خانگني ، يريد يزوجني؟ ، چا و گلبي المتعلگ بـ مُهره شسوي بي ، وصلت الشركة لگيت سجاد گبالي ...
- هلا بالشهم
- هلا بيك
- هااا ، شمالك يـَ أبن العم شو مو على بعضك
- لا مابيه شي
- متأكد؟
- أي ، چا عبدالله وينه
- جاي بالطريق
- يعني ما رجع لجامعته؟
- لا يگول هاليومين أسافر
راح سجاد و بقيت آني گاعد ، شوي و وصل أبوي
- هااا يـَ شهم فكرت باللي گتلك اعليه
- بوية فدوة رحتلك هد هالموضوع
- لا ما أهده ، رايد أزوجك يـَ شهم
- من رخصتك بوية
گمت حتى أطلع و وگفني كلام أبوي ...
- يا تنساها و تتزوج يا تصير زلمة و تطلبها من عمك يوليدي
***
فرات
گعدت و أحس راسي ثگيل و الگحه لازمتني ، تذكرت عشگ و هي تگُلي إذا نمت هنا تتمرض أبتسمت و آني أتذكر كلامها و عيونها ، گمت فتت جوه لگيتهم جاي يتريگون ، گعدت و آني الگحه ما تفعل تهدني ، حچت أمي ...
- أسم الله هاي شبيك ماما؟
- مابيه شي يوم فلاونزة بس
- چا تعال تريگ يمه
- ماريد مو مشتهي
عشق
گعدت و رحتلهم لگيتهم كُلهم كاعدين ديتريگون و فرات گاعد ع القنفة و يگح قوي أحس الگحة شگت صدرة شگ ، گلبي أنلچم عليه ، گعدت أتريگ و آني عيني تروح عليه ، هسه آني شعليه بي ليش لهدرجة مهتمة بي ، تريگت و كملت و فرات على حالة ، حچت خالة نجاة ...
- ولك يمه چان لابسلك شي باقي بطرگ الدشداشة
- ماعليه شي يوم
راحت خالة نجاة و آني بقيت ألم بالمواعين و هو عينه عليه ، ما تحملت أشوفه هيچ تركت اللي بأيدي و رحت طلعت من جنطتي حب مال تحسس لأن هو مبين عنده تحسس قوي ، أخذته و أخذتله وياه گلاص مي ...
- هاك أشرب
- شنو هذا؟
- علاج
- ماريد
- أتمنى هالمرة ما تعاندني و تطاوعني شفت من عاندتني شصار بيك
أبتسم ، و أخذ الدوه من إيدي و شربه
- بيها العافية أن شاء ألله
- الله يعافيچ
حچيتها و أنداريت حتى أروح ، گال ...
- عشگ
ألتفتت عليه
- شُكرًا
- العَفو
***
سلام : ليش ما گتلي من زمان يبوي؟
شهم : و شراح أستفاد إذا گتلك بوية
- خلني أخطبلك ياها و ساعتها إذا رايدتك توافق
- لا يابة مو هسه
- چا شوكت؟
- ما أدري
- و تبقى هيچ موهدن؟
- الله كريم بوية ، آنـه رايح عندي شغل من رخصتك
- الله وياك
طلعت و لاگاني عبدالله بالممر
- هاا شهم شبيك
- تعال بالمكتب أحچيلك
دخلنه للمكتب گعدت و گعد مقابيلي عبدالله ...
- ما تحچي شمالك
- أبوي دره بيه رايد مُهره و يريد يخطبها من عمي حسين
- أي و هذا المفروض
- ولك شلون تريدني أخطي هالخطوة و هي ما رايدتني
- و أنت شمدريك ما رايدتك ، لا أنت الحاچي وياها و رادتك و لا الخاطبها و رافضة ، شبيك شهم تريد تبقى معلگ هيچ بين السما و الگاع ، يا تحچي وياها أنت يا تخلي عمي يخطبلك ياها و أن وافقت گلنه مبروك و أن رفضت هاهيه بعد ماكو نصيب
- ماكو نصيب ، عبدالله تدري إذا خطبتها و سمعت هالحچاية شيصير بحالي ولك والله أموت ، أنت هسه گلت و هو ماكو شي و أحس گلبي أنمرد ، شلون لو صارت صدگ
- چا ابقى هيچ تباوعلها و تتحسر لحد ما يجي نصيبها و تطير من إيدك
- لا ما أبقى هيچ بس ماريد أستعجل بهالخطوة
***
رُسل
سويت الريوگ و صگر گاعد يمي بالمطبخ و يگلب بفونه كملته و حطيته ع الميز ...
- يلا حَبيبي عوف الفون و تعال تريگ
ذب الفون من إيده و حچه ...
- عوفي الريوگ أريد أحچي وياچ
- شنو
- شوفي رُسل أنتِ مرتي و أم بنتي و آني ما أبدلچ بكنوز الدنيا كُلها ، أيام و ليالي و آني أدعي و أطلب من الله يحطچ بنصيبي و من صرتي ببيتي أتزوج عليچ شنو مخبل آني
أشر على گلبه و گال ...
- گلبي هذا ما رَف و لا راح يرف لغيرچ حطي رجليچ و أديچ بمي بارد آني مستحيل أحب غيرچ ، نَفس هاي أختي و من أسألها و أحچي وياها بصفتي أخوها ، البنيه مالها غيرنا هالله هالله بيها بعد گلبي
- صار حَبيبي تدلل
- يلا عجل سمي بسم الله
أحس هم و نزاح عن گلبي من سمعت حچي صگر فعلاً بينلي أنو هو ما يشوف أحد غيري و هالشي ما حسيته بكلامة و أنما شفته بعيونه اللي يشهدن على كُل كلمة يگولها و ضوجته من زعلت عليه و ما رضيت أحچي وياه .
***
نجاة : فرات ، شلون صرت ماما؟
- الحمدلله يوم ، عجل أبوية وين؟
- راح هو و عمك يسلمون على فؤاد
- هااا خوش
عشق
طلعت من الغرفة لگيت خالة نجاة و فرات گاعدين ديسولفون ، فرات أول ما حس بوجودي ألتفت عليه نزلت عيوني منه و رحت طلعت بره ، صرت أتمشى بالحوش شوي و ألتفتت وراي و أشوف فرات جاي يمشي بأتجاهي ، وگف مقابيلي و حچه ...
- شُكرًا الدوه اللي أنطيتيني ياه فادني
- الحمدلله على سلامتك
أحچي و أباوع للسوار اللي بأيده ، چان فضه و منحوت عليه حرف M حرف ميس الله يرحمها ، من شفته ما أعرف ليش گلبي نغزني و ضجت كلش هسه آني شعليه ، حچه هو ...
- عشگ
- هااا
- دحگي عليه
رفعت راسي أباوعله ، باوعت بعيونه ، أول مره أنتبه لـ عيونه وساع و عسليات يميلن على أسود ، ما أعرف أوصف الشعور اللي حسيته و آني أباوع بعيونة أخذني لغير عالم و آني من كُل عقلي صافنه عليه ، حسيت و حچيت بأرتباك ...
- آني ، أأأ آني أروح
- وين؟
- شسمه هنااا
عفته و مشيت دخلت جوه و آني گلبي أحسه يريد يطلع من بين ضلوعي على گد ما يدگ ، شافتني نَفس و كالعادة بقت تحچي نفس الحچي ، و آني ما أشوف غير عيونه گدامي و صوته بأذني ، شصارلي يا ربي!!
صار الظهر و طلعنه نفتر بالقرية بقينه نفتر و بعدين رجعنه للبيت اللي بالمدينة ، و مشت الأيام و مَر شهرين و آني يوم عن يوم أتعلق بفرات أكثر ، آني ما ردت أتعلق بي و حتى ابتعدت عنه طول هالشهرين هاي آني أحاول ما أطلع گدامه و أشوفه و أسمع صوته ، حاولت شگد ما أگدر أبعد گلبي عنه لأن أدري هو بعده عايش على ذكرى ميس و مستحيل يشوف غيرها حتى لو هي جوه التراب يعني شراح أستفاد إذا حبيته غير الضيم و القهر ، حاولت و حاولت بس ما فاد گلبي تعلق بي ، لو بس ألمحه لمحه بسيطة أبقى أفكر بي أيام ، شلون أريد أنساه و آني عايشة وياه بنفس البيت
طلعت أتمشى بالحديقة الخلفية ، بعد ما تأكدت أنو فرات ما موجود ، أريد أبقى وحدي بعيد عن الناس و صوتهم ، دا أتمشى و ما حسيت أله واحد جرني من أيدي و دارني عليه ، چان فرات ، صرنه وجه بوجه ، چان يتنفس قوي و عاگد حواجبه ، لازم إيدي و يباوع عليه ...
********
يتبع ...
هاااا بروهات شلونها القفلة
حَبيت تعرفون أنُ هذا آخر بارت من البارتات الجاهزة ، يعني منا و رايح ماكو تنزيل يومي للأسف ، أكمل البارت يلا أنشره ، أتمنى تتفهموني و ما تگولون علقتنه بالقصة و تغيرت علينه لا والله آني مو هيچ و لو بإيدي يومية أنزللكم بارت بس أنتو تعرفون دراسة و الأمتحانات قربت و حاليًا بلشت بالمراجعة و ما أگدر أكمل البارت بيوم واحد ، أما بالنسبة للبارت الجاي ، فـ أحتمال اليوم بالليل أو باچر ينزل هو باقي شوي و يكمل .
سحر الدليمي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!