رواية عشگ الفرات ( عِندما تَهوى القُلوب ) الفصل التاسع عشر 19 - بقلم سحر الدليمي

نظرة عشگ من عيونچ كافية تمحي عن گلبي
كُل الأوجاع القديمة .

***

وگف يم الشباك و هو يصيح لحد يگرب ع الشبابيك ، فتح البرده شوية و باوع منها و رجع سدها و بعد عن الشباك وگف بصفي ، اباوع الكُل خايف و شهم يهدي بيهم ، و آني من الخوف لزمت أيد فرات بقوة و غمضت عيوني أحس بي ألتفت عليه بس ما فتحت عيوني

شهم : فرات شفتهم منو ذوله

- سيارتين شهم بس ما گدرت أعرفهم

بقينه دقايق على هالحالة لحد ما أختفى صوت الرمي و آني أحس نفسي بعالم ثاني مو وياهم ...

- عشگ ، عششگ شبيييچ ، فتحي عيونچ خلص ماكو شي راحو

أنتبهت لـ صوت فرات و فتحت عيوني ، چان واگف مقابيلي و لازمني من چتافي و خوفه عليه واضح بعيونه ...

- أنتِ زينة؟

- راحوو ، فدوة فرات خاف بعدهم

- لا تخافين و عيونچ راحو ماكو أحد ، روحي أگعدي غاد

راح يشوف خالة نجاة و شهم حاضن خواته الثنين و يهدي بيهن و بأمة ، جان موقف مرعب على لحظة گلنه خلص راح يفوتون علينه و يكتلونه كُلنه ، شوي و وصلو خالي علي و عمام مُهره و الولد ، دخلو و الخوف چان واضح عليهم ...

حسين : هاي شصاير ولكم!!

سلام : شسالفة ريحة البارود معبيه المكان و الحياطين مزرفه شكووو!!

شهم : بوية هدو علينه

- منو ولك

فرات : خالي ما عرفناهم چانو سيارتين رمو ع البيت و أنهزمو

سجاد : كامرات المراقبة ، نعرفهم من خلالهن ، شهم اللابتوب مالك وين؟

- لحظة هسه أجيبه

جاب شهم اللابتوب ماله و شغلو حتى يشوفون تسجيلات الكامرات

سلام : عرفتهم والله و العباس ما تطلع من غيرهم

علي : يابة تره السالفة بعد ما ينسكت عليها ، واضح الجماعة ناويلكم ع الشر ، و هذا اللي سووه كله تهديد

بكر : يعني و تالي وياهم يريدون يسوونها دم بيناتنا

حسين : والله لو أحد من اللي بالبيت صايبه شي ما يشفي غليلي لو ذبحت منهم عشرين زلمة

على حسب الحچي طلعو هذوله أعداء بيت الفارس من الشغل و هُمه أللي خطفو مُهره قبل فترة مبينين كلش شادين وياهم ، وره الظهر و گال خالي علي باچر من الصبح نطلع للأنبار ، و طلع ويه عمو حسين و أخوانه راحو للشركة

گاعدة بغرفة مُهره أعزل بغراضي و أحضرهن لأن باچر نطلع من الصبح كلش لأن بطريقنه نمر ع النجف نزور الأمام علي ( عليه السلام ) ، فجأة سمعت صوت صراخ و هوسة جوه ، رحت أشوف شكو ، نزلت و لگيت عمه سلوى و خالة نجاة ديتعاركن ما عرفنه شنو الموضوع لأن ما چانن يحچن بوضوح ...

نجاة : سلوى گتلچ هذا الموضوع سديه و بعد لا تفتحينه لأن ما راح تحصلين شي

- حتى لو ما أحصل شي بس المهم أكسر خشمچ و أنتقم منچ

حاولنه نهديهن بس ماكو ، عِله صوت الصراخ و حمت العركة ألى أن گالت سلوى ...

- لچ أنتِ وحدة متستحين ليش قليل اللي سويتيه أنتِ وحدة ساقـ ...

قاطع كلامها صوت فرات اللي رج البيت رج ...

- عننندچچچ!!

أجه يمشي بأتجاهها و چان عاگد حواجبه و معصب كلش من الحچي اللي گالته ، وگف گدامها و خله أمه وراه ...

فرات : كلامچ هذا چبير بس مردود عليچ ياااا سلوى

تقرب منها و خزرها و رجع گال ...

- والله لو منتي مره و چان تفاهمت وياچ بغير أسلوب

سلوى : و شتـ ...

ما خلاها تحچي و گال ...

- أگصري منها يـ مَره و أمي لا تگربين صوبها

أندار على خالة نجاة و گال ...

- يوم بيت خالي هو بيتچ و اليتعده عليچ ببيتچ هذا مو ربات أصول فـ لا تشرهين عليه

يحچي و يباوع لـ سلوى ، عافنه و طلع ، و بقت سلوى تباوع لـ خالة نجاة بنظرات حقد بعدين عافتنه و راحت لـ غرفتها

نجاة
بعد ما راحت سلوى ، رحت أدور لـ فرات ، ماكو بالبيت كُله ، طلعت بره لگيته گاعد ع الكرسي و حاط اديه على راسه ...

- فرات ماما ليش هيچي حچيت!!

رفع راسه و دحگلي و گال ...

- يعني شنو تريديني أشوفها تهينچ و أسكت؟

- لا تسكت حبيبي بس الحچي اللي حچيته ثگيل و هاي سلوى وحدة شرانية و حقودة اخاف تأذيكم أنت و ابوك و أخوك

- والله اللي يدگ الباب يلگه الجواب ، بعدين شسالفة شنو بيناتكم ليش هالگد حاقدة عليچ؟

- سالفة قديمة لا تدوخ راسك بيها

- لا ما أدوخ أحچيلي يمه

- بعدين أبني بعدين ، آني فايته جوه

فرات
راحت أمي بدون متحچيلي شنو بينها و بين سلوى ، آني هاي سلوى من أول ما شفتها ما أرتاحيتلها أبد ، أجه شهم و گعد بصفي ...

- شبيك فرات؟

- مابيه شي

- تحچي لو شلون؟؟؟

- هاي عمتك سلوى على شوي ردت أبتلي بيها

- ههههههه ليش ولك ، أنت من يمته تتعارك ويه النسوان

- مو آني ، ويه أمي ، غلطت عليها غلط ثگيل و آني سمعتها و ما تحملت رزلتها رزالة غسل و لبس

- عليك العباس؟

- والله

- هاي دواها عمي حسين أصبر خل يدري بالسالفة و هو يربيها

- تستاهل ، زين هسه شراح تسوون بسالفة التهديد؟

- والله ما أدري ، لو بأيدي أهد عليهم مثل ما هدو علينه و الطلقات أجيبها بروسهم مو بالحياطين

- شهم أنت بس أربُز و خلي الكبار همه يتصرفون

- ولك ششايفني گدامك زعطوط؟؟؟

- لا حيشاك ضلعي

***

رافد
النهار كُله و نَفس ما جاي تروح من بالي ، صرت أخلص شغلي بسرعة تا أرجع للبيت و أشوفها ، شكلي حبيتها ، معقولة آني أحب؟! ، شلون حبيتها؟ ، ما أدري بس اللي أعرفه أنو هالبنيه تربعت بگلبي خلص

جيت من الشغل العصر ، دورتلها ما لگيتها ، فتت للمطبخ لگيتها موجودة جاي تسوي چاي ...

- سلام

سمعت صوتي و فزت ...

- آسف شلعتچ!!

- شنو؟

- شلعتچ

- شنو شلعتچ؟

- فززتچ يعني

- هااا أي شوي يلا ميخالف

- جاي تسوين چاي مو؟

- اي تريد أصبلك

- والله ياريت

صبت چاي و أنطتني و گالت ...

- آني حروح للغرفة إذا تحتاج شي صيحلي

- تمام

***

رُسل
صار ساعة أگعد بـ صگر ميفعل يگعد ، آخر شي جبت لارين هي تعرف شلون تگعده ، خليتها بصفه ع الچرباية و هجمت عليه ، گعدت على صدره و صارت تلعب بعيونه و تجرجر بشواربه و تضحك ، الى أن استسلم و فتح عيونه ...

- متگعد ألا أجيبلك لارين

- هاي يعني صرتن حزب عليه؟

- أي نعم ، مو لولو؟

هزتلي براسها و هي تضحك

- سهلة باچر يجي سيوفي و نعلمچن

- هااا يعني تريد تسميه سيف إذا طلع وليد؟

- أي

- مو حلو ما عجبني

- أنتِ سميتي لارين على ذوقچ و ما گتلچ لا ، الطفل الثاني آني أسميه

- أممم تمام

***

عشق
صار الصبح و گعدنه ساعة بالخمسة و نص ، تجهزنه حتى نطلع وگفنه نودعهم بره ، أشوف فرات يباوعلي عبالك يريد يحچي شي بس ما أعرف شنو ، آخر شي أجه وگف بصفي و همسلي ...

- عدلي الحجاب شعرچ طالع

- صدُگ!!

حاولت أعدله شلون مچان لأن ماعندي مرايه

- هااا صار؟

- لا

رجعت عدلت الشال مرة ثانية

- و هسه؟

- هم لا

وگف گبالي و تقرب عليه حييل لدرجة راسي صار قريب على صدره ، صار يعدلي بالشال ، ضربت بخشمي ريحة عطره أخذتني لـ عالم ثاني غمضت عيوني و آني أستنشق عطره أللي أحسه تربع بگلبي ما أعرف ليش ، حسيته أبتعد عني فتحت عيوني و رفعت راسي و باوعتله ، گال ...

- هسه تمام

- أأأ ، أحم شُكرًا

- العفو

ودعناهم و طلعنه للنجف

***

رافد
گاعدين بالصالة آني و أبوية و جت نَفس بس چانت مو طبيعية حسيت بيها شي بس ما ردت أحچي وياها ألى أن گاللها أبوي ...

جسام : بنيتي شبيچ شو وجهچ أصفر؟

- هاااا ، لا عمو مابيه شي ، آني أترخص طالعة بره

- براحتچ بنيتي

راحت و وصلت يم الباب وگفت و حطت إيدها على راسها ، آني هنا ما تحملت رحتلها و لزمتها من كتوفها و فريتها عليه ...

- نَفس شبيچ؟؟؟

أبتعدت عني و وخرت أديه عنها ، أجه أبوية ...

- نَفس بيچ شي بنتي؟

- عمو بس راسي يوجعني

رافد : لعد روحي بدلي حتى آخذچ للمستشفى

- هاااا ، لا ما أگدر ، خلص مابيه شي

- ليش متگدرين؟

ضلت ساكته ما جاوبتني

- معقولة تخافين مني نَفس؟ ، دحگي هو حقچ تخافين و متثقين بيه لأن ما صارلچ چم أسبوع من عرفتيني ، بس أنطيني ثقتچ و صدگيني ما راح تتندمين

جسام : بنيتي خلي رافد ياخذچ ع المستشفى و لا تخافين أنتِ أخته بعهد الله

هزت براسها و راحت تبدل گعدت أنتظرها شوي و جت

جسام : هالله هالله بالبنيه يـ رافد

- بعيوني يابة

طلعنه صعدنه السيارة و توجهنا للمستشفى

***

ريان
أشوف رُسل صارلها أيام مو على بعضها و أكو شي شاغل بالها ، سألتها أكثر من مره بس گالتلي ماكو شي ، بس آني متأكدة أكو شي ...

- هسه ما راح تگوليلي شبيچ شاللي شاغل بالچ!!

- ماكو شي ريان

- لا أكو رُسل أحچيلي تره آني أختچ

سكتت شوي و بعدين حچت ...

- أحس هاي نَفس عينها على صگر

- شلون

- متحچي ويه أحد من الولد غيره ، و أحسها تتابعه بنظراتها دائمًا

- لعد آني شگول

- شبيچ أنتِ؟!

- عشق ويه فرات و بالبصرة ، أكيد هسه وگعته و آني گاعده هنا أتمناه يحبني

- فرات ميگع بسهولة ، و أگُلچ ياها من الأخير حتى تريحين راسچ ، لا أنتِ و لا عشق تگدرن توگعن واحد مثل فرات ، لأن فرات مو بسهولة يحب ، آني أعرفه أكثر منچ

***

رافد
كملنه من المستشفى و طلعنه بطريقنا للبيت ، حسيت نَفس شوي أرتاحتلي و أمنتلي و هو هذا الأريده ، آني ماريدها تخاف مني لأن آني مستحيل أگدر أأذيها ، بهذا الموقف من شفتها تعبانة خفت عليها و تأكدت من مشاعري تجاهها ، مشاعري مو مجرد أعجاب ، هسه تأكدت أني أحبها من صدُگ ، جه ببالي آخذها ع الشط بما أنو أمنت بيه ...

- شنو رأيچ نروح ع الشط؟

- هااا ، مو خاف نتأخر

- لا منتأخر ، إذا متحبين عادي أرجعچ للبيت

سكتت شوي و بعدين گالت ...

- خلص خلي نروح بس منتأخر

- تدللين

فريت السيارة و رحنه للفرات ، نزلنه بمكان للعوائل بس چان التواجد بي قليل مو هوايه ، نزلنه و نَفس راحت تمشي بأتجاه النهر ...

- أگفي لا تگربين هواي ع النهر

- تمام

- آني رايح أجيب شي نشربه ، شتريدين أجيبلچ؟

- لاااا ، لتروح و تعوفني وحدي فدوة

- هينه ما رايح بعيد هذاك المحل

أشرتلها عليه

- أروح وياك ماريد أبقى وحدي

- يلا أمشي

وصلنه المحل

- شتريدين آخذلچ؟

- بكيفك على ذوقك

أخذت ثنين عصير فراولة و رجعنه للمكان ، گعدت ع الميز و كعدت مقابيلي ، تشرب عصير و تدحگ ع النهر و آني صافن عليها و على جمالها ، لعبت بيه طوبه هالبنيه و آني ما صارلي هواي أعرفها ، قاطعت صفنتي من حچت ...

- الفرات حلو

- أيي حلو الفرات

- لونه حلو ازرگ ، دجلة لونه أخضر ، چنت اگول ماكو نهر أحلى من دجلة ، بس من شفت الفرات غيرت رأيي ، دجلة و الفرات أجمل نهرين بالعالم

- أكيد طبعاً ، و الفرات نهر مقدس

- شلون يعني؟

- مقدس لأن مرو من خلاله أغلب الأنبياء ، بالأضافة الى آل البيت ( عليهم السلام ) و الصحابة ( رضي الله عنهم ) ، ، لذالك نهر الفرات نهر عظيم و مقدس عند المسلمين .

- شگد حلووو

- شنو!

- معلوماتك الدينية

- آني احب ابحث بالدين و تاريخه أحب أعرف كلشي عنه

ضلينه گاعدين و نحچي و نَفس تشجعت و گامت تحچي وياي عكس كُل مرة أسحب الكلمة منها سحب و حتى متدحگ بوجهي ، ما حسينه ع الوقت أله مار ساعة گمنه و توجهنه للبيت ...

نَفس : شُكرًا رافد

- على شنو؟

- تونست كلش هواي بهاي الطلعة ، صارلي سنين ما طالعة و متونسة بگد اليوم

- و آني يمچ شوكت متحسين نفسچ ضايجة بس گوليلي و آني مستعد أفررچ الأنبار كلها

- ههههههه تمام

***

عشق
وصلنه النجف و طلعنه بوجهنا لمرقد الأمام علي ، وصلنه و نزلنه ، چان هواي ناس موجودين بس يعني مو مزدحم المكان ، دخلنه أحنه من باب النساء و فرات و خالو علي دخلو من باب الرجال ، زرنه آني و خالة و صلينه و كملنه و گعدت خالة تقره قرآن ، حسيت بشعور يجنن لمن دخلنه المرقد ، راحة عجيبة غمرتني ، فعلاً هالمكان ساحر بجمالة و الراحة اللي يحسها الشخص لمن يدخله ، دعيت شوي و بعدين گمت اتمشه ، طلعت و چان أشوف خالو علي و فرات خالو چان ديقره قرآن و فرات يصلي ، شوي و كمل و گعد يقره قرآن ، و بقيت أتمشه فوگ الربع ساعة ، وگفت يم مره و بنتها من شفت البنيه تذكرت لولو مشتاقتلها كلش ، بقيت واگفة و أباوع ع البنيه و حركاتها الحلوة ، الى أن حسيت بشخص حط أيدة على چتفي ، فزيت و ألتفتت رأسن ، و چان يطلع فرات ، أخذت نفس ، و حچه ...

- شعندچ هنا

- ماعندي شي چنت أتمشه

- همزين ما ضعتي

- شقصدك يعني آني طفلة؟!

- لا يابة مو هيچ ، بس قصدي المكان چبير و مليان ناس و أنتِ متندلين فـ خفت لا تضيعين

- خفت!

هزلي براسه و سكتنه ثنينه ، أجو خالي علي و خالة نجاة ، و طلعنه للمطعم حتى نتغدة ، عاد آني ميته جوع ، طلبنه و گعدنه ننتظر

***

صگر
جيت من الدوام طبگت سيارتي و نزلت ، دگ عليه عُثمان ، و بلغني بشي چنه ناسينه من سنين و أكيد بسبب هالشي راح تگع على روسنا المصايب ، دخلت للبيت و آني وجهي ميتفسر حتى سلام ما سلمت ، چان عمي گاعد ، أستغرب وضعي و سألني ...

- شبيك صگر حتى سلام ما سلمت ، صاير شي؟

سكتت و آني بالي مشغول و بي الف فكرة و حسبه ، رجع گال ...

- صگر يابة جاي أحچي وياك

- هااا هلا عمي

- شبيك شصاير وجهك ما يتفسر

سكتت شوي و آني أحاول أجمع افكاري ...

- عمي ، حارث طلع من السجن

- شنووو؟؟؟

- مثل ما گتلك

- أنت متأكد؟!

- أي والله ، خابرني عُثمان قبل شوية و گالي

- شگد صارله من طلع؟

- على حسب الحچي صارله أسبوع

- هاي الچنه خايفين منها ، ربعنه اليوم يجون مو؟

- أي همه هسه بالطريق

***

عشق
كملت أكل و رحت ع الحمامات حتى أغسل صايرات شوي بعيدات عن المكان الگاعدين بي ، وصلت ، غسلت و كملت و رحت أمشي و أعترض طريقي واحد ، وگف گبالي و گال ...

- ممكن أسمك يحلو

ما جاوبته و حاولت أمشي بس هو رجع وگف گدامي ...

- هسه ما طلبت غير الأسم دگوليلي

- ولي من گدامي لا أفضحك و أسويلك سالفة ألها اول مالها تالي واحد متستحي

حچه بأستهزاء

- يمممه تصدگين خفت

ردت أحچي و باوعت فرات جاي بأتجاهنه سكتت ، وصل يمه و لزمه من ياخة القميص و أشرلي أروح ، فرحت لأن أجه بالوقت المناسب ، رحت أمشي و ما باوعت ورايه

فرات : بالله بربك هي هاي هم فعايل زلم تعترض طريق البنات و تتحرش بيهن ، ولو أنت مو زلمة

راد يحچي بس ما خليته

- أششش و لا كلمة حيوان ، تنگلع من گدامي لا والله أبيتك اليوم بوادي السلام

عشق
أجه فرات و گعد يمنه بس چان ضايج كلش و معصب ، شوي و گمنه ، ركبنه السيارة و كملنه طريقنا ، الطريق كله فرات معصب و كل شوي يباوعلي بالمراية و يضرب الستيرن خفيف ، بقى على هالحالة لحد ما وصلنه البيت ، نزلنه و فرات نزل الغراض ، سلمنه و گعدنه نرتاح بالصالة ، و خالي جسام حچه من دون مقدمات ...

- علي ، حارث طلع من السجن ...

********

يتبع ...

برأيكم منو حارث؟ ، و شنو سالفته؟ ، بالبارت الجاي راح تعرفون أن شاء الله ، أكتبولي توقعاتكم خل أشوف ، و لا تنسون التصويت و التعليق بين الفقرات و متابعة حسابي ع الواتباد و مشاركة القصة ويه أصدقائكم

18.kij
حسابي ع الأنستا تعالو هناك

fwk.0u
حسابي ع التيك توك ضيفو انزل شغلات حلوة تخص الرواية و الواتباد بصورة عامة

سحر الدليمي