شهم يـگــول :
- مريض آنــه ، و دواي حُبچ .
***
گامت رُسل حتى تغسل و چان وجهها أصفر انتبهتلها من العصر على هالحاله ، راحت بأتجاه الحمامات و هي دتمشي ما حسينه بيها ألا و هي واگعه بالگاع
بسرعة راحلها صگر ، حاول يصحيها بس ماكو متصحى ، شالها و راح بيها ركض للسيارة حتى ياخذها للمستشفى ، عمتي نجاة راحت وياه ، و أحنه رجعنه للبيت
صگر
أخذت رُسل و گُبل للمستشفى ، ما أعرف شصار بيها فجأة وگعت و وگع گلبي وياها
- ها يوم ما صحت؟
- لا ماما متقبل تصحى
- يمه عفيه حاولي وياها ، هاچ هذا بطل مي شاهديها بلكت تصحى
أخذت أمي المي و صارت تمسح وجهها بمي و تحركها ، شوي و صحت الحمدلله
- رُسل حبيبتي أنتي ، شبيچ شصارلچ أحچي مو والله خبلتيني
رُسل : دايخة حيل صگر ، أحس هسه راح أتقيأ
- لا لا تحملي حبيبتي ماضل شي و نصل المستشفى
و فعلاً شوي و وصلنه المستشفى ، جت الدكتورة و أخذت رُسل و ضليت أنتظر بالممر و گلبي مثل النار عليها ، شوي و طلعت الدكتورة و گالت أنو رُسل حامل!
فرحت بهالخبر بس حيل خفت على رُسل بالبداية بس الحمدلله مابيها شي
شوي و طلعت من غرفة الدكتورة
- ها عمري شلونچ هسه؟
- الحمدلله أحسن
نجاة : مبروك الحمل يمه و شايفين الخير
- الله يباركلچ حبيبتي عمه
- يبارك بيچ يوم
رجعنه للبيت و گلنالهم الخبر و الكُل فرحلنه
مُهره
باركنا لرُسل لحملها و صعدنا للغرفة آني و عشق عود علساس حتى ننام بس أحنه گعدنه نسولف
- عشق شفتي صگر شگد چان خايف على رُسل خطيه
- أي ، همه كلش يحبون بعض و يخافون على بعض ، يعني رُسل من يداوم صگر خطية تبقى تلوب لحد ميرجع
- يعني همه تزوجو عن حب؟
- هو آني ما أدري بس لمن سألت ماما گالت حبو بعض كلش و حتى أول ما راح صگر حتى يخطبها أهلها موافقو و بعدين ما أعرف شلون وافقو
- ياااا شگد حلو
- أيي
- زين و أنتي؟
- شبيه آني؟!
- ماعندچ كَبل منا منا ( و غمزتلها )
- هههههه لا ولچ والله سنگل مُتسنگله
- هههههه حرامات
- و أنتي؟
- أممم شوفي هو آني سنگل ، بس أحب
- شلون يعني مفهمت؟
- يعني أحب من طرف واحد
- ياااا والله صعبه
- كلللشش
- منو هو يعني وياچ بالجامعة لو وين؟
- لا مو بالجامعة ، عود بعدين أگلچ
***
رُسل
گاعدين بالغرفة آني و صگر ، حييل فرحت بحملي بس بنفس الوكت ضايجة حييل لأن صگر راح يلتحق باچر و ياريت هنا نفس كل مرة لا هالمرة رايح لديالى ، و هو صارله ساعة گاعد يوصي بيه
صگر : حياتي ديربالچ على نفسچ زين
- أن شاء الله
- و ديري بالچ ع اللي ببطنچ و أكلي زين و هاي سوالف الچبس و النساتل أبتعدي عنها لأن موزينه عليچ
- أي
- شبيچ؟
- مابيه شي
- لا بيچ ، أحچي رسوله لا تضوجيني
من گال هيچ آني ما گدرت أسيطر على دموعي و نزلن وحدهن ، صگر تخبل من شافني أبچي ، گُبل جرني لحضنه و صار يمسح على شعري بلمسات خفيفة و كُلها حنان
صگر : أي ليش تبچين يا گلبي بس فهميني!
- ما أگدر صگر ما أگدر على فراگك و أنوب ما واضح شگد راح تضل هناك ، عفيه لتروح حبيبي لخاطري
- ما أگدر يا عمري والله ما أگدر هذا شغلي و لازم أروح و أن شاء ألله ما أتأخر و راح أضل على تواصل وياچ لحظة بلحظة بحيث ما راح أخليچ تشتاگيلي
- أوعدني راح تضل تتواصل وياي و ما تگطع عني أبد
- اوعدچ يابة والله العظيم و النبي مُحمد و غلات أمي ، أضل على تواصل وياچ ، ألا أخليچ تبزعين من أتصالاتي و تگوليلي صگر كافي شلعت گلبي لا تدگ بعد
أبتسمت خفيف على كلامة و الدمعه بعدها تلالي بعيوني ..
- لا تبچين يا عمري ، يابة والله العظيم من أشوفچ تبچين ينمرد گلبي مرد ، تقبلين هيچ تلوعين گلبي؟
- خلص حبيبي ما راح أبچي
- أي عفيه ، دحگي يالعثره
گال هيچ و حط أيده على گصته ..
- هااا شبيك؟
- نسيت أحضر ملابسي
- هسه آني أحضرلك ياهن
- لا لا أنتي لا تتعبين نفسچ آني أگوم
- حبيبي مو ...
- أششش آني أحضرهن
گام راح للكنتور و طلع جنطته و بده يحضر ملابسه و آني أدحگ عليه ..
- صگر
- روحه
- شنو تحب يكون جنس الطفل؟
- اللي يجي من الله حياه الله
- أي أكيد طبعاً ، بس أنت أنت يعني شتحب يكون!
- لو يجينه وليد نعمة من ألله
- أي صح آني هم أتمنى يجي أخ لـ لولو
- أن شاء الله
- يلا حبيبي تعال نام باچر تطلع من الغبشه
***
- و العين لا شافت طيوفك تبشرت
و الگلب حيا بك و أبتسم لك .
شهم : الله ، ولك فرات ما عرفتك شاعر
- يمعود هو كُله بيت شاعر أيش
- أي صح ، بس مُمكن تلگه بيت واحد يوصف شعورك و يعبر عن أبسط التفاصيل بداخلك و يلامس گلبك بطريقة متتخيلها ، و بالمقابل أحتمال تسمع قصيدة مجرد كلام عادي ، فرات الشعر أحساس تحس كُل كلمة توصف شي بداخلك ، الشعر مو مجرد كلام عادي لا الشعر أكبر بهواي
- يول بالطلاگ صحيح
- ههههههه
- ما عباليك تفتهم والله
شمرت عليه بطل المي و گلت ..
- ولك شني آنه ما أفتهم؟!
- رب الفهم أنت ضلعي
اي عفيه ، تگوم نطلع؟
- وين؟
- ما اعرف اي مكان ، بس نطلع لأن أختنگت من البيت
- أي نطلع ليش لا
- و رافد وينه حتى يجي ويانه
- معود هذا دايح لا تخاف علي ، ولا يگعد بالبيت
گام فرات و گمت وراه ، ويه ما گمت و أحس الدنيا أفترت بيه و ردت أوگع ، رجعت گعدت ع الكرسي و حطيت أيدي على راسي ، أجاني فرات مستغرب ..
- شههمم ، هااي شبييك يول؟
- هااا ، لا مابيه شي بس دخت شوي
- شسالفة شصايرلك!
- مادري ، يلا خلينه نروح
- تگدر
- أي أي ، هي دوخه بسيطة
- خوش يلا عجل
عشق
چنه گاعدين آني و مُهره نتابع مسلسل بس خلصت ، بعد ما طلعو الولد قررنا نطلع نگعد بالحديقة الجو كلش حلو يونس ، طلعنه و گعدنه ، طبعاً جبنه حبشكلات چبوسه على نساتل على عصاير يعني من هالأمور
- مُهره
- هممم
- البصرة حلوه؟
- كللش حلوه
- أتمنى أزورها
- تزوريها أن شاء الله ، اگلچ عشق أنتي أبوچ متوفي مو؟
- أي
- الله يرحمه حُبي ، آسفه ذكرتچ
- لا عادي عمري أصلاً آني ما ناسيته ، هسه ماعلينه ، أحچيلي أنتي عن عائلتچ
- اممم ، شوفي حُبي آني عندي أخ واحد اللي هو سجاد ، اعزب ما متزوج ، و عندي اخت ثانية أسمها زينب و متزوجة ، بابا هو الچبير و يجي وراه عمو سلام و بعدين عمه نجاة و آخر شي عمو بكر ، عمو سلام عنده ولد واحد اللي هو شهم و بنتين وياه يامور و رقية و هم متزوجات ، عمو بكر عنده ولدين و بنت عباس الچبير و يجي وراه عبدالله بس مو هنا يدرس بالسويد و ياسمين متزوجة
- يعني اختچ و بنات عمامچ كُلهن متزوجات
- أي آخر وحدة يامور بنت عمو سلام تزوجت قبل سنة ، و البقيه تزوجن قبل لا يدخلن العشرين تركن الدراسة و تزوجن بأرادتهن اهلي ما جبروهن على شي ، ما عدى يامور و ياسمين لا كملن دراستهن و تخرجن
- أي احسن الهن
***
شهم
رحنه آني و فرات لـ كافتريا مو بعيده هواي عن بيتهم ، گعدنه و طلبنه عصاير
فرات : بعدك تدخن نارگيله يول؟
- لا ولك بطلتها غير لعبت بيه طوبه
- أي أحسلك
- أي شيخ فرات ، يلا أحچيلي
- شحچي!
- شوكت تتزوج؟
- سد الموضوع شهم
- لا ما أسده فرات ، لك ياخي غلط اللي دتسوي غلط و حرام بحق نفسك
- دحگ شهم آني جاي أحاول أنسى الماضي و أطلع منه ، بس ياخي سالفة الزواج ما أحبها ، ماريد أتزوج
- و هذا الشي دليل على انك مجاي تنسى الماضي و مجاي تنساها ، فرات أنت على منو دتضحك على نفسك لو عليه؟ ، ولك آني أعرفك أكثر من نفسي!
بدت تظهر ملامح القهر على وجهه ، سكت و زفر هوى قوي و بحسرة و رجع ظهرة ليورا ، حط أيده على رُگبته و صار يباوع ليساره ، رجع يباوعلي و حچه ..
- أي شهم أي ما ناسيها و حق لا اله ألا الله ما ناسيها ، ياخي جربت انساها بس ما گدرت بكُل مره أحاول أنساها أفشل ، صورتها ما جاي تفارگ خيالي و صوتها لهسه يرن بمسامعي والله ، يول أنت تدري آني باليوم جاي أموت ألف ميته على فراگها ، صح تشوفني أضحك و اسولف بس بداخلي نار مشتغله ، 4 سنوات 4 ضبط صارلها من توفت و آني ليهساع أحبها و أتمناها ترجع
( هنا تذكرت أقتباس يوصف حالة فرات بس كاتبته من زمان🥺💔👇 )
" من الصعب جداً أن تُجبر قلبكَ على نسيان أحد أحبهُ و تَعَلق بهِ كثيراً صدقني أن ألأمر ليس سهلاً "
- أعرف فرات و حاس بيك و العباس ، بس ميصير تبقى هيچ حاول تنسى و تتأقلم ياخي ، الحي أبده من الميت ، و حتى لو أنت ما گدرت تنساها ، صدگني باچر تطلع بنيه بطريقك تحبها و تنسيك كلشي مو كادر تنساه ، و أذكرك بهاي و گول شهم گال
- ياريت والله يا شهم ، لأن آني تعبت أحس ماضل عندي طاقة أبد
***
عشق
گاعدين آني و مُهره بالحديقة و أجو الولد ، فرات و شهم ، گمت حتى أروح ...
مُهره : هاي وين عشق؟
- أأأ شسمه رايحة
فرات : وين رايحة ضلي تعللي ويانه بعد وكت
رجعت گعدت بمكاني ، چنت مفكرة انو فرات ميقبل أگعد وياهم لأن شهم موجود ، بس عادي عنده و هو مبين كلش يثق بـ شهم لذالك ميهتم لهالأمور
شهم : أي فرات سمعنه فد بيت شعر من عندك
مُهره : هاي شنو فرات تكتب شعر أنت؟
فرات : لا يمعودة هذا شهم يبالغ ، مرات تخطر ببالي شغلات و أكتبها عادي
- بس حلوو هيچ
شهم : تعال صدگ باجر صگر يروح لديالى؟
- أي صحيح
- شعنده؟
- عدهم عملية هناك ، زين أگُلك ، حيدر و جماعته رجعو تعرضولكم شي؟
- لا ولك حتى من الشغل أنسحبو مدري شجاهم
- لا تأمنولهم تره هذوله غدارين
- صحيح ، و أنتن شجاچن ساكتات ولچن
عشق : هو أحنه نعرف شدتحچون حتى نشارككم بي
فرات : حقچن عيني ههههههه
بقينه گاعدين نتعلل للساعة بالثنتن ، هوواي تونسنه بهالليلة ، الولد چانو يسولوفون و يحششون و آني و مُهره بس نضحك و همه يصيحون فاهيات ههههه ، بعدين كلمن راح لغرفته و نمنه
***
رُسل
فتحت عيوني الصبح لگيت صگر جاي يلبس ببدلته و رجعت ضجت و خنگتني العبره ...
- راح تروح؟
- ها گعدتي ، صباح الخير حياتي
- صباح النور ، ما گتلي راح تروح
أجه گعد گدامي على طارف الچربايه و حچه ..
- اي حبيبتي راح أروح
آني نزلت راسي و أحس وجهي بوخ من الحرارة بالگوة سيطرت على دموعي ، تقرب عليه و رفع راسي و صار يمسح على خدي
- شوفي گلبي أريدچ تصيرين قوية بغيابي ، و تديرين بالچ على لارين و الجنين اللي ببطنچ ، و أهم شي ماريدچ تبچين يلا أوعديني ما تبچين
حاولت أستجمع قوتي ، و مسحت دموعي اللي نزلن لا أرادياً ، وخرت شعري عن وجهي و حچيت ..
- أوعدك حبيبي ، أنت بس ارجعلي بالسلامة و لا تطول
- عفييه حياتي ، أن شاء الله ما أطول
گام صگر و شال جنطته و آني لبست شالي و نزلنه جوه ، لگينه الكُل گاعد ما عدا البنات و الولد ، سلم صگر على أمه و أبوه و عمة نجاة حالتها مو افضل من حالتي بس خالو علي يصبر بيها
صگر : يا يوم يا حبيبتي قابل آني أول مرة أطلع خارج المحافظة
- أي يمه ادري ، بس آني ماريدكم تبعدون عني لحظة وحدة
- ميخالف حبيبتي ما أطول عليكم أن شاء الله
ودع الكُل و شال جنطته و لارين مچلبه بأيده متقبل تهدها أنمرد گلبي عليها أخذها عمو علي و شالها و صار يقنع بيها و صگر مشه و أخذ گلبي و راحتي وياه
شهم
گعدت من النوم الساعة بالـ 10:15 هاي من وره تعليلة البارحة ، گمت و احس راسي يوجعني صارله أيام على هالحالة ما أعرف شسالفة ، غلست ع الموضوع و گمت غسلت و صليت ، طلعت بوجهي على غرفة فرات و الأفندي نايم و مخلي السبلت على أعلى درجة لا و چماله نازع البدي و باقي بس بالفانيله ، ما أعرف هالولد شبي ميحس بالبرد ، رحت طفيت السبلت و گعدته ..
- هااا هااا ياخي شبيك
- گوم ولك الساعة بالعشرة
رفع راسه و باوعلي بأستغراب ..
- من كُل عقلك؟
- لا من نصه ، گوم ولك
- يالكعبة تأخرت ع المعرض
گمت بسرعة غسلت و جيت أصلي و شهم گاعد ينتظرني خطية ، كملت و نزلنه لگينه البنات هم توهن گاعدات و جاي يسون ريوگ يعني مثل وضعنه
گعدنه ع السفره و جت عشگ حطت الأكل و كعدت ، أنتبهت لأيدها بعدها آثار الحرگ بيها
- شلون صارت أيدچ
عشق : الحمدلله زينة
- شفتي معجون الأسنان شگد يفيد
( فعلاً يفيد جربو آني مجربته )
أبتسمت خفيف و گالت ..
- أي صح كلش يفيد
- أي عاد مرة ثانية ديري بالچ
- أن شاء الله
شهم : أحم مُهره شلونچ؟
- بخير الحمدلله ، و أنت شلونك؟
- على ألله ، حضري نفسچ اليوم أريد أطلعچ
- صدگ ، وييين؟
- أفرفرچ بالأنبار ، لأي مكان تريدينه
- تندل؟
- أي چا شلون
- لعد شو مندليت بيت المهيوب من أجينه؟
- چنت دايخ والله و مضيع الأولي و التالي
- سوده عليه حقك
أبتسمت على حچايتها و كملنه أكل .
رافد : هااا يولو توكم يلا گعدتو ، شگد فطيرين لعد
فرات : شوف منو يحچي
- أگول تره أبوية و عمي علي و عمي حسين بالمعرض ينتظرونكم علمود توقيع العقد
- صدُگ ، يعني رايحين للمعرض؟
- أي من الصبح و آني چنت وياهم
- زين ، شهم أنت تحضر الأچتماع مو؟
- أي لازم لأن أوقع عن أبوية
- يلا عجل نمشي
عشق
راحو الولد و بقينه آني و مُهره گاعدين ، ما أفتهمت شديحچون
- أگول هاي شكو شعدهم
- لچ مو خوالچ يردون يوقعون ويه أهلي عقد نقل السيارات و كذا ، ما أعرف بهالسوالف بس هذا اللي فهمته
كملنه و گمنه آني غسلت المواعين و مُهره ساعدتني بتنظيف المطبخ ، خلصنه و أجينه نگعد بالصالة و أجن خالة نجاة و ماما و عمه سليمة گعدن ويانه ، شوي و أجت رُسل تبين أحسن من الصبح
رُسل : أحزرو شنو باچر
كُلنه صرنه نتسائل شنو باچر؟
- عمه نجاة شنو معقوله متعرفين شنو باچر؟
- لا والله ماما ما أعرف شنو
- باچر عيد ميلاد لولو حياتي
مُهره : ياااا صدگ؟!
عشق : الله عليچ؟!
- ههههه و القرآن
مُهره : شگد حيصير عمرها؟
- سنتين
حياتي العمر كُله يا رب
- تسلمين عمري
عشق : عاد آني أكثر شي احبه بالدنيا عيد ميلاد الأطفال ، رُسُل شنو رأيچ آني و مُهره نجهز للحفلة
- والله ياريت ، لأن آني مالي خلگ أطلع من البيت
- خلص و لا يهمچ عدنه ، مو مُهره؟
- أكيد طبعاً
كلش تحمسنه آني و مُهره للحفلة ، مُهره هواي بيها أشياء تشبهني لذالك توالمنه آني وياها و أنسجمنه ويه بعض بسرعة ، صرنه نخطط للحفلة و شنو حنسوي ، أتفقنه من يجون الولد نخليهم ياخذونه علمود نشتري الزينة و هالسوالف
أجو الولد و حطينه غده و تغدينه ، صار العصر و تجهزنه و طلعنه للسوگ و أجو ويانه شهم و فرات و رافد بقى بالمعرض ، أول مدخلنه على محل الزينة
مُهره : شنو رأيكم النفاخات ناخذهن أحمر و أبيض؟
عشق : لا وردي و ابيض أحلى
مُهره : لا محلو أحمر و أبيض أحلى
فرات : و آني أگول اسود و أبيض أحلى
عشق : أيييع ، تره هو عيد ميلاد طفلة صغيره ليش دتحسسني عيد ميلاد باتمان!!
شهم : ههههههه أتفق صراحة ، شبيك فرات صدگ چذب
فرات : دسكتي أم الأيع الفاهية
عشق : ياااا آني فاهية؟؟؟!
فرات : رب الفهاوة
عشق : أنتـ ...
قاطع كلامي و مخلاني أكمل المُتعجرف ..
فرات : المهم المهم ، آني رايح أشوف كيكه و أگُلهم يجهزونه لباچر ، و أنتو ضلو تكاونو ع الأحمر و الأخضر ، يلا أودعناكم
شهم : أوگف هاك السيارة
- لا ميحتاج هذا قريب هسه أگله و أرجعلكن
- ماشي
أختارينه الزينة و هالسوالف و جبنه كلشي و فرات هو اللي أختار الكيكه عاد أن شاء الله تطلع حلوه و زينه لأن هو مبين ماعنده ذوق حلو ، كملنه كلشي و رجعنه للبيت المغرب جبنه عشه ويانه من بره ، وصلنه و وره شوي حطينه العشه و تعشينه ، گمنه آني و مُهره و ويانه شهم و فرات حتى نزين الصالة ، بلشو هُمه بتعليگ النفاخات و آني رحت أرتب باقي الغراض
مُهره
راحت عشگ و بقينه ، شهم و فرات ديسون بالبردات و آني جبت كراسي و أجيت أعلگ النفاخات ، حطيت الكراسي و و صعدت عليهم چانن يتحركن بس أهتميت صعدت و گمت أشتغل وره شوي تحركن الكراسي حيل و ردت أوگع لو ما شهم قريب من يمي و لزمهن ، وگاع گلبي چان تكسرت ...
شهم : على كيفچ بوية على كيفچ ، شو أنزلي
- بعد ما كملت التعليگ
- ولچ يا تعليگ أنزلي لا تتكسرين و آني شسوي بروحي
- زين نزلت
- روحي ساعدي فرات و آني آخذ مكانچ
- تمام بس ديربالك من الكراسي
- بوية شلي بالكراسي آني ، قابل قزم مثلچ
فرات : هههههههه صحيح والله
- هااااا يعني أتفقتو عليه
- آني مالي علاقة هذا شهم
شهم : چا آنـه ما گلت غير الصحيح
رحت أساعد فرات و شهم بقى يعلگ بالنفاخات ، زينه الصالة كُلها و أجت عشق ساعدتنه و كملنه و گعدنه نرتاح
رُسل
نزلت للصالة دحگت لگيتها كُلها مزينة و كُلشي جاهز ...
- عاشت إيدكم ذوقكم يجننن والله
عشق : قصدچ ذوقنه آني و مُهره ، أما ذوله الثنين كُلشي ميعرفون
مُهره : أتفق
شهم : هاااا تتفقين يعني
فرات : يعني هسه صرتن بس أنت التعرفن يالفاهيات
عشق : لو ما أحنه وياك چان صارت الحفلة لـ باتمان مو لـ لارين على ذوقك هذا
بقو يتناگرون واحد ينطي الثاني ، بعدين گعدنه كُلنه تعللنه و گمن كلمن راح لغرفته ينام ، ثاني يوم بالليل جه وقت الحفلة جهزنه كُلشي و كشخنه و لبست لولو فستان وردي يجنن طلع عليها ، فتحت كام ويه صگر حتى يشوف عيد ميلاد لولو و جبنه الكيكة و شالها عمو علي تا يطفي وياها الشموع بما أنو صگر ما موجود فـ هو بمكانه ، شالها و طفو الشموع سوه و لارين مكيفه و تضحك و من الحماس جرت الشماغ مال عمي و وگعته ع الكيكة و تمصخ هههههه ، گال عمي و هو يحچي وياها ...
- لا يا بنت أللي لا صامو و لا صلو ، هاي شسويتي يولي
هي تدحگ عليه و تضحك ، سمعه صگر و ردله ...
- هااا يابة هااا ششايفنه كُفار قُريش تا لا نصوم و لا نصلي
- يول هاي بنتك خبيثة طالعة عليك
نجاة : و ليش ما تگول طالعة على جدها الظاهر نسيت سوالفك تريد أذكرك بيهن
- أششش أسكتي يمعودة لا تفضحينه
- ههههههههه
وگفنه كُلنه و أخذنه صور و شغلنه أغاني بس عمي جسام و عمي علي و عمي حسين طلعو بره لأن يكرهون الأغاني ضلينه بس أحنه
شهم
واگف و أباوع لـ مُهره شلون منسجمه ويه فرات و تسولف و تضحك آني تسودنت أحس الغيرة عمت عيوني بس كضيت أعصابي ، ناديتها شوي بعيد عنهم ، أجتني ...
- هلا شهم رايد شي؟
- هالله هالله بالثگل يـ مُهره
- هااا؟؟؟
- أنتبهي لـ تصرفاتچ زين تمام
- هاي شبيك شهم شمسويه آني!!
كضيتها من إيدها و عتيتها ، حچيت و آني صاك على سنوني ...
- ولچ تسأليني شمسوية ، مُهره لا تسودنيني بالزايد تره آنـه مسودن و من يطگن عندي أبوي ما أعرفه
- آخخخ شهم إيدي شبيك ، وخررر
عتت إيدها مني و راحت ، آنـه أحس بعد ما أسيطر على أعصابي إذا بقيت دقيقة هنا أسويلي طرگاعة ، عفتهم و رحت ، ركبت سيارتي و طلعت و آنـه ما أدري وين رايح ، هاي مُهره تريد تخبلني ما تدري آنـه شكثر أغار عليها ، سقت بسرعة جنونية بقيت أمشي ألى أن وصلت يم سيطرة ، وگفوني و الشرطي صار يلومني ع السرعة أللي أمشي بيها و آنـه روحي ما طايقها ، چلمه منه و چلمه مني و أشتد الكلام بيناتنا ، نزلوني و أخذوني للمركز و خلو السيارة يمهم
***
فرات
خلصت الحفلة و أنتبهت شهم ما موجود ، دورتله بكُل مكان ماكو ، طلعت بره سيارته ما موجودة ، شلون يطلع بدون ما يگول لأحد ، دگيت عليه مرتين يدگ و ما يشيله ، ضل بالي يمه خاف صايرله شي هو صارله يومين وضعه مو تمام ، ضليت أفتر بالحوش و الفون بأيدي ، شوي و اتصل فتحت الخط ...
- هااا شهم أنت وين؟؟
- آني مو شهم ، وياك الضابط عزت
- ضابط؟!
الضابط حچالي السالفة كُلها ، بسرعة ركبت سيارتي و توجهت للمركز ، دگيت على صگر تا يتصرف بلكت يعرف أحد ، وصلت المركز و دخلت للضابط ، و گال راح نطلع ماعدنه شي وياه ، الظاهر صگر حاچي وياه گبل لا أصل ، بس خلو يوقع تعهد اللي صار ميعيده مره ثانية ، طلعنه من المركز و شهم ساكت ما حچه و لا كلمة ركب سيارته و طله گبلي و طلعت وراه ، وصلنه البيت و نزل و هو كأنو ما بحلگه لسان ...
- شههممم ، أگفف يوول شبيك ، صد جاي ، أحچي وياك يول
وگف و ألتفت عليه ...
- هااا فرات شبيك
- أنت اللي شبيك؟؟
- مابيه شي
- أنت من شوكت تتكاون ويه الشرطة ، شصايرلك شهم أحچيلي
- فرات و علي مالي خلگ أحچي هدني عليك الحسين
- يول غير أفتهم شبيك!!
- مابيه شي ، آسف دوختكم بهالليل أنت و صگر ، بس آنـه حظي فگر
- أنچب لا تحچي هيچ أحنه أخوانك ، و لو طحت بشدة أحنه النگفلك
حط إيده على چتفي و أبتسم أبتسامة حزينة و گال ...
- أعرفكم و علي متقصرون
ضليت أحاول وياه يحچيلي شبي بس ماكو قفل ميحچي شي ، كلمن راح لغرفته و نمنه
***
شهم
گعدت الصبح و آنـه راسي يريد ينفجر ، ما أدري من ضيمي ما أدري شبي ، غلست ، و گمت حطو الريوگ و أكلت شويه لأن مالي نفس لشي ، أحس بروحي مختنگ
گال عمي جسام أنُ شيخهم عرف أنُ أحنه جايين من البصرة و عازمنه ع الغدة يمه ، ما ردت أروح بس عمي حسين گال عيب لازم نروح على عزيمة الشيخ
صارت الساعة بالعشرة و نص و طلعنه ، بين ما دنمشي حتى نطلع للسيارت و آني أحس خلص بعد ما أگدر الدنيا صارت تفتر بيه صحت فرات و دخت و ما حسيت ألا آني واگع بالگاع ...
********
يتبع ...
بارت طويل و قفلة قوية ، شرايكم🌚؟
شنو توقعاتكم للبارت الجاي؟ ، أكتبولي بالتعليقات
+ آسفه ع التأخير بس والله العظيم ما جاي يصيرلي مجال اليوم ضغطت على نفسي و درست من وكت و كملت النقص اللي بالبارت و نزلته ، المهم لا تقصرون بتفاعلكم الحلو و لا تنسون الحبشكلات الحلوة من تعليق بين الفقرات و التصويت و هالأمور
18.kij
تعالو أنستا
سحر الدليمي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!