- بداية عشق ليس لهُ نهاية .
***
طلعت أتمشى بالحديقة الخلفية ، بعد ما تأكدت أنو فرات ما موجود ، أريد أبقى وحدي بعيد عن الناس و صوتهم ، دا أتمشى و ما حسيت أله واحد جرني من أيدي و دارني عليه ، چان فرات ، صرنه وجه بوجه ، چان يتنفس قوي و عاگد حواجبه ، لازم إيدي و يباوع عليه ...
- بس فهميني شبيچ وياي؟!
- هد إيدي فرات أريد اروح
- ما أهدچ أله تحچيلي شبيچ
سكتت ما جاوبته و آني أحاول افلت إيدي منه
- ليش تنهزمين مني كُل ما شفتيني!! ، مضوجچ بشي آني؟ ، ليش تتهربين مني عشگ؟
- عووفننييي فرااات وخررر عنييي
- لا تصيحين و أهدي و أحچيلي شبيچ!!
- ماااا ماابيييه شييي أكررههكك أكرررهككك و ماريد أشوووفك أرتاحيت ، ووخرر عوووفنييي
هديت إيدي منه و ركضت للبيت و هو بقى واگف بمكانه ، ليش سويت هيچ و آني أحبه ، والله أحبه ، بس شفايدة هالحُب و شنو تاليته ، معروفه تاليته أصلاً هو ماله أول حتى يصيرله تالي ، فرات لازم أنساااه
***
فرات
شهرين ضبط و آني ما شايف عشگ غير چم مره بس ، گلبي مشتعل نار عليها و الليل ما أنامه و آني أفكر بيها ، و هي وين متشوفني تنهزم مني و المكان اللي بي آني ما تدخله ، أحتاريت وياها ، شمسوي بيها حتى هيچ كارهتني؟! ، آني أحبها و ماريدها تكرهني ، لو سوت هيچ وياي آني أحترگ ، مشيت للسيارة حتى أطلع ، دگ الفون و طلع شهم ...
- هلا شهم
- هلا بيك ، وين أنت؟
- طالع للمعرض
- شمالك صوتك ما يطمن؟
تنهدت قهر ، جريت نفس و بقيت ساكت
- شبيك ولك ما تحچي؟!
- أخوك واگع يول واااگععع!!
- واگع بشنو ولك؟ ، أوگف أوگف لا تحچي شي آنـه هسه بالطريق جاي عليكم ، أوصل و نحچي وجه بوجه مبينه سالفتك مو مال ينحچي بيها ع التيلفون
- شعندك جاي؟ ، و ليش ما گتلي من زمان
- عندي شغل ، صارت بسرعة و اليوم قررت أجيكم و ما صارلي مجال أخابرك
- يلا عجل حياك الله
سديت الفون و كملت طريقي للمعرض و آني دايخ بعشگ و تصرفاتها وياي اللي تشب النار بصدري .
***
مُهره
مَرت الأيام و الأوضاع يوم عن يوم تتوتر ، حيدر و جماعتة أكثر من مَره هجمو ع الشركة و تعاركو ويه عمامي يهددونهم لو ينسحبون من العقد الداخلين بي لو ما يحصللهم خير ، وأبوية و عمامي رافضين ينطون أكسار و يطخون الهم ، و بنفس الوقت خايفين علينه منهم ، لأن اللي خلاهم يوصلون لبيت عمي سلام و يرمونه و هُمه يدرون أحنه بي يگدرون كُلشي يسون ، بابا خله حراس ع البيت مالنه و وصى عمامي هم يخلون ، و الولد وين ميطلعون سلاحهم وياهم و يبلغون ليوين رايحين ، صار شهرين ما حاچيه ويه فرات أدگ عليه ميجاوبني ما أعرف شبي عليه ، عشق أحچي وياها و ما أدري شبيها تبچي و تگول كُله صوچي آني شلون سمحت لنفسي يصير بيه هيچ ، أريدها تحچي شبيها متقبل بس تبچي و تلوم بنفسها رحت لأني گاعده بالغرفة ، دخلت ...
- ماما
- هلا ماما
- بعد كم يوم يرجع الدوام بالجامعة ، شلون راح أداوم و الأوضاع هيچ!
- والله يـَ ماما ما أدري ، يجي أبوچ و نشوف تدبيره لهالموضوع
- ماما خاف ميخليني أداوم
- إي حقه إذا سوه هيچ
- مامااا شلووون و آني هاي آخر سنة أليه ، شللوون ترديني أضيعها!!
- إي يا يمه چا لو صارلچ شي يضيع عمرچ ، ذيچ أهون من هاي بنيتي
- أوووف
گمت رجعت لغرفتي و آني أفكر بدوامي و بتجاهل فرات أليه و بسالفة عشق و التهديدات اللي دتوصلنه ، كلهن ألتمن عليه .
***
شهم
وصلت الأنبار و رحت بوجهي للمعرض ، دخلت و لاگاني فرات ، مغندب و العيون حمر و الوجه ما يتفسر ، گعدنه ...
- هاي شمالك ولك ، شو السالفة مبينه مو هينه
- منيلها هينه شهم ، راح أتخبل والله!!
- شسالفة فرات تراك وهدنتني ، أحچي؟!
- حَبيتها ، و آني الچنت أگول مستحيل يرف گلبي لـ بنيه من بعد ما راحت ميس ، شفتها و دفرت باب گلبي و تربعت بي
- أوگف خل أستوعب ، فررراااات يحححبببب ولككممم سممعتووو فرررااااتتت غير رأيييههه و حَببب
- أشششش يووول أسكت يرربك منجدتني
- أوگف ، و أنت شمالك تگول مذبوحلك غالي ، چا غير اليحب يفرح
- مو هذا أنت تحب و ما محصل غير الضيم
- عاد آنـه سالفتي سالفة ، أنت شمالك شني سالفتك و منيه هاي الذيبة الگدرت توگع فرات
- عشگ ، بس شالعة گلبي و مرمرتني
- ليش!! ، آنـه على حد علمي علاقتكم زينه ، شمالها وياك؟
- مدري حالي حالك ، صارلها شهرين ، وين متشوفني تنهزم مني و ما تنجمع وياي بمكان واحد ، كلمة متحچي وياي ، شهم البنيه مو طايقة شوفة وجهي ، و آني راح أتخبل عليها ، طول الليل ما أنام و آني أفكر بيها ، نهبت گلبي من بين ضلوعي و شعلت بي النار!!
- أنت مضوجها بشي؟
- هو هذا اليقهر ، آني كُلشي ما مسوي بيها و هيچ تنفر مني ، گُلي شسوي شهم!!
- آنـه برأيي تسايرها و لا تضغط عليها خليها على راحتها و شوف شتاليها
- و گلبي شسوي بي
- والله و رجع گلبك يدگ يـَ فرات ، تتذكر من گتلك باچر تطلع گدامك بنيه تنسيك ميس و كلشي ما تگدر تنساه
- نستني ميس و شعلت النار بصدري
- ميخالف تهون ، هو هذا الحب ياخوي شمحصلين منه غير الضيم ، ساعة السودة الحبيت بيها ، هذا گلبي الأغبر لو بأيدي أطلعه من صدري و أذبه بالچول
تنهد و حچه ...
- و أنت شتالي سالفتك؟
- أووووف ولك أوووف
- شصاير يول!!
- أبوي عرف أني رايد مُهره و عرف السالفة كلها
- إي؟
- شـ إي ، يگوم و يگعد و يگلي لو تخلينه نروح نطلب البنيه من عمك لو تنساها و تخليني أزوجك ، و آنـه ما أگدر أباوع بـ بنيه غيرها أنوب أتزوج
- شجايه خالي ليش يسوي هيچ!!
- هو يشوفني ضايج و مقهور و يريد يزيح الهم عن گلبي بأي طريقة عباله سهلة أروح أخطبها من عمي و هي ما تريدني و البنيه ما تنغصب ، لو ظنه إذا زوجني راح أنساها
- و هسه شراح تسوي ، أنت لازم تقرر ما دام خالي جاي يضغط عليك
- ما أدري والله ، هسه هدنه من هالسوالف اللي ما منها غير القهر ، آنـه جاي هين عندي شغل و حتى أحذركم
- تحذرنه من شنو؟!
- من حيدر و جماعته ، هُمه يدرون أنو أحنه وياكم متعاقدين و نشتغل سوه ، فـ خاف يدورون عليكم حتى يأذونه بيكم أو يأذون شغلنه المشترك ، فـ ديرو بالكم ياخوي
- هو أحنه نلگاها من حيدر لو من حارث ، تره مو وضعية هاي بالقرآن ، شنو أحنه نضل جاك الذيب و جاك الواوي!!
- ليش شماله حارث ، متعرضلكم؟
- عبالك يسكت ، دزلنه تهديد لحد البيت و عمي خايف علينه و يوصي بينه ديرو بالكم و أخذو حذركم
- سبحان الله مثل عمي حسين ، حقهم والله ، ميخالف فرات طيعو و أخذو حذركم و أحتاطو زين أسمعو كلمة چبيركم تراهو ما يحچي غير لمصلحتكم
- أن شاء الله خير
***
نَفس
جيت لغرفة عشق ، دگيت الباب مرتين بس ما ردت عليه ، فتحت الباب و فتت لگيتها گاعدة ع الچرباية و حاطه راسه بين رجليها و تبچي ...
- ولچ ععششق ، هاايي شبيچ عُمري ليش تبچين منو وياچ؟؟
مستمرة تبچي و تشاهگ و ما دترد عليه ، تخبلت هاي شبيها البنيه ، رفعت راسها بأديه و درتها عليه ...
- ولچ شبيچ ليش هالدموع؟!
جاوبتني و هي بالگوة تحچي ...
- أحبه نَفس والله أحبه ، بعمري ما نزلت دموعي لرجال غير أبوية لمن توفى ، بس هسه دموعي مداسيطر عليهن لمن أتذكر هو مو أليه ، آني داموت نَفس والله داموت
- أششش أخذي نفس حبيبتي و أهدي و أحچيلي منو هذا اللي تحبينه و مو ألچ؟؟
مسحت دموعها عن خدودها و حچت ...
- فرات
- إي و ليش دتحچين عنه هيچ
- هو ما ناسي خطيبته اللي توفت و ميريد يحب بنيه غيرها ، و آني گلبي الأغبر حَبه و تعلق بي و آني أعرف مستحيل يصير ألي
- أنتو حچيتو بهالموضوع و گالچ هالحچي يعني؟
- لا ، بس آني أعرف هو ما ناسيها ، حتى السوار اللي بأيده محفور بي حرفها
- ما دام هو ما گايلچ أنتِ لا تألفين و تتخيلين من يمچ ، يجوز ناسيها و مديفكر بيها بس هاي أفكارچ أنتِ
- و إذا طلع صدُگ مناسيها؟ ، و آني گلبي تعلق بي و مجاي أگدر أنساه
گالت هيچ و رجعت تبچي ، جريتها عليه و حضنتها لصدري ...
- أشش حَبيبتي خلص أهدي كافي بچي
بهالأثناء دخلت خالة بدور و شافت عشق تبچي و تخبلت ...
- يمه بنيتي ههااي شبيچ تبچين يوووليي!!
سحبت نفسعا عشق من حضني و مسحت دموعها و حچت ...
- لا ماكو شي ماما ، بس رسبت بالأمتحان و گالو بعد يومين يرجع الدوام و آني مالي واهس أداوم
- بس هيچ؟
- إي
- يـَ يمه وگعتي گلبي عبالي بيچ شي
***
فرات : هسه راح تطلع للبصرة؟
شهم : إي ما دام كملت بوكت راح أطلع
- شهم إذا أنصحك تسمع مني؟
- گول
- آني برأيي تحچي ويه مُهره و تفض السالفة
- ما أعرف فرات
- لا تضل ما تعرف شهم ، لازم تحچيلها اللي بگلبك حتى تعرف اللي ألك و أللي عليك ، ما يصير تضل هيچ ، خصوصًا و أنت تگول خالي جاي يضغط عليك
- يعني أحچي وياها؟
- آني أگُلك أحچي وياها و فض السالفة
طلعت و آني كُلي أمل و مقرر أحچي لـ مُهره عن كُلشي ضامه بصدري ، أصلاً آني ما أعرف شلون باقي ليهسه و ما حاچيلها
***
نجاة : هاا أبو صگر طالع؟
علي : إي طالع
- ديربالك على نفسك
ألتفت عليه و أبتسم ...
- الكاتبة الله يصير يـَ أم صگر
- أكيد ، بس ديربالك على نفسك فدوة علي ، ماريد اللي صار گبل سنين ينعاد ، تره مابيه حيل أتحمل لو تأذيت أنت أو ولدي
- بعون الله ما يصير شي ، أنتِ لا تديرين بال ، يلا أودعناچ
- صَبر
- هااا؟؟
- نسيت سلاحك!
- ما أحتاجه
- أحنه شحچينه قبل شوي ، و جسام مو وصاكم ما تطلعون بدون سلاح ، أخذه
- صار ، و هذا السلاح و أخذنا ، أمر ثاني يـَ أم صگر؟
- عساك سالم يـَ أبو صگر
طلع و آني رحت للصالة و لگيت بدور گاعده وحدها ...
- هااا خيه شمالچ گاعده وحدچ
- أفكر بـ عشق
- شمالها عشق؟ ، أله صحيح هي شبيها ما تطلع من غرفتها أله قليل ، بيها شي؟
- والله يختي مدري شبيها هالبنيه ، اليوم الصبح طبيت لگيتها تبچي بحضن نَفس ، سألتها تگُلي رسبت بالأمتحان بس السالفة مو سالفة أمتحان البنيه چانت تبچي من گلب
- ميخالف بدور أنتِ لا تضغطين عليها هي من تريد تحچي راح تحچي
***
رُسل
بلشت نِساتي و حيل مابيه أضل بغرفتي قليل أنزل جوه ، ريان أخذت أجازة من شغلها و راحت لأهلي ، چنت أتمنى أروح وياها بس ما أگدر ، صگر مو منقص عليه شي أي شي أطلبه يجيبلي ياه ، بس شو هسه أشتهيت الموطه المشكلة هو طلع للدوام و حتى عمامي و الولد و لا واحد منهم موجود ، شيصبرني الى ما يجي صگر ، نزلت جوه لگيت عمه نجاة و عمه بدور گاعدات گعدت يمهن ...
- لعد عشق وين؟
بدور : بغرفتها
- شبيها متطلع من غرفتها؟
- والله يـَ يمه مدري عنها
گمت و رحت لـ عشق ، فتحت الباب و دخلت ، لگيتها گاعده ع الچربايه و الشباك مفتوح و صافنه عليه ، رحت گعدت بصفها ...
- عشق ، شبيچ حَبيبتي؟
ألتفتت عليه و أبتسمت بس چان واضح على وجهها الحزن ...
- لا مابيه شي
- عَجل عليش ضايجة؟
- ماكو شي بس رسبت بالأمتحان
- إذا بهاي الحچايه قنعتي عمه بدور ، آني متقنعيني بيها ، أعتبريني أختچ الچبيره و أحچيلي شبيچ عُمري!
نزلت راسها و دموعها نزلن مسحتهن و حچت ...
- گلبي ما جاي أسيطر عليه رُسل ، أحسه مو ملكي
- حَبيتي؟
- و عساني لا حَبيت لأن اللي أحبه مو ألي
- ليش مو ألچ؟
- رُسل فدوة ماريد أحچي بهالموضوع أكثر
- تمام حبيبتي على راحتچ
سمعت صوت فرات بالصالة و عشق فزت على صوته ، گمت نزلت جوه ، چان صگر جاي هم و گاعد يلاعب بـ لارين و فرات و عمه نجاة جاي يسولفون ...
فرات : آني طالع للبصرة يوم
- شوكت
- هسه ، بس رايح أحضر هدومي
- أنتظر و أطلع وره الغده
- مگدر يمه مستعجل
***
عشق
سمعت صوت فرات و بقيت ألوب بمكاني أريد أشوفه و أتطمن عليه لأن الصبح چان وجهه ميتفسر و آني زدتها عليه بتجاهلي أله ، فتحت باب غرفتي شوي و باوعت بالممر ماكو أحد ، طلعت و شفت باب غرفة فرات مفتوح للنص وگفت أباوع و شفته جاب جنطه صغيره و ديحط بيها ملابس و خله على صفحه بنطرون أسود و قميص جوزي يمكن حيلبسهن ، بس وين يريد يروح؟ ، سحبت نفسي و رجعت لغرفتي حتى ميحس عليه ، بقيت أفكر شنو حيسافر يعني! ، بقيت ربع ساعة أحوص بمكاني ، دخلت رُسل ، حچيت ...
- شنو فرات يريد يسافر؟
- إي
- وين حيروح؟
- ع البصرة يگول عندي شغل
- و ميخاف من حارث يروح يتعرضله ع الطريق و يأذيه!!
- ههههههه ، تريدين فرات يخاف من حارث
- يعني شنو ميخاف على نفسه ، الرجال حاد سنونه علينه و دزلنه تهديد لحد البيت ، و يطلع منا للبصرة
- هو ما أعرف شلون خلاه عمي علي يطلع و الأوضاع هيچ متوترة ، بس أكيد عدهم شغل مُهم لو ما مُهم چان ما خلاه يطلع
- يعني الشغل أهم من حياته!!
- و أنتِ ليش هالگد حارگه دمچ و خايفة عليه
- هااا ، لا ماكو شي بس مجرد سألت
سكتت و آني گلبي ما مرتاح لطلعة فرات للبصرة بهالوقت و هالأوضاع ، خايفة و خوفي عليه حيفضحني گدام الكُل
***
رُسل
رحت لغرفتي و گعدت أنتظر صگر ، شوي و جه ...
- إييي الله جابك حَبيبي
- هااا بعد روحي خير؟!
- مشتهية شغلة و أريدك تجيبلي ياها
- تأمرين ، بس شني هالشغلة؟
- أريد موطه بالككو و الحليب
- موطه؟؟؟؟
- إيي حَبيبي
- تدورين موطه بـ جويريد؟؟؟
- مشتهيتها والله شسوي
- و آني وين ألگالچ موطه بهالبرد يا عيني يا گلبي دگولي غيرها
- و آني بأيدي قابل يا صگر ، هو أبنك مدري بنتك مشتهيها آني شعليه
- يعني مابيها مجال
- هئ
- تمام أمري لألله ، آني راح افوت أسبح و بعدين أروح أجيبلچ
- شنو تروح؟
- إي غير أروح أجيبلچ موطه مو تريدين؟
- إي غير تاخذني وياك
- وين آخذچ وياي بهالبرد ، صاحية أنتِ بعد گلبي؟
- ماااا صگررر ، تاااخذننيي وياااك يعني تاااخذنييي
- إيي إييي يمعودة ، حضريلي هدومي بين ما أسبح و أنتِ تحضري و ألبسي شي يدفيچ
- خوش
فات صگر للحمام و سد الباب وره شوي فتح الباب و طلع بس راسه و گال ...
- هو مابيها مجال تنتظرين للعصر بعد گلبي؟
- أگُله مشتهيتها يگُلي أنتظري للعصر!!!
- أوكي أوكي
رجع يسبح و آني رحت للكنتور و طلعتله دشداشة سودة و غترة صحراوية و طلعتله الفروه مالته الجوزية حطيتهن ع الچرباية و طلعتلي ملابس ، لبست و كملت و وگفت ألف بالشال و طلع صگر لاف المنشفه على خصره و الثانية ينشف بيها شعره ...
- أنتت شللووون تطللعع هيچ بههالبرد؟؟؟
- ميخالف تعاي دفيني
- اوووف ، دلبس ألبس و عوف سوالفك هاي
- صار ، بس أنطيني مجال أنشف شعري
- يعني متنشف شعرك أله ع المرايه؟
- إي
بعدت عنه و آني أعدل بالشال ، وگف بصفي و صار ينشف بشعره ، شوي و وگف ورايه ، أدحگ عليه بالمرايه ...
- صگر أحسك مو راحة ، شتريد؟
- الله يا مُحمد ، مو راحة؟! ، هسه شمسوي آني!!
- ما أدري بس آني أعرفك من تگوم تحوص هيچ ، مو راحة
سكت ما حچه شي و بقى واگف وراي و يسوي نفسه ينشف بشعره ، آخر شي ذب المنشفه اللي چان ينشف بيها و حضني و هو ورايه و چتف أديه ، دنگ عليه و باسني من خدي ، تملصت من عنده و أنداريت عليه ...
- دحگ يـَ حلو اللي ببالك ميصير ، گتلك تاخذني توكلني موطه يعني تاخذني
- شلون تريد تشعل عشيرتي اليوم
- آني أنتظرك يلا ألبس بسرعة حياتي
راح يلبس بملابسة ، لبس الدشداشة و ألتفت عليه ...
- تعاي سديلي الدگم
- أنت سدهن
- ما أعرف
- لا تعرف يلا سدهن
- إذا ما جيتي سديتيلي الدگم ماكو روحة ، و تنسين تاكلين موطة ، و تعرفيني آني من أقفل على شي هاهيه بعد
- أوووف منك
رحت أسدله بالدگم و هو يدحگ عليه بخبث و يبتسم كملت و رجعت گعدت ع الكرسي ، شاله الغتره و حچه ...
- وين العگال؟
- ما طلعتلك عگال
- لويش!!
- سوي چراوية أحلى
هز براسه و كأنو مو عاجبه ، وگف يلف بالغتره ، كمل و لبس الفروه و گال ...
- يلا عيني
- صلوات على مُحمد و آل مُحمد ، و أخيرًا كملت حَبيبي ، شفت مو بس آني أتأخر هاي صارلي شگد مكمله و أنتظرك
- هااا يعني هسه صرت آني اللي مأخرچ؟
هزيتله براسي بمعني إي
- ديلا يلا گدامي تشوف
ابتسمت وگمت نزلنه ، طلعنه من باب الصالة و حاوطت إيده بأديه الثنين ، وگف دحگ عليه و أبتسم و حچه ..
- ربييي هالبنيه لعبت بگلبي طوبه
ضحكت و رحنه صعدنه بالسيارة و مشينه
***
شهم
دخلت البصرة و وصلت بيتنه ، طبگت السيارة و فتت سلمت على أمي و رحت بدلت ملابسي و رجعت حتى أروح لـ بيت عمي حسين ، وگفتني أمي
- وين رايح شهم؟
- عندي شغل يمه
- توك وصلت أبني أرتاح و لاحگ ع الشغل
- ميتأجل يمه ميتأجل ، يلا آنـه طالع
طلعت لبيت عمي ، وصلت و دگيت الجرس ، شوي و فتحتلي مُهره ...
- هلا شهم
- هلا بيچ ، ليش أنتِ تفتحين الباب؟
- سجاد نايم و بابا ما موجود
- خوش بس مرة ثانية لا تفتحينه أنتِ
هزتلي براسها و مشينه ، حچت ...
- إذا جاي على سجاد رايحة أگعدلك ياه
- لا أوگفي آنـه جاي عليچ
وگفت و ألتفتت عليه ...
- عليه؟
- إي
- أكو شي؟
- إي أكو
- شنوه؟!
- تتذكرين من قبل لا أطلع لبغداد گتلچ أكو شي مهم أريد أگلچ عليه بس إذا طلعت سالم من العملية
- إي ، شنو هالشي شهم؟
أخذت نفس و آني أباوع لـ عيونها ...
- آنـه أعـشــگـچ يـَ مُهره
باوعتلي و أحسها أنصدمت من الحچيته ، بلعت ريگها و گالت ...
- هاااا؟؟
- مثل ما سمعتي ، آني أحبچ مُهره 3 سنين و آني شايل هالحب بصدري لوحدي ، و هسه بعد ما أگدر اشيله بصدري أكثر و أضمه عليچ ، آني واگع بيچ يـَ مُهره
- بس ...
- آني مستعد من باچر أجيب أبوي و أخطبچ من عمي إذا أنطيتي الموافقة
- بس شهم
- بس شنو؟؟
- آني ، آني صحيح أحبك و أنت أقرب شخص أليه ، بس ، بس ما أتخيلك كـ زوج!! ، آسفه شهم فدوة لا تزعل بس ما أگدر
هنا وگفت و أحس سچين و أنغرزت بگلبي ، كلماتها هاي چانت عبارة عن سچاچين و غرزتهن بنص گلبي ، حاولت أسيطر على نفسي ، حچيت ...
- لا أصلاً ليش أزعل و لا يهمچ بنت العم و أعتبري هالحچي ما طلع مني و لا سمعتي ، أودعناچ بوية
درت ظهري و مشيت و أسمعها تصيح بأسمي ، ما ألتفتت عليها كملت طريقي و ركبت سيارتي و مشيت ، مشيت مسافة و وگفت ، حطيت راسي ع الستيرن و كضيت گلبي ، أحس نار جهنم و مشتعله بي و شيطفيها بعد ، هذا الرد الچنت خايف منه و سمعته ، آنـه شجابني و ورطت روحي بهالعشگ آخخخ منك يگلبي تيهتني و وهدنتني بعشگ ما جابلي غير الهم ، كملت طريقي و آني ما أدري وين رايح
***
رُسل
فرينه 3 محلات و ما لگينه موطه ، و آني بعد ما أتحمل ...
- أوووف صگر هسه شلون عفيييه
- آني أدري ، هو أنتِ ما لگيتي أتنسين غير بموطة بهالبرد هذا منين أجيبلچ موطة
- هو آني بإيدي ، ماعليه أريد آكل موطة بعد ما أتحمل صگر
- إي إي يا عيني بس صَبرچ علي ، تعاي تل نشوف هذا المحل
دخلنه و سأله صگر و گال ماعدنه بالككو و الحليب بس بالككو ...
- هااا بيها مجال بس بـ ككو لو أله ككو و حليب؟
- لا ماريد أله ككو و حليب
- يبووو على حظي هالمصخم ، تمام مشكور حَبيبي
طلعنه من المحل و حچه صگر ...
- بالله هسه آني منين أجيبلچ موطة
- مدري ، أريد آكل موطة آني
- أفتهمت و مُحمد أفتهمت
طلعنه نمشي بالسيارة ...
- أگف صگر خل نشوف هذا المطعم مو هم عدهم موطة
- خاف ما نلگه عدهم
- مدري خل نشوف
- دنزلي يلا أمري لألله ، آني منين جتني هالطلابة هاي
نزلنه و گعدنه على طاولة و سألهم صگر و الحمدلله طلع عدهم نفس ما أريد
- شفت مو گتلك عدهم
- الحمد و الشكر ألك ربي ، لو ما لاگيلها يجوز تخليني أفتر الأنبار كُلها و إذا ما ألگه تخليني أطلع لبغداد أدورلها موطه بالككو مدري بالبرتقال
- ههههههههه ، بالككو و الحليب حَبيبي مو بالبرتقال
جابو الموطة و صگر گاعد گبالي و يدحگ عليه و يبتسم ...
- شنو أنت متطلبلك؟
- لا آني ماريد المُهم تاكلين أنتِ
هزيت براسي و گعدت آكل ، شوي و جت ببالي فكرة ...
- صگر
- هااا ، عليچ القرآن لا تگُليلي أريد لبن العصفور لأن هذا صدُگ ما أگدر أدبرلچ ياه
- هههههه لا يعمري ، بس أنطيني إيدك
- عليش؟
- هسه دنطيني و ماعليك
أنطاني أيده و شابكت إدينه سوه ، طلعت فوني أخذتلهن صورة
- هاي عليش؟
- أريد أنزلها ستوري
- والله أنتن النسوان ما تبطلن سوالفچن
***
سناء : بكر عباس شو تأخر؟
- مدري ، أنتِ مو خابرتي توه؟
- دگيت عليه بس ما رد
قاطع حديثنه صوت عباس جاي من بره و هو يصيح ، فزينه و طلعنه بره ، أجه يركض على بكر ، وگف و حچه و هو يلهث و إيده على صدره ...
- ألحگ بوية ألحگ
- شبيك ولك شوراك ، شلحگ؟؟
- ذبحته بوية والعباس ذبحته ...
********
يتبع ...
ما أحچيلكم ع القفلة دمااار🤭🖤
المهم ، برأيكم شنو سالفة عباس؟ ، و أحچولي رأيكم بأعتراف شهم و ردة فعل مُهره؟ ، و برأيكم هل شهم لـ هنا و راح يستسلم بعد ما رفضته مُهره لو شراح يصير بعدين؟ ، و فرات و عشگ برأيكم راح يضلون هيچ؟ ، المهم هسه أريدكم تفجرون البارت تفجير🔥لأن صارلي ساعتين أكتب بي لأن وعدت البنات أكمله و أنزله بالليل لهذا نزل بوقت متأخر ، و هاي وفيت بوعدي و نزلته و عاد أنتو لا تقصرون بتفاعلكم
أما بالنسبة للبارت الجاي بعدني ما كاتبة و لا حرف عاد أنتو أدرسو بين مينزل + لحد يگُلي البارت قصير 3 آلاف كلمة شقصير رحمة للكعبة😃💔 ، المهم لغيت هواي يلا تصبحون على خير♥️
سحر الدليمي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!