رواية عشگ الفرات ( عِندما تَهوى القُلوب ) الفصل الحادي والخمسون 51 - بقلم سحر الدليمي

سلاااام ، تقبل الله طاعاتكم💙
لا تنسون التصويت و التعليق بين الفقرات
قراءة مُمتعة ♥️

***

- مو گلت للموت وياك يـ هواي
وين وعدك و المسامر و السوالف ذيچ

***

- و شقررت ، تطلگ لو لا؟

تنهدت و جريت حسره شگت صدري شگ ، أهجس حتى النفس يأذيني ، ضليت ساكت ما حچيت شي ، رجع أبوية يسألني ...

- هاا بابا ما جاوبتني؟!

رفعت راسي و دحگت عَليه ...

- حاير يابة وداعتك حاير ، أحبها و مگدر على فراگها بَس هي ما تريدني و هو هذا المأذيني

- أسمع وليدي ، أخذ هالحچاية من أبوك ، لأن آني هَم أعرف مصلحتك و يمكن أعرفها أكثر منك حَتى لو چنت چبير و قرارك بإيدك ، أسمع لعقلك ، بهيچ مواقف أخذ بشور عقلك و لا تمشي وره گلبك لأن تره يندمك والله يـَبوك

- صار حجي ، باچر يجيك الحچي

سكتنه ثنينه ، رجع حچه أبوية ...

- فرات

- هلا

- أبني آني آسف ، أدري ضغـ ...

- لتكمل يابة و لا تتأسف ، أنت أبوية و تمون على عگالي و ما أزعل منك لو شما سويت

- بَس آني أذيتك ، ما چنت متوقع تصل لهدرجة ، تدري من فتت للصالة و شفتك شمسوي بنفسك تخبلت ، لو صاير بيك شي ما أسامح نفسي ، أبني آني حَتى لو ضغطت عليكم ، من خوفي عليكم والله

- خلص يابة لتهتم ، اللي صار صار

- زين حَبيبي آني أروح و أنت نام و أرتاح

هزيتله براسي و طلع ، ضليت وحدي ، فتحت الجرار و طلعت الگلادة و الحلقة ، ضليت صافن عليهن ، آني حلقتي لحد هَسه ما نزعتها و هي من أول خلاف نزعتها ، رجعتهن بمكانهن و گمت طلعت بره الغرفة ، رحت لـ غرفتها دگيت الباب ، و جاني صوتها عبالك چانت تبچي ، فتت و سديت الباب وراي ، هي من شافتني گامت على حيلها و چان واضح عليها الخوف ، شسويت و هيچ صارت تخاف مني من بَعد ما چانت تگُلي أنت أماني ، وگفت صفنت عليها ، حچت برجفة ...

- أطلع فدوة ، لتجي

ما اهتميت لحچيها و مشيت صوبها ، تقربت عليها ...

- أنتِ تدرين شگد أحبچ؟

ساكته و عيونها بالگاع ...

- متدرين والله

هم ساكته ما ردت علي ...

- أنتِ صرتي مثل الدم اليمشي بعروگي ، شايفة الوردة الذبلانه من تمطر عليها الغيمة و ترجع تحييها و ترجعلها الحياة ، أنتِ هاي الغيمة اللي رجعت الحياة لـ گلبي الميت

- تتذكرين من گتلچ أنتِ و الأنبار آني بلياچن أضيع؟ ، هَسه آني صَحيح بديرتي بَس ضايع بلياچ

- مو كافي عذاب لـ گلبي اليحبچ؟

رفعت راسها و تحولت نظرتها ليه من خوف إلى حدة ، دحگت عليه بنظرة گصت گلبي گص ، حچت و ويه كُل كلمة تضرب على صدري ضربة خفيفة ...

- آني ماريدك ، أنت شي و أنتهى بالنسبة أليه ، خلص ما صرت تعنيلي شي

كلماتها هذني شبهتهن بخناجر مسمومة و أنغرزن بنص گلبي ...

- چنت رايدچ تداويلي جرح گلبي ، بَس مع الأسف جرحتيني بجرح أكبر منه .

- أنتِ طالگ

حچيتها و رجف صوتي و الدمعة تلالي بطارف عيني ، عفتها و طلعت ، نزلت جوه للحديقة مدري شصارلي أهجس هوى رب العالمين هذا كُله ما يترس ريتي ، فتحت الحنفية و غسلت ، گلبي صار يدگ سريع و دگاته جاي تأذيني أهجسه يريد يطلع من صدري ، صرت أضرب بصدري أريده بَس يگف ، جاني رافد يركض ، لزم إيدي و سحبها ...

- شبيييك أنت تخبللتتت !!!

- ماارييدهه يدگ راافد مااريده دگته جااي تأذينيي

- غير أفتهم شبي ، شبيك يول ، فرااات دحگ عليه شبييك؟؟

- طلگتها

- صدُگ؟؟

- والله

گعدت ع الصبه بَعد ما أگدر أگف على رجليه ، حيلي أنهد ، گعد گبالي رافد ...

- فرات دحگ عليه؟

رفعت راسي دحگتله ...

- أنسى  ، لازم تنسى تا تعيش ، قوي گلبك او بالأحرى دوس عليه و أنسى

- شنسى و هي جرحتني جرح يضل بگلبي طول العُمر

گمت و فتت جوه و رافد يصيح وراي ، صعدت لغرفتي فتحت الجرار و طلعت المُهدأ ، حچه رافد ...

- شنو هذا؟

- مُهدأ

- ليش تاخذ مُهدئات فرات؟

- أريد أنام و ما أگعد رافد ، أريد گلبي يهدأ

- ميصير لتاخذه موزين عليك بعدين تدمن عليه

- ميهمني

- شلوون ميهممكك !!

سكتت و جريت الدولكه تا أصب مي ، بحركة سريعة منه تف إيدي و جر الشريط مني ...

- جيبه رافد

- ما أنطيك ، جاي أگُلك موزين عليك

- راافد جييبههه ، جااي أگُلكك حييل مااضل بيهه

- يوول تتأذه لييش ماا جااي تفتههمم

گعدت ع الچرباية و حاچيته بتوسل ...

- عليك الله أنطيني ياه ، بغلات عمي جسام عندك

- ليش تحلفني ياخي

- والله بَس هالمره و بعدين أخذه وياك ذبه احرگه شتريد تسوي سوي

- أنت مُدمن عليه؟

- لا ، أصلاً هاي ثاني مره آخذ منه بَس أريد أنام

- زين راح انطيك بَس هالمره

هزيتله براسي و أنطاني الشريط ، أخذت حبايه و رجعتله ياه ، أنجضعت ع الچرباية ، حچه رافد ...

- تريد شي؟

- لا

- زين

***

مُهره
ضليت رايحة راده ما گدرت أگعد ، خايفة ليكون بإيده شي لأن الجرح مو هين أبد ، وره تقريب ساعة من الأنتظار أنفتح الباب و دخل شهم ، إيده لافينها و بالأيد الثانية شايل علاگة زغيرة مال علاج ، راح گعد ع القنفة بدون ميباوعلي ، رچه راسه عليها و غمض عيونه ، رحت گعدت يمه ...

- هاا شهم شسوولك؟

- خيطوها

- يااا يعني أله خياط

- إي

- أكيد توجعت مو؟

- إي

سكتت عنه ، بعدين باوعت ع العلاگة اللي وياه ...

- شنو هاي العلاگة

- مُسكن آلام

أجت عمه و گعدت يمه ...

- هااا حبيبي شلونك؟

- زين

- خوما تأذيت حيل؟

- مو مُهم أتأذة او لا ، محد يقدر هالشي

حچه هيچ و هو يباوعلي ، بعدين گام صعد فوگ ، ردت أصعد وراه لزمتني عمتي من إيدي ...

- شبي رجلچ؟

- ما أدري عمه

- صاير بيناتكم شي؟

- لا

- روحي لحگيه لتخليه وحده

هزيتلها براسي و مشيت وره شهم ، دخلت للغرفة لگيته دينزع بالسترة ، نزعها بصعوبة لأن إيده ميگدر ، أجه حَتى يفتح دگم القميص بَس ما گدر ، رحتله و مديت إيدي حَتى أفتحله دگم القميص ...

- خليني أساعدك

أبتعد عني و حچه و هو مدنگ راسه ...

- ميحتاج

فتحهن بالگوة و بدل ملابسه و راح تمدد ع الچرباية و غطى عيونه ، طفيتله الضوه و غطيته و طلعت بره
صار الليل و هو نايم ، اجه عمي و سأل عليه و حچيناله الصار ، بدون مينتظر لباچر جاب عُمال و صلحو الجامة ، من راحو فتت للمطبخ نظفت مخلفات الشغل و سويت عشه لشهم لأن أحنه تعشينه ، سويت و كملت و أخذتله ياه فوگ ، فتت للغرفة لگيته گاعد يگلب بتيلفونه ، حطيت الصينية گدامة ...

- يلا حَبيبي تعشه

- شُكرًا

ذب التيلفون من إيده و قرب الصينيه عليه ، شال الخاشوگه حَتى ياكل بَس ما گدر لأن بإيده اليسره و هو ما متعود ياكل باليسره ...

- أنطيني آني أوكلك

رفع راسه و صفن عليه ، أبتسمت بوجهه و أخذت الخاشوگه من إيده و صرت أوكله لحد ما خلص ، گام حَتى يغسل و آني أخذت الصينيه و نزلت جوه غسلت المواعين و رحت گعدت بالحديقة ، وره تقريب الساعة فتت جوه و صعدت لغرفتنه ، دخلت و لگيت شهم نايم ، نزعت ملابسي و لبست دشداشة قصيرة خفيفة بنفس الوقت ، رحت تمددت يم شهم ، حطيت راسي على صدره و إيدي خليتها على خصره ، ما تحرك أبد بَس حركة النفس مالته ، بقيت حاضنته لحد ما غفيت ، وره ما أعرف شگد حسيت عليه حضني قوي و قربني عليه ، خله راسه برگبتي و باسني منها خفيف ، هو عباله آني نايمة بَس آني حسيت عليه ، خليته يفكر أني نايمه ، حسيت بي رفع راسه و كأنو يباوعلي ، مد إيده و صار يمسح على وجهي و يوخر شعري عن عيوني ، بعدين تقرب و باسني من شفايفي ، هنا فتحت عيوني ، صارن عيوني بعيونه ...

- سامحني شهم ، والله أعرف ضوجتك بَس مو قصدي

أبتعد عني و دار ظهره و گعد ، تقربت منه و خليت إيدي على چتفه ...

- آني أحبك أنت و بَس ، و الماضي صفحة و أنطوت بالنسبة إليه ، مستعده أبقى وياك طول العمر و أساندك بكُلشي ، أنت حَبيبي الحبيته و ما چنت متوقعة أحبه أبد ، أنت اللي أنقذت حياتي من الدمار ، أنت اللي عاملتني بكُل حنيه و حُب ، أنت حُبي الأول و الأخير شهم

ألتفت عليه و صفن بعيوني ثواني ، بعدين حچه ...

- يعني ما تعوفيني و تكسرين گلبي؟

- والله العظيم وداعة أكبر ما أعوفك لو شميصير

أبتسم أبتسامة خفيفة و بسرعة أندار و جرني عليه بقوة لزگني بصدرة ، باسني برگبتي و زاح الدشداشة عن چتفي و صار يمشي أصبعه على چتفي نزولاً لصدري ، حچه و هو عيونه على حركة أصبعه ...

- أحب كُل تفاصيلچ ، جسمچ شعرچ عيونچ ، و شفايفچ ...

رفع راسه و باوع لشفايفي و همس ...

- شفايفچ أعشقهن

تقرب مني و باسني بوسة كُلها حُب و حنية و شغف ، خلاني أذوب بين إديه ...

***

نجاة أستغربت نوم فرات لهالوقت ، هو من الظهر نايم ، راحت لغرفته حاولت تگعده بَس ما گعد و لا تحرك أي حركة ، نزلت و الخوف سيطر عليها ، راحت للهول ، گاعدين صگر و رافد ...

- ولكم يمه أخوكم مدري شبي !

فز صگر من مكانه ...

- شبي يمه؟!

- مادري يـ ماما ، جاي أگعده ميرد عليه و هو من الظهر نايم

رافد : لتخافون عليه مابي شي بَس هاي عبن أخذ مُهدأ هيچ طول بالنومة

صگر : و أنت شمدريك؟

- چنت يمه من أخذ

- و ليش ما منعته ياخي ، آني چم مره منبهه و منبهكم مُهدئات ما ياخذ ، بعدين يدمن عليها و يطيح حظه و حظنه وياه

- حاولت أمنعه والله بَس ما گدرت ، خصوصًا هو چان منهار حييل ، گلت ياخذ حبايه يهدأ شوية

- ليش منهار؟

- طلگ عشق

- بالله عليك ؟!

- والله ، لو شفت حالته يـَ صگر چان عذرته

نجاة گعدت ع القنفة و صفگت إيد بإيد ، صگر عافهم و راح لفرات ، فتح الباب و دخل لگاه على نومته ، تقرب يمه و حط إيده على راسه يتحسس حرارته ، بعدين دحگله مستحسف و مقهور ، فتح الجرار و طلع شريطين مُهدأ ، أخذهن و ذبهن بالزبالة

عشق
واگفة گدام المرايه دامشط ، أنتبهت لرگبتي صاير بيها أثر من لما فرات باسني ، كُل ما أتذكر الموقف اتمنى الموت ، ما أعرف شبيه كرهته لهدرجة ، چنت أحبه و أحب قربه مني بَس هَسه و لا أطيقه ، طلعت المكياج و خافي عيوب و ما أدري شنو انوب اجيب و أحط على رگبتي بَس حتى أخفي الأثر ، أنفتح الباب و دخلت ماما ، كعدت ع الچرباية و رحت گعدت يمها ...

- طلگچ؟

- إي

- ليش ماما ، ليش تخربين بيتچ بإيدچ ، والله فرات خوش رجال و يحبچ حييل يحبچ ، لو تشوفين حالته شلون بفراگچ ، لچ ماما والله هيچ رجال ميتعوض و متلگين مثله

- ماما ما أحبه ، ما أريده يعني غصب لو شنو !!

- باچر راح تعضين أصابعچ ندم على فرات ، و من تريدينه ما راح تلگينه ، صَح انتِ بنتي بَس فرات أبن أخوية و مثل أبني و ما أرضى عليه ، أنتِ چنتي عوض بالنسبة إله بَس خذلتي ، ظلمتي يـَ عشق و هو ميستاهل

- ماما أنتِ ليش مدتفهميني

- بَس أسكتي أسكتي

- ماما خلينه نروح

- وين نروح؟

- على بيتنه ، خلينه ننتقل عليه و نستقر وحدنه

- لا

- إي ليش يا ماما ، عدنه بيت و گاعدين ويه خوالي

- ليش شبيهم خوالچ ، مقصرين عليچ بشي ، سمعوچ كلمة مره ، شو صارولچ مثل ابوچ و أكثر

- ماما أفهميني آني هنا أختنگ ما اگدر أعيش ويه فرات ببيت واحد ما أگدر

- گتلچ لا

گعدت بالگاع و لزمت إيدها و صرت أبچي و أتوسل بيها ...

- الله يخليچ ماما ، فدوة أروحلچ خلينه ننتقل لبيتنه

- هَسه ليش تبچين !!

- وافقي فدوة ماما ، الله عليچ

- زين زين بَس لتبچين آني أحچي ويه خوالچ و نشوف ، بَس أدري ما راح يقبلون

طلعت ماما و آني تمددت و نمت ما حسيت أله ثاني يوم ، رحنه للمحكمة و كملنه أجراءات الطلاق ، فرات چان تعبان كُلش و ما باوعلي أبد

عَلي چان گاعد بالهول وحده ، دخلت بدور ...

- عَلي

رفع راسه و دحگلها ...

- هلا خيتي تعاي أكعدي

راحت گعدت يمه ...

- عجل جسام وين؟

- يم الشيخ جاسر عدهم گعده

- و أنت ليش ما رحت؟

- آني مالي خلگ

- أممم ، حرامات  عود  ردتكم ثنينكم تا أحچي وياكم بموضوع

- إذا تريدين أحچي و بعدين آني أگُله

- والله مدري شگُلك

- گولي بدور ، محتاجين شي؟

- لا يخوي تسلم ما محتاجين شي ، بَس نريد ننتقل لبيتنه

- بيتكم؟!

- إي بيتنه

- ليش متضايگين هينه يمنه؟

- لا والله الحچي لله مرتاحين ، بَس عشق تبچي تريد ننتقل للبيت ما نضل هين

- ليش؟

- والله علمي علمك

- فرات مسمعها شي؟

- لا والله ، أصلاً فرات و لا يگرب صوبها

- عجل شبيها !

- والله مدري

- دحگي خيتي ، أحنه تدرين زحمة علينه نخلي نسوان وحدهن يگعدن ببيت لحالهن ، يعني صعبة علينه

- والله أدري و آني گلتلها بَس معانده و تبچي و تگول هنا أختنگت ما أگدر أضل ، البنيه ما چانت هيچ والله يخوي

- زين آني أحچي وياها و أشوف

گام عَلي و گامت ويه بدور ، راح لغرفة عشگ دگ الباب و فات ، گامت بوجهه ...

- خالو؟

گعد ع القنفة ...

- إيييه ، اليوم جاي خطار على بنت أختي أريد أگعد و أسولف وياها شوي

أبتسمتله ، هو هَم أبتسملها و گال ...

- تعاي أگعدي يمي

راحت گعدت يمه ، أندار عليها ...

- شلونچ

- زينه خالو

- زينه لو زوينه؟

جاوبته بإبتسامة ...

- لا زينه

- خوش عَجل ، يلا هَسه سولفيلي ليش تريدين تنتقلون لبيتكم؟ ، شنو هينه مو مرتاحة؟

- إي

- ليش ، أحد مضوجچ؟

- لا ، بَس آني گمت ما أگدر أعيش هنا ، أحس المكان يخنگني خالو ، فدوة وافقو خلونه ننتقل لبيتنه

سكت شوي بعدين حچه ...

- والله يا بنتي ما نگدر ، ما نگدر نخليچن تگعدن وحدچن ، أحنه جبناچن من بغداد تا تضلن هينه گبال عيونه

- خالو والله ما أگدر أعيش هنا أكثر والله

سكت ما جاوبها ، هي من شافته ساكت أيست من الموضوع و صارت تبچي من كُل گلبها ...

عَلي : لاه لاه ، ول يمه عليش تبچين !!

مد إيده و مسح دموعها ...

- لا تبچين بنيتي ، عشق شو دحگي عليه خالي

- وافق خالو الله يخليك

حضنها لصدره و صار يمسح على كتوفها بلمسات كُلها حنان ...

- لا تبچين بنيتي هاذ هو اللي تريدينه يجرالچ بَس لا تبچين

هي أرتاحت بحضنه و تذكرت من چان أبوها هيچ يحضنها و يمسح دموعها من تبچي ، لذلك ضلت بحضن خالها و مچلبه بدشداشته مثل الطفلة الزغيره

عشق
طلعو خالو و ماما و ضليت آني وحدي ، أرتاحيت نوعًا ما من وافق خالو ننتقل لبيتنه ، بَس بعدني أحس مثل الصخرة على صدري و كاتمة أنفاسي ، صارلي هواي هالشعور محاوطني ما أعرف ليش ، مليت من گعدت الغرفة و قررت أنزل للحديقة ، نزلت و وگفت بوسطها ، ما حسيت أله و أنجريت من إيدي بقوة ، شخص دارني عليه باوعت لگيته فرات ...

- صحيح اللي سمعته؟؟؟

- شنو سمعت

- تريدون تنتقلون لبيتكم؟!

- إي

- مااكوو طلععهه مناا افتهمتييي

- و أنتت شعليييككك !!

- عليه و نص ، طلاگ و طلگتچ ، حتى حچي ما جاي أحچي وياچ ، عليش تريدين تطلعين

- ما مرتاحة هنا

جرني من إيدي و حچه و هو صاك على أسنانه ...

- أسمعي تا أگُلچ ، خاف عبالچ هينه مثل بغداد لا تره أنتِ غلطانة ، هينه ماعدنه نسوان يگعدن ببيوت وحدهن

- أنت مالك علاقة ، مو فصخنه الخطوبة ، ما بقى شي يربطني بيك خلص عوفني ، و بعدين خالو عَلي وافق و راح يحچي ويه خالو جسام و هَم حيوافق

هديت إيدي منه و عفته و فتت جوه

***

مُهره
حسيت الصبح ، فتحت عيوني و باوعت لـ شهم بعده نايم ، باوعت للساعة چانت بالعشرة ، كعدت على حيلي و مطيت جسمي ، صراحة صارلي هواي ما نايمة مرتاحة ، گمت توضيت و صليت و گعدت بصف شهم ، مديت إيدي و عدلت شعره المخربط ، دنگت يم أذنه و همست ...

- حَبيبي ، رويحتي ، يا نِصفي الآخر ، يا مُكملي و يا مُنقذي من الجحيم

ما أعرف شلون طلعت وياي هالكلمات صراحة ، بَس لمن باوعت بوجهه لساني نطق بيهن بدون ميرجعلي ، حرك راسه و فرك عيونه ، فتحهن و باوع عليه ، أبتسم و حچه ...

- شنو ، شو بالله عيدي

- حَبيبي ، رويحتي ، يا نِصفي الآخر ، يا مُكملي و يا مُنقذي من الجحيم

نهض نفسه و أرتاچ ع المخده ...

- هاي شِنو غزل من صباحيات الله

- حَبيبي يا صباحيات تره الساعة بالعشرة ، بعدين أنت تستاهل أكثر من غزل

أبتسم و مد إيده و مسح على خدي ...

- يلا حَبيبي گوم صلي و آني راح أروح أسوي ريوگ

هزلي براسه و گام ، آني نزلت صبحت على عمه و عمي لگيته طالع ، رحت للمطبخ و سويت ريوگ و صعدته فوگ ، دخلت لگيت شهم ديصلي ، خليت الريوگ بالگاع و گعدت أنتظر ، شوي و خلص ، أجه گعد گبالي ، صبيت چاي و خليت گدامه ، أخذت الخبزه و سويتله لفه زغيره و نطيته ياها ، أخذها و ابتسم ...

- ميحتاج أگدر آكل وحدي

- لا متگدر أعرف بيك

سكت و ضليت اسويله لفات و انطي ياكل ...

- بوية أكلي أنتِ ما جاي أشوفج تاكلين

- ما عليك بيه ، أكل أنت

كملنه ريوگ و نزلت غسلت المواعين و رجعت للغرفة لكيت شهم لابس دشداشته و ديسد بالدگم ...

- أوگف شهم

- هااا

- آني اسدلك ياهن

رحت يمه و سديتله الدگم ...

- ليش ما أنتظرتني آني اساعدك

ابتسم و گرص خدي ...

- ولچ والله اگدر

أبتسمتله ، گال ...

- اليوم أبوي عازم البنات و ازواجهن

- صدگ

- إي والله

- همزين ، والله كُلش مشتاقتلهن

تقرب عليه و خله إيده وره خصري ...

- و آني ما مشاقتلي

وخرت إيده عن جسمي ...

- لا تضل وكح

- هههههههه

ضحك و راح نزل جوه ، آني رتبت الغرفة و هويتها و عطرتها و بدلت ملابسي و نزلت الساعة بالـ 11 ، مريت من يم شهم و صاحني ...

- غاليتي

ابتسمتله ...

- هلا حَبيبي

- تعاي عقميلي إيدي آني ما اگدر

- هاااا ، مو ما أگدر

- و آني هَم ما أگدر

- خلي عمي يعقملك ياها

- ابوي مو موجود طالع

سكتت و بقيت أباوع عليه ، آني ما أتحمل اشوف الجروح و الدم و خصوصًا هو جرحه مو هين ، فززني من صفنتي من گال ...

- هَسه شلون أخليها تلتهب؟

- لا حجيب المواد و أجي

- چا خوش

رحت جبت مواد تعقيم الجروح و گعدت يمه ، مدلي إيده و گمت افتح بالشاش و إيدي ترجف ، فتحته و باوعت للجرح و الخياط ، دخت بَس قاومت ...

- اوووف كُله من ورايه

- أنتِ شعليچ؟

- لو ما حطيت إيدك حَتى ما أتأذة چان ما تأذيت و أنجرحت إيدك

- صدگي لو هالجامة واگعه على إيدچ و جارحتچ چان آنــ تأذيت أكثر ، لأن مگدر أشوفچ متأذية ، المهم أنتِ ميصير بيچ شي آني عادي

- عادي بالنسبة الك مو إليه ، تدري شاغت روحي لمن شفت إيدك

أجت عمه و گعدت گبالنه ...

- شهم ، شلون صارت إيدك حَبيبي؟

- زينه يمه الحمدلله ، چا أبوي وين طلع؟

- راح يجيب چم شغلة ناقصتنه ع الغدة

- و ليش ما گعدتوني آني أجيب ، ليش راح هو

- تدري بأبوك من يشوفك نايم ميحب يزعجك

كملت تضميد إيده و لفيتها ، أنفتح الباب و دخل عمي شايل بإيده المسواگ ، راحله شهم ...

- عنك بوية

- لا بوية خلهن أنت إيدك

- لا بوية ما يصير جيبهن

أخذهن من إيد أبوه و آني رحت شلت البقية ، وديناهن للمطبخ شهم رجع للصالة و آني رتبت المسواگ و بلشت بالغده ، وره شوي و أجت عمه ...

- مُهره لتكثرين تره رقية و زوجها ما راح يجون توه خابرتني

- ياا ليش؟

- بنتها تمرضت خطية و متگدر تجي

- خطية ، تمام ما راح أكثر

سويت الغدة ، برياني و دجاج شوي و زلاطة ، ما حبيت اسوي اكلات هواي أكتفيت بهالقدر ، كملت و رحت لغرفتي بدلت و تعطرت ، اجاني شهم ...

- يلا غاليتي وصلو

- تمام

لفيت الشال و طلعت وياه ، لزم إيدي و نزلنه أستقبلنه يامور و قاسم و كعدنه نسولف بالصالة ، وره شوي صبينه الغدة و گعدنه نتغدة و شهم حاط مهدي أبن يامور بحضنه و يوكل بي ، چان كلش فرحان بي بحيث من اجو لسه ما نزله من إيده و كله يصيحله حبيب خالو و مهدي كلش أستحبله ، مگعده گدامة ع الميز و يوكل بي و مهدي يضحك و يلعب بشواربه و ساعة بشعرة ، حچت عمه ...

- ولك يمه بعده زغير لتوكله هواي

- ميخالف يمه يتعلم من هَسه ، أكل رجال على گد أفعالها ، مو صحيح وليدي ، مهدي باوع عليه ولك عوف الأكل

كُلهم ضحكو على تصرفات مهدي أله آني أنقهرت على شهم كلش ، اشوفه شلون يلاعب بمهدي و متعلق بي ، لو أكبر موجود چان هَسه يلاعبه و يوكله بإيده و يصيحله وليدي مثل من گال لمهدي ، طبعًا ( أكبر ) أكبر من مهدي بشهرين يعني أعمارهم متقاربه ، هو هَسه عمره ٦ أشهر و أكبر هَسه ٨ أشهر ، حچت يامور ...

- شهم حَبيبي أنطيني ياه عنك و كمل أكلك تعبك هالزعطوط

- لا والله متونس بي خلي

- و إيدك شلون

- ما عليچ بإيدي

بقى هو وياه ساعة يلعبه و ساعة يوكله ، كملنه غده و شاله أخذه غسله و نشفله بالخاولي و رجع يلعب وياه ، آني لميت المواعين و أخذتهن للمطبخ ، أجت يامور تساعدني ، وگفت أغسل مواعين و هي الظاهر أنتبهتلي ، وكفت بصفي ...

- مُهره ، شبيچ حَبيبتي؟

بلحظة ضعف نزلن دموعي ...

- كلش أنقهرت على شهم ، لو أبننا موجود چان هَم عامله هيچ ، چان صارله أب ماكو مثله ، شفتي شلون ما ترك مهدي و لا ثانية ، أعرفه ديعوض غياب أكبر اللي ما شافه

- شفته والله و أنقهرت عليه ، اعرفه شهم صح يبين للناس أنُ هو قوي بَس كُلنه ندري أنُ داخلة مكسور

- حَتى آني ، جاي أحاول أنسى سالفة أكبر و ما أفتحها ، أو بالأحرى أتناسى لأن مستحيل أنسى أبني ، ماريد أذكر هالموضوع گدام شهم لأن أعرفه ينقهر ، ماريده ينقهر أكثر كافي اللي صارله

- إي والله كافي ، لو تشوفينه بفترة غيابچ شصار بي لچ والله أنتهى

سكتنه شوي بعدين رجعت حچت يامور ...

- اگول ليش متسون طفل ، بلكي يعوضكم عن أكبر

- ماگدر

- ليش متگدرين؟

- ماعندي أستعداد اسوي أطفال ، صرت أخاف أجيب طفل والله يامور

- فكري بشهم مُهره ، صدگيني الطفل راح يرجعلكم حياتكم القديمة و يخفف عنكم غياب أكبر ، فرحي گلب شهم خطية

سكتنه ثنينه لمن شفنه شهم دخل للمطبخ ...

شهم : يامور مهدي گام يبچي يمكن نعس او مادري روحي شوفي

- تمام حَبيبي رايحتله

راحت يامور و شهم راد يطلع و وگف يباوعلي ، أجه وگف يمي ، درت وجهي عنه حَتى ميعرف أني باچيه ، مد إيده و دار وجهي عليه ...

- هاي شنو باچيه؟!

- لا حَبيبي

- لا باچية ، ليش غاليتي شبيچ تبچين سولفيلي؟

- مو شي مهم

- لا مهم سولفي

جاوبته بإبتسامة ...

- والله مو مهم حبيبي ، روح أگعد ويه قاسم عيب

هز راسه ما راضي و طلع

***

رُسل
گاعده أرضع بـ سيف خبلني صارله من الصبح بَس يبچي ، أحتاريت شسوي وياه ، عبالك اول طفل ليه ما جاي أگدر أعرف شبي ، خليته بالسرير و نزلت للمطبخ جبت علاجه ، دخلت و جيت شلته ، أدحگ عليه شو الوليد لا شبطه و لا لبطه ، تخبلت گمت أهزه أريده بَس يبچي ماكو ، وجهه أزرگ و ميتحرك ...

********

يتبع ...

18.kij
تعالو أنستا و اللي يجي يدخلي خاص يگُلي آني جديد علمود اضيفه كلوز لأن نشري اللي يخص الرواية كُله بالكلوز .

سحر الدليمي