رواية عشگ الفرات ( عِندما تَهوى القُلوب ) الفصل الثاني والخمسون 52 - بقلم سحر الدليمي

شلونكم يربعنه
لا تنسون التصويت و التعليق بين الفقرات
قراءة مُمتعة ♥️

***

- چذاب اليگُلچ ديرتي مدينة
آني عيونچ ديرتي و ما أبدلهن

***

- صگر عفييه تعاال شوف سيف مدري شبيي

گام على حيله و جاني ملهوف ...

- شبييي !!

- ما أدري بالبداية گام يگح و هَسه وجهه أزرگ و ميتحرك ، عفييه حيل ماضل بيه شبيي أبنيي

أخذه مني و شاله بحضنه ، صار يمسح على وجهه و ينفخ عليه ، ماكو ميتحرك حَتى بچي ميبچي ، تخبل صگر ، جت عمه نجاة و شافتنه ...

- شبيكم ولكم؟

- عمه سيوفي مدري شبي

- شو جيبه

أخذته من صگر و صارت تطبطب على ظهره خفيف و تمسدله بَس الطفل ما جاي يتحرك ...

- أخذو للمستشفى بسااع ولكم

صگر : ألبسي هدومچ و الحگيني ع السيارة بساع

طلع و أخذ سيف وياه و آني رحت بدلت بسرعة و طلعت و مشينه للمستشفى ، صگر دگ على السكرتير مال الدكتور هو يعرفه صديقة ...

- ألوو

- هلا صگر وين هالغيبة يول

- بنص الخير آني ، عوفني من هالسوالف و گُلي أنت وين هَسه؟

- بالعيادة ليش؟

- خوش ، جايكم هَسه بالطريق ، من أصل أريد أطب للدكتور گُبل ما أگدر أنتظر أبني مريض

- صگر بَس ما أگدر أدخلك أكو هواي مُراجعين جاي ينتظرون دورهم ، ميصير أدخلك گبلهم

صگر ألتفت و دحگ عليه و على سيف بخوف و حيرة ، رجع نظره للطريق و صاح ...

- جااي أگُللكك أبنيي رااح يرووح من إيديي تگُليي دور و مُرااجعيين ، دبرليي يااها أساامة لا بالقرآن أگلب العيادة فوگ روسكم

- زين زين بَس لتصيح

سد التيلفون و ذبه ، ألتفت عليه ...

- هااا ما تحرك ما سوه شي؟

- لا

گلته هيچ و بچيت و آني أدحگ على أبني اللي بحضني و مدري شنو مصيره ...

- لتبچين رُسل إن شاء الله مابي شي

زاد سرعة السيارة أكثر و كلساع يلتفت يدحگ على سيف ، وصلنه و نزلنه بساع ، طبينه و بوجهنه للدكتور ، دخلنه و أخذ سيف من إيدي و فحصه ، ما أدري شسواله و فز و گام يبچي ، هنا أحس حجر و أنزاح عن گلبي ، ادحگ على صگر مسح گُصته و تنفس براحة ، حچه ...

- هاا دكتور طمني شبي الوليد؟

- والله لو ما جبتو بالوقت المناسب چان راح بيها

- ليش شصارله؟

- الحليب اللي جاي ياخذه مأذي و على شوي راد يكتله ، لازم تغيرونه فورًا

أنطاني سيف شلته بحضني و بسته و آني أتحمد ربي ، الدكتور طلع ورقة و كتب بيها اسم الحليب و أنطاها لصگر ...

- هذا الحليب جيبه و ما تنطونه بَس منه ، ديرو بالكم تنطونه من نوع ثاني لأن أبنكم مو كُل حليب يناسبه

- صار دكتور مشكور

- ولو هذا واجبي

طلعنه من العيادة و رحنه للصيدلية اللي بصفها أخذنا الحليب و رحنه للسيارة ، صعدت و صعد صگر ...

- جيبي سيوفي يمي

- مو شلون أنت جاي تسوق

- ميخالف جيبي

أخذه و حطه بحضنه و صار يحچي وياه ...

- سيوفي ، بَعد روح أبوك أنت ، خوفتني عليك حَبيبي ، بَعد لا تعيدها لأن تره إذا عدتها ما أشتريلك سيارة من تكبر

ضحكت على حچيه ، يحچي وياه كأنه شخص چبير ، هاي دائمًا هيچ يحطه بحضنه و يگوم يسولف وياه بمواضيع حَتى آني ميحچي بيها وياي و من أسأله يگول أريد أعوده ع النقاشات وياي و ويه غيري من هَسه ، حرك السيارة و مشينه و سيف مطلع إديه و يلاعب بيهن بالهوا و صگر مكيف عليه
وصلنه البيت و نزلنه ، أول ما دخلنه تلگتنه عمه نجاة و عمه بدور ، سألن و حچينالهن السالفة و أخذت سيوفي و صعدت فوگ لأن نام ، دخلت غرفتنه و رحت حطيته بالسرير و غطيته ، نزعت ملابسي و لبست فستان قصير مال بيت ، وگفت ع المرايه و فتحت شعري و رشيت عطر ، أنفتح الباب و فات صگر ، ابتسم و جه يمشي عليه وگف ورايه و حضني ، دنگ يم رگبتي و گال ...

- خوفنه هالزعطوط مو

- ردت أموت مو بَس خفت

- أسم الله عليچ يـَ روح الروح

أنداريت عليه و خليت إيدي على وجهه ...

- ليش متسوي لحية؟

- هههههه شلچ باللحية

- أحبها

- مگدر ، نسيتي آني عنصر بالداخلية

- أووووف ، والله أحس الداخلية ضرتي

- هههههههه لا يابة شيوصلها عليچ ، بعدين شلچ باللحية هاي شوارب

- أريد لحية و شوارب

- زين آني أريد بوسه

- ممنوع

- هااا صدُگ؟

- إي والله

ما حسيت بي بسرعة جرني عليه و باسني من شفايفي بدون ما أحس ، وخر عني و أبتسم و گرص خدي ، گال ...

- صگر ماعنده شي ممنوع

ضليت صافنه عليه و هو يضحك ، أنفتح الباب و فاتت لارين ، وگفت يم الباب و صاحت ...

- باابااا

ألتفتلها صگر ...

- عيون بابا

- لا تچذب عليه أنت متحبني و آني مو عيونك ، لو تحبني چان وصلتني للروضة ما أخذت سيف و طلعته

گالت هيچ و راحت تركض و هي تبچي ، صگر تخبل من شافها مقهورة و تبچي گُبل راح وراها

صگر
طلعت من الغرفة و رحت لغرفة لارين ، فتحت الباب و فتت لگيتها گاعده بالزاوية بين الكنتور و الحايط و تبچي انمرد گلبي عليها ، هاي اول مره تزعل مني لدرجة تبچي ، لعد شگد قهرتها ، رحت گعدت گدامها ، مغطيه عيونها و تبچي ...

- لولو ، شو دحگي عليه بنيتي

رفعت راسها و دحگتلي بعيون مدمعة ...

- أحچيلي بابا بسنو مضوجچ آني؟

- أنت متحبني

- منو گالچ؟

- أنت وعدتني توصلني للروضة اليوم ، بَس عفتني و رحت ويه سيف

- بابا آني والله أحبچ ، و من أخذت سيوفي ما أخذته اونسه ، سيوفي تمرض و أخذته للدكتور آني و ماما ، تدرين من شافه الدكتور شگال؟

- شگال

- گال لو ما جبتو چان مات ، يعني لو عايفه و رايح وياچ موصلچ چان مات سيوفي و يصير ماعندچ أخ تلعبين و تضحكين وياه

- صدُگ

- وداعت عيونچ الحلوات ، بابا آني أحبكم ثنينكم أنتِ و اخوچ ، أنتِ بنيتي و فرحة حياتي ، و سيوفي وليدي و سندي ، آني مستحيل أحب واحد أكثر من الثاني ، ثنينكم أحبكم نفس المحبة و گلبي مسجل بأسمكم

- و ماما؟

ضحكت و جاوبتها ...

- أنتو بالطابق الجوه من گلبي و أمكم بالطابق الفوگ ، خوش هَسه رضيتي؟

أبتسمت و حچت ...

- إي رضيت

- عَجل يلا أمشي نفتر بالسيارة

گمت و گدتها من إيدها و طلعنه فريتها بالسيارة و جبتلها حلويات و رجعنه للبيت ، وصلتها لغرفتها و آني رحت للغرفة ، فتت و لگيت رُسل نايمة ، نزعت ملابسي و لبست تراك و رحت يمها تقربت عليها و بستها من خدها ، حست عليه و فتحت عيونها ...

- شوكت جيت؟

- توه هاي جيتي

- أگوم أحطلك غده

- لا لا أگعدي ماريد

- ليش؟

- أكلت ويه لارين چبس و شبعت

- هااا لازم رضيتها

- إي شلون أخلي بنيتي زعلانه

ابتسمت و خلت راسها على صدري ، حضنتها و نمنه

***

مُهره
لليل و راحو قاسم و يامور و آني صعدت فوگ و لسه منظر شهم ويه مهدي يتراوالي و كُل ما أتذكر أموت من القهر ، صعدت لغرفتي و بدلت ملابسي و فتحت شعري و رحت تمددت بفراشي ، صارت الساعة بالـ 12 أجه شهم و بدل ملابسه بسرعة و أجه بصفي ، خله عكِسه ع المخدة و رچه راسه على إيده و حچه و هو يباوعلي ...

- سولفيلي شبيچ تبچين اليوم؟

- شهوم والله مابيه شي

- لتحلفين مُهره ، يلا أسمعچ

- حَبيبي گتلك مو شي مُهم لا تدوخ راسك

- تذكرتي أكبر مو؟

- شعرفك؟

- تعلميني بيچ ولچ ، آنـه أعرفچ أكثر من ما أعرف روحي

- حَبيبي خلينه نسد هالموضوع

- و آنـه هَم أگول هيچ ، يلا تعاي خل ننام

فتحلي إديه و أشرلي أجي ، تقربت و خليت راسي على مخدته و هو حضني و نمنه

***

فرات
گاعد وحدي بالغرفة جاي أگلب بالصور مال المهر ، أدحگ عليها و أگول معقولة راحت من إيدي ، مو چانت ليه و چان هَسه أحنه متزوجين ، شلون أنگلب كُلشي ضدي ، طلعت عن الصور و رحت لليوتيوب گمت أگلب طلعتلي أغنية و شغلتها ، أندمجت وياها و حسيتها وگعت ع الجرح ...

- يمه تعاليلي ، يمه تعاليلي
آني بجمر الغضى و أنتِ بتعاليلي

- عند ما يغيب الگُمر ، سمره تعاليلي
تشوف من يدحمچ و آني أجرع الميه

- يوليد عيد الخطبه و أستنجد بعمامك
يوليد عيد الخطبه و أستنجد بعمامك

- ضرب الفشگ لا يهمك
ما زالني جدامك

بين ما آني مندمج و ناسي الدنيا ، انفتح الباب و فاتت أمي ، جت گعدت گبالي و سحبه التيلفون من إيدي و طفته ...

- شبيك حَبيبي؟

رفعت راسي و دحگتلها ...

- نار و شابه بصدري يمه نااار

خلت إيدها على وجهي و حچت بصوتها الحنين اللي ينسيني كُل جرح بيه ...

- أسم الله الرحمن عليك ماما لتحچي هيچ

تمددت و خليت راسي بحضنها و هي شالت إيدها و صارت تمسح على شعري و وجهي ...

- گلبي صاير جمره و يحرگ صدري يمه

- بَس هي تمنيتها من الدنيا ، عافتني هيچ بكُل بساطة

- حَبيبي وداعت عيونك الحلوات نصيبك ميروح لغيرك ، هذا الشي نعرفه كلش زين ، و إذا عشق من نصيبك ترجعلك

- أدعيلي ترجعلي يمه ، والله مگدر بلياها

- أدعيلك وليدي بدون متگول

- لتعوفيني يوم ، ضلي يمي ، سولفيلي هواي صوتچ ينسيني جروحي

دنگت و باستني من راسي و همست بأذني ...

- يمك آني ماما ، ما أعوفك

سكتت شوي بعدين ردت گالت ...

- تتذكر من چنت زغير شنو چنت تگلي؟

- شِنو؟

- من تصوب أبوك و ضل شهرين بالمستشفى ، چنت تجي تگلي ماما ، بابا مات؟ و أگلك لا ، ترجع تگلي إذا صار شي على بابا آني أموت ، و من وكتها عرفت أنُ الناس اللي تحبهم شگد ألهم قيمة عندك ، مو مجرد حُب و أحترام فقط

- كملي

- زين تتذكر من تعاركتو أنت و صگر على مسدس أبوك ، أتذكر چان يفصخه و ينطي ألكم و بوكتها ردتو ثنينكم و أبوك حار ميگدر ينطي لواحد و يزعل الثاني

- إي و أتذكر ضمه و گعد و گعدنه يمه آني و صگر و گال أريدكم تعرفون شي ، سلاحكم مو حديدة سلاحكم هو عقلكم انتو هَسه متكاونين على سلاحي بَس بالحقيقة أنتو كُل واحد عنده سلاح خاص بي و اللي هو عقله و بمرور الأيام راح يثبتله هالشي

- إي و أنت شكلك نسيت نصيحة أبوك هاي ، فـ راح أرجع اذكرك ، أبني الگلب چتال صاحبة ، اصحى و بطل تمشي وره گلبك جرب تسمع لعقلك ، و گتلك نصيبك ما يروح لغيرك

ضلت نجاة تحچي ويه فرات و تحاول تنسي و تخفف عنه لحد ما نام ، گامت و خلت جوه راسه مخده و غطته و طلعت ، راحت للغرفة طبت لگت عَلي گاعد يقره كتاب ، شافها و نزع نظاراته و سد الكتاب ، هي راحت تمددت يمه ، حچت ...

- ليش مو نايم لهسه؟

- ليش ما تدرين آني ما أگدر أنام إذا ما أنتِ يمي

جاوبته بإبتسامة ...

- يلا هَسه آني يمك نام

- لا أگفي مو عبالچ أنسى و ما أحاسبچ ، وين چنتي؟

- يم فرات

- بي شي؟

- مقهور

تنهد و حچه ...

- تعبني هالوليد

- بَس هو تعبان أكثر

- من إيده ، أضل أگُله يا ابني تصرف بعقلك ميفيد

- مو بإيده والله عَلي ، هذا حُب مو شي هين

- ديلا هَسه نامي و الله كريم

***

ريهام : ريااان ، يوليي أگفي أرييد إحچيي ويااچ هاي شبييچ !!

- هاا هااا شتريدين

- أحچيلي شصار ويه المسعد و خطيبته

- طلگها

- صَحيح؟

- يعني قابل أچذب عليچ

- والله حيرتيني هَسه شبيچ طافره روحچ ، أنتِ مو هذا اللي تريدينه؟

- طلگها صَحيح بَس طلگها مجبور لأنها ما تريده و هي طلبت يفصخون الخطوبة ، بعده يحبها و مچلب بيها ريهام بعده يحبها ، تعبني شسوي وياه و يشوفني

- أصبري عليه ، أنطي مجال شبيچ

- شصبر ريهام جاي أگُلچ يحبها و گلبه ملچوم عليها شلون تريدينه يحبني

- انتِ مو گلتي هي ما تريده؟

- إي

- إي هاذ هو عجل ، يحاول وياها مره مرتين من يشوفها ما تريده يبطل عنها صدگيني ، الزلم ما يركضون وره وحده ما تحبهم

- أله فرات ، بالحُب يختلف عن كُل الزلم ، من يحب يحب من كُل گلبه و ما ينسى بسهولة ، يولي ٤ سنين و هو يحن و يون على ميس ، تريدينه ينسى عشق بشهر و شهرين و يجي يحبني

- والله مدري شگُلچ

***

عشق
گعدت من النوم ، صليت و فتحت باب الغرفة و طلعت ، صار بوجهي فرات ، بقى صافن عليه شوي بعدين دنگ راسه و نزل گدامي ، نزلت وراه لگيتهم مچتمعين بالصالة و مشغلين قرآن ، أباوع لـ فرات تغيرت ملامحه و عگد حواجبه ، فجأة صاح ...

- طفووو

رافد : شنطفي يول

- القرآن ، طفوو بسااااع

رفع راسه خالي جسام و باوعله مستغرب ، حچه ...

- قرآن وليدي شلون نطفي و اليوم جمعة

فرات لزم راسه و گعد ع القنفة و صاح ...

- مااارييد أسمععههه ماااريد ، صووتهه جااي يأذينيي طفووووو

الكُل صابتهم حالة دهشه من تصرف فرات ، طبعًا آني مو اول مره أشوفه هيچ بَس أنصدمت هالمره أنفعل كلش ، گام خالي علي صدق و طفى القرآن و راح گعد يم فرات ، حط إيده على چتفه و حچه ...

- شبيك أبني ، ليش متريد تسمع القرآن؟

- مادري صوته يأذيني ، من سمعته راسي گام يوجعني ، ماريد أسمعه لا تشغلونه أنوب

خالي باوع لأمي و خالة نجاة بأستغراب ، فرات أخذ السويچ مال السيارة و گام ، صاحه خالي ...

- وين رايح بابا؟

- للمزرعة

گال هيچ و طلع
وراها بشوي گمنه نحضر بغراضنه آني و ماما حَتى ننتقل للبيت ، كملناه بسرعة لأن هو مأثث بَس نظفناه و جبنه چم شغلة جانت ناقصة ، رحت للغرفة حضرت ملابسي و غراضي و أهم شي مخدتي ما نسيتها لأن متعودة ما أنام أله عليها ، كملنه و أخذنه رافد للبيت ، وصلنه و دخلنه للبيت سفطنه غراضنه و كملنه ، اباوع للبيت كُله بي ذكريات بابا ، صَح آني ما أجيت وياه هنا بَس مره وحدة بَس ذكرياته تارسته ترس لأن هو أثثه على إيده ، رافد بقى ويانه لأن خالي جسام وصاه ميعوفنه خاف نحتاج شي

***

فرات
وصلت المزرعة و طبيت طبگت السيارة بالحوش و رحت بوجهي لـ غرام ، ما لگيتها بالغرفة مالتها ، أفتريت للحديقة لگيت عمي فؤاد رابطها بيها ، رحتلها و هي من شافتني گامت تصهل عبالك تعاتبني لأن ما جاي ازورها ، وگفت يمها و صرت أمسح على راسها ...

- أدري مقصر وياچ حيل والله ، بَس شسوي هو آني بحق نفسي مقصر

- أشتاگيتيلي مو؟

فؤاد : فرات

أنداريت لگيت عمي فؤاد واگف وراي ...

- هلا عمي

- بالمهلي وليدي ، سمعت الفرس تصهل عبالي صارلها شي

- لا مابيها شي بَس شافتني و رحبت بيه

- إي شلونك

- أنت شتشوف

- أشوفك عندك حچي چثير ، سولف يـَ بعد عمك

- و شيفيد إذا سولفت

- يفيد ، حييل يفيد أهم شي ما تضم بگلبك

- عمي آني أريد أعرف ليش دائمًا أخسر؟

- شخسرت؟

- خساراتي چبيره

- لا تگول هيچ يابة ، تراك شاب و عين الله عليك ، أهلك حواليك و شغلك ماشي و الحَمد لله ، شخسرت !!

- گلبي خسر چثير

- إييييه خسارات الگلوب ميهي هينه ، الله يعوضك وليدي

- ماريد هالعوض ، توبت

- متأكد؟

- إي ، يلا من رخصتك عمي

- وين؟

- هينه أتمشى

- ديربالك على نفسك

هزيتله براسي و أخذت غرام شديت سرجها و ركبت و طلعت أتمشى بالقرية ، غرام تعرف وين تاخذني و وين أريد ، ودتني للمكان اليحبه گلبي ، الفرات ، نزلت و ربطتها بالشجرة و گعدت ع الجرف و سرحت بهالدنيا ، سمعت صوت حركة وراي ، أنداريت لگيت بنيه واگفة ورايه و چان مبين عليها خايفة حيل و تبچي ، گمت على حيلي مستغرب منها ، حچت و چانت ترجف من الخوف ...

- ساعدني عفيه

- منو أنتِ ، شصاير وياچ؟

- يريدون ياخذوني والله

- منو؟

سمعنه صوت سيارة و البنيه أخترعت و جت تركض و وگفت وراي ...

- يـَ بنت الحلال فهميني شبيچ؟

- ساعدني و آني أحچيلك كُلشي الله يخليك

- زين أمشي

- وين؟

- مو تريديني أساعدچ؟

- إي

- عَجل أمشي وياي و لا تخافين

أخذت الفرس و مشيت و البنيه تمشي بصفي و تتلفت ، وصلنه البيت و فتحت الباب و فتت ، فاتت وياي ...

- أگعدي هينه

گعدت و رحت جبتلها مي و أنطيتها ، شربت و خلته ع الميز ...

- تگدرين تحچيلي هَسه؟

- اكو ناس معادين أبوية و يريدونه نشيل منا و ابوية ما يقبل و آني چنت أتمشى يم بيتنه تعرضولي بالطريق و رادو ياخذوني بَس أنهزمت منهم

- و أبوچ وينه عنچ؟

- بالشغل

- أنتِ شسمچ؟

- حياة

- بنت منو؟

- بنت علاء

- عرفتكم

انداريت و أنطيتها ظهري ، طلعت تيلفوني تا أدگ على صگر ، حچت ...

- شراح تسوي

- ما عليچ

دگيت على صگر و حچيتله السالفة و گال شوي و آني يمكم ، گعدنه ننتظر وره تقريب ربع ساعة وصل صگر و جماعته ، أمرهم يطوقون المنطقة كُلها و قسم منهم خلاهم هينه يم البيت ، رحتله لگيته يحچي بالاسلكي أنتظرته يكمل ، كمل و ألتفتلي ...

- هاا فرات

- آني رايح

- وين؟

- للبيت

- زين الله وياك

ردت أطلع و دحگت ع البنيه لگيتها تدحگ عليه ، عفتهم و طلعت للبيت وصلت غاد و تلگتني امي ...

- وين چنت فرات تأخرت

- صارت وياي شغلة أخرتني ، عجل عمتي وين؟

- راحت لـ بيتها

- يعني أنتقلو؟

- إي

تنهدت بقهر و شلت سويچ السيارة و گمت ، وگفتني أمي ...

- وين رايح وليدي توك وصلت

- هينه يوم

طلعت و ركبت سيارتي و توجهي لـ بيت عمتي ، وصلت غاد لگيت سيارة غريبة طابگة يم بابهم ، ما أهتميت گلت يجوز الجيران ، لگيت الباب مردود رد ، دفعته و فتت و أنصدم باللي أشوفه ...

********

يتبع ...

هالمره البارت أقصر بشوي من كُل مره ، بَس يعني أتوقع أنتو تعودتو على سردي يعني طول البارت يعتمد ع الأحداث المُخصصة إله

18.kij
تعالو أنستا و اللي يجي يدخلي خاص يگُلي آني جديد علمود اضيفه كلوز لأن نشري اللي يخص الرواية كُله بالكلوز

سحر الدليمي