رواية عشگ الفرات ( عِندما تَهوى القُلوب ) الفصل الخمسون 50 - بقلم سحر الدليمي

هلوو حُب شلونكم
هاي المشاهد راح تكون من البارتات الجاية ، نفس المرة السابقة بدون ذِكر أسماء بَس أتوقع راح تعرفون من الأحداث ، هااا و احب أنبهكم على شغلة يعني هاي المشاهد او الحوارات اللي راح تقرونها هنا ممكن تلگونها مُختلفة من نصل ألها بالبارتات بَس هي نفس الفكرة يعني .

دحگو بالنسبة لـ مُهره و شهم تقصدت ما أخليلهم مشاهد هنا لأن أريدكم بعدين أنتو تعرفون شيصير وياهم

***

عفتهم يسولفون و رحت طلعت بره بالحديقة ، أمي دتضغلط عليه كلش و تلومني و هي متعرف اللي بگلبي و اللي دامر بي ، گعدت ع الصبه و صرت أباوع للاشجار اللي بالحديقة ، و آني صافنه أجاني صوته

ألتفتت عليه لگيته راچي چتفه ع الحايط و مچتف إديه و واگف يباوع عليه و هو مبتسم ...

- نعم

نفض قميصة من التراب اللي صار عليه من الحايط و أجه گعد يمي ...

- أريد أحچي وياچ بموضوع مهم و هاي جيتي كُلها علمودچ

- اسمعك

- هَسه أنتِ أنفصلتي مو؟

- إي

جر نفس بأرتياح ، غمض عيونه و فتحهن و رجع باوعلي و عيونه تلمع ...

- إذا تقدمتلچ توافقين؟

ردت أحچي و قاطعني ...

- لا ، ماريد جوابچ هَسه ، فكري زين و بعدين رديلي خبر ، حتى إذا وافقتي أجيب أبوي و يصير كُلشي رسمي

سكتت و دنگت راسي و آني متفاجأة من طلبه هذا ...

- شو باوعيلي؟

رفعت راسي باوعتله ...

- آني رايدچ من زمان ، من أول ما شفتچ عجبتيني و ردت أتقدملچ بَس ما صار نصيب ، أنتِ فكري و أتمنى الجواب يكون القبول

_____________________

- هاك تيلفونك صارله ساعة يدگ

- ما سمعته

أخذته و دحگت ، الرقم غريب اول مره يدك علي ، فتحت خط و جاني صوت مَره ...

- دبربالك عليها ، لا تنطيها أله ، هو عرف مكانها و جايكم

- دقيقة بَس خل أفتهم ، منو أنتِ خالة و منو اللي ما أنطيها؟؟!

- *** رجلي عرف أنك ماخذها يمكم و جايكم حتى يرجعها

- و أنتِ منو؟

- خالتها

- و ليش جاي ، بَعد كُل اللي سواه جاي يريد يرجعها !!

- مو حُبًا بيها بَس طمع ، هو طماع و مستعد يتخلى عن كُلشي علمود الفلوس

- طَمع؟!

- إي ، *** طلعلها ورث من أهلها و هو سمع و يريد يرجعها حَتى يستولي عليه من خلالها

- أياا حيوااان ، زين خالة أنتِ منين جبتي رقمي و شلون عرفتي أني آني اللي أخذتها؟

- مو بلغت عن أختفائها بدون ميدري رجلي و الشرطة عرفو أنك أنت اللي مخلصها من اللي خطفوها و هُمه طلعو يعرفونك ، رادو يرحون يجيبوها بَس آني ما قبلت ، گلت خليها يمك أأمن ألها و أحسن و أخذت رقمك من عدهم حَتى أتطمن عليها ، بَس من عرفت أنُ رجلي درى بمكانها خفت عليها و خابرتك ابلغك و تدير بالك عليها

- هاذ هو خالة لا تديرين بال ، *** بحمايتي و بعون الله محد يجيس شعره منها

- فدوة لطولك يمه ، الله يحفظك لأمك و لشبابك بجاه الحسين الشهيد

- تسلمين خالة و يحفظچ

_______________________

- شفت ، شفت شلون *** عايشة حياتها بالطول و بالعرض ، شغل و سيارة و طبه و طلعة و لا هامها ، و أبني أنسلبت عافيته و گاضيها من دكتور لـ دكتور !!

- أششش ، أسكتي ديربالچ تحچين هالحچي كدامه ، سمعتي الدكتور شگال ، القهر يأذيه ، چان هالمره الله فكه المره الجاية ما يطلع سلامات ، خلي بلكت ينسى

- شينسى و هو حَتى بنومه يهذي بأسمها ، دمرته ، دمرته و راحت

- سايم جاه الله عليچ يـَ مره تگضبين لسانچ گدامه ، ماريده يسمع بطلريها فرد نوب أريد أنسي ياها تا بلكت ترجعله عافيته

_____________________

- *** عفييه تعاال شوف *** مدري شبيي

گام على حيله و جاني ملهوف ...

- شبييي !!

- ما أدري بالبداية گام يگح و هَسه وجهه أزرگ و ميتحرك ، عفييه حيل ماضل بيه شبيي أبنيي

أخذه مني و شاله بحضنه ، صار يمسح على وجهه و ينفخ عليه ، ماكو ميتحرك حَتى بچي ميبچي ، تخبل *** ، ...

- ألبسي هدومچ و الحگيني ع السيارة بساع

طلع و آني رحت بدلت بسرعة و طلعت و مشينه للمستشفى

____________________

دخلت للغرفة ، چان نايم و هواي أدوية محطوطه ع الميز و المغذي مشكل بإيده ، جريت كُرسي و گعدت بصفه ، لزمت إيده اللي بيها الكانونه و صرت أباوع عليه ، شوي و فتح عيونه بالگوة ، باوعلي و أبتسم بعز مرضه و تعبه ، همس بصوت ناصي و مبحوح ...

- جيتي

- آني آسفه ...

********

و هاي چانت مشاهد من الأحداث الجاية
أتمنى گدرت أرضي فضولكم و أخفف عنكم التفكير بالأحداث لأن هوواي جاي تجيني رسائل و يريدوني أغششهم😂 ، و آني ما أغشش إذا أغشش ، أغشش الكُل ، و هَسه أگُلكم أنتظرو البارت الجاي بعدني ما كتبت منه و لا حرف والله لأن عندي امتحانات ، باچر آخر أمتحان و ابلش أكتب بي و أحاول أستعجل بي

18.kij
تعالو أنستا و اليجي يدخلي خاص و يگُلي علمود أضيفة كلوز لأن كُلشي يخص الرواية أنشره بالكلوز فقط

سحر الدليمي