رواية عشگ الفرات ( عِندما تَهوى القُلوب ) الفصل الحادي والثلاثون 31 - بقلم سحر الدليمي

- أحب الفرات عَبن لونه من لون عيونچ .

#حچايات_غربية

***

رافد : ألووو ، وينك صگر أحنه وصلنه المضيف تجي لو لا ؟

- لا أجي أجي هَسه طالع

- إي زين لا تتأخر

- صار

سد التيلفون صگر و أخذ سلاحة و توجه للسيارة و طلعو للمضيف اللي راح تصير بي الگعدة ، أخذ وياه دورية من ربعه تحسبًا لأي شي لأن هو يدري حارث و ولده ما يتأمنون

وصلو المضيف و نزلو و وزعو الجنود حوالين المكان ، دخل صگر للمضيف ببدلته العسكرية و دخلو وياه ثنين من ربعه ، سلمو و الكُل گام بوجوهم و ردولهم السلام بما فيهم حارث ، گعد صگر يم أبو ، حچه الشيخ جاسر ...

- يابة أفلح من صلى ع النبي

ردو الموجودين : اللهم صلِ على مُحمد و آلِ مُحمد

- يابة أحنه جايين تا ننهي هالعداوة اللي صارلها سنين ، و ما نريد يگع بيناتنا دم أكثر من الوگع ، گبل أبو صگر و هَسه أبنه ، أحنه جاينكم و مستعدين ننهي هاي العداوة من أساسها

حچه عَلي : آني أللي يهمني حگ أبني يـَ شيوخ

رد الشيخ ذياب ، شيخ عشيرة حارث

- حگ أبنك تاخذة من هالشوارب يـَ أبو صگر ، أللي تآمر بي يجيلك

جسام : تسلم يـَ شيخ و أحنه هاي هگوتنه بيك

عَلي : على راسي شيخ ما تقصر ، نفصلكم ٣٠ مليون هاي حگ التهديدات و دوست الدار ، و حگ أبني فرات آخذه إذا حارث سلم أبنه و أللي چان وياه ليلة الحادث بنفسه للشرطة و ذوله واگفين بره ، أريده گدام عيوني يسلمهم ، و آني ما أجبره ع اللي گلته بَس إذا ما وافق ساعتها لحد يلومني باللي أسوي

أنتفض حارث و گام من مكانه و الكُل گام وياه ما عدا جماعة المهيوب ، حچه ...

- لاااا هيچ زودتها يـَ أبن المهيوب !!

عَلي : هذا العندي و أن ما رضيت و حگ مُحمد دمكم كلكم ما ينسيني اللي صار بـ أبني

- تهدد يعني؟

- تهديد تحذير شلون ما تريد تفهمه أفهمه

- و حگ أخوية الچتلته

گام عَلي على حيله و صاح ...

- هااي السسالففةة صاارلهاا سسنييين و ثبتتللكمم آني ماالي علاقة بچتلة أخووك و سديينه السالفةة بَسس أنت شككلك ما تررييد تسدهها ، بَس والله يـَ حاارث أن ماا كفييت نفسك عني و عنن أهلل بيتتيي يشهد عَلي ربي و كُل الحاضرين غيير أسويي الددمم للرركبب

صاح الشيخ ذياب : يابة يوجوه الخير أهدو و صَلو ع النبي

علت الأصوات و الطرفين معصبين و يصيحون و الشيوخ يحاولون يهدون بيهم بَس ماكو فايدة ، لحد ما تدخلو صگر و جماعته و هدو الوضع و رجعو يتناقشون ، أتفقو أخيرًا أنُ اللي أطلبو بيت المهيوب يجيهم ، أضطر حارث ينطيهم الفصل اللي أطلبو ، و يسلم أبنه و اللي وياه للعدالة ، خلو حارث و جماعته يتعهدون ميگربون على أحد من بيت المهيوب أو من عشيرتهم و فضت السالفة و كلمن رجع لبيته ، صگر و ربعه راحو لبيت حارث أخذو أبنه و صديقة و حجزوهم يهمهم لحد ما يتم محاكمتهم ...

صگر : عُثمان ، خلي الولد يديرون بالهم عَليهم زين تَره ذوله أعزاز عَلينه

- و لا يهمك أبو سيف لا توصي

صگر دنگ على أبن حارث و همس بأذنه ...

- فرات بَعد ما يگدر يحرك رجليه بسببك ، زين تدري آني شراح أسوي بيك؟

ضل ساكت ما حچه شي ، صگر دفر الكرسي المقابيله و صاح ...

- جاايي أسأللككك تددررييي لوو لااااا ، جااااوب أبن الـ ***

حچه و هو يرجف ...

- لا سيدي ما أدري

- و غلات فرات عندي غير أكسر رجليك و أخليك تسحل بيهن سحل ، و هاي گضبت شارب

گضب شاربه مؤكد لكلامة الحچاه و شهد عليه كُل الجنود الموجودين و ذاك صار يصيح و يتوسل ، صگر ما أهتم و أمرهم يذبونهم بالحجز و راح لمكتبه ، گعد و دگ تيلفونه ...

- هلا رُسل

- هلا حَبيبي ، شوكت تجي؟

- عليش أجي !

- شبيك مو أتفقنه تجي تا نروح للمستشفى نشوف جنس الطفل

- هااا إي والله نسيت ، يلا بعد گلبي تحضري جايچ بالطريق

- تمام

***

جسام و عَلي وصلو البيت ، دخلو و عَلي گعد ع القنفة و چان مبين عليه القهر ، جسام أنتبهله ، حچه ...

- شبيك عَلي ليش هالضوجة و أحنه أخذنه حگنه منهم و زود

رفع راسه و حچه بقهر ...

- بَس فرات راح يضل وضعه نفسه ، الوليد جاي ينتهي شوي شوي گدام عيني و آني ماني گادر أسويله شي

- ما يضل هيچ بعون الله ، إن شاء الله يتعافى و يرجع مثل گبل

جت نجاة سلمت و حچت ويه عَلي ...

- فرات يسأل شصار بالگعدة ، گوم أحچي وياه

- گايم

راح عَلي لـ فرات فتح الباب و فرات ألتفت ، راح گعد يمه ، حچه ...

- شلونك بابا

- على الله

- ما غير الله

- شصار وياكم؟

جر نفس قوي و حچه ...

- أخذنه حگنه

- شلون؟

- فصلناهم ٣٠ مليون و خلينه حارث يسلم ألي دعموك للشرطة

- و ليش فصلتوهم فلوس

- ردت أزودها عَليهم

- إي زين

- فرات

- هاااا

- أبني آني السويته هذا كُله علمودك ، أريد أبرد گلبي و گلبك ، ولو أدري گلوبنه ما راح تبرد بَس چان لازم أحاسبهم على سواتهم بيك ، آني شما يسوي حارث ما أهتم ، حرگ المحلات و المعرض و آني ردت أموت بَس مع هذا ما گربت صوبه و لا فكرت أحاسبه و منعتكم أنتو تآتون بأي حركة ضدة ، بَس هو شيطان يدري لو شما يسوي بيه ما راح أهتم لذلك سوه سوايته و أذاني بيك ، يدري أنُ الشي الوحيد اللي يأذيني لو واحد منكم صابه مكروه

- آني حياتي ضاعت يابة ، جاي أموت ع البطيئ

- ريته آني و لا أنت وليدي ، خلي عينك بعين الله ، الله ما يخلي عبده ، يمكن هذا أمتحان لك و لنه تا يشوف مدى صبرنه و إيمانه بي ، خلي إيمانك بربك قوي وليدي ، بعون الله تتشافى و ترجع تمشي و أزوجك و أفرح بيك

- على طاري الزواج ، چنت أريد أگُلك شغلة گبل لا يصير الحادث بَس ما گدرت

- شنيه؟ ، گول هَسه أسمعك

- ردت أگُلك أني أحب عشگ و رايدها ، چنت متردد أگوللها وره ما صار هيچ وضعي ، بَس صارت و حچيت وياها و البنيه موافقة

- بالله عليك؟!

- إي وداعتك

عَلي سمع هيچ و طار من الفرح ، حضن فرات و نسى الجرح اللي بصدره ، فرات تألم بَس داس على ألمه ما راد يكسر فرحة أبوه ، وخر عنه و حچه ...

- والله أنها ساعة مباركة ، عَجل ما زال البنيه موافقة من هَسه أقطعلكم مَهر

- لا يابة شبيك مستعجل ، خل نشوف عَن وضعي بلكت أتحسن ، آني ماريد أظلم البنيه وياي

- خل نشوف دكتورك شيگول ، إذا أضطريت أطلعك خارج العراق و أعالجك ، لو وين ميكون علاجك أروحله بَس المهم تتعافى ، و أن شاء الله أسويلك عرس أخلي الديرة كُلها تحچي بي

- إن شاء الله يابة

طلع عَلي من يم فرات و هو مبتسم و وجهه فرحان ، لاگته نجاة و أستغربت ...

- أشوفك تبتسم يـَ أبو صگر ، خير أن شاء الله

- خير يـَ أم صگر ، وداعتچ خير

- إي يا الله شكو !!

- أگعدي تحچيلچ

- و هاي گعدنه ، فرحني وياك

- توه چنه نحچي آني و فرات ، و گالي أنه رايد عشق و حاچي وياها بهالموضوع و هي موافقة

- عليك الحُسين تحچي صدگ؟؟؟

- ههههههه على گولت شهم و عَلي الفحل ما حچيت غير الصدُگ

- ياااا گللللوووووشششسس

و چان تطگها هلهوله يمكن سابع جار سمعها ....

- دعلى كيفچ يمعودة تره بَعد ما زوجناه ، خَلي منها لعرسه ههههههه

- والله ماعندي مانع أضل أهلهل منا لحد ما أزفه لـ عروسته و تطفى نار گلبي اللي صارلها سنين شابه عَليه

- إن شاء الله هانت ماضل شي ، بَس أول و بادي خل يرجعله حيله

- آمين ، والله أبنك يعرف يختار ، و يا زين اللي أختارها ، جمال و أدب و ثقافة ما شاء الله عليها هالعشق ، والله من أول ما شفتها تمنيتها عروس لـ فرات

- إي والله ما نلگه أخير من هالبنيه

رُسل
بدلت ملابسي و خليت لارين يَم نَفس و نزلت لگيت عَمي و عَمتي گاعدين بالصالة ...

نجاة : هااا ماما شو مبدلة !!

- عَمه راح يجي صگر ياخذني للمستشفى علمود نشوف جنس الطفل

- هااا چا بيها الخير

گعدت يمهم أنتظر چانو يسولفون ، أللي فهمته أنُ فرات رايد عشق ، حيييل فرحتله لأن أنفكت العقدة اللي سببها اله موت ميس ، بَس تذكرت ريان و أنمرد گلبي عليها ، شلون راح تكون ردت فعلها لو عرفت ، دزلي رسالة صگر تا أطلعله ، طلعت و توجهنه للمستشفى ...

- بعدك تريد تسمي سيف إذا طلع وليد؟

- إيي و شال عَليه هالأسم ، الكُل صار يناديلي أبو سيف

- مدري ليش عندي أحساس قوي أنُ اللي ببطي وليد

- اليجي من الله حياه الله ، كُله نعمة ، وليد بنيه

- إي أكيد

- شلونه فرات؟ ، صارلي أيام ما جاي شايفة

- إي والله يضل يسأل عليك ، بعده على حاله ، بَس أكو شي يخصه راح يفرحك

- شنوه؟

- عود هو إذا حَب يحچيلك راح يحچي

- خير أن شاء الله

وصلنه المستشفى و دخلنه گعدنه ننتظر دوري ، دگ تيلفون صگر و جاوب ...

- هلا ، إي مثل ما گتلك أريدكم تكسرون رجليه تكسر بحيث ماريده يرجع يحركهن أنوب ، إي إي هذاك هَم وياه ، يطبهم مَرض مو حاسبلهم حساب آني ، إي يلا طير

سد التيلفون و رجعه بجيبه ، صفنت هذا شجاي يحچي !! ...

- هاي شنو؟!

- شنو؟

- منو تريدون تكسرون رجليه !!

- ميخصچ بَعد گلبي

- أووووف هَسه شراح تخسر إذا حچيتلي

- دگومي گومي فوتي لدكتورتچ ، و عوفي هالسوالف

گمت دخلت للدكتورة و صگر ضل ينتظرني بره ، كملت شغلي و طلعتله و آني مبتسمة ...

- هاااا بشري

- راح يجينه سيوفي حَبيبي ، مو گتلك أحساسي قوي

- الحمدلله و الشكر على هالنعمة

رجعنه للبيت و أحنه فرحانين ، گلنالهم أنُ الطفل طلع وليد و فرحو و باركولنه حَتى لارين تصفگ و تگمز و هي متعرف شنو السالفة

صگر
عفتهم فرحانين و يضحكون صار هواي محد ضاحك بهالبيت ، رحت لـ فرات تا أشوفه ، دخلت ...

- شلونك يالمعقد

- منو المعقد

- أنت أكو أحد غيرك

- على الله ، هيچ تروح و تعوفني ما صدگت أطلع من المستشفى تا تعوفني و تروح

- لا يول والله مو هيچ ، بَس تدري آني عفت القسم هوواي من چنت أنت نايم بالمستشفى و فاتني هواي شغل فـ چنت مشغول ، المهم هَسه رجعت و راح أضل گاعد على گلبك و تشوف شلون تضل هيچ حالتك

- خليها يم ربك

- و النعم بالله ، باركلي يول

- عليش؟!

- أخوك راح يجيه وليد ، يعني راح أصير أبو سيف من صدُگ

- الله عليك؟

- إي والله

- ألف مبروك حَبيبي يتربى بعزك و الله يجعله من الصالحين

- آمين ، عُگباه لك

- خل أرجع أمشي أول و بادي و يصير خير

- هااا شو مطورين يعني أكو شي آني ما أدري بي؟!

***

مُهره
قرب وقت الغدة و عمي و شهم بعدهم ما أجو ، نزلت جوه لگيت عمه مكملة الغدة ...

- عمه ما خابرتي على عمي شفتيهم يجون ع الغدة لو لا؟

- لا والله حَبيبتي ما صارلي مجال

- زين عادي أخابر شهم من جهازچ؟

- طبعًا عادي حَبيبتي روحي أخذي بالغرفة

- تمام

رحت للغرفة دورت التيلفون لگيته محطوط ع الميز يم صورة شهم و خواته و همه صغار ، چانو كلش حلوين ، أخذت التيلفون و گعدت ع الكرسي ، دخلت ع الواتساب گلت أراسله مراسله أحسن ، كتبتله ...

🗨️ شهم موجود؟

بقيت أنتظر وره ما يقارب الـ ٧ دقايق فتح و جاوب ...

🗨️ هلا يمه

🗨️ آني مو أمك عُمري

طلع من المحادثة كُلها ، وره ثواني دخل و جاوب ...

🗨️ مُهره؟؟

🗨️ إيي

🗨️ هلا حَبيبتي رايده شي؟

🗨️ مشتاقتلك شوكت تجي

🗨️ أشتعلو أهلچ ، ولچ راح تخليني أعوف شغلي و أجيچ

🗨️ إيي تعال

🗨️ مگدر حَبيبي عدنه أچتماع مهم وداعتچ

🗨️ اوووف يعني متجون ع الغدة

🗨️ للأسف لا

🗨️ ماشي لعد لا تتأخرون لأن أهلي عازمينه ع العشه

🗨️ إي گال عمي حسين

🗨️ تمام لعد باي

🗨️ بايات

🗨️ شهم

🗨️ عيوني

🗨️ أحبك تمام

🗨️ أموت بيچ وداعت عيونچ

دزيتله قلب و طلعت من المحادثة و حذفتها ، رحت للمطبخ لگيت عمه جاي تحط بالغدة ، ساعدتها و گعدنه نتغدة

كملنه و لمينه المطبخ ، و رحنه گعدنه بالصالة ، شوي و أندگ الباب ، طلعت عمه و رجعت و وياها جارتنا أم ليث ، آني ما أعرفها بَس هي و عمتي على معرفة ، گعدت وياها عمتي و آني رحت سويت عصير و قدمته ألها ، المره كلش محبوبه و سوالفها حلوه ...

- إي خيه فاطمة ما عرفتينه على هالبنيه الحلوه

- هاي مُهره زوجة أبني شهم ، بنت أخو أبو شهم

- ياااا خيه شهم متزوج و أحنه ما ندري

- إي والله صارلهم شهرين من تزوجو ، صارت السالفة بساع و ما سوينه عرس

- بيها الخير خيه ، إن شاء الله تفرحين بفريخاته

ألتفتت عليه و حچت ...

- حامل أنتِ يمه؟ ، شو وجهچ أصفر

- لا خالة مو حامل

- أنطيني چف إيدچ

بقيت صافنه بوجهها مستغربه من طلبها ، رجعت حچت ...

- أنطيني أنطيني

باوعت لعمتي و هزتلي براسها بمعنى " إي " مديتلها إيدي و صارت تباوع عليها و تگلب بيها ، بقت هيچ دقايق ، حچت و هي عيونها لسه على إيدي ...

- رجلچ يحبچ هوواي يـَ يمه ، و شاف الويل يلا أخذچ

رجعت تگلب بأيدي و وره دقايق حچت ...

- راح تحبلين ، و مولدكم الأول ع الأغلب ولد

- تحچين صدگ خالة؟؟

- هذا الطلعلي بچفچ يـَ خالة ، و بعد العلم يم رب العباد

فاطمة : إن شاء الله خير

گمت رحت للمطبخ و آني حچي هاي المره يفتر بعقلي ، حطيت إيدي على بطني صرت أتخيل أحبل و يجينه ولد و يكون يشبه شهم و ياخذ حنية و طبع أبوه ، بهاي اللحظة شگد تمنيت أحبل و يجيني ولد إي ولد حابة يكون عندي ولد

راحت هاي المره و آني صعدت لغرفتي أرتب شوي بالملابس و كلامها بعده بمخي ، بقيت أعزل بالغرفة ، عزلت ملابس شهم و غراضه ، نظفتها و عطرتها و فتحت التلفزيون ع القرآن ، للعصر كملت كُلشي و گعدت أحط شوية كحل ، أحس عيوني ما أدري شلون ، بين ما آني مندمجه أجاني صوت شهم من ورايه و هو يگول ...

- هنيالها الكِحلة الباست عيونچ

أحس الحرارة صعدت عندي من الخجل ، بعد ما أعرف شرد شگول ، بقيت ساكته ، تقرب مني و مدلي علبة مغلفة بغلاف كلش حلو ...

- شنو هاي

- هدية

مديت إيدي حَتى آخذها و هو سحبها و خلاها وراه ، حچه ...

- أريد بوسه يلا تاخذينها

- شهم

- يلا حُبي يلا

أستسلمت لأن أعرفه إذا ما أبوسه يشلع گلبي ، رفعت نفسي حتى ألوحه ، بسته من خده و حچه و هو مغمض عيونه ...

- أووويليي يابة ، شلون يعني راح نگضيها بوس من الخدود

فتح عيونه و باوعلي و قرب وجهه لأذني و همس ...

- شلعتي گلبي ولچ شوكت تحنين

أبتسمت بخجل و هو مد إيده و نطاني الهدية ، أخذتها و حچبت ...

- شنو جايبلي

- فتحيها و شوفي

فتحت الهدية و طلع جايبلي تيلفون و وياه حافظة كلش حلوة ، تذكرت لمن كسر تيلفوني ...

- جايبلي تيلفون

- إي ، لمن حاچيتيني من تيلفون أمي تذكرت أني كسرت تيلفونچ و هاي المدة كُلها مخليچ بدون تيلفون ، فـ جبتلچ هذا عوض عن ذاك التكسر

- أنت عوضي الوحيد ، أنت عوضتني عن كُلشي شهم

جر نفس و هو يباوع لـ عيوني ، حچه ...

- و لگيتچ يـَ حلوة دوه لكل جرح بيه
لگيتچ و ضيعت نفسي بعيونچ الحلوة

بقيت صافنه بوجهه ما أعرف شحچي ، أبتسم و باسني من خدي و راح للحمام حتى يسبح ، رحت حتى أطلعله ملابس و آني أفكر بكلامة ، طلعتله دشداشة و بنطرون باوعت هاي شمطلعه أمداني أفتر عقلي ، رجعتهن و طلعتله بنطرون لونه أزرگ فاتح كلش ، و وياه بلوز أبيض و ستره جوزية فاتح ، خليتهن ع الچرباية و رحت طلعت ملابس و بدلت بسرعة قبل لا يطلع من الحمام ، كملت و طلع شهم من الحمام بدون ملابس بَس لاف المنشفه على جسمه و آني أباوعله ، فتح المنشفة و آني درت وجهي عنه ...

- شههمم شبيك لهدرجة متستحي !!

- أستحي من منو يعني؟

- مني

- چا أنتِ مو مرتي ، لويش أستحي منچ

- أووووف

سكتت عنه و هو يضحك ، حچه ...

- ديري وجهچ بويه كملت

درت وجهي و لگيته لابس البنطرون و البلوز أجه ليمي يم المرايه شال المشط و صار يمشط بشعره ، حچيت و آني واگفة أباوع عليه ...

- شهم تدري

- لا ما أدري ، شنوه

- اليوم أجتنه هاي جارتكم أم ليث ، و قرتلي الكف و گالت أنُ راح أحبل و يجينه ولد

- و شلون تحبلين بالله ، و آني البوسه بالگوة آخذها منچ

- أنطيني فرصة أتعود عليك شهم

- إي أنطيچ فرصة ليش ما أنطيچ ، بَس تره آني صبري أله حدود يگلبي

گالها و راح يلبس بالسترة مالته ، كمل و مدلي إيده ، انطيته إيدي و لزمها و نزلنه و أحنه إيد تشبك إيد
وگفنه بالصالة ننتظر عمي و عمتي ، شوي و أجو و طلعنه لبيت أهلي

***

عشق
گاعدين آني و نَفس بالهول ، أجت خالة نجاة گعدت ويانه ، حچت ...

- حَبيبتي عشق بلا أمر عليچ روحي علگي المغذي لـ فرات لأن صگر ما موجود

- هااا ، آني خالة؟

- إي خالة أنتِ ، أكو أحد أسمه عشق غيرچ !

- إي صار خالة

گمت و رحت لغرفة فرات ، الحمدلله أجتني فرصة حتى أشوفه و بعلم خالة ، دخلت للغرفة باوعتله نايم ، رحت للمجر طلعت مغذي و أجيت علگته و گعدت على طارف الچرياية حتى أشكله بالكانونه ، أول ما لمست إيده حَس و فتح عيونه ، باوعلي و أبتسم ، حچه ...

- ياريت لو كُل ما أفتح عيوني ألگاچ گبالي

- أأأ ، آسفه گعدتك بَس أجيت أعلگلك المغذي

عگد حواجبه و كأنو مو عاجبة ، حچه ...

- والله لعبتو نفسي كلساع شاديلي مغذي ، دكافي

- مو بسبب أهمالك أنت ، لأنك مجاي تاكل زين حتى تعوض الدم اللي فقدته و يرجعلك حيلك لذلك الأطباء ينطونك مغذيات

- لو أنتِ تجيبيلي الأكل چان أكلت

- يعني إذا رحت جبتلك أكل هَسه ، تاكل؟

- إي

- أحلف

- و غلاتچ عندي

- هاااا

- شبيچ مو گلتيلي أحلف

- أأ ، إي شسمه ، آني رايحة أجيبلك أكل

طلعت من الغرفة و آني گلبي يدگ سريع بسبب اللي گاله ، رحت للمطبخ حطيتله أكل و وياه عصير ، و أخذته و رحت للغرفة ، حطيته گباله ، حچه ...

- ساعديني تا أگوم

- هااا

- والله شگيتي گلبي بـ هاي الـ هااا ، ول يابة تعاي ساعديني شبيچ صافنة

- إي أجيت

رحت حتى أساعده ، حطيت أيدي وره رگبته و هو لزم إيدي ، نهض جسمه بصعوبة و ألم ..

- آخخخ يا يمه

- توجعت

- إي والله

- سلامتك يـَ روحي

- شنو شگلتي؟

- أأ ، گلت هذا الأكل يلا سمي بأسم الله قبل لا يبرد

قربت من يمه الأكل و هو يباوعلي و يبتسم

- يلا آني رايحة إذا تحتاج شي دگ عليه

- لا تروحين

- مگدر أبقى أخاف أحد يشوفني

- محد يشوفچ ، أريدچ يمي عشگ

- باوع بالليل أجي أشوفك

- إذا رحتي أخذي الأكل وياچ آني ما آكل إذا مو أنتِ يمي

- أووف من عنادك ، يلا هاي بقيت

ضحك و صار ياكل و هو يباوعلي ، أكل شوية و گال هاهيه بعد ماريد ...

- بَس شوية أنوب فرات ميصير هيچ لازم تاكل

- والله ما أشتهي ، هاي أكلت لخاطرچ بَس

- تمام

أخذت الصينية و طلعت و صگر راح متوجه لغرفة فرات

فرات
راحت عشگ و شوي و دخل صگر ، جه يمي فتح جهازة و أنطاني ياه ...

- هاك شوف

- شنوه؟!

- شوف و أنت تفتهم

أخذت الجهاز و شغلت الفيديو ...

- ذولة اللي دعموك ، أبن حارث و رفيجة ، إذا أنت أكو أمل ترجع تمشي هُمه هايهيه بعد كسرتلك رجليهم يعني هاي الگعدة يـَ مسعدة

- ههههههه والله كفووو أبو سيف

- والله چان بودي أذبحهم ع الجبله بَس عيب و فشلة من القانون

- ههههههه آخخخ مگدر أضحك تخسه لا تضحكني

- أنت بَس أضحك و شوفني سنك و لا تخاف إذا أنفتح جرحك آني أخيطلك ياه

- هههههههه ، بَس گبلها أقره عليه الفاتحة لأن مستحيل أطلع من بين أديك عايش

- إي والله همزين ذكرتني

***

نَفس
سوينه عشه و تعشينه و كملنه ، گعدت ويه عشق أللي أحسها فرحانة هالإيام ...

- إي ما راح تحچيلي شنو سبب ضحكة عيونچ هاي

أخذت نفس و هي تباوع للسگف و تبتسم ، رجعت تباوعلي و حچت ...

- فرات أعترفلي بحبه

- عليچ العباس؟

- إي والله

- يعمررييي والله فرحتلچ من كُل گلبي ، شفتي مو گتلچ أنتِ بَس أنطي فرصة يجوز يطلع يحبچ ، و هاي طلع حچيي هو الصحيح

- إي والله

- أحچيلي شلون أعترفلچ

بقينه آني وياها نسولف و بعدين هي راحت لغرفتها و آني طلعت بره بالحديقة ، وگفت و الجو چان بارد توه ماطر و صاير كلش حلو ، أجاني صوته و رجف گلبي عليه ...

- ليش واگفة هنا الجو بارد

أنداريت عليه ، واگف و مچتف أديه وره ظهره و يباوعلي و هو مبتسم ...

- حبيت الجو فـ وگفت هنا

تقدم عليه و صار مقابيلي ، حچه ...

- نَفس

- نعم

- أحبچ ....

********

يتبع ...

شلونهم الحلوين♥️
لا تقصرون بتفاعلكم گلبي و أهم شي تچثرولي تعليقات بين الفقرات و تصويتات🌚💜

18.kij
تعالو أنستا

سحر الدليمي