رواية عشگ الفرات ( عِندما تَهوى القُلوب ) الفصل الثاني والثلاثون 32 - بقلم سحر الدليمي

- العشق شرارة ، تُحول قلبكَ الى جمرة
تحرق صدرك بـِ نارِها .

***

تقدم عليه و صار مقابيلي ، حچه ...

- نَفس

- نعم

- أحبچ

- شُكرًا

صفنت ، لحظة لحظة ، گال أحبچ لو آني متوهمة؟! ، رفعت راسي أباوعله ، چان يباوعلي و يضحك ...

- هااا شگلت؟

- گلت أحبچ ، آني أحبچ

سكتت ما عرفت شنو أرد ، تقرب عليه و حچه ...

- والله العظيم ، من أول ما جيتي ويه صگر و شفتچ ، أخذتي گلبي بجمالچ و أدبچ و خجلچ ، يابة من أدحگ عليچ و تخجلين و تنزلين عيونچ تشعلين بگلبي النار

- أأ ، آني ...

- لا ترديلي جواب هَسه ، فكري زين و رديلي خبر ، آني أنتظر ، مستعد أنتظرچ العمر كُله ، تستاهلين عيوني أنتِ

بقيت صافنه بعيونه و آني مصدومة و فرحانة بنفس الوقت ، دار وجهه حتى يمشي ، صحت ...

- رااافد

ألتفت عليه و رجع ...

- عيون و روح و گلب رافد

بقت نظراتي تروح هنا و هنا ، شلون أگولها ، بَس آني أحبه ليش أبقى ساكته مدام هو أعترفلي ، أستجمعت قوتي و رفعت راسي ، باوعت بعيونه وحچيت ...

- ميحتاج أفكر ، آني هَم أحبك

صفن بوجهي ثواني ، حچه ...

- متأكدة؟؟

- إي وداعتك

أبتسم و حچه ...

- يبوووو يا الله شهاليوم الشگاگي هذا ، تدرين شبودي أسوي هَسه؟

- شنو؟!

- أشيلچ و أفتر بيچ مثل المسلسلات التركية ، بَس عيب ما ترهم أحنه بالأنبار مو بأسطنبول

- هههههههه ، هووواي متأثر بالمسلسلات التركية

- والله ماكو شي متأثر بي بالدنيا بگد ما متأثر بضحكتچ هاي التاخذ گلبي من بين ضلوعي

- آني أروح ، تصبح على خير

- روحي يـَ روح الروح

أبتسمت و رحت أمشي حتى أدخل جوه و هو بقى واگف و يباوع عليه

***

عشق
صارت الساعة بالـ 12 و نص و أجيت حتى أنام ، توني متمدده بفراشي و چان تجيني رسالة على موبايلي ، أخذته و فتحتها طلعت من فرات ، چان كاتب ...

🗨️ تعاي

كتبتله ...

🗨️ ليش بيك شي؟

🗨️ صدري يوجعني ، ما جاي أگدر أنام

قريتها و طفرت من مكاني ، ذبيت الموبايل و لبست الشال ع السريع و طلعت بوجهي لغرفته ، حَتى ما تأكدت إذا أكو أحد أو لا ، فتحت الباب و دخلت ...

- هااا شبيييك ، لحظة أروح أنادي خالو

- لا لا لتروحين

- مو تگول صدرك يوجعك !

- لا مابيه شي

- تحچي صدُگ فرات !!

- إي والله ، بَس سويت هيچ تا تجيني

- ليش

- مشتاگلچ ، حرام أشتاگ لـ حَبيبتي؟

- هاااا

- هَم ردت گالت هااا

شبيچ واگفة أگعدي

- مو خاف أحد يشوفنه

- عشگ ضايج ، آني يومي كُله مگضي بهاي الغرفة ، لا أتحرك و لا أسوي شي ، بَس من أشوفچ أنسى كُلشي و يهون كُلشي ميهون بَس بشوفتچ ، ضلي يمي شوية عفيه

گعدت مقابيله ع الكرسي ...

- شنو تريد أسوي حتى متبقى ضايج؟

- غنيلي

- لا صوتي مزنجر و محلو

- يابة آني راضي أنتِ شعليچ ، غنيلي يلا

گمت أغنيله و هو راچي راسه ع الديكور و يباوعلي و هو مبتسم ، غنيتله ...

- أمك طاغية يا زين الأوصاف
تتباهى بجمالك

- و خالاتك عَليك تغار و تخاف
حَتى من خيالك

- و عماتك يلقبنك يـَ شفاف
بالنسبة لـ دَلالك

- و آنـه الـ راح ألقبنك و أسميك
روحي معلگه بيك

- حَبيب أمك متقبل من أحاچيك
روحي معلگه بيك

- حَبيب أمك متقبل من أحاچيك
روحي معلگه بيك

بقى صافن بوجهي دقايق ، حچه ...

- عشگ تحبيني؟

- مو بَس أحبك ، آني أعشقك فرات ، أيام و ليالي أنت ببالي و گلبي ، شگد حاولت أنساك بَس ما فاد ، گلبي بقى متمسك بيك بكُل قوته

- يعني چنتي تحبيني من گبل؟

- إي

- عَجل ليش چنتي تصديني كُل ما أحاول أتقرب منچ؟ ، شلعتي گلبي يولي

- چنت مفكرة أنك بعدك تحب ميس الله يرحمها و ما ناسيها ، لذلك فضلت أبتعد عنك

- محد گدر ينسيني ميس غيرچ ، چنت ماخذ قرار مستحيل أدحگ بوجه بنيه غيرها ، حرمت الحُب عليه من بعدها ، نفسي عافت كُلشي بعد وفاتها ، بَس من جيتي أنتِ غيرتيني 180 درجة ، گلبي الچان مقفول كسرتي بابه و تربعتي بنصه

- الله يرحمها

- أريد اسألچ سؤال

- إي أسأل

- هَم حابه گبل لا تحبيني؟

- إي

عگد حواجبه و كأنو مو عاجبه جوابي ، حچه ...

- منو؟

- بابا

- هااا عبالي

- فرات آني بعمري ما حبيت رجال بعد أبوية غيرك ، أنت أول و آخر حُب بحياتي

- زين عندچ ولد عَم؟

- إي عندي 3 ، بَس كلهم عايشين بالخارج و لا أعرفهم و لا يعرفوني ، بَس سامعة عنهم

- مو خوش

- ليش؟

- خاف ينهون عليچ و ياخذونچ مني

- فرات تره أحنه مو بالسبعينات علمود ينهون عليه ، هاي سوالف قديمة

- أعرف ، بَس هاي عادات و تقاليد عشگ ، و العادات و التقاليد متموت للأبد ، يعني إذا واحد منهم قرر ينهى عليچ محد يلومه و ياخذچ ، شفتي شلون شهم نهى على مُهره و أخذها ، خصوصًا أنتِ ماعندچ أب يگف بوجوههم

نزلت راسي مقهورة من اللي گاله ، صَح آني ماعندي أب ماعندي سند بهالدنيا ، حچه ...

- أرفعي راسچ عشگي ، آني ما حچيت هيچ تا أقهرچ ، بالعكس أريد أفتح عيونچ على شغلات أنتِ غافلة عنها ، صَح أنتِ ماعندچ أب ، بَس آني موجود أعتبريني أبوچ أو حَبيبچ ، شتريديني أصيرلچ ، آني هنا سندچ أفتهمتي؟

أبتسمت على كلامة ، فعلاً كلامة و وجودة حَسسني أنُ آني مو وحيدة ...

- الله لا يحرمني منك

أبتسم ، بَس حسيته تعب لأن حچه هواي ...

- خَلص حَبيبي كافي تعبت يلا نام

- راح تروحين

- إي

- بعد وكت

- وين بعد وكت الساعة بالـ 1 و نص ، صارلنه ساعة نحچي ، يلا ماريد أتعبك أكثر ، تصبح على خير

- و أنتِ من أهله

طفيت الضوه و طلعت لغرفتي ، حسيت أكو حركة بالصالة بَس ما شفت أحد لأن الضوه طافي ، غلست و رحت لـ غرفتي ، تمددت بفراشي و آني أفكر بـ فرات لحد ما غفيت

فرات
صار الصبح و آني الليل مو نايمه من الألم اللي بصدري ، أحس روحي جاي تطلع شوي شوي ، شلت التيلفون تا أدز رسالة لـ عشگ

عشق
بدلت و كملت حتى رافد يوصلني للجامعة ، أجاني أشعار ، شلت التيلفون و فتحته لگيت رسالة من فرات ...

🗨️ عشگ تعاليلي ، صدري يوجعني

كتبتله ...

🗨️ فرات عوف ملاعيبك هاي ، والله مگدر أجيك البيت كُله گاعد

شافها و ما جاوب ، وره دقيقتين رجع كتب ...

🗨️ والله ما جاي أتشاقه ، تعاي

🗨️ چذاب أعرفك

شافها و ما جاوب ، بقيت أنتظره فوگ العشر دقايق و ما جاوب ، خاف من صدُگ بي شي ، هو مو من عوايدة يشوف الرسالة و ميجاوب ، نزلت جوه و فتت لغرفته ، لگيته حاط إيده على صدره و مغمض عيونه وجهه أصفر ...

- فرراات

فتح عيونه و باوعلي بتعب ...

- شبييك حَبيبي؟؟؟

- الجرح اللي بصدري يوجعني ، ما گدرت أنام الليل

- سوده عليه

- روحي لجامعتچ و ناديلي أحد من أهلي

- شلون أگدر أروح و أعوفك بهالحالة !!

- روحي عشگ ، روحي لجامعتچ

- راح أروح أناديلك أحد

هزلي براسه و طلعت ، رحت گلت لخالة ، و خالة گالت لـ صگر ، آني عفتهم و طلعت ويه رافد للجامعة بَس گلبي بقى هنا ويه فرات

صگر
رحنه لـ فرات آني و أمي ...

- فرات شبيك؟؟

- ما أدري شصارلي صگر ، صدري يوجعني

- يوم وين علاجة هذا اللي گال الدكتور تنطونه منه عند الضرورة

- هنا بالمجر ، خل أروح أجيب مي

راحت أمي تجيب مي ، جت و أنطيته علاجة ...

- دحگ آني هينه بالبيت ما راح أطلع ، إذا حسيت نفسك موزين راسلني ، تمام؟

- تمام

- يلا هَسه حاول تنام

هزلي براسه و طلعنه آني و أمي

عشق
آخذ محاظرات و بالي مشغول بفرات ، خاف يصيرله شي ...

أسراء : هاي شبيچ عشق؟

- شبيه

- دوم صافنه ، بيچ شي؟

- هااا ، لا مابيه شي

شوي و أجاني أشعار فتحته و طلع فرات مجاوبني ، يطمني عنه ، رغم گال أنه زين بَس گلبي ما تطمن أدري بي ميحچي خصوصًا آني مو بالبيت و ميريد يخوفني ، أوووف شوكت يخلص هالدوام و أرجع

***

مُهره
گعدت الصبح لگيت شهم ما موجود أكيد طالع للشغل ، توضيت و صليت و نزلت جوه ، طلعت للحديقة لگيته گاعد و ديشرب چاي ...

- هاي أنت هنا

- صباح الخير حَبيبتي

أبتسمت و رديتله ...

- صباح النور

- اليوم ما عدنه شي بالشركة لذلك عطلنه

- أحسن أريدك تبقى گدامي دائمًا

- و آني يمچ دائمًا يـَروحي

- شهم أريد أگلك شي

- إي گولي

- آني قررت أئجل هاي السنة بالجامعة

- ليش؟

- الضروف المريت بيها مو سهلة و أشغلتني عن الدراسة ، و هُمه صارلهم هواي من رجعو للدوام فـ مراح أگدر ألحگ وياهم

- بكيفچ حَبيبي ، سوي اللي يريحچ

- يعني أنت ماعندك مانع؟

- لا ليش أمانع ، هاي دراستچ و أنتِ تقررين بأي شي يخصها

- أحبك من تفهمني

- يعني متحبيني بَس من أفهمچ؟!

- لااا ، أحبك بكُل وقت ، حَبيبي أنت

شال الكُرسي ماله و أجه حطه بصفي و گعد ، بقى يباوعلي و بعدين تقرب مني حَتى يبوسني من شفايفي ، بَس سحبت نفسي من يمه و گمت ...

- أأأ ، أحم ، آني أروح أسوي ريوگ

- روحي هَسه ، بَس وين تشردين مني ، اليوم كله يمچ ، أصيدچ أصيدچ

گمت و آني أفكر شلون أگدر أنسى ذيچ الليلة السودة اللي بسببها مجاي أگدر أخلي شهم يتقرب مني ، والله أحبه و أريده بَس كُل ميتقرب مني أتذكر ذيچ الليلة و قساوته وياي

***

ريان
جتني رُسل گعدت يمي ، و أحس عدها حچي و متريد تحچي ...

- خير رُسل أكو شي؟

- راح أحچيلچ ، بَس كوني مُتفهمة ريان

- ليش شكو !!

ضلت ساكته و تبلع بريگها ...

- متحچين رُسل شكو؟؟

- دحگي ، فرات گال لـ عمي علي أنه رايد عشق ، و بَس يتعافى و يگوم على حيله يقطعولهم مهر

گمت على حيلي و آني الصدمة أحتلتني ...

- شجاي تحچين أنتِ رُسل؟؟؟

- گتلچ أنسي ريان ، فرات مو من نصيبچ ، أنتِ عاندتي

- أنساه شلووون رُسسللل آني روحي معلگه بي

- أنسي ريان ، أفضلچ تنسينه

- ماااا أنسااااه ، و مستتححييل أخليي هااي البغدادية تااخذه منيي

عفتها و رحت

- ريااان ويين رايحة يولليي ، تعاااي

ضلت تصيح وراي بَس ما رديتلها ، دخلت جوه و رحت لغرفة فرات ، فتحت الباب و فتت ، لگيت حالته متبشر بخير ، وجهه عرگان و مغمض عيونه و ميتحرك بَس صوت ونينه ينسمع ، تقربت من يمه ...

- فرراات ، تسمعنيي؟؟

أنتبهت لجرحة ينزف ، رجعت أحاول أگعده بَس ميرد عليه ، رحت ناديت عمي عَلي ، جه و جو وياه صگر و رافد ، بَس شافه هيچ صاح بالولد ...

- آني راح أروح أشغل السيارة و أنتو جيبو و ألحگوني ، بسااااع

راح عمي ، و الولد صحو فرات و حطو ع الكرسي المتحرك و أخذو للمستشفى ، رحت لغرفتي و گعدت أبچي ، مدري أبچي على وضعه مدري أبچي على حظي اللي خلاني أعشگ اللي مو ليه

***

مُهره
گاعدة ع الچرباية أمشط بشعري ، أنفتح الباب و دخل شهم ، بقى واگف و صافن بوجهي ، آخر شي قفل الباب و أجه يمي آني گلبي صار يدگ سريع ، أعرف اليوم ما راح يتركني أله ياخذ حقه مني ، گعد ورايه و آني گلبي يرگع ، أخذ المشط مني و صار يمشط بشعري ...

- أحب أمشط شعرچ بإيدي تدرين

بقيت ساكته ما جاوبته و هو مستمر يمشط بشعري ، ذب المشط و تقرب مني كلش ، شم شعري و حچه ...

- و يا ريحة شعرها من ريحة الجنة

دارني عليه و صرنه وجه بوجه ...

- مُهره آني أعرف أنتِ مناسية ذيچ الليلة و ما جاي تتقبلين أتقرب منچ بسبب اللي سويته ، بَس ثقي بيه و خليني أنسيچ ذيچ الليلة و أبدلها بليلة كُلها حُب و عشگ ، أنسي كُلشي و فكري بَس بيه إذا صدگ تحبيني

همستله بصوت ناصي ...

- كلش أحبك آني

أبتسم و باسني بوسة خفيفة كلش من شفايفي ، شوي و بده ينزل على رگبتي ، و آني مسلمته نفسي و ما قاومته ، بده يفتح دگم الفستان وحدة وحدة و بكُل هدوء ، و ...

( يلا عيني أحنه خل نطلع بره و نسد الباب🌚 )

خلونه نرجع لـ أنبارنا و نشوف شصار ما صار هناك

صگر
جبنه فرات للمستشفى و شافه الدكتور و گال جرحه رجع أنفتح و رجع خيطله ياه ، خلو تحت المراقبة للعصر و نطلع ، دخلنه عليه للغرفة ...

- هاااا فراتي الحمدلله ع السلامة

- الله يسلمك

- شلونك؟

- هَسه أحسن الحمدلله

- الحمدلله

رافد : يول فرات والله صاير نستله أنت

- آخخ يول ، بَس خليني أگوم على رجليه آني أعلمك منو النستله

- إي ديلا تنشوف

- أبوية وين يول؟

- جاي يحچي ويه الدكتور هَسه يجي ، شبيك تره ما راح يطير

- أستغفر الله ، اللهم طَولچ يا روح

صگر : ههههههه أنتو شوكت تعقلون يولو

فرات : دگول لأبن عمك الأثول

رافد : آني عاقل الحمدلله

شوي و دخل أبوية ، راح لـ فرات ...

- هااا بابا شلونك هَسه؟

- الحمدلله بابا ، بَس رجعوني للبيت كُلشي ماريد

- لا أبني منگدر نطلعك هَسه للعصر

- يبوووو يالكعبة ، غدي والله لعبت نفسي من المستشفيات

- زين و إذا گتلك عندي لك خبر حِلو

- شنوه؟

- الدكتور يگول شللك مؤقت و غيرلك العلاج ، يعني ويه العلاج الجديد أنوب چم شهر إن شاء الله ترجع تمشي بعون الله

- الله عليك يابة ، تحچي صدُگ لو تتشاقة؟

- بابا هذا الموضوع مابي شقه

رافد : عود مو تنسى تهديدك مال قبل شوية

- أنت بَس ولي من وجهي كُلشي ماريد

- يمعود رايح أجيب عشق هائها

- خاف عشق ليهساعها بالجامعة؟

- إي والله ألتهينه بيك و نسيت أروح أجيبها

- ياخي أقسم بالله أنت مو كفوو أحد ينتكل عليك ، مخلي البنيه ليهساع بالجامعة أمشي ولي جيبها

- غير يستقر العاشگ الولهان ، رايحين نجيب حبيبة الگلب لا تخاف كُلشي ماعليها

ضحكنه على حچي رافد ، طلع و فرات يتحلف بي

***

مُهره
چنت نايمة و حسيت بنقاط مي على وجهي ، فتحت عيوني و باوعت شهم توه طالع من الحمام و شعره يقطر مي و جاي يبوسني ، أبتسمت و حچيت ...

- صباح الخير حَبيبي

- يا صباح هذا حَبيبي ، تره الساعة بعدها بالـ 9 بالليل

گعدت على حيلي ...

- لا والله؟

- أي والله

- ليش أحنه من شوكت نايمين !

- من الظهر

- عزااااا

- ههههههههه

- يبووو شلون نمنه هالگد

- عادي حُبي ، يلا گومي سويلنه عشه تره ميت من الجوع

تقربت منه و بسته من خده و گلت ...

- يدلل حَبيبي

- تگومين ، لو شكلچ حابه نسوي نفس الظهر؟

- لا لا خلص گايمة

- ههههههه ، عود طلعيلي ملابس وياچ

گمت طلعتله ملابس و حطيتهن ع الچرباية و رجعت طلعتلي ملابس حَتى أروح أسبح ، حچه و هو يباوعلي ...

- تريدين أدخل وياچ للحمام خاف تخافين؟

- شگد متستحي

- أوووي عيني و منين أريد أستحي قابل منچ

ضحكت و دخلت للحمام

شوي و طلعت ما لگيته موجود ، نشفت شعري بالشسوار و مشطت ، گمت حَتى أطلع و چان يدخل شهم ...

- عشه بَعد روحي

- صار حَبيبي

نزلت جوه ، سويت عشه خفيف ، ما سويت صوت لأن عمي و عمتي نايمين ، كملت و أخذت الصينية و صعدت فوگ ، گعدنه نتعشه آني وياه ، بعدين كملنه و نزلت غسلت المواعين و عزلت المطبخ و أخذت حبشكلات نساتل و چبوسه و ببسي و رجعت للغرفة ، گعدت ع الچرباية و شهم راح فتح البلازمة حتى يحط فلم ...

- شتريدين نتابع حياتي ، رومانسي؟

- لا شنو رومانسي ، حطلنه رعب حَبيبي

- هااا رعب !!

- إييي

- يعني متخافين

- هئ ما أخاف

- چا خوش

حط فلم رعب و أجه گعد يمي و صرنه نتابع و ناكل و هو مستغرب مني شلون هاي شخصيتي و أحب أفلام الرعب ، كُل ميخلص فلم نحط ثاني و ضحك و سوالف كلش تونسنه ، لحد ما صارت الساعة بالـ 3 و طفه شهم البلازمة و گال ...

- يلا حَبيبي ع النوم

- شههمم ، والله ما جايني نوم ، خلي نتعلل أنوب

- مگدر عُمري باچر ورايه طلعه من الصبح

- وين؟

- للأنبار ، أريد أروح أشوف فرات

- بَس آني مگدر أبقى بدونك

- ميخالف حَبيبي تحملي ، لازم أروح أشوفه و أتطمن عليه ، هاي صارله شهر من طلع من المستشفى و آني گاضيها وياه ع التيلفون بَس ، فرات محتاجني

- زين أخذني وياك

- لا

- حبااب شهم ، آني هَم مشتاقة لـ عشق و أريد أشوفها ، فدووة وافق حَبيبي أنت

سكت شوي مبين ديفكر ، رجع حچه ...

- ماشي راح آخذچ أمري لألله

ضحكت و رحت حضنته و بسته من رگبته ...

- ههههههههه ، والله مرات أحسچ طفلة عمرها 10 سنوات

- آني طفلة ، رحم الله والديك حَبيبي

- دشو عاينيلي

- وخر زعلت آني

عفته و رحت تمددت بفراشي و درت وجهي عنه ، شوي و أجه تمدد يمي كلش و حضني من خصري ، همسلي ...

- أروح فدوة للزعلان آني

أبتسمت و درت وجهي عليه ، حطيت راسي على صدرة و نمت

حسيت الصبح على صوته و هو يگعدني حتى نطلع ، گمت توضيت و صليت ، ما تريگنه لأن ثنينه ما مشتهين ، لبست ملابسي و كملت و طلعنه للأنبار

***

عشق
گعدت الصبح ، صليت و كملت و نزلت جوه ، بعد محد گاعد ، رحت لـ فرات فتت و لگيته گاعد ...

- صباح الخير

- صباح العشگ و عيونها الحلوة
صباحي عيونچ الزرگ ول يَـ عشگي

أبتسمت ، حچيت ...

- شلونك؟ ، البارحة ما گدرت أجيك لأن نايم

- بشوفتچ آني زين

- ليش گاعد من هَسه؟

- دگ عليه شهم و جاوبته و وراها ما گدرت أنام

- شيريد

- جايين بالطريق هو و مُهره

- صدُگ؟

- إي والله ، و أنتِ ليش گاعدة من هَسه؟

- گعدت حَتى أشوفك

***

مُهره : شهم أوگف

- هااا شكو؟!

- دخت و لعبت نفسي ...

********

يتبع ...

مو هَلو و مو شلونكم آني زعلانة منكم😒💔
لأن البارت السابق تفاعله چان زفت حرفيًا ، كسر واهسي بالكتابة و أنقهرت والله ، بالگوه كتبت هذا البارت ، لذلك صار أقصر من كُل مره ، المهم فضلاً و ليس أمرًا تفاعلو على هذا البارت و أنشرو يمكم حَتى يصعد و ميضيع تعبي و ينكسر واهسي نفس اليوم
يلا هَسه أخليكم ويه البارت و قراءة ممتعة

18.kij
تعالو أنستا

سحر الدليمي