رواية عشگ الفرات ( عِندما تَهوى القُلوب ) الفصل الخامس 5 - بقلم سحر الدليمي

شهم
رجعت للبيت و دخلت جوه تفاجأت لگيت عمامي و ولدهم كلهم مجتمعين سلمت و گعدت وياهم

سلام : همزين جيت شهم وليدي أكو موضوع مهم نريد نحچي بيه

- خير بوية شكو ؟

سلام : أسمعو يولد مرة ثانية من تطلعون ياريت تاخذون حذركم زين و الأفضل تشيلون سلاحكم وياكم

سجاد : ليش عمي أكو شي

عباس : نفس السالفة مو عمي

سلام : أي أبني نفسها

حسين : لذلك جمعناكم حتى ننبهكم على هالموضوع

بكر : و من تطلعون لفد مكان ياريت قبل متطلعون تبلغونه انكم رايحين لهالمكان الفلاني و تيلفوناتكم أبد متسدوها تخلونها دائماً مفتوحة مفهوم

شهم : يعني شنو ذوله ميجوزون من سوالفهم الطايح حظها
يابة من هسه أحنه من هذا الشغل ما ننسحب لو مهما يصير

سلام : أي أبني ما ننسحب بس انتو أخذو حذركم زين

بكر : و هااا ديربالكم أمهاتكم و خواتكم يدرن بهالشي منريد نعيشهن برعب و قلق و أنتو تعرفوهن شلون

شهم
من سمعت كلام أبوية و عمامي تخربطت أفكاري كلها ما خايف على نفسي بس خايف على أهلي هذولة الأنذال كلشي يسون بس في سبيل يخلونه ننسحب من الشغل

فاطمة : شهم شههممم شههممم أبني وين صافن

- هااا لا هنا يوم وياچ

- لا مو وياي شكو شبيك وليدي

- لا يوم ماكو شي بس أفكر بالشغل

- زين ماما لا تتعب نفسك و روح ارتاح

- تمام

عشق
رحت گعدت بالغرفة اللي نطوني ياها بعد التعليله و بعد ما الكل راح ينام
أشتهيت الگهوة و گلت أنزل اسويلي كوب
أخذت كيس گهوة لأن چانت بجنطتي ما أعرف من شوكت بس المهم لگيتها أخذته و نزلت جوه دخلت للمطبخ و بديت أسوي گهوة
چان الكُل نايمين و البيت مابيه و لا صوت

فرات
گلت ادگ على شهم أشوفه شعنده ماعنده دگيت عليه مرتين و ما جاوب ما أدري وين يختفي هذا شوي و دگ عليه

- وينكك أنت هااا وينك مرتين دگيت عليك و ما جاوبت

- ولك على كيفك نزلت عليه دگ رزايل چنت اسبح و الفون بالغرفة ع الصامت

- هاا يلا نعيماً

- شكراً

- شكو ماكو

- والله يا خويه آني دايخ

- ليش شبيك !

شهم
حچيت لـ فرات سالفة ذولة بالتفصيل بلكت يگدر يساعدني لأن آني عقلي صار ما يجمع

فرات : و ما عرفتو شيريدون منكم

- لك هي مبينه يريدونه ننسحب من العقد ويه هاي الشركة الجديدة حتى همه ياخذونه بدالنه لأن هالعقد بيه كومه أرباح
بس المشكلة همه لحد هسه ما خطو أي خطوة تبينلنه انو أحنه بخطر بس خوالك الله يسلمهم لحالهم هيچ يحچون

- لا شلون لحالهم شهم خوالي لو ما يدرون و حاسين انو ذوله خطرين چان ما حذروكم و نبهوكم

- مادري والله مادري

- زين دحگ شهم أنت او الولد حسيتو بشي غريب يعني أحد يراقبكم او هيچ شي ؟

- لا ماكو هيچ شي
لا لحظة لحظة تذكرت

- هاا شتذكرت ؟

- اليوم أخذت مُهرة للسوگ و چنه نريد ندخل للمحل شفت ولد ثنين يباوعون علينه ما استنضفتهم صراحة جانت نظراتهم غريبة

- اي هاهيه عجل شفت شلون حچي خوالي صحيح انوب چانت وياك مُهرة افرض سولكم شي لا سامح الله
شهم لازم تاخذون حذركم أفتهمت

- اي خلص منا و رايح أدير بالي

- خوش يلا آني رايح

- وين رايح

- اروح آكل

- تاكل لحم مو ولك

- لحم تالي الليل يول مهبول أنت

- ههههه اي مو گلت انتو 24 ساعة تذبحون و تصلخون

- يعني علساس أنتو لما تذبحون و تصلخون

- أي نذبح چا شلون

فرات : چا يلا طير

سديت التيلفون من شهم و گمت تا انزل أشوف شي آكله

عشق
كملت الگهوة و صبيتها بكوب و جيت حتى اطلع
ما حسيت الا أحد فتح الباب و دخل آني فزيت و وگعت الكوب و تكسر
باوعت للباب شفت فرات واگف گدامي

- أنت و تالي وياك راح تضل تفززني شنو أنت

- و أنتي راح تضلين تطلعين بوجهي وين ما أولي

- أنت اللي تطلع بوجهي مو آني

تقدم عليه و حچه بهمس ..

- حسچ الوادم نايمة يولي

- مااا ما أنصي حسي عندك مانع

بحركة سريعة دفعني للحايط و رچه أيده للحايط من جهتي اليسره
تقرب عليه كللش و صار يحچي بهمس و هو خازرني و منبت عيونه بعيوني ..

- صوتچ ما ترفعينه بوجهي مره ثانية أفتهمتي

چان يحچي بصوت خافت و بهدوء عجيب و الشرار يتطاير من عيونه طوله و ضخامته عليه طالعه گدامه چني وصوص الدجاج المهلس لا و چماله لابس أسود آني حسيت الدم تجمد بعروقي من الخوف ما أعرف ليش هالگد خفت منه بس ما بينتله خوفي و حاولت أجمع قوتي
دفعته عني و گلت بصوت ناصي ..

- وخر من گدامي وخررر

أبتعد عني و راح فتح الثلاجة و طلع من عدها باكيت بسكت و عصير
باوعلي بنظرة ما عرفت أفسرها و تركني و راح
أوووف عزااا شبيه هذا والله مو صاحي
بسرعة لميت الگزاز و مسحت الگاع و صعدت لغرفتي ركض حتى الگهوة بعد ما أريدها

فرات
مو بنيه مصيبة والله منو هي حتى ترفع صوتها بوجهي والله لوما عمتي أخاف تزعل عليه چان عرفت أربيها
أمشي بالغرفة و أحاچي نفسي مثل المخبل
حسيت على نفسي و رجعت گعدت ع القنفة

***

مُهرة
چنه گاعدين دنتريگ و ما أحلانه الى أن حچه سجاد و گال

- مُهرة بعد ماكو روحه لصديقاتچ

- شلووون ، شلون يعني ماكو روحه ليش سجاد ؟!

باوع لأبوية و رجع باوعلي و حچه ..

- قصدي قللي روحاتچ الهن و روحه وحدچ ماكو لو تكليلي آني أوصلچ لو لواحد من الولد خوش

- بااابااا

حسين : أي بابا اخوچ حچه الصحيح

سكتت و صفنت افكر گلت حقهم يخافون عليه أي بس من شنو يخافون
عفت السالفة و كملت ريوگي
كملته و غسلت المواعين و بديت أنظف بالبيت و ماما بدت تحضر للغدة
اجتي عليه تباوعلي من فوگ ليجوه أستغربت منها

- خير ماما أكو شي

سليمة : شنو هذا السوار البيدچ أول مره أشوفه ؟

- هااا أأأ هذا ماما أشتريته البارحة من رحت للسوگ

- أمممم خوش يلا كملي شغلچ

عافتني و راحت
شعبالكم قابل خوما أگلها هذا هدية من شهم غير تفتحلي تحقيق أله أول ماله تالي
كملت شغلي و رحت گعدت ع التلفزيون دگ الفون و طلعت صديقتي رشا سألتني أذا أجي اليوم أو لا گلتلها ما أجي اوووف

***

رُسُل
چنت گاعده بالغرفة جاي أبدل لـ لولو دخل صگر مستعجل فتح الكنتور و طلع ملابسة حتى يبدل

- حبيبي شنو طالع

- أي عمري

- وين رايح

- ويه فرات للمعرض لأن الشغل هواي أريد أساعده

- اي صگر خطية فرات هالأيام ما جاي يگعد
بس عود من تجي جيب وياك حليب لـ لارين لأن خلصت

- صار تدللين محتاجة شي ثاني

- لا حبيبي سلامتك

- يلا مع السلامة
لولو بيباي بابا

- شو لولو يلا سوي لـ بابا باي حيروح شوفي

صگر
طلعت من البيت مستعجل گلت لـ هذا فرات أنتظرني نطلع سوه بس مابيه صبر ميگدر ينتظر دقيقة وحدة آخخخ منه
صعدت سيارتي و بوجهي للمعرض چنت أمشي سريع حتى ألحگ أصل لأن اليوم راح نناقش أول عقد و لازم أكون موجود
جاي أمشي و فجأة طلعت سيارة گدامي ما أعرف منين لفت الستيرن حاولت ابتعد عنها بس ما گدرت أسيطر لأن چنت أمشي سريع فلتت السيارة من أيدي و ضربت الحايط
حسيت أنضرب راسي بفد شي دخت و ما اعرف شصارلي و الدم صار ينزل من راسي ما حسيت على شي و فقدت الوعي

فرات
جو الجماعة اللي راح نناقش العقد وياهم و آني بالي يم صگر گالي ما أتأخر بس لحد هسه ماكو دگيت عليه و ميجاوب

صگر
حسيت على نفسي و فتحت عيوني دحگت الدم بعده ينزل من راسي و آني ما أگدر أتحرك أحس بدوخة مو طبيعية ما أعرف شلون طلعت التيلفون بالگوة دگيت على فرات و أنتظرته يجاوب ..

فرات
دگ الفون طلعته و شفت اللي يتصل صگر بسرعة فتحت خط و جاوبته

- وينك صگر الجماعة صارلهم أكثر من ربع ساعة من وصلو
ألووو وينك يمعود صگررر

جاني صوته التعبان و هو يجاوبني

- فـ ففراات

- صصگرر شبيك يوول شبيييك

- ألحگني فرات ألحگني سـ سسوويت حادث

من سمعته گال هيچ فزيت على حيلي ..

- شنووو شللوون ووويينك صگرر تسمعني ويااي أنت ؟

- أسمعك ع الطريق آني فرات

- زين زين جايك اصبرلي

- فرات خير شكو

- أعذرني محمد أخوية صگر سوه حادث و لازم أروحله

- اي زين روح بالسلامة

- الله يسلمك الله يسلمك

طلعت من المعرض صعدت السيارة و سقت بأقصى سرعة بس المهم عندي ألحگ على صگر
شفت سيارته وگفت بنص الشارع بسرعة نزلت و رحتله حاولت أفتح الباب بس ميقبل ينفتح بالگوه فتحته

فرات : صگر صگررر تسمعنيي شو دحگ علييه صصگررر

- هاا جيت

- أي اي صگر جيت

- لا تخاف مابيه شي بس ساعدني تا أنزل

- أي يلا تعال أگف على كيفك شوي شوي
يا الله راسك ينزف دم چثير

ركبته بالسيارة و اتجهت للمستشفى

- ها صگر انت وياي ؟

- وياك وياك بس داايخ حييل مو گادر افتح عيوني

- ميخالف تحمل هسه نصل المستشفى

ضليت أحچي وياه حتى ميغيب عن الوعي شوي و وصلنه للمستشفى دخلو لجوه و آني دخلت وياه لأن ما چان يحتاج عمليات الحمدلله صح الجرح اللي براسه غميگ بس مو خطر حيل
عالجله ياه الدكتور و خيطه و گال بس يرتاح شوية و نطلع

- هااا أبو لارين شلونك هسه طمني ؟

صگر : بخير حبيبي مابيه شي

- يلا الحمدلله على سلامتك غده شرك

- لو ما لحگتني أنت جان هسه صفى دمي و متت

- الحمدلله لحگتك
دحگ أنت ارتاح هسه و آني راح أروح اخابر أبوية أگله

طلعت من الغرفة للممر و اتصلت بأبوية

رافد
چنه گاعدين آني و عمي و ابوية كالعادة گضوها بس يرزلون بيه لأن ما جاي ألتزم و أروح للشغل
قاطعهم تيلفون عمي من دگ ..

علي : هلا فرات

فرات : هلا بيك يابة

علي : شوكت تجون أبني

فرات : يابة أحنه هسه بالمستشفى

علي : شنو شعدكم بالمستشفى

رافد
بهالأثناء نزلن من فوگ عمتي نجاة و عمتي بدور و رُسُل و عشق

فرات : يابة صگر سوه حادث

رافد
هنا عمي وگف على حيله و علامات الخوف ظهرت على وجهه

علي : شلون يول شلون سوه حادث و شلونه هسه خوما بيه شي

فرات : لا لا يابة مابيه شي الحمدلله بس رضوض بسيطة بجسمة و جرح براسه و أحنه هسه راح نطلع من المستشفى جايينكم

علي : أي زين لا تتأخرون

رافد
سد التيلفون عمي و الأنظار كلها متوجهه اله و الكُل ينتظر تفسير للكلام اللي سمعنا قبل شوي بس عمي رجع گعد مصدوم و خايف و ما حچة و لا كلمة

نجاة : خير علي شكو شصاير من سوه حادث ؟

عمي ساكت ما جاوبها رجعت حچت وياه ..

نجاة : علي مو جاي أحاچيك ليش مترد شبيك

علي : صگر سوه حادث

نجاة : يمممه وليدي شلوون سوه حادث وينه هسه علي وين أبني خوما صارله شي أحچيي

رسل : عمي عفييه احچي صگر خوما بيه شي

علي : لا تخافن و لا تبچن فرات يگول مابي شي ما تأذه حيل و هسه همه راجعين من المستشفى

فرات
وصلنه للبيت و نزلنه دخلنه لگينه الكُل گاعدين ينتظرونه
أمي تقدمت على صگر و عيونها مليانه دموع

نجاة : حبيبي وليدي هاي شصاير بيك يمه

صگر : يمه لا تبچين والله مابيه شي الله فكني الحمدلله

نجاة : الحمدلله على سلامتك ماما

- الله يسلمچ حبيبتي

علي : صگر وليدي

- يابة

صگر
تقدم عليه أبوية و حضني و هو خايف

علي : الحمدلله على سلامتك أبني شلونك هسه

- الحمدلله أبوية بخير

بعد ما سلمت ع الكُل طلعني فرات للغرفة حتى ارتاح لأن من صدُگ أحس على شوي راح أگع من طولي
دخلنه للغرفة

فرات : رسل ديربالچ عليه ضلي يمه و أذا صار شي بساع تناديني تمام

- تمام

طلع فرات و راحت رسل سدت الباب و جت عليه حضنتني و هي تشاهگ

رسل : خفتتت عليك صگر والله متت من الخوف

- لا تخافين حياتي لا تبچين رسل شو دحگي عليه

رفعت راسها و مسحت دموعها اللي بللن خدودها الحلوات

- لا تخافين گلبي والله مابيه شي ماريد أشوفچ تبچين ديربالچ تبچين حبيبي

- مگدر خفت عليك صگر

- خلص آني مابيه شي الحمدلله

- جاي تتوجع ؟

- لا بس دايخ

- يلا عجل تعال تا تنام شوي و ترتاح

رحت تمددت ع الچربايه و ضلت رسل يمي غفيت و ما حسيت على شي

فرات
رحت گعدت بالحديقة و دگ تيلفوني شفته و طلع شهم

- هلا شهم

- وينك ولك من الصبح أدگ عليك ماكو

- چنت بالمستشفى ويه صگر يول و ما گدرت ارد

- ليش يا ستار شعدكم بالمستشفى

- صگر سوه حادث

- شنوو ولكك و شلونه هسه خوما تأذه

- لا الحمدلله ما تأذه و زين هسه

- طلعتو من المستشفى

- أي طلعنه هسه أحنه بالبيت

- هااا خوش

شهم
نهيت المكالمة ويه فرات و أبوية چان كاعد يمي

سلام : شكو شهم شبيهم ولد عمتك

- بوية هذا صگر مسوي حادث

- شنوو و شلونه هسه؟

- لا يگول فرات مابيه شي ما تأذه كلش

- الحمدلله يلا شوي و أخابر على عمتك أشوفها هسه أدري بيها تلوب

- أي بوية خطية أحچي وياها

عشق
من بعد ما صگر سوه الحادث أتفقنه آني و ماما نبلغ خوالي انو نروح لبيتنه صح مو وكتها بس هاي صارلنه يومين لازم نگعد و نستقر
راحت أمي لخالي جسام اللي چان گاعد بالديوانية و آني رحت أشوف رسل خطية خاف محتاجة شي

بدور
رحت لأخوية جسام حتى أحاچي بموضوع البيت
دخلت عليه سلمت و گعدت يمه

جسام : خير خيتي ام عشق محتاجة شي ؟

- لا تسلم أبو رافد بس جيت أگلك أحنه نريد نروح لبيتنه تا تگول لواحد من الولد ياخذنه

- يا بيت ؟

- بيتنه اللي هنا شبيك جسام

- لا خيتي أنتي و بنيتچ تضلون گاعدين هينه ببيتنه حالكم من حالنه

- لا أبو رافد أحنه عدنه بيت و نروح نگعد بيه ما نريد نثگل عليكم

- تثگلون علينه شنو أم عشق ترا شو البيت چبير الحمدلله و بعدين آني مگدر أخليچن تسكنن وحدچن بالبيت هو آني ردت جيتچن من بغداد على مود ما تضلن وحدچن

- يعني ما عنها يخوي

- لا بالله ما عنها

- هاذهو اللي تشوفه يا أبو رافد
بس علمود كلية عشق تعرف صارلها أيام ما داومت و ميصير هيچ

- اي نسيت أگلچ كملنه تسجيلها و من باچر تگدر تداوم
و بالنسبة للتوصيله فرات ياخذها بدربه من يروح للشغل

- مشكور يا أبو رافد تعبناك

- لا يا أم عشق تعبچ راحه يخيتي

********

يتبع ...

عود گلت أنزللكم بارتين سوه بس تفاعلكم ع البارت السابق خرب واهسي و بطلت😒
المهم لا تنسون التصويت و التعليق بين الفقرات و متابعة للحساب و أكتبولي رأيكم بالقصة بما أنو وصلت بارت 4

18.kij
تعالو أنستا

سحر الدليمي