رواية عشگ الفرات ( عِندما تَهوى القُلوب ) الفصل السادس 6 - بقلم سحر الدليمي

نجاة : فررااات ماما فرات وينك

ما چان بالغرفة فارغة مابيها احد
شوي و طلع من الحمام ينشف بشعره چان يسبح

- لك أبني چم مره أگلك لا تطلع من الحمام هيچ هسه تاخذ برد هاك ألبس يلا

- يوم شنو السالفة تره الدنيا صيف منين يجيني البرد

- ميخالف ماما بس لازم تهتم بهالتفاصيل أكثر
أگعد اريد أحچي وياك بموضوع

- بس أمشط شعري

- لا بعدين تمشط أگعد

- هاي گعدت خير يمه شبيچ

- ماما عمك جسام سجل عشق بالكلية يعني راح تداوم هنا منا و رايح و گال أنو أنت توصلها و تجيبها

- شنوو آنييي ؟ لا يوم رحمه لوالديچ آني مالي علاقة بهاي البنيه

- ميصير أبني شنو تكسر كلمة عمك

- يوم ما أكسرها بس ما لگيتو غيري لخاطر الله

- أي ليش ماما تره هاي بنت عمتك مو غريبة

- يوم ماريد أتعاطى وياها و بعدين آني هاليومين أريد أروح للبصرة

- شعندك بالبصرة ؟

- ماما يعني شعندي بالبصرة غير رايح لـ خوالي صارلي زمان ما رايحلهم

- قادر ياربي رايح لـ خوالك و أنت گطعت عنهم صارلك فترة

- هاذ هو قررت أروح

- أي ميخالف ماما أجل روحتك علمود بنت عمتك خطية هي مالها غيركم

- أمري لألله ليش آني أگدر أرفض

عشق
گاعده بالغرفة أنتظر ماما راحت تحچي ويه خالو علمود كُليتي
شوي و دخلت للغرفة

- هاا ماما شگال

- طلع مسجلچ ماما بس خطية ناسي يگول و حتى توصيلتچ للكُلية مدبرها

- اي و شلون راح أروح للكُلية

- گال راح تروحين ويه فرات هو يوصلچ و يجيبچ بدربه

- نعممم ؟ ويه منو ؟ ويه فراات لا ماما آني ما أروح ويه هذا الخبل

- عييب ماما لا تحچين على أبن خالچ هيچ ميصير

- ماا ماما أكرهه أكرههه

- هسه غير أعرف ليش

- ماما أسلوبه بالتعامل مو حلوو ماعنده أسلوب

- يممه شو شحلاته أبن أخوي يجنن أسلوبه بس هاي أنتي خبله

- أهوووو ماما

- ميخالف ماما خلص أنحسم الموضوع راح تروحين و تجين وياه تروحين ويه فرات أحس ما تروحين ويه الغريب

- أوووف أووووف

- أنچبي

فرات
ثاني يوم گعدت ع المنبه بدلت و نزلت جوه
تريگت و كملت و شيخة عشگ بعدها حتى ما نزلت آني شألله ورطني هالورطه راح أضل أنتظر هساع

- يوم وينها هاي

- منو ماما

- عشگ

- هسه شوي و تنزل

- رايح أنتظرها بالسيارة بس گوليلها خل تستعجل تره ما فاضي الأشغال آني

- روح ماما الله وياك

عشق
اليوم أول يوم بكُليتي الجديدة ما أعرف اذا راح أحبها أو لا أصلاً هو مداومة بيها إذا حبيتها أو لا
بدلت و نزلت جوه حتى أتريگ لگيت ماما و خالة نجاة ديتريگن

- صباح الخير

نجاة ، بدور : صباح النور حبيبتي

بدور : قادر يا ربي اليوم گاعدة بدون ما أگعدچ

عشق : أي ماما من الحماس للكُلية الجديدة گعدت من الصبح

- أي يلا أگعدي تريگي بساع أبن خالچ ينتظرچ بره

- اي عادي خل ينتظر شويه

بدور : عششقق

- أي اي تمام

نجاة : هههههه عوفيها بدور خليها على راحتها

بدور : لا نجاة خطية الوليد وراه شغل شنو يضل ينتظر للظهر

عشق
كملت ريوگ و ودعت ماما و خالة نجاة و طلعت برا
طلعت من الباب لگيت فرات واگف و راچي ظهره ع السيارة
چان لابس دشداشة سوده و لاف على راسه چراويه صحراوية و لابس نظارة سوده و ريحة عطره تسطر سطر

فرات : همزين شرفتي

عافني و راح صعد بالسيارة
و آني رحت صعدت ليورا

فرات : تعاي گدام

- ماريد هنا مرتاحة

ألتفت عليه و نزع النظارة و حچه ..

- أنتي خاف عبالچ آني سايق الخلفوچ گتلچ تعاي گدام

- و آني گتلك ماريد أروح گدام لا تلح

- خوش عجل آني ما أتحرك أذا ما تجين گدام و هاي السيارة و طفيناها هائها و روحه للكلية ماكو

فولت عصبية من تصرفه و أستفزازه اليه بس ما حچيت لأن أحتمال ينزلني و يروح ماعنده مانع هذا
نزلت و رحت صعدت ليگدام و طبگت الباب حيييل

فرات : وججعع على كيفچ ويه الباب تره مو عدوچ

سكتت و ما رديتله مابيه حيل أگوم ألاسنه
تحرك و ضلينه ساكتين مده لحد ما حچه هو ..

- اسمچ عشگ مو ؟

- عشق مو عشگ

فرات : نفس الشي

عشق : لا مو نفس الشي أسمي عشق

- لا تشو عشگ

- گتتللككك أسسمييي عششققق

- هسه ماعلينه ، شنو قسمچ ؟

- مالك علاقة

- خوش

سكتنه ثنينه و كمل الطريق وصلنه و نزلت و نزل هو وياي

- ميحتاج تنزل وياي تره مو جاهل آني

فرات : والله ما نزلت لسواد عيونچ نزلت لأن عمي موصيني أنزل وياچ

سكتت عنه
دخلنه للكُلية و راح حچه ويه العميد ما أعرف شنو و أجه دلاني على قسمي و أنطاني رقمه گالي من تكملين دگي عليه علمود أجي آخذچ و راح
رحت للقاعة أول ما دخلت تلگتني بنيه مبتسمه و كلش حلوه حچت وياي و گالتلي ..

أسراء : هلوو حبيبتي أنتي جديدة مو ؟

- هلوات عمري أي جديدة

أسراء : شنو أسمچ

- عشق و أنتي

- آني أسراء

تعارفنه و دخلنه للقاعة شوي و أجت الدكتورة و بلشت المحاظرة
بقيت ويه أسراء الدوام كله كللش حبيتها أسلوبها حلو تسولف و تضحك و تحشش ذكرتني بـ نور
خلصنه محاظرات و رحنه گعدنه بالكافتريا دگيت على فرات و گال شوي و أجيچ بقيت أنتظر ويه أسراء

- أگلچ أسراء انتي منا لو منين ؟

- لا حبيبتي آني من ديالى و داخله أقسام هنا

- هاااا

أسراء : و أنتي منا مو ؟

- لا آني من بغداد بس بالجديد أنتقلنه هنا آني و أمي يم خوالي

- يعني أمچ من ألأنبار ؟

- أي

- شگد حلوو

- شنو الحلو

- من أمچ من محافظة و أبوچ من محافظة هيچ يعني يصير أمتزاج ثقافات و لهجات حلوو

- هههههه أي والله صحيح

دزلي مسج فرات أنو هو وصل و گمت ..

- حبيبتي أسراء آني راح أروح أبن خالي أجه

طلعت و هي هم طلعت وياي وگفتني أسراء و هي تباوع لفرات

- ولچ هذا الصاك أبن خالچ ؟

عشق : أي

أسراء : لعد شبيهم ولد خوالي وجوهم تطرد النعمة

- ههههههه خرا بيومچ

- هههههه يلا حبيبتي أشوفچ باچر و تتهنين بهالصاك

حچيت بگلبي و آني متوجهه للسيارة

- لو تدرين هالصاك شگد غثيث

رسل
صارت الدنيا الظهر و صگر بعده ليهسه نايم خفت يكون بيه شي صراحة ما تحملت و رحت تا أگعده

- صگر حبيبي صگر

- هممم

- گوم أگعد حبيبي يلا

- ماريد تعبان أريد أنام

- ميصير يا عمري صارلك هواي نايم گوم أكعد تا تتغده و تاخذ من دواك يلا حبيبي

- صار تدللين گعدت

- عفيه حبيبي يلا آني رايحة أصبلك غده و اجيبلك ياه

- لا ميحتاج أنزل أتغده وياكم

- مو أخاف متگدر

- لا گلبي أگدر مابيه شي

- يلا لعد خل ننزل

مُهره
خلصت محاظراتي و بقيت أنتظر سجاد بالكافتريا مليت و طلعت حتى أشوفه
رحت باوعت من بين السيارت ماكو مو جاي أفتريت حتى ارجع بين ما دا أمشي حسيت بشخص حضني من ورا و حط قماشه ما أعرف شنو على خشمي دخت و ما حسيت على شي و وگعت بالگاع حسيت أنو أحد ديشيلني و بعدين غبت عن الوعي

سجاد
وصلت جامعة مُهره صح تأخرت عليها بس شسوي أنجبرت گلت هسه دتنتظرني يم الباب بس ماكو دگيت عليها متجاوب
بقيت انتظرها يجي فوگ الربع ساعة و حرگت التيلفون حرگ و متجاوب دخلت للجامعة سألت عليها گالو طلعت هنا تخبلت ماضل عقل براسي رحت ركض للسيارة صعدت و بوجهي للبيت وصلت و دخلت عليهم و آني افتح الباب بقوة و التوتر مسيطر عليه

حسين : سجاد شبيك ابني على كيفك

جاوبته و آني ألهث من التعب و الخوف

- بوية دخيلك ألحگ

گام ابوية بطوله و تقدم عليه

- شبيك بوية شصاير ؟!

- بوية مُهره مختفية ماكو بالجامعة كلها سألت عليها كالو طلعت من زمان

ابوية صار يصفك أيد بأيد بقوة و يردد جملة ..

- راحت البنيه رااااحتتت البنيه ولكمم

امي حجت وياه و هي خايفة ..

- خير حسين مُهره وين بنتي وووييين ؟؟؟

- بنتچ انخطفت يا أم سجاد أنخطفففتت

- يمممهه عزااا العززاانييي صخااام بوجهچ سليييممه

حسين : دگ دگ على ولد عمامك خل نشوفلنه حل لهالمصيبة

شهم
گاعدين كُلنه دنتغده و دگ فوني طلع سجاد جاوبته

- هلا سجاد شلونك

سجاد : شلوني شهم شلوني مصيبة و طاحت على روسنه ولك

- اسم الله شبيك ولك شني من مصيبة ؟!

- الخايفين من عنده صار مُهره مختفية ماكو و احتمال چبير ذوله الگو*** خاطفينها

سمعت هيچ و آني طفرت من مكاني و صرت أصيح

- ششلووون ولكك شلوون تنخطف البنيييههه سجاااد تدرريي شنو يععني تنخطف بنييههه تدررييي

- ولك ادري والله أدري
بلغ الولد و تعالو خل نشوف شنسوي

نهيت المكالمة ويه سجاد و آني أحس ماضل عقل براسي يربي مُهره رااحتت اخاف يسولها شي أخاف يذبحوها

سلام : شكو شهم شبيك شصاير

- يابة ذوله الگو*** خطفوو مُهره خطفوها

فرات
رجعنه آني و عشگ للبيت
اول ما دخلنه للصاله دگ عليه شهم و جاوبته ..

- ألووو

شهم : ألحگني فرراات ألحگني مصيبه ولك

چان يحچي و صوته مبين بيه رجفه و خوفه و مرتبك

- شبيك يول مصيبة شنو أحچي ؟

- خطفو مُهره فراات خطفوهاا

- شنوو شلوون خطفوهاا يول ليش ما درتو بالكم ياخي

- مادري فرات مادري

- زين زين آني هسه طالع جايكم

نهيت المكالمة

علي : خير فرات شكو

- يابة مُهره مخطوفه

علي : لااا سووها الأنذال الگو**

نجاة : يممهه بنيتي شلون أنخطفت أبني

- مدري يمه بلا امر عليچ حضريلي ملابسي تا أطلع للبصرة

- تطلع للبصرة بهالوكت

- أي يوم لازم أكون وياهم

صگر : أنتظرني فرات جاي وياك

- لا صگر أنت بعدك موزين خاف يصيرلك شي

- يطبني مرض آني المهم نلگه البنيه

تجهزنه آني و صگر و ودعنه أهلنه و طلعنه بوجهنا للبصرة

مُهره
فتحت عيوني و آني دايخة ما أشوف شي كلشي مغوش گدامي شوي و صحصحت گمت گعدت باوعت چنت كاعدة بغرفة غريبة ما أعرف شنو فارغة و شبه ظلمة رحت للباب أفتحه حاولت شگد بس مقفول صرت أبچي و أصيح بشكل هستيري أصيح كله بأسم فرات و شهم ساعة أصيح بسجاد و بابا بس ماكو أحد محد رد عليه شكله ماكو أحد أصلاً
شوي و أنفتح الباب و دخل للغرفة واحد طويل و ضخم و چان ملثم كلشي ما مبين من وجهه
صرت اصيح عليه بصوت عالي ..

- منوو انتتت شترريييد منيي ولككك عووفنييي ياا نذلل طللعننييي منااااا يلاااا طللععنييي

تقدم عليه و خنگني برگبتي خفيف حچه بهمس و هو خازرني ..

- صوتچ ماريد أسمعه فهمتي مصيرچ هسه بأيد أهلچ أذا ما سوو اللي نريده و علي ندزچ الهم جثة و هسه صيري عاقلة و لا يطلع صوتچ

عافني و طلع و قفل الباب ورا و آني بقيت مصدومة
يربي يعني هسه آني مخطوفة و شنو اللي يريدونه من أهلي
صرت أبچي بصوت مخنوگ حتى ميسمعني و يجي يأذيني

شهم
صار الليل و الكُل أجانه لبيت عمي حسين من سمعو
الخبر
و أحنه كاعدين و نتصفن بوجوه بعض كلشي منگدر نسوي

- عمي شنو أحنه راح نضل گاعدين و واحد يباوع بوجه الثاني خلونه نسوي شي نطلع ندور نبلغ الشرطة نصخم أي شي

حسين : منگدر أبني وين نطلع ندور و الشرطة هم منگدر نبلغهم لأن مُهره ما صارلها هواي من أختفت خلي ننتظر جية صگر و فرات بلكت صگر هو يحچي ويه معارفه و نتحرك

سكتت و آني گلبي نار على مُهره هسه شصار بحالها أخاف أذوها بشي أخاف مجاي تاكل بقيت فكرة تجيبني و فكرة تاخذني وره شوية أتصل بيه صگر جاوبته ..

- ألوو هلا صگر وين صرتو

- طبينه البصرة بس الطرق أغلبها مسدوده من المظاهرات راح نتأخر شويه

- زين يلا من تصلون خابروني

فرات
دخلنه البصرة بس چانت الطرق كلها مسدوده من المظاهرات و الثوار ضلينه فوگ الساعة ندور طريق مفتوح
وصلنه لبيت خالي حسين و طلعو الولد أستقبلونه أول ما دخلنه للبيت صگر بده يحاچي اصدقائه حتى تتحرك الشرطة تدور لـ مُهره لأن ميگدرون يتحركون ألا بعد 24 ساعة و أحنه وين بينه ننتظر هالگد

صگر : ألو هلا عُثمان ، شصار بالموضوع الگتلك عليه ؟

- صگر بعدني جاي أدور أحد واصل يحچي ويه مدير شرطة البصرة بس المشكلة الزلمة عنيد ياخي

صگر : عنيد على نفسه مو علينه عُثمان ، دحگ خلال ساعة فقط ساااعة وحده أريد شرطة البصرة كلها مستنفره و تدور لا بالقرآن أسويها گشره على راسه و راس الخلفه

- صار بس أمهلني شوية راح أجيبله ناس أكبر منه و غصباً عنه يخضع للأوامر

- أيي عفيه أنتظر منك رد لا تتأخر عليه

نهيت المكالمة و رحت يم خالي حسين بست ايده و حاولت اهدي ..

- لا تدير بال خالي بأذن الله باچر مُهره ترجع لحضنك

حسين : تسلم وليدي متقصر أدري بيك كفوو

أنداريت للولد اللي چانو وجوهم مصوفره و ما بأديهم حيله

- هاي شبيكم يولو شدو حيلكم يابة

سجاد : هي ضل بيها حيل خويه صگر

شهم : لا بيها حيل سجاد بيها آني ما ادري ليش گاعدين و ساكتين
شوفو آني طالع أسأل و أدور البيه خير يلحگني مو يضل گاعد هين

فرات : جاي وياك شهم أگف

صگر : أنتظرو كلنه جايين يلا يولد أمشو

طلعنه منا 3 سيارات تفرقنه حوالين الجامعة نسأل بلكت أحد شاف ذوله اللي خطفو مُهره او حتى گدر يشوف الرقم
و فعلاً اكو ناس شافوهم و همه ياخذونها بس للأسف چانوو ملثمين و السيارة ما چان بيها رقم
لحد ما أجه الأذن من مدير شرطة البصرة و أستنفرت كل الفرق الأمنية و صرنه ندور

شهم : ماكووو هاي صار نص الليل و أحنه ندور و ماكو

صگر : على كيفك شهم هاي عملية خطف خوما تدور بس بالشوارع و البيوت نحتاج شي يساعدنه علمود ندور

شهم : شي مثل شنو يعني ؟

- مُهره چانت ماخذه وياها فون ؟

- مدري سجاد مُهره أخذت وياها فون

سجاد : أي چان وياها

- خوش عجل آني و سجاد راح نروح للمركز حتى ننطيهم الرقم علمود يتعقبونه و فرات و شهم روحو ويه وحده من الدوريات و شوفولنه كامرات المراقبة اللي بهذيچ المنطقة كلها

مُهره
چنت گاعده بالغرفة و آني أنتظر الفرج بلكت يجي احد يخلصني سمعت ذوله ديسولفون رحت وگفت يم الباب حتى اسمع حچيهم
چانو واحد يگول للثاني ..

- ها شتگول نخابر على أهلها هسه ؟

- لا مو هسه خليها لباچر

- مو الجماعة مستعجلين ولك

- و شسويلهم خلي ينتظرون آني هذا شغلي عجبهم يا أهلاً و سهلاً ما عجبهم يطبهم مرض

رجعت لمكاني گعدت و صرت افكر شراح يصير بيه اذا ما اجو أهلي و خلصوني اووف ياربي أكيد راح اموت
سمعت صوت الباب أنطبگ حييل و بعدين صوت سيارة شكلهم ذوله طلعو من البيت بس المشكلة باب الغرفة مقفول و أكيد قفلو كل البوب مو أغبياء همه

********

يتبع ...

و هذا البارت الـ 5 لخاطر البنات أللي طلبنه
بارتين بيوم فـ لا تقصرون بالتفاعل حبايبي من أشوف التفاعل عالي يصيرلي واهس انزللكم بارتات أكثر و أكمل كتابة فـ لا تقصرون♥️
لا تنسون الحبشكلات اللي كُل مره أگُلكم عليهن مابيه حيل أكتبهن

18.kij
تعالو أنستا

سحر الدليمي