رواية عشگ الفرات ( عِندما تَهوى القُلوب ) الفصل الرابع 4 - بقلم سحر الدليمي

كُل ما في داخلي يحِنُ لكِ فـ كيف أنسى ؟

******

فرات
رجعنه للبيت و طول الطريق چنت ساكت و أحس عقلي مو وياي من هذاك اليوم أظلمت الدنيا بوجهي و هسه أحس أظلمت أكثر
وصلنه للبيت نزلنه لگيت الكُل بعدهم گاعدين سلمت و صعدت گبل لغرفتي

رافد
جيت گعدت و الكُل عيونهم عليه منتظرين افسرلهم حالة فرات اللي ما تتفسر سكتت و ما حچيت شي الى أن سألني أبوية ..

جسام : ها رافد حچيت ويه أبن عمك

- حچيت يابة و يرايتني ما حچيت

نجاة : ليش أبني شصار ليش تحچي هيچ

- حچيت وياه و كالعادة عصب و گام و عافني يحاچيني و الدمعة بعينه عمه
فرات جاي تسوء حالته أكثر

نجاة
من سمعت هيچ الحچي لزمت ايد علي بقوة و أيدي الثانية على گلبي أحاول استوعب اللي أسمعه

علي : اهدي نجاة ماكو شي أهدي

رافد : عمي آني أگول ..

علي : شتكول وليدي احچي

- عمي فرات لازم يشوفه طبيب نفسي اتوقع هذا الحل الوحيد لحالته

جسام : و آني هم أگول هيچ بلكت الطبيب يشوفله حل

علي : ياريت بس أنتو تعرفون فرات أكيد ما راح يرضى

نجاة : نحاول وياه مره مرتين ما نخسر شي بس اريد أبني يرجع لحالته الطبيعية مو والله گلبي ينمرد عليه من أشوفه هيچ

علي : أشش لا تبچين نجاة ماكو داعي للبچي آني أحچي وياه و بلكت أگدر اقنعه

فرات
دخلت غرفتي و حچي رافد يرن بمسامعي و هذاك اليوم و اللي صار بيه ما جاي أگدر انساه ما جاي يطلع من مخي
گعدت ع الچرباية فتحت الجرار و طلعت صورتها شفتها و دموعي نزلن لا أرادياً
رجعت بيه الذاكرة لهذاك اليوم الأسود قبل 4 سنوات
چانت تحچي وياي و الأبتسامة مرسومة على وجهها الحلو و تناظرلي بعيونها المليانه حُب و حنية

ميس : حبيبي هسه كملنه و حضرنه كلشي ضل بس نتزوج أوووف شوكت يخلصن هاليومين و نصير سوه

فرات : هههههه هسه من كل عقلچ آني أتزوجچ شنو خبل آني

ميس : أهووو فرات لا تحچي هيچ ترا والله ازعل و بعد ما أحاچيك و حتى زواج ما أتزوجك و ديلا

فرات : لا يمعودة كلشي و لا زعلچ انوب عرسنه بقاله بس يومين خلص بطلت بعد ما أحچي هيچ

وصلتها للبيت و نزلت چان لازم تعبر الشارع حتى تصل للبيت
دحگت عليه گبل لا تنزل و گالتلي ..

- أحبك

- و آني أعشگچ يرويحتي

ما چنت أدري هاي آخر كلمة أحبك أسمعها منها
جاي تمشي حتى تعبر الشارع
و فجأة بلحظة سودة هيچ بلمح البصر جت سيارة سريعة دعمتها و وگعت بالگاع و هذا العار كمل طريقة و لا كأنو سوه شي
نزلت أركض عليها شفت راسها ينزف دم هوواية گبل شلتها و حطيتها بالسيارة و شخطت بيها للمستشفى
دخلوها للطوارئ و آني ضليت بالأنتظار ألوب عليها شوية و طلع الدكتور و گالي بالحرف الواحد

- أنا لله و أنا أليه راجعون المريضة توفت الله يصبرك أبني

هنا أنصدمت صدمة حياتي سودت الدنيا بوجهي أنتظرت بلكت الدكتور يطلع غلطان و يرجع يگولي مابيها شي بس عافني و راح
بلحظة خسرت البنيه اللي أعشگها و أللي چانت راح تصير مرتي بعد يومين
كله بسببي صوچي آني چان المفروض اوصلها لباب البيت الله ياخذني الله ياااخذنييي
و من يومها و آني لا ليلي ليل و لا نهاري نهار صرت اعصب من كلشي و أكره اسولف ويه أحد الوحيدين اللي آخذ و أنطي بالحچي وياهم همه شهم و رافد
قاطع حبل أفكاري صوت الباب و هو ينفتح دخل أبوية و جه گعد بصفي

- يابة عفيه أذا تريد تحچي وياي بنفس السالفة فـ آني طالع

لزمني من أيدي و گالي ..

- أكعد ابني اريد أحجي وياك بموضوع مهم

- شنوه

- شوف وليدي آني أگول لو تخليني آخذك لطبيب نفسي حتى بلكت يساعدك و يشوف حل لوضعك هذا

سمعت هالحچي و ما أعرف شصارلي أنتفضت من مكاني و صرت أصيح على ابوية بعلو حسي

- شبيييه وضعيي يااابة شبييييه هااا شنوو شايفني مخبلل گدامك تاا تاخذني لطبييب نفسيي

انتبهت لنفسي أنو اللي گدامي أبوية و آني اصيح عليه

علي
خنگتني العبره و آني أشوف فرات هيچ
گام وگف گبالي و صار يبچي مثل الطفل بس بخنگه و حاط ايده على حلگه حتى ما تطلع شهگاته

فرات
صرت أبچي من كل عقلي على وضعي هذا و لأن صيحت على ابوية و هو ما حچه و لا كلمة ضل گاعد بمكانه
رحت يمه ركعت يم رجليه و أخذت ايده و بستها حطيت راسي بحضنه و هو حط ايده على راسي و صار يمسح على شعري
حاچيته و آني مخنوگ و الدمعة بعيني

- آسف يابة والله مو قصدي أصيح عليك الله ياخذني أذا بعد رفعت صوتي بوجهك
بس والله مو بوعيي يابة آني تعبت والله تعبت

رفع راسي و مسح دموعي بأيده و گالي

- و لا يهمك وليدي آني مو زعلان منك زعلان عليك أبني والله آني و أمك تعبنه و أحنه نشوفك هيچ عبالك ما حاسين بيك
والله أحنه أكثر ناس حاسين بيك و بوجعك
ميس ماتت الله يرحمها و ألحي ابده من الميت أنت لازم تكمل حياتك و تحاول تنسى
يلا فرات اوعدني تنسى

ما گدرت أكسر بخاطر ابوية و آني أشوفه شلون مكسور عليه
و فعلاً آني لازم أحاول أنسى و أكمل حياتي

- خلص أوعدك راح أنسى انت بس ارضى عليه

گام و گومني وياه حضني لصدره و گالي ..

- عفيييه بوليدي السبع هيچ أريدك و آني گلبي راضي عليك

- يلا خلي ننزل جوه

- يلا حبيبي

رافد
نزلو عمي و فرات من فوگ و فرات چانت مرسومة الأبتسامة على وجهه ما أعرف عمي شسواله و شحچه وياه و خلاه هيچ يبتسم بس الحمدلله شفته مبتسم

- أي عيني لو أدري بعمي هيچ يخليك تبتسم چان من زمان دازه عليك
قابل مثل حظي بس أحچي وياك كلمة تگب عليه عبالك نار و هلت عليك نفط

فرات : انچب أنت مالك علاقة

رافد : لا أله ألا الله يول ع الأقل احترمني مو أكبر منك

فرات : أهووو ترا والله ذليتني هي سنة لا تخبصني بيها

جسام : بما أنو كلنه منجمعين و عين الله علينه فـ عندي الكم خبر حلو

نجاة : يا ألله شكو ابو رافد أحچي

جسام : خابرتني بدور تگول هاليومين راح نجي نستقر هينه بالأنبار

علي : ايي و أخيراً مو گنالها من زمان تعاي إهينه يمنه گاعده هي و بنتها وحدهن ببغداد عليش

نجاة : والله زين ما تسوي

رافد
ضلينه آني و فرات واحد صافن بوجه الثاني مستغربين من السالفة

- يعني عمتي بدور هي ما غيرها؟

جسام : اي عمتك بدور شنو چم عمه عندك

- هااا اوكي هلا بيها

***

عشق
كملنه النقل و كملت تحضير الغراض و كلشي و امي خابرت على خوالي گالتلهم باجر نجي و همه مقبلو نجي ويه أحد غريب فـ گالو ندزلكم سيارة من معارفهم
تمددت ع الچرباية و افكر هاي آخر مره أنام بغرفتي و على چربايتي باچر راح انام بمكان جديد و منطقة جديدة و اشوف وجوه جديدة
متحمسة و ضايجة بنفس الوقت بس حاولت أنسى الضوجة و أفكر بإيجابية ضليت أفكر لحد ما نمت و حسيت على صوت ماما تگعدني

- ماما عفيه خلي أنام بعد وكت والله

بدور : يولي يا بعد وكت الرجال راح يجينه بالسبعة و هسه بالستة و ربع دوبنه نلحگ

گمت غسلت و صليت و تحضرت ما گدرت آكل لأن آني من أسافر ما أگدر آكل خصوصاً اذا چانت الطلعة الصبح
اجتي نور هي و أبوها ودعتنا و راحت و آني أبچي وراها اوووف
شوية و ماما گالت اجه السايق اخذنه الغراض و طلعنه باوعت لبيتنة آخر مره و آني أفكر شنو منتظرني بالأنبار سديت الباب و صعدنه و توكلنه

فرات
گعدت الصبح ع المنبه رحت غسلت و صليت و نزلت جوه حتى أروح للشغل جاي أحاول ألهي نفسي بالشغل حتى بلكت أنسى

- صباح الخير

الكُل : صباح النور

- آني طالع تريدون شي

نجاة : وين تريد ماما

- للشغل ماما

- و ما تتريگ ؟

- عود أتريگ غادي

علي : لا ميصير أبني أكعد تريگ ويانه

فرات : اي زين ليش لا

گعدنه كلنه ع السفرة نتريگ

جسام : فرات عود لا تتأخر بالرجعة لأن عمتك اليوم جايه من بغداد

- أن شاء الله عمي

كملت ريوگ و طلعت بوجهي للمعرض

عشق
نمشي و الطريق صار شطوله معقوله الأنبار بعيده كل هالگد باوعت للساعة و طلع ما صايرلنه ساعة من طلعنه من بغداد
رچيت راسي ع الكُشن و نمت و ما أدري حسيت على ماما تگعدني تگولي گومي وصلنه الأنبار
گعدت مسحت عيوني حتى أركز باوعت من الجامة و أنصدمت الأنبار كلللشش حلوه يعني صح آخر مرة زرتها چان عمري 5 سنوات تقريباً بس ما چانت هيچ
ما اعرف بشنو حسيت اول ما دخلنه للانبار حسيت انو أعرف هالمكان حسيت أنو عندي أهل و عزوة فرحت بهالأحساس صراحة و تأملت خير
شوي و وصلنه لبيت خوالي نزلنه من السيارة و ردنه ننزل الغراض بس اجو ولد ثنين مقبلو يخلونه نشيلهن همه شالوهن
اللي أفتهمته انو ذوله ولد خوالي تسالمنه و فتنه للبيت چان كلش حلو و چبييير أكبر من بيتنا اللي بغداد يجوز بـ 3 مرات
المهم دخلنه جوه و تلگتنه بنيه شابه كلش حلوه گالت انو هي زوجة صگر و عدها بنيه يعمري تجننن كلللش حبيتها
گعدنا كلنه سويه نسولف و آني كلش حبيتهم خوالي يروحون و يردون علينه آني و ماما و يهلون و يمرحبون يگولون نورت الأنبار
ما توقعت هالگد يحبون أمي ، شوي و گامو رُسُل و خالة نجاة مرت خالو علي حتى يصبن الغدة و گمت آني أساعدهن مقبلن بس آني عاندت و رحنه صبينه الغدة و گعدنه كلنه نتغدة
كملنه غدة و هالسوالف و آني گلت لـ ماما راح أطلع للحديقة شوية أشم هوى
طلعت چانت الحديقة كلش حلوة و چبيرة چان اكو كراسي محطوطات گعدت و صرت اتأمل بهذا الجمال الأشجار و الورود چان كلشي أخضر فعلاً هالمنظر ريحني

فرات
آخر فترة چنت هامل المعرض و مو دايرله بال
من اول ما وصلت ألتهيت و ما گعدت من جهه زبائن هواية و من جهة لازم أستلم وجبة السيارات الجديدة و من جهة العقود اللي ما شفتها ضليت ملتهي بالشغل و ما حسيت بالوكت دحگت للساعة چانت قريب الثنتين تأخرت حييل آني عادي عندي لو أضل لليل أشتغل بس عمي گالي لازم تكون موجود
كنسلت كلشي اليوم و أجلته على باچر و طلعت للبيت

عشق
بين ما آني جاي أتمشى بالحديقة و صافنه چني أبو صابر ( المطي ) قاطع صفنتي صوت باب الحوش و هو ينفتح بقوة فزيت من مكاني و أخترعت
شفت واحد أجه يمشي بأتجاه الحديقة و هو عاگد حواجبه شكله يخوف أجه صار مقابيلي شافني و وگف صفن بوجهي
حچيت و آني خايفة و على شوي أبجي

- عزااا أنت منو حرامي موو شتريد فدووة روح والله ماعندي شي ما شايله شي

فرات : حرامي شنو يولي أنتي أللي منو

شفته أجه يمشي بأتجاهي هنا صرت أصيح و أگول ..

- روووحح منااا لا تجي لا تتقدم روووححح لا والله هسه أصيح خوالي يجوون يكوموك بأرضك روووح

فرات
من گالت هيچ و آني صفنت تذكرت أنو عمتي عدها بنيه و أكيد هاي هي ابتسمت و گلت ..

- هااا أنتي بنت عمتي بدور مو صح

عشق
صفنت من گال هيچ شنو منو هذا شو يصيح لأمي عمتي

- أي

- لا تخافين يابة آني مو حرامي آني فرات أبن خالچ علي

- يااا عزااا آسفة بس ما أعرفك

- اي بعد ما سويتيني حرامي خلف الله عليچ

- والله مو قصدي بس خفت

- يلا ميخالف حصل خير أمشي نفوت جوه

دخلنه للبيت و رحت تا أسلم على عمتي بدور

بدور : يااا ما عرفتونا على هالشيخ منو هذا يولو

- هههههه عمه آني فرات شنو ما عرفتيني

- يمممهه وليدي زغيرون البيت كبران و صاير شيخ ما شاء الله عليك

حضنتني و صارت تبوس بيه و آني بست ايدها و راسها

- شلونچ عمه أن شاء الله بخير

- زينة الحمدلله يبعد عمتك أنت شلونك

- على الله عمه

دخلنه كلنه للهول و گعدنه نسولف و من هالأمور

***

مُهرة
جاي على بالي أروح للسوگ گلت لسجاد بس گال عندي شغل و طلع اوووف هسه من يوديني
رحت لبابا أگله بلكت هو يوديني و لو أعرفه مستحيل يطلع ويه بنيه ع السوگ

- بابا حبيبي

- هلا بنيتي شعندچ

- أريد اروح للسوگ و سجاد ماكو يوصلني هسه شلون

- أي بسيطة خابري شهم خليه هو يجي ياخذچ أذا عنده مجال

- صدگ بابا يعني عادي

- أي عادي

- يلا خوش لعد آني رايحة

- تعااي عندچ فلوس

- اي حبيبي عندي

- هاا خوش لعد روحي يلا بس لا تتأخرين

- حاضر تدلل

بسرعة رحت للغرفة أخذت فوني حتى أتصل بشهم

شهم گاعد بالحديقة دافكر مادري بشنو بس المهم دافكر يعني
دگ فوني شفت الأسم و طلع مُهرة أستغربت مُهرة ما تتصل الا عدها شي أعرفها

- ألوو

- شهم شلونك يا أبن عمي

- بخير أذا أنتي بخير

- أممم شهومي

- عيون شهم أأأ قصدي تفضلي

- أريد أطلب منك طلب

- أمريني

- بالبداية عندك شغل لو لا

- لا ماعندي

- اممم اريدك تاخذني للسوگ سجاد ما موجود حتى ياخذني و بابا گالي خلي شهم ياخذچ شگلت

شهم
گالت هيچ و آني طرت من الفرح يعني راح نطلع آني و مُهرة وحدنه و الكُل يدري

- اي اي طبعا آخذچ أذا ما آخذج آخذ منو لعد أنتي تحضري و آني هسه طالع بس أوصل ادزلج مسج

- تمام

ذبيت الفون و طلعت ملابسي تحضرت و كملت هالمرة ما حطيت مكياج اصلاً آني اكره احطه من اطلع قلييل أحط كملت و گعدت أنتظر شهم بالصالة شوي و دز مسج انو هو وصل
طلعت و ركبت بالسيارة و تحركنه شهم چان مشغل اغنية رومانسية كلش حلوة و يدندن وياها هذا أبن عمي شكله عشگان
وصلنه للسوگ و بدينه نفتر جيت حتى أدخل لواحد من المحلات ما حسيت الا و شهم جرني من أيدي و قربني عليه بعدين رجع ابتعد عني شوي

شهم : تعاااي

- هاا خير

- تعاي وياي

- ليش شهم اريد ادخل للمحل

- عوفيه نشوف غيره

- لا مو آني أحب بضاعتهم كللش

- مُهرة عوفي المحل و تعاي نشوف غيره

- أي ليييشش

- لچ متشوفين هالعارات شلون يباوعون عليچ ترا اذا دخلنه للمحل ما أضمن نفسي و أحتمال اسوي مشكلة ألها اول مالها تالي

- لا لا فدوة بدون مشاكل شهومي خلص نطلع

طلعنه و صرنه نفتر بالسوگ فريت بيه المحلات كلها و فوگاها مشيلته الغراض و هو خطية ما حچه و لا كلمة فدووة شگد حباب أبن عمي
هذا لو سجاد چان لعب بيه طوبه ، كملنه و رحنه للسيارة حتى نرجع للبيت
وصلنه و نزلت و نزل هو وياي نزلي الغراض و دخلي ياهن الى عند الباب ردت ادخل و لزمني من أيدي

- أوگفي نسيت أنطيچ شغلة

- شنو

طلع علبة صغيرة من جيب الدشداشة مالته و انطاني ياها اخذتها و صفنت عليها شنو هاي

- شنو متريدين تفتحيها

- هاا لا اي هسه

فتحتها و طلعت منها سواار ابيض كلش حلوو يجنن

- يااا شنو هذا يجننن شكراً شهم هووواي حلو

- تستاهلين

- هاي شوكت جبته

- اليوم

- شو ما شفتك

- هو أنتي ما منتبهة

- أممم يجوز
يلا هسه آني راح أفوت محتاج شي

- لا سلامتچ

- يلا باي

- بايات

شهم
فاتت للبيت و چانت كلش فرحانة بالهدية آني توقعت ما تقبلها بس قبلتها الحمدلله
صعدت سيارتي و توجهت للبيت و آني فرحان قضيت وقت حلو ويه مُهرة ياريت كل متريد تطلع للسوگ تجي عليه آني آخذها

********

يتبع ...

هلوووو بروهاات
البارت چان عبارة عن ، ماضي فرات الأليم و لقائه بـ عشگ ، وصول عشگ للأنبار ، برأيكم شراح يصير و شلون رتح تمشي الأمور وياها؟ ، أكتبولي توقعاتكم
لا تنسون التصويت و متابعة الحساب و مشاركة القصة و التعليق بين الفقرات يعني علقو ع المشاهد و أنو رأيكم بيها

18.kij
تعالو أنستا يحلوين ضروري جدًا

سحر الدليمي