رواية عشگ الفرات ( عِندما تَهوى القُلوب ) الفصل الخامس والأربعون 45 - بقلم سحر الدليمي

شلونهم الحلوين ♥️
لا تنسون التصويت و التعليق بين الفقرات
قراءة مُمتعة 💜

*****

- شِفتها و عَقلي رأسًا طار ، خطفت گلبي و أحساسي
غريبة و بين ليلة و يوم صارت أغلى من ناسي

*****

عبدالله
وصلت بيت المهيوب ، جاي أطبگ السيارة و ما أدري شلون أصتدمت بالسيارة اللي گدامي ، بسرعة نزلت حَتى أشوفها ويه ما نزلت و چان تنزل بنيه من السيارة ، چانت معصبة و عاگده حواجبها ، أجت و باوعت للضربة مال سيارتها ، رفعت راسها و باوعت عليه ...

- أنت متشووف ، شلوون هيچ ضرربت سياارتيي؟؟؟

بقيت صافن عليها و هي تحجي و ترزل ، ما مركز بحچيها و لا أعرف شنو گالت ...

- شبييك صاافن بووجهيي مو جااي أحجيي وييااك !!

ابتسمت و رديتلها ...

- آسف ، ضربتها بدون قصد

- و فوگاها يضحك !!

- آني ما ضحكت ، مُجرد أبتسمت

- نفس الشي

ردت أحچي و طلع فرات ...

فرات : هااا خيير شبيكم شصاير؟

- ضرب سيارتي

- ميخالف أحنه نصلحها ، فوتي جوه

عبدالله : لا آني أصلحها

فرات : ماكو فرق

- لا أكو ، آني الضربتها و آني اصلحها

- أنت تعرفه؟

فرات : إي أعرفه يلا فوتي جوه

فاتت بَس قبل متفوت باوعتلي بخزره ، ابتسمت بوجهها و هي فارت بَس متگدر تحچي ...

- الحمدلله ع السلامة أبن الخال

- الله يسلمك حَبيبي

- يلا تفضل

فتنه جوه ...

- ولك منو هاي البنيه؟

- هاي ريان ، أخت زوجة صگر

- و شو يمكم ، زيارة لو شنو

- لا گاعدة يمنه مؤقت لأن شغلها أنتقل هنا

- هااا

- إيي ما گتلي شعندك بالأنبار

- والله أستلمت شغل شهم و صرت بمكانه تعرف هو ملتهي بسالفة أبنه و مُهره ميگدر يعوفها فـ أجيت هنا علمود أشرف على الشُحنة اللي راح تطلع للأردن

- منا تطلع الشُحنة؟

- إي ، مضطر أبقى يمكم يومين بَس على ما أكمل

- صدُگ تحچي أنت ، البيت بيتك يمعود

- يسلم البيت و أهله ، چا عمتي وين؟

- عمتك أخذت الوالد و طلعو ما أدري وين

صاح صگر و هو يدخل للديوان ...

- طلعو طلعة غرامية يمعود

ضحكنه و أجه تسالمنه و گعد ، حچه فرات ...

- شنو غاير منهم ، أنت هَم أخذ مرتك و أطلعو طلعة غرامية

- إي نطلع ليش ما نطلع

***

بَعد ما تخربطت مُهره نقلوها للمستشفى ، شهم و أبوه و أمه ، تحاليل و فحوصات شاملة ، گاعدين كُلهم بالممر ينتظرون أحد يطلع و يطمنهم ، طلع الدكتور و حچه ...

- منو أقرب شخص للمريضة؟

فز شهم و گام على حيله ...

- آني

- حضرتك شنو تقربلها؟

- زوجها

- عال ، شوف راح أشرحلك حالتها بالتفصيل و أبينلك اللي صار وياها علمود تگدر تمشي ع التعليمات اللي راح انطيك ياها

- تمام أسمعك

- زوجتك تعرضت لأنهيار عصبي حاد على أثر صدمة أو شيئ من هذا القبيل ، و هذا الشي راد يسببلها مشاكل بالدماغ بَس الحمدلله ما صار شي

- إييي؟؟؟

- هي هَسه راح تبقى نايمة ، منعرف شوكت تصحى ، يجوز يوم او يومين و بالحد الأقصى تبقى نايمة ٣ أيام ، و بهاي الفترة راح تبقى يمنه بالمستشفى ، آني اگدر اخليك تاخذها للبيت و أنت تدير بالك عليها بَس تبقى يمنه بالمستشفى أفضل لأن الأشخاص اللي يتعرضون لأنهيار عصبي يحتاجون عناية من أشخاص يفهمون بهالأمور

- تمام نبقيها هنا

- عال ، في حال صحت تاخذونها للبيت و تنتبهون على أكلها زين ، سُكريات متاكل لحوم چاي گهوة مشروبات غازية متشرب و أيضًا تنتبهون لنفسيتها متنقهر و لا تعصب

- إن شاء الله

- هاي كُل التوصيات اللي عليكم أتباعها و أتمنى تلتزمون بيها لأن حالتها جدًا حساسة

- أكيد دكتور ، بَس فدوة گلي أكو خطر عليها شي؟

- لا لا حاليًا ماكو شي ، بَس بعدين منعرف شيصير

- أگدر اشوفها؟

- إي تگدر

- مشكور دكتور

- الشُكر لله

راح الدكتور و شهم گعد ع الكرسي و حَط إيده على راسه و صار يفرك بي ، أجت يمه أمه حَطت إيدها على چتفه و حچت ...

- بيك شي يمه؟

رفع راسه و باوعلها ...

- والله أحس گلبي راح يوگف ، هواي الصار وياي ، ما أتحمله والله

- لتحچي هيچ يوم أسم الله على گلبك ، هذا كله أبتلاء من رب العالمين و الله ما يبتلي عبد ألا إذا چان يحبه حَتى يشوف مدى صبره و إيمانه

زفر هوى بقهر و گام على حيله ...

- آني فايتلها و أنتو رجعو للبيت مالها داعي ظلتكم هنا تتعبون ع الفاضي

سلام : لا وليدي باقين هنا لحد ما نطمن عليها أكثر

- براحتكم

دخل بدون ما يناقش لأن ماله حيل يحچي و يناقش ، حچه أبوه ...

- ما أدري شوكت يرتاح هالولد

- لتحچي هيچ گدامه سلام ، خلينه نكون مصدر قوة أله يستمد قوته من عدنه ، مو نجي نحبطه بهالكلام

- و آنـه منيلي الحيل و أشوفه هيچ ، خسر أبنه و هَسه حاير بمرته ، و حسين ، والله حاير شلون أخابره و أگله

- خابره لازم يدري

هزلها براسه و گعد ، شهم دخل للغرفة و راح گعد يم مُهره النايمة و مو حاسة بشي ، حَط إيده على راسها و حچه ...

- كافي تأذيني أكثر ما متأذي ، آني أدري اللي صار مو سهل بَس آني أتأذة من أشوفچ هيچ

نزلن دموعة و غطه وجهه بإيده ، مسح دموعة و رجع حچه ...

- گومي و شدي حيلي يـَ حيلي ، آنـه بلياچ أموت

ظل گاعد يمها لحد ما تعب ، حَط راسه على طارف الچرباية و غفه ، دخلو أبوه و أمه لگوه نايم حاولو يگعدونه لأن نومته مو عدله بَس ما گعد چان تعبان و نام يمها

***

عشق
گاعدة بالمطبخ و وياي أمي چنه دنسولف ، دخلو فرات و عبدالله ، طلبو عصير و گمت سويتلهم و نطيته الهم ، مد إيده فرات و أخذه ، ركزت على إيده صارت بيها رجفة ، ما سيطر ع الگلاص و وگع من إيده و تكسر ...

عبدالله : الله الله

بدور : أنكسر الشر إن شاء الله

أباوعله إيده اليسره ترجف و دمارتها بارزات كلش عكس إيده الثانية ، لزمها بَس بعدها ترجف ، باوعله عبدالله ...

- شبيك فرات؟!

- ما أدري ، إيدي ما جاي أسيطر عليها

- تمام أهدأ ، تعال أگعد هنا

گعد ع الكرسي و گعد بصفه عبدالله ، جر إيده و لزمها ...

- حاول ترخي إيدك

بقى لازمله ياها لحد ما أختفى الرجيف ...

- صاير عندك رجفة من قبل؟

- لا

حچيت آني : لا صاير عنده

فرات : هاي شوكت؟!

- أنت متتذكر

عبدالله : بَس إيده لو جسمه كُله؟

- لا جسمه كُله

ألتف لـ فرات و حچه ...

- لازم تروح تسوي فحوصات حَتى نشوف شنو سبب هاي الرجفة

- ميحتاج

- شلون ميحتاج فرات !!

- يلا استلم ، هاي من يكون أبن خالك دكتور

- ولك آني لمصلحتك

- مابيه شي عليش أروح

- براحتك

طلعو كُلهم و بقيت آني حايرة بحالة فرات ، ليش ديصير وياه هيج؟! ، أخاف بي شي ! ، شوي و أجاني ...

- بشنو جاي تفكر عشگي

- بيك

- ههههه شلون

- دافكر ليش هيچ ديصير وياك

- مو مهم

- لا مهم فرات ، إذا عندك مو مهم عندي مهم ، مشفت شلون وگع الگلاص من إيدك

- هَسه عوفي سالفتي ، أريد أحچي وياچ بموضوع

جريت نفس قوي و غمضت عيوني ، فتحتها و حچيت ...

- أحچي حَبيبي

- صديقي مدير منظمة توعوية ، و عنده حملة توعية على كُليتكم

- ما فهمت؟

- يعني يروحون للكلية مالتكم و يشرحون و يتطرقون لفد مواضيع معينة لغرض توعية الطلاب أتجاهها

- إييي؟

- رادني أتطوع بهاي الحملة و اروح وياه و آني رايدچ تكونين وياي بما أنُ أنتِ دارسة بهالكلية

- بَس آني ما أعرف أشرح و هالسوالف

- ميخالف آني وياچ

- مو خاف أتفشل

- اوووف ، هاي ثاني مره تگُليلي ياها ، أريدچ تفهمين أنُ أنتِ من تكونين وياي لا تخافين من شي ، حَتى الفشل لتخافين منه

ابتسمت و حچيت ...

- تمام

- خوش

- بَس بشرط

- هااا بيها شروط؟

- إييي

- ديلا بالله شنو

- تروح تسوي الفحوصات الگالك عليها عبدالله

- أهوووو

- لعد ما أروح وياك

أستغفر و مسح وجهه بنفاذ صبر ، حچه ...

- أوكي أوكي موافق ، وره منكمل أروح أسويهن

ضحكت و حچيت ...

- عفييييه

- ههههههههه

- هَسه شحنسوي؟

- نجهز للموضوع اللي راح نشرحه باچر ، تساعديني؟

- أكيييد

- خوش عَجل يلا

***

نَفس
گاعدة بالغرفة دامشط بشعري ، أندگ الباب ٣ دگات خفيفة ، گلت تفضل ، آني كُل ظني وحدة من البنات ، بَس انصدمت لمن شفت رافد واگف و يباوع عليه ، سد الباب و أجه يمشي بأتجاهي ، آني أرتبكت من شفته ...

- ءءءأ شدتسوي هنا

ما جاوبني ، وصل يمي و مد إيده على شعري وخره عن عيوني ، آني أبتعدت عنه ...

- هههههههه شبيچ خايفة يولي !

- ءءءأ ، مو هذا شسمه

- هَسه عوفيني من الشسمه ، بدلي تا نطلع

- وين نطلع؟

- مالچ شغل بدلي

- إي تمام

- إي

بقى واگف و صافن عليه ...

- إيي أطلع حَتى أبدل

- تمام طالع ، أنتظرچ بالهول

- أوكي

راح و سد الباب وراه ، و آني طلعت ملابس و بدلت بسرعة ، شلت جنطتي و موبايلي و طلعت ، نزلت جوه لگيته بالهول ...

- كملت عُمري

- يلا عَجل

طلعنه نمشي سوه ، فتحلي الباب و صعدت ...

- أعرف افتح الباب والله هههههه

- والله أنتِ مو وجه دلال ، عود ردت اسويلها مثل الأتراك

- غير يستقر بوراك

- يروحلي فدوة بوراك

- مو بَس فدوة ، فدوات يروح لـ حَبيبي

چان ديحط السويچ من گلت هيچ عافه و التفت عليه ، ابتسم و عض على شفته السُفلية و هز راسة ، بعدين رجع شغل السيارة و مشينه ...

- حَبيبي وين رايحين؟

- ممكن تبطلين هالأسئلة؟

- تمام

سكتت و هو شغل أغنية " غزال من ينصادي " خليجية حييل حلوة أول مره أسمعها ...

- يا مَكثره في فؤادي الودادِ
زولٍ غَيب أزوال

- ياني على المرادي متهادي
يا مَرحبا بهالفال

- لأجلها أخط أمدادي رَدادي
حُب و غَلا و إجلال

- لِـعشگها هَب عادي أسيادي
روسٍ ماهُم بأذيال

- كلش حلوة الأغنية

- إي تخبل

- أنت تحبها مو؟

ألتفت عليه و أبتسم ...

- بَس من أسمعها وياچ أحبها

- ليش؟

- لأن أحس بكُل حَرف بيها

ابتسمت و حچيت ...

- رافد شلون چنت عايش قبل متتعرف عليه؟

- يعني ضروري تعرفين

- إي

- أحچيلچ و متزعلين؟

- إي

- شوفي ، گبل ما أتعرف عليچ ، نوعًا ما چنت طايش ، اللي يهمني بَس نفسي و شلون أتونس ، چنت أتعرف على بنات هواي و أحاچيهن ع النت و بالواقع ، ابقى وياها أسبوع بالزايد أسبوعين و بعدين أزحلگها ، أدري هالشي غلط بَس ما چنت مستوعبة گتلچ چان همي الوحيد هو ونستي ، شغلي چنت هاملة أكثر المرات ما أروحله ، الشغل چانو مستلمينه فرات و صگر و عمي و أبوية مرات يروحون يتفقدونه ، أبوية حچه ويايه چثير و طلب مني أعوف هالطريق و أعقل بَس آني ما چنت أسمع منه و هو ما ضغط عليه ما أعرف ليش

- و شلون تغيرت بعدين؟

- من شفتچ ، والله من أول ما شفتچ كرهت هاي السوالف الچنت أسويها كُلها ، گلبي راح صوبچ و صار كُل همي ألفت أنتباهچ ليه بدون ما أتجاوز الحدود وياچ و صارت و هَسه أنتِ خطيبتي و همي الوحيد هَسه أنتِ و شغلي ، أريد أكمل الفلوس بأسرع وكت علمود نتزوج و تصيرين يمي

- آني أنتظرك ، أبقى أنتظرك لو العمر كُله

- لا حياتي بالزايد سنة أنوب و نتزوج إن شاء الله

- إن شاء الله

- يلا و هاي وصلنه

- للسوگ؟

- إي

- ليش؟

- جبتچ تا تشترين كُلشي تحتاجينه ، لأن أدري بيچ أنتِ حَتى لو تحتاجين ما تگُليلي ، بعدچ ما مستوعبة أنچ صرتي مسؤوليتي

أبتسمت و گال يلا ننزل ، نزلنه و مدلي إيده ، لزمها و مشينه ، أخذت كُلشي أريده و حَتى اللي ماريده خلاني آخذه ، الملابس اللي أخذتهن على ذوقه ما توقعت ذوقه يطلع هيچ حلو

واگفين دنحاسب و أنتبهت لواحد يباوع عليه من فوگ الى جوه ، أنقرفت من نظراته كلش ، باوعت لـ رافد يباوعله بخزره ، حاسب و طلعنه و هَم لزم إيدي و مشينه بَس چان طول الطريق ساكت و ضايج عكس لمن طلعنه من البيت ، بَس ما راد يحچي و يضوجني

***

عبدالله
طلعت للحديقة و شفت ريان واگفة و تباوع للورد ، رحت يمها تحمحمت و بسرعة ألتفتتلي ...

- آسف إذا أزعجتچ

بقت ساكته و تباوع عليه ...

- ممكن السويچ مال سيارتچ ، أريد آخذها للتصليح

- فرات ياخذها

- لا ميصير ، و بعدين فرات مشغول

سكتت شوي و بعدين حچت ...

- تمام هَسه أجيبه

راحت و وره شوي أجت و بإيدها السويچ ...

- هاك

- عاشت إيدچ

نطتني ياه و أندارت حَتى تروح ...

- أسمچ ريان مو؟

التفتت عليه و هزتلي براسها و فاتت جوه ، أخذت السويچ و صعدت بالسيارة ، خليتها بالتصليح و رجعت بتكسي

***

عشق
صار الليل و آني گاعدة بغرفتي ، دزلي رسالة فرات يريدني أروحله لغرفة المكتب ، رحت و دگيت الباب و فتت ، لگيته گاعد و عيونه بالابتوب من فتت رفع راسه و باوعلي ...

- مو گلتي تساعديني ، شو غلستي يابة

- مو مدري شوكت نبلش

- ديلا أگعدي

گعدت و هو ملتهي بالابتوب ، ساعة يباوع عليه و ساعة يكتب ...

- هَسه آني شسوي؟

- أمممم شتسوين ، شتسوين ، إي هاچ

قدملي الاوراق و القلم و گالي ...

- أگتبي اللي أگُلچ عليه

- تمام

صار هو يشرح و آني أكتب لحد ما خلصنه وره تقريب ساعة ، حچه ...

- تمام هَسه خلصنه المادة اللي راح نشرحها ، ظل نسوي بروڤا

- بروڤا؟

- إي ، مو گلتي ما أعرف أشرح ، هَسه تگومين و شنو كتبناه هَسه تشرحينه كأنما گدامچ الطلاب و أنتِ جاي تشرحيلهم فد درس مُعين

- مو ما أعرف

- هَسه گومي و آني أعلمچ اللي ما تعرفينه

گمت و أخذت الأوراق و صرت أشرح و هو يعلمني و ينبهني على شغلات ساعة يگوم هو يشرح وياي و يگُلي سوي هيچ و هيچ لحد ما تعبت ...

- فرات تعبت

- خلص كافي ، أصلاً تعلمتي

- صدُگ يعني شرحي زين؟

- إي ، باچر طبقي كُلشي تعلمنا هنا و بَس

- تمام

- يلا روحي نامي

- و أنت؟

- آني عندي شوي شغل أكمله و أروح

- تمام تصبح على خير

- و أنتِ من أهله يـَ عگال راسي

أبتسم و گالها ، آني هَم أبتسمتله و رحت لـ غرفتي ، تمددت على چربايتي و آني أفكر بباچر لحد ما نمت

گعدت الصبح ، گمت من فراشي و رتبته و رحت توضيت و صليت و بعدين بدلت و لبست رسمي عجبني ألبس رسمي ، أختاريت بنطرون زيتوني فاتح و وياه سترته هَم زيتوني فاتح و طويلة شوي و قميص ابيض ، أختاريت وياه شال أبيض و حذاء ابيض هَم عالي شوي حَتى من أوگف بصف فرات أبين شوي طويلة و لو آني لو وگفت يمه أطلع قزمه مابيها مجال
طلعت من غرفتي و سديت الباب ، باوعت فرات هَم توه طلع من غرفته ، وگفت و صفنت عليه هو هَم صفن عليه و أبتسم ، لابس رسمي ، قلييل اشوفه لابس رسمي كُله لو كاجول لو زي عربي ، چان لابس قاط جوزي غامق و القميص أسود طالع يجنن عليه ، أجه يمي ، حچيت ....

- صباح الخير حَبيبي

- صباحي عيونچ الحلوة

- أمممم ، طالع كُلش حِلو

- إذا آني حلو فـ أنتِ تگولين للگُمر غيب و آني أگعد بمكانك

- اوووف دائمًا تغلبني بالغزل

- چا شعبالچ عَجل

- هههههههه شنو هاي لهجة جديدة

- إي آني أطبگ لهجات و اسويهن لهجة وحدة

أنتبهت فاتح الـ 3 دگم الأولى من القميص ...

- شدعوة فاتح 3 دگم سد وحدة

- مگدر أحس نفسي أختنگ

تقربت منه و سديتله دگمه ...

- تره مو بَس أنت تغار من البس فد شي ميعجبك ، هَم آني ، و لا تنسى الكُلية بيها بنات

- بَعد حجبيني هَم مو أحسن بَعد عُمري

- لو يصير چان حجبتك

- هههههههه ، ماشي إذا غيرة فـ ميخالف ، يلا خلينه ننزل نتريگ و نطلع لأن تأخرنه

- تمام

نزلنه و رحنه للمطبخ لگينه الكُل مچتمع هناك ، صبحنه عليهم و گامت جده صفيه وگفت گدام فرات و شالت عليه العوچيه بمعنى أوگف ، وكف هو ...

- هاا جده أكو شي؟

باوعتله من فوگ الى جوه ، دگت عوچيتها بالگاع و حچت ...

- والله العظيم أنت ما تستحي

- رحم الله والديچ جده ، بَس ممكن أعرف ليش؟

- شنهي هاي هدومك ، دلبس هدوم مال اوادم ، دشداشة و شماغ و حط هالعگال على راسك ، هاي هدوم أهلنه الحلوة ، مو هاي هدومك

- جده تره رايح لكُلية مو مضيف تا أتعگل

عَلي : عمه زمانهم يختلف عن زمانكم ، هَسه كُلشي يختلف

رحنه گعدنه و هي گعدت و حچت ...

- إييييه والله يوليدي الزمان صار يخوف

***

شهم
گعدت من النوم ما ادري شلون غفيت البارحة ، رفعت راسي و باوعت لـ مُهره بعدها نايمة ، گمت و أحس ظهري مكسر تكسر بالگوة وگفت ، باوعت لتيلفوني لگيت ابوي دازلي رسالة يبلغني أنهم رجعو للبيت لأن أمي تعبت ، گمت طلعت بره غسلت و توضيت و صليت و رحت جبت عصير لأن دايخ كلش و مالي نفس للأكل ، رجعت للغرفة و گعدت يم مُهره ، وره ساعة و صحت ، فرحت لأن الدكتور گال 3 أيام و تصحى بَس هي صحت من ثاني يوم ، فتحت عيونها و باوعتلي ، حچت بصوت تعبان ...

- أكبر ، رجعت أكبر؟

- أوگفي هَسه أجي

گمت و رحت صحت الدكتور لأن گالي من تصحى صيحني ، أجه و فحصها و طلع طلعت وراه ...

- هاا دكتور شلونها؟

- لا الحمدلله وضعها أحسن

- زين دكتور أنت گلت وضعها حساس ، و هي تظل تسأل عن أبنها و آني أحير شجاوبها ، أخاف أحچي كلمة و ترجع تنفعل و يصير بيها نفس المره الأولى

- باوع أنت لا تصدمها بالحچي و لا تأملها ع الفاضي ، حاول تجاريها أو تغير الموضوع بَس على ما تتجاوز هالمرحلة و بعدين هي تفهم من وحدها

- تمام ، زين شوكت نگدر نطلع؟

- اليوم خليها يمنه نتطمن عن وضعها أكثر و باچر توكلو

- خير إن شاء الله

رجعت دخلت للغرفة لگيتها تباوع للسگف ، گعدت يمها و ألتفتتلي ...

- ماكو أخبار عن أكبر؟

- بَعد ماكو شي لحد الآن ، أنتِ أرتاحي حياتي و عوفي هالموضوع

غمضت عيونها بقوة و رجعت فتحتهن و باوعتلي ...

- أريد مي

- إي صار

گمت و رفعت راسها شوي و شربتها مي و رجعتها ...

- مشتهيه شي ، أجيبلچ أكل تاكلين؟

- لا مالي نفس

- باعي بَس فواكه علمود متدوخين

- ما أگدر والله

- لخاطري

- تمام

- چا آنـه أروح أجيبلچ و أجي ما أتأخر

هزتلي براسها ، عفتها و طلعت جبتلها موز و برتقال و رجعت ما تأخرت ، وصلت الغرفة لگيت الباب مردود ، آني أتذكر طبگته ، بسرعة فتحته و فتت باوعت لمكان مُهره ما موجودة ، تخبلت ، ذبيت الفواكه و طلعت رحت للصحيات بَس المشكلة مال نساء ما أگدر أفوت ، مرت من يمي ممرضة گلتلها تفوت تشوف إذا أكو أحد بيها او لا ، فاتت و آني بقيت أنتظرها على أعصابي ، وره شوي طلعت و گالت ماكو أحد ، فقدت أعصابي و صيحت عليها ...

- شللووون مااكووو شلووون فهممينييي ، عفتتهااا دقاايق بالغررفة أجيي و ما ألكاااها شلووون؟؟؟؟

- و آني شعليه شمعرفني وين راحت

حسيت على نفسي و أعتذرت منها و مشيت أدورلها بالممرات ، مشيت شوي و لگيتها تمشي و إيدها ع الحايط ، بسرعة رحتلها و جريتها من إيدها ، ردت أصيح بيها بَس تذكرت وضعها ، هدأت و خليت إيدي على وجهها ...

- ليش تطلعين من الغرفة يا عُمري مو گتلچ ما أتأخر ، هبطتيني و علي

- مو شهم باوع ، سمعت صوت بچي مال طفل ، هذا أكبر أبننا

- أمشي نرجع للغرفة

- مو خاف جوعان و يبچي فدوة خل نشوفه

- أكبر مو هنا حَبيبتي ، أمشي

- لعد وين؟

ما جاوبتها و گدتها و رحنه للغرفة ، نيمتها ع الچرباية و گعدت فتحتلها موزاية و نطيتها ألها ، أكلت منها شوي و رجعتها ، ردت أسويلها برتقال بَس ما قبلت ، حطت راسها ع المخده و دارت وجهها للجهة الثانية ، تقربت منها و بستها من راسها ، بقيت أمسح عليه لحد ما غفت

***

عشق
دخلنه للمحاظرة و سلمنه ع الطُلاب ، بالبداية بلشنه نحچي وياهم عن هالموضوع و نشوف آرائهم بي ، شاركو و گالو آرائهم و عرفناها شنو و بلشنه نشرحلهم المادة اللي حضرناها البارحة ، تناوبنه ع الشرح آني و فرات ، هو يشرح شي و آني أشرح شي ، أباوعله كأنما دكتور جامعي ، يشرح و يكتب و طريقة شرحة سلسة و مو مُعقدة ، أنتبهت لبنات اثنين چانن طول الوقت عينهن عليه و يتهامسن بيناتهن ، گمت افور من داخلي و أدعي تخلص هالمُحاظرة بسرعة علمود نطلع و ما أسوي شي يفشل ، وره تقريب فوگ النص ساعة كملنه و تشكرنه منهم و طلعنه ، رحنه وگفنه بالحديقة ، حچيت ...

- شرحك كُلش چان حلو

- أنتِ هَم خوش شرحتي و قدمتي الموضوع

- لو صاير مُدرس أو دكتور جامعي أحسلك

- لا غدي يمعودة شلي بهالدوخة

- هههههههه

وره شوي أجن نفس البنات اللي ضجت منهن بالمُحاظرة ، تقدمت وحدة و حچت ...

- مرحبا

نزع النظارة فرات و جاوبها ...

- أهلاً و سهلاً

- حضرتك فرات مو؟

- إي

- آني غيداء من الناصرية و أدرس هنا

- تشرفت بيچ

- كلش حبيت طريقة شرحك للموضوع و سوالفك و لطافتك ويانه ، خليتنه نفهم الموضوع بطريقة كلش حلوة

- فرحني هالشي

- ممكن آخذ رقمك حَتى نتناقش أكثر عن هالموضوع و ممكن بمواضيع ثانية؟

لا هنا ما گدرت اتحمل و ألزم نفسي ، حچيت و آني خازرتها ...

- حَبيبي خلينه نمشي تأخرنه

حاوطت إيدي على زنده و حچيت وياها و آني أمشي ...

- من رخصتچ حَبيبتي

مشينه و حچه فرات ...

- أگُلچ هاي مو چنها رقمتني لو آني متوهم؟

- اووووف والله ردت أچفص ببطنها هالحقيرة ، شلون تحچي وياك بكُل أريحية ، لا و فوگ كُل هذا طلبت رقمك ، شهالصلافة يا الله؟؟!

- ههههههههه ، أروح فدوة للي يغار عليه

سكتت و وصلنه للسيارة ، أباوع لـ فرات نزع النظارة و أرتچه ع السيارة و حَط إيده على گلبه ...

- شبيك حَبيبي؟؟

عض على شفته السُفلية و بعدين حچه ...

- مابيه شي حياتي ، يلا اصعدي

لبس النظارة و راح صعد و آني صعدت ...

- اليوم أريد اغديچ بالمطعم ، شرايچ؟

هو يحچي و آني صافنه و أفكر شبي فرات شنو اللي ديصير وياه ، حچه ...

- الووو يحلوو ، شرايچ؟

- هااا ، بشنو؟

- گلت نروح نتغده بالمطعم

- بكيفك

- خوش

حرك السيارة و مشينه

***

رافد و نَفس گاعدين بالهول و رافد يإيده موبايل نَفس يگلب بالصور اللي أخذوهن قبل شوية ، اثناء ما هو جاي يگلب جت رسالة ع الواتساب ، هو ما راد يفتحها بَس اللي ثار فضوله و خلاه يفتحها أنُ الرقم ما مسجل ، فتحها و أنصدم باللي مكتوب ، واحد داز كومة رسايل لـ نَفس ، غزل أشكال و حچي مينگال و ما يلبس عليه عگال و فوگ كُل هذا واصف جسمها بأدق التفاصيل و بالأخير كاتب ( الظاهر هالمرة ما عجبچ الحچي نَفس المره الاولى لذلك ما رديتي ) رافد قره هالحچي و تخبل عيونه صارن بگصته ، گام على حيله و صاح ...

- شنووو هالتممضرررط يووليي؟؟؟؟ ...

********

يتبع ...

شنو تتوقعون شراح يسوي رافد؟
++ تعالو نحچي بخصوص مُهره ، فهموني ليش بالبداية تكرهونها و هَسه حابينها و متعاطفين وياها😂؟ على فكرة تره ميحقلكم تكرهونها لأنها مو شريرة و ما أذت أحد نفس ريان ، هي كُل اللي سوته ما حبت شهم بالبداية و قهرته ، إذا تجون ع المنطق فـ هذا من حقها يعني هي مو بإيدها ، حطو نفسكم بمكانها شلون ترتبطون بشخص أنتو ما تحبونه و لا هاوي گلبكم ، آني وياكم صَحيح قهرت شهم و كُلنه أنقهرنه على قهره بَس هذا الشي مينطيكم الحق تكرهونها و تحچون عليها ، تفكيركم مو منطقي يا حبايبي🌚 ، تدرون من شفت حچيكم على مُهره ببداية الرواية ضحكت و گلت باچر تغيرون رايكم و فعلاً تغير😂😭 ، إي فـ لا تحكمون من البداية تأنو
و هَسه اودعكم و نلتقي بالبارت الجاي

18.kij
تعالو أنستا حبايب و شاركو بالآسك اللي منزلته بالستوري ، أي شي تريدونه يخص الرواية أو غيرها

سحر الدليمي