رواية عشگ الفرات ( عِندما تَهوى القُلوب ) الفصل الرابع والأربعون 44 - بقلم سحر الدليمي

هلو شلونكم هالمره ما تأخرت عليكم بسرعة نزلت البارت ، يلا عاد أنتو لا تقصرون بالتفاعل لأن هالأيام تفاعلكم صاير حييل ميعجبني و هالشي يقهرني
لا تنسون التصويت و التعليق بين الفقرات
قراءة مُمتعة ♥️.

- ما بالُ قَلبي تَركَ هواءَ رَبي و أكتفى بـِ هواكِ ؟

*****

- جبتلك عصير ، أكيد تعبان ، هاك أشرب

ظل صافن بوجهي لا حچه و لا أخذ العصير ...

- شنو ما راح تاخذة؟

مد إيده و أخذ العصير ...

- شُكرًا

- بالعافية

ظليت واگفة يمه لحد ما تأكدت أنه شرب من العصير ، أندار عليه ...

- شو واگفة ، محتاجة شي؟

- هاا لا رايحة

عفته و رحت تا أدخل للبيت و صارت عشق بوجهي ، رادت تفوت بَس وگفت گدامها ، أبتسمت و حچيت ...

- مبروك ، سمعت عرسكم قريب

- إي قريب كُلش ، فرات مستعجل رايد نتزوج بسرعة

- إيي تتهنون إن شاء الله ، بَس هااا ديري بالچ عليه زين تره فرات غالي عليه

عشق
گالت هيچ و فاتت جوه ، غالي عليها؟؟ ، لا هاي أكيد ناوية تغيضني و تضوجني لأن عرسي قريب ، رحت لـ فرات لگيته واصل و گاعد بالحديقة ...

- شنو چانت تسوي يمك ريان؟؟؟

- هَسه دگعدي و خل نتفاهم

- گعدت ، يلا أحچي شنو چانت تسوي يمك؟

- هَسه أنتِ ليش تغارين منها هالگد ، مو أتفقنه مالچ شغل بيها و لا تنطينها أهتمام

- شتحچي أنت فرات !! ، خطيبي و حَبيبي و قريبًا راح تصير زوجي مو يحقلي أغار عليك؟

أبتسم و لزم إيدي ...

- غاري يـَ بَعد هلي ، جعل محد يغار عليه غيرچ يـَ عگال راسي

- صارلك فترة تگُلي هالحچاية و كُل ما أريد أسألك أنسى ، شنو معناها؟

- دحگي ، العگال عند العرب شي مميز و له مكانته و ثگله عند اللي يلبسه و أنتِ سميتچ هيچ عبنچ شي چبير بالنسبة ليه

- شگد حلوو

- شنو؟

- أنت

- ههههههه صايرة تتغزلين يولي

- شعبالك قابل بَس أنت تعرف تتغزل ، والله أشبعك غزل

- والله خوش

- إيي نسيت أگُلك

- شنو؟!

- سمعت خالو جسام يگول عمتي راح تجي علينه اليوم ، ليش عمتهم بعدها عايشة؟

- هاااا ، إييي بعدها عايشة ، جده صفية ، اليوم راح تجي؟

- إي سمعته گال اليوم تجي

- إي زين ، بَس دحگي عشگ

- هااا؟

- شوفي خاف تسمعچ فد كلمة كلمتين يضوجنچ عبريهن ، لأن هي مَره چبيرة و هذا طبعها تحچيها طگ بطگ و ما تحسب حساب أحد ، فـ أنتِ سايريها و متأكد راح تحبينها لأن گلبها طيب

- أنت تحبها؟

- ليش تسألين؟

- هَسه دجاوب

- إي أحبها

- تمام مدام أنت تحبها آني أحبها على حُبك ألها حَتى لو چفصت ببطني مو بَس ضوجتني بالكلام

گرصني من خدي ضحك و حچه ...

- ههههههه فديت أم عقل الچبير

- آني فديتك حَبيبي

- صدُگ نسيت أسألچ ، شعندچ اليوم بالكلية؟

- مو شوف ، دكاترة قسمنه سوو تجمع ألنه و ألهم فـ دعونه نحضره يعني شلون الوداعية

- مو ودعوكم بحفلة التخرج؟!

- مو كُلهم چانو حاضرين و الطلبة هَم أكو بيهم ما أجو

- هااا ، و تخرجت حَبيبتي و صارت خريجة و قريبًا راح تصير عروس

- عروس لأحلى شاب بالدنيا

- اليوم طاگ عدها عرج الغزل ، حالفة تظل تتغزل بيه

بوزت و سويت نفسي ضجت من كلامة ، حچيت ...

- يعني ما عاجبك أتغزل بيك؟

حَس أني ضجت ، ابتسم و حچه ...

- يابة والله لو تظلين تتغزلين بيه منا لسنة ما أمل

أبتسمت چنت أعرف ميحب يزعلني أو يضوجني بَس هَس تأكدت ...

- لعد يلا خل نفوت جوه و هَم ترتاح

- إي والله حييل تعبان

گمنه و فتنه جوه ، راح توضى حَتى يصلي و آني رحت أحضرله غدة لأنه ما متغدي ، حطيت الأكل ع النار شوي و حمى نزلته و صبيته و خليته ع الميز ، أجه فرات گعد ...

- عاشت إيدچ حياتي

- بالعافية

ردت أطلع و صاحني ...

- وين رايحة؟

- هناا

- ظلي يمي

- تمام

رجعت جريت كُرسي و گعدت يمه ، هو ياكل و كُل شوي يباوع عليه ...

- حَبيبي

- گولي عُمري

- من نتزوج وين راح تاخذني شهر عسل؟

- هو شنو هذا شهر العسل ينوكل مو؟

- أوووف ، حَبيبي أنت ليش ما هامك غير بطنك

- شعندي غير بطني

- لا والله !! ، لعد آني وين رحت؟

- أنتِ ببطني ، أهووو أقصد بگلبي

- ما شاء الله عاجبك تاكلني يعني

- والله جاي أفكر بالموضوع ، لأن اللي گدامي عسل مو بنيه

- أحممم لا تغير الموضوع تره جاي أحچي جد

- جد لو عم

- فرااات والله راح أگوم

- لا لا خلص أگعدي ، يعني أنتِ رايدة نروح شهر عسل؟

- إيييي

- صار تدللين

- إيي و وين راح نروح

- وين ما يعجبچ أنتِ

- أممممم عاجبني أروح للسعودية

- دخيلك يا الله ، أول مره أشوف بنيه ما تريد تروح لتركيا

- هو شوف آني أحب تركيا بَس عاجبني أروح بشهر العسل للسعودية

- متدينة ما شاء الله

- يعني ميروح للسعودية بَس المتدين !!

- لا كُلها تروحلها ، خلص للسعودية ، للسعودية ، و منه هَم أشوف صديقي صارلي هواي ما شايفة

- منو صديقك؟

- خالد ، متعرفينه

- و شيسوي بالسعودية؟!

- هو سعودي

- هاااا ، و هذا وين لگيته و تصادقتو؟

- أنتِ شنو جاي تحققين وياي ، إذا إي فـ گولي تا أعرف أني گاعد گدام ضابط تحقيق

- لا حَبيبي بَس آني فضولية أحب أسأل ، هَسه يلا أحچيلي شلون تعرفتو على بعض؟

- هُمه چانو ساكنين هينه جيرانه يعني ، نعرف بَعض منه زغار معرفة عائلية يعني مو بَس آني وياه ، بَس بأحداث داعش رجعو للسعودية

- هااا ، و ليش ساكنين هنا؟

- شغلهم و أملاكهم هنا

- هااااا

- إييي ، الحمدلله

- هاااا متاكل شو گمت

- شبعت الحمدلله

- بالعافية حَبيبي

- الله يعافيچ

راح يغسل و آني لميت المواعين ، شوي و أجه گال آني راح أروح أنام لحد يگعدني ، عافني و صعد لغرفته ، كملت و رحت گعدت ويه ماما و خالة و البنات ، وره تقريب الساعة وصلت جده صفيه ، أستقبلناها و سلمنه عليها كُلنه ، گعدنه كُلنه بالهول وياها ، هي صَح مثل ما گال فرات ما تحسب حساب أحد و تحچي كُلشي بَس مبينه كُلش محبوبة و سوالفها حلوة ، صار وكت العشة و راحن ماما و خالة هنه يسونه و أحنه بَس نساعدهن ، كملنه العشة و صبيناه و الكُل تعشه و گعدنه نتعلل ، حچت جدة صفية ...

- يولو عَجل هذا الآخر وينه

بدور : منوه عمه؟!

- هذا أبنكم فرات مدري دجلة

ضحكنه و حچه خالي عَلي ...

- فرات عمه فرات

- إي هو هذا ، وينه عجل؟

حچيت آني : نايم جده

- منهو أنتِ يولي؟

بدور : هاي بنتي عشق عمه ، و خطيبة فرات

- هااا ، روحي يولي ناديلي خطيبچ هذا الما يستحي ، ما يگول أجي أسلم على جدتي أشوفها شحالها ، بَس هو أنتو جيل هالوكت مابيكم خير ، عوذة إي والله

ضحكت على حچيها بَس لزمت ضحكتي لا ترزلني ، عفتها تحچي و تطگ بعوچيتها بالگاع ، رحت صعدت لـ فرات ، فتحت الباب و فتت ، لگيته نايم بَس عاگد حواجبه ، تقربت من يمه حَتى أگعده ...

- فراتي

گلت هيچ و هو يفز و يجرني عليه ، حضني بكُل قوته خلاني أحس بدگات گلبه القوية و أنفاسه السريعة ، بقيت مصدومة من اللي سواه ، ما يقارب الدقيقة و هو حاضني و يتنفس سريع ، آخر شي حچيت ...

- فراات ، شبييك؟؟؟

أبتعد عني و هو يمسح بعرگه ، عيونه حُمر دم و يتلفت هنا و هنا ...

- فراات ، هاييي شبييك؟؟ ، أحچيي مو خبلتنيي !

بلع ريگه و حچه بصوت مبحوح ...

- شفت حلم ، لا مو حلم كابوس إي إي كابوس

- أهده حَبيبي تعوذ من الشيطان

أخذت الگلاص و صبيتله مي ...

- هاك أشرب مي

أخذ الگلاص و شربه كُله بمره وحده ، رجعلي ياه و حط إيده على گلبه و صار يتعوذ الشيطان ...

- فرات شو باوعلي

رفع راسه يباوعلي ...

- شنو الحلم الشفته؟

- ما أدري ما أتذكر ، بَس چان موزين

- أوگف لحظة هَسه أجي

نزلت جوه و رحت لخالة وگفت يمها و شاورتها گتلها گومي ، كامت وياي و صعدنه الدرج ، حچت ...

- شبيچ عشق شكو؟

- فرات ما أدري شبي

وگفت و أندارت عليه ...

- شبي؟؟؟

- مادري رحت أگعده و فز مفزوع من نومه ، يگُلي شفت حلم موزين

سكتت و مشت سريع ، وصلنه الغرفة و دخلنه لگيناه متمدد و مغمض عيونه بَس يرجف ، جسمه كُله يرجف ، گعدت يمه خالة ...

- فرااات شبييك ماما ليش ترجف !!

ما جاوبها و هو مغمض عيونه ، حطت إيدها على راسه ...

- جسمه بارد ثلج ، عشق حَبيبتي طفي السبلت

رحت بسرعة طفيت السبلت و خالة غطته زين ، رجعت حطت إيدها على راسه و صارت تقره قرآن بصوت عالي ، حچه ...

- لتقرين يوم

خاله أستغربت و آني هَم أستغربت ، ألتفتت تباوعلي و بعدين رجعت تباوعله ...

- قرآن هذا ماما ، هَسه ترتاح عليه

- ماريد أسمع لتقرين

سكتت خالة بَس بقت تقره بگلبها لحد ما غفى ، طفت الضوه و طلعنه ...

- شبي فرات خالة؟

- والله ما أدري يبنتي

رجعنه گعدنه ، حچت جده صفيه و هي تباوع لـ صگر اللي ملتهي يگلب بتيلفونه ...

- و أنت يول ما ناوي تثني؟

رفع راسه و باوعلها ...

- وياي جده؟

- إي عَجل ويه أبويه

- ما سمعتچ

- گتلك ما ناوي تتزوج أنوب

اباوع لـ رُسل ضاجت من كلامها كُلش و تباوع لـ صگر ، ضحك و حچه ...

- لا جده ماريد

- ليش يول ، أخذلك بنيه جديدة تونسك

ألتفت على رُسل و حچه و هو مبتسم ...

- ما حاجة عندي أم سيف تسوه الف مَره

أبتسمتله رُسل ، حچه خالي جسام ...

- عمه أنتِ ماعندچ غير سالفة الزواج

- أنت أسكت لا تحچي ، بَس أصبرلي شوية أله ازوجك

ضحك خالي من كُل گلبه ...

- يمعودة دگولي يا الله ، راح أزوج أبني و أنتِ تگُليلي أزوجك

- إي مابيها شي تزوج أنت و أبنك سوه

ضحكنه كُلنه ، حچت و هي تباوع لـ نَفس ...

- منهي هاي البنيه يولو

رافد : جده هاي نَفس خطيبتي

- بنت منو؟

- مو منا من كربلاء جده ما تعرفين أهلها

- إييي يول دربك على درب عمك ، عفتو بنواتنه و أخذتو شيعيات

عَلي : و شبيهن الشيعيات عمه ، شو تراهن چنهن العافية

يحچي و يباوع لـ خالة نجاة ...

- إيي يابة ما گلت شي ، شفايتلي لو ماخذتلي واحد شيعي و رايحة للعمارة لو لـ هاي مدري شيسمونها ناصرية مدري شني ، مو أخير من مگابلت وجوهكم ، بَس وين تاليتي أخذت سليمان و ما طول وياي خمس سنين و سلمها للكريم

صگر : إيي جده عاجبچ تتزوجين شيعي ، يلا من باچر أدورلچ شايب و ازوجچ له و ياخذچ غادي للجنوب

- عفيه بوليدي السبع ، والله بَس أنت بيك خير

رُسل
نعست و گمت رحت لغرفتي تا أنام و منه أخلص من حچي جده صفيه اليضوج ، دحگت على سيوفي بعده على نومته ، شوي و دخل صگر ، جه گعد يمي ...

- خوما ضجتي من حچي جده صفيه؟

- والله ضجت ليش أچذب عليك

- ليش تضوجين يا گلبي ، مو تدرين بيه مستحيل أسويها و أبدلچ بوحدة ثانية

- أدري و أصلاً هذا اللي مطمني

أبتسم و ظل ثواني يدحگ بعيوني ، حچه ...

- مشتاگلچ گد رحمة الله

- و آني هَم مشتاگتلك يـَ روحي

تقرب مني و باسني بشفايفي ، نزل على رگبتي و باسني منها ، جرني عليه و حضني خله راسي على صدره ، سحب القراصة و فتح شعري ، حچه و هو يمسح عليه ...

- من أكون وياچ بالغرفة شعرچ أريده يظل مفتوح لا تشدينه

رفعت راسي و دحگتله ...

- ليش؟

- أحب شعرچ ، أريدة يظل مفتوح

أبتسمتله ...

- تمام

تقربت منه حَتى أبوسه و چان يگعد سيف و يگوم يبچي ، حچه صگر ...

- بسيطة يول آني لك إذا ما طلعتك من الغرفة آني مو صگر

ضحكت و گمت رحت لـ سيف شلته ...

- صگر خطية بعده زغير

- آني هَم بعدني زغير

- هههههههه ، هااا سيادة الضابط شو تغير الحچي

- آني صَحيح ضابط گدام العالم بَس يمچ أنسى آني شنو ، و اللي يهمني بَس تكونين بحضني و طزز بكُلشي

رجع غفه سيف و رجعته بالسرير ، رحت يمه و حضنته ...

- و آني هَسه بحضنك

باسني من راسي و حضني و نمنه

***

عشق
رحت لـ غرفتي حَتى أنام بعد ما راح الكُل لغرفهم ، بَس ما گدرت أنام بقيت أتگلب بفراشي بالي يم فرات ، گمت لبست شالي و رحت لـ غرفته فتحت الباب و باوعتله نايم بعمق و مبين مابي شي ، نوعًا ما أرتاح گلبي ، سديت الباب على كيفي و طلعت رجعت للغرفة تمددت و نمت

***

مُهره
گعدت من النوم الصبح ، باوعت لگيت شهم گاعد بصفي و ناطيني ظهره ، مبين توه گاعد ...

- شهم

ألتفتلي و أبتسم بَس أبتسامته مليانه قهر و هَم ...

- صباح الخير يـَ روحي

- صباح النور

- آني فايت للحمام

- تمام

گام و فات للحمام و آني أجيت حَتى أگوم بَس دخت ، لزمت راسي و رجعت گعدت ، باوعت لمكان السرير و تذكرت أكبر ، شهم شال السرير و وداه لغير مكان لأن كُل ما اشوفه أبچي ، والله أحس دموعي نشفن من البچي ، ما يمر يوم إذا ما أبچي بي ، طلع شهم من الحمام ، مسحت دموعي حَتى ميشوفهن خطية هو هَم مو ناقصة يتظاهر بالقوة گدامي بَس علمودي و آني أعرف كلش زين هو ديتعذب مثلي و يجوز أكثر ، راح للكنتور و طلع ملابسة حَتى يبدل ، نزع البدي أنتبهت للشامة اللي بچتفه ...

- شهم تدري شغلة

التفت عليه ، حچه و هو يلبس بالقميص ...

- شنو؟

- أكبر بي نفس الشامة الموجودة بچتفك الأيمن

- صدگ والله

- إي والله

گلت هيچ و دنگت أبچي ، أجه عليه و رفع راسي و مسح دموعي ...

- لا تبچين غاليتي ، بعون الله نلگاه

- شوكت شهم شوكت؟! ، هاي صار أسبوع ماكو شي

- أصبري ، إن الله مع الصابرين

سكتت ما جاوبته ...

- آني طالع ديري بالچ على نفسچ

- وين طالع؟

- رايحين آني و أبوي للقسم نشوف بلكي الله أكو أخبار جديدة

- تمام

باسني من راسي و طلع

شهم
طلعنه آني و أبوي للقسم ، وصلنه هناك و دخلنه للضابط ، رحب بينه و گعدنه ...

- هاا حضرة الضابط بشرنه؟

- آني طلبت منكم تجون حَتى أگللكم أحنه مضطرين نقفل قضية أبنكم

- ليييش؟؟؟

- بَس أهدأ و خليني أشرحلك الموضوع

- آني هادي ، تفضل أحچي

- أنتو ماعدكم أي شي يساعدنه بالبحث عن الطفل ، يعني لا صورة لا أثباتات شخصية و فوگ هذا متعرفون اللي خاطفينه ، و أحنه لو نبقى ندور منا لأشهر ما راح نوصل لنتيجة ، لذلك الأفضل نسد القضية و لا تتأملون بشي

آني ما أستعوبت كلامة ظليت ساكت و صافن بوجهه ، حچه أبوي ...

- يعني هذا آخر كلام؟

- إي نعم

- زين ، يلا شهم گوم

گمت و حسيت بدوخة لزمني أبوي من إيدي ...

- شبيك وليدي؟

- مابيه شي

طلعنه من القسم و صعدنه بالسيارة ، خليت راسي ع الستيرن و أبوي گاعد بصفي ، حچه ...

- شد حيلك وليدي

رفعت راسي ...

- منيلي الحيل و أشدة يابة ، هَسه آني يطبني مرض ، بَس مُهره شگللها ، شلون افهمها ، أسبوع صارلها بَس تبچي ، إذا عرفت أنُ خلص بعد ماكو أكبر شيصير بيها

- ربك يعين وليدي

سكتت و شغلت السيارة و تحركنه ، وصلنه البيت و نزلنه دخلنه جوه لگيت أمي و وياها مُهره گاعدات بالصالة ، گامت و أجت يمي ملهوفة ...

- هااا شصار ، شگلولكم ، ماكو أخبار؟؟

- أنتِ ليش نزلتي هنا مو تتعبين

- أحچيلي شهم ماكو أخبار عن أكبر؟؟؟

ما گدرت اسيطر على دموعي نزلن ، گُبل أنداريت عنها و نطيتها ظهري و مسحت دموعي ، أجت وگفت گبالي ...

- ليش تبچي شهم؟!

سكتت ما عرف شگللها ، شلون بيه يا ربي ...

- أحچي شهم مو والله گلبي حيطگ

أجاها أبوي و وگف يحچي وياها ...

- بنيتي مُهره ، أنتِ أكيد عندچ إيمان بالقضاء و القدر و حكم رب العالمين

- عمو الله يخليك أحچي أبني وين

- الشرطة صارلهم اسبوع يدورون بَس ما لگوه و هُمه ماعدهم شي يساعدهم حَتى يلگونه لذلك قضيته أنسدت

- يعني شنو؟؟؟

ألتفتت عليه و أجت يمي ...

- يعني شنو شهم؟؟ ، أبني راح و بعد ميرجعلي !!

- الله يعوضنه حَبيبتي

بچت و صاحت ...

- الله يععوووضنه شنووو !! ، آنييي أريييد أبنييي ، رجعووليي أكبررر ، رجعلييي ياااه شههممم

گعدت بالگاع و صارت تبچي بحرگة ، گعدت يمها و حضنتها ، تبچي و تشاهگ حَتى متگدر تحچي ، شوي و أختفى صوت شهگاتها ، وخرتها عن صدري و باوعتلها لگيتها فاقده

***

صگر : يوم فرات ما گعد؟

- لا بعده نايم ، روح شوفه وليدي آني طالعة ويه أبوك ينتظرني بره مگدر أتأخر عليه

- إيي طالعة موعد غرامي ويه حبيب الگلب ، نسيتي فرات و أخو فرات

- آخخ منكم أنتو و سوالفكم

- ههههههه

راحت أمي و آني صعدت أشوف فرات ، دخلت لگيته نايم ...

- فررااات ، فراااات ، گوم الساعة بالتسعة يمعود

رفع راسه و دحگ عليه ...

- خير شكو؟

- ماكو شي گوم أگعد

گام و رچه ظهره ع الديكور ...

- شلون صرت؟

- ليش آني شبيه !

- مادري يگولون البارحة صرت موزين

- هاي آني؟؟؟

- لا أبوية

- شبي أبوية؟؟؟

- أووووف ، فرات ركز وياي ، جاي أسألك لأن البارحة أمي تگول چنت ترجف مادري شنو

- مابيه شي يابة ، أنت حلمان

- يجوز ، يلا گوم

- گايم

عشق
واگفة بالمطبخ أفكر بـ فرات ، ليهسه بعده نايم ، خاف بي شي ، هَسه شلون أروح أگعده لو اخلي هو يگعد ، أجاني صوته من وراي ...

- صباح الخير يـَ حلوه

ألتفتت عليه و أبتسمت ...

- صباح النور

جر الكُرسي و گعد ...

- أريد ريوگ حَبيبتي

- من عيوني

- تسلملي العيون و راعيتهن

حضرتله الريوگ و حطيتله ياه ...

- تريد چاي لو حليب؟

- بكيفچ

- حصبلك حليب

- تمام

صبيتله حليب و حطيته گدامه و گعد ياكل و آني أباوعله و مركزة بحركاته اللي تاخذ گلبي ، حچيت ...

- شلون صرت؟

- هاي ثاني مره تسألوني هالسؤال ،بالبداية صگر و هَسه أنتِ ، تره مابيه شي والله

- أعرف حَبيبي بَس البارحة چان وضعك مو تمام فـ ردت أتطمن عليك

- ليش شصارلي البارحة؟!

صفنت عليه ، شنو هذا ناصب عليه لو شنو ...

- البارحة لمن شفت حلم موزين و بعدين صرت ترجف

- متوهمين يابة ، ما أتذكر صارلي هيچ شي

سكتت عنه و آني أفكر بوضعه ، شنو معقولة ميتذكر اللي صارله البارحة !! ، دگ تيلفونه و جاوب ...

- هلا عبدالله ، إي موجود بالبيت ، صدُگ والله؟ ، و ليش ما خابرتني من زمان يول ، إي زين حياك الله حَبيبي

سده و خلاه ع الميز ...

- هذا عبدالله ، جاي للأنبار و يريد يجي علينه

- هااا حياه الله

عبدالله
وصلت بيت المهيوب ، جاي أطبگ السيارة و ما أدري شلون أصتدمت بالسيارة اللي گدامي ، بسرعة نزلت حَتى أشوفها ويه ما نزلت و چان تنزل بنيه من السيارة ، چانت معصبة و عاگده حواجبها ، أجت و باوعت للضربة مال سيارتها ، رفعت راسها و باوعت عليه ...

- أنت متشووف ، شلوون هيچ ضرربت سياارتيي ...

********

يتبع ...

القفلة حلوه تره🌚 ، برأيكم شراح يصير ويه عبدالله بعد هالحادث؟ + أستعدو الأحداث اللي جاية ناار🔥
نلتقي بالبارت الجاي ، أستودعكم الله💜

سحر الدليمي