رواية عشگ الفرات ( عِندما تَهوى القُلوب ) الفصل السادس والأربعون 46 - بقلم سحر الدليمي

شلونكم؟
لا تنسون التصويت و التعليق بين الفقرات
قراءة مُمتعة ♥️.

*****

- الله لو يبتسم و تضحك ذيك العيون
قسم بالله لا أحبه فوگ العمر عمرين .

*****

نَفس
أباوع لـ رافد ، يباوع للموبايل و عگد حواجبه ، ملامحة تغيرت 180 درجة ، گام على حيله و صاح بصوت فززني ...

- شنووو هالتممضرررط يووليي؟؟؟؟

يباوع عليه بنظرات حادة و لا مَره شفتهن بعيونه ، آني أحس أنبلع لساني گمت ما أعرف احچي ، صاح ...

- موو جاااي آكل ووحلل ويااچ و أسأللچ شنوو هذذاا؟؟؟

- شنوه؟ ، والله ما أعرف شنو دتحچي شبيك رافد؟

- الله ياااخذ رااافد الله يااااخذه ، يوليي شنوو هذاا؟؟

قدملي الموبايل و حَطه گدام وجهي ، شفت رسايل كومة من هذا اللي راسلني قبل و حظرته ، بَس شلون رسايل تفشل حَتى متنقري ، آني من شفتها خجلت كلش و نزلت راسي و حچيت ...

- والله ما اعرفه رافد والله

- شلووون متعررفيينه شلوووون؟!

- وداعتك ما أعرفه

لزمني من زندي بقوة و جرني عليه ، حچه و هو صاك على أسنانه ...

- و تچذبييين عَليييهه هَمم ، عَجلل و هاااي الرساايل شنوو ، موو جااي يگُلچ ماا رديتيي نفسس ذييچ المرره ، يععنيي رااده علييه و حااچيه ويااه و جااي تچذبيين علييه و تگُليلليي ما أعررفههه

آني ما أتحملت گمت أبچي ، بهالأثناء دخل صگر و وراه عمو جسام ، صگر شاف رافد لازمني من إيدي و يصيح عليه ، تخبل أجه دفعه من صدره و وگف بيناتنه و صاح ..

- هييي هيييي شبيييك أنت تخببلتت؟؟؟

- صگر أنت لا تدخل مالك علاقة

- شلوون مالي علاقة؟؟ ، أنت نسيت هاي البنيه بحمايتي و اليگرب صوبها أكسره تكسر حَتى لو چان أبن عمي و خطيبها

- يووول يااا الله دهاااك دحگ الصخااام و شووف لعبان الننفسس

مد إيده حَتى ينطي الموبايل لـ صگر و رجع سحبها ...

- شبيك جيب الموبايل شنو بي؟

- ما أنطي ما تشوف

جسام : رافد وليدي أنطينه الموبايل تا نشوف شنو السالفة

- يابة والله مگدر أنطيكم ، مكتوب حچي ما ينلبس عليه عگال آني استحي اقراه

- إي غير نفتهم شنو الحچي المكتوب تا نعرف شسالفة ، جيب التيلفون يـَ أبوية

- يابة بَـ ...

هنا نتر بي عمو جسام ...

- جاااي أگُلك جييبه

جره من إيده و أخذه و رافد يباوع عليه و يرجع يدير وجهه و يغلط ، آخر شي طلع معصب ، عمو جسام قره الحچي و مسح وجهه و أستغفر ، باوعلي و آني نصيت راسي خجلانة لأن الكلام المكتوب +١٨ ، أخذه من عنده صگر و قراه و حچه ...

- لا يا أبن الكلب ، رافد شلون يصدگ هيچ واحد و يتخبل علينه

اندار عليه : نَفس أهدي و أگعدي أحچيلي شنو السالفة بالتفصيل تا نگدر نتلافاها و نسد الموضوع و نعرف الحگ من الباطل

آني أبچي و اشهگ ، كُل ما أتذكر حچي رافد و عصبيته و صياحه عليه أموت من القهر ، حچه عمو جسام ...

- أحچي بنيتي لا تخافين ، أحچي تا نعرف شنتصرف

- هذا قبل أسبوع راسلني و چان يلح حيل لحد ما جاوبته و گتله شتريد ، هو من شافني جاوبته بده يدز كلام مو حلو يتوعدلي و هواي سوالف ، من شفته هيچ حظرته ، رجع دخلي من حسابين و هَم حظرته و هَسه راسلني مَره ثانية و الموبايل چان بإيد رافد ، شافه و تخبل عباله عندي علاقة بي من جاوبته ، بَس والله العظيم آني ما أعرف و حظرته أكثر من مَره ، و إذا متصدگون هَسه أطلعلكم حساباته الحاظرتها من قبل

صگر : مصدگينچ والله مصدگينچ بَس على كيفچ لا تبچين

- بَس رافد مو مصدگني ، مسمعته شحچه !!

- هو بكيفه ميصدگچ ، والله العظيم أملص أذانه إذا يشُك بيچ

سكتت و آني أبچي و اشاهگ ، حچه عمو جسام ...

- گومي بنيتي گومي أشربي مي و أرتاحي و رافد علينه أحنه نفهمه السالفة ، هو عصب عبن شاف هالكلام أعذريه

هزيتله براسي و گمت رحت للمطبخ صبيت مي بالگلاص حَتى أشرب ، شلته و وگع من إيدي و تكسر ، هنا ما تحملت گعدت بالگاع و گمت أبچي ، أجه رافد وگف بالباب و هو عاگد حواجبة ، باوعلي بطرف عينه و راح ، شلون هيچ ما هميته ، معقوله حقد عليه ، يا ربي والله أحبه و ماريده يكرهني ، والله ما سويت شي

***

عشق
نزلنه بمطعم و رحنه گعدنه بطاولتنه ننتظر النادل يجي ، بَس منتبهه لـ فرات مو على بَعضه و عاگد حواجبه كأنو بي شي ، اجه النادل و فرات طلب أكل بَس الي راح و حجيت ...

- شو بَس ألي طلبت؟

- آني ماريد

- ليش متريد ، مو گلت جوعان؟

- انسدت نفسي

- ليش؟

- هيچ لحالي

سكتت عنه ، اجو و جابو الأكل و حطو ع الطاوله ، قدملي فرات الخبز و حچه ...

- يلا اكلي حياتي بالعافية

- ما آكل أله أنت تاكل وياي

- آني ما مشتهي والله

- لعد ماريد خلينه نرجع للبيت

فرك وجهه و أستغفر ...

- اوكي راح آكل يلا

أبتسمت و بلشنه ناكل ، هو أكل شوية و گال شبعت الحمدلله ، رجع ظهره ليوره و صار يباوع ليساره ...

- لعد متگوم تغسل؟

- نگوم سوه

رجعت آكل ، شوي و كملت و گمنه نغسل سوه ، كملنه و رجعنه للطاوله ، صاح النادل و أجه حاسبه و طلعنه ، صعدت و فرات نزع سترته و خلاها وره ، صعد و فتح دگم القميص مبين متضايق ، مشينه و هو عينه ع الطريق ما حچه شي ، ما تحملت وضعه و حچيت ...

- فرات بيك شي؟

التفتلي و هو عاگد حواجبه ، ابتسم و حچه ...

- لا حياتي شبيه قابل !

- مادري احسك مو طبيعي ، اول مطلعنه الصبح ما چنت هيچ

- مابيه شي بَس نعسان

- أكيد؟

- وداعت عيونچ

حچاها و أبتسم ، رجع عينه للطريق و آني سكتت ، شوي و وصلنه للبيت نزلنه و فرات راح يجيب سترته و آني وكفت أنتظره ،شالها و حچه ...

- شو واگفة؟

- أنتظرك حَتى نفوت سوه

أبتسم و حچه ...

- ديلا عَجل

فتنه جوه و چان صگر يحچي بالتيلفون و منفعل ، ما عرفت شنو الموضوع لأن نهى المكالمة من دخلنه ، وجوههم هو و خالو جسام توحي أنُ أكو شي ، آني ما سألت و فرات هَم ما سأل أصلاً حسيته ما أنتبه للوضع ، سلم و گال راح أروح أنام ، صعد و صعدت وراه راح لغرفته اللي بنهاية الممر و آني أجيت افوت لغرفتي بَس سمعت صوت بچي من غرفة نَفس ، غرفتها بصف غرفتي لذلك سمعت ، خفت عليها ، دگيت الباب و فتت لگيتها گاعده ع الچربايه و حاضنه نفسها و تبچي و تشاهگ ، ذبيت الجنطه و رحتلها ...

- نَفس ، شبيچ يـَ گلبي ليش تبچين منو وياچ؟؟

باوعت عليه عيونها حُمر و منفخات من البچي و خشمها أحمر ، و متگدر تحچي ، مبين صار هواي تبچي ...

- شبيچ ولچ أحچي لتخبليني؟!

حچت من بين شهگاتها ...

- رافد ، ر ر راافد بَعد ميريدني ، بَعد ميحبني والله

- على كيفچ حَبيبتي على كيفچ و أخذي نفس و أحچيلي شكو شصاير ليش رافد ميريدچ؟

جرت نفس قوي و مسحت دموعها و حچتلي السالفة كُلها ...

- أكيد هَسه متندم لأنه حبني و عقد عليه ، أكيد هَسه أخذ نظرة موزينه عليه و گال طبعًا تطلع هيچ لميناها من الشوارع لعد شتطلع ، بَس والله آني مو هيچ والله ما سويت شي

- لا حَبيبتي لا ميگول هيچ هو يحبچ

- لعد ليش صيح عليه و رزلني و ميقبل يحچي وياي ، والله هو صار يكرهني

- لا مو هيچ نَفس ، باعي حياتي أنتِ هَم حاولي تتفهمين موقفة ، يعني رجال شاف واحد كاتب لـ خطيبته هيچ كلام مُقرف و خاصة أنُ هذا الحقير موصل رسالة للقارئ أنُ أنتِ حاچيه وياه أو عندچ علاقة بي ، و رافد حاله حال أي رجال عصب من قره الكلام و فهم السالفة غلط ، عصبيته عمت بصيرته و خلته يفهمچ غلط ، صدگيني باچر يهدأ و يفهم السالفة و يجي يعتذر منچ ، و اهم شي صگر و خالو مصدگينچ هُمه يفهموه

- و إذا ما صدگني؟!

- لا يصدگج ، هو يحبچ ، بَس أنطي فرصة يهدأ و يفهم السالفة

هزتلي براسها و عيونها مدمعة ...

- تمام حَبيبتي آني حروح و أنتِ لتفكرين ، حصل سوء تفاهم و راح ينحل إن شاء الله

- تمام

گمت طلعت من الغرفة و سديت الباب ، دخلت لغرفتي و بدلت و گعدت ع الچرباية حَتى أنام ، أجه ببالي اروح اشوف فرات ، لبست شالي و طلعت رحت لغرفته ، فتحت الباب و دخلت لگيته مطفي الضوه و متمدد ع الچربايه و مغمض عيونه ، حسيته نايم ردت أطلع و رفع راسه و باوعلي ...

- هاا عشگي رايده شي؟

- لا بَس أجيت أشوفك محتاج شي؟

- لا گلبي ما محتاج شي

- تمام نوم العوافي

- الله يعافيچ

طلعت و سديت الباب ، رحت لـ غرفتي و نمت

***

نَفس
لبست شالي و طلعت من الغرفة ، رحت أدور لـ رافد ، دگيت باب غرفته بَس ماكو صوت ، فتحته و فتت لگيتها فارغة مابيها أحد ، طلعت و نزلت جوه شفته بالهول ماكو ، بالديوانية ماكو ، حَتى بالحديقة شفته هَم ماكو ، رحت وره البيت لأن آني أعرفه من يضوج من شي يروح يگعد هناك ، رحت و هَم ما لگيته ، رجعت لـ غرفتي أخذت موبايلي و دگيت عليه بَس يفصله ميجاوبني لو يدگ و لحد ميفصل من وحده ، آخر شي كتبتله رسالة ...

🗨️ رافد فدوة أروحلك بَس تعال خل نحچي و أفهمك ، و الحُسين السالفة مو مثل ما مفكرها

شافها و ما رد ، رجعت كتبتله ...

🗨️ عليك الله لتعوفني ، آني منو ألي غيرك بهالدنيا ، تره والله عايشة علمودك أنت و بَس لأن لگيت بيك كُل أهلي الضيعتهم ، لتظلمني و تعوفني علمود شي آني مالي علاقة بي

أبچي و أكتب ، دزيتها و هَم شافها و ما جاوب ، يربي شلون بيه ، شلون افهمه أنُ آني مالي علاقة ، لليل و هو ماكو ، ميجاوب لا على رسائلي و لا إتصالاتي ، حَتى عمو جسام بده يقلق لأن من الظهر هو ماكو و يدگ عليه ميجاوب ، هو ماله بالعادة يتأخر هالگد و ميجاوب إتصالاتنه ، رحت لـ غرفته فتحت الباب و دخلت گعدت ع القنفه و أبچي ، للساعة 1 و نص آني بغرفته أنتظره ، نعست كلش رچيت راسي ع القنفه و غفيت ، شوي و فزيت على صوت الباب و هو ينفتح ، رفعت راسي و باوعت رافد واگف بالباب من شافني عگد حواجبة ...

- شتسوين هينه؟؟؟

گمت وگفت گباله ...

- چنت أنتظرك

فتح الباب و وخر عنه و گال ...

- أطلعي بره

- رافد بـ ...

- گللتتت أطلعيي برره

- مااا اطلع ، مااا أطللع أله تسسمعنيي

طبگ الباب حيل ، گلت هَسه يفزون ع الصوت ، أجه عليه و لزمني من إيدي بكُل قوته ، و لا چنه رافد اللي يحبني و يخاف عليه و ميريد يأذيني حَتى ولو بنسمة هوى ، حچه ...

- جايه بغرفتي بنصاص الليالي و انتِ تدرين آني شنو موقفي منچ ، يعني شنو عاجبچ اوكلچ وحل هَسه؟

- أنت ليش هيچ گلبك قاسي ، ما طالبه منك غير تسمعني و بعدين أنت أحكم

دفعني ع الچرباية و وگعت عليها ، أجه دنگ عليه ، واگف على رجل و الرجل الثانية داگها بالچرباية ، لزمني من رگبتي كأنما يريد يخنگني ...

- أطلعي بره و لا تخليني أتهور و أأذيچ

- گتلك ما أطلع أله تسمعني

يباوع بعيوني المدمعة بنظرات غضب ، كلش قريب مني و أنفاسنه أختلطت ويه بَعض ، تقرب مني أكثر و باسني بشفتي ، إيده على رگبتي و شفايفه على شفايفي ، نزل على رگبتي و باسني منها ، حَسيته بده يتجرأ و نسى نفسه او هو ديسوي هيچ متعمد ، هنا دفعته عني ، بَس ما قبل يوخر لزمني من أديه الثنين و چتفهن ، رجع على شفتي و باسني منها بقوة ، هنا عرفت هو شنو بباله ، صرت أدفع بي و اصيح بصوت مخنوگ ...

- الله عليك وخر رافد فدوة أروحلك عوفني

هنا أبتعد عني و گعد بصفي ع الچرباية ، دنگ و حط راسه بين أديه ، صاح ...

- أطللعييي ، أطللعييي ، گتللچ أطللعييي لييش تجبررينيي أسووي هيييچ

گمت و فتحت جهازي و طلعت قائمة الحظر و أخذت سكرين لحسابات هذا الحقير اللي حاظرتهن ، بعدين دخلت على مُحادثاتي وياه لمن رزلته ، أخذتلها سكرين و فتحت الصور و قدمتله الموبايل ...

- شوف ذني السكرينات و أنت أحكم

رفع راسه و باوعلي ، يباوع للموبايل و يرجع يباوع عليه ، أخذه و صار يگلب بالسكرينات ، عگد حواجبه و باوعلي ، بعدين گام و طلع من الغرفة نزل جوه ، آني هَم رجعت لـ غرفتي ، تمددت بفراشي و بقيت أبچي ، كُل ما أتذكر اللي سواه أموت من القهر ، بقيت ابجي لحد ما غفيت

حسيت على صوت الباب أنفتح ، صَح أنفتح بهدوء بَس آني حسيت عليه ، بقيت مغمضه ما ردت أبين للدخل اني گاعدة ، شوي و حسيته گعد يم راسي ، دنگ و باسني بگصتي ، عرفته رافد گُبل فتحت عيوني صارت عيونه بعيوني ، رفع راسه و همس ...

- آني آسف ، سامحيني عفيه

گال هيچ و آني فزيت ، حضنته بقوة و بچيت ، هو هَم حضني و دفن راسه برگبتي ، و أديه على خصري ، شوي و أبتعد عني دنگ و مسح دموعه ، حطيت إيدي على خده ...

- ليش تبچي رافد؟

رفع راسه و باوعلي ، عيونه حُمر كلش ، حچه ...

- أذيتچ و أنتِ تحبيني ، آني مو زلمة لأن أذيت اللي أحبها ، آني ...

خليت أصبعي على شفته ما ردته يكمل ...

- أششش لتحچي هيچ ، آني مسامحتك و متفهمه موقفك

- الحچي اللي حچيته وياچ ثگيل ، والله ما چنت أدري ، تخبلت من شفت المحادثة

- اللي صار مو هين و أهم شي أنت فهمت السالفة و اللي صار أنساه خلص

- أنسى أني أذيتچ؟ ، يولي گلبي أهجسه وار بنار ع اللي سويته ، آني شلوون سوويت هيييچ لييش تسررعت لييش حچيييت هييچ ليييش

صار يحچي و يدگ على راسه ، سحبت أديه و لزمتهن ...

- كافي رافد لتسوي هيچ ، گتلك آني ما ضايجة و متفهمه موقفك

- عليچ الله ما مقهورة مني؟؟

- والله ما مقهورة ، گتلك المهم عندي أنك فهمت السالفة

سكت و دنگ راسه ، رجع رفعه و حچه ...

- أوعدچ اعرف هذا الكلب منو و منين و ساعتها أنعل والديه هو و اليطلع وراه

- عوفه رافد خلي يولي

- اعوفه؟؟ ، من كُل عقلچ أنتِ !! ، غير بَس أعرفه أله أشرب من دمه وداعت أبوية

سكتت عنه و دنگت راسي ، هو رچه ظهره ع الديكور ، فتح أديه و كال ...

- تعاي

- هااا

- تعاي شبيچ

سكتت و بقيت صافنه عليه ، حچه ...

- لتخافين مني ، مُستحيل أأذيچ و حگ مُحمد

تقربت من يمه حضني و خليت راسي على صدره ، حچه ...

- ننسى اللي صار مو؟

- أكييد ، و نرجع مثل قبل رافد و نَفسه

أبتسم و حضني أقوه ، بقينه نسولف لحد ما الشمس بدت تطلع ، آني غفيت على صدره ، و هو بقى گاعد

حسيت من نومتي رافد مو يمي ، باوعت للساعة چانت بالعشرة ، گمت توضيت و صليت ، لبست شالي و طلعت من الغرفة ، رحت لـ غرفة رافد دگيت الباب بَس ماكو صوت ، دخلت لگيته نايم على بطنه و مخلي إيده جوه صدره ، ردت أگعده بَس تراجعت ، هو البارحة الليل كُله ما نامه خلي يرتاح ، عفته و طلعت من الغرفة

***

عشق
گعدت الصبح بَس أحس نفسي مخنوگه و ضايجة كلش حَتى صلاة ما صليت ، وگفت گدام المراية و باوعت لنفسي صارت عيني ع الگلادة الهداني ياها فرات ، نزعتها و خليتها ع الميز تذكرت كلامة لمن گالي لتنزعيها أبقي لابستها ، عفتها و طلعت من الغرفة نزلت جوه ، صار بوجهي فرات ، أبتسم و حچه ...

- صباح الخير

- صباح النور

- شبيچ؟

- شبيه؟

- هو آني جاي أسألچ !!

- مابيه شي

عفته و دخلت للهول و هو دخل ورايه ، چان صگر معصب و يحچي ويه خوالي ، حچه فرات ...

- خير شصاير ، شبيك صگر؟

التفت عليه و نتر ...

- لااا أنت مو بالبيت حضرت جنابك متعرف شصاير

فرات عگد حواجبه و حچه ...

- هَسه ليش تصيح أنت؟

- فررااات أطللعع من راااسي

- خرررب ، يوول غيير أفتتهمم شبييك !!

- روووح من وجههيي روووح

- أنتت متگُليي شبيييك متخببلل عللينهه اليووم؟؟

- آني متخبل عليكم؟؟؟

هنا صگر ذب الموبايل و أجه على فرات جره من ملابسه ، أجن ماما و خالة ع الصياح ، خالو علي چتف أديه و باوعلهم و هو عاگد حواجبه ، حچه ...

- عفيه عفيه بولدي السباع ، بَعد تذابحو گدامي هي هاي العايزة

صگر ترك فرات و ألتفت على خالو ، حچه ...

- آسف حجي ما گدرت اضبط أعصابي

خالو باوع لـ فرات و حچه ...

- و أنت؟

- آني ما گلت شي هو لحاله عصب

- أنتو شصارلكم هااا؟ ، حَتى و أنتو زغار ما تكاونتو ، أتكاونون هَسه و أنتو زلم !!

فرات : من رخصتك حجي

عاف البيت و طلع بره ، ندستني أمي و حچت ...

- روحي وراه

- ليش أروح وراه؟

- أحچي وياه و هَدي حَتى يتعود من يعصب و يشوفچ يهده

- ميحتاج

- روحي يولي آني ما أظل أعلم بيچ

- اوووف گمت

رحت طلعت بره مشيت و لگيت فرات واگف بالطرمه ، حاط أديه بجيوبه و يهز برجله ، رحتله ...

- فرات

نتر بيه : خييير

- ليش تنتر بيه شسويتلك آني؟!

أندار عليه زفر هوى قوي و فرك وجهه ، حچه ...

- آسف حَبيبتي ، أعصابي تلفانه والله

ما جاوبته ، هو باوع لصدري و حچه ...

- وين گلادتچ؟

- نزعتها

- لييش؟؟؟

- هيچ

- شلوون هيييچ؟؟ ، أحننهه مو أتفقننهه ما تنزعينهاا

- أهووو ، أنت شبييك الييوم

- أنتِ اللي شبييچ اليووم ، هاااا؟؟

أنداريت حَتى أمشي ، لزمني من إيدي و دارني عليه ...

- هذا أسلوب جديد ست عشگ !!

- مالك علاقة ، وخررر

هديت إيدي منه و عفته و فتت جوه

***

مُهره
طلعنه من المستسفى آني و شهم ، أجه حَتى يگودني بَس گتله أگدر أمشي وحدي ، طلعنه و صعدنه بالسيارة ، أباوع لـ شهم و أنقهر عليه فوگ قهري على أكبر ، بقى ويايه ما فارگني أبد حَتى نوم مينام صارلة فترة راحته مسلوبة بسببي ، وصلنه البيت لگيت أهلي موجودين سلمت عليهم و طلعت للغرفة ، دخلت و سديت الباب ، گعدت ع الچرباية و صفنت بالگاع ، شوي و أجه شهم راح بدل و أجه تمدد ع الچرباية ، حچه ...

- شلون صرتي هَسه؟

- زينة

- تاكلين مثل ما گلچ الدكتور ، تره هواي أطعمه منعها عنچ

هزيتله براسي ، سكت و حط إيده على عيونه مبين يريد ينام ، أحتاريت أحچيله لو لا ، خطية هو يريد ينام ، بَس ما أگدر لازم أحچي ...

- شهم

- هممم

- أحنه لازم ننفصل

وخر إيده عن عيونه و باوعلي مصدوم ، گعد على حيله و حچه ...

- شجاي تخربطين أنتِ؟؟

- ما جاي أخربط شهم ، آني وياك ثنينه تعبنه بهالزواج ، جبنه طفل و خسرناه ، زواجنه من البداية غلط

- لا تخبليني مُهره ، أنتِ مو تحبيني؟؟؟

- إي أحبك

- چاا لييش هيچ تسولفين متگليلي !! ، تره والله گلبي خلصان و مناقص

- آني صرتلك مصدر تعب و قهر ، طلگني و أرتاح

گام على حيله و صاح ...

- وللچ شجاااي تحچين أنتِ ، هو آنيي رااحتيي يممچ ترديينيي أطلگچ علموود أرتااح ، وللچ تدررين آنـه شصاار بييه من گالولي مااتت ، متت ورااچ و علي ، أنتِ لييش ما جاااي تشووفين حُبي ألچ ، لييش هيچ أنتِ !!

نزلت دموعي و حچيت ...

- والله أحبك و أدري بيك شكثر تحبني و متحمل كُلشي لخاطري ، بَس آني تعبت ، تعبت أشوفك تتعب أريدك ترتاح

- آني خسرت أبني و آني حَتى ما شايفة ، ماريد أخسرچ أنتِ هَم ، لا تموتيني و آني عايش

- بَس آني بَعد ما أگدر أشوفك تعبان

- لا حول و لا قوة إلا بالله

فرك وجهه و أستغفر ، حچه ...

- سمعي ، أنتِ هَسه افكارچ مخربطة و مريضة عاذرچ ، أنا أگول لو تروحين ويه بيت عمي هناك لحد ما ترتاحين و ترجعين

- و أنت؟

- أنا اروح للأنبار ، بلكي شوي تتغير نفسيتي

- تمام

- مسحي دموعچ مو تره جاي يچون گلبي

مسحت دموعي و حچيت ...

- فكر باللي گلته شهم

هز راسه ما راضي على كلامي ، طلع من الغرفة كُلها

***

شهم
ثاني يوم من الصبح طلعت للأنبار ، حچي مُهره يرن بأذاني ، ليش هيچ تحچي ، هي لو تحبني من صدگ چان ما گالت هيچ ، أصلاً مستحيل تفكر هيچ من الأساس ، يعني شنو قنعت روحها بيه حتى تنسى فرات لو شنو ببالها بالضبط ، إذا طلع هالحچي صحيح أموتها و أموت روحي هالمره ، بقيت أفكر الطريق كُله ، ما حسيت بي و لا أنتبهت أكثر من مره ردت أنضرب

وصلت بيت المهيوب دخلت و سلمت گعدنه كلنه سوه بَس آنـه بالي شارد مو وياهم ...

فرات : ششههم ألووو

- هااا

- صار ساعة أنادي بيك وين بالك؟

- لا هيچ

- شبيك شهم؟

- مابيه شي

- سوالفك هاي مو عليه ، أحچي

جريت نفس ...

- مُهره

- شبيها؟

- تريدني أطلگها

- هااا ، ليش عود؟!

- شمدريني ياخي ، تگلي زواجنه من البداية غلط و آني تعبت و تعبتك و من هالسوالف اللي ما تدخل بمخ طفل ، آنـه خايف انها ما تحبني

- شلون يعني ما تحبك ، فهمني ياها هاي

- خايف لا تكون قنعت روحها بيه بَس حَتى تنسى حُبها الأولي ، و تالي ما گدرت تنسى و گالت خل أعوفه

- لا لا شهم شهالتفكير ، هي لو ما تحبك چان ما بقت وياك و جابت منك طفل ، و أنت من البداية گلتلها بَس نفضها ويه حيدر أطلگچ ، جان رضت بالطلاگ من البداية و رجعت لبيت خالي و ما بقت وياك ، العشرة ما تصير بالتقنيع يـَ شهم ، فكر و راجع حساباتك زين گبل لا تحكم أو تتصرف ، حَتى گبل لا تحچي لو حرف واحد

- أوووف والله مادري راح أتخبل آنـه

***

عشق
ثاني يوم الولد جابو الغرفة مالتنه لأن كملوها ، ما أعرف شبيه ما فرحت بيها رغم چنت كلش متحمسه ألها ، العرس تحدد بَعد أسبوع من اليوم و آني كُلشي بيه بارد لا فرحانه و لا متحمسه لهاليوم ، عكس قبل شهر چنت أنتظر هالأيام بفارغ الصبر

دخلت للغرفة حَتى أرتب الغراض ، أول شي بلشت بالملابس ، شلت ملابس فرات مال البيت و خليتهن بباب و الباب الثاني خليته ألي ، أجيت على ملابس الطلعة ، علگت كُلشي القمصان و القوط و الدشاديش و اليشامغ صفطتهن و خليتهن بخانة وحدهن ، أجيت على هذا الصندوگ اللي مره حاولت أفتحه و ما أنفتح ما أعرف شنو بي و ليش قافلة ، شلته من الگاع حَتى أحطه بالكنتور ، ما أدري شلون أرتخت إيدي و وگع بالگاع و أنفتح ، الظاهر ما چان مقفول ، دنگت و شلته ، أنصدمت باللي بي ، شنو هاي؟ ، معقولة اللي جاي أشوفه ، ٣ صور لـ ميس و وياهن محبس شكله مال خطوبة ما أعرف مال شنو ، تخبلت من اللي شفته ، يعني لحد هَسه مناسيها ، بعده مناسيها و أحنه زواجنه بقاله بَس أسبوع ، يعني يضحك عليه ، چذاب طلع ، شلت الصور و نزلت جوه ما أشوف گدامي ، كلمن يشوفني يصيحني شبيچ و آني ما أجاوب ، رحت للديوان ملگيته ، طلعت بره شفته هو و شهم گاعدين بالحديقة ، رحت وگفت گباله و صحت ...

- ممكنن تتفهممنيي شنوو هاااي المهززلههه؟؟؟ ...

********

يتبع ...

برأيكم شراح يصير؟
خلونا نتابع و نعرف

18.kij
تعالو أنستا ، و اللي يجي يدخلي خاص علمود أضيفه كلوز لأن نشري اللي يخص الواتباد كُله ع الكلوز

سحر الدليمي