رواية عشگ الفرات ( عِندما تَهوى القُلوب ) الفصل الخامس والخمسون 55 - بقلم سحر الدليمي

سلااااام شلونكم
لا تنسون التصويت و التعليق بين الفقرات
قراءة مُمتعة 💜

***

- زَعل الحَبايب چذاب و عيونك

***

- هااا ريان شبيچ أكو شي؟

بلعت ريگي بالگوة ، حچيت ...

- آني سويت شغلة موزينة و لازم أگُلچ عليها

- هاااا شصخمتي ريان شصخمتي

أحس لساني أنربط و گمت ما أعرف أحچي ، ضليت أبلع بريگي و هي عيونها عليه خازرتني تنتظرتي أحجي ، شلون أگُللها يربي شلون ، أستجمعت قوتي الباقية و حچيت ...

- حالة فرات هاي و مرضه و اللي صار بينه و بين عشق كُله من ورايه

عگدت حواجبها بإستغراب ...

- يعني شلون من وراچ؟ ، ما أفتهمت !!!

سكتت ، صاحت بيه ...

- دححچييي شبيييچ

- آني سويتلهم سِحر

شهگت و ضربت صدرها ....

- يوويللچ من الله يـَ ريااان يووييللچ

- والله مو قصدي والله

- يوولييي أنتِ مستووعببه اللي صاار لفرااات ، أنتِ دمررتييي دمرتيي ريااان

- والله ما چان قصدي أأذيه ، آني سويتله تا يكره عشق و يحبني آني ، بَس هاي المره سوته لأذيته

- صخااام الصخخممچ ريييان ، خـ** بييچ على هالساالفة ، شسووالچ الوليد تااا تأذيينه هييچ ، عميي علي بشنوو قصرر وييااچ تاا تأذيله أبنه ، صگر ، صگر إذا عرف حتى آني رااح يكررهنيي من وراااج ، شسوويتيي أنتِ الله لييوفقچ

صارت تصيح و تغلط عليه و آني أبچي ، سيف أخترع من الصوت ، گمت شلته و خليته بحضني ...

- صوتچ عفيه لحد يسمع

سكتت و ضلت تستغفر ...

- شسوي هَسه ، ساعديني رُسل ، خاف يموت ، والله ما أتحمل يصيرله شي بسببي

- بَعد كُل الصارله من وراچ هَسه جايه تگولين ما اتحمل يصيرله شي بسببي ، شنو من گلب عندچ ، شنو من تفكير همجي

جت سحبت سيف من حضني و أخذته ...

- أطلعي بره

- بَس ...

- أطلعيي برره خلينيي أفكرر شسووي بمصييبتچ هاااي

عفتها و طلعت ، رحت گعدت بغرفتي و آني الندم و الخوف على فرات ياكل بيه أكل ، يا ربي ميصيرله شي ، يا ربي يطلع منها سلامات

رُسل
طلعت ريان و آني ضليت حايره و مصدومه بنفس الوكت ، شلون هيچ سوت ، شلون أنطاها گلبها تأذيه ، آخخ يا ربي ، ضليت لليل أفكر بحل ، شلون أگول لو أسكت ، بَس إذا سكتت و ما عرفوا أنه مسحور ما راح يگدرون يعالجونه ، آخر شي قررت أنبه صگر بَس بطريقة غير مُباشرة ، گمت حطيت سيوفي بسريره و غطيته ، رحت لغرفة لارين ، فتت لگيتها نايمة ، غطيتها زين و لميت كتبها و ألعابها ، بستها و طلعت رجعت لغرفتي ، فتت لگيت صگر گاعد ع القنفة و مبين ضايج ، رحت يمه ...

- صگر ، شبيك حياتي

- راح اتخبل ، وضع فرات راح يخبلني ، حتى عبدالله حار بوضعه ، ما جاي يستجيب للأدوية فرد نوب

- زين و شنو راح تسوون هَسه؟

- مادري ، أبوية ما خله دكتور ما عرض حالته عليه ، بَس ماكو نتيجة

- أگُلك صگر

- أممم

- خاف مسحور ، يعني أحد مسويله سِحر

- و السِحر شله علاقة بمرضه !!

- صگر السِحر كُلشي يسوي ، يمكن اللي سواه قصده يأذيه و يأذيكم بي

- و أنتِ شلون أستنتجتي هالشي؟

- ببساطة ، حالته الغرببة اللي عجزوا الأطباء على تفسيرها او يلگولها علاج ، إضافة على تصرفاته الغريبة ، مثلاً نسيانه ، مرات يسوي شي او يمر بموقف و ينسى ، ما ملاحظ عليه هالشي؟

- أمبله والله ملاحظ

- و الأكبر من هذا أنه يتخبل لو سمع صوت القرآن ، يگول يأذيني و يكره يسمعه ، و أنت أكثر واحد تعرف فرات شگد يحب يقره قرآن ، و لا تنسى أنُ عشق طلع مسويلها سِحر يعني مو بعيدة فرات هَم يكون مسحور

- إي والله صَحيح

- إي شفت

- هَسه حيرتيني والله

- ليش تحير ، أحچي لـ عمي و أخذوا على سيد و أنهوا هاي الشكوك كُلها ، إذا طلع مسحور يفك عنه السِحر و ينتهي كُلشي

هزلي براسه و فرك عيونه بتعب ...

- يلا هَسه أنت نام عُمري ، مبين تعبان

بدون ميجاوبني گام أنجضع بفراشه و غمض عيونه ، و آني أنجضعت بصفه و ضليت أدعي تنتهي هالسالفة على خير و ما يتأذة فرات أكثر

***

عشق
من ساعة ما طردني فرات من غرفته و آني ما هدالي بال ، كل شوي اريد اروح اشوفه بَس أتراجع ، أخاف يعصب و هو موزين عليه التعصيب و القهر ، آخر شي بَعد ما أگدر أتحمل طلعت من غرفتي و رحت لغرفته ، فتحت الباب و فتت ، باوعتله لگيته نايم ، تقربت منه چان حاط إيده اليمنه على بطنه ، أنتبهت للحلقة بعده لابسها ، يعني بعده يحبني بَس ديكابر ، إي أكيد يعني لو ما يحبني چان نزع الحلقة ، مديت إيدي و لزمت إيده ، فتح عيونه ، شافني و سحب إيده مني ...

- آني مو گتلچ لتشوفيني وجهچ

- فرات أحچي الصدُگ أنت تحبني لو لا؟

- ما أحبچ ، أكرهچ أموت منچ ، روحي عن وجهي

- چذاب

ألتفت يباوعلي مستغرب …

- إي چذاب ، لو صدُگ متحبني چان نزعت الحلقة ، مو حتى و أحنه فاصخين الخطوبة بعدك لابسها

باوع لإيده ، صفن شوي ، بعدين نزع الحلقة و ذبها بالگاع …

- هَسه صدگتي أني ماحبچ و كارهچ و كاره حَتى طاريچ

- و عيونك اللي يحچن غير هالحچي

- أطلعي بره و عوفيني بهمي

- الله يخليك بَس أسمعني ، شراح تخسر إذا سمعتني

- خسرتيني هواي أشياء أنتِ ، كرامتي ، صحتي ، گلبي ، هوواي خسرت من وراچ

- بَس آني والله أحبك

باوعتله خله إيده على گلبه و الإيد الثانية بدت ترجف ، خفت ليصيرله شي ، سحبت نفسي حتى أطلع ، باوعت للحلقة مالته اللي بالگاع ، دنگت شلتها و طلعت

فرات
طلعت و أخذت گلبي وياها ، كُلشي بيه يريدها و مشتاگلها ، بَس اللي سوته بيه مو قليل و ما أسامحها ع الصار بسهولة ، خليها تشرب من الكاس اللي آني شربت منه ، خليها تحس بلوعة الفراگ و جفى الحبيب

عشق
رجعت لـ غرفتي و النوم أحسه عدوي ، حاولت أنام و حاولت ما گدرت ، بقيت أفتر بالغرفة و حلقته بإيدي ، معقولة حچيه صحيح و كرهني ، كرهني لدرجة عاف الحلقة ، لا لا ما أتوقع فرات يحبني ، آني أعرف بي شكد يحبني ، ما حسيت ع الوقت من مَر ، باوعت على ساعتي لگيتها بالأربعة ، هاي شبسرعة مَر الوقت هيچ و ما حسيت بي ، قررت أرجع أشوفه ، رحت لـ غرفته لگيته نايم ، جريت كُرسي و گعدت يمه ، لزمت إيده و ضلت دموعي تنزل بهدوء بَس تحرگ خدودي وياها ، شوي و حسيته شدد قبضة إيده على إيدي ، همس بصوت تعبان و هو مغمض ...

- لا تعوفيني

صفنت ، شنو معقوله يهذي ، إي أكيد يهذي او حلمان لأن لو گاعد چان ما قبل أبقى يمه ، تقربت عليه أكثر و لزمت إيده بقوة ، و حطيت إيدي على راسه صرت أمسح بشعره و أتأمل وجهه ، گمت أحچي وياه ما أعرف إذا يسمعني أو لا ، بَس چان لازم إيدي ...

- أعرف آني جرحتك جرح كلش چبير ، أعرف تهاونت بالوعد اللي بينا بَس ما خنته والله ، و اللي صار مو بإيدي ، آني أحبك كلش ، مو گتلك سابقًا أنُ أنت عوضتني عن أبوية الله يرحمه ، أعرف أستحق كُل هاي القسوة منك ، بَس آني أعرف بيك تحبني و مُستحيل تكرهني ، خلينه ننهي هالمهزله و نتعاتب عَتب حَبيب لـ حَبيبته قابله والله بَس لتعوفني

أبتسمت بنص دموعي ...

- تتذكر أول لقاء النه شلون چان ، ههه چنت حسبالي حرامي ، چنت كلش أكرهك و چنت تستفزني هواي و تعاند وياي هواي ، ما تخيلت بيوم من الأيام أنُ هذا الشخص اللي أكرهه راح يسكن گلبي و يملك روحي و يصير كُلشي بالنسبة أليه بهاي الحياة ، چنت أسميك مُتعجرف و چنت أفكر أنُ أنت ميهمك أحد و مغرور و ميعجبك أحد ، بَس من تقربت منك أكثر أكتشفت أنُ أنت عندك أطيب گلب بالدنيا ، و الناس اللي تحبهم فوگ كُلشي بحياتك ، والله سبع گلبي شلون لگاك و حَبك

- ما أعرف إذا تسمعني اول لا بَس ...

تقربت من يم أذنه و همست ...

- تأكد أنُ آني كُلش أحبك ، و مُستحيل أتخلى عنك حَتى لو أنت ما ردتني

سحبت إيدي منه و گمت ، طلعت و سديت الباب وراي ، حسيت نفسي ارتاحيت ما أعرف ليش ، يمكن لأن حچيت و هو گبالي حَتى لو ميسمعني ، رجعت لـ غرفتي و نمت

ثاني يوم گعدت توضيت و صليت و دعيت الله يحنن گلبه عليه ، طلعت من الغرفة باوعت لگيت خالي واگف بباب غرفة فرات و وياه خاله و رافد واگف ليبره ، رحتلهم و سألت رافد ...

- شكو رافد؟

- فرات موزين

من گال هيچ أحس گلبي أنخمش ، عفته و فتت للغرفة لگيته گاعد و مخلي إيده على گلبه و مغمض عيونه بألم ، صگر گاعد يمه و يباوعله بحيره ، حچه ...

- گوم خلي آخذك للمستشفى

جاوبه بتعب : ميحتاج هَسه أصير زين

خالي علي راحله و گعد ع الكُرسي ...

- أخذت من أدويتك اليوم؟

- إي

صگر : يابة الأدوية ما جاي تفيده ، آني جاي أفكر بشي بَس ما أدري صحيح لو لا

- شنوه؟!

- خاف أحد مسويله عمل؟

- عمل؟! ، والله مادري آني دخت ، راسي گام يشرج و يغرب

- مالها داعي تدوخ يابة ، خلينه ناخذه ع السيد اللي عمتي أخذت عشق عليه و نتأكد

خالي باوع لفرات و صفن شوي ، بعدين رجع حچه ...

- لا آخذه لحديثة

- ليش لحديثة؟

- أعرف سيد مضبوط هناك ، و منه أخلي يزور مرقد الشيخ حديد بلكت يرتاح

- و شوكت نتوكل؟

- هَسه ، وليدي فرات تگدر ع السفر؟

- روحوا و آني أبدل و أجيكم

صگر : تگدر لو أضل أساعدك؟

- لا أگدر

گمنه و عفناه وحده ، نزلنه للصالة و صگر راح لغرفته يبدل و خالي گضاها يحچي بالتيلفون علمود هالموضوع ، شوي و نزل فرات يمشي على كيفه ، لابس بنطرون زيتوني و بدي أسود ردن كامل بَس كافهن للنص ...

علي : هاا يابة نتوكل

فرات : يلا

گاده صگر و طلعوا ، مَر من يمي و ما رفع عينه و باوعلي ، شگد أنقهرت ، بَس والله حقه آني ناطيته كُل الحق لأن اللي سويته بي مو هين

ريان
طلعوا و آني أحس روحي طلعت وراهم ، ضليت أدعي تعدي عليه سلامات و ميصيرله شي ، جتني رُسل ، همستلي …

- خليها ببالچ ، تره إذا صار شي على فرات أحچيلهم كُلشي و اولهم بابا تا يعرف شلون يحاسبچ

- لتحچين هيچ رُسل ، إن شاء الله ميصير بي شي ، تره آني من غير شي ميته خوف عليه

- إي حقچ تخافين

جت لارين من الروضه و راحت ألتهت وياها و عافتني ، و آني ضليت أحرگ بأعصابي

عشق
ضلينه گاعدين على أعصابنه و خالة نجاة تلوب خايفة لا يطلع صدُگ مسحور ، كل شوي تتصل عليهم بَس ميقبلون يحچولها شي و هذا اللي زيد النار بگلوبنه ، للعصر و أحنه ننتظر ، شوي سمعنه صوت السيارة ، طفرت لارين من مكانها و فتحت الباب ، دخل خالو و وياه فرات گايده ، گعد ع القنفة و رفع راسه و صارت عيونه بعيوني ، بقى صافن عليه ثواني بعدين فززه خالو علي من گال …

- أصعد لـ غرفتك وليدي أحسن من هينه

- بَس أرتاح شوية ، لولو جيبيلي مي

ركضت لارين للمطبخ تجيبله مي و هو تمدد ع القنفة ، خالة نجاة واگفة فوگ راسه ، حچت ...

- هاا علي شصار

- مثل ما توقعنه

- يعني؟

- مسحور

- تحچي صدگ !!

- إي والله

- و شلون

- يگول السيد محطوطله العمل بالأكل او بالشرب و هذا الأذاه ، أنطاه علاج تا يتخلص من البلا الموجود بجسمه

- منو سوه هيچ بي و ليش سوه

- الله أعلم

آني گمت و عفتهم رحت لـ غرفتي ، حسيت فرات مو مرتاح لوجودي لأن كل شوي يباوعلي ، ما ردت أأذيه بوجودي فـ أنسحبت ، گعدت بغرفتي و أفكر منو سوه السِحر لـ فرات و ليش شنو مصلحته ، لليل صار العشه و آني ما نزلت لأن مالي نفس لكُلشي ، وره شوي أجتني نَفس ...

- گومي فرات يريدچ

طفرت من مكاني ...

- هاااا؟؟

- شبيچ ولچ ، فرات يريدچ روحيله

- لا ما أروح هَسه يعصب و هو موزين عليه

- عمي علي بالطريق حاچيله كُلشي صار وياچ و مفهمه و هَسه يمكن يريد يسمع منچ ، روحيله ولچ

- خايفة نَفس

- من شنو خايفة؟!

- من ردة فعله ، خايفة لا ينهي كُلشي و آني والله أنتهي إذا سواها

- لتخافين حَبيبتي ، فرات يحبچ و ما راح يتخلى عنچ بسهوله ، روحيله أحچوا تعاتبوا المهم تجاوزوا هالسالفة و حلوها بيناتكم

هزيتلها براسي و مشيت و جسمي كُله يرجف خوف منه و من اللي راح يگوله ، فتحت الباب و فتت ، چان متمدد و عيونه بالسگف ، ألتفت شافني و دار وجهه ، هنا تمنيت أموت ، مبين من وجهه و بروده  الكلام اللي راح يحچي ، أكيد راح ينهي كُلشي هالمره ، لو مفتهم السالفة من خالو ليش وجهه بعده ثگيل عليه ، ما تحملت بچيت بصوت عالي و صرت أحچي ، ما أعرف شحچيت و شخبصت من حرگة گلبي ...

- باوعلي فدوة أروحلك لا تدير وجهك عني ، والله اللي صار مو بإيدي ، كُله بسبب السِحر اصلاً حتى ما أتذكر اللي صار لو ما ماما حچتلي ، بشنو أحلفلك أنُ آني أحبك و ما مستعده أخسرك ، و غلات بابا اللي صار مو بإيدي ، أحبك والله و أموت من دونك ، الله يخليك سامحني و ...

هنا أختنگت بَعد ما اگدر أحچي بَس أشهگ ، رجعت ليورا و رچيت ظهري ع الحايط ، خليت إيدي على حلگي حتى ميطلع صوت شهگاتي ، هو ألتفتلي ، نزلت دموعه مسحهن و گام بصعوبة ، سند إيده اللي بيها الكانونه ع الميز و گام وگف ، باوعلي و مدلي إيده الثانية …

- تعاي

ضليت واگفة و أباوعله مستغربه ، رجع گال …

- تعاي شبيچ

رحت و لزمت إيده ، جرني عليه و حضني ، خله إيده على خصري و الإيد الثانية ساند نفسه بيها ، دفن وجهه برگبتي ، حچه بصوت مخنوگ ...

- آخخخ يولي شسويتي بيه يـَ عشگي

حاضنته و أبچي و هو هَم يبچي بدون صوت بَس أحس بي ، ضل حاضني دقايق ، أحسه يريد يعوض أيام الفراگ ، شوي و حسيت گلبه بده يدگ سريع و صارت رجفه بجسمه ، وخرت عنه چان جسمه كُله يرجف ، خله إيده على گلبه و گعد ع الچرباية ...

- فرااات ، فرااات حبيبي شبيييك

ما جاوبني بَس يتنفس قوي ، تخبلت عليه ، رحت صحتهم أجو صگر و رافد و وياهم خالو علي ، لگيناه متمدد و الرجفه لازمته ، خالو گعد يمه و لزم إيده ...

- فراات ، فرات أبني ، يا ربي شصارله الوليد

صگر : يابة شو شوية من رخصتك

گام خالي و گعد صگر بمكانه ، بسرعه جره لصدره و حضنه بقوة ، صار يقره آيات بصوت عالي ، ما يقارب الربع ساعة و هو على هالحالة ، خالي تخبل صار يصفگ إيد بإيد ، وره شوي هدأت الرجفه بجسمه  ، رجع راسه للمخده ، أندار عليه صگر ...

- شصار عشق؟!

- والله ما أدري ، چنه نحچي و فجأة لزمه الرجيف

- يلا عدت الحمدلله

گام صگر و طلع هو و خالي و أجيت أطلع وراهم ، سمعته يناديني بصوت مبحوح ...

- لتروحين ، ضلي يمي

التفتتله لگيته يباوعلي ، أبتسمت و مسحت دموعي ، رحت گعدت يمه و خليت إيدي على راسه ، هو غمض عيونه ، بقيت گاعده يمه الليل كُله ، خليت راسي على طارف الچرباية و غفيت ، وره ما أدري شگد حسيت على صوت فرات يغني ، رفعت راسي لگيته گاعد و صافن بالسگف و إيده بإيدي ...

- شكثر مشتاگ لو تدري
شكثر مشتاگ يا عُمري

- أبوس عيونك الحلوات
و أضم صدرك على صدري

لزمت إيده هو حَس و ألتفتلي ...

- الله يطيح حظي ، گعدتچ بصوتي المزنجر

ضحكت على حچيه ...

- ياريت يوميه أگعد من النوم على صوتك

- قريبًا تصرين يمي و أنومچ على صدري و أگعدچ على صوتي

- شلون صرت؟

- زين

سكتت و دنگت راسي ، وره شوي حچه ...

- ليش عفتيني؟

رفع راسي أباوعله مستغربه سؤاله ...

- مو عرفت السالفة

- إي أعرف ، بَس آني تأذيت بفراگچ

نزلت راسي ، كمل حچيه و گال ...

- باليوم أموت ألف موته عليچ والله ، و آني أشوف شلون كارهتني و متريدين تشوفين وجهي ، يجوز متتذكرين بَس أنتِ سمعتيني كلام شگ گلبي شگ

- عشگچ شيبني و آني شاب

- هاچ شوفي لحيتي و شعري ، شگد عفتيني مو ٣ أشهر تقريبًا ، چانت هاي أسوء فترة تمر عليه بحياتي كُلها

رفعت راسي أبلوعله ، صدُگ لحيته صاير بيها شوي شيب ، خليت إيدي على لحيته و هو لزمها و باس بطن إيدي ...

- آني يمك حَبيبي ، ما راح أعوفك مره ثانية صدگني

- أبد لتعوفيني

- هئ وداعت عيونك

أبتسم بتعب ، حچه ...

- أريد أنام

- مو ملاحظ أنك صاير تنام هواي !

- تعبان والله

- زين براحتك نوم العوافي

- راح أنام بَس مو تروحين ضلي هينه

- ما أروح يمك آني والله

خله راسه ع المخده و لزم إيدي خلاها على گلبه و غمض عيونه

***

مُهره
دخلت للغرفة باوعت شفت شهم بالبلكونه ديحچي بالتيلفون بَس چان ضايج ، وگفت ع الميز أرتب بالغراض و أسمعه چان صوته عالي ...

- إي سيادة الضابط ، هاي كُل المعلومات العندي نطيتكم ياها ، لا منعرفهم ، إي عدنه أعداء ، تمام أدزلك كُلشي برسالة ، يعني ماكو أمل نلگاه؟ ، خير إن شاء الله سيادة الضابط ، مع السلامة

دخل للغرفة عيونه بالتيلفون و عاگد حواجبه ، رفع راسه شافني و أنصدم ...

- أنتِ من شوكت هنا؟

- قبل شوية أجيت

راح شال اللابتوب و أخذه حتى يطلع ...

- شنو السالفة شهم؟

ألتفت عليه مستغرب ...

- يا سالفة؟!

- ويه منو چنت تحچي بالتيلفون؟

- ويه ضابط

- و شنو عندك ويه الضابط؟

أجه تقرب عليه ، خله إيده على وجهي ...

- شنو تحقيق هذا؟

- لا مو تحقيق بَس فضول

- شغلة تخص الشركة

- هااا

- إي ، حضري نفسچ العصر آخذچ نتونس

- مالي خلگ

- ميصير تبقين گاعدة بالبيت ، حضري نفسچ و ماعليچ

عافني و طلع ، ضليت أفكر على شنو چان يحچي ويه الضابط ، ما دخلت براسي سالفة الشركة

***

عشق
گاعده يم فرات و هو نايم ، ما أجه من گلبي أسحب إيدي عن صدره خفت يفز لأن هو نومه كلش خفيف ، الباب چان مردود ، أنفتح و دخل خالو علي ، باوع لإيدي لازمها فرات و مخليها على صدره ، أبتسم و آني گمت أباوع هنا و هنا من الفشلة ، حچه ...

- شلونه اليوم؟

- زين الحمدلله

- أخذ أدويته؟

- إي أخذها

تقرب من يمي ، حچه ...

- ديري بالچ عليه ، تره اللي صار بي هَد حيله و إن شاء الله ما يتكرر

ما جاوبت دنگت راسي ، رجع گال ...

- آني ما جاي أحچي وياچ هالحچي من باب الملامه ، بَس جاي أوصيچ ، تره فرات يحبچ أكثر من ما تتخيلين ، بعُمري ما شفت أبني بهالحالة حتى من ماتت ميس ما صار بي هيچ ، و هذا دليل على أنه يحبچ حيل

مد إيده و رفع راسي ...

- مثل ما فرات أبني ، أنتِ بنتي و أضوج إذا شفت أحد بيكم متأذي ، فـ ديروا بالكم على بعض

- فرات بعيوني خالو لتشيل همه

أبتسم و مسح على راسي ...

- عفيه بالسبعه

طلع و آني سحبت إيدي من إيد فرات بهدوء حتى ميحس ، طلعت نزلت جوه غسلت و رحت للمطبخ ، حچت خالة ...

- أجيتي و الله جابت حَبيبتي

- محتاجة شي خاله؟

- سويت ريوگ لـ فرات و أريدچ تاخذيله بلكت يقتنع من عندچ و ياكل

- صار خاله أنطيني ياه

شالت الصينية و نطتني ياها ، أخذتها و صعدت فوگ ، فتت و سحبت الطبله و خليتها عليها ، گعدت على طارف الچرباية ، مديت إيدي و مسحت على وجهه بدون ما أحچي شي ، شوي و فتح عيونه ...

- يلا دتتريگ جبتلك الريوگ

- ماريد ، بَس أريد أنام

- ميصير فرات لازم تاكل ، متشوف شلون جسمك كُله يرجف و مابيك حيل ، كُله من قلة الأكل ، يلا حَبيبي لخاطري گوم

- والله ماريد

- أوووف فرات لا تتعبني گتلك لخاطري

مديتله إيدي و ساعدته يگوم ، گعد و رچع ظهره ع المخدة ...

- عَجل تاكلين وياي

- تمام آكل وياك

- روحي جيبيلچ چاي

- ماريد

- ليش أحسچ جاي تسايريني !

- لنفرض جاي أسايرك عادي يعني

- آني مو طفل تا تسايريني

دفع الطبله عنه و گال ...

- شيلي ماريد

گال هيچ و دار وجهه

- فرات حَبيبي لتسوي هيچ ، ساعد نفسك حتى تطيب و ترجعلك عافيتك والله تعبت و آني أشوفك هيچ

ساكت و صافن بالشباك ...

- لازم تطيب حتى نتزوج بأسرع وقت ، يعني أنت متريد نتزوج؟

التفت عليه ...

- أنتِ شتگولين

- ما أعرف الظاهر أنت مطايقني و ماريد نتزوج

گمت و مديت إيدي حتى أشيل الصينية ، لزم إيدي و گال ...

- آكل بَس بشرط

- شنو؟

- أنتِ توكليني بإيدچ

جاوبته بإبتسامة : صار تدلل يـَ روحي

أبتسم و گعدت ، سويتله لفه زغيره و نطيتها أله و بقيت يمه لحد ما كمل و گمت نزلت الأكل جوه و رحت لـ غرفتي سبحت و غيرت ملابسي و رجعتله لگيته نايم ، گعدت أتأمله و أفكر شنو السر اللي خلاه يحبني لهدرجة هاي ، بهاي اللحظة تمنيت أحط راسي على صدره و أغفه بَس أكتفيت بلزمة إيده

***

ريان
گلبي أشتعل بنار من شفتهم ، شلون چان ميت و ردتله الروح بَس شافها ، راح كُلشي سويته ع الفاضي ، ما فاد كُلشي ما فاد ، ضليت رايحة راده بالغرفة ، فاتت رُسل ...

- أنتِ متگُليلي شبيچ تخبلتي؟؟

- رجعوا لبعض رُسل رجعووا

- إي أكيد يرجعون و تخيب كُل مخططاتچ الشيطانية

- رُسل من البارحة هي يمه بالغرفة راح أتخبل ، أكيد صار بينهم شي و يجوز أخذها أصلاً

- لاااا أنتِ الظاهر عقلچ ضرب ، شلون ياخذها و همه فاصخين الخطوبة تخبلتي أنتِ؟؟!

- إي فاصخين بَس بعد كم يوم راح يرجعون يعقدون و هذا ما يمنعه أنه ياخذها

- لتخافين ، فرات مو من طبعه يتقرب لـ بنيه مو حلاله

- عجلل شنوو چاانت تسووي بغرفتهه الليل كُللههه فهمينييي

- و أنتِ شعللييچ ، أنتِ بالذااات متتدخليين بييههمم ، ريان أحذرچ للمره الأخيرة ، أبعدي عن فرات و عشگ و خليهم يشوفون حياتهم ، لا والله أحچي كُلشي أعرفه

گالت هيچ و طلعت ، ضليت آني حايره ما أعرف شنو أسوي

***

عشق
مشت الأيام و أسبوع وره أسبوع لحد ما صار شهر و طول هاي الفترة آني ما عفت فرات و لا لحظة ، كُلشي يخصه من مسؤوليتي آني ، آني أوكله و آني أنطي أدويته و نومه آني نظمتله ياه ، كُل ميريد ينام أگعد أحچي وياه لحد مينسى النوم ، بهاي الفترة كلش تعلق بيه أكثر من قبل لدرجة إذا نام و گعد ما لگاني يمه يطلع يدورني بالبيت كُله و من يشوفني يگُلي إذا تعوفيني و آني نايم بَعد ما أنام ، بهذا الشهر تحسن فرات الحمدلله و رجعتله عافيته مثل قبل

اليوم چان لازم ارجع لشغلي لإن الإجازة اللي أخذتها خلصت ، گعدت الصبح توضيت و صليت و طلعت لغرفة فرات أبلغه أنُ اليوم راح أرجع للشغل ، قبل ما أدخل للغرفة سمعت صوته و هو يقره قرآن ، صوته يجنن و چان يتلوه بكُل خشوع و تميز ، دخلت لگيته گاعد ع السجادة و بإيده القرآن ، گعدت أنتظرة لحد ما كمل و صدق ، گام و حط القرآن ع الميز ...

- تقبل الله حَبيبي

- منا و منكم صالح الأعمال

گمت وگفت گدامه ...

- أجيت أگُلك أنُ إجازتي خلصت و اليوم لازم أرجع لشغلي

- إي بيها الخير ، عجل يلا بدلي تا أوصلچ بطريقي

- لا آني أروح شنو نسيت عندي سيارة

سكت بَس حسيته ضاج ، ردت أضيع ضوجته ...

- گلت بطريقي ليش أنت وين رايح؟

- للمعرض

- تگدر؟

- إي أگدر

- تمام لعد آني رايحة

مشيت و لزمني من إيدي ...

- أگفي

جرني و وگفني گدامه ، صار يباوع لوجهي و لكُل جسمي من فوگ لجوه ، بعدين دنگ و شال إيده فرك رگبته و حچه ...

- لا ماكو شي روحي

- أحبك زين لا تنسى

رفع راسه عليه و أبتسم ...

- ما أنسى والله

عفته و طلعت ...

********

يتبع ...

هالمره ماكو قفلة قوية ، حييل داريتكم بَس وراكم أحداث نااار تحضروا من هَسه🌚🔥🔥

18.kij
تعالو أنستا و اللي يجي يدخلي خاص يگُلي آني جديد علمود أضيفه كلوز لأن نشري اللي يخص الرواية كُله بالكلوز