رواية عشگ الفرات ( عِندما تَهوى القُلوب ) الفصل السادس والخمسون 56 - بقلم سحر الدليمي

بالبداية السلام عليكم و هاي عيديتكم و كُل عام و أنتو بخير
أخوان خلونه نتفق من هَسه ، هذا البارت و البارتات و الأحداث الجاية راح تكون صعبة عليكم فـ اللي أريده منكم ماريد أشوف هاي التعليقات مال " خرب واهسي بالرواية " ، " الرواية خربت " ، و إلى آخرهِ ، أخوان الرواية ما خربت هي هاي الأحداث مالتها صَح خيالية و راح تگُلولي تگدرين تغيرين الأحداث لا عيوني مگدر أغير كُلشي بيها لأن من البداية آني رسمت نمط معين للأحداث أمشي عليه ، فـ ياريت تصبرون و تضلون وياي و أنتوا ألكم الصافي ، حبيت أگُلكم ماضل شي و نختم الجزء الأول إن شاء الله
لا تنسون التصويت و التعليق بين الفقرات
قراءة مُمتعة ♥️

***

- ضاقت بِنا الأرض ، و أفترقت طُرُقُنا
فـ هل لنا عَودة يا الله؟ ، أم سنحترق بنار الإشتياق و الفُراق !

***

عشق
بدلت و كملت ، أجيت أحط عطر و چان يندگ الباب ...

- تفضل

أنفتح و دخل فرات ، شافني و أبتسم ، تقرب عليه ...

- قبل ما تطلعين ، نسيتي يمي شغلة مُهمة و جيت أرجعلچ ياها

- شنو هالشغلة؟

- يعني متتذكرين؟

صفنت شوي ...

- لا ما أتذكر

مد إيده بجيب الستره و طلع الگلاده مالتي اللي هداني ياها ، شالها و خلاها گدامي ...

- معقولة ناسيتها؟

- ما نسيتها و لا أنساها

- هاچ ألبسيها و ماريدچ تنزعينها نوبة ثانية

- و غلات عيونك ما أنزعها لحد ما أموت

- أنچبي و لا تضلين تمسلتين ، إذا عدتيها أنوب لسانچ أگصه أفتهمتي

- هاااا تره والله أزعل

- دزعلي هو الرضيان شمحصل

گالها و دار وجهها ديريد يطلع ...

- يعني معقولة يهون عليك زعلي؟!

رجع وگف گبالي و هالمره تقرب عليه كلش ...

- تهون الدنيا كُلها بعيوني و أنتِ ما تهونين

أبتسمت ، هو هَم أبتسم ، دنگ ديريد يبوسني ، خليت إيدي على صدره ...

- فراات ، لتتهور تره أحنه بعد ما عقدنه

أبتعد و حك شعره بضوجه ...

- إي صحيح ، شسمه ، عود سوقي على كيفچ و من تصلين خابريني

- تمام

- يلا آني طالع

- أوگف أنتظرني

شلت جنطتي و نزلنه آني وياه ، طلعنه للسيارات ، هو گعد على بنيد سيارته و چتف إيديه و صار يباوعلي ، رفعت إيدي و سويتله باي ، صعدت بالسيارة و مشيت ، هو بقى ينتظر خالو علي و خالو جسام لأن يروحون وياه

***

بَعد مرور يوم ...

شهم
گاعد بالمكتب عندي شغل ، بين ما آني مندمج باللابتوب ، أنفتح الباب و دخل عباس ...

- ششهممم ، شههممم ولككك ششهمم

- شمالك ولك ، صاير شي؟؟

- لا بَس أريدك توصلني وياك سيارتي بالتصليح

- إي و شبيك أجيت مثل المصروع

- هههههه ، شوكت تطلع؟

- بَس أكمل الملف اللي بإيدي

- ديلا أنتظرك

گعد ع الكُرسي اللي گبالي و بعدين گام يفتر بالمكتب ، ساعة يگلب بالملفات ، ساعة بالتحفيات ، ساعة يشغل أغاني ...

- عباس كافي وترتني تره

- هو شمسوي آني !!

- أگعد خل أعرف أركز

- و هاي گعدت أستاذ شهم

سكت شوي ، بعدين رجع گال ...

- ولك هَسه أبوي لو عرف سيارتي بالتصليح شيسوي بيه

- ليش عمي بكر ميدري؟

- لا

- صراحة لو يذبحك هَم ما ألومه

- هاي عود ردتك عون وياي طلعتلي فرعون

- دگوم يلا خلصت

- أهلهل؟

- أنچب و أثگل شوي

شلت سترتي و گمت ، طلعنه صعدنه بالسيارة و مشينه ، بين ما داسولف ويه عباس ، ما حسيت اله سيارة طبگت گدامي يا دوب لزمت بريك و وگفت ، نزلنه آني و عباس عليهم و نزلو ٤ شباب منها مسلحين ، ثنين لزموني و ثنين لزموا عباس ، حاولنه نقاومهم بَس ما گدرنه عليهم ، صاح واحد منهم موجه كلامه لـ عباس ...

- هاااا وييينه صاحبك السُني عنك ، والله لو يچتمعون السُنه كُلهم هنا ما يخلصونك من إيدي

شهم : لااا يااا حيوااان على هالسالفة ، هدووونييي ولككمم

- أندار عليه و بإيده السچينه وجهها عليه ، صاح عباس ...

- عووفه دُريد لتأذيه أنت شغلك وياي إذا رجال تعال صفي حسابك

شهم : وللكك يااا حسااب شجااي تمسللت أنت ، منوو ذوول

دُريد : هَسه تعرف منو أحنه ، لا تستعجل أبو الأكبر

گالي أبو الأكبر !! ، معناها هذا يعرفنه كلش زين ، عافني و راح لعباس ، حچوا و تعاركوا ، آخر شي هذا اللي أسمه دُريد طعن عباس مرتين ، تخبلت حاولت أفلت نفسي منهم أجتني ضربة على راسي دوختني و وگعت بالگاع

وره ما أعرف شگد ، صحيت بَس دايخ كلش و غواش على عيوني بالگوه أشوف ، گعدت على حيلي ، حطيت إيدي على خشمي لگيته ينزف ، باوع ليميني لگيت عباس مُغمى عليه و غرگان بدمه ، رحتله بسرعة ...

- عباااس ، وللككم عباااس

- گوووم حَبيبي لتمووت ولكك ، عباااس

ميرد عليه و نبضه ضعيف كلش على أي لحظة يوگف ، حاولت أشيله و أصعده بالسيارة ، أنتبهت للتواير مزرفيهن و مبنچرات ...

- لااا يا الله لاااا

بسرعة طلعت تيلفوني و دگيت ع الأسعاف و بلغتهم ، خليته بجيبي و ألتفتت لـ عباس ...

- تحمل ولك ، ديربالك تموت و تعوفنه

رحت للسيارة جبت قطعة قماش نظيفة ، خليتها على جرحه و ضغطت عليه بلكي يخف النزيف لأن هواي جاي ينزف

وره شوي و أجت الإسعاف ، نقلناه ع المستشفى و نزلت وياه ، اول ما دخلنه صار عبدالله بوجهي شافني و أجه عليه ، باوع لـ حالة عباس و تخبل ...

- عباااس ، وللكك خووية ، شصاارله شهم شبيي؟؟

- تعرضولنه جماعة بالطريق و طعنوا

خلاهم يدخلونه لغرفة العمليات و گال هو اللي راح يسويله العملية ، بَس اباوعله إيديه ترجف و خايف كلش ، الممرض أنتبه عليه ، حچه ...

- دكتور لو تخلي دكتور شاهين يقوم بالعملية هواي افضل ، ما أعتقد تگدر تسيطر و أنت بهالحالة

- لا لا ، أخوي آني أسويله العملية

- مو هو لأنه أخوك حذرتك ، عاطفتك راح تغلبك

- جهزوا غرفة العمليات بسرعة ، و جهزولي كمية دم لا بأس بيها ، صنف الدم O - ، بسررعة ماعدنه وكت

ألتفت عليه و حچه ...

- شهم بلغ أبوي لأنه جاي ينتظر عباس بالبيت ، هسه يضل باله

- زين ، عبدالله شد حيلك أنت گدها

- يلا يا الله

عافني و فات لصالة العمليات ، طلعت تيلفوني و بلغت الأهل ، حسيت بدوخة قوية لزمتني ، خليت إيدي على خشمي بعده ينزف لهسه ، ماكو ثواني و وگعت ما حسيت على شي

فتحت عيوني لگيت نفسي بغرفة ، گمت طلعت بره صار بوجهي أبوي ...

- هااا بابا شلون صرت هَسه؟

- آني زين ، عباس شوضعه؟

- بعده بالعمليات

- شگد صارله بالعمليات؟

- ساعة تقريبًا

گعدت يمهم و عمي بكر يلوب مو گادر يگعد و عمتي كل شوي داگه عليه آخر شي قفل جهازه ، ضلينه ننتظر فوگ النص ، أجاني أبوي بإيده تيلفوني ...

- مُهره جاي تدگ عليك ، جاوبها و طمنها وليدي

اخذته منه و جاوبت ...

- هلا حَبيبتي

- ششههمم ، ويينكك ، شلوونكك ، خوماا بييك شي؟؟

- مابيه شي حَبيبي لتخافين

- لعد ليش ٣ مرات أدگ عليك متجاوب؟!

- چنت نايم و قبل شوي گعدت

- يعني صايرلك شي ، شهم فدوة أحچيلي شبيك

- والله مابيه شي بَس أنضربت على راسي و دخت لذلك الدكتور أنطاني دوه خلاني انام

- يعني أكيد مابيك شي؟

- بوية والله مابيه شي لا يضل بالچ غاليتي

- و عباس شلونه؟

- بعده بالعمليات

- أي شي يصير خابرني ، و أنت لتبقى هواي تعال أرتاح

- صار

نهيت المكالمة وياها ، و طلع عبدالله من غرفة العمليات مهدود حيله ، راحله عمي بكر ...

- عبدالله ، هاا ابني طمني شلونه أخوك؟؟

نزع الكمامه و حچه ...

- الحمدلله بابا تجاوز مرحلة الخطر و گدرنه نسيطر ع النزيف

- يعني ماعليه خطورة؟

- لا الحمدلله ، بَس جروحه راح تاخذ وكت يلا تطيب ، يعني راح يتأذة شوي

- أگدر أشوفه هسه؟

- لا يابة متگدر ، خلي يرتاح و إذا صحى و شفت وضعه زين أخليك تشوفه

- زين

عافهم و أجه عليه ...

- هاا أبو الأكبر شلون صرت؟

- الحمدلله زين

- أگعد خل اشوف وضعك

- شافني واحد من الدكاترة مابيه شي

- ميخالف بَس أتطمن

***

عشق
فتحت عيوني و چنت دايخة كلش ، باوعت هاي آني وين ، شنو هذا المكان ، رفعت راسي لگيت فؤاد گاعد ع القنفة اللي گبالي ، حاط راسه بين إيديه و مدنگ

رجعت بيه الذاكرة ...
چنت طالعة من البيت متوجهه للشغل ، مشيت مسافة نص الطريق و فجأة طبگت گدامي سيارة فؤاد ، نزل و أجه عليه دگ الجامة ، فتحتها ...

- نزلي أريد أحاچيچ

نزلت من السيارة و وگفت گباله ، باوعلي نظرات حسيتها نظرات عتب ، حچه ...

- ما رديتيلي خبر

- بخصوص شنو؟

- أممم و ناسية هم ، بخصوص خطوبتي ألچ يا ست عشق

- فؤاد آني ماريد نرتبط ، أتمنى تتفهم

- هااا ترديني أتفهم؟

- ياريت

- حلو ، كلش حلو

باوع ليمينه و رجع باوع ليساره ، الشارع فارغ مابي أحد ، بسرعة و بحركة خفيفة منه طلع علبه و رش منها على وجهي و من بعدها وگعت و ما أعرف شصارلي

رجعت للوقت الحالي ، رفعت راسي و باوعتله ...

- فؤاد

رفع راسه ...

- صحيتي ، خوفتيني عليچ صارلچ هواي نايمة

- آني وين؟

- بدهوك

- دهوك؟؟ ، شنسوي هنا ، ليش أحنه هنا

- منا و رايح هذا مكاننا و هذا بيتنا

- بيتنا شنو ، شدتحچي انت !! ، رجعني للأنبار

- ماكو بَعد أنبار ، أنسي الأنبار و اللي بيها ، و فكري بَس بيه لأن راح تصيرين زوجتي

- تخبللت أنت ، شلوون اصيير زووجتتكك ، آنيي أحبب فراات و عن قرييب رااح نرجعع نعقد ، رجعنيي بسررععهه

- فرات فرات فرات ، شهر كامل و أنتِ تلعبين عليه بسببه ، گاعده يمه و عايفتني معلگ ، لا وافقتي عليه و لا رفضتي ، ولچ آني أحبچ و راح نتزوج غصبًا عنچ و فرات تنسي للأبد فااهمه

- أنت ليش دتسوي بيه هيچ؟؟

- ما أجيتي بالهداوة فـ جيتچ بالقوة ، أنتِ إليه عشق إليه فهمتي

عافني و طلع و آني ضليت أصيح وراه ...

- آنيي مو اللكك موو الكك ، رجعنييي للأنبااار رجعنييي ، والله تحللمم أتزووجكك

***

فرات
عشق صارلها من البارحة مختفية ، راحت للشغل و ما رجعت و آني عقل ماضل براسي ، وين راحت ، شصار وياها ، خايف عليها ، خايف صايرلها شي ، صگر و جماعته بلشوا بالتحقيق بإختفائها بَس ماكو نتيجة لحد الآن و آني راح أتخبل ، رحت للقسم أشوف شصار ، دخلت و بوجهي لمكتب صگر ، فتت لگيته يحچي بالاسلكي ، ضليت رايح راد بالمكتب حتى ما گدرت أگعد ، كمل و التفت عليه ...

- هاا فرات

- برد گلبي صگر و گُلي ما لگيتوها؟

- لا ، بَس بعدنه جاي ندور

گعدت ع الكرسي و خليت إيديه على راسي ...

- راح أتخبل صگر راح أتخبل ، وين راحت البنيه

- گول يا الله ، إن شاء الله نلگاها و مابيها شي

- شراح تسون هسه؟

- لازم نروح لمكان شغلها و نسأل الموظفين هناك ، بلكت يعرفون شي ، بَس المشكلة ما نندل المكان

- عمتي تندله

- خوش عَجل راح أدگ عليه و أسألها

- لا آني أدگ

طلعت تيلفوني و دگيت على عمتي ، دلتني ع المكان و سديته ، گمت طلعت و صگر طلع ينادي وراي ، ما رديت عليه ركبت سيارتي و مشيت ، أمشي و أدعي الله ألگاها ، ماريدها تضيع مني أنوب ، ما صدگت على الله رجعتلي ، مابيه حيل أخسرها والله ، بين ما جاي أمشي و عيوني ع الطريق لمحت سيارتها ، ركزت زين و گربت عليها ، إي والله هي سيارة عشگ ، طابگه على يمين الشارع ، وصلت يمها و نزلت ، چانت فارغة ، فتحت الباب و صعدت لگيت جنطتها ، فتحتها و چان تيلفونها موجود و غراضها كلهن موجودات ، طبگت سيارة الدورية و نزل صگر ، دنگ و فتح الباب ...

- هاي سيارة عشق !!

- إي سيارتها ، عشگي مخطوفة صگر مخطوووفة

نزلت و جنطتها بإيدي ، حچه ...

- شمدريك؟؟

- شوف جنطتها و غراضها و حتى تيلفونها كلشي موجود ، لو رايحة لفد مكان چان ما عافتهن بالسيارة

- بالله شلون سالفة هاي

- شنسوي هسه صگر

أندار للجنود اللي وياه ...

- شباب أريدكم تشوفولنه الشارع و البيوت المحيطة إذا أكو كامرات مراقبة علمود نشوف التسجيلات

- اصبر فرات ، هسه إذا أكو كامرات نشوف التسجيل و نعرف شصاير

***

مُهره
من الظهر و آني گاعده على نار أنتظر شهم ، و هسه صارت الساعة بالـ ٩ بالليل و محد بين لا عمي و لا شهم و لا حتى أتصلوا ، أتصل عليه ميجاوب خايفة لا صايرله شي ، بقيت رايحة راده بالغرفة ، شوي و أنفتح الباب و دخل شهم ، شفته و رحتله گُبل حضنته و هو هم حضني ، و خرت عنه و خليت إيدي على وجهه ...

- ليش تخوفني عليك شهم ليش؟؟

- آسف يـَ عُمري والله ما صارلي مجال أخابرچ

- ليش عيونك هيچ مورمات؟

- راسي يوجعني

انتبهت لـ قميصه بي دم ...

- شنوو هالدم شههمم؟؟

- بَس على كيفچ يا عيني ، ذوله اللي تعرضولنه بالطريق ضربوني على راسي و على أثر الضربه خشمي صار ينزف

- أوووف الله لا ينطيهم إن شاء الله ، يلا حبيبي بدل و نام حتى ترتاح

- مابيه حيل أبدل ، بَس أريد أنام

نزع القميص و ذبه ع القنفه و تمدد بفراشه ، چان كلش تعبان حتى ما گدر يبدل ، رحت گعدت بصفه و خليت إيدي على راسه و هو غمض عيونه ، ماكو دقايق حسيته نام ، غطيته و آني هم خليت راسي ع المخده و نمت

حسيت نص الليل على صوت شهم و هو يصرخ بأسم " أكبر " كعدت و باوعتله لگيته گاعد و يتنفس سريع ...

- ششهم ، شبييك ؟؟

- أكبر موزين ، أبني موزين

كال هيچ و گام طلع للبلكونه گمت لحگته ، چان واگف و يفرك برگبته و يردد " أبني موزين " لزمت إيده ...

- شبيك شهمي أحچبلي؟؟

- أكبر موزين والله موزين

- اششش حبيبي أهده على كيفك ، هذا حلم أنت چنت تحلم و أنت هم تعبان ، تعال نرجع ننام يلا حبيبي

رجعنه للغرفة و هو تمدد و عيونه بالسگف ، أعرفه هواي جاي يفكر بأكبر و مقهور ع الصار ، أعرفه يتمنى لو هسه يشيله بحضنه و يلاعبه ، جاي يحاول يخفي حزنه عني بَس آني أحس بي

***

فرات
بعد ما دورنه بالشارع و البيوت الگريبه على كامرات لگينه ٣ وحده بالشارع و ثنين ببيت من البيوت ، رحنه نشوف تسجيلات كامرة الشارع لأن كاشفة اكثر ، صگر حچه ويه المسؤول عن الكامرات اللي بالشارع و طلب منه نشوف التسجيلات ، من عرف أنُ هو من الداخلية وافق ، أخذنه للحاسبات و طلع ، گعد واحد من ربع صگر و شغل التسجيل ، قدمه لأن طويل ، شفنه سيارة عشگ چانت تمشي ، فجأة طبگت گدامها سيارة و نزل منها واحد ، أنتبهتله زين هذا فؤاد ...

- هذاا الحيووااان أبن عمهااا

صگر : أصبر خل نشوف شيصير

حچه وياها من الجامة بعدين نزلت وگفت گباله ، شوي و رش على وجهها ما أدري شنو ، وگعت و شالها و خلاها بسيارته و مشه ، تخبلت آني من الحرگه اللي بگلبي دفرت الكرسي و تكسر ، گام صگر لزم إيديه ...

- على كيفك يول لا أتخبل

- خطفهااا صگرر الحيووااان خاااطفهااا شلووون ترييدني ما أتخبللل

- بس على كيفك هسه بلكت نتعقب أثرهم و نعرف همه وين

گعدت ع الكرسي و هو راح يحچي ويه الجنود ، شوي و جه عليه ...

- گوم روح للبيت و آني أضل أشوف السالفة

- ما أروح صگر ما أروح

- گوم روح أحسلك أنت إذا ضليت وياي راح توترني و حتى ما أعرف أشتغل

- گتلك ما أولي

- دحگ عليه ، روح ع البيت و طمن عمتي

- شطمنها و هذا النذل خاطف البنيه

- ميخالف ع الأقل تعرف هي وين ، گوم فرات لا تور گلبي

عفتهم و طلعت للبيت ، وصلت هناك و فتت لگيتهم كُلهم گاعدين بالحديقة ، تلگتني عمتي ...

- فرات هاا وليدي طمني ما لگيتوها؟؟

- عمه عشگ مخطوفة

- يممههه تحمحمتي ( تصخمتي ) يـَ بدور ، شلوون مخطووفة يوول منوو خاطفهااا

- الحيوان اللي أسمه فؤاد

- فؤاد أبن عمها؟!

- إي عجل أكو غيره النذل ، من البداية گلتلها لا تتعاملين وياه ، أبتعدي عنه هذا مو راحة ، بَس ما طاعتني آخخخ بَسس آخخخ لو أگضبه أله أنعل سلفه سلفاه

گعدت ع الكرسي تدگ و تلطم أمي يمها تحاول تهدي بيها ، و آني أحس نفسي ضايع ، ليش خطفها ، معقولة يريدها !! ، إي عجل عليش خطفها ، بَس لا يسوي اللي ببالي ، لا يا ربي لا !

***

عشق
گاعده بالغرفة و الباب مقفول عليه ، سمعت صوت فؤاد يصيح من بره ، گمت و فتحت البرده لگيته ديحچي بالتيلفون و معصب ، فتحت البرده حتى أسمع شنو يحچي ، چان يگول ...

- بابا آني گتلك من زمان البنيه رايدها ، إي ليش متقبل أتزوجها بَس فهمني؟! ، لا لا بَس نتزوج تگوم تريدني ، يابة ترضى ما ترضى آني راح أتزوجها عشق راح تصير زوجتي عن قريب ، ما أتراجع والله لو تنگلب الدنيا ما أعوفها جاي أگُلك أحبها ، لا مو ببغداد آني ، ماعليك آني وين مو متريد تشوفني ، خلص خلص عيشوا حياتكم من دوني ما دام مو راضين على زواجي بعشق وجهي متشوفونه بعد

سد التيلفون و راح للباب حتى يدخل للبيت ، سديت البرده و الشباك و گعدت ع الچرباية ، والله لو يموت ما أتزوجه شنو قابل بكيفه الشغلة ، شوي و أنفتح الباب و دخل ...

- حضري نفسچ من هَسه ، باچر الصبح راح يجي الشيخ يعقدلنه و نتزوج

گمت على حيلي ...

- أنت خبل لو شنو فهمني ، جاي أگُلك ما اتزوجك ، ما أقبل بيك ، شنو غصب هي

- راح تقبلين

- و ليش واثق لهدرجة؟!

تقرب مني و دنگ يم أذني و همس ...

- إذا ما وافقتي عليه فرات يموت ، و آني أبد ما داشاقه

شهگت و خليت إيدي على حلگي ، باوعتله مصدومه ...

- مستحيل متگدر تسويها أنت مو قاتل و لا مجرم

- و منو گلچ آني الأسويها ، عندي ناس بالورق كُلشي يسون

- متسويها ما أصدگ

- بكيفچ لتصدگين ، بَس عندچ إستعداد تجازفين بحياته؟

- آني خطفتچ و جبتچ من الأنبار لدهوك يعني ما أگدر أكلف ناس يكتلوه؟

- عندچ منا لباچر ، فكري زين ، و إذا گلتي للشيخ لا ساعتها أعتبري فرات نايم بالگبر و أمه تنوح عليه

طلع و عافني بدوامة من الأفكار ، گعدت و الصدمة و الخوف على فرات أحتلني ، معقولة يسويها و يأذيه ، بَس فؤاد من هالنوع ، لعد و تهديده ، يا ربي آني شنو أسوي هسه

***

عبدالله
صارت الساعة بالـ 12 و كُلنه گاعدين يم عباس بعده ما صاحي ، سجاد بقى ويانه ما قبل يروح ، أما عمي حسين طلب منه أبوي يروح و عمي سلام راح ويه شهم لأن تعبان

أباوع لـ عباس بده يتحرك ، شوي و صحى و فتح عيونه ، باوعلي و گال ...

- أريد مي

- صار

صبيتله مي و شربته بهدوء ...

- هاا شلونك هسه خوما عندك ألم؟

- لا ما جاي أحس بشي

- هذا مفعول البنج بعده بجسمك

تقرب منه أبوي و باس راسه ...

- الحمدلله على سلامتك حبيبي

- الله يسلمك يابة

سجاد : الحمدلله ع السلامة ولك عبيس خوفتنه عليك

أبتسمله بتعب و جاوبه ...

- الله يسلمك حبيبي سجاده

ضحكنه آني و ابوي ، حچه سجاد ...

- ولك والله لو مو مريض چان عرفت شسوي بيك

- يلا ضملي ياها من أطيب

***

عشق
صار الصبح و آني الليل كُله ما نمته ، حايره شسوي ، أنحطيت بموقف كلش صعب ، إذا وافقت على فؤاد أخسر حُب فرات ، و إذا ما وافقت يمكن أخسر فرات للأبد ، يا ربي ساعدني مالي غيرك ، اجه فؤاد جايب وياه ريوگ طلب مني أتريگ بَس ما قبلت حاول وياي هم ما قبلت ، أخذ الصينيه و طلع و قفل الباب وراه ، وره شوي سمعت صوت السيارة يعني طلع

صارت الساعة بالـ 10 و باوعت من الشباك فات و وياه الشيخ و ثنين أعتقد شهود هذا اللي توقعته ، شكله مرتبها ويه الشيخ و حاسب حساب لـ كُلشي ، بقيت رايحه راده بالغرفة و أفرك بإيديه ، يا ربي شسوي هسه شسوي ، اوافق لو ما أوافق والله راح أتخبل ، أنفتح الباب و دخل فؤاد ...

- يلا لبسي شالچ و تعاي الشيج يريدچ

- ماروح ماروح عوفني

أجه عليه و لزمني من زندي بقوة ، حچه و هو صاك على أسنانه ...

- اليوم راح تصيرين زوجتي و يصير اللي أريده ، و ألا فرات و أمچ تقرين عليهم السلام

- أمييي شدخللهااا أنت لييش لهدررجة حيووااان

- هذا التجاوز بعدين أطلعه من عيونچ ، راح أروح أحسب ٣ دقايق إذا ما أجيتي بتيلفون مني أنهي حياة حبيب الگلب و الوالدة

طلع و عاف الباب مفتوح ، بقيت أبچي و حايره شنو أسوي يا ربي ساعدني ...

********

يتبع ...

هااا أيها الشعب الفراتي شلونكم؟
حلوه هاي مال الشعب الفراتي راح أعتمدها منا و غاد
المهم سولفولنه توقعاتكم بَعد گلبي ، و چثرولنه تعليقات نفس اليارت السابق حيييل چان الدعم حلو عاشت إيدكم

18.kij
تعالو أنستا و اللي يجي يدخلي خاص يگُلي آني جديد علمود اضيفه كلوز لأن نشري اللي يخص الرواية كُله بالكلوز

سحر الدليمي