رواية عشگ الفرات ( عِندما تَهوى القُلوب ) الفصل الرابع والخمسون 54 - بقلم سحر الدليمي

هلووو شلونكم ، هالمره ما تأخرت عليكم
لا تنسون التصويت و التعليق بين الفقرات
قراءة مُمتعة ♥️

***

- بَعد إيش راجع؟ ، بَعد چويات گلبي و لوعات الفراگ
بَعد سهام غيضك الصوبن دلالي

بَعد إيش راجع؟

***

- راح أموت يابة

گال هيچ و چان يگع بين إدين عمي ، بسرعة لزمه و خلاه بحضنه ، عمتي تخبلت من شافته هيچ ...

علي : فراات أبنيي ، رد علييه ولييديي

نجاة : راااح الولد عليي راااح

- بَس على كيفچ لا تفاولين عليه

أدحگله صار بالگوه يجر النفس ، عمي يحاول يصحي بَس ما جاي يصحى ، حضنه لصدره و صار يردد ...

- لا بابا لا ، لا فرات ، شو گوم وليدي

خلاه على رجله و طلع تيلفونه و دگ ع الإسعاف ، عمتي نجاة گعدت يمه و صارت تمسح على شعره ...

- گوم حَبيبي ، گوم وليدي لا تسوي بأمك هيچ

تگطع گلبي عليها ، شوي و جت الإسعاف و أخذوه ، عمتي لبست عباتها بسرعة و لحگوه هي و عمي للمستشفى

وصلوا المستشفى و گعدوا ينتظرون ، علي دگ على صگر و بلغه ، شوي و وصل صگر ...

- هاا يابة شكو؟؟

- أخوك تخربط

- شلوون تخرربط و لييش !!

- مدري ، هيچ فجأة وگع بين إديه

- و شلونه ه‍سه؟

- مدري الدكتور يمه

طلع الدكتور وره شوي و سألوا عن حالته و گال ...

- وضعه مو تمام أبد ، گلبه ضعيف ، هَسه خلينا بالإنعاش و نشوف شراح يصير بعدين

صگر : دكتور خوما عليه خطر ، أحجيلنه كُلشي لا تغبي علينه شي

- حاليًا ما عليه خطر بَس وضعه مو مستقر و إذا ضل هيچ لازم نسويله عملية ، شوفوا هالمره طلع منها سلامات تره المره الثانية إذا وگع ميطلع منها سلامات فـ ديروا بالكم عليه زين ، وضعه حساس

و ضل فرات يومين بالإنعاش و أهله محاوطينه و الخوف مسيطر عليهم ، ثالث يوم طلعوا لـ غرفة عادية ، نجاة ما قبلت تروح أله تشوفه و تطمن عليه ، گاعدة يم راسه و تدعي الله يگومه بالسلامة ، حچه علي ...

- صگر وليدي أخذ أمك و رجعها للبيت ، كافي صارلها يومين بالمستشفى

- لا علي أريد ابقى يم فرات لحد ما يصحى

- احنه يمه و من يصحى يجوز يطلعونه ، أرجعي للبيت زحمة ضلتچ هينه

بالبداية رفضت بَس بعدين گدر يقنعها ، أخذها صگر و راحوا للبيت ، علي ضل گاعد يم فرات ، مدنگ و مخلي إيده على راسه ، فرات فتح عيونه بَس چان تعبان حيل إيده ميگدر يرفعها ، ألتفت شاف أبوه يمه ، همس بصوت مبحوح ...

- يابة

علي رفع راسه و أبتسم ...

- هلا يـَ روح أبوك ، الحمدلله على سلامتك وليدي

- أريدها بابا

- شلونك هَسه گُلي؟

- گلبي يوجعني

- أروح أناديلك الدكتور

- لا ، گلبي يوجعني عليها

- يول يابة كافي جوز منها مو راح تموت نفسك من وراها

- أريدها يابة ، جيبلي ياها أشوفها الله عليك

سكت علي ما جاوبه ، و فرات رجع غمض عيونه ، أبوه تقرب منه و باسه من راسه ...

- كافي مو والله مردت گلبي عليك يابة

شوي و جاهم رافد ...

- هااا عمي شلونه؟

- توه صحى و رجع نام

- حچه شي

- ما على لسانه غير أسمها

***

عشق
من يوم ما سمعت أنُ فرات متمرض و آخذينه للمستشفى و كلامه من گال " تأكدي إذا متت فـ من وراچ أنتِ " كلامه هنا بعده يتردد بمسامعي ، أجت امي و گعدت گبالي ، حچت ...

- شنو من گلب عندچ أنتِ؟

- ماما فدوة ...

- اششش خليني أحچي ، شسوه بيچ الوليد و هيچ أذيتيه ، والله بحياتي ما شفت حُب مثل حُب فرات لچ ، ليش هيچ أنتِ أنانية؟

- ماما آني مو أنانية

- لعد شنو هاا ، أنتِ ناوية تخربين علاقتي ويه أخوية ، تدرين بهالدنيا هاي كُلها عَلي ماكو أغلى على گلبه من ولده و أنتِ أذيتي واحد منهم ، إذا مات فرات أنتِ السبب و عَلي ما راح يدحگ بوجوهنا و لا يسامحنه و بالأخص أنتِ و هذا خالچ اللي تحبينه

گالت هيچ و گامت

***

شهم
صارلي ٣ أيام أدگ على فرات بَس ميجاوب ، ضل بالي يمه كلش خفت و گلبي ما مرتاح ، رحت لـ مكتب عمي حسين ، دگيت الباب و فتت ...

- عمي بَس أريد أسألك سؤال

- گول وليدي شعندك

- فرات صارلي أيام أدگ عليه ما جاي يرد ، تواصلت وياه او ويه عمتي؟

- ليش أنت ما تدري؟!

- بشنو ما أدري؟!

- شوف آني تواصلي ويه عمك علي و گالي أنُ فرات متخربط و ناقلينه للمستشفى و صارله أيام نايم مستسفى

- تحچي صدگ عميي؟؟؟

- إي

- و آنـه لييش محد گليي !!

- توقعناك تدري

- من رخصتك عمي

طلعت من المكتب رحت لمكتبي و آني أحس گلبي أشتعل بنار ، فرات يوگع و محد يگلي ، مبقيني مثل الأطرش بالزفة ، ما گدرت أگعد بقيت رايح راد ، أنفتح الباب و فات. عبدالله ...

- شهم شبيك؟

أنداريت عليه : گليي أنت تدرييي؟؟

- بشنو ، شبيك ولك؟!

- تدرري بووگعة فراات؟

- إي

- و ليش ما گلتلي؟

- مادري حسبالي تدري

- عبدالله لا تخبلنيي ، يعني آنيي لو أدريي أبقى مبرد أعصاابي

- هَسه أنت أهده و تعوذ من الشيطان و أدعيله بالشفاء

- شلونه؟

تنهد و گال : گلبه تعبان كلش أله مخلينه بالإنعاش

- أوووف يا ربيي أووووف

سكتت بعدين رجعت گتله : عبدالله روح أنت شوفه أنت تابع حالته

- بدون متگلي آني مفكر أروحله

- شوكت تروح؟

- ما أعرف بَس هاليومين ، أنت تجي؟

- يمكن ما أگدر ، عندي شغل هواي و ما أگدر أعوفه ، بَس والله رايد اروح اشوفه و أتطمن عليه

ضلينه نسولف بعدين أجاه شغل و طلع ، آني خلصت كم شغلة و طلعت للبيت

مُهره
أجه شهم من وقت حَتى قبل عمي ، سلم و طلع للغرفة چان ضايج كلش ما حچه شي غير السلام ، أستأذنت من عمه و رحت وراه ، فتحت الباب و دخلت لگيته واگف و داگ أديه ع الميز و مدنگ ، رفع راسه و نزع العگال و الشماغ ، عدل شعره شلون مچان و راح گعد ع الچرباية ، رحت گعدت بصفه ...

- شبيك حَبيبي شنو هالحالة؟

ألتفت عليه و حچه بقهر ...

- فرات متخربط و صارله أيام بالمستشفى

- صدگ؟!

هزلي براسه …

- و شلونه هَسه؟

- مادري

راح لفراشه تمدد و غطه عيونه ، آني گمت طفيتله الضو و طلعت

***

ثاني يوم طلعو فرات من المستشفى بَس مو فرات الأولي ، تعبان حيل حتى الأدوية ما جاي تفيده ، ريان من شافت وضعه أنقهرت و صارت تلوم بنفسها تعتقد أنُ سبب حالته هاي هو السحر اللي سوتله ياه

ريان
لليل و آني أريد فرصة حتى أشوفه بَس ما جاي يعوفونه وحده ، أنتظرت لليل عمي علي گاعد يمه ، ضليت سهرانه و أنتظر للساعة ٣ و هو يمه ميگدر يعوفه وحده ، طلعت من غرفتي و توجهت لغرفته ، وگفت يم الباب چان مردود رد ، شفت عمي غطاه زين و خله إيده على راسه عرفته يريد يطلع ، رجعت للغرفة أنتظر شوية و بعدين رجعت لغرفة فرات ، فتت و سديت الباب ورايه ، گعدت بصفه و لزمت إيده و إيدي الثانية خليتها على راسه ، صرت أمسح على شعره ، شوي و فتح عيونه بتعب ، شافني و عگد حواجبه ، حچه بتعب ...

- أطلعي منا

- ما أطلع أريد أضل يمك فرات

حاول ينهض نفسه حتى يگوم بَس ما گدر ، سحب إيده مني و رجع غمض عيونه ، رجعت لزمت إيده و همست يم أذنه ...

- راح أبقى يمك مستحيل أعوفك وحدك

من بعدها نام و ما حس أبد ، ضليت يمه للساعة ٦ بعدين رجعت لغرفتي خاف أحد يجي

***

عشق
چنت طالعة من الشغل وره ما كملت ، طلعت متوجهه للسيارة و شفت فؤاد طابگ سيارته بصف سيارتي و گاعد ع البنيد ، من شافني أجه عليه ، نزع النظارة و حجه و هو مبتسم ...

- شلونچ بنت العم

- الحمدلله و أنت؟

- بشوفتچ آني كُلش زين

- شنو جابك هنا؟

- أجيت أسألچ ، فكرتي باللي گلتلچ عليه؟

- لا بعدني

- تمام على راحتچ ، رايحة للبيت مو؟

- إي

- الله وياچ

عفته و صعدت سيارتي و توجهت للبيت

***

نجاة چانت گاعده يم فرات ، تشوفه شلون جاي يذبل شوي شوي بَس ما بيدها شي عليه غير الدعاء ، انفتح الباب و فات عَلي ...

- ها شلونه؟

- على حاله

- ما أكل شي؟

- هو گعد حتى ياكل

تنهد و جر نفس ، رچه ظهره ع الحايط و چتف إديه و ضل يدحگ على نجاة ، حچت ...

- شفت ، شفت شلون عشق عايشة حياتها بالطول و بالعرض ، شغل و سيارة و طبه و طلعة و لا هامها ، و أبني أنسلبت عافيته و گاضيها من دكتور لـ دكتور !!

- أششش ، أسكتي ديربالچ تحچين هالحچي گدامه ، سمعتي الدكتور شگال ، القهر يأذيه ، چان هالمره الله فكه المره الجاية ما يطلع سلامات ، خلي بلكت ينسى

- شينسى و هو حَتى بنومه يهذي بأسمها ، دمرته ، دمرته و راحت

- سايم جاه الله عليچ يـَ مره تگضبين لسانچ گدامه ، ماريده يسمع بطاريها فرد نوب أريد أنسي ياها تا بلكت ترجعله عافيته

قاطع حديثهم تيلفون علي من دگ ، چان عبدالله ...

- هلا عبدالله

- بالمهلي عمي شلونك؟

- على الله وليدي

- ما غير الله ، عمي بلا زحمة بَس فتحولي الباب لأن آني وصلت

- إي زين يابة طالعلك

سد التيلفون و گال ...

- هذا عبدالله وصل

عبدالله
وصلت و طبگت سيارتي و نزلت ، اول ما باوعت شفت سيارتها عرفت موجودة ، طلعت تيلفوني دگيت على عمي علي بلغته أني وصلت ، شوي و طلعلي ، سلمت عليه و فتنه جوه ، بدون ما أگعد طلعت بوجهي لغرفة فرات ، فتت لگيت عمتي سلمت عليها ، و گعدت يم فرات لگيته نايم ...

- من شوكت نايم؟

- من البارحة ، ينام و يگعد شوية و يرجع ينام و من نگعده يضوج

باوعت عليه ، فرات منتهي فعليًا ، ما أعرف اوصف الحالة الشفته بيها بَس چان كلش تعبان ، مديت إيدي و خليتها على راسه ، گعدته ، گعد بصعوبه ، فتح عيونه و باوعلي و رجع غمضهن ، حجيت وياه حتى ميرجع ينام ...

- هااا فراتي شلونك

تقصدت أعلي صوتي حتى افززه ، رجع فتح عيونه و باوعلي بَس ما رد ، نهض نفسه و ساعدته رچه ظهره ع المخدة و باوع لعمتي ...

- عشگ ما جت؟

- لا

- ما درت باللي صارلي؟

- درت بَس ما أجت ، أجت عمتك بَس ، شافتك و راحت

رجع راسه ليوره و جر نفس بصعوبة و غمض عيونه ...

- فرات باوع عليه شو

فتح عيونه باوعلي ...

- سولفلي بشنو تحس؟

- گلبي بوجعني

- و أنوب؟

- تعبان و حيل مابيه

- عاجبك بَس تنام مو؟

- إي

باوع لإيده و أجه يفصخ المغذي ...

- اوكف شدتسوي؟

- ماريده

- زين جيب آني أفصخلك ياه

لزمت إيده حاى أفصخله المغذي ، چانت ترجف و دمارات إيده مبينه ، فصختله المغذي و گال ...

- أريد أنام

- لا متنام ، لازم تاكل

- مالي نفس عبدالله

- ميصير لازم تاكل حتى لو بَس شوية

أنداريت لعمتي ...

- عمه أكل بلا زحمة عليچ ، و يُفضل يكون عصير و بسكت او كيك

- چا يمه آنـه گلت أسويله شوربه

- لا عمه يا شوربة ، منگدر ننطي هيچ مأكولات لازم أكل خفيف

- زين يمه شوي و أجي

راحت عمتي و أجه عمي علي گعد بمكانها ، حچه ...

- حَبيبي شلونك اليوم؟

- بشوفتها أصير زين

- يا بهض هالطلابة الما تخلص ، يول يابة كافي عوفها

باوعت لعمي و أشرتله يسكت هو فهم قصدي و سكت ، شوي و جابت عمتي صينية بيها ماعون بسكت و گلاص عصير ، أخذتها منها و خليتها گدام فرات ، قنعته ياكل ، أكل شوي و گال بَعد ماريد ، بَس جبرته يكمل العصير حتى بلكي يرجعله حيله لأن الأدوية وحدها ما تنطي نتيجة ، نطيته أدويته و نام ، عمتي بقت يمه و آني و عمي طلعنه نزلنه للهول ، حچه عمي ...

- هاا أبني شلون شفته؟

- والله عمي ما أضم عليك ، حالته كلش موزينه

- و الحل هَسه شنو شنسوي

- أول شي أسوي راح أغيرله الأدوية لأن هاي النوعية جسمه مگاعد يستجيب الها و نشوف إذا ما تحسن گلبه نضطر نسويله عملية

- و العملية خوما خطره؟

- والله يا عمي عملية قلب طبيعي يكون بيها خطورة

دنگ راسه و فرك وجهه بإيده ...

- عمي أهم شي لا تضغطون عليه و لا تقهرونه ، شنو يگول سايروه

***

ريان
مر شهر و فرات ما جاي يتحسن و لا يصير تغيير بحالته ، آني تخبلت معقولة السحر أله علاقة بمرضه ، لأن هو قبله ما چان بي شي نهائيًا ، رحت لـ غرفتي و قفلت الباب طلعت تيلفوني و دگيت على هاي المره اللي سوته حتى نسيت أسمها ، يدگ يدگ و متجاوب ، رجعت دگيت عليها أنوب تأخرت يلا جاوبت …

- وينچ صار ساعة أدگ ماكو

- منو أنتِ؟

- ريان

- شتريدين

- العمل اللي سويتي لفرات شنو نوعه ، احچي و بدون چذب

- هاي شبيچ يابة ، غير أنتِ تريدين عمل محبه و سويتلج ياه

- محبه شنوو ، الرجاال من يووم اللي أنطيتهه العملل و هو أنسلبت عافيته ، تمرض و وصل للموت أحچيي شنوو مسوويه أنتِ؟؟؟

- شلون يعني تمرض؟

- تمرض تمرض يعني شلونوون !!

- يعني قبل العمل ما چان بي شي؟

- لا كُلشي مابي

سكتت ما جاوبت ، صحت بيها ...

- متحچيين شمسوويه أنتِ؟؟

- ما ادري ما أدريي

- فكي السحر عنه بسرعة

- مافكه

- ليييشسش؟؟؟

- ما اعرف ، و لا تدگين عليه مره ثانية

ردت أحچي و چان تسده بوجهي ، تخبلت ، تأكدت أنُ العمل اللي مسويته هو لأذية فرات مو تا يخلي يحبني ، يا ربي آني شسويت شجابني على هالسالفة ، الله ليوفقچ ريهام ورطتيني ، شلون إذا مات يربي والله ما أتحمل أذيته آني ، طلعت من غرفتي و رحت لغرفته ، ما أهتميت خاف أحد يشوفني ، عقلي چان واگفي عن التفكير بأي شي سوا باللي راح يصير لـ فرات ، فتت و سديت الباب ، چان نايم ، گعدت بصفه و خليت إيدي على گصته ، بچيت بحرگه ، ما أتخيل يموت و أخسره و فوگ كُل هذا آني اللي تسببت بموته ...

- حَبيبي گوم ، والله ما قصدي أأذيك ، چان كُل همي تحبني مثل ما آني أحبك

- فرات

- سامحني ، والله آني أحبك و ما أشوف أي رجال ثاني غيرك

دحگت لأيده چان بعده لابس حلقته و مو نازعها ، تعجبت على كمية الحُب العندة إتجاه عشق ، صارلهم هواي من فصخو الخطوبة و هو ليهسه لابس الحلقة ، يا الله شگد تمنيت أكون آني بدال عشق و هذا الحُب اللي بگلبك كُله ليه ، مسحت دموعي و گمت ، فتحت الباب و صار بوجهي عبدالله ، من شافني عگد حواجبه بإستغراب ، تعديته و طلعت رحت لـ غرفتي ، گعدت و ضليت أبچي و حايره شسوي شلون أصلح هاي الغلطة اللي ممكن ثمنها يكون حياة فرات

***

بدور چانت تعزل بغرفة عشق و هي بالدوام ، رتبتها و وصلت للچرباية شالت المخده و فتحت السحاب حتى تبدل وجهها ، شالت الوجه و وگع من عنده صُره سوده ، شافتها و أستغربت وضعها ، حطتها گدامها و ضلت تفكر شنو هاي و شجابها لمخدة عشق ، أنتظرت عشق لحد ما جت من الدوام و سألتها عنها ...

- عشق تعرفين شنو هاي؟

- لا شنو هاي؟!

- مادري لگيتها بالمخده مالتچ ، يعني مو أنتِ مخليتها؟

- لا ماما أصلاً ما أعرف شنو هاي

سكتت و الحيرة سيطرت عليها ، رجعت حچت بقلق ...

- بَس لا الخايفة منه

- شنو الخايفة منه؟

- سِحر

- سِحر؟؟!

- إي ، گومي بدلي تا تروحين وياي

- وين رايحين بهالظهرية ماما شسالفة؟!

- عشق گومي بدلي و لا تناقشيني تره روحي واصله لهنا

راحت تبدل و عشق هَم بدلت و طلعن ، راحن لـ سيد مُختص بهالسوالف ، أنطته بدور هاي الصُره و سألته عنها و بالفعل طلع سِحر ، تخبلت من سمعت ، السيد فك السِحر عن عشق و عَزم عليها و رجعن للبيت ، و من يومها و عشق تغير وضعها ، صارت تبچي على أدناة سالفة و أكلها قل و دوامها تركته

***

عبدالله
اليوم أجه شهم حتى يشوف فرات ، هو طول هالمده چان يومية يخابرني يسأل عليه ، شگد حاول يحچي وياه بَس فرات ما گدر ، و اليوم طلعت روحه و عاف شغلة و أجه ، شاف فرات بَس ما حچه وياه لأن چان نايم ، كالعادة أغلب وقته نايم ما يگعد بَس من أنطي الأدوية ، وره الظهر و گال شهم ...

- آني راح أروح عبدالله ، هَم يالله و يالله أوصل عندي شغل

- آني هَم جاي وياك

- و فرات؟

- ماكو داعي أبقى يمه أكثر ، هي السالفة بقت يمه و يم الأدوية لو يستجيب ألها لو تتأزم حالته أكثر و ميبقى گدامنه حل غير العملية

دنگ راسه و فرك عيونه بقهر ، حچيت ...

- هاا نمشي خوية؟

- يلا

طلعنه ودعناهم و صعدنه سيارتانه و توجهنه للبصرة

***

مر أسبوع كامل من فكو السحر عن عشق و هي نفس الحالة بَس بچي و تصيح راسي يوجعني ، گاعدة بالغرفة وحدها حاضنه رجليها و دموعها ينزلن بهدوء ، دخلت أمها و گعدت يمها ...

- كافي أمي أنتِ ، كافي بنيتي ، كافي تسوين بنفسچ هيچ

التفتت عليها و حچت و الدمعة بعينها ...

- أحنه شجابنه هنا؟

- أنتقلنه لبيتنه ، تركنه بيت خوالچ

- من شوكت؟

- صارلنه تقريبًا شهرين

سكتت و داورت عيونها تتفحص الغرفة زاوية زاوية ، رجعت لأمها و حچت ...

- فرات وين ، أشتاقيتله كلش

- ليش أنتِ متتذكرين الصار

- شصار؟

- أنتو فصختو الخطوبة وكل واحد راح بحال سبيله و أنتِ اللي طلبتي ننتقل هنا تا ما تشوفين فرات

هنا أنفجرت بالبچي و صاحت ...

- شلووون ، شلللووون نفصخخخ الخطوووبة و آنييي أحبهه و هوو يحبنييي ، ماماا شلوون راااح اتخببلل والله

- أش ماما اش آني أحچيلچ كُلشي

و گعدت أمها تحچيلها كُلشي ، من سوولها العمل و صارت تكره فرات و شلون هي طلبت منه يفصخون الخطوبة ، هنا رجعت ذاكرتها و تذكرت كُلشي ، زادت بالبچي و صارت تضرب على وجهها و تصيح " آني شسويت ، شلون هيچ سويت بي " إلى أن حضنتها أمها و صارت تقره عليها آيات ، هدأت شوي و وخرت عن أمها ، حچت بالگوة من الشهگه اللي بصدرها ...

- أريد فرات ماما ، خابري خل يجي

- ميگدر

- ليش؟!

- مريض و صارله شهرين نايم بالفراش

- من ورايه مو؟

أمها سكتت ما جاوبتها ، رجعت تبچي و تردد ...

- شسويت بي آني شسويت ، دمرته ماما آني دمرته

- أشش بنتي كافي أنتِ مالچ علاقة اللي صار مو ذنبچ و لا بإيدچ كافي حَبيبتي

جاوبتها بتوسل و هي تبچي ...

- أخذيني أله ماما ، الله يخليچ اريد أشوفه

- تگدرين تسوقين لو أخابر أحد من الولد يجي ياخذنه

- خابري ما أگدر أسوق

عشف
راحت ماما تخابر على أحد من الولد يجي ياخذنه ، گمت بدلت شلون ما چان ، فكري كُله يم فرات ، شوي و ماما أجت گالت رافد وصل ، طلعت و صعدت بالسيارة و بقيت أفكر ، هسه إذا شفته شنو أگُله؟ ، شلون أبرر اللي سويته وياه ، آني كسرته و كسر العشگ ما يجبر ، وصلنه البيت و آني نزلت و فتت قبلهم ، كُلي لهفة و شوگ لشوفته رغم ما أدري شنو راح تكون ردة فعله بَس المهم عندي أشوفه ، ردت أصعد الدرج و وگفت گبالي خالة نجاة ...

- لتروحيله بنتي ، خلي ينسى اللي صار بلكي تردله عافينه

- بَس أشوفه والله خالة ، فدوة أروحلچ

بدور : نجاة خليها تروح تشوفه ، يجوز يگدرون ينسون اللي صار و يصلحون اللي أنكسر

- اللي أنكسر گلب أبني يـَ بدور

- أنطي فرصة لعشق يمكن تگدر تجبره

بدون متحچي شي وخرت عن الدرج و آني گُبل صعدت ، وصلت لـ غرفته و گلبي صار يدگ سريع ، خوف و قلق و شوگ و حُب و لهفه لشوفته و شوفة عيونه اللي أحبهن ، يا الله شگد إشتاقيتلهن ،
دخلت للغرفة ، چان نايم و هواي أدوية محطوطه ع الميز و المغذي مشكل بإيده ، جريت كُرسي و گعدت بصفه ، لزمت إيده اللي بيها الكانونه و صرت أباوع عليه ، شوي و فتح عيونه بالگوة ، باوعلي و أبتسم بعز مرضه و تعبه ، همس بصوت ناصي و مبحوح ...

- جيتي

- آني آسفه

- على شنو؟

- ع اللي صار

- ليش قليل اللي صار؟

- مو قليل والله أعرف اللي سويته بيك مو قليل ، بَس والله مو بإيدي

- و هَسه شتريدين؟

أستغربت من برودة أعصابه ، چان يحچي بتعب بَس بدون ميباوعلي ، حچيت بغصة ...

- سامحني فدوة

سحب إيده من إيدي ، نهض نفسه و رچه ظهره ع المخدة ، ألتفت عليه و حچه ...

- على شنو أسامحچ بالضبط؟

- على كسرت گلبي؟ ، لو ع الوعد اللي خنتي و تخليتي عني بكُل سهولة؟ ، لو ع الحچي اليجرح السمعتيني ياه؟ ، على شنو تريديني أسامحچ ، يولي ايام و آني متلهف على شوفتچ أريد بَس أشوفچ ما أگدر ، أتوسل بيهم يجيبولي ياچ تا أشوفچ يگُلولي متقبل تجي ، ليش هيچ ، فهميني آني شسويتلچ حتى تقابليني بكُل هذا الكُره و الحقد ، أنتِ رجعتيني للصفر عشگ ، للصفر رجعتيني

- فرات ...

قاطع كلامي من گال ...

- أطلعي بره و لا تشوفيني وجهچ

- فرات بَس أسمعني

- گتلچ بره

- بَس خل أحچيلك آني والله ...

قاطعني من عاط بصوت رج البيت رج ...

- گتللللچ أطلعيييي بررررره

أخذ الگلاص الچان ع الميز و شمره بالگاع قريب من رجليه ، تطشر و تناثر القزاز ، ع الصوت أجو ماما و خالة و وياهن صگر ، راح لـ فرات لزم إيده اللي بدت ترجف بقوة ...

- على كيفك فرات على كيفك ، أخذ نفس ، دحگ عليه

- طلعها صگر ، الله عليك خليها تطلع ماريد أشوفها

- زين حَبيبي أنت بَس هَدي

ألتفت عليه صگر و باوعلي بنظرات يتوسلني أطلع ، عفتهم و طلعت أبچي ، كُله من إيدي آني دمرته و خليته هيچ يكرهني و ميريد يشوفني

***

ريان
بعد ما فكو السحر عن عشق و حالة فرات اللي كلمالها تصير أسوء ، صرت أفكر شلون افك عنه السحر قبل ميفوت الآوان و يكتله ، أگُللهم ، بَس شنو و شلون أگُللهم ، جت ببالي رُسل هي الوحيدة اللي أگدر أحچيلها بلكت تگدر تساعدني ، رحت لغرفتها ، دخلت لگيتها جاي تبدل لـ سيف ، أنتظرتها تكمل ، راحت خلته بالسرير مالته و أنطته دبدوب صغير حتى يتلهى بي ، جت گعدت يمي و جچت بقلق ...

- هااا ريان شبيچ أكو شي؟

بلعت ريگي بالگوة ، حچيت ...

- آني سويت شغلة موزينة و لازم أگُلچ عليها ...

********

يتبع …

18.kij
تعالو أنستا و اليجي يدخلي خاص و يگُلي علمود أضيفة كلوز لأن كُلشي يخص الرواية أنشره بالكلوز فقط

سحر الدليمي