رواية عشگ الفرات ( عِندما تَهوى القُلوب ) الفصل الخامس والستون 65 - بقلم سحر الدليمي

لا تنسون التصويت و التعليق بين الفقرات
قراءة مُمتعة 💜

***

- هانت يـَ ولفي و باچر تنام أعلى صدري
باچر تهلهل ألنه نجوم السما و تغنيلنه الگمره

***

عبدالله
من سمعت أن ريان تزوجت أحس كلبي أنشلع والله ، ظلمت الدنيا عليه و حتى شغلي هملته گلت خلص راحت من إيدي ، و اللي مدوخني أكثر أن فرات روح گلبه عشق شلون يتزوج غيرها ، ظليت أدور أخبارها لحد ما سمعت أنها تطلگت و رجعت لأهلها ، هنا الدنيا ما وسعتني الفرحة و قررت انهي كُلشي و أخطبها ، رحت لأبوي چان گاعد بالديوان و لگيت وياه أمي ، كعدت يمهم ...

- زين أنكم سوه ، اريد أحچي وياكم بموضوع

بكر : شنو هالموضوع؟

فاطمة : أحچي حبيبي نسمعك

- آني قررت أتزوج و أريدكُم تخطبولي

فاطمة : أحلى خبر والله ، من باچر أخطبلك أحلى بنيه

- لا يمه البنيه موجودة

بكر : و منو هاي؟

- ريان ، گرايب بيت المهيوب

أباوعلهم صار واحد يباوع بوجه الثاني ، حچت امي ...

- بَس أبني ريان چانت زوجة فرات و تطلگوا من فترة قصيرة

- أعرف ، آنـه أحبها و أريدها

بكر : بَس أبني ...

- بَس شنو بابا بَس شنو؟؟ ، جاي أگلكم آنـه رايدها ، لا توگفون بوجه سعادتي و أخطبولي ياها

سكتوا شوي و هُمه يباوعون لبعض ، حچه أبوي ...

- هاذ هو أبشر نخطبلك ياها ، وله شرايچ يـَ أم عباس؟

- ما دام هو رايدها چا نتوكل

- إي و شوكت ترحون تخطبوها؟

بكر : أصبر خل أحجي وي عمامك نشوف منو يروح بالمشيه و منو اليظل بالشغل

- زين بَس مو تتأخرون عليه تره أعوفكم و أروح آنـه أخطبها

بكر : هههههههههه كض روحك ولك شمالك

- أحبها بويه والله أعشگها

- يـَ بعد أبوك ، إن شاء الله أزوجك ياها و افرح بيك

فاطمة : إن شاء الله

***

عشق
گاعدة وحدي بالغرفة ، انفتح الباب و دخلن رُسل و نَفس ، أجن حضنني و سلمن عليه لأن من أجينه ما شفنه بَعض زين ...

رُسل : شلونچ خوما أكو شي يوجعچ؟

- يعني بَس شوي

نَفس : الله يكسر إيده إن شاء الله ميخاف من الله !

رُسل : آمين يا رب

باوعت لـ نَفس أنتبهت لبطنها چبيره ...

- ولچ شنو أنتِ حامل؟!

- إي هههههههه

- يعني تزوجتوا أنتِ و رافد؟

- إي صارلنه ٨ أشهر من تزوجنه

- ياااا ألف مبروك حَبيبتي والله فرحتلكم

- يبارك بيچ يـَ عُمري

- بيا شهر هَسه أنتِ و حامل بشنو ؟

- راح أدخل بالسادس و حامل بولد

- الله يگومچ بالسلامة

- آمين و يوم الألچ

أبتسمت و دنگت راسي ، حچت رُسل ...

- يولي لو تشوفين فرات هَسه متگولين هذا هو قبل فترة ، شوفي هَسه جوه يضحك ويه الولد و يتشاقة ، قبل چان ميحچي ويه أحد

- صدُگ لهدرحة؟

- إي والله و أكثر ، أنتهى بغيابچ والله ، بَس هَسه رجعتله روحه من رجعتي ، شدي حيلچ و طيبي تا تتزوجون و تكمل فرحته

- إن شاء الله

أندگ الباب و صاحت نَفس ...

- تفضل

أنفتح و فات فرات ، وگف باوعلي و بعدين باوع للبنات ...

- صار وكت علاجها تعرفن تنطنه الها لو آني آنطي؟

رُسل : لا والله يخوي شمعرفنه تعال أنت أبتلي بيها

ضحك و گال : أحلى بلوة والله

ضحكن البنات و طلعن ، أجه هو گعد يمي ...

- شلونچ خوما متوجعة؟

- لا زينة

- الحمدلله

- تغديت؟

- لا بعدني

- ليش؟

- أحنه المعازيب ما نتغدة هَسه عود وره ما يكملون الخطار نتغدة

- خوش معزب عفت خطارك و أجيتني

- أهم شي أنتِ يا خطار يا بطيخ

أبتسمتله و هو أخذ العلاج و طلع الأبره حتى يضربني ياها بالكانونه ...

- والله توجع هاي

- تتوجعين شوية و بعدين تطيبين

- الله عليك شوي شوي

- صار من عيوني

گام يضربني بيها و آني أحس بوجعها بَس هو ظل يحچي وياي و يلهيني ، أنوب أجت لارين و ظلت تفتر يمه ، واگفة و حاطة راسها على رجله و تحچي وياه ...

- فرات

- هااا

- مو گلت أجيبلچ آيباد

- نسيت والله عود بعدين

- أوووف أنت مثل بابا ، كُل ما أگُله يگُلي بعدين

ضحك عليها و هي سكتت ، رجعت حچت ...

- فرات

- هااا

- فراات

- نعم

- فرات

- يول هااا شبيچ

- أنت تحب عشق؟

سكت و باوع عليها و هي تباوعلنه بنظرات الأطفال البريئة و تضحك ، باوعلي فرات و حچه ...

- أموت عليها

- يعني متحبني مو ، دروح آني هم ما أحبك

عافتنه و مشت ...

فرات : دح ول هين تعاي يولي والله أحبچ

- ههههههه خررب يومها زعلت

- روح راضيها خطية

- يابه ما زعلت هاي جاي تدلل

سكت شوي و هو يباوع لشفايفي ...

- شبيك؟

- شفتچ مجروحة

- إي

- توجعچ؟

- شوي

شال إيده و خلاها على وجهي و صار يمسح على شفايفي بأصبعه ، تقرب عليه و باسني ، غمضت عيوني و آني أحس بأنفاسه اللي أختلطت بأنفاسي ، ابتعد عني و أبتسم و گال ...

- هاي تا يطيب الجرح

- و جروح گلبي شلون تطيب؟

- آني أداويلچ ياهن

باوعت لأيده اللي لازم بيها إيدي ، چانت مجروحه  ...

- هاي شبيها إيدك؟

باوع لأيده ، ضحك و گال ...

- هاي بزونه خرمشتني

- يااا عزااا تحچي صدُگ؟؟!!!

- ههههههههههه

- يمه والله لو آني يمكن متت ، شلون هيچ خرمشتك؟

اباوعله بَس يضحك ...

- هاي شنو ليش تضحك؟

- هههههههه لا ماكو شي

دگ موبايله شاله و گال ...

- هذا رافد

فتح سبيكر و جاوب ...

- هااا يول

- تعال تبوزع صارلنه ساعة نواعي عليك

- ع الأقل كول تعال تغده ، تبوزع ياخي !!

- والله بكيفي عاجبك يا أهلاً و سهلاً مو عاجبك أنت الخسران دليمية تفوتك

- ياخي عدل سوالفك مو بعد چم شهر راح تصير أب ، ابنك شراح تعلمه

- آني و أبني ننجاز أنت اطلع من الحمره ، يلا فضني تعال

- جاي جاي

سده و آني ضحكت ، شافني اضحك گال ...

- مهبول هذا والله

- علاقتكُم حلوه

- إي أخوي هذا ، يلا آني رايح حَبيبي تريدين شي؟

- سلامتك يـَ گلبي

باس إيدي و طلع

***

مُهره
رحنه للدكتورة و الحمدلله گالت أنُ حملي مابي خطورة و وضعي و وضع الطفل زين مو مثل حملي الأول كلش تعذبت بي ، و مع هذا شهم مو مرتاح و يظل يوصي 24 ساعة ، ديري بالچ و لا تشيلين ثگيل و أخذي أدويتچ و كلش خايف عليه ، اليوم قرر يطلعني نتعشه بالمطعم ، خابرني گال هو جاي بالطريق ، بدلت و گعدت أنتظرة بالحديقة ، شوي و سمعت صوت السيارة بره ، رحت فتحت الباب حتى أطلع و صار بوجهي شهم ...

- هااا هَسه گلت أصعدلچ

- چنت گاعدة بالحديقة و سمعت صوت السيارة

- إي چا يلا

گادني و نزلت الدرج ...

- على كيفچ شوي شوي

فتحلي الباب و صعدت و هو راح صعد و تحركنه ...

- إي وين تحبين أعشيچ؟

- مادري بكيفك

وصلنه المطعم و نزلنه ، رحنه گعدنه و طلب الأكل و بقينه ننتظر ...

- بابا و عمو بكر راح يرحون يخطبون لـ عبد الله

- إي

- شوكت يرحون؟

- علساس عگب باچر

- أنت تروح؟

- والله مادري بعدني ما قررت

- خل نروح

- خل نروح؟؟

- إي عاجبني أروح للأنبار صارلي هواي ما رايحة ، و هم أشوف عشق و أتطمن عليها

- لا ماكو روحة

- ليييش شهم

- نسيتي أنچ حامل ، أخاف تتعبين

- والله ما أتعب فدوة خل نروح

- گتلچ لا لتلحين

- باوع والله ميصير بيه شي ، أصلاً حملي مو خطر حتى تخاف

سكت ما جاوب و دار و جهه ، لزمت إيده ...

- فدوة حَبيبي وافق و خلي نروح ، والله ضايجة أريد أغير جو

دار وجهه و باوعلي ، مسح على گصته ...

- ولچ والله أخاف عليچ من السفر ، شفتي شصار بيچ ذيچ المره ، الأنبار لا هنا و لا هناك

- ميصير شي والله

سكتنه من جابوا الأكل خلوا ع الميز و راحوا ، حچه شهم ...

- تمام نروح

- أمووت عليييك حَبيبي

أبتسم و هو يقدملي الأكل ...

- يلا أكلي

- أريد ببسي

- لا ماكو ببسي

- ليش ، مشتهيته

- موزين عليچ

- أووووف

- دكلي يا عيني

گمنه ناكل و هو يباوعلي و يضحك ما أعرف على شنو يضحك من أسأله يگلي ماكو شي ، خبلني !

***

عشق
گاعدين آني و ماما و هي تحچيلي شصار بغيابي و شسوت و شلون بقى فرات يدور عليه لحد ما لگاني ، بَس أحس أنُ أكو شي ضامته عليه بَس شنو هو ما أعرف ...

- ماما لعد وين فرات؟

- فرات نايم حَبيبتي ، تعبانين هو و صگر و ناموا من وكت

- إي والله كلش تعبوا وياي ، صگر ما چان يجي للمستشفى قلييل حتى مندري وين ينام ، و فرات چان نومه قليل ينام ساعتين بالهواي و بعدين يبقى سهران على راسي

- إي شفتي يـَ حَبيبتي من يكون لچ ظهر و عزوة تشدين ظهرچ بيهم و ترتاحين

- علمود هيچ أنتِ خليتينه نعوف بغداد و نجي نستقر هنا

- إي يـَ ماما ، هنا مأمنة عليچ ، حتى لو يصيرلي شي أنتِ هنا بإيد أمينه متأكدة خوالچ ما راح يقصرون وياچ

- ماما لتحچين هيچ عفيه تره والله أضوج

أبتسمت : زين زين ، يلا آني أروح أنام و أنتِ هم نامي و أرتاحي ، تريدين شي؟

- سلامتچ

گامت باستني من راسي و طلعت ، بقيت آني حاولت أنام بَس ما گدرت ما أجاني نوم ، گمت شوي شوي أفتر بالغرفة مشتاقتلها كلش ما مصدگة أني رجعت ، أنتبهت  ملابس فرات معلگه بالتعلاگه مال الملابس ، أستغربت شجابهن لغرفتي ، رحت فتحت الباب و طلعت تمشيت بالممر ، رجليه أخذني لغرفته ، رحت فتحت الباب بهدوء و فتت لگيته نايم ، تقربت منه و لزمت إيده ما حَس و لا تحرك ، كلش تعبان لأن كُل مره بَس ألمسه يفز ، بقيت لازمه إيده و أباوعله بتأمل ، لحد ما حسيت على نفسي و گمت طلعت من غرفته و رجعت لغرفتي ، تمددت و نمت

الصبح گعدت من النوم من وقت و ماكو صوت يمكن بعدهم نايمين ، گمت رحت للحمام داغسل ، رفعت راسي و صارت عيني بالمرايه ، أنصدمت لمن شفت وجهي شلون صاير ، مزورگ و كُله جروح و مورم ، صحت ...

- لاااا ياااا الله لااااا أله وجهيي

رجعت ليورا و طلعت من الحمام گمت ابچي بصوت عالي و بحرگه ، أنهضمت كلش لمن شفت وجهي ، فات فرات مفزوع ، أجاني و لزمني من چتافي ...

- شبيييچ عشگ شصاير لييش تبچين !!

جاوبته و چانت بالگوة تطلع مني الكلمة ...

- بـ ... باوع و .. وجهي شصاير بي

- أشش مابي شي وجهچ والله مابي شي

- لتچذب عليه لتچذب ، باوع شلون مينشاف من آثار الضرب ، تشوه وجهي فرات تشووه

حضني و صار يمسح على كتوفي ، آني ضميت نفسي بحضنه و زدت بالبچي ...

- لتبچين يـَ روحي تطيبين والله العظيم تطيبين و ترجعين مثل گبل و أحسن

- چنت حلوه كلش فرات

- و بعدچ حلوه إلى هَسه

- لتچذب عليه

- والله ما أچذب

بعدني عنه و لزم وجهي و هو يباوع بعيوني الغرگانه دموع ...

- أنتِ بعيوني أحلى بنيه بالدنيا ، لا تبچين

- يعني وجهي راح يرجع مثل قبل

- بإذن الله يرجع و إذا ما رجع أسفرچ خارج العراق و أعالجچ غادي

- لتعوفني فرات فدوة

حضني و گال ...

- هو آني لگيتچ بشلعان الگلب شلون أعوفچ يولي

***

مُهره
وره يومين گعدنه من وكت الصبح لأن اليوم نطلع للأنبار ، شهم بدل بسرعة و نزل مادري شبي مستعجل ،بقيت آني بدلت و جبت جنطة زغيرة حضرت بيها ملابس أليه و لشهم و نزلت ، وگفت ع الدرج و شفت شهم واگف يسولف ويه عمي ...

- يابه متأكد ما محتاجني بشي؟ ، إذا تحتاجني أبقى

عمو حط إيده على چتفه و حچه و هو مبتسم ...

- لا وليدي ما أحتاج شي ، روحو غيروا جو أنت و مرتك

هزله براسه و ألتفت شافني و أجه ...

- آني مو گتلچ لتشيلين شي ، ليش متسمعين الكلمة أنتِ

أخذ من عندي الجنطة

- شهم والله خفيفة شنو السالفة

- بويه حتى لو خفيفة ماريدچ تشيلين شي

فاطمة : حقه يمه خايف على أبنكم غير

أجينه حتى نودعهم ، گال عمي ...

- ديري بالچ على نفسچ بنيتي

- إن شاء الله عمو

طلعنه ، رحت صعدت بالسيارة و شهم راح حط الجنطة وره و أجه صعد و رحنه لأهلي ، وصلنه و نزلت تلگاني بابا و حضني عبالك صارله سنة مشايفني ...

حسين : شلونچ حَبيبتي خوما تعبانة لو بيج شي

- لا بابا كلشي مابيه الحمدلله

- حفيدي شلونه

- ههههه عال العال

- الحمدلله

أجه سجاد : يابه اليسمعك يگول هذا أول حفيد الك ، چا بنت زينب نسيتها

- لا ولك ما نسيتها بَس غير هذا أبن مُهره

- خو أنت أهم شي عندك مُهرتك

- إيي چا شعندي غير مُهرتي

- عندك أحنه بويه عندك أحنه

شهم : دخن حَبيبي لتضوج هههههههه

- ولك هاي ميفيدها دخان لا نرگيله و لا جگاير

حسين : ولكم بويه كلكم أعزاز گلبي و كلكم أحبكم و ما أفرق بينكم ، بَس هاي أخيتك معزتها تختلف عبنها الزغيرونه

- هاذ هو أبو سجاد سهمك وصل

ضحكنه كلنه على سجاد ، شوي و أجو بيت عمي بكر دخلو و سلموا ، أباوع لـ عبدالله فرحان كلش يبين كلش يحب ريان ، ما توقعت يخطبها من بعد ما طلگها فرات ، من بعد ما كمل أبوي توصياته لسجاد ديربالك ع البيت و ديربالك ع الشركة و من هالسوالف ، طلعنه للسيارات و مشينه

***

عشق
يمي فرات دينطيني بالعلاج مالتي و آني أباوعله و مركزة بكُل حركة يسويها ، ما أعرف ليش مجاي أگدر أشيل عيوني عنه ، بودي أبقى أباوعله 24 ساعة ، رفع راسه شافني أباوعله أبتسم و گال ...

- شبيچ تدحگين عليه؟

- مُعجبة ، و كُلش هَم

- أعذريني مرتبط

- أمممم ، لعد أوصفلي حَبيبتك

صفن بعيوني شوي ، حچه ...

- عنگها كما عنگ المها و عيونها ديرة
في حاجبها سواة الهلال و في شعرها يكمن الليل

- أنت شاعر؟

- عشگچ سواني شاعر

أبتسمت : بيا لهجة كتبت البيت؟

- اللهجة البدوية ، و أصلاً هذا ما كاتبة ، هَسه من سألتيني طلع وياي

- كُلش حلو

- مثلچ

بقيت صافنه و أباوعله ، گال ...

- هااا رجعنه للصفنه

- ههههههه ما أگدر ما أصفن بيك

- ديلا هَسه عوفيني و گومي تا ننزل نتريگ

- جوه؟

- إي تگدرين؟

- إذا أنت وياي أگدر

- ديلا عجل

گمت وگفت بَس حسيت بدوخة ما أعرف ليش يمكن لأن طول وكتي بالفراش ...

- هااا دختي؟

- إي

- طبيعي هالشي بسبب الضربة اللي براسچ ، لازم تظلين تمشين تا ما تلزمچ الدوخة

- تمام

گادني و نزلنه جوه شوي شوي ، وصلنه و شافوني و كُلهم گامو يهلون و يمرحبون ، فرحت كلش بكلامهم ، سحبلي فرات الكرسي و گعدت بصف ماما و هو راح گعد مقابيلي

كملنه ريوگ و رجعت للغرفة ، شوي و أجاني فرات ...

- يلا تا تاخذين من علاجچ

- مليت والله ، ماريد عفيه

- لا يابه شلون ما تريدين ، غير تا تطيبين

- أوووف

نطاني من العلاج و گال ...

- آني رايح للشغل ، محتاجة شي؟

- لتروح أبقى يمي فدوة

- مگدر حبيبي صارلي هواي تارك الشغل لازم أروح

- تتأخر؟

- الظهر أجي

- أوووف هواي فرات

- مو چنچ صايره تتأفأفين هواي

- بكيفي

- هااا هيچ صارت

- إييي

- خل نتزوج و آني أعلمچ

- شتسوي يعني تضربني

- لا ، أسوي شغلات ثانية ، يعني مثلاً ...

ما خليته يكمل ، خليت إيدي على شفايفه ...

- أششش أسكت أسكت

ضحك و باس أصابعي ...

- يلا آني رايح حبيبي ، ديري بالچ على نفسچ و خلي التيلفون يمچ لأن كُل شوي أدگ عليچ

- آني ماعندي تيلفون

- صح نسيت ، يلا خلي تيلفون عمتي يمچ و بعدين آني أجيبلچ

- تمام

طلع و بقيت آني حايرة ما أدري شسوي

***

مُهره
من بَعد طريق طويل وصلنه بخير و سلامة الحمدلله ، بابا و ماما چانوا ويانه بالسيارة و چانو شهم و بابا طول الطريق يسولفون و يضحكون تعجبت عليهم شنو ميتعبون ، نزلنه و دخلنه للبيت و كالعادة چان أستقبالهم ألنه كلش حلو عبالك صارلهم سنين ما شافونه ، بابا و عمو علي أصدقاء الروح بالروح و عمو بكر و عمو جسام يعني بإختصار كلهم ربع على گولتهم ، آني طلعت بوجهي لعشق حتى أشوفها كلش مشتاقتلها ، دخلت للغرفة و أنصدمت من شفتها شصاير بيها ، حضنتها و ما أعرف ليش بچيت ، وخرت عنها و باوعتلي ...

- مو حلوه آني مو

- لاااا لتگولين هيچ حَبيبتي والله أنتِ تخبلين

- كلكم تگولون هيچ

- لأن هذا الصحيح ، هَسه أحچيلي شلونچ خوما متأذية؟

- زينة الحمدلله ، أنتِ شلونچ بعد اللي صار وياچ

- جاي أحاول أتناسى و أعيش حياتي ويه شهم ، ماريد اخلي ينقهر ، بَس لو أجيتي عليه صدگيني مستحيل أنسى أبني

- حقچ والله ، الله يعوضكم حبيبتي

- الحمدلله الله عوضنه و آنـه هَسه حامل

- صدُگ والله؟

- إي والله

- يعمري الف مبروك ، شوفي الله مينسى عبده

- يبارك بيچ عُمري ، إي والله و النعم بالله

بقينه نسولف و بعدين صار الغدة و تغدينه ، رحت ويه نَفس بغرفتها علمود أنام ...

- أگلچ خاف رافد يريد شي من الغرفة ، أحسها زحمة

- لا يعمري لا زحمة و لا شي ، رافد من يريد شي يگلي آني أجيبله ياه ، نامي أنتِ و أرتاحي

- زين هو وين حينام؟

- ينام بالديوان ويه الولد كلهم راح ينامون هناك محد يجي هنا

والله النيه چانت أنام بَس شو طارت النومه من عيوني و بقينه نسولف آني و نَفس ، حچتلي قصتها شلون أجت هنا و شلون حبوا بعض هي و رافد و تزوجوا ...

- هههههه يعني بالبداية حسبالچ يضحك عليج

- إي والله شمدريني مو هو عنده سوابق و گلت أكيد آني راح أنظم للقائمة

- هههههههه و تالي سواها صدگ و أخذچ

- إي والله الحمدلله

- أنتِ هَسه بيا شهر؟

- دخلت بالسادس

- ولد مو

- إي ولد

- تگومين بالسلامة حبيبتي

- آمين و أنتِ هم ، مگلتيلي أنتِ بيا شهر؟

- آني باقيلي خمس أيام و أقبط شهر

- أگلچ عبدالله يعرف أنُ فرات چان متزوج ريان؟

- إي يعرف عبدالله كلشي يعرف عنها و ما همه كلش يحبها

- الله يجمعه بيها ، ولو ريان متناسبه أبد

ردت أجاوب و چان ينفتح الباب و تفوت عشق و چانت واضحة على ملامحها الصدمة ...

- أنتوا شدتحچون زواج شنو؟!

نَفس : لا ماكو شي حَبيبتي

- شلوون ماكوو شييي ، فراات و ريااان متزووجيين موو

- عشق السالفة مو مثل ما أنتِ متخيلة خليني أفهمچ

- شتفهمينيي نَفس شتفهمينييي

صار تبچي و تصيح أنقهرت كلش ، گمت أحاول أهديها و نَفس أتصلت على فرات يجي ، و فعلاً ماكو ثواني و هو يمنه ، أجه عليها ...

- عشگ شبييج شكوو أهدي أهدي مو هيچ

- وخرر عنيي چذااب أنت چذااب وخررر

- بَس على كيفچ فاهمة السالفة غلط خليني أفهمچ

- مااريدكك تفهمنيي شيي عووفنييي ، أكرهكك آني أكرررهك تسمع

گالت هيچ و وگعت بين أيدين فرات ، لزمها بسرعة و شالها خلاها ع الچرباية ...

- مُهره نادي عبدالله بساااع

أخذت تيلفوني و أتصلت على عبدالله يجي ، أباوع لـ فرات شلون خايف عليها ، لازم وجهها و يمسح على راسها ، أجه رافد و وياه عبدالله ...

- هاا شصاير شبيها؟؟

- ما أعرف وگعت لحالها تعال شوفها ليخوي

راح عبدالله شافها و حچيناله الصار ...

- لتخاف مابيها شي بَس داخت لأنها أنفعلت

- خاف الجرح اللي براسها أنفتح أو شي

- لا ما أنفتح لو أنفتح چان صار نزيف

- زين هَسه شنسوي

- هَسه خليها نايمة علمود تصحصح من الدوخة و من تصحى ننطيها من علاجها

- زين

طلعوا الولد و فرات قبل ما يطلع گال ...

- ديربالچن عليها و من تصحى أنطني خبر

فرات
رجعت للديوانية مسطور براسي ، شلون أفهمها هَسه ، شگوللها ، گعدت و جاني شهم ...

- شبيك فرات شصاير؟

- لا ماكو شي

- عليه ولك ، أحچي شصاير شمالك !

رفعت راسي عليه ...

- عشگ درت أني چنت متزوج

- لااا

- تخربطت من سمعت

- على كيفك كلشي ينحل

- شينحل شهم ، شلون أفهمها هَسه ، آني الله راح يظل مطيح حظي أدري

- هَسه هي معصبة طبيعي متسمع منك شي ، أنطيها فرصة تهده و روح فهمها السالفة و متأكد راح تتفهمك هي تحبك ولك

- هيچ تگول؟

- إي هيچ أگول يلا نام و أرتاح هَسه

راح شهم تينام و آني تمددت تا أنام بَس ما غمضتلي عين رغم أني تعبان و چنت بَس أريد أنام ، ظليت فكرة تجيبني و فكرة توديني إلى ما أذن العصر ، گمت دحگت الكُل نايم جماعة البصرة هادهم التعب ، گمت توضيت و جيت أصلي ، كملت و رحت لغرفة عشگ ، فتحت الباب شوي شوي سمعت شهگاتها من حست الباب أنفتح سكتت

عشق
حسيت أحد دخل للغرفة ، أنداريت شفته فرات ...

- أطلع منا عوفني

أجه گعد مقابيلي ع الكرسي ...

- خليني أفهمچ الصار و أنتِ أحكمي

گعدت : شتفهمني فرات أنتوا متزوجين و يمكن هَسه حامل بأبنك روحلها و عوفني

اشو گلت هيچ و هو طگها ضحكة

- هههههههههههه

- لتضحككك مگلت شي يضحك

- ههههههه أمبله والله گلتي ، يابه آني إيدها ما لازمها شلون تريدينها تحبل لخاطر الله !!

- يعني زواجكم على ورق؟

- إي و طلگتها أصلاً

- و ليش مگتلي من البداية

- چنت أنتظرچ تطيبين و أگُلچ

- ليش تزوجتها؟!

- أنجبرت والله

- شنو اللي جبرك

گعد يحچيلي السالفة كُلها و آني طار عقلي من سمعت ...

- من كُل عقلها هاي؟؟!!

- إي والله ، بلتني بلوة آني مو يمها و أبويه كرهني من وراها گام حتى ما يحچي وياي و جبرني أتزوجها و تزوجتها تا أرضي ابويه بَس

- يعني ما بيناتكم شي؟

- أنتِ تعقلينها آني أعوفچ و أحب وحدة ثانية ، أنتِ گاعدة هين بگلبي

أبتسمت و هو أبتسم و گال ...

- سامحتيني

من گال هيچ صفنت و أدركت أني كبرت الموضوع و هو ما يستاهل و قهرته ، هو من عرف أنُ فؤاد تزوجني ما عافني و بقى يدور عليه لحد ما لگاني و خلصني منه و فوگ كُل هذا چنت حامل و ما أهتم و بقى متمسك بيه و أجي آني هَسه أحاسبه على زواجه من ريان ، فززني من گال ...

- ألووو ما جاوبتيني سامحتيني لو لا؟

- آني آسفه فرات

- عليش تتأسفين ول يابه؟

- كبرت الموضوع كلش ، چان المفروض أتفهمك و ما أسوي هيچ

- ميخالف حبيبي حصل خير

- آني أحبك كلش والله و ما أعوفك لو شما يصير

- و آني هَم أعشگچ حيييل يـَ عگال راسي

- الله شگد مشتاقة لهالكلمة منك

- منا و رايح أله أخليچ تملين منها

- مستحيل أمل منك و من كلامك

***

ريان
من بعد ما رجعت لأهلي أبويه عرف أني سويت سحر لـ فرات و عشق و عاقبني بأشد عقاب ، ما ضربني و لا هاني ، حقد عليه و صار ميطيق يشوف وجهي و لا يحچي وياي ، بطلني من الشغل و سحب السيارة مني و حتى التيلفون أخذه مني

گاعده بالغرفة و جتني أمي ...

- گومي بدلي و أنزلي جاينچ خطابة

- خطابة شنو ماما آني ماريد أتزوج

- مو بكيفچ أبوچ يريدچ تنزلين ، گومي أنزلي و لا تخلينه يعصب ، شفتي ذاك اليوم من عصب عليج شصار بي ، گومي أمي فضيني

طلعت و آني ظليت گاعده ، بعدين گمت بدلت شلون ما چان و نزلت قدمتلهم الگهوة و رجعت للغرفة ، و ظليت أطگطگ بأصابعي ، ليوين و چان يدخل ابويه للغرفة و هاي چان أول مره يسويها بعد الصار ، ظل واگف ع الباب و گال ...

- مو من طبعي أزوج بناتي غصب بَس أنتِ تستاهلين ، الجماعة اللي خطبوچ من البصرة گرايب بيت المهيوب و آني أنطيتچ

- أنطيتني شنو بابا آنـ ...

- أششش و لا كلمة أفتهمتي ، مالچ كلمة فوگ كلمتي الوليد مابي عيب و سمعته زينه و أبن عائلة و شاريچ
باچر راح يجيبون الشيخ و يعقدولكم و توافقين و رجلچ فوگ راسچ و أن ما وافقتي يـ ريان تشوفين مني شي ما يرضيچ أبد

گال هيچ و طلع ، ظليت آني اريد أستوعب الصار ، يعني شنو خلص راح أتزوج و لمن لواحد حتى ما أعرفه و لا شايفته ، ظليت أفكر و أستسلمت لقدري و أستوعبت الفكرة ، أصلاً آني حياتي شنو بدون فرات ، خلي شيريد يصير خل يصير

ثاني يوم تجهزت بَس مالي نفس بشي أبد ، أجوا و وره الضيافة ناداني أبويه على مود العقد و هنا أنصدمت من شفت عبدالله هو اللي خاطبني ...

********

يتبع ...

18.kij
تعالو أنستا و اللي يجي يدخلي خاص يگُلي آني جديد علمود اضيفه كلوز لأن نشري اللي يخص الرواية كُله بالكلوز

سحر الدليمي