رواية عشگ الفرات ( عِندما تَهوى القُلوب ) الفصل الرابع والستون 64 - بقلم سحر الدليمي

لا تنسون التصويت و التعليق بين الفقرات
قراءة مُمتعة ♥️

***

عشگ تگول :

- يالساكنين الأنبار ما مركُم سيل دموعي
ولفي غابت عني علومه و صار الگلب ماجوعي

***

ظلينه ننتظر و آني گاعد على أعصابي ، ساعة اگوم ساعة أكعد ساعة اتمشى ساعة أطلع بره ، أختنگت ، فوگ الساعة صارلهم جوه ...

- إيي لييشش ماا يفعلوون يطلعوون موو طگتت رووحي و أعصاابي تلفتت من الإنتظاار

- بَس أصبر فرات شبيك ، ما شفت شلون حالتها أكيد يتأخرون و هُمه يعالجونها

- أووووف

گعدت ع الكراسي و خليت راسي بين إيديه ، شوي و طلع الدكتور ، فزيت على حيلي و ررحتله ...

- هاا دكتوور بشر شلونها؟

- الحمدلله گدرنه نسيطر ع النزيف و هَسه حالتها مستقرة ، بَس للأسف الطفل مات

صفنت بوجهه ، طفل شنو !! ...

- طفل؟؟!!

- إي المريضة چانت حامل بَس على أثر الضرب اللي تعرضتله سقطت و رحمها تأذة

رجعت ليورا و گعدت ع الكراسي أريد أستوعب اللي سمعته !! ، طلعت حامل ! ، حچه الدكتور ...

- والد الطفل منو؟ ، أكو أوراق لازم يوقع عليها

جاوبه صگر : دكتور والد الطفل هو السبب بحالة المريضة لذلك أخذوا الشرطة

- زين بَس الأوراق لازم أحد يوقع عليها

- عادي أوقع عليها آني؟

- إي عادي هَسه أدزلك ممرضة تفهمك عليهن

راح و جه عليه صگر ...

- هاا فرات

- طلعت حامل صگر

- وارد هالشي فرات ، لا تنسى هي چانت متزوجة

ما جاوبته ، رجع گال ...

- آني رايح للقسم ، طالبيني هناك على مود السواه فؤاد

- ليش شوكت أخذوا الشرطة؟

- آني خابرتهم و بلغت عليه

راح صگر و ظليت آني فوگ الساعتين انتظر ، رايح راد ، عقلي ما جاي يستوعب اللي صار ، يعني معقولة حبته و نستني ، نست حُبنه ، ظليت ساعتين فكرة تجيبني و فكرة توديني ، لحد ما جه الدكتور فات للغرفة و وره دقايق طلع ...

- خوما أكو شي دكتور؟

- لا لا أرتاح ماكو شي حالتها مستقرة

- زين دكتور أگدر أشوفها؟

- أكيد تفضل بَس إذا صحت حاول لتتعبها بالحچي

- صار

راح و آني تقربت من يم الباب ، خليت إيدي ع اليده و جريت نفس و طبيت ، دحگت عليها نايمه و راسها ملفوف و وجهها مزرگ و مجرح ، گلبي أنعصر عليها ، چانت مثل الگُمر ، طفه نورها الحيوان ، بستها من راسها و جريت كُرسي و گعدت يمها ، نايمه متدري بشي ، لزمت إيدها و أحس ملكت الدنيا كُلها ، عندي شوفتها تسوه كُلشي بالدنيا ...

- لو تدرين شصار بيه بفراگچ ، أنهد حيلي و الدنيا سودت بوجهي ، دورتلچ ، ما خليت مكان ما دورتلچ بي ، سنة كاملة آني ما تهنيت بالنوم ، كُل ما أغمض عيوني أتخيلچ گبالي و أسمع صوتچ يرن بأذني

- ما دام رجعتيلي كُلشي ماريد من الدنيا بعد ، أنتِ يمي و خلص

ظليت لازم إيدها و ادحگ على عيونها بَس أريدها تفتحهن ، انفتح الباب و فات صگر ...

- هااا شلونها؟

- يگولون زينة

تقدم وگف بصفي و دحگ عليها ...

- شمسوي بيها الحيوان ، والله لخلي يخيس بالسجن عباله ما وراها أحد يسترجل عليها

- طلعه صگر خليني آني آخذ حگها منه بإيدي

- شتسوي يعني؟

- اذبحه شسوي يعني

- أنچب ، ماريد أسمع هالحچي منك أنوب ، هَسه هو بإيد القانون و القانون هو ياخذ حگها منه

- و گلبي آني شيبرده؟

- عشگك و رجعتلك و ماعليك بالباقي ، اهتم بيها و بَس ، و طلاگ آني راح أحاول أطلگها منه و بَس تطيب نزوجكُم و نفرح بيكُم

- يطلگها غصبًا عنه

- يطلگها يطلگها ، إذاهو زلمة يطلگها وره السواه بيها

سكتنه شوي ...

- چنت مداريها مثل الوردة ، أخاف عليها من الهوا الطاير ، و شوف هو شسوه بيها

- ياخذ جزاته على سوايته هاي

مد إيده و أنطاني علاگه ...

- هاك جبتلك ملابس و شوي أكل لك و لعشق إذا صحت

- زين

- يلا آني راجع للقسم

هزيتله براسي و راح وصلة يم الباب و ألتفتلي ...

- دحگ إذا خابروك ربعنه لا تگُللهم ، ما نريد نخوفهم و خاصة عمتي إذا سمعت تگلبها مناحة

- هاذ هو ماشي

طلع و سد الباب وراه ، گمت أخذت العلاگه و طلعت الملابس تا أبدل

عشق
فتحت عيوني بالگوة أحس جفوني ثگال ، باوعت كُلشي مغوش و الحياطين بيض ، باوعت ليغاد عن الشباك شوي شفت شخص ، وضحت الصورة بعيوني زين و عرفته ، هو والله ، فراتي إي هو ، أجه ديريد يذب فانيلته و حجيت بصوت مبحوح ...

- فر ... فراتي

بسرعة ألتفت عليه ، ذب الملابس من إيده و أجه يركض ، گعد ع الچربايه و حط إيده على وجهي ...

- عشگي ، يا بَعد روحي أنتِ ، صحيتي يا غلاي

شلت إيدي و حطيتها على وجهه ، صرت أتلمس بعيونه و لحيته ...

- فراتي هذا أنت ، أخاف آني بحلم

- لا يـَ روحي أنتِ بعلم و هذا آني گدامچ

باوعت لفانيلته كُلها دم ، خفت ...

- شنو هالدم اللي على ملابسك؟

باوع لملابسه و رجع باوعلي ...

- هذا دمچ أنتِ ، من شلتچ صار راسچ على صدري

فرات

غمضت عيونها و رجعت دحگتلي ...

- شنو صار و شلون أجيت أنت ، آني ما أتذكر شي غير لمن چان يضرب بيه و بعدين وگعت و ما حسيت على شي

- بعدين أحچيلچ هَسه أرتاحي و لا تدوخين نفسچ

سكتت و ظلت تدحگ عليه دقايق ، آني چنت مدنگ راسي حچت ...

- أنساني فرات

رفعت راسي عليها ...

- شجاي تحچين أنتِ ، انساچ شنو؟!

- آني مافيدك

- ليش متفيديني؟

- آني حامل فرات

- أدري بَس

- بَس شنو؟!

- الطفل مات

- الله عليك؟؟

- إي والله

أبتسمت و گالت ...

- الحمدلله يا ربي خلصت منه و ما تورطت بي

آني صفنت عليها هاي شجاي تحچي ...

- أگُلچ أنتِ ضارب مُخچ شي؟

- ليش؟

- أبنچ هذا أبنچ !!

- و آني ماريده

- ليش متريدينه هو شنو ذنبه؟!

- ذنبه انُ فؤاد أبوه

- يبقى روح ماله ذنب ليش ما رايدته ، والله لونه ظال و جاي للدنيا و إذا أحنه تزوجنه أعتبره مثل أبني و أخلي بعيوني

- طفل مو أنت أبوه ماريده فرات

- حتى لو ميصير هيچ تفكرين ، بالنهاية أنتِ أمه

- ماارييده ماارييده كاافي ، اكرههه هوو و ابووه أنت متعررف بشنوو مرييت فراات متععررف

صارت تبچي و تدگ على وجهها ، لزمت إيديها ...

- زين زين على كيفچ عشگ على كيفچ خلص كافي آني آسف

- ماريد شي يربطني بي ، ماريد شي يذكرني بي ، ماريده يرجعلي فرات ماريده

- إي إي خلص كافي ميرجعلچ ، أششش أرتاحي حَبيبتي لتسوين بنفسچ هيچ

- يعني أنت ما ضجت لأني چنت حامل منه؟

- بالبداية ضجت ليش الچذب ، چنت عباليچ نسيتيني و حبيتي و علاقتكُم تطورت و قررتوا تجيبون طفل ، بَس بعدين من صحيتي و شفت ردة فعلچ من شفتيني تأكدت أنچ مالچ ذنب ، گتلچ والله لو هالطفل جاي للدنيا أكون أله أب و أظل أحبچ بكُل حالاتچ

- الحمدلله أني عرفت أختار الشخص الصح ، أنت نعمة الله أنعم بيها عليه فرات

- يا روح فرات أنتِ

- أريد أنام تعبانة

- نامي حَبيبي ، نامي و ريحي راسچ من هالأفكار

- لتعوفني ظل يمي

- ماعوفچ يمچ آني

أخذت إيدي و لزمتها ، ظلت لازمتها و تدحگ عليه إلى ما غفت ، سحبت إيدي منها بهدوء و گمت رحت غسلت و بدلت ملابسي و رجعتلها ، ظليت أدحگ عليها و بعدين ما حسيت و نمت

***

نَفس
رافد طلع من الصبح و آخر مره خابرني گال آني راجع بالطريق و لحد هَسه هو ماكو و أدگ عليه ميجاوب ، حرگت عليه التيلفون حرگ ميجاوب ، گلبي أنعصر خايفة لا صايرله شي ، خايفة لا سالم متعرضلة ...

- اوووف گتله رافد لتروح لترووح ميفيد بي

صارت حركة ببطني ، خليت إيدي عليها و تحسست حركته ، أبتسمت ، أبني يتحرك ببطني لأول مره ...

- أكيد أنت هَم خايف على بابا

لزمت ظهري و نزلت جوه بالگوة ، رحت للهول لگيت عمي جسام ديصلي ، وگفت أنتظرة لحد ما خلص صلاة ، گام لم السجادة و باوعلي ...

- ها نَفس أكو شي؟

- عمو دادگ على رافد مديجاوبني ، أكثر من مره دگيت عليه بَس ماكو رد

- والله هَم آني دگيت عليه گبل شوي و ما رد

- آخر مره خابرته گلي آني طالع و من زمان هالحچي يعني چان هَسه وصل

- أگفي خل ننتظر شوي بلكت هساع يجي

- عمو خايفة لا صايرله شي

- لا يـَ عمو لا توهوسين مابي شي إن شاء الله ، الغايب عذره وياه

- تعاي أگعدي تعاي لا تظلين واگفة بنيتي

گادني من إيدي و خلاني أگعد يمه و كل شوي لا تخافين و هَسه يوصل و آني متت من الخوف والله أنتهيت ، شوي و رجعت للغرفة ، بقيت أتمشى بيها لأن داحس بوجع و الدكتورة گلتلي من أحس بوجع أتمشى ، بقيت أتمشى لحد ما تعبت و تمددت ع الچربايه ، دخت من التفكير و نمت

ليوين حسيت على حركة بالغرفة ، فتحت عيوني و باوعت أكو ضوه خفيف من الشباك ، أنتبهت لشخص واگف يم الكنتور عرفته رافد گمت بسرعة نسيت أني حامل ، رحت حضنته من ظهره ...

- ليش هيچ تخوفني عليك مو والله متت من الخوف حرام عليك

أندار عليه و حضني خله راسه برگبتي ، حچه ...

- أووويلي شمشتاگلچ

وخرت عنه و باعتله گال ...

- لتخافين حياتي مابيه شي

- شصار وياك أحچيلي ليش تأخرت؟!

- تعبان والله منتهي من التعب بَس أريد أنام ، بعدين أحچيلچ

لبس البدي مالته و راح تمدد بفراشه ، رحت تمددت بصفه و خليت راسي على صدره ، هو خله إيده على بطني و گال ...

- شلونه وليدي

- زين وليدك و حتى گام يتحرك

- هههههه صحيح؟

- إي والله

تقرب باس بطني و گال ...

- بعد روحي شمشتاگله

و ظل يحچي ويه أبنه كالعادة لحد ما نام ، أباوعله نايم بتعب ، تقربت منه بسته بخده و غطيته زين و نمت

***

عشق
حسيت على وجع ببطني موتني ، باوعت لـ فرات لگيته نايم ع القنفة و چان شكله بردان و هو أصلاً الجو بدهوك بارد مو مثل جو الغربية ، حاولت أگوم بَس دايخة كلش ، بقيت أحاول لحد ما گمت و فصخت المغذي من الكانونه ، شلت غطه من اللي چنت متغطيه بيهن و رحت أمشي على كيف ، غطيته و بقيت أباوعله ، شگد مشتاقتله ، أحس روحي رجعتلي من شفته ، تيلفونه چان محطوط ع الميز ، باوعتله أجته رسالة ، شلته و فتحته چانت من صگر كاتب ...

🗨️ فرات آني ما راح أجي ملتهي ويه الولد خابرتهم و جوني ، إذا أحتاجيتوا شي خابرني ، آني باچر الصبح يمكُم

سديته و رجعته بمكانه ، رحت للحمام و هنا أنصدمت بعدني أنزف !! ، گلت يجوز وجع بطني من النزيف ، غسلت و رجعت لفراشي تمددت و حاولت أنام بَس الوجع ديزيد عليه و تحول لأسفل بطني ، أباوع لـ فرات نايم تعبان حتى ما تحرك ما أجه من گلبي أگعده ، بقي الوجع يدگ بگلبي لحد ما گمت أون ، أحس جسمي خدر و لعبت نفسي ، شوي و جاني فرات خايف ...

- هااا عشگ هاي شبييچ؟!

- داتوجع فرات

- شنو شيوجعچ؟؟

- ماعرف بطني مادري

- زين هَسه آني شسوي

- اوووف ماعرف ، راح أموت فرات

- أشش لتگولين هيچ

- علاجچ وين ، لا آني حتى ما أنطوني لچ علاج

- دحگي راح أروح انادي ممرضة دكتورة هَسه أجي ما أطول

- إي

فرات
عفتها و طلعت ، چانت المستشفى فارغة كُلها نايمة ، دورت على أحد يجي يشوفها و لگيت دكتورة خفر ، جت وياي و فاتت تا تشوفها و آني ظليت أنتظر بره ، گمت ما أندل دربي من شفتها تتوجع ، آني كُلشي هين عليه بَس أذيتها صعبه ، ماگدر أشوفها متأذية ، آني أتأذة على أذيتها ، شوي و طلعت الدكتورة ، جت عليه ...

- لتخاف ماكو شي خطر ، أنطيتها أبره بالمغذي و إن شاء الله هَسه تتحسن

- عجل ليش هيچ تخربطت ، ما چان بيها شي !

- طبيعي تصير عدها هالآلام ، رحمها متأذي للأسف

- و يعني هذا يشكل خطر عليها؟

- هاي يرادلها گعده و أشرحلك وضعها بالتفصيل ، هَسه أنت أبقى يمها و إذا صار شي ناديني

- تمام

راحت و آني فتت للغرفة ، رحت گعدت يمها ...

- هاا عشگي شلونچ

- داموت فرات والله

- أشش حَبيبتي هَسه تهودين إن شاء الله

لزمت إيدي و عصرتها حيل لدرجة نبتت أظافرها بإيدي ، أنمرد گلبي عليها عجل شگد متوجعة ، حطيت إيدي على راسها و تقربت منها ...

- شدي حيلچ عشگي ، شدة و تزول و راح تطيبين و نرجع لديرتنه

- و نتزوج ، صدگيني راح تصير سوالف

- يعني آني ما راح أموت و راح ابقى عايشة وياك طول العمر

- إن شاء الله ، آني ما راح أعوفچ لآخر يوم بعمري

سكتت و گمت أقره عليها آيات و هي بعدها لازمة إيدي بكُل قوتها ، ظلت هيچ إلى ما نامت ، سحبت إيدي منها و غطيتها زين ، دحگت على إيدي شاگتها و طالع دم ، گمت غسلت و رجعت گعدت يمها

***

مُهره
الظهر رجع شهم من الدوام و بإيده علاگه ، أجه عليه ...

- شوفي شجبت

- شنو هاي؟

- فتحيها

أخذتها منه و فتحتها ، لگيته جايب جواريب و طاگيه زغار كلش مال أطفال توهم منولدين ، جايب لونين أزرگ و وردي ...

- شفتهن و عجبني و آنـه ما أعرف الطفل ولد لو بنيه فـ جبت لونين

- كلش حلوات ، باوع شگد زغار

- هههههه إي كلش زغار ، من يجي أبننا تلبسيهن أله

- كلش متحمسه لشوفته ، أريد أجرب شعور الأمومه ، شهم كلش حلو هالشعور ، أتذكر اول ما جبت أكبر چان لمن يگوم يبجي ما أعرف شسوي بي آخذه لحضني و أگوم أغنيله و چان يسكت و ينام ، من ألزم إيديه الزغار بين أصابعي شعور يجنن

- هَسه هو باقيله 4 أشهر و يقبط سنتين ، يصير عمره سنتين شهم ، سنتين و آني ما أعرف عنه شي ، ما أعرف شكله ، ما سامعه منه كلمة ماما ، هَسه المن ديگول كلمة ماما ، أكيد لـ رجاء ، شهم ديگول لمره ثانية ماما و ...

أختنگت بعبرتي و ما تحملت بچيت ، جرني شهم و حضني ...

- أششش غاليتي لا تبچين كافي ، الله عوضنه بالطفل اللي ببطنچ هَسه

- بَس ما أنسى أكبر شهم ، ابني الأول ما أنساه

- و لا آنـه أنساه ، رغم أني ما شايفة و لا شايلة بحضني بَس أحس بي ، رابط الأب و أبنه اللي بيناتنا جاي يخلي قريب مني و مستحيل أنساه

- يلا كافي لتبچين روحي غسلي حتى ننزل نتغده و وراها نروح للدكتورة ، نسيتي عندچ مراجعة

مسح دموعي و باس عيوني ...

- ماريد أشوف هالعيون تبچي مره ثانية ، خوش؟

هزيتله براسي و رحت أغسل

***

فرات
للظهر و عشگ بعدها نايمة و لا تحركت ، خفت عليها ، رحت گعدت يمها و خليت إيدي على خدها ...

- عشگ ، حَبيبتي

- أگعدي كافي نوم

حركت راسها و فتحت عيونها ، دحگت عليه و أبتسمت ...

- شلونچ يـَ روحي ، خوما متوجعه؟

- لا أحسن الحمدلله

- الحمدلله ، يلا تا تاكلين ، نزلت گبل شوية جبتلچ أكل

ساعدتها و گامت رچت ظهرها ع المخده ، جريت الأكل و طلعته ...

- تريدين مي؟

- إي

صبيتلها مي بالگلاص و أنطيته ياها ، أخذته بَس إيدها ترجف ...

- أگفي جيبي آني اشربچ

أخذته من عدها و شربتها ، و گمت أوكلها بإيدي ...

- ليش مدتاكل أنت؟

- آني مو مشتهي

- ليش ، من اول ما فتحت عيوني ما شفتك أكلت شي !

- مو جوعان حَبيبي والله لوني چوعان چان أكلت ، أهم شي أنتِ تاكلين

كملتلها أكلها و أخذتها غسلت و رجعتها لفراشها ، لميت الغراض و گعدت يمها ع الچرباية ، صفنت بوجهي بعدين شالت إيدها اللي بيها الكانونه و خلتها على وجهي گامت تمسح على لحيتي و عيوني ...

- كلش مشتاقتلك آني

- مو بگدي والله ، شوگي لچ هد أركاني

- شنو سويت بغيابي؟

تذكرت زواجي من ريان و اللي صار ...

- ما سويت شي ، عايش بليه روح

- و هَسه؟

- رجعتلي روحي

- آني رجعتلي حياتي بأكملها اللي چنت فاقدتها ، فرات أنت حياتي كُلها

- و أنتِ عشگ صباي و باقي أيامي
أنتِ اللي اسهر لعيونچ كُل ليلة

- ما نسيت عيوني؟

- عيونچ فرات يرويني وكت العطش ، ما أنساهن

- فرات

- روح گلبه

- لتعوفني

- ماعوفچ والله ، لو تموتين هَم أموت وراچ

- أمي شلونها؟

- عمتي حالها أطگع من حالي ، بَس من درت لگيناچ ردت بيها الروح

- مشتاقتلها كُلش

- ماظل شي و نرجع إن شاء الله

- شوكت؟

- مادري من يسمح الدكتور انچ تطلعين

والله و ظلينه بالدستشفى ٣ أيام إلى ما شفنه عشگ شوي تحسن وضعها عاد گال الدكتور تگدرون تطلعون ، رجعت للغرفة ، اول ما فتحت الباب صدت عليه ...

- وين چنت كُلش تأخرت

- چنت يم الدكتور ، باچر راح نطلع للأنبار

- صدُگ؟؟

- إي والله

- يا الله والله كُلش مشتاقتلها ، مشتاقة لـ ماما و لـ خوالي و خالة نجاة ، مشتاقة للكل والله

- يلا باچر تشوفينهم إن شاء الله

اندگ الباب : تفضل

انفتح و فات صگر : يابه السلام عليكم

- و عليكم السلام

جه وگف يم عشگ ...

- هااا بنت العمه الحمدلله ع السلامة

- الله يسلمك صگر

- شلونچ ، شلون صرتي

- الحمدلله زينة

- الحمدلله

- صگر شسويتوا بـ فؤاد؟

- شسوينه بي هاي أنتِ ماعليچ بيها المهم خلصتي منه

- فدوة والله خايفة يرجعلي

- لا يابه شيرجعلچ ، غير گضينه بي التوبة بَعد ما يهوط صوبچ

- شُكرًا

- هذا واجبنه عوفي الـ شُكرًا

أندار عليه : فرات تعال رايدك بشغلة

طلع و آني طلعت وراه : هااا شسوت بشرني؟

- طلگها و هو الممنون

- ههههههه الله عليك

- والله

- شلون؟

حچالي السالفة كُلها و شسوو بي و ليش تأخر و چان ما يجينه للمستشفى هواي ...

- والله أنكُم كفو أقسم بالله

- إي عجل شعبالك ، يلا آني رايح

- وين؟

- عندي شغلة أكملها و أرجع

راح و آني طبيت للغرفة و ظليت واگف و أدحگ على عشگ و هي تدحگلي ، والله أحس جبال مو جبل أنزاحت عن صدري ، يعني هَسه عشگي رجعت حره و أگدر آخذها ، حچت و هي تدحگ عليه ...

- شبيك فرات؟

رحت گعدت يمها ع الچرباية ...

- أنتِ تحررتي هَسه

- شلون يعني مفهمت؟!

- يعني فؤاد طلگچ

ضحكت : الله عليك

- وداعتچ

- شلون ، يعني رفعتوا عليه دعوة لو شنو

- لا ، لا دعوة و لا بطيخ

- لعد؟

- صگر و ربعه عدهم أسلوب حلو بالإقناع و قنعوا و طلگچ و هو الممنون

- كتلوا يعني؟

- أصلاً هو صگر من أول ما جينه نعنع ضلوعه

- اووف الحمدلله يا ربي ، خلصت منه ، الله أستجاب دعائي فرات

- عشگ

- هاا

- مشتاگلچ

ظلت صافنه بوجهي ، تقربت عليها و سحبتها لصدري بهدوء خايف لا ألچمها ، حضنتها و خليت راسي برگبتها ، شميت ريحتها و ترست ريتي منها ، آخخخ يابه شمشتاگ لهالريحة ، هي هم شالت إيديها و حاوطت رگبتي بيهن ، تعلگت برگبتي ، همست يم أذني ...

- أموت عليك فراتي

گالت هيچ و آني نسيت وجعها و حضنتها بقوة ، فزيت من صاحت ...

- آخخخ

بسرعة وخرت عنها ...

- آسف آسف والله نسيت ، خوما أذيتچ؟

- لا بَس شوي

- الله يكسر إيد ...

ما خلتني أكمل خلت اصبعها على شفايفي ...

- لااا لتكمل لتگول هيچ

لزمت إيدها و بست أصبعها ...

- صار تأمريني أمر

ثاني يوم الصبح ، تجهزنه تا نطلع ، آني ملتهي الم بالغراض ، التفتت شفت عشگ بإيدها موبايلي ...

- هاي شجاي تسوين؟

- اريد اعدل شالي عليه ماعندي مرايه

رحتلها بسرعة ، ماريدها تشوف شكلها و الجروح اللي بوجهها ...

- لا لا ما يحتاج عوفي

- ليش؟

- عوفي و بَس

- شكلي مو حلو مو؟ ، وجهي متشوه

- لا يابه تراچ شحلاتچ ، بَس الدكتور گال موزين تستخدمين تيلفون

ظلت صافنه بوجهي عبالك ما صدگت ...

- هاا كملتي نطلع؟

- إي

جه صگر تا يشيل الفراض ، رحتله ...

- صگر بَس تنزل أطبگ مرايات السيارة كُلهن ماريد عشگ تشوف وجهها

- إي والله ذكرتني

أخذ الغراض و طلع و آني گدت عشگ و نمشي على كيفنه علمودها ، طلعنه و وصلنه السيارة ، فتحت الباب و صعدتها ، و رحت صعدت و أنطلقنه

عشق
مشينه و أحس أنُ عبالك چنت بسجن و طلعت منه ، ما مصدگة كُل المريت بي أنتهى و هَسه آني راجعة لـ حَبيبي اللي ما نسيته أبد و لا قل حُبه بگلبي و لو شوية ، إهتمامة بيه من چنه بالمستشفى ، سهره على راسي ، خوفه عليه من يشوفني أتوجع ، الأكل اللي يوكلني ياه بإيده ، كُل هاي الأمور ثبتتلي فرات شگد يحبني ولو حُبه ميحتاج إثبات ، حُبه ألي واضح بعيونه و لهفته عليه ، چان طول الطريق كُل شوي يلتفت عليه و يسألتي بيج شي؟ ، محتاجة شي؟ ، لحد ما دخلنه الأنبار و وصلنه البيت بخير و سلامة ، نزل صگر و نزل فرات أجه فتحلي الباب و مدلي إيده ...

- يلا أنزلي على كيفچ

لزمت إيده و نزلت ، گادني و مشينه ، وگفنه بالباب و أجه رجال ذبح الذبيحة گدامي لسلامتي ، درت وجهي ما گدرت أتحمل المنظر ، فرات حس عليه و گادني و فتنه جوه للحوش ، تلگوني خوالي ، سلموا عليه و حضنوني ، كُلش مشتاقتلهم ، اباوعلهم فرحانين كُلش بشوفتي ، فتنه جوه و تلگتني أمي تبچي ، حضنتني و زادت بالبچي و آني هَم بچيت ، وخرت عنها و سلمت على خالة نجاة و البنات ، بعدين گال فرات ...

- يلا آخذچ لغرفتچ ترتاحين من تعب الطريق

- يلا

مشينه و قبل منصعد الدرج دخت و وگفت ردت أوگع بَس چلبت بملابس فرات ، هو لف إيده على خصري و سندني ...

- هاا شبيچ؟؟

- دخت فرات

بدور : بنيتي تعاي بغرفتي خاف ما تگدرين تصعدين فوگ

- لا ماما أگدر

فرات : أشيلچ إذا ما تگدرين؟

- لا لا أگدر ميحتاج

گادني و صعدنه فوگ ، فتنه للغرفة و أخذني تمددت بفراشي و غطاني ...

- آني راح أروح أسلم ع الزلم تريدين شي؟

- لا حَبيبي سلامتك

- إي زين ، من تريدين شي خابريني

- تمام

طلع و أجتني أمي گعدت يمي و تبوس بيه كأنها مو مصدگة أني رجعت

********

يتبع ...

18.kij
تعالو أنستا و اليجي يدخلي خاص يگُلي علمود أضيفة كلوز لأن نشري اللي يخص الرواية أنشره بالكلوز فقط

سحر الدليمي