رواية عشگ الفرات ( عِندما تَهوى القُلوب ) الفصل السادس والستون 66 - بقلم سحر الدليمي

بارت ثاني بنفس اليوم مثل ما وعدتكم🤍
لا تنسون التصويت و التعليق بين الفقرات
قراءة مُمتعة ♥️

***

- الحُب قسمة يـَ أبن الناس مكتوبة علينه
علينه أنكتب هالأحساس صدگ مو بإيدينه

***

أنصدمت من شفته گدامي ، معقوله عبدالله اللي خطبني ، التفت شافني و أبتسم ، گعدت يم أبويه و هو يم أبوه ، سألني الشيخ و أنطيت موافقتي ، من نطقتها دحگ عليه و أبتسم ، ظلو يسولفون شوي بعدين گاموا راحو للديوانية ظلينه بَس آني وياه ، گام و جه گعد يمي آني مدنگه ما دحگت عليه ، گال ...

- شلونچ ريان

- الحمدلله

- باعي يمكن صار كلشي بسرعة بَس أريدچ تعرفين شي واحد ، آنـه كلش أحبچ و من زمان ردت أتقدملچ بَس تزوجتي و من تطلگتي گلت ما أفوت الفرصة و أجيت خطبتچ

رفعت راسي مصدومة من كلامة ...

- تحبني؟

- هوواي والله ، من أول ما شفتچ ببيت المهيوب دخلتي مخي و گلبي و ما طلعتي أبد

- معقولة أكو أحد يحبني !

- ليش تحچين هيچ؟!

- هيچ

- باعي آنـه ما أعرفچ كلش و لا أنتِ تعرفيني ، بَس بمرور الأيام حنتعرف على بَعض إن شاء الله

هزيتله براسي ، تقرب عليه و رفع راسي بإيده ، دحگ بعيوني و باسني من راسي ...

- راح أروح هَسه بَس راح نبقى على تواصل

هزيتله براسي رجع گال ...

- إذا محد يحبچ فـ آني أحبچ

گال هيچ و طلع

***

عشق
مر شهر و نص و آني الحمدلله تحسنت و وجهي رجع مثل أول يعني مو مثل أول تمامًا بَس تحسن ، فرات چان كُل هاي المدة بيني و بين تجهيزات عرسنه ، ما تركني و لا لحظة و بقى وياي و آني أستمديت القوة منه و تعافيت ، ما حسسني بالحزن ع اللي صار أبد بالعكس و هو يمي ينسيني كُلشي مريت بي ، اليوم راح يجيبون الشيح حتى نرجع نعقد و باچر عرسنه ، لحد هَسه مو مستوعبة أنُ باچر راح نتزوج ، راح أتزوج من الشخص اللي ياما تمنيت أكون وياه ، من الشخص اللي حُبه ترس گلبي و اللي چان سندي و قوتي بأضعف حالاتي ، اللي ما تخلى عني أبد و جابني من حلگ السبع ، يوم عن يوم فرات يكبر بعيني و يكبر حُبه بگلبي أكثر و أكثر

تجهزت و لبست الفستان اللي جابلي ياه فرات بالجهاز هو طلب مني ألبسه بيوم العقد چان من إختياره ، لبست و خليت مكياج بسيط ، كملت و گعدت أنتظر ، شوي و صاحوني علمود يسألني الشيخ ، مشيت و گلبي دگاته تقره ألف ، وصلت و سألني و نطيته الموافقة ، خليت شال على راسي لأن الولد راح يفوتون ، شوي و دخل فرات و وياه خوالي و الولد ، خالة نجاة هلهلت و طشت فوگاه چكليت ، وگف و باس راسها ، أباوعله چان لابس بنطرون أبيض و قميص أسود و كاف ردن القميص للنص ، أجه عليه و هو مبتسم ...

- و رجعتي نورتي حياتي مره ثانية

أبتسمتله و هو مد إيده بجيبه و طلع گلادتي اللي محفور عليها أسمي و أسمه ، خلاها گدامي و گال ...

- تتذكرينها؟

- هاي گلادتي ، وين لگيتها؟

- من أخذتچ من بيت هذاك الحيوان شفتها واگعه بالگاع و أخذتها ، چان المفتاح مالها خربان بَس صلحته

بقيت أباوعله ما حچيت شي ، گال ...

- أنداري تا ألبسچ ياها

أنداريت و لبسني ياها ، لمسات إيديه على رگبتي حسسني بشعور غريب ، رجعت أنداريت عليه ، باس راسي و حضني

ثاني يوم گعدنه من الصبح ، يا دوب تجهزنه و رحنه للصالون ، وصلنه هناك و بدينه بالتجهيزات و آني كلش فرحانه ، أحس هاي الدنيا مسايعتني من گد الفرحة ، و أخيرًا تالي صبري فرج و راح أعيش وياه طول العمر ، أحس أني بحلم

***

فرات : رافد السيارة عليك بربك أخذها خل يرتبون الزينه و هاي السوالف

- أبشر

- بَس دحگ أريد كُلشي بسيط ماريد شي قوي هيج بَس زينة بسيطة

- هاذ هو تم

- و الوان الزينة أريدها بيضه لأن السيارة سودة و ماريد غير ألوان

- إي إي أفتهمنه

راح و رجعت ناديته ...

- أگف أگف رافد

- هااا

- على كيفك أمشي بالسيارة تره تدري معزتها عندي

- كااافي تووصي يوول بالقرآن هساع أذبك أنت و سيارتك بالشط غديي شملحة

- أنچب و يلا ولي

- هاي راح أروح بَس تره مو لخاطرك لخاطر عمي

- إي ديلا أشطح

راح و آني تذكرت ملابسي ...

- دح يا الله نسيت

صگر : هاا شنسيت

- ملابسي نسيت ما جبتهن ، آني راح أروح أجيبهن

- مو عندك سغل بالقاعة مال العرس

- إي والله نسيت

- دروح و ملابسك آني أجيبهن

- هاا خوش عجل

- بَس وين أجيبلك ياهن؟

- هينه ع البيت

- خوش

ردنه نمشي چان يجي أبويه ...

- هااا رايحين

- إي

- زين الله وياكم لا تتأخرون

- يابه خوالي ما وصلوا؟

- ذيچ الساع خابرتهم ما يجون

- شنووو !! ، بكيفهم ما يجوون؟؟

- والله مدري عنهم

- بالقرآن ما يصير هيچ ، عجل منو اللي تگعدلي يحضر عرسي و يفرحون وياي

- خوالك ماعدهم كلمة

صگر : هااا يابه تره ما أسمحلك ذوله خوالي

- هههههههه دطير أنت و خوالك

فرات : والله عليها حگ هاي

عَلي : إي والله يـَ بوك و حگ مربع هَم

صگر : يابه شنو أنت جاي تشيشه على خواله

- لا بَس آني فاعل خير

- هههههههه خوش فاعل خير

طلعت بَس ضجت حيل ، چنت أريدهم ويايه بهاليوم و هُمه چانوا واعديني ، وصلت للقاعة و طبيت تا أعلمهم شلون يخلون الزينة لأن ما عجبت عشگ موتتني ساعة هيچ و ساعة هيچ

عشق
كملنه كُل شغلنه بالصالون و وگفت ألقي نظرة على شكلي ، وگفت گدام المرايه و باوعت على نفسي و آني بالبدلة البيضة ، صفنت ، معقولة أجه هذا اليوم اللي أنتظرته سنين ، ألبس البدلة البيضة و أتزوج فرات و أبقى يمه طول العمر بعد كُل اللي مرينه بي ، معقولة بعد كُل اللي صار نرجع ننجمع و تتحقق أمانينا ، على أثر هاي الأفكار نزلن دموعي بدون ما أحس ، نَفس واگفة بصفي ، حچت ...

- لااا ولچ ليش هالبچي ، هاچ أمسحي دموعچ هَسه يخرب المكياج

أخذت منها الكلنس و مسحت دموعي ، حچت ...

- ليش تبچين يا عُمري

- والله ما أعرف هيچ ، يمكن هاي دموع الفرح

- يگلبي إن شاء الله الفرح دوم وياچ و ميفارگچ

شوي و سمعنه هورنات عالية بره ، گالو أجت الزفه ، تجهزنه و البنات لمن الغراض ، طبو فرات و وياه خوالي و رافد و صگر و وياهم نسوان ما أعرفهن طبن يهلهلن ، الصالون أنترس ، أجه فرات يمشي بأتجاهي و ويه كُل خطوة يخطيها گلبي يدگ دگة ترحيب و عشگ أله ، چان لابس دشداشة بيضة و شماغ أحمر و العباية الجوزية شايلها بأيده ، وصل يمي و باوعلي و هو مبتسم ، تقرب عليه و باسني من راسي دنگ على أذني و همس ...

- و صار اللي نتمناه يـَ عشگي و تالي هالعشگ زفه و هلاهل و إيدي تشبك إيدچ

حط الكبوس على راسي و أنطاني إيده و گادني و مشينه ، صعدنه بسيارته هو اليسوق و آني صعدت بصفه لأن بدلتي مو مفرشه حيل أختاريتها تكون بسيطة و فرشتها زغيره علمود ما أتقيد بيها ، أصلاً كُلشي أختاريته چان بسيط كلش من مكياج لتسريحة الشعر للأكسسوارات كُلشي بسيط ، فرات شغل هاي الأغنية مال حبها و أخذها و ما چذب نسيت أسمها ، شغلها و على الصوت ع الآخر و هو يضحك و يردد ويه الأغنية ...

- فرات نصي والله كُلش عالي

- ما أنصي ، خلي الكُل يدري أني أخذتچ و صرتي ليه بعد هايهيه

أبتسمت و سكتت عنه ، شوي و وصلنه القاعة مالت العرس ، ردت أنزل و گالي ...

- أگفي

نزل هو و أجه عليه فتحلي الباب  ، حاوطت إيدي على زنده و دخلنه أول ما دخلنه أستقبلونه بالهلاهل و الچكليت ، رحنه للمكان اللي نگعد بي أجينه حَتى نگعد و صاح رافد ...

- أگفو أگفو ، مو هَسه تگعدون تعالو تا ناخذلكم صور

رحنه لمكان معزول بالقاعة خاص بجلسات التصوير يعني مابي زلم فـ آني گدرت آخذ راحتي و أنزع الكبوس ، أجت المصورة و أخذتلنه صور و رجعنه گعدنه بمكانه ، گعد فرات يمي و صار يحچي وياي ، وره تقريب الربع ساعة دخلو خوال فرات و ولد خواله كُلهم أجو حَتى عوائلهم ، أحنه تفاجأنه لأن گالو منگدر نجي ، گام فرات وگف گبالهم و هُمه أستقبلو بهوسات جنوبية كُلش حلوة ، خلو المعازيم كُلهم يصفنون عليهم ، كملو الهوسات و سلمو على فرات و فراحنين اله هواي كأنو أبنهم مو أبن أختهم ، طلع شهم و وره شوي رجع و وياه فرقة چوبي و مُطرب ، حچه ...

- يلا فرات گابلني

- إي أگابلك ليش لا

فرات لف الشماغ على راسه و شهم هَم كذلك سوه نفس الشي و صارو يلعبون چوبي ، يتحركون بخفة و بتميز على إيقاع الطبل و المُطرب يغني و باقي الفرقة يچوبون ، خلصو فرات و شهم و ، باقي الفرقة بقو يلعبون ، فرات أجه گعد يمي و صگر  أجه أخذ سيف حَتى يوگفون ويه الفرقة ، و رُسل متقبل ياخذه خايفة لا يخترع من صوت الطبل لأن هو بعده زغير ...

صگر : ما يخترع معودة خليه يتعلم

أخذه و وگفو يم الفرقة ، سيف يريد ينزل من حضن أبوه و هو بعده حَتى ميمشي ،شوي و أنطاه لخالي علي و گامو يلعبون هو و رافد

تذكرت تيلفوني ما أدري وين ...

- مُهره شفتي تيلفوني وين؟

- والله ما أدري ، أوگفي يمكن يم نَفس

صحنه على نَفس و گامت بالگوة تمشي من بطنها ، أجت ...

- هاا ولچن شبيچن؟

- تيلفوني يمچ؟

- إي يمي

- أنطيني ياه

فتحت جنطتها و أنطتني ياه و راحت ، باوعلي فرات ...

- شلچ بالتيلفون؟

أخذت إيده و شابكت أصابيعنه سوه ، طگيتلها صورة و نزلته ستوري ع الأنستا ، كتبت تاريخ اليوم اللي هو زواجنه و حطيت فوگاه قلب أحمر و بصفه محبس ، شوفتها الفرات و أبتسم

خلص العرس و كلمن راح لبيته و أحنه رجعنه لبيتنه ، وصلنه و أول ما دخلنه صاح رافد ...

- إيييييي يلاا وياي
و بنت الشيح لأبن الشيخ جبناها
هو الرادها و هو التمناها

صاحو كلهم وياه : بنت الشيخ لأبن الشيخ جبناها
هو الرادها و هو التمناها

بعدين رجع گال : جبنالك وردة بصينية
بنت شيوخ و بغدادية

و رجعوا ردو وراه و فرات يباوعله و يضحك

سوولنه حفلة زغيره بيناتنه بَس أحنه و خوال فرات و عوائلهم ، رگصنه سلو موشن و تذكرت حفلة المهر مالتنه من رگصنه و آني چنت ما أعرف بَس فرات علمني ، شغلوا الموسيقى و گام فرات و نطاني إيده و گمت وياه ، صرنه نرگص و هو كُل شوي حاضني و إيده ما شالها عن خصري ، گعدت آني و هو راح لخالة نجاة ...

- يلا ماما تعاي

- هااا أبني شنو؟

- نرگص شنو

- ما أعرف ولك

- آني أعلمچ لو تريدين ترگصين ويه أبويه تتحججين

- ههههههه لا ولك ما أعرف والله

ديلا تعاي تعاي

جرها عليه و صاروا يرگصون سوه ، شگد حلوين سوه ، كمل و أجه يمي ، صاح رافد ...

- يلا الصور

فرات : ما كافي صور

- لا مو كافي آني المصور و بكيفي

گمنه چان يگول ...

- يلا فرات سويلها هاي الحركة اللي يسوونها أهل الخليج بأعراسهم بما أنُ أنت لابس زي عربي

- يا حركة يول؟

- من تلبسها العباية شبيك

ضحك فرات و أجه ديلبنس العباية ، صاح رافد ...

- أگف أول شي البسها و بعدين أنزعها و لبسها ياها لأن راح أصورلكم فيديو

لبسها فرات و تقرب مني و نزعها و لبسني ياها و باس راسي و رافد يصور و كل شوي ناطينه حركة جديدة

بقينه ساعتين لحد الساعة 12 و فض كُلشي ، صعدني ماما و خالة و البنات للغرفة ، حچت ماما ...

- الله يهنيچ و يسعدچ إن شاء الله يـَ ماما
حضنتها و بچيت ، حچت خالة ...

- شبيچ ولچ تره وياچ بنفس البيت ليش البچي ، لو هَم تريديها تنام وياچ بنفس الغرفة ، چا وليدي وين يروح

ضحكنه على حچيها ، طلعن و بقيت آني گاعدة ع الچرباية ، وره شوي و أجه فرات ، گعد بصفي ع الچربايه و نزع الشماغ و العگال ، شال إيدي و باسها و خلاها بين أديه ، حچه ...

- حمل و أنزاح عن گلبي من صرتي ليه

- ما چنت متوقعة يجي يوم و ننجمع آني وياك بنفس الغرفة

- آني عشگتچ عشگ چنت مستعد أضحي بكُلشي بَس تصيرين ليه

- آني أعشگك فرات

- مو بگدي

أبتسمت و باسني من خدي ، سكتنه بَس أنتبهتله مو على بعضه حسيت بي شي بَس ما أدري شنو ، رجع حچه ...

- ما تنزعين البدلة ، شنو ناوية تنامين بيها

- لا أنزعها

- عَجل يلا خل أساعدچ

- هااااا

- هاا شنو؟!

- مو شسمه

- عشگي ، هَسه أنتِ حلالي و آني حلالچ ، بعد عليش هالخوف

گام و گومني وياه وگف ورايه و فتح سحاب البدله بهدوء ، زاح البدلة عن چتفي الأيمن و باسه ، بعدين حسيته أبتعد عني ، أنداريت أباوعله لگيته گاعد ع الچرباية و عاگعد حواجبة ، گصته كُلها عرگ ، أستغربت حالته ...

- فرات شبييك؟؟!

- مابيه شي عشگي ، أنتِ كملي و آني فايت للحمام

گام راح للحمام و آني نزعت البدلة و لبست فستان نوم قصير الى فوگ الركبة ، و صدره مفتوح ، ردت ألبس الروب مالته بَس گلت ليش ألبسه ، هاهيه بعد هو صار زوجي ليش أستحي منه لازم أتعود عليه ، ذبيت الروب ع القنفة و رحت للمرايه فتحت التسريحة و خليت شعري فتح وگفت أرش عطر و طلع فرات من الحمام ، وگف باوعلي و أبتسم ، ذب الخوالي و أجه عليه ، وگف مقابيلي ، حط إيده جوه حنچي و رفع وجهي دنگ عليه و باسني من شفايفي ، أبتعد عني و گعد ع الچرباية ، فتح دگم الدشداشة كُلهن و صار يفرك بگلبه ، و العرگ ينزل من گصته ، و يتنفس سريع ، گعدت يمه ...

- شبيك فراتي أحچيلي شديصير وياك؟؟؟

أبتسم و حچه ...

- مابيه شي حياتي

گال هيچ و گام نزع الدشداشة و الفانيله الداخلية و لبس تراك بَس ما لبس بدي و لا فانيله بقي هيچ ، أجه وتمدد ع الچرباية و صاحني أجي يمه ، رحت گعدت يمه و هو حاط إيده على گلبه ، ساعة و هو هيچ و آني تخبلت نزلت دموعي من شفت حالته ، حچه ...

- لا تبچين عشگي والله ما بيه شي

- شلون مابيك شي متشوف شلون حالتك فرات !!

- هَسه أتحسن حياتي

- آني أروح أنادي أحد ميصير تبقي هيچ

گمت و لزمني من إيدي ...

- لا تنادين أحد ما حاجة

- فرات فهمني شنو السالفة ، أنت مو علساس من فكو عنك السحر تحسنت و ما بقى بيك شي؟!

- تحسنت صحيح ، بَس گلبي مرات ينغزني

- و ليش ما گلت لأهلك؟

- ما بيه شي ليش أخوفهم

- يعني كُل هذا و تگول مابيك شي؟؟

بقى ساكت ما حچه شي ، ضلت هاي حالته لحد نص الليل و آني ما غمضتلي عين و هو هيچ ، لحد ما حسيت أنه نام ، بسته من راسه حرارته بعدها ما نازله ، بقيت گاعدة على راسه ما ردت أنام بَس بعدين غفيت بدون ما أدري من التعب

فتحت عيوني و الصبح صاير ، باوعت لتيلفوني الساعة بالـ 9 ، رجعت باوعت لفرات چان نايم بتعب ، تقربت منه شفت حرارته الحمدلله نازله ، گمت توضيت و صليت و بدلت لبست فستان أبيض كلوش و رهمت وياه شال بيجي ، حطيت مكياج خفيف و رشيت عطر و گمت ، طفيت السبلت و غطيت فرات زين و طلعت ، نزلت و أستقبلوني بالهلاهل ، گعدت و گعدت يمي أمي ، حچت خالة ...

- چا رجلچ ليش ما نزل وياچ؟

- عفته نايم خالة ، ما أجه من گلبي أگعده

تقربت مني أمي و همست ...

- شبي رجلچ؟!

- نايم ماما

- أحچيلي بنيتي آني أمچ

- ماما فرات البارحة الليل كُله ما نامه

- ليش؟

- گلبه يوجعه ، بعد آثار السحر بجسمه

- يوويليي ، و آني أگول شبي الوليد ذبلان و منتهي ، آني عبالي من فؤاد أخذچ ، أثاري سالفة السحر بعدها

- ماما شسوي كُليلي ، البارحة الليل كُله و هو يون من الوجع ، كُل مينام يرجع يفز ، شسويله

- ما دام أنتوا سوه كُلشي يهون و هالسالفة بعدين نشوفلها حل ، ما وصيچ يـَ ماما صيري سند اله و أگفي وياه بكُلشي بالصغيره گبل الچبيره ، تره فرات تعب و تأذه و هو بعيد عنچ ، چنت كُل يوم أشوف حُبه الچ و لهفته و شوگه عليچ بعيونه ، چنت أشوفچ بعيونه و هالشي خلاني أأمن عليچ أكثر

- ماما فرات روحي من الدنيا و آني وياه بكُلشي و أفدي بروحي والله

- عفيه بنيتي

بقيت گاعده وياهم ساعة ، بعدين رجعت لغرفتنه ، فتت و چان فراتي بعده نايم ، رحت للكنتور طلعت دشداشة قصيرة و خفيفة و نص ردن ، ذبيت الفستان و لبستها و فتحت شعري و خليت من العطر اللي يحبه فرات هو جابلي ياه بالجهاز ، گالي أحب هذا العطر أريدچ تحطين منه ، رحت للچربايه گعدت يمه نايم بسابع نومه ، أباوعله و أتأمل تفاصيله الذوبت روحي عشگ ، جروح الحادث اللي لهسه آثارهن موجوده بصدره ، أباوع لعيونه و هو مغمصهن رموشه طوال ، شواربه و لحيته السوده الخفيفة و الشيب الخفيف اللي بيها ، آخخخ يا هذا الشيب كُله من ورايه ، أباوعله و أريد أحفظ كُل تفاصيله ، طگت روحي أريده يگعد و هو نايم و لا يتحرك ، تقربت منه و بديت أمشي أصبعي بخفه على صدره وصولاً لرگبته ، دنگت و همس بإذنه ...

- أبو العيون الحلوه ، حَبيبي يلا أگعد

أباوعله نايم و لا تحرك ، دنگت بسته من عيونه و من خده و من صدره ماكو و لا يحس ، طگت روحي و گمت ، ما حسيت بي أله من لزمني من إيدي و جرني عليه ، وگعت ع الچربايه ، خلاني جواه و دنگ عليه ...

- تره گاعد مو نايم آني ، بَس حبيت أعاند شوي

حچه و هو يفرك لحيته بوجهي ...

- يااا فراات وخرر لحيتك تچكچك فدووة

- أوووي تچكچك ، عجل منو الصارله ساعة يدحگ عليه و صافن بلحيتي

- عزااا شمدرييك !!

- كُلشي أدري آني

دنگ ديريد يبوسني من رگبتي و چان يندگ الباب ...

- أهووو هسه وكتك يالباب ، هو حظي مشخط أدري بي

- أشش عيب ليسمعونك ، وخر خل أگوم أفتح الباب

- گومي گومي ، گومي و عوفيني

گمت فتحت الباب لگيت نَفس شايلة صينية الريوگ ...

- هذا ريوگكم يـَ عرسان

- شُكرًا بَعد روحي

غمزتلي و گالت ...

- ديلا بعدين تشكريني هَسه فوتي راضي حبيب الگلب

راحت و آني فتت و سديت الباب ، خليت الصينية بالگاع ...

- يلا حُبي گوم تريگ

گام و أجه عليه ...

- ما عاجبني أتريگ من هذا

- لعد شتريد؟

- هو أكو واحد عنده هالعسل هذا و يروح ياكل جبن و چاي

گال هيچ و شالني بين إيديه ...

- يااا ولك شدسوي نزلننيي ، ولچ ماماااا لحگينيي

- إي عود خلي ماما تفيدچ

شالني و خلاني ع الچربايه ...

- والله غير أطلع القضى و المضى منچ

مجتف إيديه و حار وين يبوسني ، بوسني بوجهي و شفايفي و رگبتي و صدري ، حتى خشمي باسه و آني ميته ضحك عليه ، دنگ و همس بأذني ...

- مريتي و عشگي و عگال راسي ، أعشگچ حييييل يـَ روح روحي

***

مُهره
واگفه بالمطبخ جاي أشرب مي ، ما أحس أله أيدين حاوطت خصري ، عرفته شهم ، لزمت إيديه و هو خله راسها برگبتي ...

- شجاي تسوي هنا شهم

- تره مشتاگ آني

- عيب وخر ليروح أحد يشوفنه أحنه مو ببيتنه

وخر عني ، أنداريت عليه و هو باوع لبطني و گال ...

- شلونه حَبيب أبوه

- زين

- مشتهيه شي أجيبلچ

- إي مشتهية البقلاوة

- صار أجيبلچ بقلاوة ، و بعد؟

- كيك بالشوكلا

- من عيوني ، و بعد؟

- هايهيه ماكو شي

تقرب باسني من خدي و طلع ، رجعت آني للبنات چانن گاعدات بالصالة

***

نَفس
چنت واگفه دامشط ، أنفتح الباب و فات رافد مستعجل ، طلع ملابسه و بدل بسرعة ، أجه يمي حضني و باسني ، گال و هو إيده على بطني ...

- شوكت يطلع هالزعطوط مو متت و آني أنتظرة

- ههههههه ماظل شي حبيبي ، كُله شهر و نص و يطلع

- و ينور حياتنا

- إي

- ماوصيچ ديري بالچ على نفسچ خوش

- ميحتاج توصي حبيبي

راد يمشي لزمته من إيده ...

- وين رايح؟

- ويه الولد بالحديقة

- هاا يعني متطلعون

- لا هينه موجودين

- خوش روح حَبيبي

راح و آني غيرت ملابسي و حطيت شوي مكياج و لبست شالي و نزلت جوه ويه البنات

***

عشق
فتحت عيوني و شفت فرات واگف گدام المرايه ، گعدت أباوعله لابس دشداشة صحراوية و جاي يلف الغترة البيضة چراوية ، باوعت ع الساعة چانت بالأربعة العصر ، گمت أمشي شوي شوي ، حضنته من ظهره ضحك و گال ...

- وخري يولي خل ألف الغتره

- ما أوخر

- بالله شلون سالفة هاي

جرني من إيدي و وگفني گباله ...

- شرايچ أنتِ تلفيلي ياها

- تمام ، بَس روح أگعد ع الچربايه لأن إذا بقيت واگف ما ألوحك

ضحك و راح گعد ، أخذت الغتره و لفيتله ياها چراويه ، گام شافها بالمرايه و گال ...

- عاشت إيدچ

- و إيدك ، آني حروح أسبح

- تمام روحي

أخذت ملابسي و فتت للحمام ، سبحت و كملت و طلعت أنشف بشعري ، لگيته گاعد و مخلي إيده على راسه ...

- فراتي

رفع راسه شافني و أبتسم ...

- هاا يـَ عگال راسي

- بيك شي؟

- لا حَبيبي مابيه شي ، يلا ألبسي تا ننزل

لبست ملابسي و مشطت شعري و خليت مكياج و كُل هذا و هو ساكت ما حچه و لا كلمة ...

- فرات

- هاا كملتي

- إي

- يلا عجل أمشي

گام و وگفته ...

- هَسه أسويلك أكل بَس وين راح تگعد؟

- لا ماريد

- فرات أنت من أكل العرس ما أكلت شي لحد هَسه شبيك !!

- مابيه شي والله بَس مو جوعان

- متأكد

- وداعتچ

أخذ إيدي و نزلنه سوه ، هوه راح للولد و آني رحت للبنات

فرات
طلعت بره بالحديقة لگيت الولد كلهم موجودين ، شهم و رافد و عبدالله و عباس جاي يلعبون طوبه و صگر ملتهي ويه لارين و سيف ، شافوني و جو كلهم باركولي ، گعدنه و گال رافد ...

- هَسه افتهمنه عريس بَس النهار كله يم المره لا هاي واگفة

- يول والله چنت نايم الليل كله ما نمته

عباس و رافد صاروا واحد يدحگ على واحد آخر شي ضحكوا و الولد كلهم ضحكو وياهم ، شلت بطل المي و رشيته عليهم ...

- نيتكم الخـ ** هاي صفوها لا أنعل ... ، أستغفر الله

رافد : إي إي كمل گول أنعل والديكم ، عاد هنا تنعلس علسه مرتبة أبويه عمك و أبوه خالك

- لا عمي و خالي على راسي بَس أنتوا گو****

عباس : رحم الله والديك

رافد : إي سولفلنه ليش ما نمت الليل

- لا بَس تمرضت شوي

صگر : شبيك شصارلك؟

- راسي عبن تعبت

- إي إذا راسك اشوه

شهم : إي هَسه كلنه تزوجنه و عبدالله خطب ، بقوا بَس عباس و سجاد ، شوكت تسوونها بويه؟

سجاد : والله آني مستعد بَس ألگه بنت الحلال

- إي إن شاء الله تلگاها ، و أنت عباس أفندي؟

- لا آنـه شايل الفكرة من راسي

فرات : إي تريد تظل دايح بكيفك

- إي و علي شحلاتها تديح بكيفك ما وراك مره تظل تسألك وين رايح و وين جاي

عبدالله : وراك أبوي حَبيبي

- والله عاد هذا أزود حتى من مرتي لاحگني ع الدعسه على گولت أخوانه السوريين

صگر : ما يلام بيك عبنك مو آدمي

- رحم الله والديك أبن عمتي

- و والديك أبن خالي

ضحكنه على سوالفه و ظلينه نسولف إلى ما جو أبويه و عمي و خوالي ، چانو بالمعرض روحهم معلگه بالشغل حتى بالعطلة لازم يطلعولهم شغلة ، گعدوا يمنه و صاروا يسولفون بالشغل و طبعًا ما تخلى الگعده من رزايل خالي بكر لـ عباس ....

********

يتبع ...

18.kij
تعالو أنستا و اللي يجي يدخلي خاص يگُلي آني جديد علمود اضيفه كلوز لأن نشري اللي يخص الرواية كُله بالكلوز

سحر الدليمي