رواية عشگ الفرات ( عِندما تَهوى القُلوب ) الفصل الخامس والثلاثون 35 - بقلم سحر الدليمي

- و كون أعلگنچ گلاده برگبتي
و كُل ما ردت أشيلچ و أبوسنچ

***

مد إيده فؤاد حَتى يسلم عليه ، بَس شو فرات بقى صافن بوجهه و هو عاگد حواجبه ، يباوع عليه و يرجع يباوع لـ فؤاد ، أحسه هَسه يطرده ، حچت خاله ...

- فرات سلم ع الولد شبيك أبني!

فز من صفنته و مد إيده و سلم على فؤاد بَس من وره خشمه ...

- هلا

رجع يباوعلي و أشرلي أدخل جوه ، عفتهم و دخلت ، و فرات أخذ فؤاد و دخلو للديوان ، أجتني ماما ، حچيت ...

- يربي بَس لتصير بينهم مشكلة

- بين منو؟

- فرات و فؤاد

- أسم الله ليش المشاكل ماما؟

- ماما مشفتي فرات شلون يباوعله و يحچي وياه من وره خشمه ، من وقت ما سألني عن ولد عمي و حچيتله عنهم هو ما حابهم حَتى قبل ليشوفهم

- لا ماما فرات عاقل ميسوي هيچ

- گلبي مو مرتاح لجية فؤاد أبد

- زين هو ليش مو حاب فؤاد؟ ، الوليد توه وصل و ما شفنه منه شي

- خايف لا يحط عينه عليه

- أهااا يعني السالفة غيرة ، هههههههه

- مماامااا ، داگُلچ حيتعاركون و أنتِ تضحكين

- ول يـَ أمي فرات مو طفل تا يسوي هيچ ويه ضيفه ، حَتى لو هو مغتاض منه راح يسكت أحترامًا لـ واجب الضيافة

- مادري بَس خايفة

- تحبينه يـَ روح أمچ؟

- هاااا؟؟

- من گال هاا سمع

- إي أحبه كُلش ماما ، فرات ينحب غصب

- لعد منو اللي چانت تضوج منه و تسمي نهر الفرات ، هههههههه

- ماما ، هاي قبل مو هَسه

- الله يوفقكم و يسعودكم يـَ ماما ، راح أأمن عليچ عند أبن أخوية و أعرفه گد الأمانة

- آمين يعمري

- يلا خل نروح نضَيف الوليد عيب

- ماما روحي أنتِ حبابه آني ما أگدر

- لييش؟!

- فرات ميريدني أطلع گدامه

- ميصير بنتي الوليد متعني من غاد تا يشوفنه ، يلا گدامي

طلعنه للمطبخ سوينه عصير و رحنه للديوان ، راحت أمي گعدت و آني قدمتلهم العصير ، فؤاد أخذه و عينه عليه ، أباوع فرات يخزرني بعيونه ، أووف يا ربي شلون راح تعدي على خير ما أدري ، رحت گعدت يم أمي ، حچه فؤاد ...

- شلونكم عمه إن شاء الله بخير

- بخير يـَ عمه الحمدلله

- خوما محتاجين شي؟

- لا وليدي الحمدلله ما محتاجين شي

يحچي و يباوعلي ، أنتبهت لـ فرات يهز برجله و يباوع عليه ، عرفت معنى نظراته يريدني أگوم ، گمت و رحت للصالة لأن صراحة ما تحملت نظرات فؤاد أبد ، شوي و أجاني فرات ، حچه ...

- أنعل عمامچ واحد واحد ، و أنعل ولدهم ، و أنعل عشيرتهم كُلها من صغيرهم لـ چبيرهم ، خوش؟؟

- ليش هالسب فرات شبيك؟!

- يول يربچ ما شفتي شلون يدحگ عليچ ، بالگوه گضبت نفسي و ما فگست عيونه

- هَسه ليش معصب عليه ، آني شعليه

- ماريدچ تطلعين گدامة خلاص ، كأنو ما موجودة ، خوووش؟؟؟

- تمام

راح و آني رحت لـ غرفتي سديت الباب و گعدت ، يربي شلون بيه ، فرات يغار كلش و غيرته صعبة گُبل يعصب و ميتفاهم ، هَسه منين طلع النه هذا فؤاد

لليل و بقى فؤاد يمنه ، أجو خوالي و ما قبلو يروح فـ حيبات هنا ، سوينه عشه و حطينه ، الزلم وحد و النسوان وحد ، گعدنه أحنه نتعشه بالصالة و هُمه بالديوان ، كملنه و رحت آني لـ غرفتي أدرس ، لأن هالفترة هواي عندي أمتحانات و هاي آخر سنة يعني لازم أركز بالدراسة ، بقيت أدرس لحد الساعة 11 ، كملت و عفت الكتب و رحت غسلت وجهي و أجيت سويت شوية عناية لبشرتي ، كملت و تمددت حَتى أنام و آني ما أعرف شصار ما صار ، أكيد فرات هَسه مشتعل بنار من وره فؤاد

***

فرات
گاعد بالحديقة ، كرهت البيت من وره هذا فؤاد ، جاني رافد گعد يمي ، حچه ...

- شو هنا؟!

- عَجل وين أولي

- ما تروح تگعد بالديوان

- آني بالگوه گاضب نفسي على فؤاد تريدني أگعد يمه

- ليش يول شمسوي بيك

- الحيوان عيونه ما جاي تنزل من عشگ ، وين ما يشوفها يضل صافن عليها

- هااا هَسه أفتهمت

- شفتهمت؟

- الغيرة يـَ فرات

- السالفة مو سالفة غيرة و بَس رافد ، هذا أبن عَم و أبن العم ينخاف منه

- يعني خايف لا ينهى عليها؟!

- إي

- يمعود هذا شمفهمه بهالسوالف

- آني أحسب حساب لـ كُلشي رافد

- والله يخوي مدري شگُلك

- شوكت تقطعون مهر أنت و نَفس؟

- وياكم حَبيبي ، حَتى الحفلة وياكم

- عذه حَتى بـ هاي چاك نفسك وياي

- إي طبعًا غير ضلعك

- گشره يـَ هالضلع

- ههههههههه ، وياك وياك للموت

***

مُهره
گاعدة أرتب بملابسي و أرجعهن للكنتور ، أجه شهم ، تمدد ع الچرباية و صار يباوعلي أشوفه من المرايه ، حچه ...

- تعاي

- جاي أرتب بالملابس ، هَسه بَس أكمل

- عوفي الملابس هَسه ، تعاي مشتاقلچ

عفت الملابس و رحت گعدت بصفه ، حچه ...

- بَعد لا تسوين بيه هيچ

- آسفه يـَ گلبي

- ولچ والله تمنيت الموت بغيابچ عني

- أسم الله ، لتحچي هيچ شهم

- تحبيني مُهره؟

- لو ما أحبك چان ما بقيت وياك و شلت قطعة منك ببطني

- أعشگچ و علي الفحل

- و آني هَم يـَ روحي

سحبني لحضنه و حضني حيل ، حچه ...

- شوكت نگدر نعرف جنس الطفل

- مو هَسه ، أله بالشهر الثالث أو الرابع

- و أنتِ هَسه بـ يا شهر؟

- بالثاني

- أهووو ، يعني راح أنتظر شهر مدري شهرين أنوب

- ههههههه ، متحمس تعرف شنو راح يجينه؟

- كلش

- إن شاء الله يطلع ولد

- لا إن شاء الله بنيه

- هَسه لا نتعارك هو بعدين يبين

- تمام

- شهم

- روحي

- هاي سالي شوكت تروح؟

- والله ما أعرف

- آني ما أگدر أشوفها ، أكرها

- مالچ علاقة بيها حَبيبي طنشيها

- أنت چنت تحبها كلش؟

- ما حبيتها بگد ما حبيتچ

- أنت تحچي هيچ علمود ما أزعل

- لا و العباس ، جاي أحچي الصدگ ، مُهره آنــه مستحيل أحب أحد مثل ما حبيتچ خليها ببالچ هاي

- الحمدلله هَسه طمنتني

- أبقي متطمنه دائمًا

فجأة سمعنه صراخ جوه ، فز شهم و گام حَتى يشوف شكو و آني گمت وياه ، نزلنه جوه لگينه سالي لازمه إيدها و الدم يجري منها ...

شهم : هااي شكوو شصااير؟؟!

فاطمة : يمه سالي أنجرحت إيدها بسرعة وديها للمستشفى جاي تنزف هواي

شهم صار يفرك بوجهه و يستغفر ، حچه ...

- يلا لبسي بسرعة بين ما أجيب شماغي و أجي

راحت تلبس ، و شهم رجع للغرفة شوي و نزل و هو يلبس بشماغه سواه چراوية ع السريع ...

- حتاخذها؟

- شسوي مُهره متشوفين حالتها

- يعني خايف عليها؟

- ما خايف عليها ، بَس خوما أخليها هيچ

- تمام

سالي
أضطريت أجرح إيدي بالگزاز جرح قوي ، لأن أعرف ماكو غير شهم هنا حَتى ياخذني هو للمستشفى و ترجع تخرب علاقته هو و مُهره ، لبست و كملت و طلعنه للمستشفى ، الساعة بالـ 12 و نص و الشوارع فارغة ، أباوع لـ شهم يسوق و هو ساكت ، حچيت ...

- شهم إيدي دتنزف هواي

- لا حول و لا قوة ألا بالله

فتح الچكمچه حتى يدور على كلينس بَس ماكو ، دور بكل السيارة و ما لگه ، آخر شي نزع شماغه و حطه بإيدي ...

- شدي إيدچ بي بين منوصل

- ما أگدر شهم دتوجعني

- صَبرك يا الله صَبرك

وگف السيارة و ألتفت عليه ، أخذ الشماغ مني و شدلي إيدي بي و رجع كمل طريقة

مُهره
بقيت رايحة راده بالغرفة ، ما أرتاحيت و لا أجاني نوم ، هاي الحقيرة سالي ما ناوية تعوفنه ، حاطه عينها على شهم ، مو بعيدة تكون هاي كلها خطة من يمها بَس حَتى تبقى وحدها ويه شهم ، صارت الساعة فوگ الـ 1 و همه ماكو ، نزلت جوه و صرت أفتر بالصالة و عقلي ديخترع أشكال السيناريوهات و السوالف ، شوي و أنفتح الباب و دخلو ، أنتبهت لـ سالي بأيدها شماغ شهم ، باوعتلي و راحت لـ غرفتها ، أجاني شهم ...

- هاي بعدچ مو نايمة

- إي

- ليش؟

- أنتظرك

- چا يلا خل نصعد ننام لأن آنـه حيل نعست

رحنه لـ غرفتنه و شهم بدل ملابسه و تمدد ع الچرباية ، ما ردت أحچي وياه لأن مبين كلش تعبان و نعسان فـ أجلتها و خليته ينام ، تمددت يمه و هو أندار عليه و صار يباوعلي ، حچيت ...

- شو صاير متغطي عيونك من تريد تنام

- أريد أبقى أعاين لوجهچ لحد ما أغفى

تقربت من يمه و حضنته و نمنه

***

عشق
واگفة بالمطبخ داساعد خالة بلم الريوگ ، و فرات واگف يمنه ديشرب چاي و يباوع عليه ، حچت خالة ...

- حَبيبتي عشق هذا الچاي بَس أخذيلهم ياه

ردت أحچي و سبقني فرات ...

- لا لا يوم آني آخذه جيبي

- بَس أنت بعدك ما كملت چايك

- هي مال چاي هَسه ، جيبي حُبي جيبي

أخذه و مشه حَتى يطلع ألتفت عليه و حچه ...

- اليوم تداومين مو؟

- إي

- عَجل يلا تحضري آني أنتظرچ

- تمام

راح هو و آني رحت لغرفتي حَتى أبدل

***

ريان
واگفة جاي أسگي بالورد ، طلع فؤاد يخابر ، وره شوي طلعو فرات و عشگ ، نهى مكالمته فؤاد ، حچه موجه كلامة لـ فرات ...

- هاي وين ماخذ عشق؟

- للجامعة يعني وين؟

- آني أوصلها

- لا أنت أرتاح آني أوصلها ، يلا عشگ

عشق
صعدت بالسيارة و صعد فرات و طبگ الباب حييل ، حچه ...

- صَبرك يا أيوب ، أنطيني الصبر منك يا ربي

- حَبيبي على كيفك و هدي أعصابك موزين عليك جرحك بعده ما طاب زين

- آخخخ ، يولي لو بأيدي چان ضميتچ بين ضلوعي و ما خليت أحد يشوفچ

گال هيچ و حرك السيارة و مشى

ريان
أنتبهت لـ فؤاد و نظراته على عشق ، معقولة عجبته !! ، ما حسيت بي ألا و واگف يمي ، حچه ...

- عشق تداوم جامعة مو؟

- إي

- شنو قسمها؟

- ما أعرف

- و ليش فرات هو يوصلها ، ليش مو خط؟

- ما لگو ألها خط

سكت و مبين ضاج ، حچيت ...

- إذا رايدها أخذها قبل لا تطير من إيدك

- هااا؟

- نظراتك ألها مبينه نظرات أعجاب ، إييي هاي بنت عمك مابيها شي

- شلون يعني تطير من إيدي؟!

- إذا رايدها أستعجل و أخذها ، آني گتلك

عفته واگف بمكانه و دخلت جوه ، يا رب ياخذها أبن عمها و أخلص منها

***

فرات
رجعت للبيت و دخلت للديوان ، گعدت و حچه فؤاد ويه عمي ...

- عمي أنتو تجارتكم بالسيارات مو؟

- إي بالسيارات

- زين معرض لو غير شي؟

- لا معرض

- لعد خوش ، آني رايدلي سيارة ، أفتريت بغداد كلها ما لگيت التعجبني ، بلكت يمكم ألگه

- تحب ناخذك للمعرض هَسه و تشوف بنفسك؟

- والله ياريت

- صار تدلل

گمنه و طلعنه للمعرض آني و عمي و رافد

***

مُهره
شهم واگف ع المراية يمشط بشعره ، وگفت يمه ، حچيت ...

- شماغك البارحة شيسوي يم سالي؟

- شدت بي إيدها

- يعني ماكو شي تشد بي إيدها غير شماغك !!

- إي ما لگيت شي بالسبارة

- همممم

- آني رايح اليوم ما أرجع ع الغدة و بالثنتين أجي ألگاچ جاهزة علمود نروح ع الدكتورة

باسني من خدي و گال ...

- ديري بالچ على نفسچ

لبس سترته و طلع ، نزلت جوه ، ساعدت عمه بالشغل ، صارت الساعة بالـ 10 و أندگ الباب ، طلعت عمه تفتحه شوي و أجت وياها يامور تبچي ...

- ولچ بنيتي بَس فهميني شبيچ؟؟

حچت و هي تبچي ...

- ضربني الحقير ، مد إيده عليه ولچ يوم

رفعت ملابسها و شوفتنه جسمها ، كُله آثار ضرب ، عمتي تخبلت من شافت جسمها ...

- ولچ هاااي شمسووي بيييچ؟؟

- قاسم متغير عليه يوم هوواي متغير

- لحظة خل أگول لأبوچ و أخوچ همه يربونه ، شنو ما وراچ أحد حَتى هيچ يسوي بيچ

- لا لا يوم لا تخابرين أحد

- ليش !!

- يوم هَسه إذا دره شهم يسويها مصيبة على راسه و آني ماريد السالفة تكبر ، بَس يجي أبوي أحاچي و أخلي هو ياخذ حگي من قاسم بدون ليدري شهم

- زين ليش ضربچ؟

- يريدني أبطل من شغلي و آني ما قبلت و ضربني

- الأدبسز

***

فرات
عمي و فؤاد گاعدين يتناقشون عن أنواع السيارات و آني ما مرتاحله أبد ، حچه عمي ...

- فرات أخذ فؤاد أشرحله عن السيارات اليمنه علمود يختارله وحدة

- و ياسر وين عَجل؟؟

- ياسر دزيته بشغلة

- تمام

طلعنه للكراج شرحتله عن السيارات و هذا خبلني كُل ما أجيبه على وحدة لا ما أحب هيچ ، ماريد هيچ ، ماريد هالنوع ، الى ما طگت روحي منه ...

- أگُلك تره هذا الموجود عدنه ، عجبك أخذ ، ما عجبك الأنبار متروسه معارض غيرنه

- و أنت ليش معصب؟

فركت وجهي و أستغفرت بصوت ناصي ...

- لا حَبيبي ما معصب تفضل أختار اليعجبك

- عاجبني آخذ مثل سيارتك

- والله ماعدنه مثل سيارتي

- ليش ماعدكم؟

- ما جبنه

- و ليش ما جبتو؟

- لا أنت ناوي تجلطني اليوم

- هاااا؟؟

شفت ياسر راجع ، ناديته و جه ...

- ياسر ساعد فؤاد يختارله سيارة مرتبة لأن مبين ذوقة صعب

- صار يدلل

عفتهم و رحت للمكتب ، حچه عمي ...

- هااا شو جيت؟

- عمي بالقرآن هذا فؤاد خبلني

- ليش يول؟

- ما يعجبه العجب و لا صيام رجب

- ههههههه ، ميخالف وليدي لازم تتحمل الزبائن لأن أكو اذواقهم صعبة

- آني أتحمل خلگ الله كُلهم ، بَس هذا أعذرني عمي ما أگدر

- هههههههه

- آني رايح لأبوية ، خوما تحتاجني بشي؟

- لا وليدي ، درب السلامة

***

مُهره
كملنه غده و گعدنه نسولف آني و يامور ، حچتلي شلون قاسم متغير عليها و معاملته ألها صايرة حييل موزينة ...

- زين ليش هيچ فجأة تغير عليچ؟

- والله ما أعرف راح أتخبل ، چان كلش زين وياي و يحبني و يهتم بيه ، شنو اللي غيره ما أدري

- يعني هاي أول مره يمد إيده عليچ

- إي والله

- ولچ خاف مسحور

- مسحور؟!

- إييي ، أنتِ مو تگولين خواته موزينات وياچ و دائمًا يعبن براسه عليچ بَس هو ميهتم لحچيهن

- إي حيايه ذني خواته والله

- چا ماكو غيرها ، مسحور الرجال

- و شلون أتأكد؟

- ما أعرف نسأل عمه فاطمة و نشوف شتگول

- بَس فدوة مُهره شهم لا يدري

تفاجأنه بدخلت شهم علينه ، سلم و حچه ...

- هااا شنو اللي ما تريدني أدري بي؟!

يامور : لا حَبيبي ماكو شي بَس چنت أگول لـ مُهره إذا أجاني ولد أسمي على أسمك

- ليش أنتِ حامل؟

- لا بَس قصدي بالمستقبل

- إي زين سمي اللي تريدينه ، هااا مُهره جاهزة نمشي؟

- إي حَبيبي جاهزة

- چا يلا

***

نَفس
بدلت ملابسي و طلعت أنتظر عشق حَتى نطلع للسوگ لأن الحفلة بقالها بَس 4 أيام و أحنه بعد كُلشي ممسوين ، أجاني رافد ...

- هااا راح تروحون؟

- إي

- فرات هو راح يوصلكم لأن آني عندي شغل

- تمام

- أي شي تحتاجينه أخذي ، خوش

- إن شاء الله

راح رافد و أجت عشق و طلعنه ، فرات وصلنه للسوگ و راح گال من تكملون خابروني ، أخذنه آني و عشق فساتين خليجية كلش حلوات ، ما عجبنه شي غيرهن ، أفترينه بالسوگ و أخذنه كلشي نحتاجة ، كملنه و خابرت خالة نجاة على فرات ، شوي و أجه ، صعدنه بالسيارة ، حچه ...

- خوما نسيتو شي؟

عشق : نسيت آخذ حذاء

بدور : شلون نسيتي يا ماما ، هَسه نرد نرجع

فرات : أنتِ أرتاحي عمه ، آني آخذها تشتري حذاء و نجي ، يلا عشگ

عشق
نزلنه آني و فرات نمشي ندور على محل مفتح لأن كُلها بدت تعزل ، فرات يمشي سريع مجاي أگدر ألحگ بي ...

- فررراات فدوة على كيفك بالمشي تره والله دتمشي سريع

- هااا آني أمشي سريع لو أنتِ دوبچ تمشين

- شسوي هذا مشيي

- يلا و هاي خففت

- إي عفيه ، أگُلك شصار على فؤاد؟

- راح

- وين راح؟

- ما أدري ، أشتره سيارة من عدنه و راح ، عاد ما أدري راح يسافر لو بعد عنده شي بالعراق

- المهم راح

- إي بالله

لگينه محل بعده مفتح ، أول ما دخلت عجبني حذاء أبيض كلش حلو أخذته و فرات حاسب و طلعنه ...

- محتاجة شي أنوب؟

- لا هاهيه حَبيبي

- خوش عجل

وصلنه البيت و نزلنه ، فرات راح گال صگر رايده بالقسم مادري شيريد

فرات
وصلت القسم و نزلت ، دخلت جوه لگيت حارث و ثنين من جماعته جاي يحچون ويه صگر علمود أبنه اللي أنسجن ...

- شوف منو هنا ، ما شاء الله ، شعدكم هنا يابة؟

حچه واحد من ولد حارث ...

- و أنت شعليك

- لاااا ، لازم أعرف

صگر : جاين يشوفون ولدهم ، مو مصدگين أنهم تحولو محكمة و أخذوهم منا

فرات : بَس آني اللي أعرفه أنتو سلمتوهم للعدالة كـ مجرمين ، يعني عسى ما يفطسون ، ما يحقلكم تدورون وراهم

حارث : أشوف طالعلك لسان يـَ وليد

- والله أنت بعدك ما تعرفني زين ، بَس إذا ما جزت من سوالفك الطايح حظها و فكيت ياخة عنه بهذيچ الساعة راح أخليك تتعرف عليه زين

ما عجبه الحچي ، أخذ جماعته و راحو ، حچه صگر ...

- شبيك حاد سنونك عليه يول

- والله لو أذبحه هَم قليلة بحقه ، هَسه عوفنه منه ، ليش ردتني؟

- ليش ردتك؟

- هو آني جاي أسألك شبيك أبو سيف !!

- والله ياخي نسيت

- عَجل ما دام نسيت گوم خل نرجع للبيت

- والله مگدر عندي شغل

- لارين تدورلك و تبچي

- بالله صحيح

- إي والله ، دگوم تلحگ ع الشغل

- عجل يالله

***

عشق
كملنه عشه و رحت لفرفتي ، تواعدنه آني و فرات ساعة بالـ 12 نشوف بعض ، بقيت أدرس لحد ما أجه الوقت ، لميت كتبي و نزلت جوه ، ما لگيت أحد الكُل نايم ، أجيت على باب الصالة لگيته بَس مردود ، فتحته و طلعت ، باوعت فرات واگف داير وجهه و لابس الفروه مالته ، رحت يمه ، حَس و ألتفتلي ...

- يا هلا بـ عشگي

- هلا بيك

- هاي شو طالعة هيچ؟

- شلون؟!

- چان لابستلچ شي شلون تطلعين هيچ

- مو بردانه

- ميخالف لازم تلبسين ، هاچ الفروه حطيها على كتوفچ

- حَبيبي والله مو بردانه

شال الفروه و حطها على كتوفي ...

- ول يا عيني خطوبتنه ما ضللها غير چم يوم ، مابيه حيل تتمرضين و أگوم أئجل

- هههههههه ، والله صحيح

بقى صافن بوجهي ، فجأة غنه بصوت هادئ و ناصي ...

- الله شمحلا غاليتي و چنها الملاك
نص الليل تواعدني و ما همها عناد

- طلعت و الگُمر غايب ظلمه و براد
لفيتها بحضيني و آني البردان

- الله كلش حلوه الأغنية

- هاي أغاني چوبي

- صدُگ والله

- إي والله ، حيييل أحبها هالأغنية ، منطبقة عليچ

- أحبك

- أعشگچ كثر عشگ دلـيـم لـلأنــبـار
و أعزچ كثر دگات گلبي و الأنفاس

بقيت أباوعله و آني مبتسمه ، حچيت ...

- منو تحب أكثر ، آني لو الأنبار؟

- الأنبار ديرتي و أنتِ حَبيبتي ، يعني آني أتيه بلياچن

- فرات

- هااا

- أنت من وين الله دزلي ياك؟ ، آني بدونك چنت ضايعة ، أوعدك راح أبقى أحبك لآخر يوم بعمري و ما راح أكون لأحد غيرك

- و آني گلبي راح يضل طول العمر بين أديچ ، ملكچ أنتِ و بَس ، و عيوني ما راح تشوف بنيه غيرچ ، يـَ عشگي و راحة بالي

***

مُهره
الصبح گعدت متأخرة شوي ، توضيت و صليت ، أجيت حَتى أطلع أنتبهت لـ تيلفون شهم ناسي ، أخذته وياي و نزلت أكيد هَسه يرجع عليه ، طلعت بره لگيت عمه و يامور گاعدت بالحديقة ، رحت گعدت يمهن ، شوي و أندگ الباب بقوة ...

قاسم : فتحووو البااب وللكممم

يامور : هذاا قاااسمم

فاطمة : خلي يدگ بالباب لحد ميمل و يروح

- لا ماما هذا ميمل ، راح أفتحه أشوف شيريد

مُهره : ولچ لا تفتحيله هذا مسودن ليروح يأذيچ

- لا آني أتفاهم وياه

راحت حَتى تفتح الباب و گمنه وياها ، فتحتله ياه و دخل يصيح ...

- آني موو گتلللچ رووحههه لأهللچ مااكوو؟؟؟

- يعنيي ترييد تمدد إييدكك علييه و ابقى گااعده يمكك

- أكسسرر رااسچ و متتحرركيين فاااهمه ولچ

- لااا مووو فاهممهه و لا تصييحح ، تره آنيي تحمللتكك هوواي

عِله الصياح بينهم و عمه تحاول تهدي بيهم بَس ماكو أشتد النقاش بينهم لحد ما قاسم ضرب يامور و وگعها بالگاع ، ويه ما أجه حَتى يضربها مره ثانية صاح شهم من ورا ...

- وللكك حيييوااان ...

********

القفلة قوية أعرف🙂
++ البارت اليوم شوي أقصر عن كُل مره بَس لأن هاي الأحداث المُقررة لهذا البارت ما ردت أضيفله أنوب ، يلا لا تنسونه من التفاعل الحلو التصويت و التعليق بين الفقرات

4

_nora

هذا حساب كاتبة جديدة ، روحولها و أقرو قصتها و أدعموها ، لا تقصرون وياها حبايب و خلونه ندعم الكاتبات الجديدات يستاهلن♥️

هاي روايتها ، يلا فجروها أعرفكم متقصرون🔥🔥

صدُگ تعالو نسيت أگُلكم ، تحبون أنزللكم مشاهد و أحداث من البارتات الجاية؟ ، نفس ذيچ المره يعني

سحر الدليمي