رواية عشگ الفرات ( عِندما تَهوى القُلوب ) الفصل الرابع والثلاثون 34 - بقلم سحر الدليمي

- لا تَلُمني في غيرتي يا عَزيزي
فـ أنا إمرأة أكرهُ أن يَقترب أحد من مُمتلكاتي الخاصة .

***

شفت الباب مردود و مبين شهم واگف جوه و أنتبهت سالي وياه ، چانو يحچون ، أنصدمت لمن سمعت سالي تگله ...

- وين حُبك و وعودك و كلامك أليه شهم؟؟ ، والله آني كلش أحبك

أحس أنصعقت من اللي گالته ، أريد أستوعب مجاي أگدر ، شهم يخوني؟؟ لا مستحييل ، چا و هذا الحچي شِنو؟! ، عفتهم و رحت لغرفتي ، طبگت الباب و گعدت أبچي ، ليش يسوي وياي هيچ ، شنو يعني يريد ينتفم مني ، يعني ميحبني !!

سالي
واگفة بالمطبخ جاي أشرب مي ، دخل شهم و صاح ...

- مُهره

- آني سالي

- آسف عبالي مُهره

دار وجهه حَتى يطلع ، صحت ...

- شهمم أوگف

- هااا؟؟

لمن شفته رجعتلي إيام قبل ، أباوع بوجهه و تذكرت كُلشي ، حچه ...

- شمالچ؟؟

- وين حُبك و وعودك و كلامك أليه شهم؟؟ ، والله آني كلش أحبك

- حُب شنو ، تسودنتي أنتِ؟؟

- يعني بهالسرعة نسيت حُبنا و أيامنا سوه

- إيي نسيت ، نسيتچ من زمان فهمتي ، آنـه هَسه رجال متزوج و أحب مرتي فوگ ما تتصورين ، و الماضي ما اله وجود بحياتي

- بَس آني أحبك شهم

- هااا هَسه صرتي تحبيني؟؟ ، چا مو أنتِ اللي گلتي أحنه منرهم لبعض و أجوني خطابة و آني وافقت ، وينه خطيبچ عنچ؟؟

- فسخت الخطوبة شهم ، لأن ما گدرت أكون وي رجال غيرك ، ما تقبلت أكون لأحد غيرك ، أنت غير شهم متشبه أحد ، طول هاي السنين ملگيت أحد يشبهك

- و آنـه ماريدچ ، و نسيتچ و طلعتچ من گلبي ، خليها ببالچ ، آنـه أحب مُهره أكثر من أي شي بهالدنيا و مُستحيل أبدلها بـ بنيه ثانية ، لذلك أبعدي عني و ألا أسوي شي ميعجبچ أبد ، فاهمة؟

عافني و طلع ، شعل بگلبي النار بكلامة هذا ، شلون ينساني ، شلوون يحب غيري ، مو چان واعدني يبقى يحبني طول العمر ، لييش راح لييششش

***

مُهره
گاعدة أبچي و أنفتح الباب و دخل شهم ، شافني أبچي و أجه يمي ...

- مُهررره ، شكوو ليش هالبچي حَبيبي؟؟

- وخرر عنييي ، لا تتقرب يمي

گمت و أبتعدت عنه ، باوعلي و هو مستغرب ، حچه ...

- هاي شمالچ؟؟

- تخونيي موو شههمم؟ ، تخوونيي و آني حاامل بأبنك

- خيانتيش ، شمالچ بوية !!

- أنت راايد تنتقمم منيي ، أنت متحبننيي صدگ أعررف

- ووللچ لاا تسوودنينيي ، أنقاام أيش؟؟؟

- أعررف أننكك تحب ساالي و موااعدهاا هم ، عرففتت شههمم عررفت

- ولچ بوية مو هيچ السالفة و علي ، أنتِ فاهمة غلط

- لاااا ، آنييي هَسه فهمت الصَحييح ، هَسسهه فهممتت كللشيي

- بَس أسمعيني و خليني أفهمچ السالفة

حطيت إيديه على أذاني و حچيت ...

- مااارييد أسمع منكك كلششيي ماااريد

- مُهره

- ودينييي لأهلليي شهم

- ولچ بوية أعقلي و خلينه نحچي بهدوء

- تماام ، حخابر سجاد هو ياخذني

- عووفيي الصخاام و ماااكوو رووحه لأيي مكااان

- هااك ، أخذ الفون و كسرره نفس ذيچ المره ، أصلاً أنت هااي سوالفك ، تكسر الفون و تكسرني ، هاي ثاني مَره شهم ، ثاني مَره

- تمام تمام ، سوي اللي يريحچ

گال هيچ و طلع من الغرفة ، و آني رحت طلعت جنطة و گمت ألم بملابسي و آني دموعي عشرة عشرة ، أتصلت بسجاد شوي و أجه و طلعنه لبيتنه ، و شهم ما شفت وجهه أبد

***

شهم
طلعت من الغرفة و آني دمي فااير ، أكيد هاي سالي هي اللي گايله لـ مُهره و معبيه براسها ، رحت دورت عليها بكل البيت ما لگيتها ، طلعت بره و شفتها گاعدة بالحديقة ، رحتلها و آني ما أشوف گدامي بودي هَسه أذبحها ، وصلت يمها و سحبتها من إيدهاا ...

- أنتِ شگااايلهه لـ مُهرره وللچ؟؟؟

- هاي شبيك شهم هد إيدي !

- ولچچ أحچييي شحاااچيهه وي مُهره؟؟

- والله محاچيه شي شبييك!!

- مُهرره دررت أنيي چننتت أحببچ و هي حسبالها انُ جااي أخونهااا

- إيي و آني شليي علاقة!!

- محد غيرچ اله مصلحة لو مُهره عرفت اللي چان بيناتناا

- بَس أنت گلت أنتهى كلشي

- عاينيلي ولچ ، و علي الفحل لو دريت أنُ أنتِ اللي حاچيه لـ مُهره عن هالموضوع ، غيير أدففننچ بإييديي

دفعتها و وگعت بالگاع ، رحت للغرفة و شفت ملابس مُهره ماكو و الجنطة ما موجودة ، دورتلها بالبيت و ما لگيتها ، يعني رايحة

***

مُهره
سجاد تسودن من شافني أبچي ، طول الطريق يسأل بيه و يحاول يعرف شنو السالفة ، و آني خلصتها بچي ما حچيت و لا كلمة ، وصلنه البيت و دخلت شفت بابا بالصالة ، رحتله و أرتميت بحضنه و زدت بالبچي ...

حسين : هااي شبييچ بابا ليش هالبچيي؟؟

ما رديت عليه ، شنو أگله؟ ، أبن أخوك اللي تزامط بي يخوني !!

- ولچ بوية أحچي شسالفة لا تسودنيني!!!

سجاد شبيها أخيتك؟؟

- مدري يابة بَس تبچي ما گدرت افهم منها لا حگ و لا باطل

- شو بوية مُهره عاينيلي تشوف

رفعت راسي أباوعله ، حچه و هو يمسح دموعي ...

- منو منزل دموع بنيتي ، منو مبچي هالعيون الحلوات ، أحچيلي بابا شهم وياچ؟؟ ، إذا هو أحچيلي علمود أعرف شتصرف وياه

- ما أگدر أحچي بابا ، بَس ماريده ، ماريد أرجعله ، أريد ابقى هنا يمك

زفر هوه و كأنو ما عاجبة ، حچه ...

- زين بابا هَسه أنتِ روحي أرتاحي و بعدين نفهم السالفة

رحت لغرفتي ويه ماما و سمعت بابا يگول لـ سجاد ...

- هَسه أريد شهم يجيني ، بسرررعه

***

عشق
گاعدة وحدي و ضايجة ، طخت براسي أنظف المطبخ ، رحت و طلعت الغراض و نظفت أماكنهن و عزلتهن ، و نظفت الأرضية ، أنوب باوعت للثلاجة هَم اجه ببالي أنظفها ، طلعت اللي بيها و نظفتها ، كملت شغلي و غسلت و طلعت صار بوجهي فرات طالع من غرفته ...

- هاي شدتسوي هنا؟

- مليت من الغرفة گلت أطلع للحديقة شوي

- أساعدك؟

- لا أگدر أمشي وحدي

- تمام

وگف يباوعلي من فوگ الى جوه ، حچه ...

- ليش ملابسچ هيج؟؟

- شبيهن؟!

- غير مطرفسات مي ، شنو سابحة بيهن أنتِ؟

باوعت لملابسي كُلهن مي ...

- هههههه ، لا بَس چنت أنظف بالمطبخ و تنگعت

- يا بعد شيبي يـَ هالضحكة

- و أنت من وين لك الشيب ، ههههههه

- مادري بَس هي حچاية و تنگال ، يلا يابة روحي بدلي لا تتمرضين الدنيا بعد بيها برد

- صار

راح يمشي و بعدين ألتفت و گال ...

- عود ألحگيني للحديقة

أبتسمت و هزيتله براسي ، راح هو و آني رحت لغرفتي بدلت دشداشتي و لبست فستان وردي رشيت عطر و لفيت الشال و طلعت ، لگيته گاعد ع الكُرسي ، رحتله ...

- تحب أسويلك شي؟

- أريد چاي حياتي

- لا الچاي موزين عليك هَسه

- أهووو ، ديلا يابة جيبيلي على ذوقچ

- تمام

رحت للمطبخ ، سويتله عصير مشمش هو كلش يحبه خالة گالتلي ، كملت و أخذته و طلعت ، نطيته ياه ، حچه ...

- عَجل وين ربعنه؟

- كُلهم ما موجودين

- وين راحو؟!

- نَفس نايمة ، و صگر و رُسل راحو للعيادة رُسل عدها مراجعة ، و ماما بالسوگ ، و رافد طلع لـلرمادي ، و خوالي بالشغل

- أبوية شلونه؟ ، سمعت أنه يشكي من صدره

- إي مرات يقبط عليه ، بَس هالفترة يگول أشوه

سكت دقايق ، بعدين رجع حچه ...

- عشگي

- عيونها

- شوكت تحبين نقطع مهر؟

- بَس تتحسن أنت

- آني مابيه شي الحمدلله

- ميخالف تتحسن أكثر حَبيبي

- عَجل الشهر الجاي

- الله كريم عُمري

- أريدچ يمي بأسرع وكت

- هو آني يمك حَبيبي

- أريدچ بغرفتي

أستحيت من گال هيچ و نزلت راسي ، حچه ...

- أحب خجلچ ، و أحبچ كُلچ

- و آني أعشقك

***

شهم
گاعد بالهول و أجتني أمي ...

- شهم شفت مُهره؟ ، دورتها ما لگيتها

- راحت

- وين راحت؟

- عافتني و راحت لأهلها يمه

- ليش أبني ، صاير بيناتكم شي؟؟

- من وره بنت أختچ غير

- شهم أحچي بوضوح وليدي و بدون هالألغاز

- مُهره عرفت أني چنت أحب سالي ، هي فاهمة السالفةغلط و عبالها جاي أخونها

- و منو گاللها؟!

- أكو غير سالي ، أگص إيدي إذا مو هي

- أبني مُهره حامل و حملها صعب ، يعني ما لازم تتعب و تنقهر

- والله أدري ، بَس شسوي هي ما أنطتني مجال أفهمها السالفة ، يلا آنـه رايح

- وين؟

- رايحلها بلكي أگدر أحچي وياها

گمت و طلعت من البيت متوجه لبيت عمي ، دگ عليه سجاد ...

- هااا شهم شلونك

- هلا سجاد

- أبوي يريدك علمود مُهره

- هو آني جايكم ، قريب عليكم

- هاا ديلا

نهيت المكالمة و كملت طريقي ، شوي و وصلت ، دخلت و لگيت عمي گاعد بالديوان ، سلمت عليه ، حچه ...

- شصاير بيناتكم أنت و مُهره؟

- عمي والله ما صاير شي ، موضوع بيناتنا هي فهمته غلط و زعلت ، ما خلتني حتى أفهمها الموضوع

- و تالي  شلون ، ولك أجتني عيونها مورمات من البچي

- عمي خليها تجي آني أحچي وياها و أراضيها و ميكون خاطرها أله طيب

گام سجاد حتى يصيحها ، شوي و أجه ...

- ولك هاي قافلة من البيجي ، متقبل تجي

تنهدت بقهر ، حچيت ...

- تمام ، هَسه خليها ترتاح يمكم و بعدين آني أجي و أشوفها

- خير إن شاء الله

- بَس عمي ديرو بالكم عليها تره بسرعة تتعب ، و مرات تنسى ما تاخذ أدويتها أله آني أذكرها و هي لازم تاخذهن بوقتهن

أبتسم عمي ، ردلي ...

- وليدي تراها ببيت أبوها ، يعني مو عد ناس غربه حتى توصي

- شسوي عمي ، گلبي راح يبقى يمها

- روح وليدي و خليك متطمن

***

رافد
رجعت العصر ، رحت أدور لأبوية حَتى أگُله و أحسم الموضوع ، دورته بالبيت ما لگيته ، سألت عنه و گالو بالمعرض ، ركبت سيارتي و توجهت للمعرض ، شوي و وصلت ، دخلت للمكتب ، و لگيته هو و عمي جاي يرتبون الأوراق اللي ضاله مو محترگة ...

- السلام عليكم

ردولي السلام ، رحت گعدت ...

- يابة عندي موضوع وياك

- إي أحچي

- أريد أتزوج

حچه عمي ...

- يعني و أخيرًا قررت تعگل

- إي والله عمي ، عگلت و حاب بنيه و أريد أتزوجها

جسام : منيه؟

- نَفس

صارو يدحگون واحد بوجه الثاني ، ألتفت أبوية و حچه ...

- نَفس !!

- إي يابة

- والله يوليدي نَفس خوش بنيه ، صارلها أشهر يمنه ما شفنه منها شي ، بَس شلون و أحنه ما نعرف أحد من گرايبها؟

- يابة هي أهلها متوفين ، و هي مو زغيره يعني هي المسؤولة عن نفسها ، نسألها و إذا وافقت نقطع مهر و هايهيه

أندار أبوية على عمي و حچه ...

- و أنت شتگول يـَ عَلي؟

- والله ما دام الوليد رايدها مابيها شي و إذا وافقت توكلو على الله

- زين ، عود نخلي أم صگر تسألها و نشوف رايها ، و منا لذاك الوكت يصير خير

***

نَفس
من آخر مره حچينه آني و رافد هو ما حچه وياي مره ثانية و لا آني ، و مبين ساكت ع الموضوع ، و حتى ما حچه لأبو ، شوي شوي جاي يخليني أتأكد أنُ هو ميحبني مجرد ديلعب عليه حالي حال باقي البنات ، بَس و كلامه آخر مره ، هو حلفلي أنُ يحبني و رايدني ، أحس عقلي تشوش مجاي أعرف شنو يريد و لا جاي أعرف الحقيقة شنو ، أجتني عشق گعدت يمي ...

- نَفس ، شبيچ حَبيبتي؟

- ما مرتاحة لـ رافد عشق

- ليش؟

- أحسه ديلعب عليه

- و شلون أجاچ هالأحساس؟!

- من زمان گتله خلينه نخطب و علاقتنه تكون رسمية گدام الكُل لأن آني ما أگدر ابقى وياك هيچ ، و هو حَط ألف عذر حَتى منخطب

- بَس فرات گالي أنُ يضل يحچيله عنچ ، حَتى گال أول مره رافد يحچيلي عن بنيه و عيونه تلمع لمن يحچي عنچ ، فرات يعرفه كلش زين و لو يدري بي ديلعب عليچ چان هو وگف بوجهه لأن سبق و حذره من هالشي

- ما أعرف عشق ، عقلي مديگدر يستوعب اللي ديصير

- أنتِ تحبي؟

- كلش أحبه ، بَس شراح يفيدني الحب إذا طلع ميحبني من صدُگ و طلعت عليه سالفة موزينة عند الناس اللي فتحولي بيتهم و أستقبلوني بي ، و آني غريبة عشق و مالي أحد

- لا تحچين هيچ نَفس ، أحنه هنا أهلچ و أنتِ مو غريبة

- شنو أسوي هَسه عشق؟ ، آني ضايعة

- أنتظري و شوفي ، إذا يحبچ حيسوي اللي تريدي

***

مُهره
گاعدة بغرفتي ، أحس ما بودي أطلع منها ، ليش عفتها و رحتله و تالي يخوني ، ليش هيچ سوه وياي ، والله آني أحبه و مگدر على فراگه ، أجه أشعار لـ تيلفوني ، فتحته و طلع من شهم ، چان كاتب ...

🗨️ الغرفة مو حلوة بدونچ

🗨️ أنطيني فرصة أفهمچ السالفة

🗨️ تعاي خل نحچي

شفت رسائلة بَس ما رديت ، قفلت الفون و ذبيته ، وره قريب العشر دقايق أجه اشعار منه ، چان كاتب ...

🗨️ خلص ما دام ما تردين ما أضغط عليچ ، شوكت متحبين نحچي ، نحچي

🗨️ بَس لا تنسين علاجچ ، باقيله ساعة

🗨️ مُهره أريدچ تتأكدين من شي واحد ، آني أحبچ و مستحيل أبدلچ بـ بنيه ثانية ، و مو شهم اللي يخون

كتب هيچ و بعدين طلع من الواتساب ، ردت أكتبله بَس تراجعت و عفت الفون

لليل و نزلت أتعشه ، مالي نفس بَس علمود الطفل اللي ببطني و لأن ورايه علاج ، تعشيت و رجعت لغرفتي ، أخذت علاج و تمددت حَتى أنام ، آني ما متعودة أنام من وقت ، بَس اليوم مالي واهس لشي ، يوميه نسهر آني و شهم سوه أفلام و مسلسلات و سوالف ، كلش نتونس ، و من نريد ننام يحضني و ننام ، تعودت على حضنه و هَسه وحدي ، شلون راح أگدر بدونه ، بقيت أفكر لحد ما نمت

( هذا حال مُهره ، خلونه نروح نشوف حال شهم🥺💔 )

شهم
دخلت للغرفة گعدت و آني أعاين لمكان مُهره ، هنا تنام و هنا تگعد ، حسيت روحي أختنگت و طلعت منها ، رحت للهول تمددت ع القنفة و قررت أنام هنا ، مگدر أنام بالغرفة و مُهره ماكو بيها ، طلعت تيلفوني و دخلت للواتساب شفتها قارية الرسائل بَس ما دازه شي ، دزيتلها رسالة و نمت

مُهره
گعدت الصبح و أحس ألم ببطني و ظهري ، ما أهتميت و رحت توضيت و صليت ، أخذت الفون و شفت رسالة من شهم ، فتحتها ...

🗨️ أرجعيلي ولچ ، گلبي طگ عليچ

كتبتله ...

🗨️ چان فكرت بهالشي قبل متخوني

شوي و شافها و كتب ...

🗨️ ولچ سطرني العباس إذا آنـه صدگ خاينچ

🗨️ گتلچ فاهمة الموضوع غلط

🗨️ طلگني شهم

🗨️ زين و يهون عليچ تحرمين هذا الطفل اللي ببطنچ من أبوه ، تحرميني من أبني مُهره؟!

قريت الرسالة و ما رديت أحس بعد ما أگدر الوجع زاد عليه ، ذبيت الفون و ما شفت آخر رسالة دزها ، نزلت جوه و گعدت أتلوه من الوجع ، أجت ماما و شافتني هيچ و صاحت سجاد و أخذوني للمستشفى ، وصلنه و حطوني بغرفة ، أجت الدكتورة و فحصت وضعي ، حچت ...

- شگد صارلچ تحسين بهالألم؟

- اليوم بَس حسيت بي

- دتاخذين من علاجچ بصورة صَحيحة؟

- إي والله ، فدوة دكتورة الطفل خوما عليه خطر؟

- أحتمال نضطر ننزله

- لااا دكتورة ، شنو ننزله ، آني ما أنزل أبني ، مستحيل

- هَسه راح تبقين تحت المراقبة ، إذا بقى وضعچ هيچ ضروري تنزلين الطفل و ألا تموتين بنتي

طلعت و آني بقيت أبچي ، مستحيل أرضى ينزلون الطفل حَتى لو متت ، شوي و دخلت أمي ، صارت تحچي وياي و تحاول تهديني ، بَس آني أبچي ...

- ماما أريد شهم ، فدوة خلو يجي

- تمام ، هو بره هَسه أصيحه

طلعت ماما ، شوي و أجه شهم ، گعد يمي و لزم إيدي ...

- لتبچين حَبيبي موزين البچي عليچ

- شهم ديگولون لازم ننزل الطفل ، آني ما أنزل أبني ما أگدر

- إذا خطر عليچ ننزل الطفل ، أهم شي أنتِ

- ما أگدر شهم ما أگدر

- أشش خلص أهدي و لتبچبن ، خليها يم الله

سكتت و هو هَم سكت ، وره شوي رجع گال ...

- الصبح قريتي الرسالة؟

- يا رسالة؟

- شرحتلچ بيها السالفة كُلها ، مُهره آني ما خنتچ ، صَح قبل لا أحبچ چنه على علاقة آني و سالي و چنت أحبها ، بَس هذا الحچي قبل سنين و هي عافتني و راحت أنخطبت ، و آني نسيتها و حبيتچ أنتِ ، و علي الفحل آنـه أحبچ

- يعني أنت متحبها و لا عندك علاقة بيها؟

- وداعتچ لا ، أنتِ منو گالچ هالحچي؟

- محد ، سمعتكم تحچون أنت وياها بالمطبخ

- إي أنتِ سمعتي طارف السالفة و ما أفتهمتي الباقي ، بوية والله أحبچ و ماعندي شي وياها

- آسفه حَبيبي فهمتك غلط

جر نفس بأرتياح ، أبتسم و حچه ...

- المهم هَسه فهمتيني

- شهم خايفة على أبننا

- لا تخافين گلبي ، خليها على الله

- و النعم بالله

لليل بقينه بالمستشفى و شهم ما فارگني و لا لحظة و يصبر بيه ، الدكتورة تروح و ترجع عليه ، آخر شي أجت الدكتورة ، أبتسمت و حچت ...

- الحمدلله تحسن وضعچ تگدرون تطلعون

- يعني ماكو داعي ننزل الطفل؟

- لا ، بَس لسه حملچ خطر و منعرف شنو يصير بالفترة الجاية ، بَس أنتبهي لنفسچ و أكلچ زين و ألتزمي بعلاجچ

- إن شاء الله

راحت الدكتورة ، و أحنه رجعنه للبيت

***

نَفس
نادتني عمه نجاة گالت أكو موضوع تريد تحاچيني بي ، رحتلها للغرفة ، لگيت عشق يمها ...

- هاا عمه ناديتيني؟

- إي حَبيبتي أگعدي

گعدت و حچت ...

- بنتي ، رافد بلغنه أنه رايدچ على سنة الله و رسوله ، شگلتي؟

- هاااا

- أبتسمت ...

- جاي أگُلچ رافد رايدچ ، إذا موافقة گولي حَتى نتوكل على الله

باوعت لـ عشق أبتسمتلي و هزت براسها ...

- موافقة عمه

- ألف مبارك حَبيبتي

- يبارك بيچ

أجتني عشق حضنتني و همست بأذني ...

- مو گتلچ يحبچ و حيسوي أللي تريدي

أبتسمتلها ، و گمت رحت للمطبخ ، وگفت و أحس گلبي طاير من الفرح ، يعني طلع صدُگ يحبني ، صرت أحاچي نفسي مثل الخبله ...

- يعني صدُگ يحبني

أجاني صوته من گال ...

- يابة والله أحبچ

ألتفتت ، لگيته واگف وراي و يبتسم ، حجه ...

- حاچتچ عمتي مو؟

- إي

- و وافقتي؟

- أكيد

- الحمدلله

- بَس بعدني ما مرتاحتلك أله نخطب صحيح

- يااابة و القرآن راح أتخبل من وراچ و أگوم أمشي و أشگگ بهدومي

- هههههههه ، ليش

- يـَ بنت الناس گلت لأهلي عليچ و سألوچ إذا موافقة عليه لو لا ، يعني شتريدين بعد حتى تصدگين أني أحبچ !!

- أتشاقة شبيك متتحمل شقه

- آني أتحمل كلشي منچ

- رافد

- روح رافد

- أحبك

- آخخخ يابة

- هههههههه

- إن شاء الله بَس يطيب فرات نقطع مهر سوه و الحفلة هَم سوه ، بَس زواجنا مثل ما گتلج

- تمام قابلة

***

عشق
مَر شهر تقريبًا و اليوم فرات و خالة راح يروحون للنجف يزورون الأمام علي ، فرات وعد خالة بَس يتحسن ياخذها ، طلعت بره و صار بوجهي فرات ، لابس دشداشة سوده و شماغ أحمر مسوي چراوية و لابس نظارة سوده من شافني نزعها و أجه يمي ...

- شلونچ

- ضايجة

- ليش؟

- حتروح للنجف و آني أشتاقلك

- ما نطول عمري اليوم نرجع إن شاء الله ، محتاج هالزيارة حييل ، أريد ارتاح هناك

- شبيك حَتى ترتاح؟

- اللي مريت بي بالفترة الأخيرة تعب نفسيتي حيل ، أريد أروح هناك يم الأمام و أرتاح

- تمام

سكتنه شوي بعدين حچيت ...

- ليش لابس أسود؟

أبتسم و ردلي ...

- أحبه

- بَس طالع كلش حلو بالأسود

- هاي لأن عيونچ حلوه تشوفيني حلو ، وله آني منيلي الحلا

- أصلاً أنتو الزلم كُلكم هيچ تگولون على نفسكم بَس بالحقيقة أنتو حلوين

تغيرت نظرته ألي و صار يخزرني ، حچه ...

- هاااا لازم تدحگين ع الحلوين مو يولي؟؟

- لااا والله شبيك ، عندي أنت و أدحگ على غيرك شنو خبله

- يبوووو يا الله

- شبيك؟!

- عفت كُلشي و ركزت ع الـ أدحگ ، طالعة من لسانچ مثل العسل

- ههههههههه

- و شحلات الحچي الأنباري بـ لسان بغدادية

- تدري آني أذوب لمن تگُلي عَجل و دحگي

- أحمم أحممم

گال هيچ و أشر وراي ، باوعت لگيت خالة دتمشي بأتجاهنه ، وصلت و حچت و هي تباوع لـ فرات ...

- يلا ماما نمشي؟

- يلا

مشت خالة و هو باوعلي و عض على شفته السُفلية و لبس نظارته و مشه ، ضحكت على حركته هاي و دخلت جوه لگيت أمي دتحچي بالتيلفون بَس ما فهمت منها شي ، كملت و حچيت ...

- منو هذا ماما؟

- أبن عمچ ، فؤاد

- شيريد؟

- جاي لـ بغداد عنده شغل و يريد يجي هنا حَتى يشوفنه آني وياچ و يرجع

- يريد يجي لـ هنا؟؟

- إي

- يعني هَسه تذكر يجي يشوفنه؟ ، سنين أحنه عايشين وحدنه ببغداد هَسه يلا تذكر

- والله يـَ أمي ما أدري عنه

بقيت أفكر و تذكرت حچي فرات بخصوص النهوه و هالسوالف ، لا ما معقولة فؤاد يسوي هيچ هو طول عُمره عايش خارج العراق يعني مستحيل يعترف بهالسوالف

***

فرات
وصلنه بعد طريق مدته 3 ساعات ، دخلنه و زرنه و صلينه ، گعدت بالحضره ، شگد أرتاح بهالمكان لو شنو يكون صاير وياي من أجي هنا أنسى كُلشي ، تعودت على زيارته من چنت صغير

كملت و طلعت ، شفت المكان اللي چانت واگفه بي عشگ من جينه هنا ، تذكرتها و تذكرت سوالفها ، جتني أمي ...

- فرات حَبيبي أريدك تاخذني للمقبرة

- شلچ بالمقبرة يوم؟

- أريد أزور قبور جدك و بيبيتك و أريدك أنت هَم تزورهم ، آخر مره زرناهم جان عُمرك سنتين

- تمام ، بَس آني ما أندلهم

- آني أندلهم

- خوش عَجل يلا

طلعنه من الضريح و توجهنه للمقبرة ، وصلنه و دخلنه گاع مسيجة و بيها چم گبر ، گالت أمي هاي الگاع ندفن بيها موتانا بَس ، وگفنه و قرينه الفاتحة ، حچت أمي ...

- لمن أنودلت أتذكر جدك چان يمنه ، بوكتها گالي أنطيني هالولد آني أربي ع الأقل بي ريحة منچ و كُل ما أشوفه أتذكرچ

- و ليش ما أنطيتيني أله؟

- ولك شلون تريدني أبعدك عني ، شبيك ماما !!

- هااا هَم صَحيح

أبتسمت و گامت ، طلعنه من المقبرة صعدنه بالسيارة و توجهنه للديرة

***

عشق
العصر و وصل فؤاد ، طلعت أمي حَتى تستقبله و خلتني أطلع وياها آني ما ردت أطلع بَس گالت عيب هو جاي حَتى يشوفنه و يتطمن علينه ، طلعنه عليه سلم علينه و بهالأثناء وصلو فرات و خالة ، دخل فرات مستغرب لمن شافنه واگفين ويه رجال هو ميعرفه ، دخل و باوع عليه بخزره ، حچه ...

- تفضل ، منو حضرتك؟

- فؤاد ، أبن أخو المرحوم أبو عشق

مد إيده فؤاد حَتى يسلم عليه ، بَس شو فرات بقى صافن بوجهه و هو عاگد حواجبه ...

********

يتبع ...

القفلة ما تجلط تره🙂

نزلت مُقتطف من الرواية الجديدة ، روحو شوفو و أنطوني رايكم

تعالو أنستا

سحر الدليمي