رواية عشگ الفرات ( عِندما تَهوى القُلوب ) الفصل السادس والثلاثون 36 - بقلم سحر الدليمي

- جميل عِندما تُفتح دفاتر العشق القديمة ليُعاد سرد حِكاياتها من جديد .

***

عِله الصياح بينهم و عمه تحاول تهدي بيهم بَس ماكو أشتد النقاش بينهم لحد ما قاسم ضرب يامور و وگعها بالگاع ، ويه ما أجه حَتى يضربها مره ثانية صاح شهم من ورا ...

- وللكك حيييوااان

ضربه بوكس وگعه بالگاع و رجع يكمل عليه ، صار يضرب بي و يصيح ...

- وللكك أنععللل يوومكك ، تضرربهااا و هيي ببييت أهللهااا مااا حسبتللنااا حسااب ، شنيي هيي تاييهتلكك أبن الگو**

يضرب و يغلط عليه نهنه تنهنه ، لحد ما عمه صاحت بي ...

- ولك يمه تعال شوف أخيتك مدري شجرالها

أنتبهت لـ مُهره طايحة بالگاع ، فز شهم و أجاها يركض ، حَط إيده جوه راسها و أنصدم بالدم ، معناها راسها مجروح ، شالها و راح حطها بالسيارة و عمه راحت تلبس بعباتها حتى تروح وياه ، صاح عليه ...

- مُهره فوتي جوه و قفلي البوب لا تفتحينهن لـ كائن من يكون

دخلت جوه و سويت مثل ما گلي شهم ، قفلت البوب كلهن و هذا قاسم دايخ و واگع بالگاع ، گعدت أبچي على حال يامور ، أجتني سالي توها گاعده من النوم ...

- هاي شكو شصاير ، شنو هالصياح؟

ما جاوبتها عفتها و رحت لغرفتي و هي ضلت تفر بإيدها ، گعدت و أحس وجع ببطني ، يربي بَس ليصير بيه نفس هذاك اليوم والله مناقصنه

***

عشق
واگفة بالمطبخ توني خلصت ريوگ و داغسل ، سمعت رنت تيلفون ، باوعت لگيت تيلفون فرات الظاهر ناسي هنا من أجه يتريگ ، أخذته و رحت حَتى أنطي اله ، صعدت فوگ لغرفته ، دگيت الباب ...

فرات : فوووت

فتحت الباب و دخلت لگيته نازع التيشيرت مالته و گاعد ع الچرباية ديداوي بجرحه ، أنتبهلي و رفع راسه عليه ...

- هاا عُمري رايده شي؟

- ءءءءأ

- هو شنو الـ ءءءء ؟!

ما أعرف شصارلي ، أستحيت من دخلت عليه و هو هيچ ، أحس الحرارة صعدت لراسي و بعد ما أگدر أحچي شي و هو صافن عليه ما نزل عيونه عني ...

- ءءءء هذا الشسمه

- إييي؟!

- تيلفونك ، تيلفونك نسيته بالـ هذا المطبخ

أبتسم و گام على حيله و أجه يمي ، مد إيده و نطيته التيلفون و هو يباوع عليه ...

- شلونچ

- زينة

- اليوم أحد ، و آني جاي أنتظر يوم الثلاثاء على جمر ، أريدچ تصيرين على أسمي بأسرع وقت

سكتت ما حچيت شي و آني مدنگه راسي ما أباوعله بَس أعرف هو ديباوعلي ، الباب مردود ع النص ما حسينه بي أله أندفع بقوة و أنفتح ، وگفت ريان تباوعلنه و هي مخنزره ...

- أنتو ما تستحون على نفسكم ، بالغرفة و وحدكم ، و أنتِ ما تستحين واگفة وياه و هو هيچ؟؟

صاح فرات ...

- و أنتِ شععليييچ ، شغاااثچ هااا؟؟

- إيي صحييحح شععلييه بييكمم ، و أنتو تركضون ع الحرراام ، آني شدخخلننيي ، بَسس والله عييب علييكمم

- ول ياابة شبيييچ ياا حررااام يااا صخااام شوو تمسلتييين أنتِ

ع الصياح و الصوت العالي أجت خالة ، وگفت مستغربة و هي تشوف فرات و ريان يتصايحون ، سكتتهم و حچت ...

- شبييكمم ولككمم سصااير؟؟

- عمه جاي تشوفين ، ترضينها وگفتهم هاي وحدهم و بالغرفة و همه بعد ماكو شي رسمي بيناتهم ، مو عيب؟!

- خالة والله آني بَس أجيت أنطي التيلفون مالته و أطلع ، والله ما قصدي أوگف و أحچي وياه

نجاة : رياان روحي و بعدين عندي حچي وياچ

راحت ريان و هي ما عاجبها و تباوعلنه بتك عين ، أندارت عليه خالة ...

- ماما آني أدري شنو أنتِ و شنو تصرفاتچ ، بَس ريان و صرتي تعرفينها ، لذلك حاولي تتجنبينها و لا تخليها تطلع حچي موزين عليچ

هزيتلها براسي ، أنتبهت لـ فرات لزم جرحه و گعد ع الچرباية و هو عاگد حواجبه مبين متألم ، راحتله خالة ...

- هااا ماما بيك شي؟

- لا لا يوم مابيه شي

***

شهم
عالجو يامور و خيطو راسها لأن الجرح شوي چبير ، تونه طالعين من المستشفى و صف سيارته أبوي ، نزل و أجه على يامور ، تسودن من شافها هيچ ، حاچته و هي تبچي ...

- بابا ضربني ، قاسم ضربني

- يـَ بعد أبوچ بوية ، و غلاتچ غير آخذلچ حگچ منه و أنعل والديه

فاطمة : شوفلنه حَل سلام ، تره هاي مو أول مره يمد إيده عليها

- تحچين صدگ أنتِ؟!

- والله العظيم

- هينه آنـه أله

گاد يامور و صعدو بالسيارة ، آني عفتهم و ركبت سيارتي و توجهت لبيت الكلب قاسم ، وصلت و نزلت دگيت الباب طلعلي أخوه تعديته و فتت جوه لگيتهم گاعدين بالحديقة ...

- أنت هم حاسب نفسك رجال هااا ، گلي ولك

حچه أبوه ...

- شهم بهداي بوية ، هيچ سوالف ما تنحل بالعصبية

- عمي أنت على عيني و راسي بَس تراضها أبنك يضرب أختي و هي بنص بيت أهلها ، گلي شنو رجولتك من تضرب مره بَس فهمني ولك

- بوية والله ندري الولد غلطان ، و أمسحها بوجهي

- و علي لو البت صاريرلها شي محد يخلصك من بين أديه

عفتهم و طلعت للبيت ، وصلت و دخلت جوه لگيت أمي بوجهي ...

- وينها يامور؟

- بغرفتها وليدي

رحتلها دگيت الباب و فتت ، لگيتها گاعده و تبچي ، گعدت يمها ع الچرباية ...

- لا تبچين يـَ روحي ، دموعچ غالية عليه

- والله ما چان هيچ وياي ، فجأة تغير و صار يعاملني بقسوة

- خيولي ، ماعليچ بي

سحبتها لحضني و حضنتها و صرت أمسح على ظهرها ...

- شلونچ هَسه

- زينة حَبيبي

- لا تهتمين ، و علي إذا ما جر عدل وياچ آني أله

- عوفه شهم ، ماريدك تتگاوم وياه

- چا يبچي أخيتي و يمد إيده عليها و أسكتله؟ شني ششايفتني

- الله لا يحرمني منك يگلبي ، و يديمك سند أليه طول العمر

- و يديمچ يـَ روحي ، يلا آنـه أخليچ ترتاحين ، بَس أوعديني ما تبچين ، ماريد أشوف دموعچ

- تمام ، روح حَبيبي

عفتها و طلعت ، صعدت لغرفتي ، دخلت و رحت گعدت ع الچرباية ، حطيت على راسي و دنگت ، أجت يمي مُهره ...

- شهم ، لا تضوج حَبيبي فدوة أروحلك

- أنهضمت كلش اليوم

- هونها حياتي و لا تزيدها على روحك

حطت راسها على چتفي و حضنتني

- آنـه بشوفتچ أنسى كل همومي

- و آني ماريد الهموم لگلبك ، ما أحب أشوفك مهموم

- شلونچ ، و شلونه روح أبوه

- زينين ، بَس تره غرت ، شنو روح أبوه چا آني شنو هنا

ضحكت ...

- أنتِ روحي و گلبي و كلشي بحياتي ، يكفي أنچ أم أبني ، أنتِ قطعة مني

- أموت عليك

***

عشق
كملنه عشه و گعدنه كلنه أحنه النسوان نتعلل بالصالة ، دنسولف و چان يجون فرات و رافد مداهرين ...

رافد : ياخي فرات والله ما سويتها مثل ما علمتك

- دغير يستقر هو

- دنچب والله أنت كُلشي متعرف

- أحترم و لتگول أنچب

- هو أنت أصغر مني عليش أحترمك

- لا عليك الله !!

- والله

- خايب ما تولي

گعدو و همه واحد يحچي ع الثاني ، حچت خالة ...

- ولكم أمي أنتو تبقون هيچ؟

رافد : عمه دشوفي أبنچ

فرات : إي تشوف أبنها ، تشو شاب شحلاته يسواك

- أستلم يالحمزة

نهت شجارهم رُسل من گالت ...

- عمه شنو رأيچ تحچيلنه قصة حبكم أنتِ و عمي و شلون تعرفتو على بعض ، بما أنُ أنتو تزوجتو عن حُب

- ولچ شجابها على بالچ هالسالفة

- مادري ، يلا عمه أحچيلنه عفيه

- بعدين بعدين

حچيت آني ...

- يلا خالة دحچيلنه

فرات : إي يوم تره و لا مره حاچيتها

ويه ما رادت تحچي أجه صگر ...

- أگفو أگفو ، شتحچون؟

رُسل : گلنه لـ عمه تحچيلنه قصة حبهم هي و عمي

- هاااا ، إي يلا يوم نسمعچ

- يعني مابيها مجال

صحنه كلنه " أبد " ، أستسلمت و بدت تحچي

نجاة
هاي بيوم من الأيام چنت بره بالحوش جاي أنظف ، أندگ الباب و رحت فتحته گُبل ما گلت منو ، ويه ما فتحته حچه الرجال اللي ع الباب ...

- ول يابة ما تگُلي وينك صا ...

ألتفت عليه و قطع كلامة ، حچه ...

- منو أنتِ؟

- أنت اللي منو؟

- آني عَلي صديق حسين ، هذا مو بيت حسين؟!

- إي ، أصيحلك ياه؟

- والله ياريت

فتت جوه و صحتله حسين ، بعدين أفتهمت أنُ هو صديق حسين من الدراسة و حَتى بالشغل و أول مره يجي لبيتنه ، مَر شهرين ، و عَلي يومية يمنه لأن شغلهم ويه الولد ، و أكثر من مَره أشوفه من أرجع من الدوام ، چان كُل ما أطلع گدامه يضل يباوعلي لحد ما أختفي عن أنظاره ، و بيوم من الأيام چنت راجعة من الدوام ، و شفته هو گاعد بسيارته گدام باب بيتنه ، من شافني نزل و أجه يمشي بأتجاهي ، آني من شفته جاي صوبي مشيت للباب حتى افوت ، صاح ...

- لحظة لحظة

وگفت و أنداريت عليه ، وصل يمي و حچه ...

- أنتِ شسمچ؟

رفعت راسي و خزرته لأن ضجت من تصرفه ...

- بالله موگفني بالشارع علمود تسألني شسمچ ، ما تستحي أنت؟

أبتسم و گال ...

- بالهداوة يابة بالهداوة ، آني ما قصدي شي والله ، بَس أريد أگُلچ شي ، تسمعيني؟

- گول

- من الأخير يـَ بنت الناس آني عاشگچ و رايدچ على سنة الله و رسوله ، آني ما أگدر أضل كُل ما تطلعين گدامي أدحگ عليچ و عيوني تلاحگچ ، عيب و أخوچ حسين مثل أخوي و أعز الله شاهد ، فـ آني رايدچ بالحلال إذا موافقة تا أجيب أهلي عليكم ، هاا شگلتي؟

ضليت ساكته ما عرفت شنو أرد بَس سمعت كلامه هذا أحس أنربط لساني ، حچه ...

- جاي أتنه تره!! ، إذا تحبين فكري و رديلي خبر بعدين مو أله هَسه أخذي راحتچ

- الجواب تاخذه من أبوي

ابتسم و آني عفته و دخلت للبيت و آني أفكر معقولة طلع يحبني و نظراته هاي الفترة كُلها مو خالية
و صدگ ما چذب خبر و وره يومين جاب أهله من الأنبار و أجه خطبني من أبوي و آني وافقت لأن عرفته حُبه ليه صادق من جاب أهله و طلبني حسب الأصول ، أبوي چان متردد بالموافقة لأن الأنبار بعيدة و آني وحيدته و ما رادني أبعد عنه ، بَس من شافني موافقة و هو يعرف عَلي عز المعرفة ، وافق و تمت الخطوبة ، بَس بعدين أكتشفت أنُ سلوى بنت عمي حاطة عينها على عَلي و چانت دائمًا تشوفه و تتقصد تطلع گدامه حَتى يشوفها و هي متأملة يجي و يخطبها بَس من سمعت بي خاطبني تخبلت و أجت عاركتني و سوتها سالفه من كل عقلها ، بالگوة سدينها و ما وصلت للكبار

فرات : يعني هذا سبب كُرهها لچ؟

- إي ، و ماكو غيرة ، لحد هَسه شايلة بگلبها عليه

- دخل تولي

صگر : والله أبوية طلع مو هَين

فرات : محد هَين بالعشگ

حچه هيچ و ألتفت يباوعلي ، أجو خوالي و حچه خالي عَلي ...

- عساها لمة خير إن شاء الله

رافد : يا هلا والله يا هلا بالعاشگ الولهان

- هاي عليه يول؟!

- إي عمي عليك عَجل عليه

- هااا الظاهر چنتو مستلميني

صگر : يابة أمي چانت تحچيلنه قصتكم من حچيت وياها و خطبتها و هالسوالف

- هااا نجاة لازم تذكرتي أيام گبل

- ليش هو آني نسيتها حَتى أتذكرها

رافد : يابة و أنت هَم سولفلنه شلون عرفت أمي الله يرحمها و أخذتها

هنا خالو جسام تغيرت معاني وجهه و هو يباوعلنه ، دنگ راسه و حچه ...

- بعدين وليدي بعدين

رافد : هو آني كُل ما أسألك عن أمي تگُلي بعدين و بعدين ، و لا مره حچيتلي شي عنها

رافد كال هيچ و گام طلع للحديقة ، الكُل سكت و بان عليهم الحزن

نَفس
ما صدگت الكُل گام لغرفته و فضت اللمة و گمت طلعت وره رافد اللي طلع و ما رجع ، طلعت بره دورته بالحديقة ماكو ، رحت وره البيت و لگيته گاعد و صافن بالسما ، گعدت يمه ...

- رافد شبيك؟

- مابيه شي

- لا بيك ، آني أعرف مقهور ، أحچيلي لا تخلي بگلبك

تنهد و حچه ...

- ميحچيلي شي عن أمي ، لو ما عمتي نجاة شوفتني صورتها و حچتلي شوي عنها چان آني ما أعرفها نهائيًا ، ليش يسوي هيچ بيه ! ، ليش كُل ما أسألة عليها يتهرب من الجواب؟!

- لا تضغط عليه حَبيبي ، يجوز هو ميگدر يحچي عنها ، أنت متعرف شنو بگلبه

- آني أدري بي ميحب أحد يجيب سيرتها گدامه بَس آني من حقي أعرف كُلشي عَن أمي و هو بصفته أبوية لازم يتفهم هالشي

- رافد فدوة لا تزعل و تقهر نفسك ، آني ما أگدر أشوفك هيچ ، أرجع رافد اللي عرفته اللي دائمًا يضحك و يضحك كُل اللي حواليه

بقى ساكت ما گال شي ، شوي و ألتفت عليه و حچه و هو مبتسم ..

- و هاي لخاطرچ نسيت الزعل كُله

- يلا لعد گوم نفوت جوه الجو بارد

- بردانه يـَ بعد گلبي

- إي

- أنطيني أديچ

- هااا؟

- أنطيني ياهن

سحب أديه و حطهن بين أديه و صار يفرك بيهن و بعدين شالهن و نفخ عليهن و حطهن على صدرة ، خلاني أحس بدگات گلبه السريعة و هو حاط أديه على صدرة ، حچه ...

- بودي ألفچ بحضني هَسه بَس آخخخ

سحبت أديه منه و گمت ...

- آني أروح

- روحي هَسه بَس لو صرتي حلالي ما أهدچ لو يجي الحمزة

أبتسمت و آني دايره وجهي عنه ، عفته و دخلت جوه ، المهم گدرت أنسي زعله و أغير موده

***

عشق
گاعده بغرفتي توني دخلت فراشي حَتى أنام ، أجتني رسالة على تيلفوني فتحته چان فرات كاتب " تعاي آني أنتظرچ بالحديقة " گمت لبست شالي و نزلت ، طلعت لگيته گاعد ع الكُرسي ، رحتله ...

- هااا أكو شي؟

- إي

- شنوه؟!

- أشتاگيتلچ

أبتسمت ...

- يعني منزلني من فوگ حَتى تگُلي أشتاگيتلچ !

- أريد أشوفچ گبل لا أنام

- و آني هم

- دحگي تره آني أدري بريان جاي تزعجچ و حاطتها وياچ ، بَس أنتِ حاولي تبتعدين عنها و لا تحچين وياها

- و أنت شمدريك؟

- أدري كُلشي آني

- آني مالي علاقة بيها والله ، بَس هي ما أعرف شبيها وياي

- طنشيها

- فرات أريد أگُلك شي

- گولي

- آني أريد الزواج يكون وره ما أتخرج مو هَسه

- نعم نعم؟!

- شبيك !

- يابة تحچين صدُگ أنتِ؟! ، آني مقرر وره ما نقطع مهر بشهر نتزوج

- أنت مقرر؟ ، لعد آني شنو هنا خراعة خضره حَتى ما تسأل عن رأيي!!

- لا مو هيچ بَس آني ردت نتزوج بأسرع وقت

- لعد ما دامك أنت ما حاسب حساب لوجودي و تقرر عني و متكلف نفسك تاخذ رأيي ، آني ماريدك و ألغي كُلشي

گمت حَتى أروح ، هو گام و سحبني من إيدي و دارني عليه ، حچه و هو عاگد حواجبه ...

- شنو نلغي كُلشي شو تمسلتين أنتِ؟؟؟ ...

********

يتبع ...

هلو شلونكم ،شلونها القفلة؟
+ أعذروني والله أعرف البارت قصير و آني ما راضية عليه و حَتى سردي أحسه مدري شلون مو مثل كُل مره ، أصلاً مدري شلون كتبت هالبارت بالگوة والله ، نفسيتي زفتت حييل و عدنه مريض بالبيت و منا الدوام ، و الرواية مسؤولية تره لا عبالكم فد شي هَين خاصة إذا چانت خيالية ، ردت ما أنزل بارت اليوم والله بَس هواي ناس يراسلوني ع الواتباد و ع الأنستا يسألون شوكت البارت ، ما ردت أكسر بخاطرهم و كتبت هاللي أگدر عليه و نزلت
أمانة الله أعذروني و لا تگولون تغيرت علينه ، لا والله بَس آني هَم ليه ظروفي ، صَح طولت بَس لازم اشرحلكم سبب تأخيري ، أنتظرو البارت الجاي و إن شاء الله يكون أقوه

تعالو أنستا

سحر الدليمي