رواية عشگ الفرات ( عِندما تَهوى القُلوب ) الفصل الثالث 3 - بقلم سحر الدليمي

عشقي لكِ مُقدس كـ نَهر الفُرات تماماً .

***

شهم
أحنه متعودين كل فترة تصير جمعة للعائلة يم واحد من عمامي أو يمنه و اليوم جمعة العائلة يمنه يعني راح يجون عمامي و عماتي هم بس عمتي نجاة تگول مگدر أجي لأن الطريق طويل و هي مريضة حقها والله البصرة بعيدة بتلفات الدنيا هههه
المهم البيت مخبوص بالتحضيرات و غده و هالسوالف تعرفون الجمعات العائلية شلون
طبعاً هذا آني كله ميهمني اللي يهمني هو شوفتها بس شوفت عيونها اللي من أشوفهن تنسيني الدنيا و مابيها اوووف أريد أشوفها و أكحل عيوني بشوفتها

مُهرة
اليوم جمعتنا ببيت عمي سلام يعني أكيد راح تجي عمتي نجاة و يجي فرات و أشوفه يربي شگد مشتاقتله و هو و لا يمه حتى أتصال ميتصل عليه
من الصبح مخبوصة و حايره شنو ألبس و لحد هسه مگدرت أختار شي و هذا سجاد يصيح فوگ راسي خلصي و خلصي و آني دايخة و حايرة بملابسي
يصيح و هو صاك على سنونه أووف منه هذا اخوية و لا عنده ذرة صبر

سجاد : ولچچچ مُهررررة فضينهههه رااااح نتأخر ع الووااادم

مُهرة : اهوووو سجاد على كيفك ، بابا فدوة خليه يعوفني والله دخت

حسين : سجاد وليدي على كيفك خلي اختك على راحتها

سجاد : يابة شلون على راحتها مو تأخرنه

حسين : عادي أبني هسه قابل وين رايحين لغربه خوما غربه ذوله بيت عمك

سجاد : سكتت سكتتت أصلاً هو منو غيرك مدللها و مكبر راسها حتى هيچ صارت

حسين : هههه چا شعندي غيرها هاي بنيتي لبة گلبي

هُهرة : فديتك يروح بنتك أنت

باوعت لسجاد بنظرة مُكر و صرت ارفعله بحواجبي حتى أغيضه هههه خبيثة مو بأيدي
خزرني خزره أنخلست بمكاني يمه هذا سجاد ما يتفاهم والله
عفته و رحت للغرفة و أخيراً گدرت أختار ملابس
لبست فستان جوزي فاتح ضيگ من فوگ و صاير كلوش من جوه رهمت وياه شال أسود و ترانشوز أبيض و حطيت مكياج خفيف شلت جنطتي و رجعت ذبيتها هسه قابل اني وين رايحه عفتها و أخذت فوني بس نزلت و لگيت الكل مكملين و گاعدين بالصالة عزززاا والله آني متأخرة كلش و مأخرتهم وياي

سجاد : صلو على محمد و آل محمد نزلت الأميرة ولچ وينچ مو فطرتي گلبي

مُهرة : أي كملت كملت يلا

حسين : يلا بوية چا مشينه

شهم
وصلو بيت عمي بكر و عائلته ألا بيت عمي حسين تأخرو اعرفها هاي سوالف مُهرة هي أخرتهم
شوي و أندگ الباب و گمت حتى أفتحه أكيد همه
فتحت الباب و دخلو و صارت مُهرة بوجهي أوويلي طالعة ملاك اليوم حبيبة گلبي هي من شافتني أباوعلها گبل نزلت راسها و فاتت
سديت الباب و فتت وراهم

***

فرات
گعدت من النوم چانت الدنيا الظهر گمت و أحس بوجع براسي و دوخة هاي عبن ما نمت البارحة بالليل
رحت غسلت و بدلت ملابسي و نزلت حتى أروح للمعرض

نجاة : همزين گعدت وليدي هسه ردت اگعدك علمود الغدة

فرات : لا حبيبتي آني ماريد غدة رايح للمعرض و عود أذا جعت آكل هناك

علي : ليش أبني بيك شي شو أحسك مدري شلون

فرات : لا أبوية مابيه شي بس شوية راسي يوجعني

بهالأثناء دخل صگر للصالة استغربت ما عبالي يضل لهالوكت

صگر : عجل ما دامك هيچ أگعد آني أروح للمعرض

فرات : و دوامك شلون ؟!

صگر : ماعليك بدوامي أنت ضل ارتاح
يلا آني طالع من رخصتكم

الكُل : الله وياك

فرات : لعد وين لارين ما شفتها اليوم مشتاگلها

رُسُل : بغرفتها كاعده تلعب بالألعاب حتى هي سألت عليك

فرات : هاا خوش يلا آني رايحلها من رخصتكم

رُسُل : عمه أصب الغده هسه ؟

نجاة : اي حبيبتي روحي و آني هسه لاحگتچ

رُسُل : لا عمه أنتي ارتاحي و ديربالچ تدخلين المطبخ
عمي ديربالك تخليها تگوم من يمك

علي : ههههه روحي و ماعليچ

نجاة : علي

- هلا

نجاة : شفت فرات

علي : شبيه

نجاة : مدري أحسه مو على بعضه خاف بيه شي و ميريد يگول

علي : لا يمعودة مابيه شي فرات هذا طبعه من يوم چان صغير شنو ما تعرفين أبنچ

نجاة : أله اعرفه

علي : اي عجل هايهيه

فرات
صعدت فوگ لغرفتي و رحت فتحت الكنتور و طلعت باكيت مال نستله جايبها لـ لولو لأن تحبها يوميه انطيها وحدة اخذتلها وحدة و رحت دخلت لغرفتها لگيتها جاي تلعب من شافتني جت تركض عليه غبيت النستله عنها تا ما تشوفها

- هاي شنو مشتاگة لـ عمو هوايه مو

هزتلي براسها بمعنى أي

- أحزري عمو شنو جايبلچ وياه ؟

رفعت راسها للسگف تفكر و رجعت نظرها ألي و تهزلي بكتوفها بمعني مدري
طلعتلها النستله و أنطيتها ياه أخذتها مني و هي تضحك صارت تحاول تفتحها بس ما كدرت رجعتها ألي حتى افتحلها ياها فتحتها و انطيتها لها و صارت تاكل و كالعادة دمرتني و دمرت نفسها و لعبت بيه طوبه ههههه بس تضل غاليتي

***

مُهرة
أدور بعيوني على فرات بين الموجودين بس ماكو حتى عمتي ماكو يمكن ما جايين بس گلت خل اسأل عمتي بلكي أطلع غلطانة

- عمه لعد بيت عمتي نجاة وين شنو مو جايين

فاطمة : اي والله حبيبتي ما أجو خابر عليهم عمچ و ابو صگر يگول عمتچ نجاة شوية مريضة و متتحمل الطريق

- هااا تمام

هنا چانت خيبة أمل بالنسبة اليه شگد أنتظرت هاليوم حتى يجي فرات و أشوفه و تالي ما اجو أوووف يمُهرة شهالحظ العندچ
بسرعة أنتبهت لنفسي و حاولت ما ابين انو آني ضجت

شهم
دخلت للصالة حتى أسلم على عماتي و بنات عمامي و آني چذب دخلت حتى أشوف مُهرة

- سلام يعماتي و بنات عمي شلونچن أن شاء الله بخير

الكُل ردلي السلام باوعت لـ مُهرة اللي هي الوحيدة ما ردتلي چانت مدنگه راسها و مبينه دتفكر بشي
تقربت منها شوي

- شلونچ يبنت عمي

رفعت راسها و باوعت عليه أبتسمت و جاوبتني

- بخير أذا أنت بخير يا أبن عمي

ابتسمت بوجهها و حسيت الكل يباوعلنه يربي هاي آني شبيه ليش سلمت عليها گدام الوادم بس آني من اشوفها مگدر أكض روحي و ما أحچي وياها بسرعة طلعت من الصالة حتى محد يشُك
رحت گعدت ويه عمامي و الولد بالديوانية مشى اليوم عادي و صار الليل و كلمن راح على بيته و خواتي امي مقبلت يروحن گاللتلهن يباتن يمنه اليوم
جان يوم كلش حلو و أحلى شي عيونها الحمدلله أني شفتها
جه ببالي فرات گلت خل أخابر عليه مشتاگ لسوالفه هالعار
دگيت و فتح خط

- هااا ضلع شلونك

فرات : هلا حبيبي بخير أذا أنت بخير

شهم : والله اليوم أخوك بمليون خير

أبتسم أبتسامة ماكرة و گال ..

فرات : هااا لازم شفتها حبيبة الگلب

شهم : اي شفتها شفتها ياخي علواه يومية نسوي جمعة حتى تجي و أشوفها

فرات : هههههه والله يول شعندك سوالف

شهم : تعال صدگ شلون صارت عمتي ولك ؟ ألتهيت اليوم و ما گدرت أخابركم

فرات : الحمدلله زينة احسن من البارحة

شهم : و أنت شمالك ولك شو مدري شلون تحچي

فرات : مابيه شي

شهم : عليه ولك فرات آني شهم احچي احچي يلا فضني

فرات : ههههه يول والله مابيه شي شبيك

شهم : أممم زين زين يلا ولي

فرات : شوو أولي ؟! مو صوچك صوچ اللي يجاوبك يا مطي

گال هيچ و سده بوجهي ياخي هذا فرات مصيبة و علي هههههههه

***

عشق
گعدت الصبح و مثل كل مرة بدلت و رحت للدوام مشى اليوم طبيعي الى حد هاي اللحظة
كاعدين آني و نور بالحديقة و دنراجع المادة فجأة أجانه ولد ما اعرفه و لا شايفته قبل هالمرة

كرار : دگيت عليچ قبل يوم ليش ما جاوبتي ؟

عشق : عفواً دتحاچيني ؟!

كرار : أي لعد أحاچي ابوية

باوعت لـ نور و چانت علامات الصدمة مرسومة على وجهها و آني صدمتي متقل عن صدمتها من هذا شيريد ليش هيچ يحچي وياي باوعت عليه و نترت بيه ..

عشق : انت منو و شتريد مني و منين جبت رقمي أصلاً ؟؟

كرار : اتصلت عليچ حتى أحچي وياچ

گمت على حيلي و گتله ..

- و منو أنت حتى تحاچيني من شوكت أعرفك حتى يصير بيناتنا حچي

كرار : عشق آني معجب بيچ و أريـ ...

قاطعته و گلت لنور يلا نمشي عفناه و رحنه اييع شنو هالشكولات معجب بيچ اصلاً مبين من وجهه مو راحة

نور : ولچ عزااا هذا منو

عشق : و شمدريني آني الله ياخذه

نور : گبر ميستحي ، أحضري رقمه عود

عشق : أي طبعاً

مشى اليوم طبيعي كملنه محاظرات من وكت و أتصلت نور على أبوها يجي ياخذنه رجعت للبيت مهدود حيلي و أنوب هذا الأرعن خرب مزاجي بس ما بينت لأمي تغديت و صعدت گبل لغرفتي حتى ما نمت بقيت أدرس لأن عندي أمتحان كللش صعب أووف
للعصر كملت دراسة و دا ألم بكتبي و دخلت ماما للغرفة

بدور : عشق ماما كملتي دراسة لو بعدچ

عشق : كملت ماما

بدور : اي خوش اريد أحچي وياچ بموضوع مهم

سمعت بيها موضوع مهم وخرت شعري عن ركبتي و خليته ليورا و عدلت گعدتي فتحت عيوني مركزة ويه ماما

- أي ماما گولي أسمعچ

بدور : شوفي بنيتي أبوچ الله يرحمه صارله سنتين من توفى و طول هالسنتين و أحنه عايشين وحدنه و آني حاطة أيدي على گلبي محد يسأل علينه من عمامچ كلهم خارج العراق و لاهين ببيوتهم و خوالچ تواصلنه وياهم بس ع التيلفون و آني مگدر أبقى عايشة وحيدة هنا بهالمدينة اللي ما أعرف احد بيها و باچر عگبه لو صارلي شي أنتي شيصير بحالچ

عشق : وين تردين توصلين ماما ؟!

بدور : آني قررت

عشق : شقررتي ؟

بدور : نروح لخوالچ بالأنبار نستقر يمهم هناك تشو بيت و عدنه هناك و گرايبنه كلهم هناك يعني راح نأمن

عشق : شنوو ماما ؟! شلون ترديني أعوف بغداد هنا ذكريات طفولتي و ذكريات بابا شلون اعوف بغداد ماما شللووون !!

بدور : بنتي أعرف صعب عليچ بس صدگيني من نروح للأنبار راح تحبينها و تتعودين عليها

عشق : ماما شلون اتعود عليها شلووون آني حتى خوالي ما أعرفهم أسمع عنهم منچ بس

بدور : بنتي آني أخذت هالقرار علمودچ انتي لأن أفكر بيچ و بمستقبلچ اريد أمن عليچ عشق ماما افهميني
باچر من تروحين للجامعة أطلبي نقل للأنبار علمود نكمل بسرعة و نمشي

گامت ماما و طلعت و آني بقيت مصدومة و ضايجة لليل بعدين فكرت بكلام أمي كله صح أحنه هنا وحدنه ماعدنه سند و خوالي على حسب حچي ماما كلش يحبونه
بس شلون اترك بغداد و ذكرياتي اوووف
گمت غسلت وجهي و حاولت أنام نمت و ما حسيت الا على صوت ماما و هي تگعدني گمت و تحضرت رحت للجامعة هنا شافتني نور و اجت عليه

نور : هلوو حب شلونچ

عشق : زينة

نور : شبيچ شو ضايجة

عشق : مابيه شي

نور : عشق شبيچ احچيلي

جاوبتها و القهر مبين بصوتي
- راح اروح نور راح اروح

نور : وين تروحين ولچ شبيچ احچي

عشق : ماما گالت حنروح نستقر بالأنبار

نور : يااا ولچ عليمن رايحين هناكه شلووون

عشق : لچ شبيچ خوالي هناك

نور : زين ليش خاله بدور قررت هالقرار فجأة

عشق : تگول هنا عايشين وحدنه و مو مأمنه نروح هناك يم خوالي أحسن باعي هو كلامها صحيح آني خنگتني الوحدة بس انتي و امي بحياتي أريد اتعرف على خوالي و اشوفهم بس والله صعب اترك بغداد صععبب

نور : يعني حتعوفيني ؟

عشق : مجبورة نور والله

نور : و شوكت حتروحون ؟

عشق : بس نكمل النقل

دخلنه للمحاظرة و مشى اليوم طبيعي بس آني ضايجة لأن حترك جامعتي و بغداد و حترك نور اوووف
يا ترى شنو اللي منتظرني بالأنبار شحيصير وياي هناك راح أتعود لو لا
أسئلة هواي براسي مو لاگيتلها جواب
كملنه دوام و رجعنه للبيت

***

فرات
نزلت جوه لگيت أبوية بالصالة ناداني حتى أگعد يمه رحت گعدت

علي : شلونك وليدي

فرات : زين يابة الحمدلله

علي : شو مبدل چنك تريد تطلع

فرات : أي والله راح نطلع آني و رافد نتمشى شوي

علي : بهالليل ؟!

فرات : أي عادي يابة ترا أحنه مو زغار

علي : هههههه أدري أدري بس لا تتأخرون

فرات : حاضر تأمر بشي ثاني أبو صگر

علي : لا وليدي سلامتك

رافد : ها فرات نطلع

فرات : أي يلا ، من رخصتك يابة

رافد : من رخصتك عمي

علي : الله وياكم

رافد
طلعنه آني و فرات حتى نتونس شوي آني اقترحت على فرات نطلع نغير جو حتى بلكت أطلعه من مود الكآبة اللي هو بيه من هذيچ السالفة و هو على هالحالة يعصب بسرعة و يضل كئيب و نادراً ما يضحك شگد حاولنه وياه نغير من حالته بس ماكو اللي صار وياه حييل صعب و مينسي بسهولة
رحنه للكافتريا و دخلنه گعدنه و فرات كالعادة ساكت اذا ما احد يحچي وياه هو مستحيل يفك حلگه
حاولت أحچي وياه و أغير من حالته شوي ..

- فرات

- هلا

- شوكت تتزوج

- رافد أنسى هالموضوع

چان يحاچيني و هو داير وجهه

- لا ما انساه فرات شوكت راح تنسى و تطلع من هالحالة هاي أنت تدري عمي و عمتي شگد متاذين عليك خطية ياخي أنسى انسى هاي صارلك 4 سنين على هالوضع

ألتفت عليه و أنگلبت ملامحة للعصبية نتر بيه و گال ..

- ما أنسى رافد ما أنسى ليش هو اللي صار ينسي عوفوني مالكم علاقة بيه لحد يتدخل بيه و سالفة الزواج لحد يفتحها وياي لا ترا والله العظيم أهج و بعد ما تشوفون وجهي

گال هيچ و عافني و گام طلعت اركض وراه صعد بالسيارة و صعدت وياه
خله أديه ع الستيرن و رچه راسه عليه
حسيت أني ذكرته و ضغطت عليه ولو هو ما ناسي
بس شسوي لازم أحاول أطلعه من هالحالة هاي

- فرات

جاوبني و هو بعد على وضعيته

- هممم

- آني آسف ما چان قصدي والله

رفع راسه و ناظرلي نظرات كلها حزن

- تعبت رافد والله تعبت

- ادري بيك فرات والله العظيم و أحنه شوف كلنه وياك و جاي نحاول نخليك تنسى لازم تنسى فرات حتى تكمل حياتك ميصير تضيع شبابك هيچ

- مگدر أنسى والله مگدر و أنتو كل ما تحچون وياي بسالفة الزواج و تگوليلي انسى يزيد وجعي أكثر رافد والله تعبت

- خلص هايهيه محد راح يفتح وياك هالسالفة مرة ثانية بس أنت أوعدني تحاول تنسى يلا فرات اوعدني

- ما أدري رافد مگدر اوعدك

*******

يتبع ...

هلو يحلوين
بس حبيت انوه على چم شغلة
أولاً الرواية خيالية من خيالي و ليست حقيقية
ثانياً البارتات غالباً راح تكون هالطول الا اذا حسب الأحداث يجوز تطول شوي
و بسسس أتمنى عجبتكم القصة
منتظرتكم احداث تجنننن

18.kij
تعالو أنستا

سحر الدليمي