رواية عشگ الفرات ( عِندما تَهوى القُلوب ) الفصل الثالث والأربعون 43 - بقلم سحر الدليمي

لا تنسون التصويت و التعليق بين الفقرات
++ أعذروني خاف أكو سحگات
قراءة مُمتعة ♥️.

*****

-

اليوم ما كتبت أقتباس خليته عليكم ، أكتبو اليعجبكم بَس شرط يكون مناسب لأحداث البارت أو الرواية بشكل عام .

*****

- جيبي الطفل

بقيت صافنه بوجهه ، شنو شجاي يگول هذا ...

- ما أنطيك أبني

- أنطيني الولد بالحسنى لا تخليني آنـه أجي آخذه

حضنت أكبر حيل و قربته على صدري ...

- گتلك ما أنطيك أبني

بقى صافن عليه و آني أدعي و أردد ( يا عَلي يا حاضر الشدات أحضرني ) وينك شهم ويينك ، أجه عليه و مد إيده على أكبر حَتى ياخذه ، بسرعة گمت و أبتعدت عنه ...

- كتتللك ما أنطييك ابنيي ووخخررر

- يابة دجيبي

تقرب عليه و جر أكبر من حضني غصب و آني چلبت بإيده و صرت أبچي و أصيح ...

- رجععهه رججعع أبنيي فدووة لا تاااخذهه ، دخيلك يا عَلي

نفض إيدي عنه و أخذه و طلع ، لابت روحي وراه تخبلت صرت أصيح بعلو صوتي ، رجاء واگفة گبالي تباوعلي و تبچي ، رحت لزمتها من ملابسها ...

- لييش هيييچ سوويتي بييه لييش ، شلوون نطااچ گلبچ تخللييهم يااخذون ابنيي منييي

- مُهره بَس أسمعيني ، والله آني مالي علاقة ما أگدر على شي ما بإيدي شي

- فدووة رجعيلي أكبر رجعييلي أبني فدووة أروحلچ

- والله العظيم ما أگدر

- باعي آني أم أفهميني ، أنتِ باچر هَم تصيرين أم و راح تفهمين اللي جاي أحس بي هَسه ، رجعيلي أكبر الله يخليچ

- وداعتچ ما أگدر أفهميني ، تحضري راح ترجعين لأهلچ

- مااا أتحررك خطووة وحدة منااا إذاا مااا أبنيي ويااي ، رجعووليي أبنيي وللكمم

- ما أگدر أسويلچ شي ، بَس اللي أگدر أگلچ ياه أبنچ راح يكون بخير

گالت هيچ و راحت ، گعدت بالگاع و صرت أبچي من گلب محروگ ، يعني شنو أخذو أكبر مني؟ ، بعد ميرجعولي ياه !! ، أنداريت أباوع للچرباية شفت المميه مالته ، قبل شوية چان بحظني و چنت أرضعه ، شلون هيچ أخذو مني ، أخذتها و صرت أبچي ، شوي و أنفتح الباب و دخل رجال ...

- يلا گومي

- وين أبني؟؟؟

- أنسي أبنچ و گومي

- أبنييي ما أنساااه رجعوولي أكبر

اجه عليه و سحبني من إيدي و گومني ، طلعنه للسيارة و شد عيوني و صعدنه ، ما أعرف وين رايحين

من بعد ما أخذو أكبر من حضن أمه ودو لـ حيدر اللي چان ينتظر شوفته بفارغ الصبر ، أنطاه ياه الرجال و أخذه بين إيديه و الولد يبچي ، حچه ...

- و أخيرًا أبن الفارس صار بين إديه

حچه أخوه : حيدر اللي جاي تسوي غلط ، رجع الطفل لأهله هو ماله ذنب بالعداوات اللي بينه و بينهم

- ماله ذنب بَس آنـه رايده يمي ، رايد أحرگ گلوب أهله عليه طول العمر ، خلهم يتحسرون عليه و يدورونه و ما يلگونه

راد يحچي أخوه بَس قاطعه و هو يوجه كلامة لواحد من زلمه ...

- أمنتولنه بيت بصلاح الدين لو لا؟

- البيت جاهز عمي

- زين خلصو أموركم علمود من باچر نطلع لصلاح الدين

- إن شاء الله

***

شهم
طول وقتي أبقى بالغرفة ، ما أحب اشوف أحد حَتى أهلي مالي نفس أحچي وياهم ، نفسي عافت كلشي بالدنيا ، صرت أنتظر موتي بفارغ الصبر ، حياتي ما تسوه شي بدونها ، البنيه اللي سنين و آني أتمناها و من صارت بحظني الموت أخذها مني ، و أبني ، أبني اللي ما لحگت أشوفه ، گلبي يگلي مُهره بعدها عايشة ، بَس عقلي يگلي خلص ماتت لازم تنساها ، بَس گلبي شينسي ، گاعد بالبلكونه لأن أختنگت بالغرفة ، حسيت بإيد أنحطت على چتفي ، أنداريت و شفت أبوي واگف وراي ، أجه و گعد بصفي ، بقى يباوع عليه حچه ...

- شهم ، مو كافي بابا؟

- كافي من شنو بابا !!

- أبني شوف حالك شلون صاير ، ولك والله آنـه و أمك گلوبنه ممروده عليك ، كافي وليدي

- و آنـه گلبي مات وراها بوية

- أحييه بذكر ربك بوية ، ألتجأ لربك و أرمي حمولك كلها عليه و هو يعينك

حچت أمي ...

- أبوك حچيه صَحيح يـَ يمه

ألتفتت و لگيتها واگفه وراي ...

- أنتو ما جاي تفهموني

سلام : فاهمينك بوية والله فاهمينك ، أنت خسرت مرتك و أبنك و هذا شي صعب ندري ، بَس يا بوية شد حيلك

ردت أحچي و دگ تيلفوني ، باوعت رقم غريب ، فتحت خط ...

- ألو

بمجرد ما گلت ألو حچت ، حچت و بصوتها أحس گلبي چن وردة ذبلانه و أجاها الماي و رجعت تفتحت ، ركزت بصوتها زين ، هي والله صوتها ، لو شگد ما غابت عني ما أنسى صوتها ...

- ششهمم فدووة تعاال أخذنيي منااا بسررعة فدووة

گالت هيچ و رجع رجال حچه وياي ...

- إذا رايد مرتك تعال للـ ****

سد الخط ...

- هااي مُهرره ، والله مُهره حچت ويااي

سلام : تسودن الولد

فاطمة : ولك يمه كافي أستوعب مُهره ماتت الله يرحمها

- والله ما ماتت يمه توه حچت وياي و گالتلي تعال أخذني ، هي والله هي صوتها

مشيت و أبوي لزمني من إيدي ...

- وين رايح ولك؟؟

- رايح أجيبها

- ولك مسودن أنت جاي نگلك البت ماتت ، مااااتت

- بوية عليك العباس هدني ، جاي أگلك ما ماتت آنـه سمعت صوتها ، هدني خل أروحلها

هديت إيدي منه و مشيت ...

- شههمم ، أوگفف ولكك جااي ويااك آنـه

نزلت أركض و ألف بشماغي بسرعة ، طلعت بره و صعدت بالسيارة ، أجه أبوي و صعد وياي و مشينه ، بقيت أدور للمكان اللي گالي عليه هذا الرجال بَس ما جاي ألگاه و أبوي يحچي وياي و يريدني أرجع ، عباله آنـه تسودنت ، و عَلي اللي حاچتني مُهره هاي عشگ سنيني مستحيل أنسى صوتها

***

مُهره
خلوني بمكان شبه مهجور و راحو ، بقيت رايحة راده ممية أبني بإيدي ، روحي تلوب عليه و أبچي ، من وكت ما أخذوه مني و دموعي ما نشفت عليه ، شوي و حسيت طبگت سيارة وراي ، أنداريت و شفت سيارة شهم ، نزل من عدها هو و وياه عمي سلام ...

- ششهمم

خله باب السيارة مفتوح و أجه عليه يركض ، وصل يمي و حضني گبل ، حضني بكُل قوته و آني هَم حضنته و خليت راسي على صدره و بقيت أبچي ، حَتى هو بچه ، بقينه دقايق واحد بحظن اللاخ ، وخر عني و حَط إيده على وجهي و مسح دموعي بأصبعه ، حچه ...

- آخخخ يا جَرح گلبي و دواي ، فراگچ هد حيلي

باوعتله العيون مدمعة و حُمر كلش ، شكله هنا نفس شكله لمن شفته بالحلم ، تعبان كلش و حيله مهدود حرفيًا ، معقولة فراگي هيچ سوه بي ، باوعت لعمي سلام واگف وره شهم و يباوعلنه ...

- عمي

- هلا يـَ بَعد عمچ

رحتله و حضني و باسني من راسي ، وخرت عنه و باوعت لـ شهم يباوع للمميه اللي بإيدي ، حچه ...

- شنو هاي؟

باوعتلها و تذكرت أكبر اللي أخذو مني ، بچيت ...

- هاي ممية أكبر

- منو أكبر؟

- أبننا شهم ، أخذوو منيي أخذوو من حضنيي و حرموني منه

- لحظة بَس خل أستوعب ، يعني أنتِ ولدتي؟؟

- إيي بَسس أخذوو مني اللي ما يخاافوون من الله ، أخذو أبنك شهم

سلام : بوية بَس لا تبچين خل نفهم منو اللي أخذه؟؟

- ما أعرفهم عمي ، چانو حابسيني كل هالفترة و لمن ولدت أخذو مني و رجعوني

- يعني غايتهم الطفل من البداية !!!

أباوع لـ شهم ملامحة تغيرت للعصبية ، صاح ...

- والله غيير اششربب من دممهمم هالچلاااب

گادني و صعدني بالسيارة و صعد هو و عمي و مشينه ، و آني مشتعله بگلبي نار على أبني
وصلنه بيت أهلي ، نزلنه و شهم فتح الباب و دخلنه ، لگيت بابا گاعد بالحديقة ، گاعد ع الكرسي و لازم راسه و مدنگ ، رحت يمه ، حچيت بصوت بي غصة ...

- بابا

رأسًا رفع راسه و باوعلي ، فتح عيونه على وسعهن و هو يباوعلي ...

- مُهررره؟؟؟

گال هيچ و گام جرني لصدره و حضني ...

- يـَ بَعد روح و گلب أبوچ ، مُهره شو عاينيلي بابا ، يعني أنتِ ما ميته ، الف الحمدلله و الشكر ألك ربي

حاضنته و أبچي و أشهگ بكل قوتي لدرجة النفس صار يصعب عليه ، وخرتي عنه و حچه ...

- شبيچ بنيتي ، ليش هالبچي

- بابا أخذو أبني مني ، حرموني منه ، رجعلي ياه فدوة

أخذ المميه من إيدي و باوع لـ شهم ...

- صَحيح هالحچي؟

- وين ألگاه آنـه ، وين أدوره گلولي ، و عَلي آنـه راح أتسودن

أجه عليه و لزم إيدي ...

- مُهره حَبيبتي حاولي تتذكرين ، ما شفتيهم ما عرفتي أحد منهم ما أندليتي مكانهم وينء؟

- والله ما أعرفهم ما گدرت أعرف أحد منهم ، بَس چانت أكو بنيه تهتم بيه أسمها رجاء ، هي الوحيدة اللي تجيني

- رجاء؟؟

- إي

- زين فوتي جوه أنتِ و آنـه رايح

طلع و طلعو وياه أبوي و عمي

***

عشق
طلعت بره و شفت فرات گاعد وحده بالحديقة و يباوع لاثر الجرح اللي بإيده ، رحت گعدت يمه ، رفع راسه و باوعلي و أبتسم ...

- يا هلا بـ عشگ الفرات

- ههههه حلوه هاي عشگ الفرات

- بَس مو أحلى من عيونچ

- تعرف شي

- لا شنو؟

- آني كُلش أحب عيونك

- ليش تحبينهن؟

- لأن كُل ما أباوع بيهن أشوف كمية الحُب اللي بگلبك إتجاهي ، فرات آني أفهم اللي بگلبك من عيونك

- العيون و راعيهن ملكچ أنتِ و بَس

أبتسمت و باوعت لإيده ...

- الجرح مخلي أثر بإيدك

باوع لإيده ...

- إي ، عادي

- كُله من ورايه

- أنتِ بَس ظلي وياي و لا تفارگيني و آني ما يهمني لو أنجرحت ستالاف جرح

أخذت إيده و بست مكان الجرح ...

- هاي أعتبرها قُبلة إعتذار

- ما أقبلها

- ليييش !!!

- ع الأقل بوسيني بخدي تا أحس بيها

- أستقر فرات و عوف هالسوالف

- إي راح أعوفها هَسه ، بَس لا تنسين زواجنا ما بقاله شي

- شلون ما بقاله شي !!

- شبيچ عشگ ، جامعة و خلصتي و تخرجتي ، بَعد تريديني أنتظر أنوب؟؟ ، لا هاي العايزة

- هااا لا حَبيبي شوكت متحب نتزوج عادي

- إي زين عبالي ، هَسه أريد أغير أثاث الغرفة و بهالفترة آخذ راي أبوية و نحدد موعد العرس إن شاء الله

ريان
توه راجعة من شغلي و شفت فرات و عشق بالحديقة گاعدين ، سمعت حچيهم كُله ، يعني راح يحددون يوم العرس ، يعني هَسه لازم أنسى فرات !! ، لا لا مستحيل مگدر أنساه مستحييل أنساه ، آني مستعدة أسوي كُلشي بَس حَتى يكون ليه ، رحت لغرفتي بدلت ع السريع و أخذت تيلفوني و دگيت على صديقتي ...

- هلا ريان

- آني غيرت رأيي

- غيرتي رأيچ بشنو؟

- باچر تاخذيني على هاي المره الگلتي عليها ، أريد تسويلهم سِحر يكرههم ببعض و بأسرع وقت هَم

- هَسه يلا تذكرتي تسويلهم سِحر ، من قرب زواجهم

- ريهام عوفيني من هذا التمسلت ، آني مالي شغل اللي أريده زواج ميتزوجون و يخرب كُلشي افتهمتي

- باچر نروح ع المره و هي تعرف شغلها

فزيت من انفتح الباب و دخلت رُسل بإيدها سيف ...

- تمام ريهام أحاچيچ بعدين

نهيت المكالمة ، حچت رُسل ...

- شنو هذا اللي يخرب؟

- لا ماكو شي بَس گلت لـ رهام تسوي تقرير أنطلب من عدنه بالدوام فـ گلتلها لا تخربينه

- إي زين ، بَس خلي يمچ سيوفي الى ما أكمل شغلي ، صگر طلع و محد فارغ اخلي يمه

- تمام جيبي

اخذت سيف منها و طلعت ، بَس حسيتها ما أقتنعت بكلامي لأن نظراتها مو طبيعية ، يلا المهم ما سألتني

ثاني يوم كملنه شغلنه آني و ريهام و طلعنه وره الدوام لـ هاي المره ، آني أبد ما أؤمن بهاي الشغلات و لا بعمري مجربتها ، بَس فرات ما خلالي طريق ثاني ، آني أحبه و مگدر أشوفه يروح لوحدة غيري ، حجينه ويه المره و فهمناها السالفة و گالت تعالن باچر تلگن العمل جاهز و تاخذنه وياچن

***

فرات
رحت لأبوية علمود أحچي وياه بموضوع العرس ، لگيته يصلي بالديوانية ، گعدت أنتظرة الى ما خلص ...

- تقبل الله أبو صگر

- منا و منكم صالح الأعمال

گعد بصفي و هو يلف بشماغة على راسه ، حچه ...

- إي يلا وليدي أحچي أسمعك

- شحچي !!

- الحچي اللي جيت علموده

- ه‍ههههه شمدريك

- اعرفك بابا ، يلا أحچي

- يابة جاي أسألك على موعد العرس شوكت تريده يصير؟

- آني مالي علاقة ، أتفقو أنت و عشق و حددو اليوم اللي يناسبكم و آني حاضر

- آني گلت لـ عشگ هالفترة أريد اغير أثاث الغرفة ، شرايك بَس تجهز الغرفة؟

- إي هاذ هو عَجل ، يعني و أخيرًا راح أشوفك عريس

- إن شاء الله يابة

- إن شاء الله وليدي إن شاء الله

- يابة من رخصتك آني رايح أدگ على شهم أشوف وضعة

- شلونه شهم؟

- والله يابة صارلي يومين ملتهي ما حاچي وياه ، بَس على حاله شهم

- الله يساعده ، ظل وياه وليدي لا تخلي وحده

- أخوية هذا يابة شلون أخلي وحده

- عفيه وليدي

گمت و طلعت بره بالحديقة دگيت على شهم بَس ميقبل يرد ، شوي و چان يفتح خط ...

- هلا فرات

- شلونك شهم

- والله ما أدري أضحك أبچي ، أحس أني ضايع فرات

- ليش شبيك

- مُهره عايشة

- شهم ردينه لـ نفس الموضوع ، شوكت تنسى و تريح گلبك؟

- ولك والله ما تسودنت آنـه صاحي ، مُهره طلعت عايشة و هاي يمي بالبيت ، و إذا ما مصدگ خابر أبوي و أسأله

- تحچي صدُگ أنت؟؟؟

- و علي الفحل صدگ

- إيي ألف الحمدلله ، بَس لحظة شلون عايشة شصار وياها وين چانت؟!

- هي عايشة و رجعتلي ، بَس أبني فرات أبني

- شبي أبنك؟!

حچالي السالفة كُلها ، و آني تخبلت ...

- صدُگ تحچي أنت؟؟ ، طفل توه جاي شيريدون منه !!

- غايتهم أبني من البداية ، آنـه شاك أنهم يعرفونه عز المعرفة و أله شلهم بالولد و أخذوه

- حيدر؟؟

- ساعة أگول حيدر بَس بعدين أرجع أگول هو ماعنده شي ويانه و صارله هواي ما متعرضلنه ، والله راح أتخبل فرات وين راح الولد !! ، بعلي لو يتبينلي أنُ اللي وره خطفة مُهره و أختفاء أبني هو حيدر غير أحرگه حرگ هو و اللي يطلع وراه

- بَ أگف على كيفك ، دحگ آني باچر يمك و نشوف شنسوي بهالسالفة

- لا فرات لتجي صارلك أشهر عايف حياتك و محتار بيه ، ألتفت لأشغالك و آنـه أدبر أموري

- إذا ما أحير بيك بمنو أحير يول

- أنت على أبواب زواج ، أهتم بأمورك و أنساني

- زين راح أحچي ويه صگر يشوف معارفه بلكت يگدرون يساعدونكم بشي و إذا أحتاجيت شي بَس خابرني أعوف كُلشي و أجيك

ظل ساكت ما جاوبني ...

- مو جاي أحچي وياك يول وينك؟؟

- والله لو عندي أخ من أمي و أبوي ما وگفلي مثلك ، آنـه شلون أجازيك گلي؟

- تجازيني من أشوفك مرتاح ، راحتك هي راحتي يَخوي

- أرتاح لو لگيت أكبر و خليته بحظني ، ولك آخخخ شگد چنت منتظر اليوم اللي يجي بي للدنيا و ينور حياتي و أشيله بين إديه

- إن شاء الله تلگاه و يرجع لحظنكم

- إن شاء الله

- سميتو أكبر؟

- مُهره سمته هالأسم

- شد حيلك أبو الأكبر ، شده و تزول

- الله يسمع منك

***

شهم
رجعت للبيت و آني مهدود الحيل و أجر بخيباتي وراي ، دورت و دورت بَس ما لگيت الولد ، شگول لـ مُهره هَسه؟! ، ما لگيت أبننا !! ، آخخخ يا نار الحيرة ، صعدت فوگ لغرفتي و دخلت لگيت مُهره گاعده و عمتي سليمه يمها ، أول ما شافتني فزت على حيلها ، أجت يمي ...

- هاااا لگيته موو؟؟؟

بقيت ساكت حاير شجاوبها ...

- إيي لگيته أكيد ، هو جوه يم عمه مو؟

راحت للباب حَتى تفتحة ...

- وين رايحة؟

- أجيب أكبر من عَمه

سحبتها و قربتها عليه ...

- ما لگيته مُهره

- شنوو يعنيي مااا لگييته؟؟ ، أريييد أبنيي شهممم أرييد أكبر

صارت تبچي و تصيح ، جريتها لصدري و حضنتها ، ظلت تضرب بيه و تردد ( رجعلي أبني ) ، عمتي واگفة و تباوعلها بعيون مدمعة ، شوي و حسيت حيلها أرتخه و إيديها نزلتهن عن صدري ، رخيت إديه عنها و چان توگع مغمى عليها ، لزمتها گُبل و شلتها خليتها ع الچرباية ...

سليمة : مُهره ماما گعدي بنيتي شجرالچ !!

- مُهره ، باوعيلي حَبيبي شو ، فتحي عيونچ مُهره

صبيت مي بالگلاص و مسحت وجهها ، شوي و صحت و هَم رجعت تبچي بَس حيلها مهدود مابيها ترفع إيدها ، ظلت تبچي لحد ما غفت ، آني ظليت يمها ما عفتها ، لليل و آني گاعد يمها ، گعدت و باوعتلي ...

- شلونچ هَسه؟

- ماكو خبر؟

- لا

سكتت و خلت أديها على وجهها ، تقربت من يمها و حضنتها ...

- لا تبچين ، ولچ والله دموعچ أحسهن ينزلن على گلبي مثل التيزاب

- چنت أنومه بحضني و أرضعه بإيدي ، أغنيله قبل مينام حَتى تعود مينام أله يسمع صوتي و آني أغنيله ، هَسه منو يغنيله؟ ، ينام بحضن منو؟

- بحيل الله نلگاه و يرجع لحضنچ ، أنتِ بَس أدعي

- تعبت شهم ، أريد أبني

- ريت التعب بيه و لا بيچ

***

ريان
كملنه شغلنه آني و ريهام و طلعنه بوجهنه على هاي المره ، وصلنه البيت و دگينه الباب فتحته و گالت فوتو ، فتنه وياها و أخذتنه لغرفة ما دخلتنه عليها بالمرة الأولى ، دخلنه و الغرقة چانت عبارة عن دخان و روائح مو طيبه ، گعدنه و طلعت علبة و وياها صُره زغيره مدت إيدها و گالت ...

- أخذي

- شنو هذا؟

- العمل اللي طلبتيه

- آني طلبت منچ عمل تره مو سم ، شنو هذا؟

- أنتِ بَس أخذي و سوي اللي أگُلچ عليه كُلشي تريدينه يصير

- زين تنشوف

- هاي الصُره السوده تشيلينها و تحطينها بفراش البنيه لازم بفراشها ، و هاي العلبة تشيلين من اللي بيها و تحطين بعصبر بأكل بدوه بأي شي و تنطينه للرجال ، لازم تكون بالأكل و الشرب

- و تنفع؟

- إي تنفع

- و إذا ما نفعت

- مستحيل ما تنفع

- خوش عجل

حاسبناها و طلعنه ، وصلت ريهام لبيتها و آني رجعت للبيت ، دورت لعشق ما لگيتها بعدها مو جاية من الكلية ، صعدت لغرفتها رحت فتحت سحاب المخده مالتها و حطيته بيها و سديته

***

عشق
رجعت من الكلية و چان كُل همي أشوف فرات كُلش مشتاقتله اليوم ما أدري ليش يمكن لأن ما شايفته من البارحة بالليل ، هَسه اليسمعني يگول ما شايفته صاير شهر ، هَسه ماعليه آني مشتاقتله و بَس ، نزلت قبل رافد و دخلت للبيت متلهفه لشوفته أكيد هَسه راجع من الشغل ، بَس لگيته ماكو بعده مو جاي ، سألت خالة عليه گالت ميجي حَتى ع الغده عنده شغل ، هنا خابت كُل آمالي بشوفته ، رحت لغرفتي ذبيت الجنطة و أخذت موبايلي دگيت عليه بَس ماكو ميجاوب ، كُلش أنقهرت عفته و گمت بدلت ملابسي و نزلت أتغده أكلت شوية و گمت ما مشتهية رغم چنت جوعانة حييل و أصلاً مردت اتغده بَس أكلت شوي لأن الصبح ما تريگت ، صعدت لغرفتي و تمددت بفراشي و طلعت موبايلي صرت أگلب بالتيك توك شوي و أجاني مسج من فرات ع الأنستگرام ، عفت كُلش و رحت دخلت عليه ، چان كاتب ...

🗨️ موجودة حياتي؟

بسرعة كتبتله ...

🗨️ آني موجودة بَس أنت الـ ماكو

شافها و كتب ...

🗨️ والله ملتهي بالمعرض و هَسه آني يم النجار علمود الغرفة ، شوفني نماذج هواي للغرف ما ردت أختار گلت أنتِ تختارين ، ثواني أدزلچ الصور

دز يجي بالعشر صور ، شفتهن وحدة وحدة ، كتب ...

🗨️ هنه هواي بَس آني شفت هذن أحلى شي و گلت تختارين منهن ، شوفيهن و أنطيني رايچ

🗨️ حَبيبي چان أنت أختاريت ماكو فرق بيني و بينك

🗨️ لا أريدچ أنتِ ترتبينها على ذوقچ

🗨️ تمام خل أختار و أگُلك

رجعت گلبتهن كُلهن ، آخر شي عجبتني الرابعة كُلش حلوه ، كتبتله ...

️ فراتي الرابعة كُلش حبيتها

🗨️ صار ، الرابعة ، الرابعة

🗨️ يلا آني هَسه راح أروح

🗨️ شوكت تجي؟

🗨️ بَس أكمل ، يجوز العصر

🗨️ تمام ترجع بالسلامة

🗨️ الله يسلمچ

***

مُهره
گعدت من النوم و باوعت شهم نايم بصفي ، نايم بتعب ، اكيد يتعب البارحة طول الليل سهران على راسي ما نام و لا أرتاح ، مسحت على راسه و ما تحرك نايم بعمق ، غطيته زين و گمت ، باوعت للسرير و نزلن دموعي ، شيصير لو هَسه أبني نايم بي ، و آني و شهم مرتاحين و نباوع عليه و ننتظرة يكبر بفارغ الصبر ، الله لا يوفق اللي أخذوه و حرموني منه و بالأخص رجاء اللي واگفة تتفرج عليهم لمن أخذو أكبر من حضني ، شگد توسلتها و ترجيتها و ما رفلها جفن ، شدعي عليهم قليل ، بَس حوبتي ما تتعداهم ، حوبة أم محروگ گلبها على أبنها اللي ما لحگت تفرح بي ، مسحت دموعي و نزلت جوه للمطبخ ، محد بالبيت ، عمي و عمتي نايمين بغرفتهم هُمه متعودين ينامون الظهر ، رحت للمطبخ دايخة كلش لأن ما ماكلة شي ، دورت حب راس ، لگيت و أخذت حبايه و شربت وراها ماي ، و وگفت و حطيت إيدي على راسي ، شوي و جاني شهم ملهوف و الخوف واضح بوجهه ...

- شتسوين هنا؟؟ ، فزيت من گعدت و ما لگيتچ يمي

- مابيه شي ، بَس نزلت آخذ حب راس

- راسچ يوجعچ؟ ، آخذچ للمستشفى؟

- لا حَبيبي مابيه شي ، هَسه أصير زينة

تنهد و جَر حسره ، حچه ...

- آآآه شگد مشتاگ أسمع هالكلمة منچ ، لابت روحي بغيابچ

- و آني رجعت بَس أبني ماكو

- نلگاه إن شاء الله

صعدنه فوگ للغرفة ، آني گعدت ع الچرباية و شهم راح يبدل ...

- وين رايح؟

- أشوف الشرطة شصار وياهم

- فدوة طمني ، تره گلبي نار والله

كمل لبس ملابسه و أجه يمي دنگ عليه و حچه ...

- أنتِ بَس كوني هادية هيچ و لا تبچين و ربچ هو يحلها

- و النعم بالله

ودعني و راح

***

ريان
صار العصر و گمت رحت للصالة ، دحگت من الشباك و شفت فرات فات من الباب و جه گعد ع الكراسي اللي بالحديقة ، بسرعة رحت للمطبخ و سويت گلاص عصير ، طلعت العمل و خليت منه بگلاص العصير ، ضميته بجيبي و أخذت العصير و رحتله ، وگفت يمه ...

- فرات

ألتفت و من شافني عگد حواجبه ...

- هلا

- جبتلك عصير ، أكيد تعبان ، هاك أشرب ...

********

يتبع ....

تره مو قوية القفلة والله ، يعني داريتكم بيها
++ أعتذر ع التأخير والله گلت علساس اليوم أنزللكم البارت من وكت بَس النت مدري شبلاه بالأنبار يومية و مسويله صيانة و گاطعينه علينه ، يعني اليوم والله من الصبح يروح و يجي ما گدرت أكتب شي ، المهم هَسه البارت و نزل ، نلتقي بالبارت الجاي إن شاء الله

سحر الدليمي