رواية عشگ الفرات ( عِندما تَهوى القُلوب ) الفصل الثالث والخمسون 53 - بقلم سحر الدليمي

لا تنسون التصويت و التعليق بين الفقرات
قراءة مُمتعة ♥️

***

- ضربتين بالگلب يوجعن يـَ هواي .

***

عشق
چنه گاعدين آني و ماما بالطرمه ، خلصنه ترتيب و طلعنه گعدنه ، أندگ الباب و راحت ماما فتحته و دخل فؤاد ، أستغربت جيته و شلون عرف أنُ أحنه هنا أصلاً ، أجه وگف گبالي ...

- شلونچ عشق

- الحمدلله

بدور : تعال أگعد أبني لا تضل واگف

- لا والله عمه مو مال گعده مستعجل ، آني بَس أجيت أشوفكم خاف محتاجين شي لأن عرفت أنتقلتو هنا

عشق : شعرفك؟!

- عرفت

بدور : ليش أنت مو سافرت؟

- لا ، شغلي هنا صار بين بغداد و الأنبار و أسافر لأهلي كُل نهاية شهر

- هااا ، الله يوفقك وليدي

- تسلمين

الباب چان مردود ما مطبوگ ، أنفتح و دخل فرات ، أول ما دخل صارت عينه على فؤاد ، عگد حواجبه و أجه يمشي عليه وگف گباله و نتر بي ...

- شتسوي هنا؟

- سلامتك ، بَس أجيت أشوف بيت عمي خاف محتاجين شي

- هَسه يلا تذكرت بيت عمك ، يوول سنيين عايفيينهن نسووان گاعداات وحدهنن ما أهتززت شوواربككم و جيتوو شفتووهن ، هَسهه جااي تگول بييت عميي ، دروبك هاي مو عليه فؤاد

- والله بيت عمي و شوكت ما ردت أجي ، أجي ، أنت متمنعني

فرات لزمه من ملابسه و حچه و هو صاك على أسنانه ...

- گتلك عيونك إذا تحطهن على عشگ أفگسلك ياهن و مُحمد

بدور : فراات ، فرااات أبني موو هيچ وخرر عنهه ، فراات ، أووف ياا ربي

فؤاد : زين نشوف

فؤاد وخر إدين فرات عنه و طلع ، أندار عليه فرات و صاح ...

- هذااا العفتينيي على مووده مووو يووليي ، و آنيي صاارليي أياام ليلليي ما أناامه أگوول شمسووي ويااها و هيچ كرهتنيي ، أثااري طلعع هذا الحيووان أبن عمچ هوو السبب

- شجاي تحچي أنت شبيييك ، مالي علاقة بي

- مالچ علاقة بي مو ، أسمعي اللي ببالچ ما يصير و أن صار و كلام الله أذبحچ أنتِ وياه ، و گولي فرات گال

گال هيچ و طلع

***

شهم
أجيت من الشغل الظهر و صعدت للغرفة ، فتحت الباب بهدوء خاف مُهره نايمه ، فتت و لگيتها گاعده ع الچرباية و ناطيتني ظهرها ، رحت وگفت بصفها ، ما حست عليه ، باوعت بإيدها الممية مالت أكبر اللي چانت وياها من لگيتها ، گعدت بصفها و خليت إيدي على چتافها ...

- شبيچ عُمري ؟

أندارت عليه و عيونها مدمعة ...

- أشتاقيتله شهم ، مجاي أگدر أنساه والله ، لحد هَسه أشتم ريحته كأنو بين إديه ، أريد أبني بَعد ما أگدر أتحمل

گالت هيچ و صارت تبچي و تشهگ ، جريتها و حضنتها لصدري ...

- أششش لتبچين حَبيبي ، لا تگطعين گلبي مُهره ، تره هو مثل ما أبنچ أبني ، بَس شبيدي و ما سويته

- جاي أموت بفراگه شهم والله جاي أموت ، ماريد أبينلك هالشي بَس بعد ما أگدر أتحمل ، أريد أبني

- أشش كافي لتبچين ، الله يعوضنه إن شاء الله

- والله لو يصير عندي خمس أطفال مينسوني أكبر ، أخذ گلبي و تعلقت بي كلش ، برائته و إديه الصغار ، هدوئة و عيونه ، تعرف عيونه چنهن عيونك بالضبط

تحچيلي عنه و آني أحس گلبي انعصر عصر عليه ، والله ما جاي أنام ليلي و آني أفكر بي ، أول طفل إليه هيچ يختفي من بين إديه و ما ألگاه ، أختنگت حسيت هَسه راح أبچي ، عفتها و كمت طلعت خارج الغرفة ، رحت للديوانية طلعت تيلفوني و دگيت على صگر ، شوي و جاوب ...

- هلا بأبن الخال ، شلونك

- هلا بيك حَبيبي ، على الله و أنت

- بنعمة

- صگر أريد أنخاك

- أفااا ، تبشر و عد عيناك ، گول

- أريد أدور ابني و أريدك تساعدني ، شلون؟

- صار ، أعرف شخص يشتغل بفريق تحقيق ممتاز و القضايا اللي يستلمونها كُلها مُعقدة نفس قضية أبنك و أكثر ، أحچيلك وياهم و يتواصلون وياك و إن شاء الله خير

- إي الله و إيدك خوية

- بَس تره ميشتغلون بدون مقابل

- يعني شلون؟

- يعني يريدون فلوس

- ميخالف أنطيهم شگد ميريدون بَس يلگولي أبني والله طگ گلبي عليه

- إن شاء الله تلگاه و تفرح بي و يكبر بين إديك

- آمين يا رب ، يلا خوية آنـه أترخص

- مرخوص حَبيبي الله وياك

نهيت المكالمة و رجعت للغرفة ، فتت و لگيتها نايمه و بإيدها المميه ، أخذتها منها و خليتها بالمجر و غطيتها ، رحت بدلت ملابسي و أجيت تمددت بصفها و حضنتها و نمت

***

ريان
حرت شسوي ويه فرات و يحبني ، ماضل شي ما سويته و ما شافني ، أكو ازود من السحر سويتله ياه و ما فاد ، جت ببالي فكرة ، هالمره لازم أتجرأ و أخطي هالخطوة بلكت يلين گلبه عليه و يحبني ، أنتظرت لليل لحد ما الكُل نام و تأكدت فرات دخل غرفته و نام ، حطيت شوي مكياج و لبست فستان قصير و صدره شوي مفتوح ، فتحت شعري و خليت أحلى عطر عندي ، طلعت من غرفتي و توجهت لغرفة فرات ، فتحت الباب بهدوء و دخلت ، لگيته نايم و نازع التيشيرت مالته باقي بَس بالتراك ، أبتسمت من شفته أعرفه هو ميحب ينام بالتيشيرت ، رحت فتحت كامرة تيلفوني ع الفيديو و خليته ع الميز گبال الچرباية ، رحت و گعدت يمه و هو نايم بعمق و مو حاس على شي ، خليت إيدي على صدره و صرت أمررها و صولاً لـ رگبته دنگت و شميت عطره اللي أموت عليه ، بسته بوسه خفيفه برگبته و رفعت راسي أدحگله و اتأمله و هو نايم ، تمنيت أكون آني مرته هَسه و ما أنومه على بحضني ، شلت إيدي و خليتها على شعره و صرت ألعب بي ، حسيته بده يتحرك ، ما أهتميت و أستمريت أمسح على شعره و لحيته ، حچه و هو مغمض بصوت ذايب ...

- عشگي

- أحبك يول

فتح عيونه و صارن بعيوني ، من شافني فز و لزمني من إيدي و وخرها عن وجهه ، صرنه قريبين على بَعض حييل ، عگد حواجبه و ترك إيدي و گام ، صاح ...

- أنتِ شتسوويين هيينههه يوولييي

گمت وگفت گباله هو من شافتي دار وجهه و حچه ...

- أستريي نفسچ شهالمنظر أنتِ ما تستحين !!

- آني أحبك فرات

- ول من نجعل الله لا يحبچ ، أطلعييي أنگلعييي عنييي تررهه اللي بييه مكفينيي

تقربت عليه و لزمت إيده ...

- آني ألك فرات ، ملكك أنت و بَس و أنت مستحيل تصير لغيري

جرني من شعري و حچه ...

- تمسلت لا تمسلتين ريان لا بالقرآن هذا الصار أوصله لأبوچ و أخلي يذبحچ

گال هيچ و عافني و أخذ تيشيرته و طلع ، رحت أخذت تيلفوني و طفيت التسجيل ...

- صرت وحدة رخيصة من وراك يـَ فرات ، بَس بسيطة إذا ما تزوجتك آني مو ريان

رحت للغرفة و بدلت ملابسي و گعدت فتحت الفيديو و أخذت سكرين من حس و لزم إيدي و چان قريب عليه ، هاي اللقطة كُل من يشوفها راح يفكر أنُ هو راضي و مقتنع باللي جاي يسوي وياي ، حفظت الصورة و الفيديو و و خليتهن للوقت المناسب طفيت التيلفون و نمت

***

شهم
حسيت الصبح على صوت مُهره و هي تگعدني ، فتحت عيوني لگيتها گاعدة گبالي و لازمه إيدي ، من شافتني گعدت أبتسمت و حچت ...

- صباح الخير يـَ روحي

گعدت و أخذت إيدها و بستها ...

- صباحي أنتِ و ماكو أحلى من هالصباح

- شهم

- هلا حَبيبي

- آني آسفه

- ليش تتأسفين؟

- البارحة أعرف قهرتك بحچيي و أنت مو ناقص و ...

خليت إيدي على حلگها و سكتتها ...

- اشش لتكملين ، كُل متضوجين و تنقهرين تعاي أحچيلي آني لتحچين لغيري ، حَتى إذا ردتي تبچين أبچي بحضني ، تمام؟

هزتلي براسها و سكتت ...

- أكو ريوگ لو أروح أتريگ بالشركة

- لا شلون أخليك تطلع بدون ريوك ، أنت گوم غسل و ريوگك يجهز

- چا خوش

گمت و فتت للحمام غسلت و طلعت لگيتها بعدها بالغرفة ...

- هااا شو بعدچ ، چا مو گلتي اسويلك ريوگ

- بالبداية خل أحضرلك ملابسك

- هااا يعني ألبس على ذوقچ اليوم؟

- إي ، تريد رسمي لو زي عربي لو كاجول؟

- بكيفچ

راحت فتحت الكنتور ...

- تمام ، حطلعلك هذا القميص الأبيض و وياه بنطرون أسود و هاي الستره البيجي ، حلو؟

- حلو عاشت إيدچ

- يلا أنت صلي و بدل و تعال تلگه الريوگ جاهز

- تمام

راحت و آني صليت و كملت ، لبست ملابسي و خليت عطر و شلت تيلفوني و نزلت جوه للمطبخ ، تريگت و ودعتها هي و أمي و طلعنه للشركة ، وصلنه و أبوي راح على مكتبه و آني رحت على عبدالله لگيته بمكتبه گاعد و صافن ، فتت و هو ما حس عليه ، گعدت و جه موظف بإيده اوراق ، خلاهن گدام عبدالله و حچه ...

- أستاذ عبدالله ذني الأوراق لازم توقعهن

عبدالله صافن ما رد عليه ، رجع حچه الولد ...

- أستاذ عبدالله !!

فز على صوته ...

- هاا هلا حَبيبي

- الأوراق ذني لازم توقعهن

باوع ع الأوراق و گلب بيهن شوي و رجعهن للولد و رجع لصفنته ...

- هاك

- بَس أستاذ ما وقعتهن

حچيت آني : جيبهن علاوي آني اوقعهن

أخذتهن منه و وقعتهن و رجعتله ياهن و طلع ، باوعلي عبدالله بإستغراب ...

- هاي أنت شوكت أجيت؟

- حقك صافن و متدري بالهوا يشرج لو يغرب

- لا مو صافن

- إي مبين

سكت و صار يباوع ع الميز و ينقر عليه بأصابعه ...

- أحچيلي شبيك؟

- مابيه شي

- لا بيك أحچي ولك تضم علي

تنهد و جر نفس ، باوع عليه و حچه ...

- حبيت ولك شهم

- صدگ؟

- والله

- يعني و أخيرًا ، و منو هاي؟

- ريان ، أخت زوجة صگر تعرفها مو

- إي أعرفها ، بَس شجابك عليها؟

- من رحت للأنبار ، دعمت سيارتها غصبًا عني و شفتها ، نزلت تعاركني و أخذت گلبي ، من ذاك اليوم لهاليوم و هي ببالي

- چا أخطبها

- هو مقرر بَس مو هَسه خل أنتظر شوي

سكتنه ثنينه بعدين حچه ...

- ولك ذني الأنباريات كلهن هيچ عصبيات و ما يتفاهمن

جاوبته بإبتسامة : رب العناد و العصبية ذني ، بعدك ما شفت منهن شي

- و آني أموت بالعناد و العصبية

- ديلا هَسه انت عوف العناد و العصبية و أنتبه لشغلك لا تفشلنه

- ههههه تمام

***

فرات
من بعد اللي سوته ريان طلعت من البيت كُله و ما رجعت إلى الصبح ، ليهسه مصدوم من اللي سوته ، شنو هالجرئة و الوقاحة العدها ، مستحيل هاي أخت رُسل عقلي ما جاي يستوعب ، رجعت للبيت و گعدت بالحديقة شوي و طلعت لارين تلعب ، شافتني و جت عليه ...

- فراتي

- هاا حَبيبي

- أنت مو تحب عشق؟

تنهدت و جاوبتها ...

- إي أحبها

- و مو گلتو راح تتزوجون؟

- إي

- لعد شو هي عافت بيتنه و راحت بعيد ، ليش؟

- مادري

- يعني هي بعد متحبك؟

- والله هيچ الظاهر يـَ لولو

- چنت أريد تتزوجون و تجيبون عنون زغيييير

- ههههههه ، أنتِ منو علمچ على هالسوالف يولي؟!

- محد بَس آني أعرف ماما و بابا من تزوجو جابوني للدنيا و بعدين جابو سيوفي ، و أنت و عشق من تتزوجون هم راح تجيبون عنون

- منتزوج بطلنه

- ليش

- عبنها ما تحبني

- بَس آني أحبك

- و آني هَم أحبچ بنيتي

راحت تلعب و جاني رافد ...

- وين چنت كُل هالليل يول؟

- لتخاف آني مو مثلك تا اروح ع الملاهي

- أنچب و أحچي وين چنت؟

- رافد عوفني تره والله العظيم روحي طافره

- سولف شبيك يول !!

سكتت رجع گال ...

- دسولف رحمة لحصان الحمزة

- يوم عن يوم جاي أنصدم بالناس اللي حواليه أكثر ، يمكن يجي يوم و أنصدم بنفسي حتى

- أگُلك هاي سوالف الألغاز آني ما افتهم بيها ، أحچي مثل الوادم لا أنعل سلفه سلفاك

- خليها بالگلب

گمت عنه و فتت جوه ضل هو ينادي وراي بَس ما رديتله ، صعدت فوگ لغرفتي صارت بوجهي ريان ، وگفت گدامي و حچت ...

- فرات ...

- أششش ، لا تگولين أسمي مره ثانية و لا تطلعين گدامي

دفعتها عن طريقي ، رجعت حچت ...

- فرات بَس أسمعني

- تدرين نفسي صارت تلعب منچ لذلك لا تطلعين بوجهي ، طلعنه ملفين گحـ** ببيتنه و أحنه ما ندري

- لااا فراات آني مو هيچ والله مو هيچ

- لعد شنو أنتِ هاا شنوو؟؟ ، اللي تجيني تالي الليل لغرفتي و بملابس أعوذ بالله منهن و احنه كُلشي ما بيناتنه ، هاي ستتسمى هااا؟؟؟

- تتسمى عاشقة ، آني أحبك ليش ما جاي تحس بيه ، وريت گلبي ور و أنت تركض وره عشق ، شنو شفت بيها و ما شفته بيه و هيچ حبيتها و خبلتك

- شفت بيها الشرف اللي ما شفته بيچ ، يولي چنت خطيبها يعني حلالها و هي حلالي و متخليني أحضنها جايه هَسه تقارنين نفسچ بيها ، حُبچ خلي لچ و أن طلعتي بوجهي نوبة ثانية اقسم بالله غير أوصل الحچي لأبوچ فـ خليني ساتر عليچ أحسلچ

عفتها و طبيت للغرفة ، حسيت بوجع بگلبي ، طلعت العلاج و أخذت منه ، طبيت سبحت و طلعت ، تمددت بالفراش و آني حسبه تجيبني و حسبه توديني إلى ما نمت

***

عشق
كاعدة بالغرفة دارتب بملابسي فاتت ماما ...

- تعاي فؤاد جه و يريد يحچي وياج

- بشنو يحچي وياي؟

- مدري

- يلا جايه

طلعت أمي و آني لميت ملابسي و لبست شالي و طلعت ، رحت للهول لگيته كاعد و مدنگ راسه ...

- السلام عليكم

رفع راسه عليه و أبتسم ...

- هلا والله ، تعالي گعدي أريد أحچي وياج بموضوع و متأكد راح يفرحچ

گعدت مقابيله ...

- شنو؟!

- هَسه أنتِ تخرجتي مو

- إي تخرجت

- و ما ناوية تشتغلين بشهادتچ

- أكيد بَس ما أعرف منين أبلش او وين اقدم

- هاي عوفيها عليه و أصلاً يمكن لگيتلچ وظيفة

- الله عليك صدُگ؟

- ههههه إي والله بَس لازم نروح و نتفاهم وياهم

- إي نروح ماكو مشكلة

- هَسه تگدرين؟

باوعت لأمي هزتلي براسها بمعنى إي ، أبتسمت و باوعت لـ فؤاد ...

- تمام أبدل و نروح ما أتأخر

- ديلا أنتظرج

رحت للغرفة و آني طايرة من الفرح ، و أخيرًا حلمي راح يتحقق و يصير عندي شغل خاص بيه و تعب سنين الدراسة ما راح يروح ع الفاضي ، بدلت بسرعة و نزلت جوه ...

- كملت نطلع؟

- إي نطلع

طلعنه و صعدنه بالسيارة و مشينه ، شوي و وصلنه يم مبنى شوي چبير ، حچه فؤاد ...

- هاي شركة أهلية ، أحسلچ تشتغلين بيها من الشركات الحكومية او الدوائر الأخرى

- اوكي

- ننزل

- إي ننزل

نزلنه و دخلنه جوه ، فؤاد چان ماخذ موعد ويه المدير من قبل فـ ما أنتظرنه هواي ، دخلت ع المقابلة و فؤاد بقى ينتظرني بره ، كملت و الحمدلله المقابلة چانت ناجحة و أنقبلت بالشغل ، طلعت لـ فؤاد و گتله و دخل يحچي ويه المدير ما أدري عن شنو ، شوي و طلع و رحنه للسيارة ...

- و هاي الشغل و تم

- الحمدلله

- أتفقت وياه تبلشين من الأسبوع الجاي

- و ليش مو من باچر

- لا علمود تتحضرين زين

- تمام

سكتنه شوي و رجعت گتله ...

- شُكرًا فؤاد

التفت عليه و أبتسم ...

- ماكو داعي تشكريني ، ما سويت غير الواجب

وصلنه البيت و نزلنه ، بشرت أمي و كلش فرحتلي ، كعدنه نسولف بالهول ، حچت ماما ...

- بَس شلون راح تروحين للدوام؟ ، يعني توصيلتچ شلون!

فؤاد : آني أوصلها عمه

حچيت : بَس فؤاد أنت هَم مرتبط بشغلك

صفن شوي يفكر بعدين رجع گال ...

- ناخذلچ سيارة

- بَس آني ما أعرف أسوق

- آني أعلمچ ، و من باچر نبلش بأول درس و ابقى اوصلچ بين متتعلمين و ناخذلچ سيارة

- تمام موافقة

ثاني يوم أجه عليه من الصبح و أخذني لمكان فارغ مابي سيارات هواي ، طبگ السيارة و نزل ...

- يلا روحي بمكاني

نزلت و رحت بمكانه و بلش يعلم بيه ، چان هادئ كلش وياي و أبد ميحسسني بالتوتر ، رجعنه للبيت و أحنه بالطريق كال ...

- ما دام عشق حتگوم تسوق الله يستر أهل الأنبار

- هههههههه لا مو لهدرجة شسالفة

أندار عليه و أبتسم ، حچه و هو يباوعلي ...

- تدرين شغلة؟

- شنو؟

- ضحكتچ كلش حلوه ، چنها بغداد

- أحم ، شُكرًا

- العفو

رجعنه للبيت و صار يومية يجي ياخذني حَتى يعلمني ، أستمرينه شهرين لحد ما تعلمت السياقة و ضبطتها كلش زين ...

- باعي عشق ، باجر أروح لـ بغداد أسحب فلوس و أجي علمود آخذلج سيارة ، لأن آني فلوسي ببغداد

- لحظة لحظة و منو گلك آني أقبل أنت تاخذلي سيارة !!

- ليش متقبلين

- طبعًا ما أقبل ، بابا صَح توفى بَس الحمدلله ما خلاني أحتاج لشي ، خلالي خير من الله ، فـ آني حروح اسحب من حسابنا فلوس و أنطيك ياهن تاخذلي سيارة

- تمام على راحتچ

ثاني يوم رحت سحبت الفلوس و نطيته ياهن و أخذلي سيارة ، منها بلشت أعتمد على نفسي و اروح يومية لشغلي و بهيچ مشت حياتي

و بيوم ، أجانه فؤاد ، دخل گعد جوه ، و آني
عفتهم يسولفون و رحت طلعت بره بالحديقة ، أمي دتضغط عليه كلش بسبب تركي لـ فرات و تلومني و هي متعرف اللي بگلبي و اللي دامر بي ، گعدت ع الصبه و صرت أباوع للاشجار اللي بالحديقة ، و آني صافنه أجاني صوته

ألتفتت عليه لگيته راچي چتفه ع الحايط و مچتف إديه و واگف يباوع عليه و هو مبتسم ...

- نعم

نفض قميصة من التراب اللي صار عليه من الحايط و أجه گعد يمي ...

- أريد أحچي وياچ بموضوع مهم و هاي جيتي كُلها علمودچ

- اسمعك

- هَسه أنتِ أنفصلتي مو؟

- إي

جر نفس بأرتياح ، غمض عيونه و فتحهن و رجع باوعلي و عيونه تلمع ...

- إذا تقدمتلچ توافقين؟

ردت أحچي و قاطعني ...

- لا ، ماريد جوابچ هَسه ، فكري زين و بعدين رديلي خبر ، حتى إذا وافقتي أجيب أبوي و يصير كُلشي رسمي

سكتت و دنگت راسي و آني متفاجأة من طلبه هذا ...

فؤاد : عشق شو باوعيلي؟

رفعت راسي باوعتله ...

- آني رايدچ من زمان ، من أول ما شفتچ عجبتيني و ردت أتقدملچ بَس ما صار نصيب ، أنتِ فكري و أتمنى الجواب يكون القبول

ودعني و راح و آني بعدني مصدومة ، يعني شنو فؤاد يحبني !!

***

عبدالله
گاعدين آني و شهم جاي نراجع چم ملف ، أجاه أتصال و گام طلع بره المكتب ، وره شوي رجع ...

- شهم

- هااا

- شو كثرانه إتصالاتك هالفترة شنو السالفة

- لا ماكو شي

- متأكد؟

- إي طبعًا

سكتت عنه بعدين رجعت حچيت ...

- ياخي ما مرتاحلك جاي أحسك ضام عليه شي

باوع للباب و رجع باوعلي ...

- باوع آني هالفترة جاي أدور على أبني ، متفق ويه فريق تحقيق خاص جاي يدورونه

- إي و هاي من الزينات ليش ما تريد أحد يعرف؟؛

- ماريد أحد يعرف لأن ماريد السالفة توصل لـ مُهره ، آني بعدني ما أعرف يلگوه لو ميلگوه ، ماريد أنطيها أمل و تالي منحصل شي

- إي والله صدگ حچيك

- هالسالفة تضل بيناتنا عبدالله ماريد أحد يعرف

- خلص و لا يهمك

***

رُسل
فتت للصالة لگيت عمة نجاة گاعدة بَس ما أعرف شبيها تفرك إديها بتوتر ، خليت سيف ع القنفة و گعدت يمها ...

- عمه

ما ردت عليه ...

- عمه نجاة !!

- هااا هلا حَبيبتي

- شكو شبيچ

عصرت إديها و بلعت ريگها و حچت بقلق ...

- ما أعرف شگول و منين أبدي

- شكو عمه خوفتيني؟!

- عشق خاطبها أبن عمها فؤاد

- شنووو؟!

- خايفة لا فرات يدري و يصير بي شي لو يسوي بيها شي

رفعت راسها و حچت و هي مستغربة ...

- فرااات

دحگت لگيت فرات واگف بباب الصالة و شكله سمع الحچي ، جه وگف گبال عمه و حچه ...

- أنخطبت مو

- فرات ماما بَس أهده

أخذ السويچ و طلع بسرعة ، طلعت تنادي وراه عمه و هو ميرد گام ميشوف دربه

***

عشق
گاعدة دانظف بالمطبخ ، و ماما راحت يم الجيران ، أندگ باب المطبخ بقوة ، كل ظني أمي رجعت بَس تعجبت ليش جاي تدگه بقوة ، رحت فتحت الباب و أنصدم بـ فرات ، دخل و طبگ الباب وراه ، لزمني من شعري و جرني و مشى بيه للهول ، آني أصيح و أدفع بي بَس مجاي أگدر أخلص نفسي ، فتنه للهول و رماني بالگاع ، دنگ و لزمني من وجهي بقوة و صاح ...

- مووو گتللچ اللي بباااللچ ماا يصيررر مااا يصيييبر ، أذبححچ والله أذبحچ و ما تصيريين لغييريي أفتهمتييي

وخر إيده عني و آني بچيت و صحت بي ...

- شدتححچيي أنت شبيييككك

- متواافقيين على فؤاااد متوووافقيين أفتهمتييي

- افههممم أنت ماالكك علااااقة بييههه أنت و لاا شيي بالنسبةة إليي و لو تبقى آخرر رجاال بالدنيا ما آخذااك و لاا أقبلل بيييك

خله إيده على گلبه و گعد ، باوعلي و بچه ، و چانت هاي أول مره أشوف فرات يبچي ، حچه بصوت مبحوح و مليان قهر ...

- أحبچ يولي ، روحي معلگه بيچ ، كافي أرحميني و أرحمي گلبي اليحبچ

- آني ما أحبك ، ماريدك ، فدوة عوفني الله يخليك

بقى يباوع عليه شوي بعدين مسح دموعة و گام مشى وصل يم الباب و ألتفتلي ، حچه ...

- تأكدي إذا متت لو صار بيه شي فـ من وراچ أنتِ

گال هيچ و طلع

***

رُسل
عمتي ضلت تلوب وره ما راح فرات ، محد موجود حَتى يلحگه و ندگ عليهم ميجاوبون ، جه عمي علي ، تلگته عمتي ...

- علي دخيلك ألحگ فرات بسرعة

- هاا نجاة شصاير شبي فرات؟!!

- عرف أنُ فؤاد خاطب عشق و طلع ، اخاف يروحلهم علي ألحگه

راد يطلع عمي علي و چان ينفتح الباب و يدخل فرات ، چان تعبان حيل و بالگوه يمشي ، وگف و حچه ...

- راح أموت يابة

گال هيچ و چان يگع بين إدين عمي ...

********

يتبع ...

صبركم عليه و ع الأحداث ، و أبقو ويايه لأن جايتكم أحداث تجننن يعني لتحكمون ع الرواية بسرعة

18.kij
تعالو أنستا و اللي يجي يدخلي خاص يگُلي آني جديد علمود أضيفه كلوز لأن نشري اللي يخص الرواية كُله بالكلوز

سحر الدليمي