رواية عشگ الفرات ( عِندما تَهوى القُلوب ) الفصل الثالث والستون 63 - بقلم سحر الدليمي

بارت مُفاجئ🌚🤎
لا تنسون التصويت و التعليق بين الفقرات
قراءة مُمتعة ♥️

***

- عفت كُل عيوبك و حَبيتك ، هو اليحب جَنة يشوف مَحبوبة

***

رجعنه للبيت و هو چان كُلش فرحان طاير من الفرح ، بَس آني چنت مصدومة ما حچيت و لا كلمة ، يحچي وياي ما أرد عليه ، حامل ، آني حامل منه !! ، و فرات ، فرات لو عرف شراح تكون ردة فعله ، يعني خلص بَعد ما أگدر أعوف فؤاد صار أكو طفل بيناتنه ، صرخت بحرگة گلب ...

- لااااا ، مااارييدههه ، ماااريييده

صرت أبچي و أضرب على بطني بكُل قوتي ، ركض عليه فؤاد و لزم إيديه ...

- أهدي عشق أهدي مو هيچ

- عووفنييي الله لااا ينطيييك حيوواان ، آنييي أكرههكك ، ماارييدكك لااا أنت و لااا أبنكك ماارييدكمم

- شدتحچين عشق تره هذا الطفل أبنچ أنتِ هَم

- مااارييدهه والله أمووته ماارييده ، مستححيييل أخليي يجيي للدنيااا

دفعته عني و رجعت أضرب ببطني ، حضني بسرعة و چتف إيديه ...

- أقسم بالله يـَ عشق إذا صار على أبني شي أنسى كُل حُبي ألچ و أدفنچ هنا بمكانچ

- وخرر عنيي حقييير نذذللل الله لاا يوفقكك

- أهديي ، أهديي بَسس على كيفچ

إيديه صارت ترجف من الأعصاب و الصياح ، دخت و الدنيا صارت تفتر بيه ، ما حسيت على شي و وگعت بالگاع

***

فرات
رحنه آني و صگر ع القسم اللي يداوم بي مروان حتى نشوف شنو صار بسالفة عشگ هو صارله فترة مستلم القضية ، بالطريق حچه صگر ...

- إن شاء الله نلگاها عن قريب ، مروان محقق و هذا شغله و ما تصعب عليه قضية

- إن شاء الله ، گلبي خلص و آني أدورلها والله

- هانت إن شاء الله هانت

وصلنه غاد و نزلنه ، دخلنه للمكتب ماله گام بطوله و أستقبلنه ...

- حي الله ابو سيف

- تحيا و تدوم حبيبي

- يا هلا بـ فراتنا

- هلا بيك

گعدنه و هو جاب كُرسي و گعد بصفنه ...

- إي شلونكُم شخباركُم ، مشتاگين يولو

صگر : والله على الله لاهين بهالدنيا

- ما غير الله ، بالنسبة لقضية البنيه آني طلبتكُم علمود أشرحلكُم وجه لوجه و أفهمكُم

فرات : شتفهمنه مروان صاير شي؟

- دحگو ، آني وسعت نطاق البحث على جميع المحافظات و عممت مواصفات البنيه و معلوماتها هي و الخاطف على جميع المراكز ، و هَم تواصلت ويه أصدقاء الخاطف و مكان عمله و گدرت أجمع عنه معلومات تگدر تساعدنه بالبحث عنه ، يعني إن شاء الله خلال شهر البنيه يمكُم

- شهر چثير مروان

- فرات آني أستلمت القضية بوكت متأخر و القضية مُعقدة شوية و يرادلها صبر و شغل يعني شهر أقل شي تره

سكتت آني ، حچه صگر ...

- زين أحنه بشنو نگدر نساعدك؟

- أريد أتواصل ويه أهله ، هُمه بالخارج گلتوا مو؟

- إي خارج العراق

- تمام أنطوني ارقامهُم أي شي ضروري أتواصل وياهُم

- بَس أرجع أدزلك رقم أبوه

- هاذ هو متفقين عجل

***

نَفس
هَسه آني بالشهر الرابع يعني صار وكت نروح نشوف شنو جنس الطفل ، أخذني رافد و رحنه للمستسفى و هو متحمس حيل بَس يريد يعرف شنو راح يجينه ، وصلنه هناك و سويت سونار و كملت و طلعت لـ رافد ، من شافني أجه ملهوف ...

- هااا بشري

- خلينه نرجع للبيت

عفته و مشيت ، أجه وراي ...

- أحچي شنو جنس الطفل؟

ما جاوبته ، طلعت و رحت صعدت بالسيارة ، صعد هو و حچه بقلق ...

- شبيچ نَفس شو ساكته ، الطفل بي شي؟!

- لا مابي شي

- إي عجل ما تحچين !!

- من نرجع للبيت

- شيصبرني آني ، صارلي أشهر أنتظر هاللحظة دگوليلي عاد

- ماگول أله نرجع للبيت

- خوش عجل مالها رجعه للبيت أله تگولين

باوعتله و ضحكت ...

- تره أنت الخسران الوحيد ، يعني إذا ما رجعنه ماگولك

- بداعتي گولي مو زهگتي روحي

- ماگول

- إذا تحبيني گولي

- شتجيبلي إذا گتلك؟

- أي شي تريدينه

- أكيد؟

- والله العظيم

- تتذكر الفستان اللي شفته بالنت و گتلك اريد أطلبه و گلتلي لا و ما اقبل تلبسن هيچ لبس؟

- أنلاصت يالحمزة أنلاصت

- أريد الفستان رافد

سكت شوي بعدين ألتفت عليه ...

- صار يابه يجيچ الفستان ، يلا گولي

- أممممم

- گولي مو شعلتي جد جدي

- بيه ولد ، طفلنه الأول ولد رافد

- گولي والله

- هههههه والله العظيم

اخذ واجهي بين إيديه و باسني ...

- أححح امووت بييكك آنيي حَبيبيي

حط إيده على بطني ...

- طلعت وليد يول ، أبوسك ول بابا أنت و أمك

- هههههههه

- فرحان رافد؟

- أله طاير من الفرح طاااير

- ليش؟

- شنو ليش ، البنيه اللي أحبها أخذتها و هَسه أبني ببطنها بَعد شريد من الله ، والله الله خجلني بكرمه هذا ، ما چنت متخيل أتزوج و يصير عندي أطفال ، و هَسه مرتي بصفي و أبني جاي بالطريق ، شريد أكثر بَس گوليلي

- الله يديم الفرحة عليك حَبيبي

- و يديمچ ليه يا نَفسي و نور عيوني

خليت إيدي على بطني و الإيد الثانية لزمت إيد رافد ...

- سمعت ماما ، تعلم الغزل من أبوك حتى باچر تگوله لـ حبيبتك

- بَس خل يجي أدخله دوره و هو صغير اعلمه على كُلشي يخص هالسوالف

- إي گول و فعل ههههههه

- إي عجل شعبالچ

حرك السيارة و مشه بَس مو بطريق البيت ...

- هاي وين رايحين؟

- نجهز ملابس لـ الوليد غير

- بَس بَعد وكت

- لا نجهز من هَسه أحسن

- بَس آني ما أعرف بملابس الأطفال

- هَسه يا عيني قابل يرادلها علم الذرة هي ملابس مال زعاطيط

- حديثي الولادة أسمهم

- إي نفس الشي

رحنه لـ محل خاص بملابس الأطفال حديثي الولادة و لحد عمر السنة ، اشترينه ملابس كومة و رافد ما خله شي ما جابه ، مميات و العاب مال زغار و بطانيات و كُلشي جهزله كُلشي ما خله شي ناقص ، خلصنه من ملابس الأطفال و أخذني للمول هَم جابلي ملابس و ما خله شي بنفسي ...

- أريد أجيب ملابس و أريدچ أنتِ تختاريلي ياهن

- ليش

- عاجبني ألبس على ذوقچ

رحنه لقسم الملابس الرجالية و أختاريتله ملابس و عجبنه ، كملنه كُلشي و رجعنه للبيت ، رحنه لغرفتنه آني ميته تعب و منا بطني بلشت تكبر و صارت تضايقني ، گعدت ع القنفة أرتاح و رافد طلعله ملابس و فات يسبح ، أرتاحيت شوية و گمت بدلت و گعدت أعزل بالغراض الجبناهن ، ملابس الولد خليتلهن باب وحدهن علمود ما أتعب ، سفطتهن و رجعت لملابسي و ملابس رافد ، طلع من الحمام دينشف بشعره ...

- نعيمًا يـَ حلو

- لتزحفين تره متزوج و مرتي متقبل

- هههههههههه راافد بطل سوالفك

- صار من عيوني و سنوني

- شدخلهن سنونك

- لا شلون دخلهن

راح للميز يمشط ، حچه ...

- نسيت أگُلچ باچر رايح لكربلاء

ذبيت الملابس من إيدي و رحتله ...

- شتسوي هناك؟؟؟

ألتفت عليه : اجيب الورث مالچ

- مااريده رافد عووف كربلاء مترووح

- حگچ هذا ما أخلي بإيد رجل خالتچ الدايح

- رافد أذا سمع بيك جاي لكربلاء يأذيك ، فدوة عوف ماريد الصخام الورث عندي أنت معوضني عن كُلشي

- لا أجيب حگچ و أجي

- فدوة اروحلك حَبيبي عوف هالسالفة ، فكر بأبننا اللي جاي بالطريق إذا صار عليك شي لا سامح الله آني ما أگدر أربي وحدي

- يابه ما يصير شي لا تظلين توهوسين

عافني و راح گعد ع الچربايه ...

- رافد

- هو صدُگ شنو الورث مالچ؟

- بيتين

- تمام عجل أبيعهن و أجيبلچ فلوسهن تتصرفين بيهن شتگولين ، لو أخليلچ ياهن بَس أحولهن بأسمچ

- رافد مااريد شيي مااريد ، أريدك أنت و بَس

- صار تعاي والله آني هَم رايدچ

سحبني عليه و راد يبوسني دفعته ...

- راافد موو وكتهاا يمعوود

- هَسه مو گلتي أريدك والله خبلتيني

- أهووو دوخر

ضحك ، و آني گمت و رجع سحبني ، حضني و صار يمسح على راسي ...

- ميصير شي حبيبي بعون الله ميصير شي ، أروح و أرجع بنفس اليوم

- خايفة رافد ، والله خايفة عليك

- لتخافنين ميصير شي إن شاء الله ، أريد أحفظلچ حگچ آني

- بَس الله يحفظك اليه كُلشي ماريد غير هالشي

***

مُهره
چنت رايحة للدكتورة عندي مُراجعة و وياي عمتي ، شهم وصلنه و راح للشركة ، سوينه التحاليل و دخلنه ع الدكتورة حتى أشوف تحسنت عن آخر مره لو لا ، دخلنه و أخذت التحاليل ، قرتهن و باوعت عليه ...

- لا الحمدلله وضعچ تمام ماكو شي و الطفل هَم وضعة جيد

باوعت لـ عمتي مصدومة ، رجعت باوعت للدكتورة ...

- طفل شنو دكتورة؟

رفعت راسها : أنتِ حامل حَبيبتي شنو ما تدرين؟

ضحكت بفرحة و عيوني غورگن ...

- لا والله ما أدري ، يعني صَحيح چنت أحس بدوخة و مرات تلعب نفسي بَس ما فكرت بالحمل

- هاي لأن بعده توه بلش يالله أسبوعين

- صدگ أسبوعين؟

- إي أسبوعين ، راح أكتبلچ شوي أدوية ضرورية أثناء الحمل ، أما بالنسبة لأدويتچ القديمة اتركيها لأن موزينه ع الطفل

طلعنه من الدكتورة ، حچت عمتي ...

- مبروك يمه ، الله عوضكُم حَبيبتي

- يبارك بيچ عمه ، الحمدلله على كُلشي

- شهم لو دره راح يفرح هوواي ، خاصة هو هالفترة ضايج مدري شماله

صفنت أتخيل فرحته شلون ، يا ربي ما مصدگة الله عوضني و كتبلي أصير أم مره ثانية ، الحمدلله يا ربي الف الحمدلله و الشكُر ، طلعنه للصيدلية أخذنه الأدوية و گعدنه ننتظر شهم ، شوي و دزلي رسالة أنُ هو وصل ، طلعنه و صعدنه بالسيارة ، مشه و چان معصب ساعة يتأفأف ساعة يخابر و يصيح بالتيلفون ، آخر شي حچت عمه ...

- شبيك أمي ليش هالعصبية؟!

- ماكو شي ماما لا تدوخين راسچ

- أنت هَم لا تدوخ راسك وراك خبر يفرحك

- شنو شصاير؟

- لا تستعجل على رزقك

سكت و حسيته ما أهتم يعرف الخبر ، بَس باوعلي بالمرايه كأنو يسألني شكو ، وصلنه البيت و فتنه و شهم بقى ينزل بالمسواگ ، فتت للغرفة بدلت و گعدت ألم بملابسي ، فات شهم و راح للحمام بدون ميحچي شي ، شوي و طلع ينشف بوجهه ، شمر الخاولي و راح للچرباية ، رحت وراه قبل ميگعد لزمته من إيده ...

- شبيك حَبيبي ليش ضايج؟

- مابيه شي

- ميهمك تعرف شنو هالخبر الحلو؟

گعد ع الچربايه و جاوب و هو يعدل بالمخدة ...

- و شنو هالخبر بالله؟

- آني حامل

بسرعة رفع راسه عليه و گام ...

- هااا شنوو عيدي؟؟

أبتسمت : آني حامل شهم ، الله رزقنه بطفل ثاني

- شوكت شلون؟؟

- اليوم الدكتورة گلتلي ، آنـه ما چنت أدري و لا چنت ملاحظة على نفسي ، بَس اليوم الدكتورة أكتشفت الحمل بالتحاليل

- الله عليچ تحچين صدگ لو تشاقين؟

- والله و غلاتك مجاي أتشاقه اللـ ...

قاطع كلامي من جرني و حضني بقوة ، حضني و حسيته بچه ، بعدت عنه و باوعتله ، مسح دموعه گُبل ...

- تبچي شهم؟

- باعي ما گدرت أسيطر على دموعي ههههههه

- يعني الله رزقنه بطفل ثاني؟

- إي حَبيبي الحمدلله

- ألف الحمدلله و الشكُر ، الله كريم و مينسى عبده

- و النعم بالله

سكت و يباوعلي و يبتسم ، شلون تغير مودة من الضوجة للفرحة ...

- شگد عليچ؟

- أسبوعين

حط إيده على بطني ...

- بعده زغير يعني

- ههههههه إي حَبيبي

- باعي ديري بالچ على نفسچ مُهره ما أوصيچ خوش

- تمام

- شنو مشتهية أجيبلچ؟

- مادري بعد ما أشتهيت شي

***

فرات
گاعد بالهول ويه أبويه و جاي يعلمني شلون لازم أگضب نفسي ويه الزبائن اللي يجون للمعرض لأن اليوم تكاونت ويه واحد ، يحچي و آني بالي مو يمه كُل تفكيري بعشگ ، شوكت ألگاها يا ربي بَعد ماعندي صبر ، أهجس حتى الصبر مل مني ، جه صگر و هو يحچي بالموبايل ...

- إي إي زين ، دزلي العنوان إي ، تسلم حَبيبي ما قصرت و كفو منك عز الله ، ماشي تدلل ، الله وياك أخوية

سده و دحگ عليه و هو مبتسم ...

- البشارة فراتي

- شنو شكو؟

- خابرني مروان و گال أنهم گدروا يلگون عشگ و حددوا مكانهم

گمت من مكاني بساع ...

- الله عليك تحچي صدُگ؟؟

- إي والله

- و وينهم هَسه ، بيا مكان ، أروح أجيبها هسه إيي وين سويچ السيارة

- على كيفك وين تروح تجيبها ليش هي هين هناك

- عجل وينها؟

- بدهوك

- شنووو بدهووك؟؟؟

- إي الحيوان أبن عمها ماخذ بيت هناك و گاعدين بي

- دزلي عنوان البيت بسااع والله لأروح أنعل والديه

عَلي : وين تروح هساع يابه ، هي دهوك هين هناك تا تروح

صگر : إي فرات مثل ما گال أبويه أنتظر لباچر و من الصبح نطلع

- شيصبرني لباچر

عَلي : صبرت سنة كاملة ما تگدر تصبر هالچم ساعة

والله و گعدت أنتظر و أنتظر أهجس الساعة صارت سنة عليه والله العظيم ، الليل كُله ما گدرت أنامه و آني أفكر شلون راح يكون اللقاء ، مشتاگتلي مثل ما آني ميت عليها؟ ، بَعدها تحبني مثل ما حُبها بگلبي ظل يكبر و يزيد يوم عن يوم؟ ، ظليت گاعد و أحسب الوكت دقيقة دقيقة ، صارت الساعة بالخمسة و دگيت على صگر ، جاوبني و مبين توه گاعد من النوم ...

- هاا شبيك؟

- شنو شبيك گوم ورانه طلعه لدهوك. والله الليل ما نمته و آني أنتظر ، ما صدگت على الله طلع الصبح

- أگُلك مو گال عرسك مبارك گال أله هَسه

- ورانه طريق صگر يلا گوووم

- إي إي گايم

سديته منه و گمت بدلت بسرعة و نزلت جوه أنتظر صگر بالهول و مو گدران أگعد ، ظليت رايح جاي ، شوي و نزل مبدل و مكمل ، طلعنه و توجهنه لدهوك ، الطريق هو طويل و آني حسيته طويل أضعاف مُضاعفة ، بَعد ساعات طويلة وصلنه دهوك و أحنه متكسرين ، بَس ما يهمني المهم الگاها و أكحل عيوني بشوفتها ، طلع صگر العنوان و گمنه نفتر ندور البيت و كل شوي يخابره مروان يوصفله الطريق و ظلينه نتوخ بالشوارع

***

عشق
طول هاي الأيام آني ما مهتمة بنفسي ، ما آكل زين و لا آخذ أدويتي و لا منتبهه لحركتي ، گلت بلكي ينزل الطفل و أخلص منه و من أبوه ، طلعت من الغرفة جاي أمشي و مريت من يم غرفة فؤاد شفت الباب مفتوح ، دخلت و سمعت صوت المي بالحمام يعني جاي يسبح ، باوعت التيلفون مالته مشمور ع الچرباية ، أخذته و فتحته ما چان بي رمز ، أريد اتذكر رقم فرات ماكو أنمحى من ذاكرتي ، فتت ع الأنستا و حاولت أبحث على حسابه ، اليوزر ناسيته بحثت من خلال الأسم ، كتبته و طلعلي ، دخلت و شفت الصور و متت أنتهيت ، هنه هنه ما ناشر شي صارله هوواي و البايو مغيره ما مخلي بَس ٣ نقاط و قلب مكسور و الصورة الشخصية نفسها ما مغيرها ، دخلتله خاص و كتبت ...

🗨️ فرات آني عشق ، تعال خلصني الله يخليك

دزيتها و چان افز على صوت فؤاد ...

- هاي شدتسوين؟

ويه فزتي وگع التيلفون ، دنگت عليه بسرعة و أخذته ...

- جيبي التيلفون

- ما أنطي

- أگُلچ جيبي

أبتعدت و ضميت التيلفون وراي ، بسرعة ذب المنشفة و جرني عليه ، أخذ التيلفون و باوع بي ، رجع باوعلي و ضرب التيلفوني عليه أجه براسي ، صاح ...

- لچ للييشش ترراااسلييي ليييششش ، اليووم أنعلل واالديييچ

ضربني راشدي بقوة ، وگعت و طخ راسي بحافة الچرباية ، دنگ ع الگلاده اللي بصدري ...

- و آنيي أگوول لييش هالگلااده ماا تنزلل من رگبتچ ، أثااري بيهااا أسمه للگـ *** مالتچ

سحبها مني بقوة و رماها بالگاع ، دنگ عليه و ما أحس الراشدي منين يجيني و منا راسي ينزف ، بعدين گام و صار يدفر بيه و يصيح و يغلط ، لحد ما غبت عن الوعي و ما دريت عن شي

فرات : أگف هذا البيت مو؟

صگر : شو بالله ، إي إي هو

- هاذ هو مروان لگينه البيت عاشت إيدك

- تدلل و ترجعون بالسلامة

- الله يسلمك أخوية

سده و وگف السيارة بساع و نزلنه ، الباب مسدود بَس السياج واطي عبرنه من فوگاه و فتنه للحوش ، رحنه دگينه الباب أكثر من مره ماكو رد ، آخر شي تلفت أعصابي گضبته و كسرته ، فتنه جوه و نسمع صياح فوگ ، ركضنه للطابق الثاني ، فتنه للغرفة و أشوف فؤاد يكتل بعشگ ، جمدت ما تحركت و آني اشوفه شلون يضرب بيها ، ركض عليه صگر و جره و تولاه چتل وين صوابك اليوجعك ، ركضت آني لـ عشگ لگيتها منتهية ، وجهها ما ينشاف من الدم و فاقدة ، شلتها بحضني صار راسها على صدري ...

- عششگ ، عششگ حَبيبتيي فتحيي عيوونچ

- دحگيي عششگ آنيي يمچ والله جيبت گوومي ، گوومييي يولي لا تعوفينيي

- عشگ لاا تعووفينيي

أدحگ على فانيلتي هي بيضة و صارت حمره من الدم ، دحگت أكو دم على رجليها ، هنا آني عقل ماظل براسي ، تنزف هوواي ، بسرعة شلتها و وگفت ...

- صگرر للمستسفى بساااع

أخذتها و نزلت ركض ، صگر وراي ، ركض فتحلي باب السيارة و صعدت و خليت راسها بحضني ، شغل السيارة و شخط بيها بسرعة ، راسها ينزف حيل ...

- صگر جاي تنزف حيل أنطيني أي شي يمك أخلي ع الجرح

فتح الچكمچه و طلع من عدها شماغ ، لگحلي ياه أخذته بسرعة و لفيته على راسها ، أشوفها ميته بين إيديه ما تتحرك ...

- صگر وين صارت المستشفى البنيه راح تموت

- ما أندل آني فراات ما أندلل ، خرراا بالحظ

گضيناها من شارع لشارع آخر شي وگف نزل و سأل واحد ، رجع بسرعة ...

- أندليتها

حرك بأقصى سرعة ، شوي و وصلنه المستسفى ، نزلت و شلتها و دخلنه للمستسفى ، شافوها بإيدي و جو ركض أخذوها مني و دخلوها جوه غرفة ما أدري شنو ، گعدت بالگاع أهجس حيل ماظل بيه ، صابتني رجفة قوية بإيديه ، راح صگر جابلي مي شربت شوية و أنطيته ياه ...

- شبيك فرات؟؟

- شفتها مو شمسوي بيها الحيوان ، شفت حالتها صگر شايلها جثة بين إيديه جثة والله

- أشش لا تحچي هيچ شد حيلك

- شگول لعمتي لو صار بيها شي ، شسوي لو ماتت و عافتني بحسرتي عليها

- متموت إن شاء الله ما يصير بيها شي

سكتت و هو گام يتمشى بالممر ، آني گاعد و أدحگ على إيديه الترجف و ملابسي اللي كلهن دم ، غمضت عيوني و صورتها و هي مدميه ببالي ...

********

يتبع ...

18.kij
تعالو أنستا و اللي يجي يدخلي خاص يگُلي آني جديد علمود اضيفه كلوز لأن نشري اللي يخص الرواية كُله بالكلوز

سحر الدليمي