- مو مُهم كِثر السوالف
المُهم گلبي يحبك
***
مُهره : شهم أوگف
- هااا شكو؟!
- دخت و لعبت نفسي
وگف و طبگ السيارة على طارف الطريق ، نزلت و هو نزل وراي حتى يلحگني ...
- أبقى يمك لا تجي
بقى واگف بمكانه و آني رحت أتقيأ ، ما گدرت أتحمل كلش دخت من الطريق ، رحت أمشي عليه و هو أجاني بأيده بطل مي ، غسلت و شربت شوية ، و گادني و رحنه صعدنه بالسيارة ...
- شلونچ هَسه؟
- الحمدلله
- آنـه ليهش ماريد آخذچ وياي لأن أدري بيچ تتعبين من الطريق الطويل
- خلص حَبيبي مابيه شي لا تخاف
- ولچ هبطتي گلبي
- أسم الله على گلبك
- أمشي لو ننتظر ترتاحين شوي؟
- لا أمشي منريد نتأخر
حرك السيارة و رجعنه كملنه طريقنه و آني الدوخة ما عافتني
***
ريان
رحت لغرفة فرات دخلت و لگيته نايم ، ضليت واگفه و صافنه عليه ، ليش ما حَبني؟ ، ليش حبها و ما حبني ، شنو الزود اليمها عني و هيچ أخذت عقله و گلبه ، سنين و آني أگول يجي يوم ينسى ميس و ممكن يحبني و هَسه راح و حَب عشق و يريد ياخذها ، أندار عليه و فتح عيونه ، حچه و هو مستغرب ...
- هاا ريان أكو شي؟
- لا بَس جيت أشوف خاف محتاج شي
- أريد مي إذا ماكو زحمة
ضليت ساكته و آني مركزة بشكلة ، شلون متغير حيل و المرض هاد حيله ، بعمري ما شفت فرات بهالحالة ، شگد مقهورة منه و بنفس الوكت مقهورة عليه ، حچه ...
- ريااان؟؟
- هااا إي رايحة أجيب
طلعت جبتله مي و رجعت ، أنطيته المي و رحت صادفتني عشق و آني طالعة من غرفته ، دحگت عليه بنظرات غضب ، عفتها و رحت
عشق
دخلت للغرفة و آني أحس الدم صعد لراسي من شفتها طالعة من غرفته ...
- هاي شعدها يمك؟؟؟
- منو؟
- أكوو غيررهااا ، ريياااان
- هاي شبيچ شكو !!
- شچانت تسوي يمك؟؟
- مادري گعدت لگيتها هنا ، گالت جايه تشوف إذا محتاج شي
- الحقيرة
- شبيچ وياها؟؟
- تدافعلها يعني؟!
- أنتِ شبيچ اليوم يولي؟!
- تمام مدامك متريدني أحچي على ريان ، آني رايحة
- ويين رايحة يولليي ، عشگ ، عشگ ، تعاااي
عفته ينادي وراي و طلعت ، رحت لغرفتي قفلت الباب و گعدت أبچي ، ليش يحچي وياها ، و ليش ميريدني أحچي عليها ، هو مو يحبني ، ليش هيچ يحچي وياي ، بقيت للظهر حابسة نفسي بالغرفة ، هواي دزلي رسائل و أتصالات بَس ما فتحتهن و لا رديت على أتصالاته ، آخر شي شلت الفون و فتحت رسائله ، چان كاتب ...
🗨️ وييينچ تعاااي
🗨️ بسس فهممنيي شبيييچ !!
🗨️ أحد مضوجچ؟؟
🗨️ آني مضوجچ؟؟؟؟
🗨️ يربچ ردييي لا تكفررينيي بالأسلام هَسه
و هواي داز رسائل ما قريتهن بَس قريت آخر شي چان كاتب ...
🗨️ عشگ تعاي لا تتعبيني ، تره آني من غير شي الدنيا طالعة من عيني ، لا تصيرين أنتِ و الوكت عليه ، آني تره اللي مهونها عَلي هو أنتِ ، وله چان من زمان طگت روحي
قريتها و رجعن دموعي نزلن ، مسحتهن و گمت نزلت جوه و رحتله ، دخلت و لگيته فاصخ المغذي و إيده على صدرة ديحاول يگوم ...
- أوگفف أوووگف هااي شدسوي ، مو الدكتور منعك من الحركة
رفع راسه و باوعلي ، حچه بتعب ...
- گلت بلكت تصير معجزة و أگدر أمشي و أروح أشوف شبيها عشگي
نزلن دموعي و حچيت ...
- أنت تعرف الحركة شگد خطرة على جرحك ، شفت قبل أيام شصار بيك ، فرات إذا يصيرلك شي من ورايه آني أموت والله
- أشش لا تبچين و أگعدي أحچيلي شبيچ
گعدت ، رد گال ...
- أمسحي دموعچ ما أحب أشوفهن
مسحتهن و آني أباوعله ، حچه ...
- يلا أحچيلي آني مضوجچ بشي؟
- لا بَس ضجت لأن حچيت ويه ريان
أبتسم و گال ...
- يعني السالفة غيرة
- مو بَس غيرة ، آني ماريدك تحچي وياها
- ليش؟
- هي تكرهني ، و أصلاً هي اللي حطت الفلوس بغرفتي مره لمن ضيعتوهن ، رادت تتهمني أنُ آني ماخذتهن
- الله عليچ؟؟
- وداعتك ، لذلك ماريدها تتقرب منك ، لأن هي تكرهني و ما أعرف شنو ممكن تسوي
- ليش تكرهچ؟
سكتت ما ردت أگُله تحبك و تكرهني لأنك رايدني ، حچيت ...
- ما أعرف
- تمام خلص ما أحچي وياها ، بَس أنتِ لا تضوجين
سكتت ما جاوبته ، رد گال ...
- أحبچ يولي ، أنتِ هنا بگلبي ، متربعة و گاعدة
أبتسمت ، گال ...
- تبسم يا حَبيبي ، ترا بَسمة الغالي من السُنة
نزلت راسي مبتسمه ، حچه ...
- أرفعي راسچ عشگي ، دحگي عليه
رفعت راسي أباوعله ، گال ...
- سبحان من حَط لون الفرات بعيونچ
- أحبك
- أعشگچ يـَ عشگي
أجاه اشعار لتيلفونه ، فتحه و ضحك ، أنطاني التيلفون و گال ...
- دحگي
أخذت التيلفون و باوعت شهم چان كاتب ...
🗨️ ولكم فتحو الباب أدري ميتين خوما ميتين صار ساعة أدگ بالباب
ضحكت و هو حچه ...
- روحي خلي أحد يفتحله الباب لا يهجج المنطقة تره هذا مسودن على گولته
- ههههه تمام
طلعت و رحت لـ صگر گتله و طلعو أستقبلوهم ، أجت مُهره و تسالمنه ...
- ولچ شبيچ وجهچ أصفر؟؟
- ردت أموت ولچ ، آني ما أگدر أسافر بطريق طويل بَس عجبني أجي ويه شهم و بالگوة قنعته
- والله لو ما مقتنع هواي أحسن على حالتچ هاي
- لچ گضه الطريق كُله صوچي آني جبتچ وياي و أنتِ نستله ما تتحملين
- ههههههه حقه والله
- أووووف إي طبگي وياه عليه
- لا لا آني وياچ ، روحي غسلي و آني أروح أسويلچ عصير يفيد حالتچ
- تمام
راحت مُهره تغسل و آني سويتلها عصير و رحت للصالة لگيتها گاعدة ، نطيتها العصير و حچت ...
- شلونه فرات؟
- زين الحمدلله ، بَس كلش مقهور لأنه ميگدر يمشي
- سودة عليه
أجت خالة نجاة و وياها ماما ، حچت خالة ...
- إي مُهره أحچيلي شلون شهم وياچ ، خوما يزعلچ؟
- لا عمه بالعكس شهم كلش زين وياي
- حَبيبي أعرفه أبن أخوي معدل
بهالأثناء دخل شهم و حچه ...
- سمعت أسمي هنا ، هااا عمه چنتي تحچين عليه مو؟!
- هههههه لا ولك ، چنت أگول شهم معدل
- هااا عبالي ، فرات وين؟
- هناك بالغرفة
شهم
عفتهم و رحت للغرفة دخلت و شفت فرات ، گُبل رحت و حضنته ، شگد چنت خايف أنه يموت و يعوفني ...
- شلونك فراتي؟
- بشوفتك آني زين
- چنت رايد أبقى يمك لحد ما تصحى و أتطمن عليك ، بَس أنت تعرف السالفة
- لا يهمك حَبيبي آني أعرف ، ما تحسنت علاقتكم؟
- آخخخ ولك ، شلعت گلبي يلا سمعت منها كلمة أحبك
- هههههههه ، المهم سمعتها
- إي و العباس
- يلا لعد ننتظرك تصير أب إن شاء الله
- ههههه الله كريم
- دايم كريم
- ولك شو متغير أنت ، المرض لو الحب اللي غيرك؟
- آني لو ما الحب هو مصبرني چان ودعت من زمان
- هههههههه ، لازم أكو تطورات آنـه مالي علم بيها؟
- إيي والله
حچالي السالفة كُلها ...
- يعني و أخيرًا راح نشوفك عريس ولك
- هَسه خل يرجعلي حيلي و يصير خير
- يرجع وداعتك يرجع ، و أوعدك غير ألعب بعرسك چوبي محد لاعبه قبل
- هههههه تنشوف
- عاد تعرفني آني و الچوبي شنو ، قصة عشق لا تنتهي
- ذكرتني بأيام المراهقة
- وداعتك غير أرجعها بعرسك
***
رُسل
واگفه جاي أعزل بملابسي ، أنفتح الباب و دخل صگر ، جه يمي و حضني من وره ، حط إيديه على بطني ، حچه ...
- شلونه وليدي و أمه
- وليدك متعبني
- أنعل أبوه
- هههههههه تسبه و أنت أبوه !!
- ميخالف عادي
أنداريت عليه و حطيت إيدي على وجهه ، حچيت ...
- حَبيبي
- عيونه
- إريدك تاخذني للسوگ علمود نجهز ملابس سيوفي
- مو بعد وكت؟
- أحسن أريد أخلص من ملابسه و أحضرهن من هَسه
- من عيوني
- تسلم عيونك يگلبي
- شوكت تجيبين و نخلص ، أحس هذا الزعطوط مشاركني بيچ
- هههههههه ميخالف يـَ گلبي أصبر
- شيصبرني متگوليلي
گال هيچ و طلع ، و آني رجعت أرتب بالملابس
صگر
طلعت و رحت لـ فرات ، أخذت الكُرسي المتحرك حَتى يطلع شوي ميضل بالغرفة ، دخلت و بَس شافه صاح ...
- صگر طلعه عفيه
- ليش يول ، جبته تا تطلع بره شوي خوما تضل محبوس بالغرفة !!
- طلعه صگر من أشوفه أكره نفسي ، أضل محبوس و لا أشوفه
- زين زين
طلعته و رجعته بمكانه ، رجعت لـ فرات ...
- تعال گوم وياي
- شگوم؟؟
- أنطيني إيدك ، گوم حاول تمشي و آني وياك ، ميصير تضل گاعد
- مگدر صگر مگدر
- لا تگدر فرات والله تگدر ، أنت بَس أنطيني إيدك و خلي الباقي عليه
أقتنع و أنطاني إيده ، گدر يحرك رجليه شوي ، بهالأثناء دخل شهم ، شافه و جه عليه ...
- و آني وياك هَم أنطيني إيدك
- شوي شوي أستند علينه
ساعدناه و گدر يگف شوي على رجليه ، حچه ...
- هاهيه بَعد مگدر تعبت
- زين زين
شهم : صلوات على مُحمد و آلِ مُحمد ، إذا هالمرة گدرت توگف المرة الجاية تمشي إن شاء الله
صگر : بالضبط
- إن شاء الله
- منا و رايح كُل يوم أجيك نمشي شوي آني وياك
- ليش محسسني آني طفل توه يمشي !!
گال هيچ و طگيناها ضحكة آني و شهم و هو صافن و يتوعدلنه
***
نَفس
واگفة داسگي بالورد ، كملت و أنداريت ، فزيت من شفت رافد واگف مچتف أديه وره ظهرة و يباوعلي و يبتسم ...
- أنت متبطل سوالفك؟؟
- يا سوالف
- فززتني
- هههههههه
- روح رافد ، أخاف أحد يشوفنه
- تره مشتاگ آني
- طول الوقت گدامك وين تلحگ تشتاقلي
- مشتاگ أحچي وياچ ، أسمع صوتچ و أشوف ضحكتچ ، مشتاگ لنظرة عيونچ ليه ، الشوگ ذابحني نَفس
- آني هَم أشتاقلك والله ، بَس أخاف أحد يشوفنه ، خصوصًا آني غريبة هنا
- أنتِ مو غريبة نَفس ، أنتِ صرتي كُل أهلي و ناسي
- أبقى غريبة رافد ، و أنتو تفضلتو عليه و لميتوني ببيتكم و يگُلك يا غريب كون أديب ، لذلك آني لازم أنتبه لتصرفاتي زين و ما أتخطى حدودي
زفر هوا قوي و فرك وجهه مستاء من اللي گلته ، حچه ...
- هَسه ليش تحچين هيچ
- هاي الحقيقة رافد و ما لازم نتجاهلها أو نغفل عنها
- بَس آني أحبچ
- أعرف ، و آني هَم أحبك ، بَس الحُب ما يشفعلنه لو أحد فهمنه غلط
- دحگي آني أگدر هَسه أگُلچ خلينه نخطب و نقطع مهر ، بَس آني ماريد فترة الخطوبة تطول
- و ليش تطول؟!
- آني جاي أمشي بشغلي ، أريد ألم چم فلس و ساعتها نتزوج ، ماريد أبوية هو يزوجني بفلوسه و آني عندي شغل و أشتغل ، من زمان چنت مقرر زواجي كُله من فلوسي و تعبي من البداية للنهاية
- بَس هذا ما يمنع أنُ نكون مخطوبين رسمي و گدام الناس ، أحسن من هاي اللقاءات اللي بالتختل
- ما أگدر هَسه نَفس
- أنت إذا رايدني صَحيح مترضالي الحچابة الموزينة
گلت هيچ و عفته و مشيت ، هو بقى واگف و يباوع عليه ، معقولة ديضحك عليه و مو صادق وياي لذلك ميريد يخطبني !!
***
مُهره
طلعت من الهول و صار بوجهي شهم ، جرني من إيدي و قربني عليه ...
- أشتاقيتلچ
- شهم شبيك عيب ليشوفنه أحد
- محد يشوفنه كُلهم نايمين
- والله متستحي أنت
- ههههههه ، شلون صرتي حَبيبي؟
- الحمدلله ، آني بَس من أمشي بطريق طويل يتخربط وضعي
- مو نستله
- شهههممم
قرب وجهه عليه كلش ، و همس ...
- آني أحب آكل نستله تره
- يبووو دوخر راح تفضحنه أنت
عفته و رحت و هو يضحك ، رحت طلعت بره لگيت عشق دتخابر ، سدت التيلفون شافتني و أجت عليه ...
- هااا چنتي دتخابرين الحُب مو
- لچ موتني يريدني طول الوقت يمه
- حقه غير يحبچ
- آني هَم أحبه ، بَس عيب شيگولون علينه العالم من أبقى 24 ساعة يمه و أحنه ماكو بيناتنه شي رسمي
- و شوكت تصير علاكتكم رسمية؟
- بَس يتحسن وضع فرات ، هَسه مجرد حچي بين الأهل
- هااااا
- إيي ، هَسه گوليلي أنتِ ، ماكو شي جاي بالطريق منا منا
- لا ولچ شسالفة ما صارلنه هواي من تزوجنه
- أمممم
***
مُهره
بقينه بالأنبار يومين و بعدين رجعنه للبصرة ، مَر شهر تقريبًا و أحنه گاعدين ، نفس الروتين و حياتنا هي هي ، حيدر و جماعته مجاي نسمع عنهم شي أبد
گاعدة بالحديقة و چان يندگ الباب ، گمت حَتى أشوف منو ، شهم منبهني ما أطلع للباب بَس آني هنا قريبه و گلت أشوف منو ، رحت وگفت يم الباب و صحت ...
- منووو؟؟
محد حچه ، فتحت الباب ما چان موجود أحد ، فجأة طلع بوجهي رجال ضخم و طويل و ملثم بشماغ ما مبين كلشي من وجهه ، دفعني لداخل الحوش حاولت أقاومه بَس ما گدرت ، طلع مدري شنو من جيبه و رشه على وجهي ، و طحت ما حسيت على شي
***
عشق
فرات تحسنت حالته و گام يگدر يمشي بَس مو حيل ، يمشي خطوات و بسرعة يتعب ، صگر و رافد ما عافو وياه لحظة بلحظة
گاعدة دانطي بالعلاج مالته و أجه صگر ...
- يلا عيني شنو متمشي اليوم؟
- لا شلون ، أمشي
- عَجل يلا
گام من وحدة من الچرباية ، بَس بالوگفة أله ساعدة صگر ، حچه صگر ...
- شنو رأيك اليوم نطلع نمشي بالصالة مو بَس بالغرفة؟
- خاف ما أگدر
- لا تگول ما أگدر فرات ، تگدر صدگني
رفع راسه يباوعلي ، أبتسمت و هزيتله براسي ...
- تمام يلا
گاده صگر و طلعو يمشون للصالة ، أجه خالو علي و فرح كلش لمن شاف فرات واگف على رجليه
- الحمدلله وليدي ، الله أستجاب دعائي
- الحمدلله يابة
و طلعت خالة نجاة و شافته و صارت تهلهل و أجت تحضن و تبوس بي ، طبعًا مچان أحد يدري أنُ فرات يگدر يمشي هاي الفترة كُلها صگر يجي للغرفة و يحاول يخلي يمشي ولو شوي ، بَس اليوم طلع للصالة حَتى يمشي أكثر ...
نجاة : يمه والله چنت مفكرة بَس تگوم على حيلك آخذك و نروح زيارة لأبو الحسنين سلام الله عليه
- ميخالف يوم بَس يتحسن وضعي أكثر آني آخذچ بإيدي
- إن شاء الله ماما
عَلي : يلا كافي أبني تعال أرتاح مبين تعبت
آخذه خالي و گعد ع القنفه ، حچه ...
- لعد وين عَمي؟
- عَمك ملتهي بطلابة المحلات الحترگت
- ليش ليهساع ما رممتوهن
- أمبله العمال جاي يشتغلون بيهن
- و المكتب مال المعرض شصار عليه؟
صگر : هذا عليه آني ، هَم جبت عمال و جاي يشتغلون بي يومية أروح أشوفهم
- إي خوش عَجل
***
شهم
رجعت من الشغل للبيت ، طبگت السيارة و نزلت ، أنتبهت باب الحوش مفتوح ، شسالفة شلون يخلونه مفتوح ، رحت و دخلت ، أول ما دخلت شفت مُهره طايحة ، رحتلها أركض ...
- مُههررره ، مُهررره حَبيبتيي هاااي شبيييچ
ولچ مُهررره جاوبينيي !!
متجاوب و وجهها مگلوب أزرگ تسودنت ، شلتها و رحت للسيارة حطيتها بصفي و توجهت للمستشفى ، گلبي يرجف عليها ، طول الطريق أحاول أصيحها بَس متقبل تصحى كأنها ميته ، وصلت للمستشفى و نزلت ، صحت الكادر الطبي و أجو أخذوها و دخلوها للغرفة ، ضليت أنتظر و گلبي يدگ سريع و دگاته جاي تأذيني ، شصارلها؟ ، ليش هيچ حالتها ! ، شوي و طلعتلي الدكتورة ...
- المريضة متزوجة لو عزباء؟
- متزوجة
- و حضرتك شِنو تقربها؟
- زوجها آني دكتورة
- تمام
- لحظة دكتورة فهميني شبيها؟
- لسه منعرف خلينه نسويلها فحص شامل ، إن شاء الله خير
رجعت دخلت للغرفة و آني ضليت أنتظر ، أحس گلبي شاعلة بي نار عليها ، طلعت التيلفون و بلغت الأهل و ضليت أنتظر فوگ الساعة أجو عَمي و مَرت عَمي و وياهم أبوي و گعدو ينتظرون وياي ، طلعت الدكتورة ...
- هااا دكتورة طمنينا؟؟
- المريضة متعرضة لحالة تسمم
- بَس دكتورة هي ما ماكلة شي من البارحة و دائمًا چانت تدوخ و تلعب نفسها
- مو بالأكل ، هي مستنشقة مادة سامة ، لذلك صار عدها تسمم
حسين : زين دكتورة هَسه شلونها؟؟
- لا الحمدلله هَسه وضعها تمام و گدرنا نمنع السم من الأنتشار بكُل جسمها
- الحمدلله
- بَس أكو شي ثاني
شهم : شنوه؟؟
- مبارك زوجتك حامل
- حاامل؟؟؟
- إي نعم
- زين خوما يأثر هالموضوع ع الحمل؟
- حاليًا لا ، لأن الحمل ببدايته و الجنين بعده ما متكون حَتى يتأثر بالأمراض اللي تصيب الأم ، بَس ممكن بعدين تواجه صعوبة بالحمل بسبب أثر السم بجسمها
راحت الدكتورة بَعد ما فهمتنا كلشي ، أبوي و عمي باركولي و عمتي طايرة من الفرح ، بَس آني ما أگدر أفرح أله أشوف مُهره و أتطمن عليها و أتأكد أنُ ماكو شي يضرها ، شوي و گالو نگدر نشوفها ، دخلنه و چانت صاحية بَس تعبانة كلش ، گعدو عمي و عمتي يمها و صارو يحچون وياها و هي فرحت من شافتهم ، شوي و گالو نرجع للبيت من تطمنو عليها ، طلعو و طلع أبوية وياهم ، بقيت آني جريت كرسي و گعدت يمها ، بستها من راسها و حطيت إيدي عليه ...
- الحمدلله ع السلامة حَبيبي
- الله يسلمك
- حيييل خفت عليچ
- لتخاف يـَ گلبي آني زينة
- مبارك يـَ بعد روحي ، راح تصيرين أم
- هاااا ؟؟؟
- أنتِ حامل حَبيبتي
- تحچي صدگ؟؟؟
- وداعت عيونچ
- يعني آني وياك حنصير أم و أب
أبتسمت و وخرت شعرها عن عيونها ، حچيت ...
- إن شاء الله حَبيبي
- يااا الله ألف الحمدلله و الشكر ، شهم حيصير عدنه طفل مستوعب هالشي؟!
- هههههه إيي يروحي
- بَس شو أحسك مو فرحان؟!
- بالعكس كلش فرحان ، بَس خفت عليچ و ضاعت الفرحة
- هاااا عبالي
- مُهره أحچبلي شنو صار وياچ بالضبط ، يگولون صاير عندچ تسمم
صفنت ثواني تفكر ، رجعت حچت ...
- چنت بالحديقة لوحدي و أندگ الباب و رحت أشوف ، گلت منو محد جاوب ، فتحت الباب و چان يطلع بوجهي رجال ضخم ، دفعني لداخل الحوش و رش على وجهي مادة ما أعرف شنو و بعدها طحت و ما حسيت أله و آني بالمستشفى
- تحچين صدگ أنتِ؟؟؟
- إي و العباس
- و ما عرفتي منو؟؟
- لا چان ملثم كلشي ما مبين من وجهه
گمت على حيلي لزمتني من إيدي ...
- وين رايح؟؟؟
- رايح أشوف هذا يا گو** متعدي علينه و حاول يأذيچ
- فدووة شهم لا تروح و تعوفني الله يخليك
- مُهررره هدييي إيديي
- فدووة رحتلكك شههم ، ع الأقلل أنتظر لحد ما يتحسن وضعيي فدووة لا تروح و تخليني هناا بدونك
- أووووف
فركت وجهي و گعدت و آني الدم واصل لراسي ، منو هذاا الحيوووان ، لليل و طلعناها للبيت ، طلعت أشوف كامرات المراقبة بَس الحظ سواها و بهذاك الوكت چانن طافيات ، عفت الموضوع و رجعت لـ مُهره ...
- هااا لگيت شي؟؟
- أنتِ أرتاحي و لا تدوخين راسچ بهالأمور
- يعني ملگيت شي؟
- الكامرات چانن طافيات و ما متسجل شي
- حرامات
- وداعتچ غير ألگفه هذا الكلب أبن الكلب
- تعال يمي
نزعت الشماغ و العگال و وخرت الغطى و تمددت بصفها ، حضنتني و خلت راسها على صدري ، حچت ...
- خلص حَبيبي أنسى و خلينه نفكر بمستقبلنه ، گلي شنو تتمنى يكون جنس الجنين؟
- بنيه
- بَس آني أريد ولد !!
- ههههههه ، يمعودة هَسه بَس خل يجي بخير و سلامة مو مهم ولد لو بنيه
- بَس آني عندي أحساس أنُ حيكون ولد
- الله أعلم
- زين إذا طلع ولد شنو نسمي برأيك؟
- أممممم ، الياس ، نسمي الياس ، شنو رأيچ؟
- كللشش حلووو ، خلص إذا طلع ولد نسمي الياس
- زين و إذا طلعت بنيه شنسميها؟
- ما أعرف ما ببالي أسماء بنات
- ديلا نامي هَسه اليوم تعبتي ، بعدين ندور أسماء
دفنت راسها بصدري ، گالت ...
- شهم دفيني بردانة
- أبشري ، أدفيچ بضلوعي لو جاس البرد عَظمچ
غطيتها و حضنتها حييل لحد ما نمنه .
***
نَفس
طول هاي الفترة و آني ما أحچي ويه رافد و من أشوفه أبتعد عنه ، و هو متخبل من تجاهلي أله ، بالليل يگضيها مراسلات و آني أجاوبه بكُل برود و هو يشتعل بنار من برودي ، يتصل و أرفضه و ما أحچي وياه نهائيًا
و بيوم ، آني بالديوان دارتب بي وحدي و ما منتبهه ، فجأة فزيت على طبگت الباب ، أنداريت و لگيت رافد واگف يم الباب و يباوعلي ، قفله و أجه يمشي بأتجاهي ...
- شدسوي هنا أنت و ليش قفلت الباب أفتحه بسرعة؟؟
وصل يمي و لزمني من إيدي و حچه و هو صاك على سنونه ...
- أنتِ نااااوييهه تخبليينييي ، هاااا يوليي؟؟؟
- رافد عوفني شبيك ، فدووة أفتح الباب و خليني أطلع ليجي أحد و يشوفنه
- أسمعي يـَ بنيه ، أنتِ ليه غصبًا عنچ ، آخذچ يعني آخذچ أفتهمتيي؟؟؟؟
- راافد شبيييك
- أنتِ اللي شبيييچ هااا؟؟؟
سحبت إيدي منه و حچيت بعصبية ...
- أنت متحبني صَحيح و دتحاول تضحك عليه و تسألني شبيچ؟؟!
- ياابة منو اليضحك عليچ؟؟
- أنتتت
- يابة و القرآن و وداعت أبوية أحبچ و ما حبيت أحد بگدچ ، آني أعترف چنت يوميه ويه بنيه و ألعب لعب و ما أحب من صدُگ ، بَس أنتِ غير نَفس غييير أفهميي يـَ بنت الناس آني مو بَس أحبچ آني هاايم بيچ
- چذاااب ، أنت چذاااااب
فرك وجهه بقهر و زفر هوا قوي ، حچه ...
- شلون تريديني أثبتلچ حُبي؟؟
- بالحلال رافد بالحلال مو بالتختل
- صار ، آني أحچي ويه أبوية بهالموضوع
***
مُهره
مَرت الأيام و آني الحمل كلش متعبني ، نساتي متعبة و تضَوج ، أجتنه بنت أخت عمه فاطمة ، حتبقى يمنه فترة لأن أهلها طالعين خارج العراق علمود العلاج و هي دراستها هنا متگدر تعوفها ، سلمت عليها و شو هاي تحچي من وره خشمها و تباوع عليه من فوگ الى جوه ...
سالي : أنتِ زوجة شهم صَح؟
- إي
ما أرتاحيتلها صراحة ، تضحك و تحچي ويه شهم بكُل أريحية و لا كأنو تعرف أنُ هو متزوج و نظراتها أله مو راحة ، گام شهم راح للمطبخ ، و رحت وراه لگيته ديشرب مي ، شافني و حچه ...
- هااا حُب رايدة شي؟
- هاي بنت خالتك مو راحة
- ليش؟
- ما أدري بَس ما أرتاحيتلها كلش ، لا تحچي وياها و تتقرب منها
- هااا بدينه بالغيرة
- إيي أغاار أغااار تمام ، لا تحچي وياها
- هههههههه ، صار يدلل دنفوش
گال هيچ و راح للديوان ، يسميني دنفوش لأن هالفترة زاد وزني شوي ع الحمل و مبين عليه السمن ، رحت لغرفتي أرتاح شوي ، گعدت أگلب بالفون و دگيت على ماما حچيت وياها و سألتني عن وضعي ، صار وقت علاجي ، گمت دورته حتى آخذ بَس ما لگيته ، تذكرت أني ناسيته بالمطبخ ، شلون عقل صاير عندي ، ما أدري شلون راح يساعدني بالدراسة من أرجعلها ، نزلت جوه للمطبخ ، شفت الباب مردود و مبين شهم واگف جوه و أنتبهت سالي وياه ، چانو يحچون ، أنصدمت لمن سمعت سالي تگله ...
- وين حُبك وعودك و كلامك أليه شهم؟؟ ، والله آني كلش أحبك ...
********
يتبع ...
هاااا شبابنا الطيبة شلونكم🙂💞
إييي شسمه شلونها القفلة🌚
المهم يابة شوفوني تفاعلم الحلوو اليطگ بالگاع و لا تنسون التعليق بين الفقرات و التصويت هذن حييل مهمات + تعالو أحچي وياكم بموضوع مهم قبل ما أروح ، بعد ما نكمل "عشگ الفرات" ، شتحبون نبلش بشنو ، "عشگ الفرات الجزء الثاني" لو قصة جديدة راح يكون أسمها "جمر قلبي" و حاليًا كاتبة منها المُقتطف ، تحبون أنزللكم ياه و تشوفونها و تنطوني رأيكم و بهذا الوكت نقرر بشنو نبلش؟؟
يلا أكتبولي آرائكم بعد گلبي
تعالو أنستا
18.kij
سحر الدليمي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!