- عشگتچ و العشگ بلوة
و ضيعت روحي بعيونچ الحلوة
***
مشيت بس أمشي بطيئ لأن مگدر من رجلي ضليت أمشي و أمشي ، لحد ما وگفت بعد ما أگدر ، گعدت و خليت البنيه بحضني ، حرت شسوي شلون أنقذها النزيف راح ياخذها ، شوي و وگفت سيارة و نزل منها زلمة جه علينه و گال ...
- خير أبني شصايرلكم؟!
- عمي بلا زحمة تگدر تاخذنه للمستشفى ، البنيه مُصابة و إصابتها خطرة
- أي اكيد
جه وياي ساعدني و صعدت البنيه بالسيارة و تحركنه للمستشفى ، وصلنه و نزل الزلمة نادة الكادر الطبي و جو أخذو البنيه و نزلت آني ، ويه ما نزلت وگعت و ما حسيت بعدين
فتحت عيوني ، لگيت نفسي بغرفة عرفت انو آني بالمستشفى ، ركزت زين شفت عُثمان واگف و داير ظهرة ، صحته ...
- عُثمان
التفت و جه عليه ...
- صگر ، الحمدلله ع السلامة
- الله يسلمك ، شبيها أيدك؟
- غير انصابيت بالأنفجار
- شصار وره ما انفجر البيت احچيلي!
- شصار والله يخوي ، نص جماعتنه جرحى جبناهم هنا ع المستشفى ، أربع ولد للأسف أستشهدو
- لا إله ألا الله ، الله يرحمهم ، و راضي الكلب و جماعتة شصار بيهم؟
- ثنين منهم ويه هذا الفجر ماتو ، و الباقين أنهزمو
- أيا حيوانات ، عبالهم خلصو مصيرهم ينگضبون
هنا تذكرت البنيه!! ، فزيت على حيلي و حسيت بوجع برجلي
- هاي شبيك صگر على كيفك
- عُثمان البنيه البنيه الچانت وياي وينها؟
- البنيه وضعها زين الحمدلله بس بعدها مو صاحية
- الحمدلله
ثاني يوم الصبح حسيت نفسي أحسن فـ رحت حتى اشوف البنيه و اعرف شنو سالفتها ، رحت سألت الدكتور و سمحلي اشوفها ، دگيت الباب و سمحتلي بالدخول ، دخلت و أول ما شافتني رفعت راسها و عدلت گعدتها ، جريت كُرسي و گعدت گبالها ...
- الحمدلله ع السلامة اختي
- الله يسلمك
- شلونچ أن شاء ألله احسن
- الحمدلله أحسن
- زين ، عادي أسألچ كم سؤال و تجاوبيني؟
- أي تفضل
- بالبداية انتي شسمچ؟
- أسمي نَفس
- زين منين؟
- آني شيعية
- ههههه يابة ما سألتچ على مذهبج ، قصدي منين من يا منطقة يا محافظة؟
- من كربلاء المقدسة
- و النعم والله
- هاااا ؟!
گلت بصوت ناصي ...
- عفيه ع الفهاوه
- شنو شگلت؟
- مو شي ، هسه گوليلي شنو سالفتچ شلون صرتي بأيد راضي و چلابه؟
دنگت راسها حسيتها راح تبچي ، بعدين رفعته و بدت تحچي ...
- آني يتيمة أمي و ابوية ماتو بحادث من چان عُمري 15 سنة و رحت أعيش يم خالتي لأن ماعندي غيرها و زوجها چان موزين وياي دائمًا يضربني على اتفه الأسباب ، هو يشتغل ويه راضي كُلها شغلات خارجة عن القانون ، و بيوم باگ من راضي فلوس و صرفهن كُلهن ، المبلغ جان شوي چبير و راضي عرف انو هو اللي باگهن و اجه ع البيت و هدده لو يرجع الفلوس لو تنطينه البنيه العندك ، يقصدني آني ، زوج خالتي ما تردد أبد كُبل نطاني الهم و همه أخذوني لديالى و حبسوني بالغرفة و بعدين جيتو أنتو و خلصتوني
- زين همه حاولو يعتدون عليچ؟ ، أحچيلي إذا حاولو يسون هالشي
- لا أبد بس حابسيني بالغرفة ، ما أعرف شيردون مني
- زين ، انسي كُلشي ، انتي هسه بأمان ان شاء ألله
- توقعتك عفتني و رحت ، ما توقعتك باقي وياي بالمستشفى!
- آني من اول ما فكيت چتافچ صرتي من مسؤوليتي فـ شلون تريديني أعوفچ
- شُكرًا
- العفو ، ما سويت غير الواجب ، زين هسه أنتي أكيد ما تريدين ترجعين لبيت خالتچ؟
- لا مستحيل والله أبقى بالشوارع و لا أرجع لهذاك البيت
- زين عجل ماكو غير آخذچ وياي لأهلي بالأنبار
- يعني أنت سني؟
- يابة أنتي شسالفتچ ويه المذاهب ، هسه شيفرق سني شيعي كُله نفس الشي
- هسه جاوبني فدوة سني لو لا؟
- أستغفر الله ، أي يابة سني أرتاحيتي ، هسه گوليلي تروحين وياي لو لا؟
- هاااا مو أخاف!
- من شنو تخافين يعني؟
- مو يگولون الأنبار بيها داعش و تخوف
- لا خالي ماكو داعش هسه طلعو من زمان ، و هسه الأنبار آمنة و كُلشي مابيها و الكُل يزورها من كُل المحافظات
- تمام أصلاً ماعندي مكان أروحله غير وياك
- زين عجل
مَرت أيام و أحنه بالمستشفى أنتظرت لحد ما يتحسن وضع البنيه ، و عُثمان ضل وياي ، طلعنه من المستشفى و بوجهنه للأنبار .
عودة للحاظر ...
- يمه وليدي الحمدلله ألله نجاك منها
- الحمدلله يمه
علي : بس أحنه ما گالونه منفجر البيت ، گالو احتمال ماخذينهم رهائن
- اي يابة مو همه ما رادو يخوفونكم و همه ما متأكدين إذا آني ميت لو عايش
- الحمدلله على كُل حال
نجاة : بنيتي نَفس ، لا تحسين نفسچ غريبة بيناتنا و تگولين ماعندي أهل ، تره أنتي هنا بنص أهلچ
جسام : أي بنيتي مثل ما گالت خالتچ
نَفس : تسلمون و شُكرًا كلش هواي لأنكم حسبتوني وحدة من عدكم
رُسل
متت من حچه صگر اللي صار وياه بديالى و شلون أنقذ هاي البنيه و شالهاا اييي شالههااا و آني گاعده هنا و أندب حظي أمداني ، و هي البنيه حلوه أكيد باچر راح يتزوجها عليه و تصير ضرتي لا لا مستحيييل والله أموته إذا سواها ، أحس فار دمي بعد ما أگدر گمت صعدت لغرفتي خاف أچفص گدام الوادم آني من أعصب ما أگدر أگضب لساني ، ضليت رايحه راده بالغرفة و أحس نار مشتعله بصدري ، شوي و أنفتح الباب و دخل صگر ...
- هاا عُمري شبيچ؟
دحگتله بطارف عيني و ما جاوبته ، رجع گال ...
- شبيچ رُسل؟!
بعد ما أتحمل انفجرت بوجهه ...
- أيييي تررريييددد تتززوج ععليييه موو صگررر
اشو هذا هدها ضحكة!! ...
- ههههههههههه ، هاي منيلچ هالكلاوات بعد گلبي
- موو كلاوااات أنتتت جبتتت هااي نَفس مددريي شسمههاا تاااا تتزووجههااا عللييييه!!
- بس حسچ على كيفچ و أهدي خل نتفاهم
- وخرر عنيي آني مزاعلتك
- لا والله؟!
- والله العظيم
- أيييه شسوي يعني لازم أراضيچ هسه
دايرتله ظهري يعني هو ورايه ، حسيت بي راح ع الباب قفله طگتين و جه عليه ، دارني عليه و حضني لزگني عليه ، حاولت أفلت من عنده بس لا جدوى حاضني قوي ، فتح شعري و خلاه ليوره ، نزل على رگُبتي و باسني بوسه خفيفة منها و شمها ، گال بصوت ناصي ...
- مشتاگلچ يولي
جاوبته و آني أحس صوتي بالگوه يطلع ما أدري يسمعني او لا ...
- و آني هم حبيبي
يحچي و هو دافن راسه بركُبتي و حاضني ...
- گلتيلي زعلانه هااا؟
- لا منو گالك
- ما أدري سمعت هيچ شي
بعد عني و لزمني من أيدي و أخذني للچرباية ...
( أأأ أحم ، أصبلكم گهوه وياي بعد عُمري😂🌚 )
***
مُهره
صار ساعات و أحنه ننتظر خبر من عمو سلام و هو ما أتصل و لا حتى دز رسالة و بابا و عبدالله من ندگ عليهم نفس الشي ميجاوبون ، عمة فاطمة تلوب و آني گلبي گام يلعب ، أجن يامور و رقية من سمعن اليوم عملية أخوهن ، گالن راح نضل هنا لحد ما يجي شهم و نتطمن عليه
***
عبدالله
خلصت العملية و طلعو شهم و خلو تحت المراقبة ، أجه دكتور عُمر حتى يفهمنه على وضعه ...
سلام : هااا دكتور طمني نجحت العملية لو لا؟!
- أبشركم العملية نجحت الحمدلله
- أوووف الحمدلله ، الحمدلله و الشكر
حسين : الف الحمدلله
عُمر : بس بقى شي واحد خايفين منه!
هنا أختفت الأبتسامة عن وجوهنه ، گال عمي حسين ...
- خير دكتور شكو؟
- أكو أحتمال يصير عنده فقدان ذاكرة لأن مثل متعرفون العملية ما چانت هينة و ممكن تسببلة أضرار و الأضرار هاي أنو يفقد ذاكرته!
عبدالله : دكتور أتوقع طبيعي هالشي وره هيج نوع من العمليات انو يصير عند المريض فقدان ذاكرة مؤقت
- أي بس أحنه بعد منعرف إذا مؤقت او لا و إذا چان جُزئي او كُلي
سلام : زين عُمر و الحل
- باوع سلام گتلك هذا مُجرد أحتمال ، فـ هسه راح يبقى نايم 24 ساعة و وره ما يصحى راح نعرف إذا صار عنده فقدان بالذاكرة أو لا ، يعني منگدر نتصرف اي شي حاليًا
- زين شوكت نگدر نشوف؟
- هسه متگدرون ، وره الـ 24 ساعة تگدرون تشوفونه
***
مُهره
گاعدين على أعصابنا و ملينه من الأنتظار ، شوي و دگ فوني باوعت اللي يتصل عبدالله ، بسرعة فتحت خط ...
- الووو وينكم عبدالله حرگنه الموبايلات حرگ عليكم محد يجاوب عايفينه هنا على أعصابنا
- على كيفچ على كيفچ أهدي شوي
- أوكي هدأت ، گلي هسه شهم شلونه شصار؟؟
- قبل شوية طلعو من العملية و الحمدلله عمليته نجحت
- عليك العباس تحچي صدگ؟؟؟؟
- أي والله چا أچذب
- تمام يلا باي اروح ابشر عمتي
- الله وياچ
رحت أركض مثل الخبلة فتحت الباب و دخلت غرفة عمة ، جانت توها مكمله صلاة و جاي تسفط بالسجادة ...
- عممه البشااارة
- شكو ولچ؟!
- عملية شهم نجحت
رجعت عمه تصلي و تتحمد الله ، و آني هم تحمدت ربي و فرحت كلش ، بعد ما چان شهم مأيس انو تنجح العملية و رافض يسويها الحمدلله سواها و نجحت رحت ابشر يامور و رقية خطية ، يامور اول ما سمعت طفرت حضنتي أباوع لرقية خطية متگدر تگوم لانها حامل و بطنها گدامها هههههه
***
نَفس
أجيت ويه صگر للأنبار و آني خايفة و ما أعرف شنو حيصير وياي ، بس من شفت تعامل اهله وياي و شلون حاطيني على راسهم ، هذا الخوف كُله ما أعرف وين راح و تحمدت ربي لأن وگعت بين هيچ ناس وردة مال ألله ، بس زوجة صگر ما أعرف شبيها تباوعلي بنظرات ما عرفت افسرها و حتى ما حچت وياي ، عكس عشق اللي من وصلت لحد هسه ما فارگتني
واگفة ويه عشق بالمطبخ دتسوي عصير ...
عشق : نفس حبيبتي تريدين أحسب حسابچ بالعصير؟
- لا عمري سُكرًا ماريد
- أمممم ، عادي اسألچ كم سؤال ، لأن آني فضولية و ما اتحمل هههههه
- ههههه عادي خيه سألي براحتچ
- أنتي شگد عمرچ؟!
- عمري 25 سنة
- هااا حلووو ، زين أهلچ وين؟
- حسيت بغصة من سمعت طاري أهلي بلعتها و ، حچيت سالفتي كُلها لـ عشق ...
- يااا ، الله يرحمهم حبيبتي ، و هذا زوج خالتچ الله ينتقم منه بجاه النبي
- آمين يا رب الله يسمع منچ
- زين خالتچ ما جانت تحاول تمنع زوجها من أنو يضربج و لمن نطاچ لذوله المجرمين
- متگدر لأن هي كلش تخاف منه لدرجة تسوي كُلشي يگوللها عليه و متعارضه بشي
- المهم خلصتي منهم هسه ، و صار عندچ أهل و آني أختچ و أمي هي أمچ و الولد هنا مثل أخاونچ
- أصلاً الشي الزين الوحيد اللي صارلي من هاي المعمعة كُلها أنو تعرفت عليكم
- بعد عمري ، زين هسه خل نودي العصير لـ خوالي هسه أتأخر عليهم و أحصل رزالة
- ههههههههه يلا أمشي لعد
عشق
طلعت للصالة وديت العصير لـ خوالي و رحت وديت گلاص لأمي و أجيت رجعت الصينية للمطبخ و هذا كُله و نَفس وياي مفارگتني ههههه خطية بعدها ممتعودة ع البيت ، أجه ببالي أنو نطلع نگعد بالحديقة الجو حلو ...
- نَفس شنو رأيچ نطلع نگعد بالحديقة؟!
- اي نطلع ليش لا
طلعنه آني و نَفس ، و آني مدنگة و أمشي داريد أطلع من الباب و ما أحس الا أنضربت برجال ، آني چنت أمشي سريع و هو هم ، رفعت راسي داريد اشوف منو ، باوعت و شفته فرات چان ديخابر و من رفعت راسي عليه نزل الفون من أذنه ، توقعت هسه يگوم يحچي و يصنف عليه مثل عادته ، بس صار العكس بقى واگف بمكانه و يباوع عليه احسه ديتمايز شكلي لأنه مستمر صافن عليه ، و آني هم ما أدري شبيه بقيت منبته عيوني بي و ما حچيت و لا كلمة ، الى ان تحمحمت نَفس و گالت ...
- احمم ، يلا عشق خل نطلع
أنتبهت لنفسي و رحت ويه نَفس و هو تعدانه و طب للبيت ، گعدنه ع الكراسي و آني نظرات فرات لسه مراحت عن بالي ، گالت نَفس ...
- أحم ، شكله أكو شي بينچ و بين فرات
- شي مثل شنو يعني؟!
- يعني حُب و هالأمور
- هااا لا شنو ما بيناتنه شي يمعودة!
- عادي خيه إذا ما تردين تحچيلي براحتچ
- لا ولچ مو هيچ ، بس والله ما بيناتنه شي
سكتت نَفس و آني هم سكتت ، وره شوي رجعت گلت ...
- أنتي ليش فكرتي هيچ؟
- ما أعرف بس شفت نظراتكم غريبة
صفنت ، هاي صدُگ نظراتنه چانت هيچ عزههه!!
رافد
كملت شغل و طلعت للبيت وصلت و فتحت الباب و دخلت ، رحت أمشي بأتجاه الحديقة ، رفعت راسي و دحگت لگيت عشق و وياها بنيه ما أعرفها گاعدات بالحديقة ، بس شنو من بنيه ضيييم مو بنيه شايله جمال تدوخ بي أكبر شيخ آني ضليت واگف بمكاني صافن عليها ، حسيت على نفسي و رحتلهن ...
- السلام عليكم
عشق : و عليكم السلام ، شو تأخرت!
أحچي و عيوني لا إراديًا يروحن على هالبنيه ...
- هااا مو چان عندي شغل هواي اليوم
- هسه عوفك من الشغل ، لو تدري شصار اليوم
- خير شصار ، سمعتو شي عن صگر؟!
- صگر رجع اليوم الظهر
- چذاابه!!
- والله شبيك ، إذا ممصدگ روح و شوف
رحت بسرعة دخلت للبيت أول ما دخلت شفت صگر گاعد بالصالة ويه أبوية و عمي ، وگفت گباله ...
- أنت واحد طايح حظ
دحگ هنا و هناك ، و گال
- آني؟؟
- أي أنت
- ليش يول ، هاي بدال ما تسلم عليه و تتحمدلي بالسلامة
جريته من أيده و گام على حيله و حضنته
- الحمدلله ع السلامة ضلعي
- الله يسلمك حبيبي
- يول والله طلع البيت وحشه بدونك
- أي علمود تعرف
- ههههههههه
***
نَفس : أگول عشق منو هذا الولد اللي أجه قبل شوي؟
- هذا رافد أبن خالي جسام
- يعني أبن عم صگر و فرات
- بالضبط
***
شهم
فتحت عيوني و آني ما أتذكر شصار قبل لا أنام ، أحس راسي ثگيل حيل و ما أگدر أتحرك ، أنداريت ليميني لگيت أبوية لابس عويناته و بأيده القرآن و جاي يقره بي ، حچيت بصوت بالگوة يطلع ما أعرف إذا يسمعني أو لا ...
- بوية
صدق و نزع العوينات و باوعلي ...
- شهم ، ألف الحمدلله على سلامتك وليدي
- ألله يسلمك يابة
- شلون صرت حبيبي ، خوما تحس بوجع
- لا يابة بس أحس راسي ثگيل
- زين بوية تتذكر أحنه وين؟
- أي بوية أحنه بالمستشفى ببغداد
- زين وليدي أنت أرتاح و لا تتعب نفسك ، آنــه رايح أدگ على أمك أطمنها
***
فرات
تذكرت شهم صارلي هواي ما حاچي وياه ، ما أعرف أخباره ، سالفة صگر أخذت كل تفكيري ، دگيت عليه جهازه مقفول ، خفت لا يكون صايرله شي ، دگيت على سجاد و جاوبني ...
- هاا سجاد شلونك
- هلا فرات الحمدلله
- أگُلك جاي أدگ على شهم جهازه مقفول ، خير اكو شي؟
- ولك شهم ببغداد راح يسوي العملية
- بالله عليك؟!
- و الحُسين
- صار هواي ما حاچي وياه چنت ملتهي بسالفة صگر و ما حاچيته أسألة عن اخباره
- ليش شماله صگر؟!
- سالفة طويلة عود بعدين أحچيلك ياها ، هسه گُلي شهم شلونه؟
- لا الحمدلله نجحت عمليته و وضعه تمام
- الحمدلله
نهيت المكالمة ويه سجاد ، و رحت أگول لأهلي و أطمنهم على شهم ، أتفقنه نروحلهم للبصرة نشوفه و أمي هم صارلها هواي ما زايرتهم ، گلنه نروحلهم بس يجون من بغداد
عشق : ماما حبيبتي خليني أروح وياهم للبصرة
بدور : شموديچ للبصرة يولي
- عفيه ماما أريد أروح مشتاقة لـ مُهره وافقي فدوة
- لا عشق ماكو روحة
- فدوة ماما ، هسه قابل آني رايحة ويه أحد غريب
علي : بدور خليها تجي ويانه شتريدين منها
- أييي ماما يلا وافقي
- أووف منچ ، تمام روحي
- بعد روحي أنتي
فرات
طلعت رحت گعدت بالحديقة و تذكرت عشگ من اصتدمت بيه ، أنعاد الموقف كُله گدامي ، من دحگت بعيونها ، أول مرة أدحگ بيهن أنتبهت لـ جمالهن و تمايزت شكلها زين ، عشگ حيل حلوة خلتني اصفن بجمالها مع أنو هي 24 ساعة گبالي بس ما چنت أشوفها أبد ، ما أعرف شصارلي بوكتها ، بس أللي أعرفه شفت عشگ بطريقة مختلفة تمامًا غير عن كُل مرة .
********
يتبع ...
آسفه ع التأخير چان المفروض البارت ينزل من الظهر بس النت چان فاصل يمي
هااا بروهات شلونكم ، شرايكم بالبارت حلو؟
بس حبيت تعرفون أنو لحد هسه بعد ما بلشت الأحداث الحقيقية ، يعني هاي القريتوها كُلها خفايف🌚 ، منتظرتكم أحداث قووية فـ أبقو ويانه ، و لا تنسون التصويت و التعليق بين الفقرات و متابعة لحسابي بالواتباد و شاركو القصة إذا حبيتوها
18.kij
هذا حسابي ع الأنستا تعالو هناك بعد گلبي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!