رواية عشگ الفرات ( عِندما تَهوى القُلوب ) الفصل الثامن عشر 18 - بقلم سحر الدليمي

- و آنــه الأبيعن كل غالي خاطر تحبيني
و أشري نظرة عيونچ بدم گلبي و سنيني

***

مُهره
مَر أسبوع و جماعتنه لسه ما رجعو من بغداد ، شهم وضعه تمام و قبل يومين الدكتور گال تگدرون ترجعون للبصرة ، بس عمو سلام گال نبقى يومين أنوب يگول أخاف عليه لا يتعب بالطريق لو يتخربط ، اليوم قررو يرجعون للبصرة و بنفس الوقت عمة نجاة خابرت عمو بكر و گالت راح نجي عليكم و حتى عشق حتجي وياهم ، ما مصدگة اليوم كلش فرحانة ، و البيت مخبوص نتطافر هنا و هناك ، طبعًا حننجمع ببيت عمو سلام ، عمة فاطمة تنتظر وصولهم بفارغ الصَبر ، خابرناهم و گالو للعصر أحنه ندخل البصرة ، الكُل حيتواجد يمنه اليوم حتى صديقتي رشا و أهلها ، لأن معرفتنا من الأساس معرفة أهل

بقينة ننتظر للعصر الساعة أربعة ضبط و گال سجاد وصلو جماعتنه ، أجينه احنه البنات آني و يامور و رقية و زينب و رشا وگفنه بشباك الصالة و صرنه نباوع ، وصلو عمامي و شهم و بنفس الوقت وصلو أهل الأنبار ، نزلو و نزل شهم جان مبتسم بس أبتسامه متعوبة ، عاد أول ما دخل ذبحو طلي جوه رجليه لـ سلامته ، گاده عمو سلام و وصلو للطرمة و طلعت عمة فاطمة تستقبله ما تحملت حتى يدخل جوه ، چان لقائهم كلش مؤثر لدرجة دمعت عيونه ، راحتله و حضنته و ما اهتمت للزلم الهواية الواگفين ، شهم باسها من راسها و اسمعه يطمن بيها و يگلها مابيه شي ، دخل للصالة و راحله يامور و رقية يحضنن و يبوسن بي وحدة على يمينه و وحدة على يساره تصرفاتهن وياه كلش تضحك هههههه

يامور : حبيبي شلون صرت هسه خوما دتتوجع؟

- لا يگلبي الحمدلله زين

رقية : خوفتنه عليك شهومي

- لا تخافين يروحي ، خلص أزمة و عدت على خير و ألله كتبلي عمر جديد أعيشه وياكم

- الحمدلله

سلم علينه كُلنه و راح للمضيف ما رضى يرتاح يگول عيب اعوف العالم و همه جايين علمودي ، چان يباوعلي بنظرات متتفسر كأنما ديحاول يوصلي شي من خلال نظراته ، صاحت رشا و هي واگفه تباوع من الشباك ...

- ولچچن تعالن باعن!!

- هاا شكو

زينب : شبيج ولچ!

رشا : باعن على ذاك اللي واگف ويه سجاد ، خررب يومه ع الهيبة الشايلها

صار عندي فضول منو هذا ، رحت أباوع و عرفته فرات ، چان لابس دشداشة سودة و غتره بيضة و عگال و نظارته السودة ما نزلت عن عيونه

زينب : هذا فرات أبن عمتي نجاة

فاار دمي من رشا كامت تتغزل بي و تگول ...

- حمووت دباع الوسامة و الثگل لچ حتى ميباوع ع البنات اللي يمرن من يمه ، أگلچن أهل الأنبار ما يردون چنه بصراوية؟

لا آني إذا بقيت دقيقة وحدة وياهن أتعارك و افضح نفسي ، عفتهن و رحت أسلم على عمتي ، سلمت عليها و أخذت عشق و رحنه يم البنات نحضر للعشه بس الأشياء البسيطة مو طبخ ، لأن الولد جابو طباخين ثنين هُمه مسؤولين عن الطبخ ، خلصنه شغل و گعدنه نسولف و عَرفت عشق ع البنات ...

- أگلچ شلون خالة بدور رضت تجين للبصرة؟

- لچ مقبلت بالبداية بس قنعها خالو علي ، لو ما هو چان هسه آني ما گاعدة گبالچ

- ايي فديته عمو علي ما أنساله هالمعروف

- ههههههه

زينب : بنات شنو رأيچن نطلع نگعد بره هنا أختنگت من ريحة الطبخ و جوه البيت مخبوص

يامور : لا خاف اكو زلم و يشوفونه فشلة

رقية : اي والله و لو يدري بيه حُسام طالعه گدام الزلم و العباس يشويني مثل مجاي يشوون باللحم بره

- ههههههه ولچن لا شمالچن احنه مخبلات نطلع گدام الزلم ، نروح نكعد بالحديقة الخلفية ، هااا شگلتن؟

مُهره : آني وياچن إذا ترزلتن اترزل وياچن و إذا تونستن هم وياچن

- چا يلا أمشن

طلعنه من الباب الخلفي للحديقة اللي وره البيت ، الحمدلله ما چان اكو أحد ، الولد كُلهم چانو بره اللي بالشارع و اللي جوه بالحوش ، بس الزلم الكبار جوه بالمضيف ، گعدنه تربعنه بالگاع و صرنه نسولف ، سولفتلنه رقية عن حُسام شلون منتظر يجي الطفل بفارغ الصبر و كلساع يجي يسألها شوكت تولد ، و يامور حچتلنه عن قاسم يريد منها يسون طفل بس هي متقبل تگول ما مستعده حتى اكون ام و صاحبة مسؤولية ، و زينب و زوجها كرار اللي يضلون متعاركين 24 ساعة و واحد يصنف ع الثاني

صارت الساعة بالعشرة و فرغ البيت كلمن راح لبيته بقينه بس أحنه المُقربين ، گعدنه كُلنه بالصالة سوالف و ضحك و متونسين ويه بعض ، عيني لا إراديًا تروح على فرات ، أنتبهت عليه حسيته مو طببعي مبين باله مشغول بفد شي ، آخخخ لو أگدر اقره افكاره و اعرف بشنو ديفكر ، رحت گعدت يم عمة نجاة چانت عبالك متوترة من شي سألتها و گالت تعبانة من الطريق ، أنتبهت لعمة سلوى چانت تباوع لعمة نجاة بطريقة و كأنما ما عاجبها وجودها و حتى محچت وياها بس على گد السلام ، حسيت أكو شي بينهن بس غلست ع الموضوع

نجاة
وصلنه لبيت اخوية سلام و دخلنه گعدنه بالهول ، چانت الأمور طبيعية و فرحانة بسلامة شهم و بشوفة أهلي لأن صار هواية ما شايفتهم ، الى أن أنصدمت بشوفة شخص ، ما چنت متوقعة أشوفه نهائيًا ... سلوى!! ، شفتها و رجعلي الماضي كُله ، ما توقعت أشوفها لأن هي راحت و ما رجعت مرة ثاني لأهلي و كل ما أزورهم ما چانت موجودة شمعنى هالمرة أجت!! ، حاولت أكون طبيعية و أتناسى الموضوع ، مَر الوقت و گمت حتى أغسل ، رحت للحمام غسلت و طلعت لگيت سلوى بوجهي! ...

- خير سلوى رايدة شي؟

- ليش رجعتي نجاة؟

- أنتي أللي ليش رجعتي مو آني ، ليش أبتعدتي عن أهلي و هسه رجعتي؟

- بسببچ أنتي

- آني؟!

- اي أنتي ، مرتاحة ويه علي مو ، عايشة بسعادة و خلفتي منه ، و آني حال الظيم حالي كُل هالسنين ما نسيته لحظة وحدة

- أنتي شجاي تحچين سلوى!!!

- تزوجتيه و أنتي تدرين بيه شگد أحبه و رغم هذا طعنتيني بظهري و أخذتي مني

- آني ما طعنتچ بظهرچ ، من الأساس هو ما رادچ و لا چان ألچ ، و أنتي تعرفين كلش زين انو أحنه نحب بعض ، و ياريت تسدين هالموضوع لأن أحنه كُبرنه على هالسوالف

سكتت شوي ، بعدين تقربت مني و همست بأذني كلام وترني و خربط أحوالي ...

- ما ينسد الموضوع أصلاً هستوه أنفتح ، و تشوفين شسوي بيچ يـ نجاة ، أله أطلع ظيم هاي السنين كُلها من عينچ

مَر الوقت و آني كلام سلوى ما غاب عن بالي و مبين عليه التوتر ، أجه علي گعد بصفي شكله أنتبه أني مو تمام ...

- خير نجاة شبيچ؟

- لا مابيه شي

- شو دحگي علي ، وجهچ أصفر بس لا هابط ضغطچ!

- لا بس تعبانة من الطريق ، هسه أرتاح و ارجع طبيعية لتخاف

- أي زين ، لا تنسين أخذي من علاجچ

- أن شاء الله ، أگول لعد فرات وين؟

- ويه شهم بره

***

فرات : و هسه شراح تسوي شهم؟

- ما أعرف فرات

- شوكت تفاتحها بالموضوع؟

- والله ما أعرف

- يول أنت لشوكت تضل ما تدري! ، شهم إذا تحبها گوللها

- أگوللها بس مو هسه

- بكيفك ، تعال تا ترتاح أنت من جيت من بغداد ما أرتاحيت

- عوفني يطبني مرض

- يوول أنت ششبيييك بسس فهممنيي!

- أشش فرات سد الموضوع أجت عمتي

نجاة : شهم شلونك يمه شلون صرت

- الحمدلله عمه بخير

- شو باوع عليه ، ولك يمه مبين عليك التعب ، فرات حبيبي دخله جوه خليه يرتاح

فرات : صار ساعة أگله بس معاند ، أمشي وياي يلا

***

يامور : أي عيني عشق و مُهره انتن شوكت ناويات تتزوجن؟

عشق : شوكت ميجي النصيب

مُهره : أما آني ما اتزوج لحد ما أتخرج ، أريد اخلص من ظيم الدراسة و بعدين ابلش بظيم الزواج

رقية : ولچ الزواج مو ظيم الزواج شي يجنننن ، خصوصاً إذا تحبي و هو يحبچ اووويلي يمه ودوني لحبيبي حُسام أشتاقيتله

زينب : خايبه دنچبي وين نوديج لحسام بهالليل

مُهره
بقينه نتعلل آني و البنات للساعة بالوحدة بعدين نمنه كُلنه بغرفة يامور و الولد نامو بالمضيف

***

سلوى
الليل كله ما نمت و آني افكر شلون أنتقم من نجاة شلون اضوگها الظيم مثل ما ضوگتني ياه ، صار الصبح و نزلت طلعت بره شوية أشم هوى ، ويه ما طلعت و شفت علي واگف وحده بالطرمه و ديشرب جگاير ، تقربت منه و گلت ...

- لا تشرب جگاير موزينه عليك

ألتفت عليه و اول ما شافني عگد حواجبه و گال ...

- نعممم!! ، منو أنتي؟

- يعني متعرفني؟!

- لا

- آني سلوى يـ علي

أنصدم لمن سمع بأسمي بقى ساكت ما حچه و لا كلمة ، ذب الجگاره بالگاع و داس عليها و طفاها ، گلت ...

- خلينه نتزوج

- شنووو؟؟؟؟

- أي خلينه نتزوج ما دام آني بعدني أحبك و أنت ما تحب نجاة طلگها و تزوجني

- منو گالچ آني ما أحب نجاة!! ، آني لو ما أحبها چان ما تزوجتها ، و بعدين تريديني اتزوج بعد ما الشيب غزه راسي

- آني هم الشيب غزه راسي بس مو من الكبر لا من فراگك

- أستغفر الله العظيم ، أنتي شتريدين مني ما تگوليلي!!

تقربت عليه أكثر و لزمت أيده و گلت

- اريدك أنت

عصب و ابتعد عني ...

- أبعدي عني غاد و لا تگربين صوبي ، أعوذ بالله من كيدچ يـ مَره

- بعدها ساحرتك نجاة بعدها واگفه بيني و بينك و بعدك تريدها و تحبها مثل گبل ، بس بسيطة آني أعلمها والله لا ...

قاطع كلامي و لزمني من أيدي حيل و صار يحچي و هو صاك على سنونه ...

- أسمعي يـ مضعوفة البخت والله العظيم أن گربتي على أم صگر او بس فكرتي تأذينها غير أدفنچ بأديه أفتهمتي ، و هساع أمشي من گدامي لا أفين حظچ أمشيي

عفته و رحت دخلت جوه

نجاة
سمعت كُل الحچي أللي دار بين علي و سلوى ، من سمعته و تخربطت أحوالي ، طلعت بره حتى أشوف علي ، چان لسه معصب حييل ، اول ما شافني أجه عليه ...

- هاا نجاة شبيچ؟

- شتريد منك سلوى؟

- معودة هاي تمسلت ماعليچ منها

- لا علي هاي ناويتلنه على نيه والله

- ما تگدر تسوي شي

- علي أنت متعرف سلوى مثلي ، لو حقدت على أحد متعوفه والله ، آني خايفة على فرات منها ، خلينه نرجع للأنبار عفيه علي

- يابة قابل شتريد تسوي لـ فرات ، خلص أنسي و لا تفكرين بيها ، تعاي تا نفوت جوه

***

نَفس
گاعده بالحديقة لوحدي بعد ما عافتني عشق و راحت للبصرة تعودت عليها ، افكر شلون أجيت هنا و شلون خلصت من راضي و زوج خالتي المريض كُله بفضل الله سبحان و تعالى ثم بفضل صگر لو ما هو ما اعرف هسه آني وين ، أجاني رافد وگف يمي و حچه ..

- مرحبا

- أهلاً و سهلاً

- عادي أگعد يمچ؟

- أحمم ، أي تفضل

گعد مقابيلي و آني دايره راسي عنه بس أحس نظراته تتابعني ...

رافد : اي شلونج ان شاء الله مرتاحة يمنه؟

- ألحمدلله بخير

- دحگي إذا تحتاجين أي شي يعني مثلاً روحه للسوگ او تحتاجين شي من بره تعاي عليه لأن صگر دائمًا بالدوام و فرات مو داري ألله وين حاطه

ابتسمت على كلامه على فرات ...

- ان شاء الله

- شبيچ تضحكين هههههه

- لا بس كلامك ضحكني

احچي وياه و آني منزله عيوني بالگاع ...

- نَفس

- نعم

- دحگي عليه خلي عيونچ بعيوني

- هااااا؟؟

- أي يعني من تحاچيني دحگي عليه

رفعت راسي و اول ما رفعته أجت عيوني بعيونه ، جان يباوع عليه بتركيز ، استحيت من نظراته بس ما بعدت عيوني عنه ما أعرف ليش ، اجه صگر و آني نزلت عيوني عنه ...

صگر : رافد

- هاااا

- صد جاي يول جاي أحچي وياك

- هااا ياخيي شبييك

- يول مو عيب عليك گاعد هين و مخلي عمي وحده بالمعرض گو ...

قاطعة رافد و هو يگول ...

- عليك الله لا تبلش بمحاظرتك گايم هائها راح أولي

- اي يلا أنگلع

طلع رافد و بقى صگر گاعد يمي ...

- أيي شلونچ ست نَفس

- الحمدلله زينة

- خوما تحتاجين شي؟

- لا شُكرًا

- إذا تحتاجين شي لا يردچ اله لسانچ

- تسلم

- شعنده وياچ هذا الخبل خوما ضوجچ؟

- ههههه لا بالعكس چان يسألني عن أحوالي

- غريبة والله شجايه

- والله ما أدري

- المهم هسه آني اترخص

- الله وياك

رُسل
چنت واگفة بباب الصالة و شفت صگر جه گعد يم نَفس و صارو يحچون و هاي تضحك وياه و مصدگه نفسها ، فات صگر نزع البيريه و گعد ع القنفه وگفت كدامه ...

- شچنت تسوي ويه نَفس؟

- چنه نلعب توكي

- صگررر مو وكت شقاك جاوب

- سألتها إذا محتاجة شي

- بيها مجال بعد متحچي وياها و لا تسألها عن شي

- ليش عيني

- أغار عليك

- يبووو أشتعلو عشيرتي ، دشو تعاي جاي

جرني من أيدي و گعدني بصفه و تقرب مني ...

- حياتي تره أحنه بالصالة شبيك

- أي و إذا

- لا والله

- اي والله

- وخر سرسري

- رحم الله والديچ گلبي و غراضه

- هههههه أبوس گلبك حبيبي

- مو هنا عيب

- شوف شلون گلبها عليه

- هههههه ، وينها بنت أبوها مشتاگلها

- نايمة

- هااا شجايها!!

- مو تعبت من اللعب و نامت ، اكلت راسي و هي تسألني على فرات فاگدته

- هههههه أبوها الثاني ما تگدر بدونه

- يلا حبيبي گوم بدل و غسل علمود نحط الغده

- صار

***

مُهره
صار الظهر ، و الولد كُلهم طالعين ما بقى بالبيت بس فرات و شهم لسه نايم اول مرة يبقى نايم لهالوكت بس حقه لسه قبل كم يوم طلع من العملية أكيد تعبان ...

فاطمة : مُهره حبيبتي روحي گعدي شهم دورت ليامور حتى تگعده بس مدري وينها

- صار عمه هسه أروح أگعده

عفت البنات و رحت صعدت فوگ لغرفة شهم ، دگيت الباب مره و ماكو صوت دگيته مره ثانية و هم ماكو جواب ، فتحت الباب و دخلت ، چان شهم نايم و حاط أيده على عيونه يكره الضو كلش ، وگفت يمه ...

- شهم .. شههمم ، گوم أگعد شهم

وخر أيده عن عيونه و باوعلي ، عدل گعدته و جاوبني ...

- مُهره ، خير أكو شي؟!

- لا بس صارلك هواية نايم فـ عمتي دزتني عليك حتى أگعدك

- ليش بيش الساعة!

- بالـ 11:36

- أوووف هاي صارلي هواي نايم

- بيك شي شهم؟

- لا بس راسي شوي يوجعني ، وين أبوية؟

- كلهم طالعين ماكو هنا بس فرات ، يلا گوم ننزل

زاح الغطه عنه و گام وگف على حيله و داخ راد يوگع بس لزمته من أيده ، حط أيده على عيونه و عصرهن كلش مبين متوجع ...

- شههمم متوجع أنت؟

جاوبني و هو بعده على حالته ...

- شوي

وخر أيده عن عيونه و شافني لازمة أيده ، أنتبهت و هديتها ...

- أحمم ، يلا خل ننزل

- گوديني ما أگدر أمشي دايخ

- چذاب كلشي مابيك

- صدگيني دايخ ، هسه أوگع من الدرج و أتكسر ترضيلي ياها؟

- أوويلي منك ، تعال

لزمت أيده و مشينه و هو يباوعلي و يبتسم
نزلنه من الدرج ...

شهم : وين فرات؟

- بالمضيف

- يلا چا وصليني عليه

- ماكو درج منا للمضيف يعني تگدر تمشي وحدك

- يعني متوصليني؟!

هزيتله براسي بمعنى " لا "

- يلا چا اروح وحدي شسوي

راح للمضيف و آني رحت أگعد ويه البنات و عماتي

عشق
أجت مُهره و گعدت ويانه ، صرنه نسولف و نضحك و متونسين و فجأة قاطع صوت ضحكاتنه صوت الطلقات صوت رمي كُلش قريب من البيت ، فزينه بطولنه و الرمي و لا وگف ، رحت تقربت من يم الشباك حتى أشوف شكو ، أجه فرات و بسرعة جرني من أيدي و بعدني عن الشباك ...

- شتسوين هنا يولي وخري عن الشباك

وگف يم الشباك و هو يصيح لحد يگرب ع الشبابيك ، فتح البرده شوية و باوع منها و رجع سدها و بعد عن الشباك وگف بصفي ، اباوع الكُل خايف و شهم يهدي بيهم ، و آني من الخوف لزمت أيد فرات بقوة و غمضت عيوني أحس بي ألتفت عليه بس ما فتحت عيوني ...

********

يتبع ...

هلووو بروهات شلونكم♥️
و القفلة شلونها ، أن شاء الله عجبكم البارت ، أنتظرونا بالبارت الجاي أن شاء الله + أكتبو توقعاتكم شراح يصير ، لا تنسون التصويت و التعليق بين الفقرات و متابعة لحسابي بالواتباد و مشاركة للقصة إذا عجبتكم

18.kij
هذا حسابي ع الأنستا ضروري تتابعوني عليه لأن كلشي يخص الرواية انزله هناك

سحر الدليمي