رواية عشگ الفرات ( عِندما تَهوى القُلوب ) الفصل السابع والأربعون 47 - بقلم سحر الدليمي

لا تنسون التصويت و التعليق بين الفقرات
قراءة مُمتعة ♥️

*****

- ماذا فَعلت؟؟ ، لكي تُقابليني بكُلِ هذا الكُره !

ألستي أنتِ مَن أحببتني؟

ألستي أنتِ من قُلتي لي ، أنا أُحبك أنت فقط لا يهُمني شيئٌ آخر

إذًا لماذا كُل هَذهِ القسوة يا حَبيبتي؟!

هَل بَرد حُبي في قَلبكِ؟ ، هَل تودينَ قَتلي بِـسهام عيناكِ و نظراتها الباردة؟!

خاطرة بـَقلمي ( على لسان فرات )

*****

شهم : شبيك صافن؟

- وياي؟

- لعد ويه منو ، ماكو غيرنه گاعدين هنا

- لا هيچ ماكو شي

- صفنتك هاي مثل صفنتي البارحة ، أحچيلي أسمعك

تنهد و جر نفس ، باوع عليه و حچه ...

- عشگ أحسها متغيرة

- شلون؟

- صايرة متحب تحچي وياي و حچيها كُله ببرود ، حَتى ما جاي أشوف بعيونها الفرحة و عرسنه بَعد أسبوع

- ليش عود؟

- ما أعرف ، هو هذا المحيرني و راح يخليني أتخبل

- جربت تحچي وياها بخصوص هالموضوع؟

- لا

ردت أحچي و أجت عشق وگفت گبال فرات و صاحت ...

- ممكنن تتفهممنيي شنوو هاااي المهززلههه؟؟؟

- شبيييچ ، شنوو هالأسلوب الطايح حظه هذا؟؟

- قبل متعلق على أسلوبي شوف نفسك

- هَسه غير أفتهم شبيها

شمرت بوجهه صور ما أعرف شنو ، وگعن بالگاع كام فرات شالهن و عگد حواجبه ...

- ما توقعتك تطلع چذاب

- آني مو چذاب

- لعد شنو تفسر تصرفك هذا ، خال صورها و محبسها بصندوگ و قافله و مخلي ويه هدومك و جاي تضحك عليه و تگُلي أحبچ ، أنت رايد تنسى ميس بيه بَس شكلك مدتگدر ، أحب أگُلك آني مو أداة للنسيان عندك ، مشاعري و گلبي مو لعبة بين أديك

- لتحچين هيچ ، أنتِ فاهمة الموضوع غلط

- لتستغبييتيي فراات ، آنيي فهمتتت كلششيي و توضحخ گداامي كللششي

- عشگ

- لتنطق أسمي مره ثانية ، و هاي حلقتك و گلادتك خليهن يمك و هذا الزواج آني بَعد ماريده

نزعت الگلاده و الحلقة و جرت إيده و حطتهن بيها و راحت ، صاح وراها صيح و راد بَس ما التفتت اله أبد ، اباوع لـ فرات گعد على طارف الدرج ، فتح دگم القميص و صار يفرك بصدرة ساعة يفرك برگبته ، عيونه صارن حُمر و يتنفس سريع ، أنتبهت لأيده ترجف ما جاي يگدر يسيطر عليها ، رحتله لزمته من چتافه ...

- فرااات شو باوعلي ، هايي شبيككك؟؟؟

ما جاوبني أحسه يجر النفس بالگوه ...

- أنت زين فراات ، أحچيي بييك شي؟؟

همس بتعب ...

- موزين آني شهم موزين

- زين أوگف اروح أجيبلك مي

عفته و طبيت جوه أخذت مي بسرعة و طلعت باوعت ماكو أختفى ، ثواني عفته بَس ارجع ألگاه ماكو ...

- اوووف فررات اوووف

ذبيت الگلاص من إيدي و طلعت للشارع بسرعة ، شفت سيارته من بعيد ، بسرعة ركبت سيارتي و لحگته ، أمشي وراه ، ساعة يخفف و ساعة يرجع يمشي بسرعة ، عرفته ما جاي يگدر يسوق ، آخر شي وگف و طبگ السيارة على صفحة ، وگفت و نزلت من السيارة و رحتله فتحت الباب و چان خال راس ع الستيرن ...

- فرراات ، فراات جاي أحچي وياك حاچيني !!

رفع راسه و باوعلي ، حچه بصوت مخنوگ ...

- سمعتها شگالت ، متريدني ، متريد تتزوج

باوع للكلادة و الحلقة اللي بأيده و رجع حچه ...

- هيچ عافتني بكُل سهولة ، ليش هيچ من أول خلاف هنت عليها !!

باوعت لإيده لحد هَسه ترجف ...

- بَس فهمني إيدك ليش ترجف مو خبلتني؟؟

ما جاوبني و رجع راسه للكشن و غمض ...

- گوم وياي خل نرجع للبيت

- لا ما ارجع بَس أخذني منا

- وين آخذك ولك؟ ، متشوف وضعك شلون !

- أخذني للمزرعة بَس ماريد أرجع للبيت عفيه شهم

- زين زين يلا أنزل

نزل و آني رحت صعدت و هو صعد و مشينه ، طول الطريق ساكت و خال إيده على صدره و الإيد الثانية ترجف ، أسأله شبيك يگلي مابيه شي ، لحد ما وصلنه المزرعة ، دخلت السيارة داخل الحوش ، ويه ما خففت بعدني ما واگف فرات فتح الباب و نزل ، بسرعة نزلت و صحت وراه ميرد ، دخلت وياه ، هو دخل لوحدة من الغرف و سد الباب ، گعدت آني بالصالة ، مرت ساعتين ضبط و فرات ماله حس و ما طلع من الغرفة ، گمت رحت دگيت الباب ...

- فرات ، فرات ، تسمعني؟

- إذا تسمعني جاوب

ميرد و ماكو صوت ما جاي اسمع شي ...

- باوع بَس افتح الباب خل أحاچيك ، فرات !!

- إذا ما فتحته أكسره تره

مرت نص ساعة و هَم ماكو صوت ، و آني رايح راد بالصالة مو گادر أگعد ، حاير شسوي ، ليش ميقبل يفتح الباب !! ، آخر شي قررت أدگ على صگر هو يجي و يشوف ، صَح متعاركين هو و فرات و ميحچون ويه بعض بَس متأكد إذا عرف بالسالفة يجي ، دگيت هلا و فتح خط ...

- هلا شهوم

- مو وكت الـ هلا صگر تعال بسرعة

- خير يا ستار شكو؟؟

- فرات تعاركو هو و عشق و طلبت منه ينهون الخطوبة ، هو ضاج كلش و حَتى ما گدر يسوق طلب مني أجيبه هنا لبيت المزرعة و هَسه صارله ساعتين و نص قافل على نفس الغرفة و ماكو صوت ، خاف بي شي صگر تعال شوفه تره آني توهدنت

- زين زين جاي مسافة الطريق

سده و آني رجعت أحاول ويه فرات بَس لا جدوى ، بقيت رايح راد لحد ما سمعت باب الكيندور يندگ رحت فتحته و دخل صگر ملهوف و علامات الخوف واضحة بوجهه ...

- وينه ، ما طلع؟؟

- لا ماكو صوت

- وينه؟

- جوه

دخلنه و صگر راح يدگ بالباب و يحچي و يصيح يريد منه بَس يحچي كلمة ماكو ، گلنه صايرله شي مابيها مجال ، صگر تخبل حار شيسوي ، آخر شي گال ماكو حل غير نكسر الباب ، أبتعد عن الباب و ضربه 3 دفرات و أنكسر ، فتحه و دخل بسرعة و دخلت آني وراه ، لگينه فرات گاعد بالگاع و راچي ظهره ع الچرباية و صافن بالحايط ، تقرب من يمه صگر ...

- فرات ، أشو دحگ عليه ، شبيك؟

ما باوعله بقى صافن و همس ...

- عافتني ، راحت و عافتني مثل ميس

- لا لا ما عافتك هو صار خلاف بسيط بَس تهدون و تحلونه

- لا والله عافتني شوف هاي الگلاده بيوم المهر هديتها ياها و گلتلها لتنزعينها أبد ألا إذا شلتي حُبچ من گلبي و كرهتيني ، دحگ هَسه نزعتها و خلتها بإيدي

حچاها و بچه ، خله إيده على عيونه ، أول مره أشوف فرات يبچي ، فرات اللي ما بيوم طحت و ما لگيته ساندني ، و هَسه آنـه أشوفه طايح و مو گادر أسويله شي ، صگر لزم وجهه و حچه ...

- لتبچي فرات ، ليش تبچي ، شو دحگ عليه يول أنت زلمة عيب تبچي

رفع راسه و صاح ...

- عجل مو عييب گلبي يحترگ ، موو عييب تعووفني هييچ و تتخلى عن حُبي بهالسهووله

رجع دنگ راسه و غطى وجهه بإيديه ، صگر أستغفر و گام على حيله ، آني رحت يم فرات ، گعدت و آني حاير شحچيله شگله شسويله حتى اخفف عنه و آني أكثر واحد أعرف شنو جرح العشگ ، حچيت بدون تفكير ...

- تهون

رفع راسه و باوعلي بنظرات مكسورة و عيونه حمر دم ، تقربت من يمه و حضنته ، خله راسه على چتفي و مچلب بملابسي حيل ، حچه ...

- گُلي شسوي هَسه شهم ، آني ضعت ، هي ديرتي و آني بدونها ضايع

- لتسوي هيچ بروحك فرات ، تنحل وداعتك تنحل

وخر عني ، باوع عليه و بعدين رجع باوع على صگر ، كام على حيله و راد يطلع لزمه صگر ...

- وين رايح؟

- رايح أشوف ليش سوت هيچ ، تشوف شلون تعوفني اليوم

هد إيده من صگر و طلع يركض ...

- أگف يوول تعاال جااي فراات

طلعنه وراه بسرعة ، ما لحگنه بي ركب سيارتي و طلع ...

صگر : مهبول والله أخوية مهبول

- مو وكت الحچي صگر خلينه نلحگه بسرعة

ركبنه بالسيارة و طلع وراه صگر ، يمشي سريع كل شوية نگول راح يسوي حادث ، بألف يا الله و يا عَلي وصلنه البيت ، طبگ السيارة و نزل

عشق
گاعدة بغرفتي أبچي و أمي و خالتي يمي يريدن بَس يعرفن شبيه ...

بدور : عشق ماما بَس أحچيلي شبيچ منو وياچ؟ ، والله مردتي گلبي

نجاة : عشق حَبيبتي سولفيلي فرات مضوجچ؟

حطيت إديه على أذاني ماريد أسمع شي يخصة ...

- ماريده ، ماارييد أسسمع اسممهه ، مااريده عووفوني منههه

فجأة أنفتح الباب بقوة و أنرگع بالحايط ، دخل فرات و لزمني من إيدي و گومني ...

- گوومييي

نجاة : فرات ماما على كيفك ويه البنيه شبيك !

- حررگت گللبييي يووم حررگت گلببي و تگُليليي على كييفك ويااها

جرني من إيدي و گومني ، وگفت گدامه باوعتله چان معصب كلش ، عيونه حُمر و وجهه أزرگ ، باوعلي بتوسل و حچه ...

- جاي أگُلچ فاهمة الموضوع غلط ، ليش تريد تكسريني؟

- شنوو هووو الغللط موو شففت صوورهاا بعينيي ويهه غرااضك

- والله العظيم وداعت عيونچ اللي ما أحلف بيهن چذب ، ناسيهن و ما چنت أدري بيهن ، صارلهن 5 سنين على حطتهن ما گلبتهن ، بَس البارحة شفت الصندوگ و فتحته و لگيتهن ، و گلت راح أشيلهن

- متقنعني بهذا الحچي فرات كافي چذب

- يول يا الله ما جاي أچذب ما جااي أچذذببب

- لعد شتسمي هذا هااا؟؟

تقرب عليه كلش و همس ...

- معقولة تغارين من وحدة ميته؟

أبتعدت عنه ...

- السالفة مو سالفة غيرة ، سالفة كرامة ، أنت هنت كرامتي بقيت لحد هَسه محتفظ بغراض ميس و آني خطيبك

- لا حول و لا قوة إلا بالله ، جاااي أگُللچ نااسييهنن مصخخمههنن  ، يااا أمة مُحمد فهمووهااا

عصب كلش و صار يصيح و يغلط على نفسه ، حاولن يهدنه ماما و خالة بَس ماكو ، أجو شهم و صگر جرو و رادو يطلعونه بَس ما قبل ، لحد ما صاح خالو عَلي ...

- فررااات

أندارينه لگيناه واگف بالباب ، عاگد حواجبه و معصب ، فرات سكت و جاوبه بصوت مبحوح ...

- هااا

- تعال وياي

- يابة بَس ...

- گتتللكك تعاال وييااي

طلع و طلعو وراه

,,,

نزلو جوه ع الصالة ، فرات گعد ع القنفة و حَط راسه بين أديه و دنگ ، عَلي وكف فوگ راسه ...

- شبيك أبني فهمني ليش كُل هالصياح و العصبية؟!

ساكت ميرد على أبوه ، يهز برجله من التوتر و رجفة إيده رجعتله ، رجع حچه عَلي ...

- متحچي شبيك؟؟

ما جاوبه ، ألتفت على صكر و شهم ...

- دفهموني شبي أخوكم يولو شسالفة؟؟

صگر : يابة عشق طلبت منه ينفصلون

- ليش؟؟

- مندري

أندار على فرات ...

- فهمني وليدي ليش طلبت تنفصلون؟ ، مضوجها بشي أنت ، فرااات موو جااي أحچيي وياااك !!

شهم أنتبه لـ فرات وضعه مو تمام ، راح تقرب من عَلي و حجه ..

شهم : عمي من رخصتك بَس أحاجيك

- احچي أبو الأكبر أسمعك

- عمي لا تضغط عليه شوف حالته شلون آنـه مو عاجبتني ، كلساع أگول هَسه يوگع من طوله ، هو بي شي؟

- والله ما أدري

أندار على فرات اللي بعده على حاله ، أنتبه لرجفة إيده ، گعد يمه ...

- فرات وليدي بيك شي؟

- ول يابة بَس فهمني شبيك ليش ترجف مو راح تخبلني؟!

رفع راسه و دحگ على ابوه ، بعدين گام بدون ميحچي ولا كلمة ، مشى چم خطوة و راد يگع لو ما شهم سنده ...

شهم : بيك شي فرات؟

عَلي : بَس لو يحچي و يگول شبي

حچه بتعب و بصوت مبحوح ...

- گلبي يوجعني

تقرب من يمه عَلي ...

- ليش يوجعك؟!

صگر : خل ناخذك للمستشفى

- لا بَس أريد ارتاح

عافهم و صعد فوگ ، وگف يدحگ على غرفة عشگ و هو يسمع صوت شهگاتها ، حط إيده على گلبه و مشى دخل لغرفته و رچه راسه ع الحايط بحيرة و هَم و السؤال الوحيد اللي يتردد بذهنه هو شنو اللي غير عشگ هيچ فجأة ، صور ميس مو سبب كافي لتصرفها هذا

***

ريهام : هااا بشري شصار؟؟

ريان : شبشر يولي لحد الآن كُلشي ماكو ، عرفت هاي سوالفچ الطايح حظها متفيدتي

- يولي شلون متفيدچ ، هذا سِحر تعرفين شنو يعني سِحر

- إي وينه يلا شو كُلشي ماكـ ...
أكفي ريهام خل أشوف شنو هاي الهوسه البره هَسه أرجعلچ

طلعت من الغرفة و مشيت ، الهوسه جايه من غرفة عشق ، رحت و لگيت فرات معصب و يحچي و عشق تبچي ، الكُل ألتمو عليهم ، اللي عرفته أنُ عشق طالبه من فرات ينفصلون و فرات متخبل ، آخر شي جه عمي علي و أخذه و نزلو جوه ، الكُل طلع و ضلت عشق تبچي وحدها ، تقربت من يمها ...

- مو گتلچ أبتعدي عن فرات ميفيدچ

- طلعي بره

- أرتاحيتي هَسه من علقتي نفسچ بي و تالي طلع يضحك عليچ

- خلي ألچ تتهنين بي ، و بعدين هم يچذب عليچ و يسوي بيچ نفس ما سوه بيه

- إي فرات الي من البداية بَس أنتِ أخذتي مني ، لا من هالناحية لا تاكلين هَم ما راح يسوي بيه مثل ما سوه بيچ

- طلعيي برهه ، گتللچ طلععييي بررهههه

- ههههههههه طالعة شبيچ لتصيحين

عفتها و طلعت رجعت لـ غرفتي و دگيت على ريهام ، ردت ...

- هااا شكو شصاير يمكم؟

- يولي هَسه بين السِحر ، راح ينفصلون والله راح ينفصلون

- شوفييي مو گتلچ هذا سِحر مو لعبة

- بَس أكو شي موزين

- شنو؟

- فرات مو قابل ينفصلون ، يعني بعده يحبها ، أحنه مو سويناله تا يكرهها

- شوي شوي كُلشي يجي شوي شوي ، أنتِ بَس أگفي تفرجي و اللي تريدينه يجي إلى يمچ

- نتفرج و نشوف شيصير ، بَس دحگي دزيلي رقم هاي أم بكر بسرعة

- شلچ بي؟

- يفيدني

- مو يمي أله أدبرلچ ياه

- تمام أنتظرچ

***

صگر
گاعدين بالهول و آني بالي يم رافد من الظهر مختفي أدگ عليه ميجاوب ، خايف لا سوه اللي ببالي ...

- عمي رافد ما خابرك ما گالك هو وين؟

- صار من الظهر أدگ عليه ميجاوب راح يخبلني هالوليد

عَلي : ليش شكو؟

- يابة گالي ألگاله هذا الكلب اللي مراسل نَفس ، گتله عوفه آني أحاسبه بَس هو شكله ما سمع كلامي و راح دوره ، خايف لا يلگاه و آني أعرفه يگضي بي التوبة

شهم : هذا مسودن ولك يسويها

- آخخ منك رافد آخخ

دگ تيلفوني ، طلع رقم غريب ، جاوبت ...

- ألو

- السلام عليكم

- و عليكم السلام

- حضرتك الضابط صگر عَلي المهيوب؟

- إي نعم

- ممكن تجينه للقسم رايدينك بشي ضروري

- خير يا الله شكو؟

- رافد جسام المهيوب أبن عمك مو؟

- إيي؟؟

- حاجزينه يمنه بالقسم ، تعال و نتفاهم

- زين زين جاي

سديت التيلفون و گمت ...

- مثل ما توقعت اللي خايف منه صار

جسام : ليش شصار؟

- رافد حاجزينه بالقسم و رايديني هناك

- جاي وياك

رحنه للقسم و گعدنه ويه الضابط ، اللي فهمنا أنُ رافد معتدي على هذا الوليد بالضرب لهذا حجزوه و بالمقابل أحنه هَم قدمنه شكوى بحقه بسبب اللي سواه ويه نَفس ، أما بالنسبة لـ رافد فـ الضابط طلع عرف و گدرنه نقنعه يطلع بكفاله و تعهدتله اللي صار ما ينعاد ، أخذنه رافد و طلعنه نمشي للسيارة ، وگفت و جريته من إيده ...

- أنت ليش تعاند و تكسر كلمتي يول؟

- يعني شنو تريدني أسكتله بَعد اللي سواه ، و القرآن لو ما الشرطة جو چان شربت من دمه

- يول مو گتلك آني أحاسبه ، هَسه أرتاحيت من أنحجزت و صرت عدهم أنت العايل ، آني أحير بيك لو بـ فرات ياخي شبيكم أنتو !!

- حاسبته و نعلت والديه و هايهيه فضت راحت

- دومك تمشي بشورك

- أحسلي

- دمشي أمشي لا اشگ راسك فوگ ما هو مشگوگ

- آخخخ والله ذكرتني هذا الكلب جرحني براسي ، صگر أخذني للمستشفى دحگ راح أموت

جسام : ههههههه ول يابة أنت تشوف صگر محروگ دمه تره هَسه يرجعك للقسم ماعنده مانع

- إي يابة غير أريده ياخذني للمستشفى

صگر : تمشي گدامي للبيت بالعيني و أغاتي لو آخذك للگبور؟

- لا لا للبيت للگبور شنو ، أريد أتزوج يمعود

صعدنه السيارة و طلعنه للبيت

نَفس
واگفة بالمطبخ دادگ على رافد ميجاوب ، ٣ مرات أدگ عليه و ميجاوب ، بالمره الـ ٤ دگيت و سمعت صوت جهازة أنداريت لگيته واگف بالباب ، باوعت لـ راسه مجروح ...

- رااافد هااي شنوو شبيي رااسك؟؟

- مابي شي

- أشو تعال أگعد خل أداويلك ياه

گعد ع الكُرسي و آني رحت جبت مُعقم جروح و شاش و أجيت أضمدله ياه ...

- شلون هيچ أنجرحت؟

- ماعليچ ، المهم ربيت ذاك الحيوان

- أوووف رافد مو گتلك عوفه أنت ليش عنودي

- من السالفة تصل يمچ أحرگهم حرگ وداعت أبوية

سكتت ما جاوبته ، كملت تضميد الجرح و حطيتله لزگه ، گعدت بصفه و هو يباوعلي ...

- عادي أسألك سؤال؟

- طبعًا

- ليش دائمًا من تريد تحلف تگول وداعت أبوية؟

- لأن ماعندي أغلى منه ، أبوية إنسان مثالي بالنسبة ليه

- لهدرجة تحبه؟

- و ازود هَم

- حقك تحبه هيچ ، عمو جسام گلبه طيب و تعب حَتى وصلك لهالنقطة

- أعرف

- بَس تره آني بديت اغار منه

- هههههههه تغارين من أبوية؟

- إي

- لتغاربن ، أنتِ وحد و أبوية. وحد و ثنينكم أعزاز على گلبي

أبتسمت ...

- أسويلك شي؟

- إي والله رايد چاي لأن راسي يوجعني

- تمام

***

بالليل الكُل تعشه أله فرات و عشگ ما قبلو ، عَلي گعد و صاح نجاة و أجته ...

- صحتني؟

- إي ، أريدچ تروحين تحچين ويه فرات بلكت تعرفين شصاير بينهم هو و عشق

- مو تعرف السالفة شنو ، عشق شايفة صور ميس ويه غراضة و ضاجت

- أعرف بهالسالفة ، بَس هذا مو سبب كافي يخلي عشق هيچ تطلب الإنفصال و تصر على كلامها ، لازم أكو شي ، أحچي ويه فرات بلكت يحچيلچ تا نگدر نتصرف

- و ليش متحچي وياه أنت؟

- حچيت وياه و ما حصلت منه لا حگ و لا باطل

- زين رايحة

صعدت نجاة لغرفته ، دگت الباب و جاوبها بصوت تعبان ، دخلت و لگته گاعد بالگاع و راچي ظهره ع الكنتور ، راحت گعدت گباله ...

- ليش ما نزلت تعشيت؟

- مالي نفس

- ميصير ماما تتمرض هيچ

- آني أتمرض إذا عافتني يوم

- فرات حَبيبي أحچيلي شصاير بينكم بلكت نگدر نساعدكم

- والله ما أعرف ، اللي صار أنتو كُلكم تعرفونه ، هي شافت صور ميس ، بَس ما جاي تدخل بمخي تعوفني علمود هيچ سبب تافه

- يعني متعرف شبيها؟

- لو أعرف چان مو هذا حالي

- زين حَبيبي أنت أرتاح هَسه لأن مبين تعبان ، و خلي ببالك اللي ألك ميصير لغيرك و اللي مكتوبلك لابُد ما تشوفه

هزلها براسه و عافته و طلعت ، حچت لـ علي و حار بسالفتهم أزود

عشق
گاعده بالغرفة و أمي يمي ...

- ول يـَ ماما بَس أحچيلي شصاير بينكم ليش هيچ متريدينه؟!

- ماما صور ميس ويه غراضة يعني مناسيها شلون تريديني أبقى وياه

- هذا مو سبب مقنع ، الوليد تخبل من گلتيله ننفصل ، جه و فهمچ و حلفلچ ميدري بيهن و مبين ما يچذب ، لو يجذب چان ما عصب هالگد

- مااريدههه مامااا ماااريده كااافي موو غصصبب رااح تموتوني والله

باوعتلي و هزت راسها مو راضيه ، بعدين عافتني و طلعت ، و آني تمددت و نمت

حسيت على إيد أنحطت على راسي ، فتحت عيوني الدنيا ظلمه و ضو خفيف من الگلوب البره ، أنداريت و فتحت الشمعه اليمي لگيت فرات گاعد يم راسي ، بسرعة فزيت و گمت على حيلي هو من شافني فزيت گام بَس بصعوبة ...

- أنت شتسوي هنا؟؟؟

- تعبان رايدچ يمي

- مااريدك أطللععع عووفنيي

- جاي أگُلچ تعبان و راحتي يمچ ، أحس گلبي راح يگفي

- مالي علاقة عوفني و أطلع

دنگ راسه و فركه بإديه الثنين ، رجع رفعه و تقدم عليه ، جرني عليه و حضني ، حاولت أبتعد عنه بَس ما گدرت ، صرت اضرب بي على صدره ، شوي و حسيته أرتخه ، أبتعد عني و حط إيده على گلبه ، حچه ...

- ليش جاي تأذيني

- گتلچ راحتي يمچ و سلبتيها مني ليش منين جتچ هالقسوة !!

- ماريدك أفهم

جر نفس بحسرة و ألم ، عافني و طلع

شهم
طلعت حَتى اشرب مي ، جاي أريد أنزل الدرج و سمعت صوت خطوات وراي ، أنداريت لگيت فرات واگف و ساند نفسه ع الحايط ، رحتله و لزمته من إيده ...

- فراات شبيك؟؟

رفع راسه و باوعلي ...

- موزين شهم ...

********

يتبع ...

داريتكم بالقفلة حبايب لأن هذا آخر بارت أنزله برمضان ، راح أوقف كتابة الرواية طيلة شهر رمضان لأن ماعندي مجال أكتب و أنتو لاحظتو لأن تأخرت عليكم هالمره ، فـ إن شاء الله نلتقي بالبارت الجاي اللي راح يكون أول أيام عيد الفطر المُبارك
و هَسه أستودعكم الله♥️

18.kij
هذا حسابي ع الأنستا ضيفوني و اللي يضيف يدخلي خاص يگُلي آني جديد علمود اضيفه كلوز لأن نشري اللي يخص الرواية كُله بالكلوز

سحر الدليمي