رواية عشگ الفرات ( عِندما تَهوى القُلوب ) الفصل السابع والثلاثون 37 - بقلم سحر الدليمي

عشگ تگول :
- يـَ فزة گلبي أللي لـ غير حسك ما يفز

***

گمت حَتى أروح ، هو گام و سحبني من إيدي و دارني عليه ، حچه و هو عاگد حواجبه ...

- شنو نلغي كُلشي شو تمسلتين أنتِ؟؟؟

- ما أمسلت وخر ، آني ماريد واحد ميقدرني و ميهتم لرأيي

- لاااا هااااي جديييدةةة مااال مااررريييدكك ، ترييدينيي و غصصباً عننچ أفتتهمتيي؟؟

- لااا أنت زودتتهااا وخرر عنيي ، هدنييي

هديت إيدي منه و رحت أسمعه دفر الكرسي و وگعه ، صعدت لغرفتي و آني الدمعة بعيني تمددت بفراشي و غطيت راسي و غفيت ، حسيت على دگت الباب ، گمت باوعت لموبايلي شفت الساعة بالخمسة ، گمت لفيت شالي و رحت فتحت الباب ، طلع فرات ، رفع راسع و باوعلي ...

- آني آسف

- ماريدك تعتذر ، روح منا

أجيت أسد الباب و حط إيده ما خلاني أسده ...

- والله الليل ما نمته و آني أعرف مضوجچ ، خلص شوكت ما تريدين نسوي العرس حَتى لو بعد سنة ، المهم متضوجين

- أنت عصبت و صيحت عليه و آني ما مضوجتك بشي ، بالعكس أنت اللي ضوجتني من قررت عني

- يابة والله آسف ، آني من گلتي ماريدك عقل ماضل براسي ، أيام و أشهر و آني أنتظر هاليوم آخر شي تگوليلي ماريدك!!

- آني مو ماريدك ، بَس أنت قهرتني و حچيت هيچ بدون تفكير

- الله ياخذني إذا بعد أقهرچ ، زين؟

- أسم الله لتحچي هيچ

- يعني سامحتيني؟

- اليحب يسامح ، و آني أحبك

- أعشگچ يولي

***

مُهره
گعدت الساعة بالـ 11 شهم ما موجود ، نزلت جوه أنتبهت سالي ما موجودة بالبيت ...

- عمه لعد سالي وين؟

- رجعو أهلها من السفر و أخذوها

- هااا

بداخلي كلش أرتاحيت لأنها خلص راحت ، بالرغم أنُ شهم ما چان يحچي وياها نهائيًا و المكان اللي هي بي هو ميدخله ، بَس هي چانت تضل تذب عليه حچي و آني ساكته بَس علمود الطفل اللي ببطني ، لأن إذا رديت عليها راح تصير مشكلة و آني راح أتأذة و شهم مو ناقصة ، رحت لـ يامور أشوفها و أتطمن عليها ، دگيت الباب و دخلت ...

- صباح الخير

- صباح النور

- شلونچ اليوم حَبيبتي؟

- زينة الحمدلله

- شنو راح تسوين هَسه؟

- والله ما أعرف ، بَس أيوي و شهم راحو لـ عمي كاظم يشوفون حَل

- ترجعيله؟

- ما أعرف مُهره ، هو جاي يكرهني بي شوي شوي

- خلص حَبيبتي ، أنتِ هَسه أهدي و أنتبهي لصحتچ ، و هالسالفة بعدين تنحل

***

فرات : يمه خابرتي على خوالي شفتيهم إذا يجون للحفلة لو لا؟

- إي يمه خابرتهم ، ما يگدرون يجون

- ليش؟

- يگولون هالفترة حيل مشغولين و ما يگدرون يعوفون الشغل و يجون

- حرامات

- و شهم ، يجي لو لا؟

- هَم ما يجي ، مُهره حملها صعب و ما يگدر يعوفها و يجي

- حقه يخاف عليها

سكتت أمي ، شوي و ردت حچت ...

- چا يمه شوكت أشوف وليداتك يلعبون حواليه؟

- يمه يـَ بعد الـ چا و الـ عَجل و أهلهن

- أحچي ولك لا تضيع السالفة

- إي يمه دصبري غير أتزوج ، شنو الجهال يطلعولي بالسحبه

- ههههههه ، ولك والله عليك سوالف

- يمه تراني گاعد على نار أكثر منچ ، بَس شسوي هاي عشگ سودنتني على گولت خوالي

- ياااا ، چا شمالها وياك يمه

- ما تريد نتزوج هَسه

- چا شوكت؟

- تريد تتخرج بالبداية يلا نتزوج

- إي چا حقها يـَ يمه

- إييي أطبگي وياها و عوفيني

- يمه شبيك ، هي ما بقالها شي و تتخرج ، كُلها چم شهر ، أصبر

- إي أصبر هو آني شبيدي غير الصبر

عشق
اليوم ما داومت لأن الحفلة باچر و ملتهيه بالتحضيرات آني و نَفس من عناية للبشرة و هالسوالف ، حَتى الولد مشغولين لأن الحفلة راح تصير ببيت المزرعة لأنه أكبر من هذا فـ راحو يشوفون شنو ناقصة و يجهزونه ، طبيت للغرفة لگيت نَفس منزله الفستان مالها و تباوع لچتفها و صدرها بالمراية ، تقربت منها و شفت آثار على صدرها و چتفها ...

- شنو هاي الآثار؟

أندارت عليه و رفعت فستانها ، حچت ...

- لمن صار الأنفجار مو أنصابيت بي ، فـ هاي آثار الإصابة

راحت گعدت ع الچرباية و بقت صافنه ، رحت گعدت يمها ...

- هَسه أنتِ مو باچر حفلتچ المفروض تكونين فرحانة ، بَس آني اللي أشوفه عكس هالشي !!

- ما أعرف شبيه عشق

- متريدين رافد لو شنو؟

- لاااا ، مو ما أريده ، بَس كلشي صار وياي بحياتي دينعاد هَسه گدام عيني ، و ما جاي أگدر حَتى أفرح ، تمنيت أبوي و أمي وياي بهالأيام ، تمنيت رافد يجي يخطبني من أهلي مثل كل بنيه

- أنسي الماضي نَفس و أفرحي ، و لا تبينين حزنچ گدام رافد و تكسرين فرحته خطية هو كلش فرحان

- أعرف و مستحيل أبينله ، أصلاً آني أريده يبقى فرحان أگوم أضوجه بخبالي

- ههههههه ، إي والله خبال

أبتسمت أبتسامة حزينة ...

- إييي دبتسمي شبيچ ، و يلا تعاي خل أسويلچ حواجبچ و بعدين أنتِ تسويلي حواجبي

- آني ما أعرف

- والله

أنفتح الباب و دخلت رُسل ...

- هااا كملتن؟

- لاا بعد ، أگُلچ رُسل تعرفين تحفين الحواجب؟

- إي أعرف

- هاااا خوش لعد ، علمود تسويلي حواجبي لأن هاي الثولة متعرف

***

شهم
رحنه لـ بيت عمي كاظم حَتى نشوف سالفة يامور ، گعدنه و أبوي و عمامي يحچون ويه عمي كاظم و آني بَس أستمعلهم ما حچيت شي ، ضلو يحچون و يجيبونها منا و يردونها منا ، لحد ما گال عمي كاظم ...

- أبو شهم شتأمرون أحنه حاظرين ، شرايدين ، رايدين نطلگ؟

قاسم : لااا ، آنـه ما أطلگ ، صَح آنـه غلطت و هاي أعترفت بغلطي گدام الكل ، بَس مرتي رايدها و ما أطلگ

ردت أحچي بَس ندسني أبوي و ما خلاني أحچي ، حچه هو ...

- البت شورها بيدها و آنـه ما أغصبها على شي ، لو رادت تردلك تتعهد ما تأذيها حَتى ولو بكلمة ، و لو رادت تطلگ تطلگها غصبًا عنك و رجلك فوگ راسك

- عمي أسمحلي أجي وياكم و آنـه أحچي وياها و أتعذر منها و أشوفها هي شنو تريد و على هالأساس نتصرف

- چا خوش

شهم : و ألك عين تحچي وياها و تتعذر هَم ، ليش هي سوايتك ألها أعذار

- آنـه غلطان يـَ شهم و معترف بهالشي ، و الله بكبره يعفي عن الغلطان لو تاب ، أنتو ما تعفون !!

سلام : يلا بوية خلونه نمشي و نشوف تالي هالسالفة

گمنه و طلعنه للبيت ، آنـه مو راضي على هالحچي بَس بعد السالفة تحولت لـ يامور و هي تقرر اللي تريده ، وصلنه البيت و نزلنه ، جريت قاسم على صفحة و كضيته من ملابسه ...

- أسمع ولك ، لو وافقت يامور تردلك ، و علي لو سمعتها كلمة موزينة أو مديت إيدك عليها ، أحسب نفسك مدفون بوادي السلام و آنـه دفانك

ما جاوب و عافني و دخل للبيت

يامور
گاعدة بالغرفة وحدي و حاطه راسي من رجليه ، فجأة أنفتح الباب بهدوء ، رفعت راسي و شفت قاسم واگف ، من شفته و آني گمت على حيلي ...

- شتسووي هنااا شلوون دخلتت رووحح منااا مااريد أشوفك

سد الباب و أجه يمشي بأتجاهي و آني واگفة بمكاني و أبچي ، دموعي نزلن من شفته و تذكرت اللي سواه ، وصل يمي حاول يحضني بَس آني أبتعدت عنه ، جرني عليه و حضني بقوة ، و آني أدفع بي أريده يبتعد عني ...

- لييش جاااي عليييه ، مو آنيي مو خووش و مترييدنيي شتغيير هَسههه ، عووفنييي

حچه و هو حاضني ...

- آني آسف ، ولو أدري كلمة آسف ما تكفر عن غلطي وياچ ، بَس آني وصلني حچي عنچ و تسودنت و بعدين أكتشفت هالحچي غلط و هَسه جاي أتذعذر منچ ، سامحيني يامور

- شنو هالحچي؟

- مالچ غرض بي ، المهم تسامحيني ، والله صارلي يومين ما نايم و آني أفكر بيچ و شلون أنطاني گلبي و سويت بيچ هيچ

أبتعدت عنه و حچيت ...

- شرايد مني؟

- رايدچ ترجعين وياي معززة مكرمة ، و أوعدچ اللي صار ما يتكرر

- ليش سويت هيچ قاسم !!

- أنتِ تدرين بيه شگد أحبچ ، بَس من سمعت هالحچي طار عقلي و گمت ما اوچد دربي

- يعني إذا رجعت وياك متأذيني؟

- عساها إيدي بالكسر إذا مديتها عليچ أنوب ، بَس سامحيني و رديلي

- أرجع بَس بشرط

- و هو؟!

- ما أگعد ويه خواتك بنفس البيت ، أريد بيت وحدي ، و شغلي ما أبطل منه و إذا ما وافقت طلگني و مالي عيشه وياك

- تم ، بيتچ يجهز منا لباچر ، و شغلچ تبقين بي ، بعد؟

- و لا شي

- سامحتيني؟

- لا

- ليش؟

- أنت أذيتني قاسم ، مو بسهولة أنسى و أسامحك ، صَح وافقت أرجع بَس ما سامحتك

- و شوكت تسامحيني؟

- ما أدري

- تمام ، أخليچ على راحتچ هَسه ، رايح أجهز البيت و باچر أجي آخذچ

هزيتله براسي ، و باسني بگصتي و طلع
حسيت قاسم رجع مثل قبل ، بَس اللي سواه مينسي بسهولة ، لو بَس أعرف شنو هذا الحچي اللي واصله عني أرتاح

***

عشق
لليل و كملنه كلشي ، آني نعست و رحت لغرفتي حَتى أنام ، تمددت بفراشي و آني أفكر بباچر و فرحانه هوااي ، فرات اللي چنت أحارب گلبي حَتى أنساه و أطلعه منه ، باچر حيصير خطيبي و علاقتنه تكون رسمية ، بقيت أفكر لحد ما غفيت

گعدت الصبح ع المنبه مالت التيلفون ، سديته و گمت ، الساعة چانت بالـ 8 ، بين ما توضيت و صليت و تريگنه و تجهزنه صارت الساعة بالـ 9 ، رافد و فرات ما شفناهم طالعين من الصبح لبيت المزرعة و وياهم خوالي حَتى يستقبلون المعازيم ، أخذنه صگر و وصلنه للصالون ، دخلنه و چان الصالون فارغ لأن حجزناه بَس ألنه حَتى نكمل بسرعة

***

فرات
واگف بره و جاني رافد كاشخ ...

- هااا فرات شلونه عليه القاط؟

- حلو

تقربت منه أعدله الستره ...

- لا تلبس رباط مو حلو يطلع

- لا يمعود غدي شعندي خانگ نفسي بي

- ههههههه

- و أنت ما تبدل سمنتظر؟!

- آني طالع هَسه ، من أجي عود

- وين رايح؟

- عندي شغيلة ما أتأخر

عفته و طلعت للسوگ ، لمحل الذهب ، وصيتهم يسولي گلادة أريد أهديها لـ عشگ ، وصلت للمحل أخذت الهدية و خليتهم يغلفونها بطريقة مميزة ، ركبت سيارتي و مشيت ، بَس الطريق حييل أزدحام بالگوة الواحد يمشي

***

عشق
كملنه شغلنه بالصالون ، آني و نَفس أختارينه مكياجنه يكون بسيط و هادئ و حَتى تسريحات الشعر فضلنه تكون بسيطة ، ذبينه الشالات على روسنه و طلعنه لـ صگر اللي ينتظرنه و وياه لارين گاعدة بحضنه و تلعب ، من شافنه شغل السيارة ، صعدنه و توجهنه للبيت ، و صگر طول الطريق ما خله أغنية ما شغلها و يطگ أصبع و لارين ترگص و هي بحضنه ، وصلنه للبيت و شفنه سيارات كومة ع الباب ، هاي عود گالو محد راح يحضر بَس المقربين يعني شنو ذولة كُلهم مقربين ، سوولنه مجال و دخلنه للبيت و الزلم كُلهم بره ، شفنه رافد و حچه ويه نَفس بَس فرات و لا شفته ، گعدنه و سألت أمي ...

- ماما فرات وين؟ ، ما شفته من أجينه !!

- والله ما أدري آني هَم ما شفته ، تلگينه ويه الزلم

- بَس چان أجه علينه

- اصبري هَسه يبين

ضلينه گاعدين شوي و أجه الشيخ حَتى يقطعلنه المهر ، تبين أنُ فرات ما موجود بالبيت ، طالع و ما گايل لأحد وين رايح ، بقينه ننتظر عشر دقايق ربع ساعة نص ساعة و هو ماكو ، رافد يخابر و صگر يخابر و خالي علي يخابر بَس ما يرد عليهم ، صارلنه ساعة ضبط من أجه الشيخ و أحنه ننتظر و هو ماكو ، آني ما گدرت أتحمل دموعي نزلن ، أنتبهتلي أمي و صارت تحچي وياي و تهدي بيه ، هَسه يجي و ما يتأخر و من هالسوالف ، و آني گلبي نار أخاف صايرله شي ما معقولة يتأخر لحاله بهيچ يوم

***

فرات وره ما فض الأزدحام سيارته عطلت بنص الطريق ، و بالصدفة موبايله طلع ناسي بالبيت ، نزل شاف السيارة حاول يصلحها بَس يحتاجلها وكت و هو ماعنده وكت تأخر حيل ، قفلها و عافها بمكانها و أجر تكسي و رجع للبيت ، وصل و لاگوه رافد و صگر ...

صگر : وييينك أنتت يووول؟؟

- مستعجل بعدين أحچيلكم السالفة

رافد : يلااا بسرعة يول

راح للغرفة بدل ملابسة بساع و نزل ، رافد و صگر بالديوانية و وياهم الشيخ ينتظرون فرات ، و فرات كلساع جايه واحد يباركله و يلهي بي ، هو مستعجل الشيخ صارله فوگ الساعة ينتظرهم يعني ما يدرون سوكت يمل و يعوفهم ، وصل فرات للديوانية و قطعلهم مهر الشيخ و كملو ، النسوان بالصالة سون مجال لـ فرات و رافد و دخلو للبنات ، رافد مو مصدگ شغل موسيقى سلو موشن و جر نَفس و صارو يرگصون ، حاضنها و يرگص وياها و يضحك كأنه سوه أكبر أنجاز بحياته من أخذها و صارت أله

عشق
أجه فرات و وگف يمي ، لزم إيدي و حچه ...

- و أخيرًا صرتي خطيبتي

- وين چنت وگعت گلبي عليك

- سلامة گلبچ يـَ گلبي ، سالفة طويلة بعدين أسولفها

- المهم أجيت

- عشگي

- روحها

- صدي عليه شو

أنداريت عليه أباوعله و هو يباوعلي بنظرات كُلها حُب و مركز بيه و ناسي العالم و الهوسه اللي حواليه كأنو ماكو بَس آني وياه بالمكان ، طلع علبة من جيبه مغلفة بطريقة كلش حلوه فتحه و طلع منها گلاده ذهب قلب و محفور بنصه أسمائنه آني وياه بطريقة مميزة
فتحها و تقرب مني لبسني ياها و باسني بگصتي ، حچه ...

- هاي مو گلادة أعتبريها گلبي و صار معلگ برگبتچ و لو مَره فكرتي تهجرين گلبي و تعوفيني ، الگلادة هاي تشيلينها و تذبينها

- مستحييل بيوم من الأيام افكر أتخلى عنك و عن گلبك ، و هاي الگلادة راح تبقى وياي و ما راح تفارگني دقيقة وحدة

أبتسم و أندار يباوع لـ رافد و نَفس منسجمين سوه و يضحكون ، أندار عليه و گادني من إيدي ...

- تعاي

- وين؟

- نرگص وياهم

- مو ما أعرف

- أعلمچ

- فرات خاف أتفشل عيب والله

- آني وياچ لا يهمچ

وگفنه بالوسطه و هو شال إيدي و خلاها على چتفه و إيدي الثانية لزمها بإيده ، و إيده الثانية خلاها على خصري ...

- شلون ما أتحرك آني أنتِ تتحركين

- تمام

گمت أسوي مثل ما هو يسوي ، آني ما أعرف أرگص هيچ رگص بَس هو وياي و علمني طلع سهل ميرادله شي ، دنگ راسه و خلا يم أذني و همس ...

- شيصير لو اليوم عرسنه و ينتهي كُلشي و تصيرين يمي

- المهم هَسه آني ألك و أنت ألي گدام العالم كُلها

- بَس آني ما أتحمل أشوف هالعسل گدامي و ما أضوگه

- شتقصد؟

حچه و هو يحط أصبعه على شفايفي ...

- شفايفچ دوخني

- فرااات ، ترهه أستحي شبييك

ضحك و جرني لصدره و حضني

نَفس
ما مصدگة رافد گدامي و صار ألي ، فرحتي هاي نستني كُل الضيم اللي مريت بي ، طفت الموسيقى و وگفنه ، رافد شال إيده و وخر شعري عن رگبتي ، دنگ و باسني منها ...

- رااافد ، عيييب مو گداام العالم

- هااا عَجل تعاي للغرفة نكمل غاد

- يبوووو والله أنت متستحي

- هو عليش أستحي غير أنتِ حلالي

- إي بَس تره اليوم حفلة المهر مو العرس

- المهم ، آني خليني أروح لأن إذا ضليت هينه مگدر أگضب نفسي

راح و صاح فرات ...

- فرااات ، يلا أمشي الچوبي راح يبلش

- تريدنه نلعب چوبي و أحنه بالقوط ، ميصير يمعود

- دمشي ، هَسه قاط دشداشة ما يهم

أخذ فرات و راحو طلعو بره ، شوي و رحنه نباوعلهم من الشباك ، فرات راد يلعب بَس عمو عَلي ما خلا لأن خاف لا يرجع الكسر لرجله ، أجو مجموعة و صارو يدبچون و رافد و وياه صگر گدامهم يلعبون ، رافد فرحان و يلعب و يغني ويه المطرب ، لعبهم چان كلش حلو ، آني أول مَره أشوف أحد يلعب چوبي گدامي ، چنت أسمع عنه بَس ، للعصر و أنتهت الحفلة و كلمن رجع لبيته ، و أحنه هَم رجعنه للبيت

***

يامور
لليل و أجه قاسم و أخذني للبيت مالنه ، وصلنه و دخلنه چان هو مكمل كلشي بَس يرادله شوي شغل ، غيرت ملابسي و رحت أساعدة نلم بالغراض ، جاي أشيل بالكرسي و باوعت لـ قاسم واگف و يباوع لأيدة و الدم يجري منها ، عفت الكرسي و رحتله ...

- أوگف هااي شبييهاا أييدك

- مابيها شي جرح زغير

أخذته للمغسله و غسلت إيده من الدم ، جبت بلاستر و تعقيم و عقمتله الجرح و شديته ، حچه ...

- يامور عوفي هذا الجرح ، گوليلي مسامحك و خلي الجرح اللي بگلبي يطيب

- مسامحتك

- گولي والله

- والله

أشو هذا شالني و صار يفتر بيه و هو يضحك ...

- يااا قاسم شبييك نزلني

نزلني و لزم وجهي بإيديه الثنين ، حچه ...

- أوعدچ ما راح تشكين مني أبد ، راح أبقى أحبچ و أداريچ العمر كُله

- و آني هَم راح أبقى أحبك

باسني من شفايفي و طلع گال عندي شغلة أكملها و أرجع

***

مُهره
اليوم رحت للدكتورة ويه عمه و سويت سونار و طلع الطفل ولد ، فرحتي هاي ما أنطيها لأحد غير شهم ، ردت أسويها اله مفاجأة و گلت لعمتي حَتى عمي لا يدري علمود ميگُله ، گعدت أنتظرة بالغرفة بَس تأخر ، بقيت گاعدة و أنتظرة لحد ما غفيت و آني گاعدة ع القنفة

حسيت على شهم و هو يبوسني ، گعدت و لگيته گاعد يمي ...

- ليش نايمة هنا حَبيبي؟ ، تتعبين هيچ

- چنت أنتظرك

- و ليش تنتظريني چان نمتي ، فرضًا آني ما أجيت ، تبقين للصبح هيچ !!

- مو ردت أگلك شي

- شنو؟!

- اليوم رحنه للدكتورة آني و عمه و سويت سونار

- إيي؟

- و طلع بيه ولد ، راح يجينه ولد شهم

- عليچ العباس؟

- إي والله

ضحك و هو يحمد الله و يشكره ...

- حنسمي الياس مو؟

- إن شاء الله ، إذا ما حابته نغيره

- لا بالعكس كلش حبيته

- چا خوش

سكت و بعدين رجع حچه ...

- مشتاقلچ كلش

- و آني هَم

تقرب مني و باسني من خدي و گام يبدل ملابسه ...

- اليوم حفلة فرات و رافد مو

- إي

- شگد چنت أتمنى أحضرها

- حَتى آني بَس لا اگدر أعوفچ و أروح و لا أگدر آخذچ وياي

راح تمدد بالفراش و گال ...

- طفي الضو و تعاي

طفيت الضوه و رحت تمددت يمه ، حچه ...

- تعبان رايد أنام على صدرچ

- سلامتك من التعب يگلبي

تقرب عليه و دفن راسه برگبتي و حضني من خصري

***

يامور
بقيت أنتظر قاسم لحد الساعة 11 ، أنفتح باب الغرفة و دخل ...

- تأخرت وين چنت؟

- أعرف والله ، بَس چان عندي شغل

راح گعد على طارف الچرباية و آني من تطمنت عليه كعدت ع الطارف الثاني و أنطيته ظهري و گمت أمشط بشعري ، شوي و حسيته وراي ، وخر شعري للصفحة الثانية و زاح الفستان عن چتفي و باسني منه ، حچه ...

- شرايچ نسوي طفل

- بَس ...

- ششش ، آني رايد طفل

سحبني عليه و خلاني بحضنه ، گال ...

- آني عمري ٣١ و أنتِ ٢٩ شوكت تردين نسوي أطفال لحد ما ندخل الـ ٤٠ !!

- و من نسوي أطفال منو يدير باله عليهم ، إذا أنت تشتغل و آني أشتغل

- هاي محلوله ، أنتِ تردين طفل مني لو لا؟

- شهالحچي قاسم ، طبعًا أريد

- خوش

***

عشق
گعدت متأخرة لأن البارحة تعبت ، گمت توضيت و صليت و نزلت لگيت فرات ديتريگ ...

- صباح الخير حُبي

- صباحي أنتِ يـَ عشگي ، يلا أگعدي تريگي علمود أوصلچ بطريقي للكلية ، تروحين مو؟

- إي أروح طبعًا ، صارلي يومين ما رايحة

- تمام ، آني رايح أنتظرچ بره ، أنتِ كملي على راحتچ

- ماشي

طلع و آني بقيت أتريگ ، كملت و رحت صبحت على ماما و طلعت لغرفتي ، بدلت و لبست فستان أحمر و وياه شيلة بيجي و رهمت وياه حذاء كعب بيجي بَس مو عالي حيل ، شلت جنطتي و كتبي و نزلت جوه ، طلعت لـ فرات لگيته گاعد ينتظرني بالسيارة ...

- خوما تأخرت عليك؟

- لا

مشه و آني طلعت المرايه و قلم الحمره حَتى أطوخها شوي لأن حسيتها مو حلوه ، حچه هو ...

- لا تطوخينها

- ليش

- هيچ أحلى

- ما دام أنت تشوفها هيچ حلوه ، خلص حلوه

أبتسم و رجع نظره للطريق ، وصلنه و ردت افتح الباب بَس ما أنفتح ...

- فرات الباب مقفول ، أفتحه

- ما أفتحه

- ياااا ، مو وكت شقاك فدوة حَبيبي أفتحه راح أتأخر

- بوسيني و أفتحه

- فراااات

- يلا عيني يلا

تقربت منه و بسته من خده ...

- يلا أفتحه

ضحك و فتحه ، نزلت وهو راح ، دخلت للجامعة و تلگتني أسراء ...

- هلووو

- يااا هلوو ولچ ، منو هذا اللي بستي و نزلتي؟

- هههههه ، ولچ على كيفچ ، خطيبي هذا

- گولي والله

- والله

- لحظة لحظة تذكرت ، هذا مو أبن خالچ الصاك؟

- ولچ لتزحفين ، خطيبي أگُلها

- ولچ ما قصدي بَس دا أسأل

- إي هو ، يلا أمشي خل نفوت محاظرتي راح تبلش

***

فرات
جاي أمشي بطريقي للمعرض ، أنتبهت گدامي سيارة صگر واگفة على صفحة ، طبگت سيارتي و نزلت ، رحتله هو شافني بالمرايه و نزل جه عليه ...

صگر : ستسوي هنا فرات ، أرجع للسيارة بساااع

- ليش ، و أنت شعندك واگف؟؟

- خطرر هناا خطررر ، أرجعع فرااات بسـ ...

قاطع كلامة صوت الرمي اللي ثار من كُل صوب ، جه يركض عليه و رحنه بصف السيارة نتحامى بيها ...

***

شهم
چنت نايم و فزيت على صوت الموبايل ، گعدت على عيوني النوم ، ردت أجاوب بَس فصل ، باوعت الساعة بالـ 9 و عشر مكالمات فائتة من سجاد ، بسرعة دگيت عليه و جاوب ...

- أللحگ شههمم ألححگ

- خير شكو يا ستار ، شبيك سجاد؟؟

- الشُحنة اللي البارحة واگف عليها بنفسك و مشيتها كاضينها الشرطة ع الطريق و لاگين بالسيارات نفسهن مخدرات مو بالمواد المحمله بالسيارات ، يعني رحنه بيها ولك

- شتحچي أنت سجااد؟؟!

- تعال بسرعة خل نشوف شنسوي بهالمصيبة

- زين زين جاي

سديت الموبايل و بدلت بسرعة و طلعت ، وصلت للشركة و دخلت ، لگيت سجاد يصفگ إيد بإيد ...

- شلوون صاار هييچ سجااد شلوون؟؟

- ولك آني شمدريني ، مو البارحة أنت أشرفت ع التحميل بنفسك؟

أجيت أحچي و سمعت صوت جاي من وراي ...

- السلام عليكم

أنداريت و شفت الشرطة جايين ع الشركة ...

- يا هلا و عليكم السلام

- أنت شهم سلام الفارس؟

- إي آني !

- عدنه أمر بألقاء القبض عليك ...

********

يتبع ...

شلونهن القفلات ، هالمره قفلتين مو وحدة🙂💞
يلا عيوني لا تنسونه من التفاعل الحلو و أهم شي التصويت و التعليق بين الفقرات

تعالو أنستا

سحر الدليمي