رواية عشگ الفرات ( عِندما تَهوى القُلوب ) الفصل التاسع والعشرون 29 - بقلم سحر الدليمي

فرات يگول لـ عشگه :
- حَتى و أنا أصارع الموت قلبي ينبض بأسمكِ .

***

- و هَسه شاللي ناوي عليه يابة؟

- تعال گرب يَبوك ، و آني أگُلك عَلى شنو ناوي

- أسمعك يابة

- هذا السوينا كُله لا شيئ گدام اللي براسي

- و شنو اللي براسك؟

- هالمره رايد أضربه بأعز شي على گلبه

***

فرات
صار الليل و الكُل نامو ، رحت لغرفة أبوية أشوفه و أتطمن عليه ، دگيت الباب و سمعت صوت أمي ، فتت ...

- هااا يوم شلونه أبوية

- يمه جيت و الله جابك ، أبوك مدري شبي بَس يون و أحاچي ميرد عَليه

تقربت يمه ، حطيت إيدي على گُصته ، رجعت شفت حرارة جسمه و مصخن نار ...

- يمه أبوي مصخن

- يابة ، تسمعني ، جاوبني أبو صگر؟؟

- و هَسه شلون أبني

- الدكتور گال ما لازم يصخن موزين عَليه ، راح أروح أجيب مَي أسويله كمادات

رحت جبت مي بارد و قطعة قماش نظيفة ، گمت أسويله كمادات بلكت تنزل حرارته ...

- إذا ما فكته الصخونه آخذه للمستشفى

- بهالليل ، والله أخاف عليكم فرات

- شسوي يمه خوما أخلي يضل هيچ ، أنتِ نامي آني أضل سهران على راسه

- شينومني و أبوك بهالحالة

ضليت گاعد على راس أبوية و أمي وياي ، لحد ما أخذها النعاس و نامت ،صارت الساعة بالـ 3 و آني غفيت بَعد ما حسيت وضع أبوية تحسن

***

شهم
رجعت للبيت متأخر ، فتت و لگيت الأضوية كُلها مطفيه ، صعدت لـ غرفتي شفت الضوه معتلگ ، ما ردت أدخل بالبداية بَس بعدين فتحت الباب و دخلت ، شفت مُهره نايمة ع الچرباية و شعرها مفتوح و نازل على عيونها و رگبتها ، تقربت عَليها و وخرت شعرها عَن وجهها ، أنصدمت من شفت رگبتها و صدرها ، تذكرت اللي صار الظهر ، هاي شمسوي بيها آني؟! ، مستحيل آني أگدر أأذيها هيچ ، شلون سويت هيييچ بيهااا شلوون ، دنگت عليها و بست راسها و هي گُبل فزت و أبتعدت عني و هي تبچي ...

- عوفنيي فدوووة لا تقترب عَليييه علييكك الله

گمت من يمها و طلعت بره الغرفة كُلها و آني أفكر شلون سويت بيها هيچ شلون خليتها تخاف مني من بعد ما چانت تتحامى بيه ، آني اللي تزوجتها حَتى أحميها من حيدر و تالي سويت بيها هيچ !!

***

عَلي صَحى الصبح و لگه نجاة نايمة بصفه و فرات گاعد ع الكرسي و حاط راسه على طارف الچرباية و نايم ، عَدل گعدته و أرتچه على ديكور الچرباية ...

- فرات ، گوم نام و أرتاح بغرفتك وليدي

گعد فرات على صوت أبوه ...

- ليش نايم هنا بابا؟

- البارحة صخنت حيل و ما گدرت أعوفك ، شلون صرت هَسه؟

- على الله

حط إيده على راسه حَتى يشوف حَرارته ...

- لا الحمدلله ماكو صخونه

مَرت أيام قَليلة و شهم و مُهره ميتاحچون ، مُهره صايره تخاف حييل من شهم و من تشوفه يدخل للغرفة تطلع منها و هو ميحچي وياها و حَتى مينام بالغرفة ، عَلي تحسن وضعه شوي ، و حسين و سلام و وياهم شهم جو زارو

شهم
واگف بالحديقة الخلفية و آني متندم على سوء ظني بـ فرات ، شلون فكرت بي هيچ و آني أدري بي يحب عشق و هوَ أللي أصر عَليه أنُ أعترف لـ مُهره ، أحس بهالفترة عَقلي طار من راسي ، أجاني فرات ...

- شعندك هنا؟

- ماعندي شي بَس حَبيت أبقى وحدي

- هااا عَجل آني رايح

أندار حَتى يروح ، لزمته من إيده و صحت ...

- فرات

ألتفت عَليه ...

- هَلا

- أنت تعرف شگد آني أحبك مو؟

- ههههه إي أعرف

- چا أريدك تسامحني

- أسامحك عَلى شنو يول؟ ، شو أنت جاي تمسلت !!

- خاف بفد يوم غلطت بـ حَقك فـ سامحني

- يابة مساحك دنيا و آخرة

أبتسمت و درت وجهي ، رجع حچه ...

- شوضعك ويه الحُب بعد ما تزوجتها؟

- آخخخ ولك ، شاعلة بگلبي النار هالبنيه

- ليش شصاير

- أكتشفت أنها چانت تحب شخص قبل ما أعقد عليها

- و منو هذا

صفنت ، شگله؟! ، البنيه الهواها گلبي تحبك و بسببك مو رايدتني ...

- ما أعرف ، بَس ساعة العرفت تخبلت فقدت أعصابي و ...

سكتت ما كملت ...

- شبيك !

- خوفتها مني كلش فرات ، صارت كُل ما أگرب صوبها تبتعد عني و تصير تبچي و تتوسل أبعد عنها و ما أطلع گدامها ، حَتى من أنام بالغرفة هيَ تروح تنام بغير غرفة ، أنتَ تعرف شلون چانت علاقتنه قبل الزواج ، هَسه تغيرت تغيير جذري و آني السبب

- شهم ضربتها؟!

- عساها إيدي بالكسر لو چنت مادها عَليها

- خَلص أنسى و خلها يم ربك هوَ يدبرها ، أمشي تنروح نگعد يمهم غاد

راحو فرات و شهم للحديقة اللي بوجه البيت ، چانو گاعدين صگر و عشگ و نجاة ، گعدو وياهم ، و لارين مچلبه بملابس أبوها و تبچي تريده يروح يشتريلها نستله ، حچه فرات ...

- شبيها لولو

- تريد نستله ، گوم أشتريلها من هذا المحل اللي براس الفرع

- أله آني مخلفها و ناسيها ، مو أنت أبوها گوم أشتريلها

- هااا و منو اللي يمشي و يگول لارين بنتي ، شو هَسه طلع كُله حَچي !!

- يابة بنتي ، و هائها گايم أشتريلها ، يلا لولو تعاي

- لا لتاخذها وياك ، تتعلم ع المحلات و مابينه حيل

- هَم صَحيح

لارين سكتت من عرفت راح يجيبولها نستله ، گام فرات و طلع

بالشارع سيارة واگفة قريب ع البيت ، من شافو فرات طلع يمشي بالشارع حركو السيارة بسرعة بأتجاهه ، فرات چان حاط أديه بجيوبه و مدنگ راسه ، حَس على صوت السيارة ، ويه ما رفع راسه ، دعمو و أنهزمو ، وگع فرات ، اللي گاعدين بالحوش فزو من صوت السيارة ، راحو شهم و صگر يشوفون شكو و نجاة لحگتهم و إيدها على گلبها و وياها عشگ ، طلعو الولد ، و أنصدمو باللي شافو ، فرات واگع بالگاع غرگان بدمه ، راحوله يركضون ، راسه مجروح جرح قوي و ينزف ، صدره نابته بي قطعة قزاز لأن من صدمو جامت السيارة تكسرت ، جه عليه صگر و صار يحچي وياه ، هوَ صاحي بَس ميرد عَليه و تنفسه ضعيف ، طلعت عشگ و وياها نجاة شافت فرات بهالحالة و صارت تصيح ، شافها صگر و صاح بـ شهم يدخلها جوه و شهم واگف و مصدوم لحد ما حَس و راح دخلهن جوه و طلع لـ صگر ، خابرو ع الأسعاف و جو أخذو و راحو للمستشفى

نجاة دخلت للبيت تبچي بصوت عالي و تصيح " أبني راح مني " ، سلام و حسين گاعدين هُمه و جسام و عَلي بالديوانية ، سمعو حس الصراخ گامو يشوفو شكو ، وصلو للصالة و شافو نجاة و عشگ يبچن ، عَلي راح لـ نجاة يفتهم شبيها ...

- نجاااة ، هاااي شبييچ لييشش هالببچيي !!

نجاة ما جاوبته و هي مستمرة تبچي ...

- شو حاچيني أم صگر شبيچ

رفع راسه لـ عشگ ...

- عشق بنيتي شكو ليش هالبچي؟

جاوبته عشق و هيَ تبچي ...

- خالو ، فرات و هو طالع للمحل دعمته سيارة و صگر و شهم أخذو للمستشفى

- شنوووو !!

گام على حيله راد يطلع ، وگفه حسين ...

- وين رايح عَلي

- رايح أشوف أبني

- أوگف ، أنت بعدك مريض و الحركة موزينة عَليك

جسام : إي عَلي حچي حسين صحيح ، أنت ضل هينه و آني و سلام رايحين للمستشفى

- بَس أشوفه و أتطمن عَليه ، حسين بغلات سجاد عندك أخذني لفرات

- يخوي لا تحلفني

- تاااخذذوونيي للمستشفى لووو آنيي أگووومم أووليي؟؟؟

من شافو مُصر ع الروحه ، گام حسين و أخذه و راحو للمستشفى ، و سلام ضل يحاول يهدي بأخته اللي أرتفع ضغطها من البچي و ضلو حايرين بيها

***

صگر
وصلنه المستشفى و دخلو بسرعة للعمليات و آني گعدت ، أتذكر منظره و هو غرگان بدمه ، راسه ينزف و صدره ينزف ، ضليت أدعي الله يفكه منها و يگوملنه بالسلامة ، مستحيل أتحمل موته آني ، والله أموت وراه ، گعدت ع الكراسي أحس حيلي راح ، شهم گبالي رايح راد بالممر و مو گادر يگعد ...

صگر : أنهد حيلي بالقرآن

شهم : منوووو دعممههه شلووون دعممهه شلووون !!

- ماكو غيره حارث النگس ، أگص إيدي إذا ما طلع هوَ وراها

گلت هيچ و شهم عافني و طلع ، لحگته و وگفته ...

- وين رايح يول؟؟

- رااييحح أششرربب منن دممههه لـ هذا حاااررث

- مو وكتها هَسه شهم ، خلينه نتطمن عَلى فرات ، و وراها آني أللي اشرب من دمه

واگفين و جونه أبوية و خالي حسين ، جه عليه أبوية و چان الخوف واضح بعيونه ...

- وين أخوك يـَ صگر؟؟

- يابة أنت شجايبك هينه !

- فرات وين صگر؟؟

- بالعمليات

- شلون وضعه

- ما أعرف يابة ، لا تخاف ماعليه شي إن شاء الله

- ماعليه شي و دمه تارس دشداشتك !

گال هيچ و گعد ع الكرسي و حَط إيده على راسه ، أنتبهت لـ دشداشتي كُلها دم و ما منتبه ، حسيت روحي طلعت ...

- شهم ، آني رايح أبدل ملابسي ، إذا صار شي خابرني

هزلي براسه ، عفتهم و طلعت

***

عشق
ذابت روحي من شفته بهالحالة ، مَعقولة يموت و يعوفني؟ ، و گلبي اللي تعلق بي و حَبه أكثر من إي شي بالدنيا ، شلون أقنعه أنُ حَبيبك خَلص راح و بعد ميرجع ، أمي گاعدة بصفي ، حچيت و آني مخنوگه من العَبرة اللي بصدري ...

- ماما فرات راح يموت !!

ألتفتت عَليه ...

- أسم الله بنيتي لا تگولين هيچ ، إن شاء الله يتعافى و يرجع لحيله

- ماما أنتِ مشفتي شلون چان وضعه

- الله موجود ماما

راحت يم خالة نجاة اللي تعبت من گد البچي ، شوي و أنفتح الباب و دخل صگر باوعنه دشداشته بيها دم ، خالة شافته هيچ و رجعت تبچي ، راحتله و لزمته من ملابسه ، حچت و هي تبچي ...

- هذا دم أخوك مو !!

- يوم كافي لا تسوين بنفسچ هيچ ، آني من غير شي أحس گلبي ممرود

- يمه فدوة رحت لطولك آنـه ، بَس أخذني للمستشفى أريد أبقى يمه و أتطمن عليه

- مگدر آخذچ يمه والله مگدر

باوع لأمي أشرلها تجي لخالة ، و هو أندار لعمو سلام و صار يحچي وياه بعدين عافنه و طلع للغرفة و لحگته رُسل

رُسل
رحت للغرفة فتحت الباب و شفت صگر جاي يبدل بملابسه ، ما حچيت وياه و آني أشوف شلون مقهور و گلبه ملچوم على أخوه ، كمل و حچيت ...

- صگر شلونه فرات؟

دحگ عليه و بعدين گعد ع الچرباية و حَط إيده على راسه ، گعدت بصفه و حَطيت إيدي على كتوفه ...

- صگر ، فرات صايرله شي؟

- بعده بالعمليات منعرف عَنه شي

- حَبيبي ، إن شاء الله يگوم بالسلامة ، أنت بَس أدعيله

- إن شاء الله ، يلا آني راجع للمستشفى ، أمي گولولها مابي شي و وضعه زين حَتى ما تخاف ، و ديربالكم عليها رُسل

- بعيوني لا تهتم

طلع صگر و آني رجعت للصالة ، گعدت و يمي لارين خايفة لأن تشوف عمتي تبچي ، جتني عشق ...

- رُسل ، صگر گال شي على وضع فرات؟

- يگول بعده بالعمليات ميعرفون شي عَنه

***

مُهره
من ذيچ الليلة و آني أحاول ما أطلع گدام شهم أبد ، صرت كلش أخاف منه أحسه مو شهم القديم بَس معَ ذلك أحس بفراغ بغيابة ، صارله يوم بَس غايب و آني حَسيت بالفراغ بدونه ، مع أنُ ما أحچي وياه و لا أگعد يمه بَس چنت أحس بوجودة و هذا يكفي

بـ هاي الفترة حَسيت أني كسرت گلبه كلش ، الكلام اللي گتله ياه و شلون گلت أني أحب فرات گدامه ، مهما يكون آني أبقى على ذمته و ميصير يطلع مني هيچ حچي ، بَس آني شسوي من سمعت هالخبر گمت ما أعرف شحچي ، نزلت جوه عند عَمه لگيتها گاعده بالمطبخ ، گعدت يمها ...

- عَمه ، مو علساس يجون اليوم من الأنبار شو ما أجو؟

- ميجون اليوم يمه أجلو جيتهم

- ليش؟!

- فرات أندعم ، و هَسه هو بالمستشفى و حالته خطره ، و ميريد يجون أله يتطمنون عَليه

- عَمه أنتِ صدُگ تحچين؟؟؟؟

***

صگر
طلعو فرات من العمليات و حولو ع العناية ، الدكتور گال لازم يبقى تحت المراقبة وضعه بعده خطر و مو مبين شوكت يصحى ، أدحگ على أبوية حَط إيده على راسه و صار يفرك بي و يعصر بعيونه ، رحتله ...

- يابة بيك شي؟؟

لزم إيدي حيل حسيته راح يگع من طوله ...

- على كيفك يابة شو أگعد أرتاح ، رافد مي بسرعة

راح رافد جاب مي و أنطاه يشرب ، حچه خالي حسين ...

- عَلي كافي لازم ترجع للبيت و ترتاح ميصير هيچ

- لا لا ، آني أضل هينه ، بَس أشوف عن فرات

جسام : سمعت الدكتور شگال عن وضعة ، خلينه نرجعك للبيت لا يصير بيك شي و نصير بثنين

- يلا يابة أبوس إيدك أرجع للبيت و هَم طمن أمي هسه تلگه حالها بالويل بلكت من تشوفك ترتاح

بالگوة قنعنا يرجع للبيت ، أخذو عمي و خالي و رجعو و آني و الولد ضلينه بالمستشفى

***

رُسل
رحت لغرفتي حتى أرتاح شوي ، من الصبح واگفين على أعصابنه ، تعديت من يم غرفة ريان و سمعت صوت شهگاتها كأنها جاي تبچي ، بسرعة فتحت الباب و دخلت لگيتها گاعده بالگاع و راچبه ظهرها ع الچرباية و تبچي ، من شافتني سكتت و مسحت دموعها ، رحت يمها ...

- رياان ، هااي شبييچ يوليي؟؟

- عفيه رُسل ماكو خَبر عن فرات؟

- آخر مره صگر يگول بعده بالعمليات ، و هَسه أدگ عَليه ميجاوب

نزلت راسها و صارت تبچي

- ليش تبچين حَبيبتي؟

- أخاف يموت رُسل ، والله أموت وراه إذا مات ، آني ما أتحمل يصيرله شي

- أششش لا تفاولين عليه ميصير ، گومي غسلي و خلي ندعيله

***

عشق
وصلو خوالي و وياهم عمو حسين ، خالة راحت وگفت گبال خالو عَلي ، حچت ...

- هااا عَلي طمني شلونه فرات؟؟

خالو ساكت ميحچي شي و حتى ميباوع بوجه خالة ، رجعت حچت ...

- شوو سااكت ، فدوة أحچي و ريح گلبي !!

خالي بقى ساكت و باوع لعمو حسين كأنو يريد هو يحچي ، راح گعد ع القنفه و خله أديه على راسه ، و عمو حسين أجه لخالة ...

- هاا حسين أحچيلي

- لا تخافين نجاة وضعة زين بَس لازم يبقى بالمستشفى هالفترة

أقتنعت خالة و راحت گعدت يم خالي ، شوي و أندگ الباب طلع خالي جسام يفتحه ، و طلعو جماعة صگر جايين يحققون بالحادث ، طلعولهم كلهم حتى يتفاهمون وياهم ، شافو الكامرات مال المراقبة و اللي فاهمينه أنُ اللي دعم فرات واحد من ولد حارث ، خالو عَلي كلش عَصب و خالو جسام يهدي بي ...

جسام : عَلي ، نسوي گعده و نحلها ، هيچ أمور ما تنحل بالعصبية

سلام : إي و بالگعده تتفاهمون على كلشي و تاخذون حگكم منه ما دام ثبت أنُ هوَ المتعدي عليكم

- إييي گعده و يقشمروني بفصل چم مليون و هايهيه تنسد السالفة ، أبني بالمستشفى بين الحياة و الموت لو صار عليه شي شتفيدني فصولهم هااا؟؟

جسام : عَجل شتريد عَلي؟ ، فرات مو ميت تا نگول ناخذ زلمة بمكانه

- حتى لو ، دم أبني الطاح ع الگاع لازم يطيح گباله دم چبيرهم ، آني سكتتله چثييير ، حتى من حرگ المحلات و المعرض و آني تأذيت بي سكتت ، بَس مال تصل السالفة لولدي و أهل بيتي لاااا هينه أمحيه محي و مُحمد

- هاي شبيك عَلي ، هذا أنت الچبير و العاقل هيچ تحچي ، عَجل عليش نلوم صگر و شهم و رافد

- أنت ما جاي تفهمني يخوي ، أگُلك لو أبني مات ما يكفيني دم عشيرتهم كُلها و حگ مُحمد

خالي گال هيچ و گام راح للغرفة ، حچه عمو حسين ...

- ميخالف جسام أتركه هسه ، هو يحچي هيچ من حرگة گلبه ، باچر يهده و تنحل الأمور بالتي هيَ أحسن

- و آني شريد غير هيچ ، آني ماريد تصير بينه و بينهم دم و ثارات تجر لولد الولد

بقينه على هالحال أسبوع ، بين الخوف و القلق ، و آني طول هالأسبوع ما ضگت طعم النوم ، حتى إذا نمت أفز من نومي ، و دراستي هملتها ، كُله بسبب خوفي على فرات ، خفت لا أخسره و آني گلبي متعلق بي ، إذا ما أشوفه گدامي أحس يومي ناقص شي ، خوال فرات رجعو للبصرة من الصبح لأن ميگدرون يغيبون عن شغلهم أكثر من هيچ ، گاعدين و أجه خالي عَلي و رافد و گالو أنُ فرات تعده مرحلة الخطر الحمدلله و هَسه عادي يخلون أحد يزوره ، بَس كُلنه أنتبهنالهم وجوهم مگلوبه و ضايجين ، حچت أمي ...

- و هَسه شبيكم ضايجين غير تفرحون !!

رافد : شنفرح عمه ما تگوليلي

نجاة : لييش شصااير ؟!

بدور : ما تحچون !

عَلي : يگول الدكتور بَعَد ميگدر يمشي عَلى رجليه

بدور : يعنيي أنشلل ؟؟؟

نجاة : شتحچوون أنتوو ، شلللون ميگدرر يمشيي على ررجلييه !!

آني أحس عقلي وگف ، مجاي أگدر أستوعب اللي سمعته !! ، فرات بعد ميمشي ، معقووله ، شلوون راح يتحمل هالخبر !!

رافد : هذا اللي گاله الدكتور عمه

نجاة : يعني شنوو رااح يبقى طوول عممره مشلوول !

عَلي : ما ندري ، الدكاترة گالو حاليًا بَس ، و ما ندري إذا راح يبقى هيچ أو يگدر يرجع يمشي مره ثانية ، آني شايل هَم شلون أگُله هيچ خبر ، يا رب ساعدني

للعصر و رجعو للمستشفى و وياهم خالة حَتى تشوفه

***

مُهره
رجعت للبيت بعد ما چنت يم أهلي ، دخلت و لگيت عمو سلام ، يعني راجعين من الأنبار ، سلمت عَليه و صعدت لغرفتي ، فتحت الباب و دخلت لگيت شهم گاعد ع القنفة ، ردت أطلع بَس تشجعت و بقيت بالغرفة لأن لازم أحط حد لخوفي و أصلح علاقتي بشهم ، سلمت عَليه بَس ما رد ، گام على حيله و وگف گبالي ، حچه بنبرة حادة و عصبية مكتومة ...

- ويين چنتيي خااتوون؟

- چنت يَم أهلي ، سجاد أجه أخذني

- و ليش مگلتييليي ، طررطور آني گداامچ؟؟

- شلون أگلك و أنت چنت بعدك بالأنبار !!

- يعني مااعنندچ تيلفوون تتصلين و تبلغينيي حضرت جنابچ !

- الظاهر نسيت أنك كسرت تيلفوني

سكت و رجع گعد بمكانه ، چان ضايج و مقهور كلش ، حاولت أحچي وياه و أضيع عصبيته ...

- شهم شبيك ضايج؟

أنصدمت من نتر بيه بعصبية ...

- عففتت فررات مثثلل المييت بالمستشفى و أججييت ، يعننيي شترديينيي ألععب چووبي مثلاً؟!

عافني و طلع ، كلش أنصدمت بأسلوبه وياي صاير ميحب يحچي وياي و إذا حچه كله بعصبية و نتر ، كلش متغير شهم و كله بسببي

***

بالمستشفى ، و بوحدة من الغرف ، نايم صارلة أسبوع ، الكانونه مشكله بأيده ، و المغذي ينزل قطرة قطرة على عَدد دگات گلبه ، و يتسلل لجسمه التعبان حَتى يرجعله الطاقة اللي فقدها ، أمه وأبوه گاعدين يم راسه و ينتظرون يفتح عيونه ، أخوه أللي ما فارگه و لا لحظة واگف و ينتظرة يرجع يحچي وياه و يشاقيه و يگُله لارين بنتي و آني أبوها الثاني

فتح عيونه بَس بثگل لأن صارله هواي مغمضهن ، دحگ المكان كُله أبيض و عليه غواش ، يحس بالوجع بَس ميگدر يگول آخ ، أستجمع قوته و نطق بصوت تعبان و هو يدحگ لأمه ...

- يوم

- يا هلا بحسك يـَبعد أمك ، شلونك يـَ روحي؟

جاوبها بتعب ...

- آني شصارلي؟

حچه عَلي ...

- ما صارلك شي وليدي بَس حادث زغير

تقرب منه صگر و حچه ...

- هيچ تسوي بأخوك؟! ، وگعت گلبي يول

أبتسم و جاوبه ...

- حسب الله مثلك من عفتنه أسبوعين لا حس و لا خبر

أبتسمو كُلهم على كلامة بَس بقهر و هُمه يحاولون ميحسسونه بشي و يخففون عليه قدر الأمكان

***

شهم : هلا رافد شلونك

- أهلين حَبيبي بخير

- دومكم ، طمني شلونه فرات؟

- لا الحمدلله هَسه وضعه مستقر و صحى

- عليك الله ؟!

- إي والله

- ألف الحمدلله

- بَس أكو خبر موزين

- هااا شنوه؟!

- الدكتور يگول حاليًا حركته أنشلت ميگدر يمشي

- شللووون !!

- إي والله

- لا يا ربي ، و هَسه شالحل يعني

- ما أدري ، يگول ننتظر بلكت ويه العلاج يرجع يمشي

- إن شاء الله ، بلكي الله

- خلها على الله ، يلا آني رايح أشوفه شهم سلملنه

- يوصل ، أنت هم سلملي على فرات

- يصل إن شاء الله

سديت التيلفون ، و حچيت لأهلي وضع فرات ، طلعت للغرفة حتى أنام أحس عيوني راح تقفل من وحدهن ع التعب ، دخلت للغرفة لگيت مُهره گاعده ع الچرباية ، تمددت بصفها و گامت ، حچيت ...

- هاي وين؟

- رايحة أنام بالگاع

- ماكو نومة بالگاع تنامين هنا بصفي ، وين ما أريد تنامين فهمتي؟

- شهم شبيك وياي ، ليش لهدرجة متغير علي؟!

- ما متغير بَس جاي أعاملچ بالمعاملة اللي تستحقينها

صارت تبچي و تحچي ...

- بَس آني ما أستحق كُل هالقسوة منك

- وداعتچ تستحقين و أكثر من هيچ ، بَس هذا گلبي الأغبر ما ينطي بيچ

بقت واگفة و تبچي ، صحت ...

- كااافيي بچييي ، تععااي ناااميي خلليننيي أنططمررر

فزت من صوتي ، و تمددت بصفي بس ع الطارف كلش ، غطت راسها و بقت بَس شهگاتها اللي تزرف گلبي زرف ، بَس لازم أعاملها هيچ هيَ كسرت گلبي هواي و تحملت منها هواي بَس لأن أحبها ، و هيَ و لا مره فكرت بيه ، هيَ تستحق هالاسلوب هذا

***

صگر
صار الليل و أحنه كُلنه يم فرات وضعه تحسن شوي عن الصبح بَس ميگدر يحچي هواي ، أبوية و أمي حايرين شلون يگولوله أنه بعد ميگدر يمشي ، فجأة زاح الغطى عنه و حاول يگوم ، حچه أبوية ...

- هاا هاي شبيك وليدي؟!

- يابة بَس أريد أتمشه شوي مليت من الگعده

- لا بابا ميصير تتحرك رجلك مكسورة و الحركة تأثر ع الجرح اللي بصدرك

صگر : إي فرات بعدين تتمشى

- ما أگدر أحس نفسي مختنگ ، وخرو خل أگوم

ما گدرنه عليه ، وخر الغطى و حاول يحرك رجليه تا يگوم بَس ما گدر ، حچه و هو يدحگ علينه ...

- ما جاي أگدر أحرك رجليه ليش؟ ...

********

يتبع ...

برأيكم شلون راح تكون ردت فعل فرات؟
القفلة حلوة تره🤡
المهم أعذروني على سردي هذا لأن أحس مو حلو و مو مثل كُل مرة لأن نفسيتي چانت تعبانة حييل من الأمتحانات يعني تخيلو ضليت 5 أيام أكتب بهذا البارت ، المهم شوفونه تفاعلكم الحلو و لا تقصرون

18.kij
تعالو أنستا

سحر الدليمي