أحبيبني قبل أن أموت و أُغادر هذا العالم .
***
بين ما دنمشي حتى نطلع للسيارت و آني أحس خلص بعد ما أگدر الدنيا صارت تفتر بيه صحت فرات و دخت و ما حسيت ألا آني واگع بالگاع ...
فرات : شهههم ، شههممم ، خاليي تعااال
حسين : شههمم ، بووويه شبيك ولك شجرالك
علي : على كيفكم على كيفكم ، هاكم مي شاهدو و هو يصحى
فرات : شهم ، شهممم تسمعني جاوبني ، شبييك؟
شهم : مابيه شي مابيه شي ، بس راسي يوجعني
فرات : خشمك جاي ينزف ، شهم شبيييك؟!
- ما أعرف فرات والله
- زين زين ، گوم تا ناخذك للمستشفى
- ميحتاج
- شلون ميحتاج يول
حسين : شهم گوم بويه ناخذك للمستشفى انت صارلك ايام على هالحالة و أحنه ما ندري شنهي علتك
فرات : يلا گوم وياي ، على كيفك أستند عليه
علي : حسين أذا تريد روح ويه شهم ع المستشفى و نكنسل الروحة للگعدة
- لا علي مترهم الشيخ طالبنه بالأسم ، آني اروح ويه أبو رافد و أنت روح ويه الولد
- زين عجل
فرات
گدت شهم و صعدته بالسيارة ، چانت حالته حييل موزينه و متبشر بخير أبد و خشمه ينزف دم هواي ما أعرف شنو السبب ، شهم أول مره يصير بي هيچ ، جه ابوية صعد بصفي و تحركنه للمستشفى
- هاا شهم انگطع الدم
- لا بعده ولك
- هاك هذا كلينس
علي : شهم وليدي أرچي راسك ع الكشن و لا تدنگه بلكت يخف النزيف
- أن شاء الله عمي
وصلنه للمستشفى و دخلو شهم للطوارئ و راح يمه الدكتور ، يبينون حتى مغذي علگوله يعني وضعه ما يبشر بخير ، گعدنه ننتظر الدكتور يجي يحچيلنه شبي
***
مُهره : ماماا ، ماماااا لحگي
سليمة : بسم الله شبيچ ولچ
- ماما شهم داخ و وگع ما أدري شبي و أخذو للمستشفى
- يمه اسم الله شبي الولد ، عاد قبل شوية أمه داگه عليه تسأل علي
نجاة : على كيفچ سليمة شبيچ
عشق : مُهره حبيبيتي طولي بالچ أن شاء الله مابي شي
***
فرات
طلع الدكتور و سألناه عن وضع شهم ..
- بالبداية ، هو شكى من راسه شي او مثلاً تصيرله دوخة و هالأمور؟
علي : أي دكتور يشكي راسه و يدوخ
- من شوكت يعني شگد صارله؟
فرات : صارله أيام على هالحاله
علي : خير دكتور شبي؟
- حسب التحاليل و الأعراض اللي جاي يمر بيها ، للأسف طلع عنده ورم بالدماغ ، و هالمرض خطير حيل لدرجة أنو يقتل المريض
- لا أله ألا الله ، و الحل دكتور شنو؟
- الحل الوحيد هو العملية ، لازم نسويله عملية نستأصل بيها هذا الورم و بأسرع وقت هم ، و أيضاً لازم تعرفون أنو نسبة نجاح العملية هي 50% يعني يا أما تشفي من المرض يا أما تنهي حياته! فـ لازم تقررون شتريدون و بسرعة هم
فرات
جاي أحاول أستوعب كلام الدكتور بس أحس مخي ما جاي يجمع ، معقوله شهم حياته لهدرجة مُهددة بالخطر و احنه تونه ندري؟ ، معقوله أكو أحتمال أخسر شهم؟
***
حسين
دخلنه للمضيف و رحب بينه الشيخ و باقي الشيوخ ، و آني بالي يم شهم .
جسام : شيخ ، وياي أبو سجاد گرايبنه من البصرة جاي زيارة
- حي الله بأهل البصرة هلا و چثير الهلا
حسين : تحيا و تدوم شيخ ما عليك زود
- شنو جاي وحدك من البصرة؟!
- لا والله وياي أهلي و أبن أخوي ، بس شوي مريض ما گدر يجي
- عليه العافية
- الله يعافيك
- أگول أبو رافد ، عجل أبو صگر وين شو مو جاي
جسام : والله شيخ ، أبو صگر عنده شوي شغل بالمعرض فـ ما گدر يجي
***
فرات
گال الدكتور ، بس يخلص المغذي نگدر ناخذه و نطلع ، دخلنه على شهم ننتظر ..
علي : الحمدلله ع السلامة وليدي شهم ، خفيفة أن شاء الله
- الله يسلمك عمي
ابوية جر كُرسي و گعد بصف شهم ، حتى يحچيله السالفة كُلها لازم يدري ..
- شوف شهم ، الحچي اللي راح اگُلك ياه مو سهل ، بس خلي أملك برب العالمين چبير و لا تفقده
- خير عمي شكو؟! ، أحچي أسمعك
حچاله أبويه السالفة كُلها بدون ميزيد و لا ينقص شي ...
- يعني آني راح أموت؟!
- لا أبني متموت أن شاء الله ، گتلك أكو عملية تسويها و أن شاء الله كُلشي ميضل بيك
هنا شهم سكت دقايق ما حچه و لا كلمة ، بعدين زاح الغطه عنه و جه تا يفصخ المغذي من أيده ، يگول أريد أطلع
- هاي شبيك شجاي تسوي!!
- أريد أطلع
- بعده ما خلص المغذي أنتظر شوي
- گتلك أريد أطلع فرات!
- زين زين أگف لا تأذي أيدك ، هسه ننادي الدكتور يشيلك المغذي
أخذنه شهم و طلعنه من المستشفى ، طبعاً الدكتور كتبله شوي أدوية بس كُلها مُسكنات ، اللي تفيده هي العملية ماكو حل غيرها
وصلنه للبيت و دخلنه و آني گايده ، بعده دايخ بالگوه يمشي
صعدته للغرفة يرتاح و نزلت جوه ، ويه ما نزلت وصلو عمي و خالي حسين
حسين : هااا بشرو شلونه شهم ، وينه؟
سكتنه محد حچه شي ...
- علي متحچي شبي شهم
علي : شهم عنده ورم بالدماغ و لازم يسوي عملية بأسرع وقت
- لاااا ، گول غيرها علي!
- وداعتك هذا الصار
- وينه هسه؟
فرات : فوگ بالغرفة
حسين
صعدت بوجهي لشهم ، فتحت الباب و فتت لگيته نايم ، جريت كُرسي و گعدت يمه ، حاير ما أعرف شلون أتصرف شسوي و شلون أگول لـ سلام ، شگله أبنك مريض و أحتمال يموت!
دگ تيلفوني و طلع سلام ، جاوبته و آني متردد ..
- هلا سلام
سلام : هلا خويه شلونكم
- بخير الحمدلله
- شو صوتك مدري شلون ، بيك شي خويه؟
- هااا لا لا مابيه شي
- أي زين ، أگلك شو أدگ على شهم ميجاوب شسالفة
- ما أدري يمكن حاط الجهاز صامت
- أذا يمك أنطيني ياه
- لا نايم هسه
- شلون! ، شهم مينام بهالوكت ، خير خوما بي شي؟
- لا لا مابي شي ، بس يگول البارحة ما نمت زين
- أي زين خويه ، چا من يگعد گله يحاچيني
- أن شاء الله
***
مُهره
أنصدمت صدمة چبيره من سمعت شهم مريض بهالمرض ، ليش و شلون؟! قبل أيام ما چان بي شي نهائياً ، شهم من صغري و هو أقرب شخص عليه ، متعوده علي كلش ما أتحمل فكرة أنو يموت او يصيرله شي ، بابا قرر نرجع للبصرة باچر ، حضرنه الغراض و گعدنه ننتظر صار الليل و حطو عشه و محد أله نفس ياكل ، شهم لسه ما طلع من الغرفة ، صعد فرات حتى يتطمن عليه
فرات
صار الليل و شهم بعده ما طالع من الغرفة ، خفت لا صايرله شي ، صعدت حتى أشوفه ، فتحت الباب و دخلت ، لگيته گاعد ع الچربايه و صافن بالسگف ، رحت گعدت مقابيله ...
- شهم ، بيك شي؟
- لا
- گوم أنزل جوه
- لا هنا أحسلي
سكتت عنه و هو ما حچه شي ، وره شوي گال ...
- راح أموت فرات!
- انچب شهالحچي متموت ، أن شاء الله ، تسوي العملية و تتشافى بأذن الله
- ما أسوي عملية ، هو بالحالتين آني ميت أن سويتها أو لا
- شهممم لا تخبلنيي
- راح أموت فرات راح أموت و آني ما گايل لـ مُهره شگد آني أعشگها و أتمناها تصير حلالي ، فرات آني مو خايف من الموت ، آني اللي حاز بگلبي أني ما گلتلها أحبچ ، راح أموت و هي متعرف شگد أحبها
- متموت شهم بأذن الله متموت ، أن شاء الله تتشافى و تگوللها أنك تحبها و هي هم تبادلك نفس الشعور ، أنت بس خلي عندك أمل برب العالمين
ضليت هوواي أحچي ويه شهم و اقنع بي يسوي العملية بس معاند ميقبل يسويها
***
مُهره
أجيت حتى أنام و آني بالي يم شهم ، حتى ما رحت و شفته ما أگدر اباوع بعيونه ما أگدر أشوف أنكساره و ضعفه ، آني بعمري ما شفت شهم هيچ و نهائياً ما مستعده أشوفه ، بقيت أفكر هواي لحد ما غفيت ما أدري شلون
فتحت عيوني الصبح ، غسلت و بدلت و أخذت غراضي و نزلت جوه ، لگيت أهلي متحضرين ، شفت شهم چان وجهه أصفر و الكانونه بأيده و أحسه بالگوه واگف ، ما گدرنه نتريگ بس شهم أصر علي بابا أنو ياكل و أكل شوي بسكت و عصير و بالگوه
فرات گال لـ خالي أذا تحب أروح أوصلكم لأن شهم ميگدر يسوق ، بس گال لا ميحتاج آني أگدر أسوق
ودعنه الكُل و طلعنه للسيارة و تحركنه للبصرة .
***
صگر
صارلي يومين بديالى ، بس الى هسه ما سوينه شي لأن نريد خطة مرتبة حتى نگدر نداهم البيت ، لأن هالبيت بي أرهابيين و يحوي على كُل انواع الأسلحة و المتفجرات ، لحد هسه ما عرفنه شلهم بهاي الأسلحة او على شنو ناوين .
عُثمان : صگر ، دزيت الولد حتى يراقبون البيت زين لأن أحنه منگدر نداهم ألا نعرف الوضع
- أي عفيه ، خلي يوافونه بأصغر التفاصيل
- أن شاء الله ، زين شوكت نگدر نداهم برأيك؟
- أول شي لازم ننتظر جماعة ديالى لأن راح يكونون ويانه بالمداهمة ، و ثانياً تنشوف الولد شيصير وياهم ، يعني أحتمال المداهمة تصير لو باچر لو عگبه
***
نجاة
طلعت بره لگيت فرات گاعد بالطرمه و صافن مدري شبي
- فرات
- هلا يوم
- ماما حاچيت صگر اليوم
- أي حاچيته
- شلونه
- بخير
- و أنت شبيك؟
- مابيه شي
- ضايج على شهم مو؟
- مادام تعرفين عليش تسأليني
- والله يا ماما آني هم ضايجة علي و أبوك هم ، بس شنسوي ما بأيدينه غير ندعيله ، الله يساعد گلب فاطمة لو عرفت ، و سلام شراح يصير بي ، طول عمره چان يگول شهم ثمرة أنتظاري سنين و ماعندي أغلى منه
- شلون يعني ثمرة أنتظارة سنين؟!
- خالك سلام أول ما أتزوج بقى أربع سنوات ما أجاه أطفال و بعدين الله رزقه بـ يامور و رقية و بهذاك الوكت هواي فرح ، بقى ينتظر يجي ولد و أنتظر أربع سنين مرة ثانية و بعدين أجه شهم و فرحته صارت فرحتين .
- و هسه راح يموت
- لا فرات لا تگول هيچ يمه ، أسم الله علي أن شاء الله يتشافى من هالمرض و يرجع مثل قبل و أحسن
- شلون يا يمه و هو رافض يسوي العملية
- ماعليك خالك هو يقنعه يسويها
- و أذا سواها و مات ، لأن العملية نسبة نجاحها ضئيلة ، الدكتور يگول لو تشافيه لو تتسبب بموته! ، يوم آني ما مستعد أخسر شهم تدرين أنو هو أكثر من أخوية .
- أنت بس خلي عينك بعين رب العالمين و لا تفكر بشي سيئ فكر بس بالشي الإيجابي و أدعي لـ شهم و أن شاء الله ميصيبه شر .
***
عشق
چنت داريد أطلع بره للطرمة و سمعت خالة نجاة و فرات يحچون
فرات چان مقهور على شهم هواي و خالة نجاة تحاول تصبر بي ، ما چنت أعرف انو فرات هالگد يحب شهم ، بس همه مبينين علاقتهم كلش قوية ، حتى آني أنقهرت على شهم صح ما أعرفه غير من كم يوم ، بس حرام ميستاهل اللي صار بي ، ألله يشافي و يحفظة لأهله .
***
مُهره
دخلنه البصرة ، و وره شوي وصلنه بيت عمو سلام ، نزلنه و أجه شهم حتى ينزل بس چان دايخ ، راح علي بابا و ساعده ، دخلنه للبيت و تلگونه عمي سلام و عمة فاطمة و بابا چان گايد شهم و يمشي ، عمة فاطمة أول ما شافت حالة شهم تخبلت ...
- شههمم ، شمالك يمه شصايرلك ليش حاط كانونه؟!
سلام : خويه حسين شبي الولد ، ليش هيچ حالته ، بابا شهم شجرالك؟!
حسين : هسه خلي ندخله جوه يرتاح ، و آني أسولفلكم
فاطمة : يمه وليدي سودة علية تعال يمه أگعد هنا ع القنفة
دخلنه جوه للهول و عمة فاطمة گعدت يم شهم و لزمت أيده و صارت تمسح على راسه و تقره آيات و تردد أمانة موسى أبن جعفر ، و شهم راچي راسه ع القنفة و مغمض عيونه أحسه أرتاح شوي ، عمة فاطمة بس شافته هيچ تخربطت أحوالها لعد لو تعرف بمرضه شيصير بيها .
سلام : ها خوية أحچيلنه شبي الولد ، مو گلبي راح يوگف!
حچالهم بابا السالفة كُلها و عمة فاطمة من سمعت تخربطت أحوالها بالزايد صارت تدگ و تلطم و ماما تحاول تهدي بيها ، أما عمو سلام ما حچه و لا كلمة بس وجهه صار أصفر و علامات الصدمة واضحة علي ، صافن على بابا ما يحچي شي ...
حسين : سلام ، خويه سلام شمالك ، انت وياي؟
- شلون حسين ، شلون يعني ، راح من عندي كُلشي مابي يرجعلي مريض بهالمرض!
- أهده سلام ، بعون الله و أهل البيت خفيفة .
- أنهد حيلي يا أبو سجاد ، أنهد حيلي وداعتك .
من گال هيچ ، گُبل راحله بابا و سحبه من أيده و طلعو بره ، وگفو بالطرمة و صارو يحچون أشوفهم من الشباك .
حسين : سلام شد حيلك لا تنهار ، لا تسوي هيچ گدام شهم ، هو من غير شي مأيس و يگول راح أموت ، و اذا شافك هيچ أنت و أمه يفقد الأمل تماماً ، ع الأقل أنت شد حيلك و أسنده بهالمحنه ، هسه أهم شي تحاول تقنعه يسوي العملية لأنه معاند و ميقبل يسويها .
- و أذا سواها و مات ، مو تگول نسبة نجاح العملية %50 ؟
- مو أذا ما سواها راح يموت مابيها مجال ، ع الأقل بالعملية أكو أحتمال أنه يتشافى و يعيش ، سلام لازم تقنعه يسوي العملية .
- أي زين ، و آني راح أخابر صديقي الدكتور عُمر ، و أشوفه شيگول .
- أي بعد أحسن .
***
عشق
طلعت مره ثانية للطرمة و لگيت فرات بعده على نفس گعدته ، رحت وگفت گباله و حچيت وياه ...
- لا تضوج
- هاا
- أي لا تضوج ، تره الله چبير و ميخلي عبده
- و النعم بالله
- عادي أگعد بصفك؟
- أي أكيد تفضلي
- ليش هالگد خايف على شهم؟!
- شهم أخوي ، أذا ما خفت علي عجل على من أخاف
- شلون گدرتو تبنون هالعلاقة القوية و أنت بالأنبار و هو بالبصرة؟
ألتفت عليه و باوعلي و حچه ...
- يعني تريدين تعرفين شلون؟
- أي يعني إذا تحب
- من چنت صغير ، چان أبويه دائمًا يروح للبصرة و ياخذني وياه و يضل هواي هناك يم خوالي يعني مرات نضل اسبوعين او شهر ، بحكم شغل أبوية طبعاً ، فـ بهاي الفترة چنه آني و شهم نضل سوه ، نلعب سوه ، ناكل سوه ، ننام سوه ، فـ قوت علاقتنه من هذيچ الأيام
- و صرتو أصدقاء
- أخوة مو أصدقاء
- كلش حلو لمن عندك أخ بس مو من أمك و أبوك ، يكون سندك بكُلشي ، توگع ينطيك أيده و يحاول يگومك و أذا ما گدر يوگع وياك ، هذا الشخص فعلاً نعمة من رب العالمين
- اي شهم نعمتي من رب العالمين
- بالضبط ، يلا خلينه نفوت جوه صارت الدنيا ليل ، أخاف هسه تطلعلي البزونه و يجوز هالمره أموت .
- هههههه شگد جبانه
***
عُثمان : صگر وصلو جماعة ديالى
- لا حييل جايين من وكت لو منتظريلهم چم يوم انوب مو أحسن ، من اول ما وصلنه ديالى خابرتهم و هسه يلا جو أدري احنه جاي نلعب خوما نلعب .
- والله ياخي ذوله شغلهم مو صحيح بس شنسوي متگلي الحظ جابنه عليهم ، هسه تطلعلهم لو لا؟
- ما أطلع ، خليهم همه يجون جاي
بقيت أنتظر الجماعة يشرفون ، وره شوي دخلو 3 عساكر ، ضربو التحية و وگفو گدامي ...
- سيدي ، آسفين ع التأخير
- ههههه لا حبيبي عادي ، لو جاين وره شهر هم عادي ، نگعد و ننتظركم شوارنه أحنه
- سيدي ، والله الأمر بالتحرك أجانه متأخر
- هو الخياس كُله من فوگ آني أدري ، أنتو مالكم علاقة ، هسه اذا عدكم شي مهم گولي ياه هسه و اذا ماكو انصرفو
- لا سيدي أكو
- شكو گول
- سيدي ، أحنه مراح نشارك وياكم بالمداهمة
- عجل عليش جاين يابة ، تا نصبلكم چاي و نوكلكم كليجة ، أي غير جاين ويانه .
- سيدي القائد الأعلى گال أنو أحنه نبقى فريق دعم الكم و أنتو اللي تداهمون البيت .
- هو ما جايتني المصايب غير من القائد الأعلى الله يچرم ، يول عُثمان سمعت هذا الأفنخ شيريد! .
- سمعت صگر سمعت ، خلص خلي نداهم أحنه و بدون متسوي مشاكل ، أحنه بوضع حساس ميسمحلنه ننشغل بشي ثاني غير العملية ، صلي على مُحمد و أهده .
- اللهم صلي على مُحمد ، يا رب صبرني أنت .
وره شوي رجعو الولد اللي دزيناهم يراقبون البيت ، و أخذنه كُل المعلومات اللي ممكن تفيدنه ، حضرنه كُلشي و حاولنه ننام
گعدنه الساعة بالـ 4:00 ، تحضرنه و ركبنه السيارات و مشينه
وصلنه البيت و تقدمنه أحنه و فريق الأسناد ضلو ينتظرونه بالفرع الثاني اذا صار اي شي ننطيهم اشارة يتدخلون ...
- عُثمان ، أنت ما راح تشارك ويانه ...
********
يتبع ...
هلو بروهات شلونكم
قفلة حلوه مرتبة ما تجلط ، مداريتكم آني والله
المهم لا تنسون التصويت و تعليق حلو مثلكم و متابعة الحساب .
18.kij
هذا حسابي ع الأنستا تعالو هناك تئبروني .
سحر الدليمي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!