رواية عشگ الفرات ( عِندما تَهوى القُلوب ) الفصل الثامن والستون 68 - بقلم سحر الدليمي

لا تنسون التصويت و التعليق بين الفقرات
قراءة مُمتعة ♥️

***

- و ما بين الرمش و الرمش حچايات الگلب مفضوحة .

***

نَفس
حسيت الصبح على وجع ببطني ، وجع قوي لدرجة گعدني من النوم ، باوعت لـ رافد نايم ، أسمع اصواتهم جوه گاعدين من وقت لأن اليوم فرات و عشق يسافرون ، بقيت گاعدة بفراشي و أمسح على بطني و أقره آيات بلكي يخف الوجع ، ما فاد گمت أخذت علاج و رجعت للفراش و هَم ما فاد أصلاً زاد الوجع ، آخر شي گعدت رافد ، فتح عيونه و باوعلي ...

- هااا نَفسي شبيچ؟

- رافد بطني دتوجعني

گعد على حيله و فرك عيونه ...

- بَس لا تطلگين

- أطلگ شنو رافد ، بعدني الشهر السابع ما كملته

- مو أكو جهال يجون بالسابع و الثامن

- أوووف ما أدري رافد ما أدري

تقرب من يمي و حضني ...

- خلص حَبيبتي إن شاء الله هَسه تهودين

صار يمسح على بطني و يردد آيات و أدعيه و يتعوذ من الشيطان ، شوي هدأت و الوجع خف ...

- هاا شلونچ هَسه؟

- أشوه

- الحمدلله

گام فات للحمام و طلع نشف إيديه و وجهه و فرش شجادته و صله ، كمل و أجه يمي ، ردت أگوم ...

- أگفي شعندچ گايمه؟

- أسويلك ريوگ

- لا لا ماعليچ بريوگي أرتاحي هَسه

- مو شلون ...

- بَس أگعدي يـَ بنت الحلال

راح نزل جوه و وره شوي أجه و بإيده صينية الأكل ، خلاها گدامي ...

- يلا تا نتريگ سوه

- منو سوه الريوگ؟

- آني سويته

أبتسمت : يعني راح آكل الريوگ من إيديك اليوم

- إيي عفيه ، يلا يلا تريگي و ريگي أبني وياچ ، چنه مستعجل ع الجيه هالزعطوط

- هههههههه

گعدنه نتريگ آني وياه ، كملنه و أخذ الصينية و نزلها جوه ، و آني گمت بدلت و مشطت شعري ، أجه گعد ورايه ع الچربايه و عيونه عليه ، حچه ...

- تدرين أحسچ تشبهين أمي

ألتفتت عليه : شلون؟!

- تعاي

رحت گعدت يمه ، لزم إيدي و باسها ، گال ...

- يگولون أمي چانت حييل حلوه لدرجة كُلمن يشوفها يخطبها من جدي ، بَس هي ما چانت توافق و هي چانت المدلله عند جدي ، چانت ترفض كُلمن يجيها ، لحد ما شافت أبويه و حبته و جه خطبها و وافقت عليه

- الله شگد حلو هيچ ، لعد حقه عمو جسام لحد هَسه حزين عليها

- أبويه ما نساها و لا لحظة ، شگد چان يحبها بَس ما تهنى وياها ، ظلت وياه سنة و ماتت بَس يگول أحمد ربي أنه أنطاني ذكره منها اللي هو آني

- أممم زين أوصفلي ياها

تقرب عليه و مسح على شعري و خلاه وره أذني ...

- يگولون شعرها چان طويل حيل و أسود و سرح ، عيونها وساع و سود ، و بيضه مثل الثلج ، لا هي طويلة و لا گصيرة و جسمها حلو ، ما أعرف هواي عن شكلها هذا الوصلني بَس هي چانت حيل حلوه

- الله يرحمها حَبيبي

- آمين ، بَس تدرين شي

- شنو؟

- أحس أكو شي چبير يخصها مغبينه عليه

- شلون حسيت هيچ؟

- كُل ما أسأل أبويه عنها يتهرب من الموضوع و ميرضى يگُلي أي شي

- مو أنت تگول ينقهر من يجيب طاريها

- مو هذا السبب الرئيسي ، بَس تاليتي أعرف شمغبين عليه

- رافد أترك الموضوع ، شي صار من سنين و أنتهى لتدور وراه

- لا نَفس هاي أمي ، من حقي أعرف كُلشي عنها و كُلشي صار وياها

- زين أهل أمك وين؟

- موجودين بَس بغير قضاء

- شو و لا مره حچيتلي عنهم

- ما أعرف عنهم شي أصلاً

- ليش شعجب؟

- أبويه مانعني منهم ، لا أجيب طاريهم و لا أشوفهم و من أسألة ليش يگُلي أحسن

- يااا شنو السالفة !!

- مو أگُلچ أكو شي مغبي عني و آني لازم أعرفه

***

مُهره
طلعت بره بالحديقة لگيت شهم گاعد و يمه أوراق و جاي يشتغل بيهن ، رحت گعدت يمه ، شافني و أبتسم ...

- يا هلا بهالطول

أبتسمتله و هو دنگ ع الأوراق ...

- حَبيبي

جاوبني بدون ميباوعلي : عيونه

- أريد أرجع للكلية

رفع راسه و باوعلي : و أنتِ حامل؟!

- إي ليش؟

ذب نفس و عاف الأوراق و أنتچه ع الكرسي ، صار يلعب بشواربه و يباوع گدامه ...

- هااا شهم مگتلي ليش

- باعي مُهره آنـه ماعندي مانع ترجعين للكلية و تكملين دراستچ بالعكس هالشي يفرحني و قبل ياما طلبت منچ ترجعين بَس هَسه أختلف الوضع ، هَسه أنتِ حامل

- يعني متقبل أرجع أدرس؟

- مو قصة ما أقبل بَس أخاف عليچ و ع الطفل

- ليش شهم ماكو داعي للخوف قابل آني وين رايحة

- تعرفيني آنـه أظل أوهوس

- يعني هَسه شنو ما أداوم؟!

- مادري

- باوع خلي أداوم و إذا شفت نفسي أتعب و هالشي يأثر على حملي أترك الدوام

سكت ما جاوبني و صار يباوع للميز ...

- فدوة حَبيبي والله بنفسي أرجع للدوام ، هنا ضوجة كلش أبقى گاعدة اليوم كله بين أربع حيطان ، و لا تنسى آنـه عندي حلم و چنت أسعى حتى أحققه بَس

ألتفت عليه ...

- بَس اللي صار أجه شهم و نهى عليچ و خرب كلشي ، دمر أحلامچ و بعدچ عن دراستچ و سجنچ بين أربع حيطان

- لااا شهم لتحچي هيچ والله مو قصدي هذا ، بالعكس أنت ...

- لا مُهره آنـه دمرت حياتچ والله صحيح ، ما چنتي هيچ قبل ما أتزوجچ ، چان هَسه أنتِ متخرجة و جاي تشتغلين بوظيفتچ و چان ما صار اللي صار

قربت الكرسي يمه و لزمت إيده ...

- شهم والله مو قصدي هيچ لتفهمني غلط أبوس إيدك حَبيبي ، بالعكس والله آني كلش مرتاحة وياك و عندي أنت تسوه الدنيا و مابيها ، شهم لو ما أنت تزوجتني چان آنـه هَسه فصلية ببيت رجال أكبر حتى من بابا و الله أعلم شنو حالي ، أنت ما دمرت حياتي بالعكس تمامًا أنت نقذتني و منعت من أنُ تدمر حياتي ، آنـه وياك عرفت معنى الحُب الحقيقي ، خلص إذا دوامي بالكلية يزعجك ماريده ، أهم شي عندي أنت و أبني اللي ببطني ، أنتوا كُل حياتي

بقى صافن عليه بعدين حچه ...

- يعني مو ضايجة من اللي صار ، يعني بعدچ عن دراستچ بسبب زواجچ مني؟

- بالعكس والله شهم آنـه أحبك ، و آنـه يمك عايشة ملكة عادي شوكت ما أريد أگدر أرجع لدراستي ، بَس لو هَسه آنـه يم حيدر مستحيل أرجعلها بعمري

- خلص چا من باچر أروح للكلية و أرجعچ

- يعني أكيد مقتنع برجعتي؟

- گتلچ آنـه ماعندي مانع بَس خايف عليچ

- إن شاء الله ميصير شي يـَ روحي

أبتسم و تقرب باسني من خدي ، شلت إيدي و مسحت على وجهه ...

- ماريدك تفهمني غلط مره ثانية ، و أريدك تعرف و تتأكد آنـه مستحيل أتندم على زواجي منك ، ولك أنت روحي من الدنيا ، أنت مُنقذي

- ولچ آنـه هايم بيچ مو بَس أعشگچ

***

نَفس
صار الظهر و سوينه غده و حطيناه بَس آني ما تغديت رحت لغرفتي ، رجعلي الوجع و هالمره أقوه من الصبح ، ظليت أتمشى بالغرفة بلكي يخف ، بَس ماكو ديزيد ميخف ، متت أحس روحي دتطلع ، فات رافد شافني و أجه عليه ...

- نَفس شبيييچ حياااتيي ، نَفس دحگيي علييه يوليي

رفعت راسي أباوعله ، شفت الخوف بعيونه ...

- راح أموت رافد الوجع ديزيد عليه

- زيد تعاي أگعدي

- آخخخ ماگدر أگعد رافد ماگدر

- زين آني هَسه شسوي يا ربي ، دحگي راح أروح أشغل السيارة تا آخذچ للمستشفى

هزيتله براسي ، راح وصل يم الباب و حسيت عبالك مي نزل مني و الوجع زاد عليه صرت أصيح منه ....

- آخخخ رااافد يمكنن نززل الطفل آخخخ ولچ يمهه لحگينييي

- زين أگفي راح أروح أنادي عماتي يشوفنچ

راح بسرعة و آني ميته من الوجع أحس روحي دتطلع ، أجن عمه نجاة و عمه بدور شافني و گالت عمه بدور ...

- رافد وليدي بسرعة روح شغل السيارة مرتك جاي تطلگ

- هاااا ، تطلگ !!

نجاة : إييي ولك ماماا رووح بسررعه

راح رافد و أجت عمه نجاة لبستني عبايه و لفيت الشال شلون مچان ، أجه رافد گادني و عمه بدور شالت جنطة الملابس و رحنه وصلنه يم الدرج ، حچه رافد ...

- تگدرين تنزلين لو أشيلچ؟

- لا لا أگدر

نزلنه و آني أمشي و لازمة إيد رافد و عاصرتها حيل من الوجع ، هو حاضني و يهدي بيه ، صعدنه بالسيارة و مشينه ، شوي و وصلنه المستسفى ، دخلوني بغرفة و أجت الدكتورة فحصتني گالت عندي ولادة بَس بَعد لازم ننتظر شوي ، راحت و شوي و طب رافد ، أجه گعد يمي و لزم إيدي ...

- رافد خايفة والله

- لتخافين حَبيبتي ، بعون الله تجيبين و تگومين بخير و سلامة

- إذا متت أوعدني تظل تحبني و ما تنساني مثل عمو جسام ما نسى أمك أبد

- أگُلچ چنه الطلوگ أثر عليچ و گمتي تمسلتين بالحچي

- أوعدني رافد ، و ديربالك على أبننا و دوم أحچيله عني

- نَفس أسكتي لا تخليني أگوم أوهوس

- بَس أوعدني الله عليك

سكت و مسح وجهه بقهر ...

- يابة والله گلبي ما تسكنه وحدة غيرچ ، أرتاحيتي؟

أبتسمتله بتعب و شلت إيدي مسحت على وجهه ، أخذها و باسها ...

- الله يگومچ بالسلامة و ترجعيلي و نربي أبننا سوه

***

عشق
وصلنه السعودية ما أعرف بيا منطقة هَسه أحنه بَس المهم بالسعودية ، نزلنه من الطيارة و أخذنه الغراض ، مشينه شوي و لاگانه صديق فرات هو و زوجته ، سلموا على بَعض واحد حضن الثاني مبينه علاقتهم كلش قوية ، أجت زوجته سلمت عليه و رحبت بيه ...

خالد : وينكم يـَ رجال أنا گلت توصلون گبل كذا

فرات : أخرونه بالمطار يمعود

- أنزين المهم وصلتوا بخير و سلامة و عشاكم اليوم عندنا و تباتون بَعد

- لا حَبيبي تسلم راح نحجز بفندق

- الله يسامحك خويك موجود و تحجز بفندق أفااا عليك بَس

- متقصر بَعد روحي

- زين يلا الحين خلونه نروح ، الوالد من أمس و هو يسألني عنك ، يوم عرف أنك جاي هو اللي گالي أعزمك

- شلونه إن شاء الله بخير

- بخير بخير

صعدنه بسيارته و مشينه

ملاحظة : عيوني بالنسبة للشخصيات السعودية أكيد راح يحچون بالسعودي بَس أنتوا راح تلاحظون هواي كلمات عدهم نفس الكلمات العدنه بَس راح يكون الفرق بالنطق ، هُمه ينطقونها بشكل و أحنه ننطقها بشكل ثاني ، فـ آني هَسه جاي أكتب باللهجة السعودية للشخصيات السعودية .

وصلنه بيتهم و نزلنه ، الزلم راحوا للديوان و أحنه دخلنه جوه ، گعدت و أجت أمه سلمت عليه و گعدت ، تعرفنه على بَعض و زوجته حيل محبوبه بسرعة تدخل الگلب و أمه هَم نفس الشي

***

رافد
لليل و أحنه ننتظر ، آني ظليت ويه نَفس أهدي بيها و ما بمدي أعوفها ، آخر شي دخلوها لغرفة العمليات ، ولادتها طبيعية بَس ما أعرف ليش خايف عليها حييل و حچيها ظل يدگ براسي ، عمتي نجاة و عمتي بدور وياي گاعدين ننتظر ، شوي و جو أبويه و صگر بَس صگر ما طول رجع للبيت لأن مابي أحد بَس رُسل و الجهال ، ما أدري شگد ظلينه ننتظر ، شوي و طلعت الدكتورة ، رحتلها ...

- هاا دكتورة طمنيني شلونهم؟

- زوجتك بخير و الحمدلله ، هَسه راح نطلعها للغرفة و تگدر تشوفها

- و أبني؟؟؟

- أبنك للأسف وضعه حيل موزين

ظليت صافن عليها أحس أنربط لساني ما گدرت أحچي ، حچه أبويه ...

- يعني شنو دكتورة ، الطفل شبي؟

- الطفل وضعه موزين لأن جاي بالسابع ، أحنه هَسه راح نخلي يمنه تحت المراقية ، بَس

حچبت آني : بَس شنو؟؟

- إحتمال يموت

گعدت ع الكرسي مصدوم من اللي سمعته ، عماتي ظلن يحچن ويه الدكتورة ، جاني أبويه ...

- شد حيلك وليدي رافد

- أبني يابه ، سمعت شگالت ، أبني يجوز يموت

- لا إن شاء الله ما عليه شي ، و عاد أن مات فـ يا وليدي الله ما قاسمله يعيش و إن شاء الله ، الله يعوضك بغيره

ظليت ساكت ما حچبت شي ، وره تقريبًا نص ساعة فتت على نَفس ، چانت صاحية و تون بَس مو صاحية حيل ، ظليت گاعد يمها لحد ما صحت زين و گامت تحچي ...

- رافد وين أبني؟

ظليت حاير مدري أحچيلها لو لا ، إذا حچيتلها خاف يصير بيها شي ...

- رااافد

- هااا ، هااا عُمري

- أبني وين شو ما جابوا أريد أشوفه

- مو هَسه يجيبونه حياتي ، لازم يظل يمهم هالفترة

- أووووف

***

فرات
بَعد ما تعشينه طلعنه گعدنه بالحديقة ، خالد فات جوه شوي و طلع بإيده صينية و بيها چاي ، حطها و گعد ...

- إيييه گُلي شلونها الكبسة السعودية ، آعرفك تحبها

- عاشت إيدها خالتي ، بعدها تسوي الكبسة طيبة

- إي عجل شعبالك

- ههههههههه بعدك تخبط باللهجات

- يمعود أسكت بالگوة گمت أحچي سعودي ، ماخذ لساني ع العراقي و هَسه جيت أنت و ذكرتني بي

- هههههههه ، حقك متربي بالعراق

- إي والله ، الحين گلي و شلونه العراق

- بَس أستقر عى لهجة رحمه لوالديك

- و لا يهمك بستقر ع اللهجة السعودية ، تكلم أخلص

- العراق على حاله مثل ما تركته ، بَس حررنه المناطق من داعش و الباقي عاد أنت تعرف وضع العراق

- إيييه يخوي أنا اللي أعرف

- و أنت شلونك بَعد اللي صار وياك؟

- أنا من الله بخير لكن من الناس ماني بخير أبد

- هااا ليش ، زين تعال صدُگ شو متزوج أنت ، عجل و حَبيبتك؟!

- هههههههههه گلتلي حَبيبتك !!

- شكو يول أحچي؟!

- من بعد ما عرفت اللي سووه فيني داعش تركتني

- لا والله

- والله العظيم

- و بعدين؟

- ههههههههه ، تصدگ انها بَعد ما تعافيت كلمتني تبغانا نرجع

- و شگلتلها؟

- گلتلها ضفي وجهك و لا عاد أشوفك تكلميني مره ثانية ، اللي بينه أنتهى زي ما بغيتي أنتِ و ما لنه رجعة

- ههههههههه تستاهل

- أجل ( عجل ) تتركني عشاني مريض و مشلول و يوم أتعافى ودها نرجع لبعض ، لا بالله تخسي و أنا ولد أبوي

- ههههههههههه كفووو ضلعي ما قصرت بيها

- إييه عشان تعرف خويك ماهو بهين

- إي شلون عجل ، زين ليش تزوجت

- تزوجت بنت عمي علشان أبوي ، أنا ما ودي ياها و لا بعمري شايفها ، لكن أنت تعرف ابوي ما عنده غيري و گال وده يطلبها لي و أنا وافقت عشان ما أكسر بخاطره ، لكن علاقتي فيها سطحية جدًا

- و هي

- شفيها؟

- تحبك؟

- مدري عنها ، و أنت؟

- شبيه

- وش سالفتك و وش اللي صار معك؟

- آني سالفتي سالفة

- طيب تكلم أسمعك

حچيتله الصار كُله ، ضحك و گال ...

- أهل العراق بالعشگ أبد مو سهلين

- إيي وداعتك

- طيب خلنه نفوت ننام تأخر الوگت

- إي بالله أخذتنه السوالف

- ههههههه

گمنه و آني ويه ما گمت حسيت بنغزة بگلبي ، أنتبهلي خالد ...

- هاااا و شفيك؟؟

- فرااات ، فيك شي؟

- لا لا مابيه شي

- متأكد؟؟

- إي إي متأكد

- طيب خل ندخل داخل شكلك تعبان

- إي والله

عشق
ثاني يوم الصبح ، گعدنه و تريگنه و وداعنهم و رحنه للفندق ، وصلنه هناك و أخذنه غرفة ، صعدنه چان الفندق يجنن و ترتيبة مميز ، دخلنه للغرفة ، فرات أخذ ملابس و راح يسبح و آني بلشت أسفط الملابس بالكنتور ، كملت و بدلت ليست فستان قصير و فتحت شعري ، خليت مكياج خفيف و تعطرت ، طلع فرات و كالعادة بَس لابس تراك ، و أجه وگف فوگاي و دنگ يمشط بشعره ، آني گاعده و هو واگف يمشط بشعره فوگ راسي ...

- تره بللتني

هو سوه عناد وياي ، گام و نفض شعره من المي كُله عليه ...

- ياااا موو هييچ فراات رااح يخررب المكيااج

- هههههههههه يابه هو أنتِ حلوه بدون صخام مكياج

راح گعد ع الچربايه و جرني من إيدي گعدني على رجله ، خله إيدي على خصري و يباوع عليه ...

- متونسه؟

خليت إيدي على صدره اللي بعده يقطر مي ...

- كلش متونسه

- هو من المطار لبيت خالد للفندق شمتونسه بعدني حتى ما طلعتچ

- ما أعرف بَس المهم متونسه

سكتت و آني أمشي أصبعي على صدره و أرسم عليه شغلات ، ضحك و گال ...

- هاي شجاي تسوين يولي

- أكتب أسمي على صدرك

- ميحتاج ، أسمچ محفور بگلبي حفر

باوعتله و دنگت بسته من شفايفه و رفعت راسي بسرعة ضحك و باوعلي ، حبيت أداهره شوي ...

- فرات

- هلا

- تعرف شي

- لا شنو

- صديقك خالد كلش محبوب

شدد قبضته على خصري ، خزرني و گال ..

- نععممم؟ ، ما سمعت شوو باالله عيديي؟؟

- آخخ شبيك حتنبت أصابعك بخصري

- شنو هذا التمسلت؟؟

- هههههههه أتشاقه والله شبيك ضجت

- هذا الشقه ما أحبه يـَ حلوه

ضرب خشمي خفيف بأصبعه و گال ...

- ديربالچ

لفيت إيديه على رگبته و گتله ...

- صار يدلل حَبيبي بَس المهم ميزعل

ضحك و شالني نومني ع الچرباية و ...

( طفوا الكامره🌚 )

***

رافد
للصبح و آني ويه نَفس و هي تنام و تفز و تسألني ع الطفل و آني بكل مره أتعذرها بعذر ، لحد هَسه منعرف عنه شي آخر مره سألت عنه گالوا بعده وضعه هو هو ، گاعد يم نَفس و مدنگ و إيدي على راسي ، حسيت على صوتها التعبان ...

- رافد

رفع راسي : هااا يـَ گلبي شتريدين

- أبني ، أريد أبني وينه

- مو گتلچ يم الأطباء هُمه يهتمون بي هالفترة لأن بعده حديث الولادة

- يعني مابي شي؟

- لا يابه مابي شي

- متأكد؟

- إي

- زين أنت شفته؟

- لا بعدني ما شفته ، من يسمحولنه آخذه و أجيبلچ ياه نشوفه سوه

أندگ الباب و دخلن عماتي تحمدن لـ نَفس بالسلامة ، بعدين جه أبويه و هَم تحمدلها بالسلامة و لبسها سوارين ذهب بإيدها ...

- هاي شنو يابه طلع ذوقك حلو بالذهب

- ههههه ، شفتهن و گلت ما يلوگن غير بإيد نَفس

جاوبته نَفس بتعب : شُكرًا عموو الله يديمك ألنه

- تگومين بالسلامة إن شاء الله بنيتي

- الله يسلمك

ظلينه يومين بالمستشفى و أبني ما شفته أبد و كُل ما أسألهم يگُلولي بعده على وضعه و ميقبلون أشوفه ، نَفس ما بطلت أسئلة عنه و كُل مره أحير شجاوبها ، لدرجة گامت تبچي و تردد أريد أبني ، آني طلعت بَعد ما أگدر أتحمل أخاف أفقد أعصابي و أگُللها ، دخلت عليها عمتي بدور بلكت تقنعها ، رحت آني للدكتورة شفتها تمشي بالممر ...

- دكتورة أبني شصار عليه ، إذا مات گولي و فضينه أمه گلبها عليه و تريد تشوفه

- لا لا مو هيچ الموضوع ، آني هَسه چنت جايه حتى أگُللكم

- شتگوليلنه؟

- أبنكم بخير الحمدلله و تعده مرحلة الخطر ، چنت متوقعه يموت من شفت حالته بَس عاش و الله كتبله عمر

- بالله عليچ صحيح؟

- هههه إي والله ، تفضل وياي حتى أنطيك ياه

رحنه لغرفة ما أدري شنو بَس بيها أطفال هواي ، فاتت و طلعت بإيدها الطفل ، أخذته منها و شلته بحضني ، أرتاحيت و گلبي نزل عليه مي بارد و آني شايل أبني بحضني و أشوفه يلاعب بإيديه و يتنعوص ، تشكرت منها و رحت لاگاني أبويه ...

جسام : هااا رافد

- يابه أبني ما مات شوفه

أخذه مني و شاله و باسه و گال ...

- ما شاء الله ما شاء الله ، الله يحفظة و يطول بعمره و تفتخر بي إن شاء الله

- آمين

- شراح تسمي؟

- أنت سمي يابه

- آني؟

- إي يابه ، أول طفل ليه أريدك أنت تسمي

دحگ ع الطفل شوي بعدين رفع راسه و دحگ عليه ...

- حي الله أبو مُلهم

ضحكت : سميته مُلهم؟

- إيي

- عاش ذوقك يابه

- تعيش هني

أنطاني ياه و گال ...

- روح ودي لأمه خل تشوفه و يتطمن گلبها

فتت للغرفة چانت نَفس نايمه و عمتي ما موجودة ، گعدتها فتحت عيونها و دحگت عليه و على مُلهم ...

- أگعدي شنو متريد تشوفين أبنچ

حاولت تگعد ، مديتلها إيدي و ساعدتها تگعد ، مدت إيديها و أنطيتها ياه ، حضنته على صدرها و باسته ...

- حَبيبي أنت يروح ماما يـَ گلبي

رفعت راسها و دحگت عليه : رافد شوفه شگد زغير فدوة يعمري

- ههههههه إي بعده زغير

- سميته لو بعدك؟

- أبويه سماه مُلهم

- صدُگ؟

- إي والله ، شنو ما عجبچ؟

- بالعكس كلش حلو و غريب

- إيي

دنگت تدحگ عليه و تمسح على وجهه و هو يتنعوص ...

- مُلهم ، يا روح ماما أنت

صار يبچي و هي حارت شنو تسويله ...

- رافد يمكن جوعان

- إي جوعان هَسه أسويله مميه لأن گالو لازم يرضع مميه

رحت طلعت الحليب و سويتله رقم مثل ما گالت الدكتورة ، أنطيته لـ نَفس و گامت ترضع بي ، ظليت أدحگ عليها شلون فرحانه بـ مُلهم و تحچي وياه ، بستها من راسها و دنگت بست أبني

***

عشق
الظهر طلعنه آني و فرات تغدينه بمطعم خارج الفندق و بعدين رحنه للمول أشترينه شوي ملابس و كم غرض محتاجيهن ، بعدين بقينه نفتر و من مكان لمكان كلش تونسنه ، تعشينه و رجعنه للفندق ، فرات رأسن ذب ملابسه و نام لأن تعب اليوم من التفرفر شلعت گلبه ، آني فتت سبحت و لبست دشداشة خفيفة و رحت تمددت بصف فرات و حضنته و نمت

تالي الليل حسيت على وجع ببطني ، گعدت باوعت الساعة بالـ ٣ ، الوجع أسفل بطني موتني ، أباوع لـ فرات نايم ، بقيت گاعده و أدعي يخف الوجع بَس ماكو ما جاي يخف ، حَس عليه فرات ...

- عشگي ، شبييچ؟

- مابيه شي حَبيبي أرجع نام

- شرجع أنام ، دشو دحگي علي

- شبيچ يولي؟؟

- داحس بوجع برحمي

كف الغطى عنه و گال ...

- گومي آخذچ للمستشفى

- لا لا ميحتاج

- دگومي وجهچ أصفر گومي يابه

گمت بدلت و هو بدل بسرعة و گعد ينتظرني ، كملت و طلعنه للمستشفى ، وصلنه و دخلت للدكتورة فرات بقى ينتظرني ، گعدت تسألني بشنو أحس و حچيتلها ، فحصتني و گالت ...

- أنتِ متزوجة وله عزباء؟

- لا متزوجة

- كم صارلك و أنتِ متزوجة؟

- أسبوع تقريبًا

- أممم بعدك عروسة

- إيي ، دكتورة شنو اللي ديصيرلي؟

- أنتِ من العراق صَح؟

- إي

- يا هلا بأهل العراق ، وش أسمك؟

- هلا بيچ ، أسمي عشق

- طيب شوفي يـَ عشق ...

********

يتبع ...

18.kij
تعالو أنستا و اللي يجي يدخلي خاص يگُلي آني جديد علمود اضيفه كلوز لأن نشري اللي يخص الرواية كُله بالكلوز

سحر الدليمي