رواية عشق المومنين(أبناء الساده) الفصل التاسع وأربعون 49 - بقلم نازك الحمراني

السلام عليكم

نازك الحمراني
ابناء الساده

عندما يقسم ربّك مرّتين متتاليتين،
"فإنّ مع العسر يسرا إنّ مع العسر يسرا "
فإطمئن الموضوع يحتاج بعض ' الصبر' ،
لا أكثر..!!

بقيت اسمع بس مااكدر احجي عمتي زينه اجت صوبي
تلزمني تصبرني

-ام علي حبيبه اكعدي موزين عليج تعاي گعدي گعدي وافهمچ والله ماگو شي

وهسه خابرت امچ تجي

خوفي على سيد مهدي خلاني أشر بيدي الها افهمها اريد اعرف سيد مهدي شنو بيه بس ماتجاوبني لان ماتعرف شنو أكول

طكيت وجهي حيل عاد جاوبتني..

-هااا سيد مهدي عنده تسمم خفيف بس رب ضاره نافعه هذا التسمم چان سبب أله لان الدگتور اگتشف انو سید مهدي عنده التهاب زائده ولو باقيه بعد كم يوم چان راح بیها وتوفى وهسه صحته زينه لاتخافين انروح انا وياچ انشوفه

رحت البس النقاب والعبائه وصلنا للمستشفی رغم الاوجاع العندي دخلت والسيد چانو مطلعینه..بغير غرفه كعدت يمه يون انين خفيف وجهه عرگان گمت صوبه مسحت وجهه بیدي رغم طالع من الانعاش بس اجهزه
معلگه ارید اگتم بچیتي الخاطره امسح دموع واقراء
دعاء

-
يَا سادَتي وَمَوالِيَّ إنّي تَوَجَّهْتُ بِكُمْ اَئِمَّتي وَعُدَّتي لِيَوْمِ فَقْري وَحاجَتي إلى اللهِ، وَتَوَسَّلْتُ بِكُمْ إلى اللهِ، وَاسْتَشْفَعْتُ بِكُمْ إلى اللهِ، فَاشْفَعُوا لي عِنْدَ اللهِ، وَاسْتَنْقِذُوني مِنْ ذُنُوبي عِنْدَ اللهِ، فَاِنَّكُمْ وَسيلَتي إلى اللهِ وَبِحُبِّكُمْ وَبِقُرْبِكُمْ اَرْجُو نَجاةً مِنَ اللهِ، ارجوگم سادتي أحفظو زوجي

همست بصوت ناصي

-أكعد مولاي لا اطول لان انا اموت واضيع بلياك انت وحدك الي خليتني انسانه وحسستني انا غاليه اكعد
اجى جدي

گال

-هااا بویه حدچ تلث ساعات لان ولد عموته وگرابتنه راح یجون یشوفوه..

-صار جدي صار امي گالت وهي تدخل

-اتمددي يمه لا تگعدین الخاطر ظهرچ لایتعب
اگو قنفه چبیره یم شباك تمددت عليها وانا اردد ياابا صالح أدركني،ياامي الزهراء أدركيني بقيت اردد الى أن اجت امي جابت كرسي وكعدت عليه

گالت
-نامي يمه محد يدخل وذا دخلو انا وهذا الكرسي الثاني ساترينچ من الناس

-تعبتچ ماما

غفيت گد مابچیت وگد ماندبت واشوف نفسي مكان گله
خضار وطيور وحمام ابيض،ریحة المكان ريحة مشامه منها ابد وانا گاعده علی مرجوحه بیضه ايد تتلمس بيه
التفت على جهه اليمنى اشوف سيد مهدي مبتسم
ابتسمت اله گتله

-لیش تضحك ضحكني وياك

رد
-ماگو شي بس فرحان

-يارب دوم تفرح بس فرحني وياك

-شوفي ياام علي صديقي شاب استشهد من فتره يعني قبل لا ازوجچ وقبل لا اتخرج الیوم راح یجي

-زبن مو انت تگول شهید

-(احیاء عند ربهم)

-سيد فهمني شنو معناها

گام گمتت ویاه صار جدامي باس راسي واخذ ايدي هم باسها گالي

-اروح هسه انتي ابقي

مشى وردت أگله وین الاثر الي بجبينك بس السگتني وهو يمشي يروح يم سدره مشيته عدله مايعكز برجله ولا يعرج

ردت اصيحه شفت عين بلگاع تخوف فزیت امي والطبيبه تضرب خدي وتگلي

-گعدي كعدي ام علي

فتحت عيوني النقاب ملفوف على رگبتي

إن للمــرأة يـوم ألقـيامة مـوقفاً عـن
عفــتها ومــلبسها.. فــان جــازته
شـملتها رحــمة ألله
هنيئــاً لمن تقتــدي بــعفة الزهــراء

عدلت النقاب اريد اگلهم وینه سید مهدي دفعت الطبیبه واشوف سید مهدي متوجي على مخده گمت اله والاول مره احضنه جدام الناس گد ماخفت علیه من الحلم وجهه رغم الوجع مبتسم اليه گال

-قارورتي شبيها خايفه عليه وهيچ تحضنيني وولچ اله اسوي بعدعمليه

عدلت كعدتي وصرت قريبه منه لان اتذكرت امي والطبيبه وجدي واكفين نزلت النقاب اضيع المستحى لزمت ايده واحساسي انو احب حتى اكثر من ابني ضناي..

گالي

-تدرين ماردتچ تعرفین مسوي عمليه اخاف علیچ من القهر لان أنتي وردَ بستآني ودنِـيتـيّ الحلـــوة

هزيت راسه اله معنى اعرف

رجع گال

-سید علي مشتاق اله..وهمين اريده حتى اوصي على امه مايخليها تبچي منا لمن ارجع للبيت
لان أمه مو بس أمه هو أمي أنا وأختي أنا
وابويه أنا وذول كلهم أنتي يعني يصعب عليه اشوف أدموعچ

‏لان قارورتي هادئة كأنما على وجهها يرتاح العالم

بچیت علی حچیه وخوفه علیه لزمت ایده البیها کانولا
نصیت راسي بستها ودي أكله لا تحچي هيچ ویایه لان جاي احسد روحي على هيچ زوج وانسان نادر

يا رجلي وبعلي القوي
يا جيشي
ويامن سيفي ذراعك وسندي امام الجميع

دومه سيد مهدي یستغل كل وقت وكل لحظه ومايضيع اي فرصه اله يعبر عن حبه اليه..

رجع گال

-هاااا نبقی نبچي اريد اشوف هاي لعيون الحلوه تضحك لان موجوع..

جده صاح بيه

-كااافي يلمستخف الدكتووره هنانه تتناوع الگم لاتحچي هيچ يمي

صاح بجده وهو موجوع

-اي جدي هسه اسكت لان الدكتوره هنا لو لان انت تغار ومحترك گلبگ من عشقي الحبي ومريتي

-ولك امهيدي اركد

-جدي وحك جدك راكد انت تتحارش

بقى يشاقى ويه جده

لمحت وحده من باب الغرفه ممرضه كلش حلوه واكفه تباوع على سيد مهدي....غرت وتنرفزت مديت أيدي صعدت صدرية العمليه غطيت صدره...التفت بعدها واگفه تتناوع شافني ضجت سيد مهدي التفت للباب ورجع أبتسم عليه همس

_صيحي الممرضه تشوف الكانولا

بحلقت عيوني اله وگمت للباب ألممرضه بعدها واگفه سديت ألباب بوجهه ورجعت كعدت يمه لزم ايدي باسها مبتسم

_يفداچ عمري ياعمري أشلون غيره تمووووووووت

درت وجهي منه ضايجه لزم ايدي باسها

_أحبچ

مادرت وجهي أله

_أحبچ دوري ياعيني دوري

درت عليه مبتسمه وبدى مفعول مسكن الالم يروح
لان كل شوي يون ويسكت الى ان رن نقاله..

جابته عمه زینه گالت اله بصوت ناصي

-هذا سيد مجتبى
اخذته منها وخليته على اذن سيد مهدي...وبقو يحچون

الی آن تخربط سید مهدي وانا لازمه ايده حتى النقال اجى يطيح من ايدي اخذه جدي من عندي
صاح جدي وهو يخابر

-وووولك مجتببببببببى الله يلعن عدووووك تريد تزوج
ومنوووو البغدادية ...تعااااال لاخوك بلمستشفى وانت هناك تتمعشك

بقى سيد باقر يصيح وسيد مهدي يحاچي

-جدي لااااا تعيط بيه لااااا يعاند جدي على كيفك ويه عضيدي جدي ااه ااااأاه اخ الوجع يمووت وين الطبيب أاااخ

دخلت ام سيد مهدي طلعنها الممرضات وطلعو امي وعمتي وانا

عمتي رغم تبچي اخذت النقال من جدي سيد باقر نطته الام سيد مهدي حتى تحچي ويه مجتبى

گالت

-یمه وینك سيد مجتبى تعال الاخوك سوى عمليه الو الو

كعدنه انا وامي أتصبر عليه وانا اصبر على نفسي طلعت كتاب القران من جنطتي اقرا..مرت اربع ساعات والاطباء

كل اشوي داخلين طالعين الى ان اجى سيد مجتبى من بعيد حتى ماسلم على جده ولا علينه دخل للغرفه بقى اشويه طلع وبهدوء گلي

-تعاي خويه يريدچ السید

دخلت اشرلي سيد مهدي بئيده وجهه ذابل وتعبان فد مره گالي

-احبيبه لازم ترحين للبيت لان تعبتي..وثانيا عضيدي الي
چان یعیرني بيچ ویگلي شمالك تبقى واكف يم عمود الگلیه علمود ابنیه چنك مجدي...

هسه هو واكع بلحب
واكيد جدي ماراح يقبل فا اريدچ تجهزین نفسچ هل اسبوع تگعدین بلبیت وترتاحین حتی من اصیر زین نروح انا ویاچ نشوف البنیه الخابص الدنیه بیها

-هزيت راسي الهة واشرت بيدي شبيك

-لا ما تخربطت ردت أكوم اهدي جدي نسيت عمليتي
وتحركت بعنف وتاذت حبيبه زوجچ بطل طلع من ۱٦ مدري ١٨عمليه الحساب عند سيد مجتبى الزائده تموتني

-رفعت ايدي بقيت ادعيله

-اي وحق جدي زين كلشي مابيه
لاتلوبين وتفكرين ومثل ماگتلچ الموضوع بيناتنا

-هزيت راسي الة

-وهسه روحي عضيدي راح ينام ويايه

اجى يطلع سيد مجتبى گال

-اخذو راحتكم اريد اشوف عمامك المن جايين باب المستشفى همه ونسوانهم
جاوبه سيد مهدي

-اذا عندي خاطرر يمك عوفوهم

-اعوفهم هااا وهاي الحيه ام راسييين ورجلها

-مالك غرض كلشيييي يمي اذا ماضربهم ضربه اندمهم

روح اسبح وتعال يمي بات ماريد احد لان قاسم وامير على ساس يجون

-صار يخوي صار

راح سيد مجتبى وسد الباب كلي سيد مهدي

-بقينا وحدنه قارورتي والملائكه الصالحه ثالثتنه شتگولین

هزیت راسي وايدي معنى اعرف

هو عرف شنو أكول وهو متوجع كمل حچیه وگال

-الملائكه قصدي الي يسجلون حسنات المتزوجين ذول خاصين فقط يسجلون ثواب الاستحمام
ابتسمت بخجل اله وفرحه

گال
-عقيله معقوله هاي انتي هیچ تتناوعیلي معقووله ولكم ياعالم يراد ذبيحه

سويت نفسي مفاهمه شي واهز راسي وايدي على صدره
رجع كال

-اخخخ منا العمليه منا الصوندات،منا جدي هادم الذات ومفرق الجماعات وانتي هنا تحرگین گلبي
گمت دنجت بست راسه

_لا دنجي اريد اشوف خدچ شنو بيه

دنجت

_لا أكثرر. دنجي مااشوف خدچ زين

قربت وجهي أله رأسن رفع وجهه ولثم شفتي

" ياقبله تطيب بـها الجراح

دخل جدي علينه صاح بيه

-ولك بويه شمال عدوك شلون بساده شاليني حال حالي شبيكم أستخفيتو

طلعت من الغرفه تمشيت الممر واشوف ام سيد مهدي لازمه سيد مجتبى وتسال

-اشلونه اخووك وانت اجيت حتى مامنشف شعرك بس لا بيه شي

-لاااااا يمه مابي شي ةبنفسي شفت تقاريره كامله بس يمه تخيلي مااصير عنده التسمم چان راح من ایدنا یمه

-عیون امك

-اخووي ليش هييچ یتعذب عود ارتاح ويه اليحبها گل یوم سالفه تطلع اله

گال هل حچي وانفجر بلبچي حضنته امه وتباچو
صاحتني امي وياها منتظر حتى نرجع للبيت كالت عمتي الامي

-خيه خليها انا وياها والعلويه نروح للبيت

التفت مجتبى وكال لااا هلا ولااااا مرحبا بلحياااية شيصبرني اروحلهن
بس ربي يحبمي اجو برجليهم اذا مااطلع حركت اخوي بيگم

‏لأنّك نشأت مُستقِيمًا، مُتجذّرٌ في تكوينك الصدق والصفاء والوضوح، تجدك تنفر من المَيْل، وتكره الاعوجاج في الأفعال، والأقوال، والأشخاص، تحب الصادقين، الأنقياء، ويسوءك المتذبذبين، المُتلوّنين، ونصيحتي: حافِظ على النور النقيّ المُشِعّ بين جنباتك مهما واجهت من ظلام

........

-تأتي في بعض الروايات:
المجالسة مع الزوجة و استماع ما في قلبها و الفضفضه ، أجرها افضل من الاعتكاف في مسجد النبي "ص"

.....
غفران///

اشترِطوا في الزَّواج الدِّينَ أوّلًا
ابحثوا عن أزواجٍ وزوجاتٍ يتَّقين الله؛ البيتُ القائم علىٰ أُصول الدِّين بيتٌ أعمدتُه صلبةٌ لا تتأثَّر بالعوامل الخارجيَّة، قدِّموا الدِّين علىٰ كلِّ أمور الدُّنيا، فأمورُ الدُّنيا لا تأتي بالدِّين، ويأتي الدِّين بكلِّ شيء

طلعت من المكتب حتى ماحچیت شي ولا أي گلمه قبل لا اسد الباب التفت للغرفة المكتب شفت وجهه اشلون صار غاضب لان مانطيته نتيجه

رجعت الغرفتي خليت ألجنطه على الميز بعصبيه لغفت عبايتي أم دنيا چان بیدها اوراق هواي اول ماكعدت على الكرسي جابت اليه سفطه

وكالت

_أعصاااابچ حبي

_ام دنيا رحمه الأهلچ شنو هاي الأوراق

-هااااچ حبي ساعديني بيها بالچ تغلطين بلارقام لان هذا الجرد على عدد السجاد والزوالي وسعرهن

اخذت الاوراق سحبت جنطتي ادور قلم گالت

-اي بشري اشلونچ وجهچ متغير چنتي يم ابو الاشبال هلا رحتي يمه هااا گولي

-اي يم ابو حظيظان وشنو چنت یم منوو قابل

ضحكت ام دنيا وراحت كعدت على كرسي مكتبها

گالت بغمزه عين

-يسلام يسلام يسلام خايبه شوچنه الحظ الحلو جعلته اوليدي ماچان بوگتنا هیچ ویلاد حلوین احلی واحد بیهم زلفه واصل الرگبته ویلبس بنطلون اعرض من تنورتي والدگم بلقميص امفتحه للصره وذا عبر من يمنا گل احنا نبقی فاگات احلوگنا لو تدخل ذبانه ماندري

وانتي يحظي هذا رجال مالي طوله،ونازك،وانيق،وشعره مرتب ولحيته مرتبه،وطويل تتختلين بسده،والاهم كلش
يلبس جواريب ويه الحذاء مثل ماتحبين

جاوبتها بنتره

-عووفيني ام دنيا انا ماادور لا ناقه ولا جمال

-افلوس عنده ومتدين كلها تحلف باخلاقه....

-ترى ماكاعده على گلبچ ام دنیا وانا ماارید ازوج مااارید

انتبهت علی نفسي وحتى المره ماتضوج گمت الها بست راسهه وگتلها تری ابد گاااعده علی گلبچ ومازوج خوش

ضحكت لان انسانه طيبه ردت عليه باسلوب ام

-غفران حبيبه انتي بحسبت بنتي الحياة فرص ومارح أكلچ سید سلمان فرصه،وماتتگرر بس آگلچ شغله وحده
وانتي مؤمنه وقاريه حديث الرسول محمد صل الله عليه واله وسلم

(إن اتاكم من ترضون دينه وخلقه فزوجوه)الحديث هو حچي الدين يعني ركزي ابموضع سيد سلمان حتى تشوفين گلبچ شنو یگول الچ وذا ارتاح گلبچ ورتاح اله اتوگلي على رب العالمين

-ونعم باالله بس مااكدر اظلمه ويايه انه بعدني وبعده بالي ممتهيئه للزواج ولا اعتقد في يوم راح اتهيء انه تعبانه فد مره

-ليش يمه مو نفسها أمچ الله یحفظها چانت مزوجه ومخلفه وتالي أزوجت وهسه تحب زوجها ترى الدنيا ماتوكف على احد والله كل الي يسوي النا اختبار

-صعبه ام دنيا ورحمه الاهلچ مارید ینفتح هذا الموضوع
اترجاچ لان امي بلبيت هم مثل حچيچ وانا فد مره اتازم

_حقها تريد تفرح بيچ لان محد دايم الاحد ولا انتي زغيره لو عند نفسچ زغيره

_لاااا مگايله زغيره بس مو چبيرره ترى

_أشگد عمرچ

_سته وعشرين راح خل بسبعه وعشرين

_وشگد صار المرحوم من أستشهد

_من ٢٠١٤راح وارح گل واهس وياه

_وهسه أحنا راح ندخل ٢٠١٩موو مابقى كم شهر

_ترى مو شغلت سنين الشغله تقبل وانا لسى ممتقبله أفتح گلبي الأحد لأن عباس چان شي دافي بوگت البرد وراح الدفو

_وتالي ياعيني

_تالي انسد الموضوع ونشتغل

بقینا گاعدین الی ان خلص الدوام طلعت انا وام دنیا‌ رگبنه سیارة الخط شفت سيد سلمان جاي يركب سيارته نزع سترته وشمرها جوه السياره ألتفت من شافني نزع منظرته وتوجى على ألباب صم ايده حيل وطگ بنيد السياره ودخل

من يمي نرهبت طكيتها مشيه أخت الرگضه للسياره وحتى أضيع خوف گلت الأم دنيا

-والله مریم الها وحشه بس شو لا حس ولا خبر

-عمها گایل الهم ماریدها اداوم اشو احنا ممحتاجین وحتى سوى الها شهريه٢٥٠الف

-الله يوفقها بحياتها خطيه

-ليش انتي تعرفين شي شو تسألين

-لا معرفتي بيها مثل ماانتي تعرفيها بس هيچ شتاقيت الها

_أححح وچ فگري ترى سيد سلمان مو هين ومازال أتقدم ألچ مااعتقد راح يعوفچ

_وي وانا شگوو اصلا انا عنوديه ومااقبل بيه أبد

_ماادري أثنينگم روسگم يابسه واعصاب أشلون تصفى ويأگم

_تصفى أنا جالطته لأن ماأريده

_أنشششوف يخبر بفلوس باچر بسوك يصحيونه بحاجه الف هههه

_هههههه والله أم دنيا وصلنا أودعناچ

_الله وياچ

نزلت تمشيت للبيت دخلت ألبيت يصوصوي محد بيه بس منتظر اخوي وهسه يم جماعته و امي يم عقيله وابوي مسافر يجوز اعبر عل بيت اخوي احمد ومرته لا مااعبر خليني اتمدد ارتاح اشوي

نزعت عباتي حللت ملابسي توضيت وصليت حتى ما جهزت فطور اليه

وهمين ماريد افكر بلي گاله سید سلمان خاصه کلمته الوعد
عود شنوه الوعد الحمد الله

سحبت نقالي خابرت علی ماما گالت عقیله زینه بس السید متسمم غلقته منها ومنتظره اخوي يجي حتى اروح العقيله انتظرته ماكو طلعت مروگات من المجمده ونمت ومأحس للمغرب امي تگعدني

_گووومي خايبه وچ انتي شلوون بيچ أخوچ صايم وحتى ممحميه الأكل

فرگت عيوني

_المروگات على المجمده والتمن بس أحمي أنتي مسويته

_وشوگت تحمي راح يأذن

گمت رگض للمطبخ واشوف أمي محميه ألأكل التفت واشوفها أجت وراي گالت

_همزززين أجيت چان أگلتي دبس وراشي أدري بيچ وچان سويتي الأخوچ بيض عيون

_وشگووو بيها يمه قابل مو أكل

_ااوف الله يعين المظلوم الي ياخذچ

_أنتي گلتي مظلوم وانا ما أحب أظلم أحد يعني شنوو يانبع الحنان شنوو ماازوج

شمرت عليه فصم تمر أجت بكصتي جاوبتها

_أللهم أني صائم

أخذت الچفچير واجت أطگني

_ولللچ وذااا ماصايمه شتسوووين

مديت أيدي شبگتها

_أذا ماصايمه أبوس خدچ حيل واشرد

ضحگت دخل منتظر وصوتن مثل صوت علي من يصيح

_أم شاااامه ويأچ للبن سرايحه وحدي ماتشربين منها

عفت گلشي رحت أصلي صلاة المغرب گملت صلاتي بقيت كاعدة على سجادة واسبح

اجتي امي كالت....

-شبيج اليوم شو مو على بعضچ نومتج طولت موعوايدج

- لااااااا ماكو شي بس تعبانه

حجيت بگلبي ااخ لوتدري خطبني السيد لااااا هسة أدز أخوي منتظر ودکلهم موافقة لأن شافته مره من وصلتني للشركه وهي راحت للسوك گالتلي خوش قسمه أفگر أگله تعال يمه أخطب بنتي بلا مهررر

بس والله ولاااااكلهة راح تأكل گلبي وتضل أزن واني ماتحمل أي

عاد گالت

-هااا غفورة وين وصلتي بصفنتج اليوم موخاليه
بس لا وحده أو واحد يريد يخطبچ وانت رافضه أدري بيچ أعرف سوالفچ وذا طلع أبو الشركه وهااااي من تااااسع المستحيلات أعلك ضفيرتچ بلبنگه

ماحچيت شي لان مااريد أچذب عليها

رجعت گالت

_هااا يمه بيچ شي ضاااايجه نطلع انا وياچ نتمشى

-مابيه يمة بس تعب

-زين أكلچ غفورتي

-الله يستررر غفورة وغفورتي شكو كولي يمة

-لاسلامتج غير بنيتي ودلعهة

_من أشوگت أصلا أني عايشه التعنيف بأصوله

_وچ غير اريد مصلحتچ

_اي سولفي سولفي خن أشوف شنو وراچ لان دروبچ
أعرفهن درب درب

_احترمي ولچ أنا أمچ
_اسفه ماما حبيتي گملي
_أليوم

_أي شبيه أليوم

_خليني أحچي ولاااا تتاوعيلي هيچ

_يله دنجت

_كعدت يمي تربعت

_أليوم ام حاتم واحمد ابنها الزغير النجار تعرفينه بنها الي محله على شارع

-شبي يمة ماات

-ياا اسم الله فاولتي ولد

-غير اعرف صار ساعة عددتي عائلة ام حاتم

-اجت اليوم ام حاتم ورادتچ الابنه أحمد

خليت السبحه ونزعت الچادر وگفت

-شنووو يمه يوميه هاي سالفة تعديه موكتلج مازوج

-ووچ فززتني شنو ماتزوجين مو بكيفج مكابلتني وكبرتي لحگي على روحچ خلفيلچ واحد ثنين تلاثه اربعه

_خمسه سته سبعه وألمن

_يااا عمرج راح دخلين ستة وعشرين

-يمة شبيج نوب عليه احمد المحفف واربعة وعشرين ساعة علچه بحلگه

_أي بس يلبس أجواريب ويه الحذاء

_يمه هذا جالط وجه بلموس ماينعرف خده من خشمه

_بعد بعد طلعي سوالف مثل كل مرة چان بيمن يزين لحيته غير بمووس وچ لا طلعين عيب بولد ناس شبي معتني بروحه وابن ناس وشاغول وكله تحمد
بخلاقة شايفة شي عليه

-لاا استغفر الله بس مااريدة وجه يلمع أكثر من وجهي مايوالمني

_أنتي ياهو اليجيچ تگولين أحلى مني ادري أنتي قرده عند نفسچ

_لااايمه مااريد

-شوفي غفران جاي أضحك وياااج الج اسبوع تفكرين لاااا وتوافقين لان تماديتي هووواي كافي
لاتصيرين ظالمة نفسچ اني تعبت من تفكير راح اموت اريد أمن عليچ

-اسم الله يمه على كيفچ ضغطچ راح يصعد

-لااااا مو بيدچ لاتموتيني يالله ترتاحين

عافتني وكامت زعلانه شلون بلوة هسة شافو مني يومية وحدة جايني لا فوكاه اجاني سيد وهذا احمد محفحف كثروا خطاطيبي واني شلون اقنع امي مااريد

گملنه فطور وامي زعلت ودايرة وجه عني ماتحاجني گملت غسل الماعين ورحت الغرفتي نقهرت على روحي
ودموعي صبن شقنعهم مااريد ازوج

غفيت حسيت على منبه سويت سحور أمي ماتسحرت بس أنه صليت ورجعت نمت كعدت الصبح صبحت على امي وابوية

كاعدة امي وحاطة ايده على خده وشادة راسه بعلك اخضر وعاكدة عگده چبيره وتون من راسها

وبابا كاعد اشرلي صبعة على حلكه

_أشششش لااا تگتلنه

رحت غسلت وبدلت وكعدت جدامها
حاجتني دايرة وجهه

_اخذتي علاجچ. البارحه

_أي اخذته

_شربتي ماي زين

_أي يمه

دنجت بست راسهااا وراس ابوي وطلعت من البيت
لان أمي جاي تضغط عليه وهية تنقهر وتتمرض حتى ابوية مل منها گد ماتوگع علينه

رحت بلخط وصلت الشركة دخلت غرفتنا لکيت ام دنيا سابقتني

_صباح الخير
ردت

_صباح النور

_ليش مااجيتي بلخط

_رجل دنيا بنتي وصلني بطريقه وچ سكتي اليوم ينزلن الاسماء بيهن حوافز للموضفين مدري كراميات

-واني مو ياكم لن بجديد توضفت

-كولي يالله كون يطلع أسمچ بساع لطمتي

-يالله بس اعرف ميطلع اسمي انتم موظفين قدماء وعشرت عمر سواء بلمؤسسه قبل أو بشرکه أتشوفين تجيكم حوافز واني لا حتى سلة الغذائية ماگو

-هم صح بس نكول ان شاء الله انتي هم جاي تعبين
راحت ام دنيا بقيت أجرد واسجل نص ساعة واجت ام دنيا
كالت

_ بعدهن لهسة ماجاي الاسماء واني هل مرة محتاجة حوافز اريد اشتري ثلاجة بدال الحتركت
جاي ارد عليها دخل استاذ سلمان وبيده علاليك
من لمحته دنكت ورجعت اسجل

-السلام عليكم

تفأجات من سلامه وبتسمته ومثل كل مرة
رديت السلام بصوت ناصي

لو سمعة لولا وكف يم أم دنيا ومنطيني ضهرة

رفعت راسي شفته هم لابس اسود بسود وعطر يفوح وسبحة بيده والمحبس وساعة هذن مايستغنى عنهن
وانا ولا أحب واحد يكثر أكسسوارات

نزلت راسي هسة اني شعلية ابصبص بس فضولي على يوم يذبني بتايهة سمعت صوت مشية مقابيلى

حجى بصوت ناصي ميريد تسمع ام دنيا همس

_ترى السلام الله الواجب تردين

رفعت رأسي ومتعجبة على جرأتة واشوف مبتسم ابتسامة جانبية وعايف ايدة بجيب بطلونه

رديت بس من بين اسناني
ترة سلمت استاذ بس انت مسمعت(ووسالم واجب كفائي مازال أم مريم ردت أنا سقط مني))رغم انا سلمت

-يجوز

خزرته لأن مستفز
حس على ام دنيا وكفت تريد تطلع

گال وهو يدنج

-ست غفران هاي علاگه حصتچ مثل البقية
عافها وطالع مشى سريع قبل لاتطلع ام دنيا

اجت ام دنيا وترفع بحواجبه وتغمز

_ عود ردت اطلع اعوفكم بس الاستاذ فهمه وطلع
دادة يستحرم وحدگم تبقون بغرفة لأن يعرف كلش زين نوع الموضفين يخاف عليچ تجيچ حچاية طلع افهم مني

-على كيفچ خاله ترى خيالچ واسع وعلى يا أساس يبقى وانتي تعوفينا

-لاا ماكو شي بس اسمع تبسبس
وهاي اول مرة يجي ويوزع يمكن يخاف عليه لن تعبانه شيصعدني طابق ثاني

-وليش ضحكين يمكن نقهر عليج صدك شعجب هل مرة الي حصة

-خاب أسگتي يخاف عليه صدگت حضي متعلمة اصعد وانزل ولااا اني الأودي سجلات محد غيري يصعد

_ليش جابهم بنفسه

_لأن ألسيد يغارر والشباب أغلبهم بطابق الثاني
وهل مرة ذكرچ وجابلچ

-كمت وكفت وتجهت الام دنيا

_بالله عليمن يغار

-يمة شبيچ عيونچ نطن تردين بس تتعاركين قصدي على مريم يغار عبالچ عليچ

-لااا مريم ماكو هسة

-تسكتي تردين بس سالفة

عفتها ورحت للمكتب افكر معقولة واصل درجة يغار عليه وهيچ رايدني طلع بيه گل ألبلااا يمه يمه صدگ لو گالو من سكوتي موتي

كملت الدوام بين التدقيق؛وبين الجرد ورجعت للبيت
دخلت لكيت امي ماكو صحت

_ يماااا يماااا ماما

ردت عليه من غرفته

-تعاي هنا اني

رحت للغرفه قبل لا خل جرت العلك من يمها وشدت راسها وتتلفت لا اشوفهه من شدته‍ دخلت عليها

-شلونج يمة بعده رأسچ يوجعچ

-اي بعدة ماشوفيني شادته وويون عليه منين تلكاها
منچ لو من مرت المرحوم كاطعة بينه اريد شوف وليدنه

-هسة أصلي وخابر زهراء لان صدك ماكو اخابر على ابوها بس أنة شمسويتلج انتي متعبة روحچ

-اي فالحة بس بلسان روحي مني صلي وخابري انتضرچ

صليت وگملت

رنيت على رقم زهراء ماگو رجعت كررت مرتين
يالة شال الخط وطلع ابوها گتله

-السلام علیگم عمي شخباركم

-هلا بويه غفران اشلونچ

-الحمد الله خاف زعجتگم بس زهراء ماكو اتصل عليها ماترد قبل شهر من جبتو ابن علي وهسه ابوي مشتاق اله فد مره وامي همين والبايسكل اجى عليه

شمر حسره وكال

-بويه بنتي تعبت صار الها سنتين ارمله وياماخذين الولد يامرجعي وتستحي تخبركم

-شنو تخبرنه

-عمي بنتي اتزوجت وطلعت ويه زوجها للاردن لان هو هناك يعيشون اهله صار سنين

-ها اي عمي بس ابن علي وين

-ابنها اكيد اخذته وياها صار ٢٥يوم

-والبايسكل مارگبه

-عمي سلمي عل اهل الله وياچ

غلقه ومااعرف شنو اسوي وشلون اگول البابا او ماما منتضرتني
رحت للمطبخ مخنوگه مااعرف اگول البابا والماما نگعت التمن للفطور رحت الامي اضحك وبحجة اسالها حتى اغير الموضوع

-يمه اشلونها عقيله

-عقيله من ظيم الظيم ييمه مدري شوكت ترتاح

-اي والله عمره جابته تعب

-معدتي لايبه بس انتي وجهچ مخطوف لونه هااخابرتي

-اي يمه خابرت زهراء

-اي عفيه يمته تجيب اوليدي فدوه الگلبه اخر مره شفته گلش یشبهه ابوه صایر

-یمه ابو. زهراء ردعليه مو زهراء

_ليش يمه چا وين زهراء

_يمه زهراء ازوجت واخذت ابن علي وياها للاردن

صفنت امي ودموها بدت تنزل وحده ورى الثانيه شلون تأخذه وماتگول ماافگرت بينه ماااااا گالت
هذا جده متعلق بيه ويشوف ابوه بيه

وبأيدها ضلت دك على رجليها

_شگول الأبوچ غفوره

-يمة على كيفچ ويه روحچ

-وج اخذت ابن غالي وراحت وماگالت عنده أهل

لزمت ايدي حيل وگالت بعصبیه

-لاااا دگوولین الابوچ لان یتمرض بس يعرف زهراء ماخذه ابن علي ومسافره يروح بيه

واحنا نحچي صار خيال سد ضوه الشمس مال باب الهول ولن يطلع ابوي جاي گال
-يعني ابن علي بعد ماااشوفه

اللهم اصرف عن بيوتنا المرض والهموم والأحزان، ومِنَّ عليها بالسكينة والستر والأمان

.......

.................
العلاقة التي لا تكون فيها
بطبيعتك ...
ولا تتصرّف فيها على سجيّتك،
وإنما تتصنّع .. وتتكلّف فيها
طلبا لرضا عنك أو رجاءَ
إعجاب بكَ ...

هي علاقة سقيمة مستنزِفةٌ
لا تأميل منها ولا تعويل عليها
وتركها أحرى بكَ وأصون لكَ ...

سيد مجتبى///

مسجون..

-اي
بقيت واكف مكاني من حچايتها متفاجاء من الگالته رغم توترها من بس بقت واكفه تتناوع اليه منتظره شنو أحچي وشنو ردت فعلي حرت ألحظه حرت شگول الها‌ لان أنا من الناس استصعبت شي أسمه سجن,او محكوم مو ادور والدها هو المسجون

تفرك ايدها ثواني وانا متصنم ردت فعلي لخبطتني مبالغه لان جائز انسجن وهو المظلوم مو ظالم

بلعت ريجي مبلل شفتي حتى أكطع سگوتنا وگتلها

-لیش وشنو سبب سجنه

ردت بحزن وخذلان

-چنت آتمنی عندي مرايه بيدي حتى أتشوف وجهك وردت فعلك اشلون أذتني وشلون انت تخربطت

-لا مو ردت فعلي بس تفاجأت
رفعت ايدها لازمه ورقه زغيره شگتهه وراحت من یمي طلعت تركض وانا كعدت على التخم خمس دقايق وانا منصي راسي..

اخذني الفضول وگمت اشوف الورقه شلتها هي ونصها الثاني..طلع رقم تلفون اندك الباب وعرفت هاي دگت عمي ابوغايب گمت فتحته جایب بیده صینیه تمن ومرک گلي

-عمي اعذرني ماادري بيك تجي لهنا وهذا فطورنا

اخذت الصينيه منه

-مشگور عمي أتفضل اكعد ويايه اكل حتى لو تجاملني

دخل وعيونه للصينيه الجابتها ميسم كعدت أگل واتناوع النظراته گام

_رايح أسوي چاي

_أكون شاكر

أكلها طيب وتحب السبايسي مثلي أكلت ريزو الدجاج گله واخذت من شوربة عمي ابو غايب اشوي الى أن خلصت أگل وهو رجع بيده الصينه اخذت گوب الچاي وگتله

-اشگرگ عمي بس شو ساكت من شفت صينية ميسم الحد هسه اكو شي بالك

-لا ياعمي ماكو شي الله يستر عليك .

-احچيلي اريد اسمعك

-العين ماتعلى عن الحاجب ماگدر

-معناها الحچي ثگیل

-لا العفو سيد

رجعت كوب الچايه وگتله

-الیوم مااعتقك اله تسولف اليه شنو همه ومنو

-صار تدلل شوف سيد همه ناس صارلهم تقريب سنه
هنا ساكنين بس شنو مايجون اول ما اجرو الشقه، مجرد بقو غراض داخلها الى أن تقريب صار الهم هيج اربع اشهر ولا أگلك سكنو فعليا وجابو ملابسهم ن شهر يعني استقرو بعد اطلابتك وياهم مباشره

-ليش برائيك

-مااعرف بس هذا الشي الأگلك عليه هو الصح ها وترى ابنهم ولد حباب عكس،امه واخته

-امه واخته شبيهن

-اشويه اصواتهن عاليه ويجادلن ويعارك نحتى اذا صار صوت جهال بلمجمع يلعبون يرحم يهدن على الناس يعني صاحبات السان

-واخلاقهن

-قصدك سمعتهن أحنا ماشفنه عليهن شي،موزين او حركه موشي بس الصوت العالي وعراكات مايفوتن عركه، بحيث اخوه المحروسه ميسم دائما يقنعهن يجن يعيشن وياه بلبيت بس هنه بعد استقرن هنا

-ها يعني هو ماعايش وياهن

-لا ماعايش مزوج وباقي هو ومرته وهن زعلن عليه واجن هنا ومن انت شفت العركه هاي يريد ياخذهن وياه لان گلهن تعبت اجي هنا واروح البيت هو حنين هن لااا

-اكيد عزلن لان مشاكل هواي

-الله اعلم بعد

_زين ابوهن ليش انسجن

-متهم بقضية هوة وشريكة تأجرون بسيارات شريكة اخذ فلوس وطفر وهوة وكع بيه ونسجن..

وهي ميسم

-هي خوش ابنيه بوسط هاي الضروف جاي تدرس ودور على شغل حتى ماتاخذ افلوس من اخوها يعني هيج انسانه هيج ظروف ومحافظه على نفسها تعتبر زينه

وهسه أترخص منك سيد حتى اجيب سحور
طلع ابو غايب وانا تمددت على ال چربایه أفكر بميسم
بقيت سهران ألحد ماسمعت صوت أبو طبيله يصيح سحور سحور كعدت على حافة الفراش
اگوم اجهز سحور بس گاعد افگر باحساسي هل معقوله انا احبها من صدك لو انا هيچ استعجلت حتى غيض عمامي

وذا مااحبها لازم أترك المجمع وارجع الكربلاء خاصه ان والدها طلع مسجون اي لازم احدد موقفي هل انا احبها واريدها واقبل بوضعها لو مجرد اعجاب

سلكت اليه بيضتين وحمیت الچاي مال عمي ابو غايب أسحرت بلا شهيه فرشت اسناني شربت مي الى ان اذن الفجر صليت ونمت

الصبح شفت نقالي بيه هواي مكالمات من امي جدي عمتي،امير وقاسم،وماجد ولد عمي شسالفه ليش هلگد یتصلون محد یفهمني بس سيد مهدي مخليني على راحتي ومايزعجني يحترم قراراتي

لبست تشرت ابيض،وبنطلون ابيض مشطت شعري تناوعت الوجهي طالعه لحيتي اشويه يجوز كل شاب يحب لحيتي اله انا لان لونها اشگر لذا گلما تطلع خفیفه احلقها بسرعه والیوم مالي خلك أسوي شي اروح اشوف
حسين شنو يريد مني وشنو اخبار الصيدليه

انطلقت بسيارتي حتى ماباوعت على شقة ميسم لازم احدد قراري اريدها او لا...يجوز چنت فرحان من گلت الها راح اخطبچ بس سالفة والدها عندي شك بيها ولازم افتهم سالفته

دخلت للصيدليه حسين كاعد يرتب العلاج شافني ضحك
وبفرحه اجى سلم

-هلااا بسيد اشلونك اخبارك امورك

-الحمد گول شنو وراك ترى اجيت البغداد شارد من الناس گلها حشی اخوي عضيدي

-شارد البغداد شنو جزر المالديف يحظي

كعدت على كرسي ايد على الميز وايد اللعب بسويچ جاوبته

-شوف حسین حبیبي مادام النفسیه صفر حتی لو جزر المالدیف ماترفع من نفسيتك رقم واحد

-الله على الفيلسوف

-خاب دحچي شنو بيك

-البيه ماينحچي

_الهل درجله شو الاعرفه عنك طاك الدنيه چلاق

-هل مره. هي طكتني چلاق

كعد گبالي
-اي سولف اليه لیش جاي وشنو جابك وشكد تبقى بغداد صايم لو لا، هواي تبقى لو شوي

گمت ضايج غميته
-حتى لة مزوج ماتسالني مرتي هيج

-اذا ماتسولف تتعب وانا اتعب

-انت تتعبك شعليك

-اخ شلون شعليه غير الفضول وشارلوك هولمز يشتغل وانا اذا اشتغل شارلوك هولمز معناها اتعب وذا اتعب معناهة مافتح الصيدليه ووووو

-حسين

-هاااا

_وعلااااه يله گووم

_ما أگوم

-لاااا گووم انگلع من یمي

-شكرا

-العفو

ضحك اخذ سويچ سیارته قبل لایطلع گال

-هاااا ماتفگر ددفگر وزیح الثگل

لزمت شيشة علاج ردت اشمرها عليه طلع بسرعه
كعدت ورى ميز الصيدليه..والناس طابه طالعه
اخذتلي صفنه بقراري وستعجالي بخطوبة ميس

چنت منصي راسي سمعت نقرات على ميز الكزاز
رفعت رأسي اشوف ولد شاب

وگفت ضايچ وگتله

_ نعم
رد عليه وعايف ايده على راسه يفرك گصته ويحاچيني بضوجه

-دكتور حب وجع راس قبل اسبوع اخذت منه من عندگم

_شنو نوع العلاج

_هذاا الولد الي بس يضحك چان واگف ويعرفه

-هااا قصدك زميلي زين الوصفه المكتوب بيها ألعلاج

_ضاعت مني دكتور هوة باكيت اصفر وبي شريط حب ابيض تعرفه انته غير دكتور

رفعت حاجبي تناوعت اله عليه هاي شلون بلوه هذا شيفهمه

گتله..
_عزيزي مااعرف هيج علاج شلون أنطي الك

-شنيه دكتور باكيت اصفر عليه صورة شريط حب شوفلياه رأسي مأذني

استغفرت ربي هسة شحجي وياه مين طلعلي

_حبيبي ماعدنه روح غير صيدليه

رد عليه...
_خووو سديتها بوجهي اروح اشوف غيرك احسن أنت كلشي متفتهم

طلع بسرعه من الصيدليه حتى خلاني اجاوبه رغم عصبني كعدت على الكرسي أستغفر ربي
اليوم أمبين مصبح بوجه منواا ذكرت بوجه حسين ونگيگيه

أجت مريه من نسوانه الطيبه على راسها صينية سمچ

خلت صينيتها بلكاع وگالت

_شلونگ يمه

_الحمد الله تفضلي

_يمه أريدن هاضا الحب مال الفاد

_شنو وين صاير اقصد هااا الفاد وشبيه

_يمه هيج اتريع بس أگلن عدس ولازم الصايم ياگل شوربة عدس وذا ماياگل يعتبر ماصايم يييييمه

_ماصايم أذا ماياگل عدس موووو

_اي يمه

_زين شنو اسمه الحبوب

_لا موش حبوب كبسون بيه خريزات نويعمات اسمه كبسون(كبسول))ابو زرور

_اللهم صبرچ ياروح وين أگو هيچ اسم رحمه الأهلچ يمه مايصير

_دتنطي صبر خن اطلعن الورقه گتبتها حرمة أبني تعرف گلشي

طلعت من علاگه ورقه زغيره نطتني ياها فتحتها المكتوب( امبرازول)

ناوشتها العلبه حاسبتني وهي دردم عليه ماعاجبها
وانا احس هلگت هذا حسين شلون متحمل الوضعيه شو گلها أطباء صايره ودي اسد الصيدليه وارجع للبيت بس لا خليني ابقى عاد مافكر ميسم

بقيت امشي مراجعين الى أن خفو قريب العصر انفتح باب الصيدليه دخلت ميسم بيدها سفرطاس من هذا المتعدد العلب استيل سلمت

-مساء الخير
فرحت من أجت وگفت أتناوع لابسه شال أبيض شامرته بطريقه عشوائيه ومتمردات كم خصله شعر، فستان طويل نيلي رغم مومخصر بس بارز كلشي بيهة وگلشي بيها حلو وجهه خدودها عيونهة

نصيت راسي استغفر ربي عود اريد انسى رديت

_مساء النور

كعدت على صفحه وهي وكفت أمگاني،وهي استلمت الشغل كعدت مخزن الصيدليه بارد كلش غفيت من التفكير ماأشوف اله صوت يهمس بأ ذني

-دكتور مجتبى سيد مجتبى اذن اذن تعال نفطر سوى

فزيت لكيتها قريبه عليه گلش فركت وجهي عبالي احلم لو أتخيل

_گولي ميسم ليش جايتنه

_أذن دكتور گوم افطر

باوعت للجام صدگ السما كلش مغرب رحت للمغسله غسله وجهي تمضمضت وتوضيت أخذت سجاده حسين صليت المغرب

طلعت من المخزن شفتها مرتبه الاكل الجايبته ريحة الاكل طيبه الچای بلغلايه

كتلها

-ابقي انتي انا اروح افطر

-لا تروح

تفاجأت منها وگل يوم تفاجأني

-العفو

-لا تروح جبت الك واليه أكل وذا متاگول انت أي ماحاگول

گل هل وقت وانا مارافع عيوني مااريد أتعدى حدودي جاوبتها

_الف عافيه هذا المطعم أگله زين

__لا عفيه دا أترجاك

رفعت راسي الهة بقيت ساگت مثل الي جمد امكانه ماعرف شنو أكول الاول مره بهل طريقه تتناوع اليه حسيت كلشي واكف بهل الحظه لان نظراتها خلتني اضعف وانا لازم اغض البصر درت وجهي على جهة ألباب مديت أيدي حتى أطلع

اجت عليه أقتربت تتوسل بصوتها ناعم ((لااا تروح الله عليك))

_ميسم أنا أرجوچ مااريد أتعدى
حدودي

_دا أگولك عفيه والله أنا اسفه على اي حرگه او گلمه صدرت مني او اي شي حتى او حرگه عاديه عندي
أوفر عندگ أعتذر

_رجعييي ألمگانچ منا الشارع وهذا جاااااام لاااتجين زايد الخاطر نفسچ

_مااااشي أبتعد بس والله ونبي بعد مااكررها هي كلمه وراحت وذا تحب همات بعد مااحچي وياك بس لا تزعل مني ولا تعوفني اقصد انا تعبت من كل شخص أكول هذا سند ويترگني الحالي اخوي ازوج بابا انسجن وهسه انت

_الخاطر محمد لاتحچين هيج لأن أضغطين عليه

أتقربت عليه بقى بيني وبينها خطوتين عيونها دمعت وهي تمد ایدها تلزم ايدي سحبت ايدي منها حيل مثل الي لدغته حيه بحيث حسيت چن وجعتها لأن سحبت أيدي حيل منها بسبب عصبيتي

ابتعدت منها وصلت للباب ألثاني حتى ماتزاحمني على هذا الاول وبعصبيه نترت بيها من بین اسناني

-ديربااااااآاالچ دیرررررربالچ او أياج تتقربین مني زااااايد وووچ أشبييچ فكرري فکررري الف مره يله تكررين هيچ تصرررف انتي بنيه گتلج ياها ميسم واگولها لاااا تعیدین هاي الحرگه الحرام عليچ وچ فهي عليه ياميسم أذا عدتيها مره ثانيه اكسررر ايدچ ولا تتوقعین ماا اسویها

بقت ساگته واعرف انا جرحت مشاعرها بس ماريد تكررهااا لان حرام عليها وعليه رجعت همست

-اسفه بس تعال افطر ويايه حباب

تناوعت الها تحچي وتقدم شفايفه شلون طفل زعلان يبرطم

تمشيت متعصب كعدت على الکرسي فتحت بطل أللبن وشربته مره وحده أجت فرحانه كعدت على الكرسي الثاني واثنينه بقينه ناكل بهدوء

رغم تاكل بس أتصفن وترجع أتتناوع عليه
ماانطيته انتباه منزل رأسي وأکل بشراهه أكلت تمره
شربت مي گمت خلصت

گالت

_ما أكلت ليش

_ الحمد الله سفرة دايمة ترى خلصت الأكل أنا

-الف عافيه دكتور حبيت دولمة وباذنجانيه

-عاشت الايادي كلش طيبات هاي انتي سوتيهم

ضحكت وگالت

-لاااااااااااادكتووور ماما طبخته اني سوت بس چاي لأن فاشلة بطبخ

حجيت ويه روحي هم نعمة مسوية چاي كتله

_عشتي ريحته طيبه

_اهم شي يعجبگ

مسحن أيدها بلگلنس المرطب وصبت جاي وقدمته

-شكرراا تعبناچ

- تعبك راحة دكتور

رفعت راسي تحجي وعيونه تلمع بفرح

_شنو مشكلة ابوچ اريدچ تفهمني ليش نسجن

-دكتور
بابا شارك وية صديقة معرض سيارات بيع وشراء أخذ فلوس سيارت صديقه وسافر والعقد بأسم بابا وصديقة فلت فوكعت ألقضية براسه ونسجن

-شلون أمن بصديقة يعرفة لو هاي اول مرة

-لاااا شلون ما يعرفه عشرت عمر ومن الطفوله وهاي رابع مرة يشتركون بيع وشراء سيارات

-والمعرض موجود نبأع

-لاا بابا خلى ألسيارات باقيات حتى سدد ثلثين من المبلغ وهنا الناس بقو يطلبون بابا واشتكو عليه تالي أجت الشرطه علينه واخذو بابا وشمرو بسجن

ومايطلع اله يسدد ألاربعين مليون

- زين امجچ من زمان طلكت من أبوج

-لاا قبل سنة من سجن بابا طلبت طلاق منه لن نصحته من صديقة وماخذ نصيحة رفعت عليه قضية وطلقت لان أدگول اخاف على مستقبلچ ويکولون أبوج سجين

_بلعكس المفروض تبقى وياه متسنده

_ماما أشوي تحب نفسها

دنكت حاير واني وين وكعت نفسي عائلة متشتتة وكلمن بجهة بس هية شنو ذنبه

همست

_دكتور
رفعت راسي الهة ونصدمت عيونه السود مليانه دموع خشمها احمر

جاوبتها بلا ما أحچي

گالت...

-يعني أنت غيرت رايك بعد متردني

تناوعتالها مجرد ثواني نقهرت على وضعهة بس شلون تدبر بقيت ساكت

رجعت گالت

-دكتوررر أني احبك واريدك

رغم جرئتها بس تبچي وتحچي

جاوبتها

-ميسم أنطيني مهلة ادبر اموري وأشور اخوي وان شاء الله للعيد أگون أنا خاطبچ

فزت واكفه صفگت بيدها ونگزت

_صدوك دكتور راح تخطبني

گمت أضحك على حرگتها

-ان شاء الله يالة نطلع نقفل تاخر وقت
كامت لملمت غراض وقفلنه وطلعنه

طول الطريق أتسولف عن حبها الأبوها وأمنيتها انو يطلع من السجن وشلون حتکون سعيده بزواجها أذا ابوها موجود بلعرس ووهواي امور حچتهم حسيت بعفوبتها وجمال تحررها البسيط

وصلنه للمجمع گتلها

_يله أنا رايح بشغلة

نزلت

_شگرا على التوصيل

_يله روحي مااحرك السياره اله تصعدين

مشت وهي تأشر باي وراحت واني نطلقت بسيارة واني حاير رحت على كورنيش الاعظمية صفنت بهل معضله ماكو غير عضيدي اليحل سالفة اتصلت عليه ماكو رد

رجعت ثاني مرة أتصلت عاد رد

السلام عليگم عضيدي شلونك.

-وعليگم السلام هله بأبن أمي وأبوي شلونك

_ابو علي شلونك صحتك ام علي شلون صارت

-الحمد لله زينه بس بعدها بدون نطق

-ان شاء الله تحجي سيد شو صوتك ناصي من كوة تحچي بيك شي

-لا مابيه بس چنت نايم

-ابو علي ينام هيچ وگت

_أي يخوي اي

_زين صاحي لا أريدك بسالفة

-اكول واني اخوك

-اريد ازوج

-واخيراا الف مبروك منو سعيدة الحظ

_وحده دخلت قلبي چفت بلا أستئذان ولا سلام

ردت أگمل حچي أسمع بس ونين صحن

-الوو سيد تسمعني شو صوتك اختفى اريدك تخطب اليه الصيدلانيه ميسم شتسوي تونون
وكته هسة

-ماسوي شي بس عيدهة منو كلت تريده

-الوووو الووو انت متوجع عضيدي ووينك الوووووو

منوو ويايه جدي

-ولك أي أنة جدك ولللك يامجتببببى تحلم تاخذهااا ألهاي أم شعر البغدادية

-جدي أنطيني اخوي ليش أنطاك موبايله

-اخوك يخاف أعليك ومايکلك أخوك مريض ومسوي عمليه وانت حاير بلبغدادية وعايفنه صاير تزعل وهو
يگابر مايريد أحد يخدمه غيرك

_أخوووي مسوي عمليه

فإن بدأ الحُب بذنب فلابُدَ أن يَنتهي بمعصية،
وإن اردتم نهاية طيبة حافظوا على بدايةٍ نظيفة
............
...........

رغم كل الثبات الذي أظهره، إلا إني بحاجه الى كلمة واحدة ، تهزم خوفي وتزيل عن كتفي ثقل العالم
والكلمه هي ان حبيبتي ستعود يومٱ لي

تمشيت للحديقه ورى البيت أكو مخزن مصمم من السفونج انخلي بيه بريمزات الطبخ،القزانات،وكلشي يخص شغلات العزومه...

شوي مخنوك وضايج..كعدت على المرجوحه أدخن ورثت جكاره وافكر بلي راح يصير وشلون يستمر وضعي بهاي الظروف

هزيت المرجوحه ولن تحرگ المسقف مالها،رفعت راسي واشوف البوري المربوط بيها يريد يوكع شمرت الجكاره للكاع وسحكتها بشحاطتي

مديت ايدي للبوري اصلحه لا احد من الجهال يركب المرجوحه وتوكع على راسه...سمعت صوت مرت اخوي تريد الجدوره

عفت المرجوحه رجعت للمخزن اجيب الجدوره و عدت التصليح تالي اصلحها..

دخلت للمخزن طلعت جدر اول ورحت اطلع الثاني
وطلعت البريمز

اخذت اچاگوگ تناوعت للمرجوحه راگبتها مریم هزت رجلها البوري مال مسقف بعد حركتين ينفصل شمرت الجدر قبق القزان

واجيت عليها بخوف
دنجت عليها جريتهة حييل خايف انضربت بصدري
بحيث ايدي على خصرها وايدها على صدري

ردت عليه بنترة ودفعتني حيل ولا چنها مريم الأعرفها

-شكو شنو هذا تصرف اني زوجة اخوك عيب

ابتعدت منهة خطوتين باوعتلهة بستهزاء وبحلگي الجگاره

گتلها بهدوء مستفز

_ترى لاااا تتحلمين أخون أخويه

_وشنوو السويته هسسسه

_ههه منو أليمچ شوفي البوري يريد يفلت

من فشلتها دنجت راسهة ورجعت رفعته و

كالت ...

- اي مالة داعي خوفك اوكع انضرب اموت مااااعليك بيه لاصير خايف عليه خوووش

أنت غدااار بين معدنك وعووودك الجذابه و دير بالك تلمسني اوتوصل يمي

جريت نفس من الجگاره حتى مااتعصب من ردت فعلها لان تحچي بزمخ وترجف دکيت البوري

تمشت خطوة الهة كزيت اسناني واشر

_ اريد اعرف عليمن تلمحين وشنو هاي ألعين لصلفة تحچين هيچ وويايه تخبلتيييي

_واحچي أكثررر لأن أكررررهك أكرررهك

جريت نفس من الجگاره ودي أجنزهااا على حچيها
انخطف لونها شافتني تعصبت جيت أتقرب عليها

سمعت صوت مرت اخوية ام ريتاج صيح
من مطبخ

_رعد تعال أندخل جيس تلتمن مااكدر وحدي
ردت عليه

_جايچ ام رتوجة

گتلها

_أخخخخ يامرريم بيچ بخت

مشيت من يمها وخزرتها خليتها ما تشيل راسها بس بعدني محترگ گلبي من کلمة أكرهك

بقيت لايب أفور من ألعصبية شلون هيج تحاجيني
خلت صبعي بحلگي وعضيته حيل من قهري

شلت البريمز والراس يسحل ورايه...اجت هي شالته

استفزيتها

_شنيه صرتي معدله

همست

_غصب عنك معدله يامكرروووه حسبي الله عليك

__وووچ ابتلي بيچ وابو فاضل

_شتسوي بعد

وصلنه للمطبخ منتظرتني مرت اخوي
كالت تعال هذا جيس التمن بس ندخله للمطبخ

رحنه نشيل ألچيس نريد نوصل للباب واشوف مريم واكفه ومجتفه ايديه ام ريتاج حاجتهها

مهجة مريوم وخري عن طريق
راحت وكفت يم سنك تغسل بوجهه

گلت بضوجه

-ام رتوجة فد ساعة واطلع محتاجة شي من بره

-تسلم ابو رعود يوم عرسك وهنيالهة تاخذك شاطر ومعدل عكس خوانك دومگ مساعدنه

جاوبت بصوت عالي

-نويت هو نويت أن شاء الله

ردت ام ريتاج

-ماصدك كل مرة تحچي هيييچ

تناوعت ألمريم صايرة ورة ام رتاج عيونها فاتحتهن على وسعهن ودمعة تلالي بيهن

كتلها بگلبي صبريلي لا توبچ على هذا لسان

کالت أم ريتاچ

_گوول والله ناوي

_مثل ما أگلچ هل مرة نويت واذا تلگيلي مرة حلوة واخلاق من معارفج هم نعم الله

-وشنو موصفاته ألتريدها

طلعت لجكارة ماورثتهه بس خليتها بحلگي لأن مايجوز أدخن علني

جاوبت ام ريتاج ونطيت مواصفات عگس مريم

_مواصفات مرتي المستقبليه أريدها طويلة ابد أبد مو قصيرة
اريدها توالم طولي واريدها جسمها حلو وبعد عينچ ميزانچ أريدها من فوگ شبه ضعيفه ومن جوه تارسه
يعني مثل ((العرموطه جسمها))

احجي وداير وجهي صفحة ثانية لاصوت كزاز طشر التفت ام ريتاج لكت مريم تلم
بلكزاز وتحاچيها بخنيك ومدنچه راسها تكلها

_أعتذر وكع مني اكلاص راح المه

ام ريتاج كلتله

_ فدوة شبيج ختنگي هوة كلاص نمونه عوفي المه اني ليش دموعچ

التفت عليها هاي صدك بچت

كامت مريم كلتلها

_ لا بس مادري شطب بعيني

ضجت عليه مااريد أشوف أدموعها عفتهن متعصب ورحت كعدت بلستقبال بلتخم يم باب لميت ابوية
ونوار وامي وراشد صرت بعيد عنهم طلعت جهازي
انشغل شوية عنهم

شوية ودخلت مريم راحت وكعدت بصف نوار مدري شاورته
وهوة ضحك نوب رجع شاوره وكرصه من خده

ابوية يمازحهم گال

_ ها شعدكم بلابل

نوار جاوب

_بوية مريم أتگول تعال أنروح للغرفة كتلها عيب كاعدين ثاري تريدني ألبس التراك الجابته هديه اليه ويه نيشانها

بحلقت عيوني من جرئتها من شافتني طكتها بضحكة

ابويه گال النوار

_رووحو بويه اخذو راحتكم

ردت عليه مريم

_ لااعمو يشاقة وياك نوار كتله اشتاقيت لهلي
بس هوة سوالفه هيچ شنو أحچي يخلي بيها انه

تباوع علليه وتحجي وتبسم

نوار جاوبها

_ لاا مريم انتي گلتي

ابوية حاچاهم ...
"نوار ترى صياااام وانت چنك انت تريد الغرفة وختلاتها

ضحك نوار

_ها يابة تعررف سوالف الغرف
رد عليه

_ كووم مطي ولك صاير هتلي نوير

صافن عليهم وكلهم يضحگون ويشاقون ولاچن
ذابحيني حتى امي المقهوره عليه تضحك وتقبلت الوضع

كام نوار وخلى ايدة على اجتاف مريم ويضحكون وطلعو تعدو من يم ألباب واسمع تکله

موگتلك لا بعد لاتكول مريم أكررره هذا الاسم يذكرني بأحقررر شي صار بيه
گووول مهجة لأن مهجة صارت الك

تعجبت على حجيه شكد متناقضة..وگفت طكيت التخم بئيدي حييل

‏كيف أمحو أيامًا كانت مع حبيبتي حيث تركت في عُمق روحي أثر؟
......

مريم////

كان عليك أنّ تبقى بجانبي عندما هزمتني الأشياء
لا أن تكون ضمنها .

بعد ماتعصبت عليه لأن أنردمت بحضنه تالي طلع خايف عليه لااااوكع بس أجتني فرصة إطلع قهري وکل الحچي لبگلي صاير حنين على گل اله عليه

هو العافني وراح خلاني أوجه مصيري وية اخوو
لاسوالي حل ولا طاني مبرر

مدري منين أجتني هيج جرئة وحاچي بصوت وعصبية حتى هوة بقى فاتح عيونه عليه ومتعجب

وسولته من يعصب يبقى يعض بشفته سفلى
أحسه صار نار وجه أنگلب ايده يفتحها ويسدها يمكن لوغيري مااأسكت وتحمل تقدم عليه واني كتلني الخوف

لو ماا ام رتاج صيح عليه يشيل جيس تمن حمدت الله وشكرته راح مني وهوة يخوزر

من خزرته أشوية چا بللت على ملابسي من خوف
بس شنو ماعفتهم رحت وراهم

ودخلت مطبخ سوت نفسي غسل وجههي وغسلت كلاص اريد اشرب مي

قهرني بزايد وويوصي شوفلى مرة يزوج وتقصد يوصف اليرده
لاو قهرني اكثر يريده طويلة عكسي ويرده جسم حلو يدري بيه معصعصة مااحس اله من ايدي وكع الكلاص وتكسر وحصرتني بجيه
عافنه وطلع

كمت غسلت وجهي وعدلت روحي ورحت الاستقبال اكعد يم نوار دخلت ورحت كعدت يم نوار
شورته مشتاقة ألأهلي
رد شاورني واني مامشتاقة الي
اليوم أطلعچ أتخبلين بلمكياج وكرص خدي

وعمي زاد من يمهة يضحك ويشاقة وية نوار باوع رعد يشرب بجكارة بس يريد ياكله

كمنه اني ونوار نضحك من طلعنه كتله لاتكولي مريم كول مهجة لن مهجة الك مريم موحلو بعد
دخلت للغرفة بس أختنكت وبچيت

مدري من رعد يريد يزوج
مدري من وضعي مااعرف شنو هوة وهذا نوار كل همة مكياج
مااعرف أشتقيت ألأهلي واختنگت

اجة نوار يحاجيني

_شبيچ مهجة ليش تبجين على اهلج اني أوديج لاتبجين

باوعت عليه يريد يبچي وياي ياربي هذا زلمه إحساسه رهيف مدري اضحك مدري ابچي
واني أباوع نوار مقهور ويريد يبچي هلى مبچاي

كتله
_مابيه أشتاقيت الأمي

طفر يمي وگال

_أسمعين صوت عياط
كتله

_اي صوت عمي

كال

_لاااااهذا صوت رعد عيييدد

......

شكرا للادمن المبدع ganah01298631