رواية عشق المومنين(أبناء الساده) الفصل السادس وثمانون 86 - بقلم نازك الحمراني

السلام عليكم
.اسالكم الدعاء لاختي....كهرباء من الصبح ماكو النت عطلان اشتركت رصيد ونشرت
..........

كل همسه اكو شجار وفراق
كل كلمه تصدر أكو اختلاف وخصام
تسكت هم أكو فراق وهجر وسوء فهم
بين طاعن ومدافع ومصرح.
"في قلوبهم مرضٌ فزادهم الله مَرَضا " !

مجتبى//ماتحملت كلام عمي للمره   الثانية وتجاوزه علينة البوگس الاخذة ماريح گلبي بي بس لخاطر الناس الجاية للفاتحه ولخاطر شيبة جدي سكتت ..

وكفت بنص الفاتحه گاره كل عمامي وبنفس الوگت خايف على سيد علي شفتة خايف ولازك بيه راسا لزمت ايده حتى اطمنة وماخلي يخاف من شي ..
دنگت عليه وهمستلة ...

-لاتخاف حبيبي ماگو شي يخوف وانا وجدو يمگ ..

شفت الدمعه بعينة خايف ويبتسملي شلته وحضنته حتي يطمئن ورديت نزلتة..
مگدرت افرغ دموعي على اخوي وعضيدي لان (علي)لازم ايدي وگلما ابچي يگلي راح الوح(اروح) اصيح بابا

فراك اخوي غصه بقت بگلي وبیومین گبرت فوگ عمري عمرين...شايل هم جهال اخوي و امي وجدي وعمتي

چنت مدلل بجال سید مهدي ماادري بدنيا طشت رشت

حتى من يصير نقاش ويه عمامي على اي مناقصه على اي بنايه اسمع جدال سيد مهدي العمامي ولي يسگتهم بگلمه وحده من عنده

دائما یطلعون عمامي من مگتب  جدي اعصاب غضبانين یطلع وراهم سید مهدي يسلم عليهم ويوصلهم للباب مره سالته

-عضيدي انت ليش متعب نفسك اطردهم وفضهه

يجاوبني

-اطردهم يامسهلها بس خايف على جدي وعليك على امي ومرتي لان بس اطردهم لو اقطع علاقة وياهم يأذونگم گلگم

-ياذونه همه عمامنه واحنا دمهم ولحمهم

-ماحاجه اگلك شي بس سورة يوسف انطتنا هواي عبره عن الاقربون

-زين  وشیردون بلضبط

-هاي مال شنو يردون امبين مايرضون بلي عرضته الهم يردون البير وغطاه

-وشنو معناهاا

-مابيها معنى لا ادوخ روحك

ـعضيدي الاعرفه  همة اخذو حصصهم مالهم شي يمنا

ـ اي صح لگن جدي من وزع الحصص بتساوي الهم راحو على مناقصه اشترو كيعان بارقام يسموهن ١٤وذني ملك للدوله خمس سنوات ويخلص عقدهن ويه الدوله ..فـ خسرو فلوسهم گلهه

-انت هم اشتريت گیعان من الدوله

-عفیه انه من اشتریت  مباشره من الدوله طرحت مناقصه ودخلت بیها حصتي حصتك رغم اقل من حصص عمامي

بس‌كدرت اشتري بيهن محلات بصناعيه..
واشتريت الگاع بنيت بيها بيوت عشره على شكل مجمع وصارن خير من الله
يعني ربحت بيهن وهاي غير المناقصات

-اعرف بيك شااااطر یخوي من يومك

-لاااا ربك بارك بيهن لان نذرت اول ربح يكون ثواب نيابه عن الحجه المنتظر

-هااا وعمامي خيرو الكيعان

-عمامك من خسرو افلوسهم رجعو عليه وعلى جدي مكطعت بيهم جاي كل شهر اسهم الهم كل واحد نص مليون ..ودخلهم شراكه بلمناقصات..

-ونعم  والله زين لعد ليش كل مره يطلعون يتعصبون

-لان كل مره عينهم على معمل جدي مال طابوك وهذا المعمل حصة عمة زينة من الورث ووياهه جدي وبيبيتي تعرف معيش بيه ايتام وعوائل فقيره

- شگد طماعین

- المهم یخووي النسخ الاصليه خليهم يمك والنسخ المستنسخه يمي

-ليش

-لاااان ما راح يشك بيهن عندك يعرفون انت ملتهي بسفر وحياة السفررر  بهيچ محد یگدر یاذيكم ولا ياذون جدي

مسحت ادموعي مقهور راح سيد مهدي وراحت هيبة جدي لهيچ حچي سيد مهدي چان صح وچان لاوي ايدهم  ويعرف دماراتهم

موت سيد مهدي مو بس وجع موته اگبر من القهر لان انگشفت الوجوه واحد طلع مایرید الثاني وكأن اجى الوقت التطلع على حقيقتها

عيوني على صورة عضيدي سواها امير شكل بوستر چبیر مکتوب بنص البوستر بسم الله الرحمن الرحيم((يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي )) صدق الله العظيم.
والذي استشهد مع ثله من الجيش الابيض سبب جائحه كارونا ألعين

احاچي الصوره بعتاب وقهر يا أعز ناس على گلوبنا معقوله راح تصير ذكرى،والله ياخويه  تقطع  گلب اخوك  وتفطر من الحزن اشگد ضحكنا سوياً وشگد اخطاء وتجي أضمني إلصدرك الحنون،زين گول صبرت گلبي

اشلون اصبر عقلي ينسى ذكرياتنا سوه
اصبر عقلي اشلون اصبر امي علمودك ..

صبرت امي جدي منو اله ومحد يفهمه غيرك...
گول همين صبرتهم گلهم
مرتك اشلون
سيد علي شلون
العلوية درة شلوون
مهدي عضيدي يومين صارلك ميت الناس انجلبت علينة

تعال اخذني مو حمل افراگک ولا حمل اشیل الهموم الچنت شایلهن.. صرخت بصوت بعد المن أكول عضيدي
وگ خووية حاچبني أنهد حيلي

يا عضيدي ويا ضلوعي كلهن مشتاق الك مثل ام مشتاقه الابنها المغترب دبرني شسوي بلجاي يصير شسووي

مسحت دموعي شلت سيد علي مسحت دموعه گتله

-انت زلمه لااااتبچي اريدك تساعدني

-اثلون(اشلون)اساعدك ماعرف انلوح(انروح) البابا يجي يساعدك ويساعدنه

-سيد علي ابوك بقاك يمي حتى تساعدني لان هو راح يساعد الناس اتفقنا

-اثوكت(شوكت) يجي اريد بابا

بچاني ويا وحاچته منين اجيبلگ بابا بعد روح عمگ..  من هاي الناس كلها اطيب وصير زينه يجي ان شالله..

هسه راح انزلك لان عيب شايلك انت زلمه اتفقنا

-اتفقنا

نزلته بقى لازك بنطلوني وبين جدي اسمع جداله ويه ابو عامرر

تخربط جدي للمره الثانيه بلمستشفى خلتني اتعصب أكثر لزمت گلبي من الوجع...
بحيث توجيت على الحايط بعصبيه  مديت ايدي ضربت عمي بوكس...
ولده رغم مارضين على ابوهم بس سحبوني ودفعوني جوه الببيت  مهما يكون هو ابوهم…
ابو ميسم مد ايدة و كومني

-ابني كوووم اسند نفسك عليه

هوسه براسي ابو طليقتي هذااا مدري انا صرت ماشوف وماميز الوجوه..  مديت ايدي وسحبني وگفت صرت وجه بوجه وياه شگرته بنضرات عيوني وابتعد عنة حسيت بعيونة حجي بس عفتة ومشيت مالي خلك روحي

خبر موت اخوي مصيبة حلت علي راسي الحياة توقفت وياه مو بس الحياة ماتت حتى موتت گلبي من اي مشاعر ثانيه

شفت عمي رجع اجاوز بين حزني وغضبي ودي اصرخ مثل النسوان واطلع قهر گلبي اريد اي شي يطفي ناري وكفت جدام الصار

ولد عمي جدامي بين اليصيح عليه وبين اليوكف ابوه اجى عمي ابو زيد..
طكني بوكس بظهري حيل احس الوجع اجى الگلبي اندرت عليه بغضب غلط وگال

-چلب جاااااااي تصير رجاااال علينة وانت جبتلك كاوليه مناك

تعصبت اكثررر هسة لو اقتلهم مااطفي بركان الغضب بلعكس راح يشتعل شعل ویاگل الاخضر وليابس..

وگفت بوسط اهلي وناسي مثل شخص غريب عنهم ومن هل الحظه قررت ادفن گلبي واصير جسم مات بيه كلشي قلب وروح اندفنن ويه اخوي

ردت اي فكره تسعف عقلي  بس جدام الذئاب الواكفه  كل الافكار العاقله تختفي تتلاشى امام طعن الاقربون ..

مامهتمين الحزني حتى حزن الغربة  على اخوي اگثر من هالگرايب امير واگف يمي گلتلة

-الزم سيد علي بين ما ارجع

-لا راح اجي وياك

-تعال ولزمه حيل لاتهده
ركبنا السياره كل احنا اخذنا جدي و ننطلق للمستشفى..
رحت ويه زيد وزياد …
باوعت شفت امير راكب السياره الوراي باوعت زين ماشفت وياهم طفل علي

صرت الوب صحت بزيد قرب سيارتك من سيارة امير اريد احچي وياه ..

طلعنا الشارع زيد يسوق وانا متوجي على باب السياره  وكفت سياره امير وولد خاله يم سيارتنه يم التقاطع مديت راسي گتله

-وین سید علي

-عند بيبته
-ياهي امي ترى امي فاقده

-لا ام عقيله ارملة سيد مهدي

صحت بزيد
-اررررجع بسرررعه ارررجع

-شرجع يامجتبى جدي تعبان قابل بيبيته تاكله

-ززيد ارجع بسررررعه أكلك
انجنيت للاخير

رد

- امري الله  راجع

لاف السياره زيد طلعت نقالي مره اخابر على منتظر مره
اخابر على ابو غفران مره على ولد عمام جدي ..
مخليت رقم مادكيت عليه متوتر وخايف على امانة اخوي شجاني وعفته يمهم

مره اتناوع للشارع ..مره لساعة النقال خمس دقايق گلشي تصير بيها . . همست بصوت مسموع

-ابويه علي مولاي لاتخذلني جدام اخوي
وليده بأمنتك
يااعلي ابو اليتامه

وصلت للدربونه والسياره كعد تمشي فتحت الباب مثل مجنون ركضت قبل لااااوصل البيتنا خطوات

شفت سميره انطت سيد علي الام عامر وابتعدن عن بعض خطوات رحت راكض على ام عامر مجرد مالمحتني  خلت سيد علي بلكاع و شردت مثل لمسوي جريمه شارد منهة ولحگت رجلهه

ركض سيد علي عليه دنجت شلته بوسته
-الحمد الله يااامانة اخوووي شلونك
بديت افحص وجهه نزلت بلكاع كفيت ردن قميصه فتشت ايده نزعته كمامته لبسته كمامه ثانيه...

كال
-ليش تفتشني عموو

-اخاف عليك من وحوش البشرر يا وليدي

- مابية شي عمو وين نلوح هسه لبابا

- الحمد لله مابيك شي .. لا ياروحي نروح نشوف جدو شوي مريض بس

رتبت كمامته ورجعت للسياره..خليته بحضني

وصلنة المستشفى ودخلو جدي للردهه انطوه ابر وادوية وشوي استقر…
اتناوع الجدي شفته مقهور مهموم گلشوي يبچي ادري بي مخنوك من سبب عمايل عمامي ويايه وكفت يمه

-ليش ضايج سيد

-دارو عليك يبوووي وانت وحيد بينهم صرت مثل اسد مجروح دارت عليه الاسباع

يبچي جدي ويحجي بچیتت ويا كلمة الوحيدد قهرتني  رديت عليه اصبره لان وضعة مو تمام

_وانه تربيتك وانت وياي مااضل ووحيد
جدي لاااا تخاف عليه امامي علي ابو اليتامى وياي

-جدك مابيه حيل ..رراح حيلة وصحته ويه اخوك ..
بس خايف عليك وعلى الايتام  وارملة اخوك وامك رااح الجان ساد حلوگهم وموگفهن عد حدهم

-تساعدني بس تكوم بسلامه ونوكف بوجهم من تصير بضهري مايهمني شي بعد

-ماااظن يوليدي بية. حيل وكفة بعد

-لاااا اظن ومتيقن الامل برب العالمين وباهل بيته عليهم السلام قبل لاااايكون بلبشررر

-اااخ يامجتبى صاير چنک حچی اخووك

-هوو لازم اصير اخوي مهدي وگلك ياها
المات هناك ودفنته مجتبى مو سيد مهدي

انا المتت بدل اخوي بقيت بس الجسم بس الروح روح سيد مهدي والجدامك واكف سيد مهدي بجسم مجتبى

التركه والامانه چبیره ومحد یتحملها بس العنده عقل ونفسیة سيد مهدي

-اااااااخ ياااااحرگة روحي على حفيديي مهدي وگ عمامك حتى ماااخلونه نطفيهااا

-ماتتطفى ياجدي لووو بحور الدنیا گلها .. بس خليگ قوي لخاطري ترى انا مو حمل ضربتين بالراس ارحمو بحالي انا وحيد صفيت بين الوحوش اريدگ من بعد الله تصيرلي سند ياجدي…

-بيد الله وليدي

کعدت یم جدي ربع ساعه تذكرت اخابر ابو غفران گتله

-السلام علیگم

-وعلیگم السلام ابنی شلون صار جدك كالو تخربط

- والله جبناه للمستشفى وشوي احسن الحمد لله…

ـ الحمد لله…

ـ نسیت اخابرگم لان التهيت بالصار اعذرني بس ترة سيد علي يمي لاتخافون ..

-اي والله فرحتني بعد عمك رحمة والديك لان يبسنة من الخوف وجاي اجي
هسه بطريق

-لاااا لاااا يمي الله يحفظك

عقيلة///الكل واكف يحچي بابني( علي)
جواي خوف چبير عليه هذا بچري ضناي بس مااگدر احرک شفتي واگول خایفه وحتی لو احچي منو يسمعني صوتي مبحوح ومختفي تماما

مقهوره من حالتي وضعي ومااگدر استوعب الصار للن چنت اسمع افلان صار بیه صدمه وفصل عن العالم وانسان دخل بصدمه وماطلع منها

چنت دائما ضد هيچ ناس بحیث اجادل كل شخص منهم وحاول اقنعه واگلهم بس قلیلي الايمان ينصدمون

بس المبتعد عن رب العالمین ینصدم
لان الانسان المؤمن حتى لو ينصدم صدمته راح تكون  بحدود لان مخلي باله ايه قرانيه
(لن يصيبنا الا ماكتبه الله لنا))

عمري ماتخيلت راح اعيش دور الصدمه وينطبق عليه حديث (من عاب استعاب)
وفعلا النتقاد دائما غلط لان راح نطلق الحكم بسرعه على الناس واحنا حتى  معاشين وضعهم ولا موقفهم

تمشيت خطوات من امي خالي گالها سید علي بحضن عمه مجتبى لاتخافون ..

هنا ارتاحيت من عرفت بي يم عمة واطمأنيت لگیتها خوش فرصه اروح ارگب سیاره ارجع البیتي و السيد مهدي..
حبيبي مابيه شي بس مجرد تعبان دره عند غفران وعلي عند مجتبى

بقى حبيبي وحده يحتاجني وهسه بعد محد يمنعني اروح اله والزم ايده البارده..
لاا الدافييه ايده دومها دافيه بس هالمرة جانت باردة  مبين بردان اروح ادفي ايدة خاف البرودة تاذي

سيد مهدي يحبيني مايتحمل فراگي تجي بالي خيالات اهل سيد مهدي من رحت البيت جده شفت ناس تبچي ناس تصيح اسمه
لكن  لاحياة لمن تنادي..

اتذكر هواي گلولي صبري البقى بابنچ علي واخته بعدها اجيت هنا ويه امي
اي هاي امي تحاچیني

-عقيله روحي سبحي  حتى اسبح وراچ من اطلعین تلکین مسویه اگل الچ والخالچ

تناوعت الها ماگدرت احچي ولا حتى ابچي مشيت لازمه ايد سيد مهدي تمشيت الغرفتي القديمه ابيت اهلي..

اجى يمي سيد مهدي بس شفته حليان وصاير ابيض احمر دشداشته بيضة تلالي وجهه مابيه اي تشوه والچراویه الخضره على متنه وشكل يجنن وگف يمي تمعنت بوجهه فرحانه هايمه بيه

گتله

-انت عایش ياحبيبي والله گتلهم عايش بس محد یصدگني

جاوبني

-ليش كصيتي شعرچ قارورتي

-لان احبک واني الگ وگلي الگ وشعري شسوي بي خلاف عينگ خلي يمگ تنام عليه

ـ گلتيلي احبگ

لزمته من ايده وگعدت على السرير..

-مو بس احبك  واموت عليگ واعشقگ والله سيد راح اتعلم كلمات غزل واكولهه الگ

ـ گلشي منچ حلو قارورتي

ـ لعد ابقى يمي بداعتي لاتطلعلهم خليهم معتقدين انت متت حتى ترتاح منهم من مشاگلهم ابقى بس يمي لاتفارگني نيمني على ايدك مهاد گلبي حبيبي

-واخيرآ دلعتي اسمي الله حققتي امنيتي

-عجبك مووو

-يسلملي هل راس

-خوش هسه اريد اغفى بحضنك گل الدلع والغزل راح اتعلمة لخاطرگ بس لاتعوفن

ابتسملي وگام عني وابتعد بعد ما التفت عليه اختفی
ردت احرگ جسمي وارگض وراه بس ماگدرت اريد اصرخ واصيحله يلتفت عليه ولايعوفني بس ماگو

صوتي اختفى سيد مهدي اختفى انهاريت لطمت وجهي بقوه بلگي يرجعلي بس ماگو راح ماعرف وين راح گمت افتر بالغرفة اشوف منا ادور يم الكنتور جوة السرير لا اني مانمت هذا مو حلم شفته والله شفته ولزمته…

خفت يشوفوني اهلي وعبالهم تخبلت
رگضت  وتمددت علی الچربایه مارید اکعد بعد من الصدمة اريده يرجع  اليه

لو چان حلم ارید ارجع احلم ويبقى مفعولها ساري الشي الوحيد المصبرني على الاستمرار بالحياة هو شوفته

رد آضهرلي حبيبي من العدم
ابتسمت اله خفت اتحرگ من مگاني خاف يختفي مرة ثانيه ..

اجى عليه بسني من راسي .. اي والله حسيت بي يبوسني من راسي بعدين راح مني يمي يشاقى و يضحك جان كاشخ كلش وحط عطر المسچ الاصلي اخذ سبحته ودعائة لعد اشلون يجيبون خبر موته

عقلي يخاطب روحي بس روحي ضايعه مثل قارب ضيع خريطة الطريق وشراعه
فقدت السيطره ضايعه واريد مرفاء امان بس سيد مهدي مرفئي ..

كمت من مگاني ادور طلعت برة الغرفة اتلفت وادور مثل الام المضيعه ولدهه مالگيت شي

رديت دخلت للغرفه مكدرت ابچي ستكان جسمي و تنهيدات
سيد مهدي بقراء زيارة عاشوراء غفيت ونمت...

دقيقه وفزيت خايفه اريد ابچي لان ماكو هو  وانه مو ابيتي..
ماريد استوعب وماريد اصدك الصار يارب يگون حلم يارب يگون گابوس واگعد منه
غصة بگلبي تحرگني ابچي و ابلع دموعي

مديت ايدي وتذكرت نقالي وينه بي صورنا لقطاتنا ضحكاتنا سويه وحلاوة الضحكه طعمها بشفافي هسه حلگي مره امر من الحنضل اريد سيد مهدي وجهالي بعيده عن احقاد الناس

دخلت امي كعدت طرف الچربایه

-هاااا بنیتي ماصرتي زينه
درت وجهي الها

-وليش اصير زينه والمن

-الخاطر جهالچ منو الهم تری سید مجتبی ملتهي بامه وجده انتي لازم تتقوين الاجل اطفالچ

-اموت ویبقون عمام السید یربوهم

-لاااا لا هذاا شلون منطق ووللج محد یررحم حال احد ليش انتي منو رحمج بهالدنية لان ناسها تغيرت منو تتوقعين يرحم بحال جهالج احنة مادايمن وعمهم ملتهي الله يساعدة

ـ اريد سيد مهدي يمة

ـ ياابنتي الموت حق… هذا الموت جان یخوف الناس قبل چانت من یموت الها احد تنسی الزعل وتوگع کل الخلافات والاحقاد ويرجعون ايد وحدة…

بس هسه الوقت صار دنيء قبیح اکثر مایتصوره عقلچ..
وگلب الانسان  اقسی من الصخر مینسی ذنب الميت ولا ذنب اهل الميت بحيث كد الحقد لبگلهم وگد القسوه مايروح ياخذ من خاطر اهل المیت بحجة متعارگین
وانتي شفتي بعينج ياعقيلةة اصحي عاد

-والحل يمه اريد سيد مهدي مااكدر بلياه

-الحل سلمي امرج لله واقنتعي بقضاء الله وقدرة..
و گعدي لميهم جوه ايدچ..

مثلچ انه من استشهد ابو احمد الدنیا نسدت بعیني بس قويت نفسي الخاطر ابني

_يمه الشعور بذنب يوجع
يمةة قاسي تتمنين لو يختفي  بأي طريقه ولاي سبب وتحت اي ظرف المهم يختفي

-ذنب اي ذنب تقصدين يمة ليش شمسوية

-سيد مهدي چان امنیته ادلع اسمه مادلعته ماگدرت اشوفه شخص یدلع اشوفه سید مهدي وبس اكثر من الف مره يطلب ادلع اسمه ومانفذت طلبة وضلت بنفسه يمة ضلت بنفسه

-وتالي يمه تالي لا تخوفيني عليچ تهون اذا على الدلع هسة يحتاج منج دعاء قران صلاة مو دلع يابنيتي هاي الاعمال يحتاجهه اگثر
لاتسولفين هيج بنتي اهدئيي

-بارده غطیني يمة غطيني

-شبيچ ترجفین  وج دنيا حارة تگتل

-بارده بارده غطيني سيد مهدي وينه صيحي گليله عقيلة تريدگ

-عقيلة ولج لاتحجين هيچ لاتغيبين عن وعيج
تعال ابووو علي الحك عقيلة مدري شصار بيهه ..

سيد مجتبى//اخذت علي ورحت الغرفة دگتور عماد خليت يمه سيد علي گتله

-،أطمئن على جدي واخذه ما اتأخر ان شالله 

-براحتك .. بس تعال تريك راح تجي دكتورة سحرر

-مشكور ما اشتهي..

بقيت افتر بتحاليل جدي رحت للغرفه لگیته گاعده

-لیش جدي تكعد اتمدد وارتاح

-طلعني ختنكت من المستشفى وضاگ صدري

-اهووو ياجدي خل يضبطون ضغطتك ميصيررر

-اذا ابقى اموت تريد تموتني

ـ لا اسم الله عليگ يمعود شنو هالحچي

رن نقالي فتحت خط طلع ابو غفران سلمت رد السلام ..
شنوووو .. تمام تمام
سديته متفاجاء من صدك احتاريت گال جدي

ـ شكووو بويه احجي

-عقيلة مرت سيد مهدي الله يرحمه

-شبيهااااا وانا ابوك

- دتنزف وداخله مرحلة الصدمه العصبية

-كوووم وولگ گووم اخذني لليتيمه كووم

ـ لحضة لحضة لاتتعصب هي هنا فوگانه بالمستشفى…

جبت كرسي متحرك واخذت جدي صعدنا القسم الولاده شفت ابو غفران سلمنة عليه وگال لاتسألوني گلشي ما اعرف هسة تطلع ام غفران وتحجيلنة الصار

وكفنا انه وجدي منتظرين خبر طلعت ام غفران سلمت

گالها جدي

-اشبيها عقيله

-ماادري بس حاليا داخلة صدمه ومن اثر الصدمة دتنزف ومنتظرين الطبيبة…

وكفنا كل احنا منتظرين ندعي ونبتهل الى الله اجتنا ممرضه گالت

-منوو بیگم من اهل المريضه هنا

جاوب جدي
- احنه احنه بعد عمچ احنة هذا اخ زوجها يعني اهل زوجها وهاي امهة

ـ  انريد احد منكم يوقع على العمليه لان المريضه حامل وجاي تنزف وحالتها خطره

ـ عملية شنو بنتي

ـ لازم نتخلص من الحمل ونظف رحمها
ولازم موافقه من الزوج او اهلها

رد جدي

- شلون تريدون تقتلون الطفل

جاوبت

-اهم شي سلامة مرت اخوي نوافق؟

#يتبع