رواية عشق وإبتلاء الفصل الخمسون 50 - بقلم الكاتبة شمس السعدي

البارت الخمسون والاخيييير
#عشق_وإبتلاء💔
#بقلمي_شمس

اشترينالها بيت يبعد عنه كم بيت ..
بي غرفه وصاله واستقبال ومطبخ وصحيات ..
وحديقه صغيره .
حلو ومرتب .
نضفته اني وحلا .
ومصطفى اخذ سجاد وراحوا للحله الماما .
جابو غراضها وجابوها وياهم ..

يومين احنه نرتب بالبيت وعدلناها .
صار يخبل ..
صارت ونستي يمها . اضوج اخذ اولادي واروح.
بالليل نروح يمها .
اذا مصطفى بالدوام . اني ابات يمها ..
حتى مااحسسها بالوحده .
ماما صار واهسها بالحديقه . بدات تزرع وترتب بيها كلش حلوه طلعت .
بحيث من نروحلهم نفضل نگد بيها ع الترتيب ..

حياتنا حلوه وكل الي احبهم يمي ..
نطلع زيارات كربله او نجف سويه .
ناخذ سيارة كبيره ونروح ..
والمقابر هم مانفوت زيارتها .. لان عدنا احباب هواي هناك ..

مصطفى شگد يحاول يريد اطفال بعد . بس اني مااريد.
هم عمليات وهو بعدهم صغار ..

وعدته من تدخل جنة مدرسه اسوي ههههه .
ماما طلعت تقاعد ..وارتاحت بالبيت بسبب مرضها وماتگدر .
فگمت اخلي الاولاد يمها من اروح للمدرسه .
بس ملوكه . وياي بالاول ..
ابد محسست احد انه ملوكه مو بنتي .
كان اهتمامي اكثر بيها .
اكو بعض المعلمات وياي . يگولن الي يشوفج يگول انتي امها .

گلتلهن فعلا اني امها ..

دراستها اكلها ملابسها كله اني اسويه الها .
عمتي افراح متگدر .
وهم وياي بالبيت تساعدني من اداوم لان البنات كلها تزوجت .
وبقى البيت النا .
بس اخوان مصطفى اثنين بالمتوسطه وبالاعداديه كبروا .
وهم الهم متطلبات .

الايام والسنين تركض بسرعه ..
بس هذا الشي ماأثر علينا .
نضوج نروح البغداد نتونس كم ونجي .
واول مدخل الفيس .
سوالي فيس ومخلاه بنفسي .
وعود عمامه هناك ميقبلون وجدو مهدي هم .
بس هو گلي اني واثق بيج . اتصفحي بي واستخدميه بس لتگولين الاحد سويت ..

علي اخو مصطفى بالاعداديه . حب رؤى بنت عمتي انتصار اخت حنين .
ويريد يخطبها .
مصطفى عارض يگول وكحه ..
وصارت مشاحنات بينه وبين اخوه .

علي .. انت شهامك اخذت الي تحبها وعندك اولاد منها .واحنه يطبنا مرض .

بيومها صارت مشكله كبيره ..
وماانحلت الا بعد ماجدو مهدي . گله عود خلص اعداديه ويصير خير .

رؤى فعلا وكحه وحتى عمتي متريدها . تگول اني ضگت مره منهم ومااريد اكرر الغلط .
بس بعد الحب اعمى ومانگدر نحجي .

الكبر ماأثر على حبيبي بالعكس زاده وسامه .
اني يوم عن يوم احبه واتعلق بي .
احسه ابوي واخوي مو بس زوجي وحبيبي ..

طبعا بعد ماكبرت ملوكه ..
گال گامت تفتهم لازم نسوي غرفه الهم بصف غرفتنا ونخليهم بيها هي وقسور .
وجنه تبقى يمنا .

بس اجه بالاجازة بلش. طلع عمال . وسوالهم غرفه .
همزين احنه معطلين نصف السنه. .
ورتبها وسوالهم رسومات .
اشترالهم غرفه .
ملوكه اختارت غرفه باربي ع ذوقها .
والشيخ الصغير .
خبلنا . كل ساعه مختار شي .
ومصطفى وياه ميرفضله طلب .
الى ان صفى واخيرا ع غرفه السيارة .
رتبنالهم الغرف .
واول يوم ناموا بيها .. خبصوني .
كل ساعة واجونا . وگطعوا سوالفنا هههههه
ساعه مي . ساعه اهاف . عود اخاف . هذا قسور .
ساعه ملوكه . تگول ميخليني انام قسور .
واني باقيه بينهم .
تالي عاط بيهم مصطفى رجعوا للغرفه .

گال المن سويتلهم غرفه غير ارتاح وي مريتي .
وسحبني اله وهاي كان اول مره مااشلع گلبه .
كنت اگله الاولاد ليشوفونا .
مااسوي شي الا لمن اتأكد ناموا نهائي .
مااريد يصير بيهم الي صار بيه واني صغيرة .
صار وهواس عندي .
حتى مااخلي ملوكه تغيب عني .
سواء بالبيت او بالمدرسه .
وخاصه بعد العجايب الي گمت اشوفها بالنت والفيس .

بابا هذا كبرة وهو ماقطع الامل انه يرجع ماما .
بس ماما ماقبلت وگالت ..
اني ماقبلت بي من كنت شابه هسا اقبل بي .
هذا وكت زياراتي وعمرتي وحجتي.
مالي خلگ بعد لسوالف ابوج ومراهقته هههههه.

وفعلا . مخلت زيارة تعتب عليها .
الايران والعمره وحتى حجة حجت ..

اخواني كبروا . وصارت روحهم بيه فديتهم .
شگد امهم حاولت تبعدهم عني.
بس همه كل يوم العصر يجون يشوفوني .
ومرات اخذهم ونروح الماما نتعشا يمها .
وماما تفرح لان وحدها خطيه .
حتى هي تعودت عليهم وحبتهم .
ومن وحدتها جابت بيبي ماسه يمها .
گالتلها من اشوف امي اشوفج واني وحدي .
بيبي هم فرحت . تگول واخيرا راح اخلص من بتول وبلاويها .
من بعد ماانتقلت بيبي عند ماما .
بيت ماما مافرغ من الناس .
الرايح والجاي يمر بيهم عمود بيبي .
وهذا الشي فرح ماما .
وخلاها ترتاح من الوحده الي كانت بيها .
عماتي واهلنا واحنه واخواني وحتى بابا .
البيت دايما مليان .
وبيوم الجمعه .
كل بيت يسويله طبخه ونجتمع بيت ماما .
وضحك وسوالف ولمه .
وايام حلوه ماتنسى .. الى سنة 2014 المشؤومه .
اي اكثر سنه مشؤومة بالنسبه الي .
اخذت فرحتي وحياتي وضيعتني بأيامها .

بهذي السنه دخل داعش والوضع تأزم . وصارت مجزرة سبايكر الي راح بيها آلآف الشباب الحلوة.
ومنهم اقاربنا خطيه اثنين .
امهم ماتت عليهم ..

زاد خوفي على مصطفى .
وگمت اتوسل بي ميروح البغداد بعد لو الاي مكان .
لان كان دوامه بالافواج . وكل يوم ياخذوهم المكان .

بس مصطفى عنيد بشغله .. ويگول العمر واحد وكل يوم يموت بيومه لو اهلي روحي بقوطيه .

البلد مگلوب بسالفه داعش .
اكثر من حرب بوش .. كان داعش وباء وسيطر ع البلد .
هواي محافضات سقطوها .

كان من يروح مصطفى للدوام ع الدقايق اتصل عليه .
وهو رغم خوفي عليه وقلقي .
كان يحب يتغزل بيه ويسمعني كلام حلو حتى ماانقهر .

………… ..… ..

ملوكه نجحت من الثاني . وقسور بالروضه .
وجنو صغيره بعدهي .
كنت اباوعلهم واخاف يجي يوم الي يبقون بلا اب .
بسبب عناد ابوهم .اگله بطل من الدوام .. يگلي قابل اني جبان .
الشهاده للابطال .
يحرگ بروحي .
وتالي يضحك . يگلي ولج اذا مااشوف وجهج ووجه اولادي ماارتاح .
ومستحيل يجي يوم اروح واترك هذي الوجوه .
بس انتي شدي حيلج وياي وسويلي بعد ضرغام حتى ارتاح .

ههههههه هو ادري بيك تريد توصل الهاي النقطه .

ولج ماسه لتعانديني مو اسويه غصب عنج .

ههههه متگدر ..

دتعاي اريد اشوف شلون مااگدر .. ووووو💑

عيشني ليله تخبل عبالك ليلة زواجنا ..
وكانت هاي اخر ليله نعيشها سويه ..

طلبوهم بالدوام ثاني يوم وراح ..
ويمكن مناك ناقلين الفوج مالتهم الغير مكان لان من اتصل .
گال احتمال اطول يله اجي الوضع متأزم و ماكو نزول .
بقى فترة منازل .
وكل ساعه اتصل عليه مرات يرد ومرات ميرد .
لان يگول طلعنا بكمين .

شنو كمين لعد انتو وين .

احنه بالصقلاويه ماسه ..

شنو😲 . من شوكت وليش رحت مو گتلك لاتعرض روحك للخطر عمودنا وينه وعدك الي مصطفى.

هاي شبيج يعمري گولي يله . والله سحگناهم سحگ وبعون الله ميگدرولنا .
خلي عينج بعين الله . وادعيلنا .

بيومها گلبي انقبض والنهار كله مانشفت دمعتي .
كلما تسألني عمتي .
اگلها مابيه شي بس مختنگة .

ثاني يوم اتصل بيه مصطفى.  كان شهر التاسع بسنه 2014..
گعد يوصي بيه ع الاولاد وع روحي . وعلى امه .

مصطفى شبيك ليش تخبلني .

مابيه شي حبيبي.  بس هاي دنيا وماتنحزر .
وهسا احنه طالعين بواجب ردت اسمع صوتج واسمع كلامج الحلو .
حتى اتقوى واتشجع ..

ياكلام حلو مصطفى دمي نشف .
اعتبرينا مخطوبين ونسولف .
تتذكرين من نگعد سويه يم نهر الغراف .
شلون بالبداية نتناگر . وتگولين عليه معقد .
ولج مااصدگ يوم واحد حب وحده مثل حب مصطفى الماسه .
انتي ماستي وجوهرتي .
هههههه لو من اجو خطبوج الي واني ماادري .

مصطفى ??

عيونه 😍

احبك

اموت عليج

دير بالك على روحك الخاطري .

مدام انتي بگلبي ميصير عليه شي .
بوسيلي الجهال وديري بالج عليهم .
اريدج قويه يعمري ..

لاتگول هيج مصطفى تخبلني . انت قوتي اني بلياك مااسوه شي . خلي هذا الشي ببالك .
ولتذب روحك للخطر .
فكر بينا يعمري .

ان شاء الله حبيبتي . انطيني بوسه حتى اتوكل .

امووووااااه 😘😘 يعمري .
مودع بالله ومحمد وعلي ..

هذا كان اخر اتصال بينا .
بعدها كلما اتصل يطلع مغلق
الخوف كتلني ودموعي مانشفت .
كنت اصلي واقرأ قرآن حتى اهون عن نفسي .

تالي ماتحملت . رحت العمتي گلتلها . وبيومها گب العياط بالبيت .
جدو مهدي بأتصالاته ومعارفه .
عرف اكو مجموعه ماخذيهم من الصقلاويه ومحجوزين عند داعش .

واكو جماعه محاصره هم ثانيه . وطالبين مساعده وانقاذ بس مواصلتهم . ويمكن داعش قاتلهم .

الكل بجى وعيط وعمتي استسلمت ولبس اسود .
وگالت خلص ابتي مات .

بس اني كان عندي امل بيوم يرجع .
مستحيل يترك اولاده ويتركني ويروح ..
بس من اتذكر سوالف وشلون يوصيني .
اگوم ادگ والطم وابجي .
بحيث محد يگدر يلزمني .
عشت بتناقضات .
ساعه احجي على عمتي واگلها لتبجين ان شاء الله عايش .
وساعة اني اسوي اكثر منها واملخ شعري .
اگلهم حبيبي واريده .
الله الي جمعنا بعد كل العوائق ورزقنا باولاد .
مستحيل ياخذة مني .
اذا انطانياه واخذه . ليش خلانا نجتمع ليش مخلانا مفترقين .
وكلها تگلي لاتحجين هيج هذا كفر .
بس اني بلاوعي وماعندي وعي افكر بالي احجيه .

اولادي يحسوون ابوهم غايب وصارله اكثر من شهر .
يسئلون عليه ويشتاقوله .
واني احاول اصبرهم بس اني شنو الي يصبرني.

ماما گالت تعالي عندي لاتبقين هناك وتتذكريه .
بس اني رفضت مكاني هنا ببيت زوجي .
اخاف يجي يوم ومايلگيني .
وعمتي هم خطيه تواسي روحها بوجودهم .

كلها گطعت الامل . الا اني صحيح ابجي واشتاق واطلع صوره ومسجاته .

بس بقيت انتظره الى يومنا هذا ..
كل يوم ابجي دم من الانتضار .
لبسوني اسود .
واني مااعرفه اذا ميت او عايش .
هسا لواعرف ع الاقل ارتاح .
ع الاقل اروح الگبرة وابجي وارتاح وازوره .
بس اني عايشه بضياع .
اشتاقله ومااعرف وين اروحله ووين الگيه .
كل ماينفتح الباب اباوع اگول بلكي هو الي دخل .
ماقصرت عن اولادي بشي .
وربيتهم وكبروا .
ودائما يسئلون عن ابوهم .
كبرت صوره كلها وترست الغرفه بيهن .
حتى جنو تعرف ابوها وماينسوه .

وبيوم الم كتلني بالليل .
من القهر گلت احتمال غابت .
بس ماادري بروحي حامل .
وسقطت بيومها .
من گد القهر والتعب .
مااتحملت .
اوووف يامصطفى حتى الطفل الي كنت تتمناه
ماراد يجي ع الدنيا وانت مابيها .
عافني وراح هم ..
متت بيومها من البجي .
كان هاي اخر شي تركه مصطفى بيه وراح .
وتالي خسرته بقيت الوم بروحي وابجي ..

الى يومنا هذا مانسيته ولااعتبرته ميت .
صحيح اشتاقله بس انتضره .
اصلي اله واقراله قرآن .
بس ماصدگت يمكن يموت ويتركنا ..

الناس اعتبرته مات واخوه نسى واتزوج .
وطالب بغرفتنا الفوگ وطلعنا منها .
انتقلت يم ماما بعد المشاكل .
وعمتي حجت وياه ومافاد .
يگول رجلها ومات شعندها بعد هنا .

حسيت بذله بعدك يامصطفى وينك تعال شوف حالي وحال ولدك .
بيبي ماسه بعد غياب مصطفى كتلها القهر وتوفت مااتحملت كانت تحبه كلش .
لعد ليش اني مااموت من القهر عفيه گلب عندج ماسه .
بس بعدين اتراجع واگول اني عشت من قهر القهر شنو ذنب اولادي خطيه .
يتيتمون من الابو والام .
استمرت الحياة عند الكل . الا عندي توقفت من اخر اتصال اله .
وصار طيف بحياتي ميفارگني احجي وياه ليل ونهار .
كنت التهي بالدوام ودراسه الاولاد بالنهار .
بس الليل اووووف هنيال الي ينام الليل ..

قد طال غيابك ومازلت انتظرك في كل وقت طال الغياب وانا فاقدة كل شئ من دونك فأنت روحا لي وقلب لي يضيئ لي الحياة الى متى سيظل غيابك والى متى تنزف دموعي خوفا عليك..
طال غيابك يا حب العمر كلة انتظر همسات صوتك وانتظر ضحكاتك انتظر كل جميل فيك.
طال غيابك حبيبي وانا اشتاق اليك فاقدة للحياة من دونك ..انتظر مجيئك كي نعود بالذكريات ضحكاتك كلماتك صوتك صدى يلازم حياتي ..
ياحب عمري الكبير . ارجع من جديد قد طال الغياب
وانا فاقدة لحبك ولحضنك وهمساتك ياعمري ..

النهاية ☹️☹️
للكاتبه شمس ❤
 
……… .....……………

احبتي اتمنالكم متابعه ممتعه ويارب عجبتكم .
صحيح الكل طلب متكون النهايه مأساويه لكن هذا الشي مو بيدي .
ومااگدر اغير النهايه من كيفي .
مااعرف اذا كان مصطفى عايش او ميت .
لكن الرحمه للعدل والميت .
وربي يرحمه اينما كان .
ربي يصبر قلب زوجته ويحفظ اولاده ويجعلهم بأحسن المراتب ويكونوا فخر الابوهم ..
وامهم الي تعبت بحياتها هوايه وتحملت الي ميگدر يتحمله . الله يعينها ويصبرها .
وتسلمون ع المتابعه حبايب .
انتضروني بقصه جديده .
لكن بعد فترة من الاستراحة 😊😘😍
الكاتبه شمس