رواية عشق وإبتلاء الفصل التاسع والأربعون 49 - بقلم الكاتبة شمس السعدي

البارت التاسع والاربعون
#عشق_وإبتلاء💔
#بقلمي_شمس

خنگتني العبرة وعمتي تحجي .
گلتلها عمه مبريه الذمه الها . ولليوم ماحقدت ولا كرهتها .
هي مثل اختي والله ..
وبحياتي ماردت تعاستها وابتعدت عن الناصريه علمودها .

عمتي انتصار ..ادري يمه ادري .
گلبج مثل گلوبنا ماتشيل حقد .
بس مااوصيج ببنيتها.  صارت امانه برگبتج .

-ملوكه بعيوني عمه .

عمتي تكسر الگلب . موتت روحها طول فترة الفاتحه .
بناتها حاقدات عليه ويسمعني حجي .

ملوكه كانت متريد بس اني وتبجي .
وهنه ميخلنها تجي الي .
الى ان عمتي افراح گامت تحجي عليهن هي وبيبي ماسه .
كنا نروح الصبح ونرجع بالليل تعبانين وماما وياي هي وباجي احلام . عدنه يبقن ..

احس نضرات الناس تاكلني . وخاصه من يشوفون ملوكه بحضني.  يگولون موتتها واخذت رجلها وبنتها .
وماما من تسمع ماتسكت تبقى تحجي .

اضوج بداخلي واموت قهر . بس اتحمل .
لان الناس عليها الظاهر .

خلصت الفاتحه .. رجعنا للبيت .
عمتي بقت هناك لان ناس تروح وترجع .

بقت ملوكه عندي . اكلها ولبسها واصعد شايلتها وانزل شايلتها .
غير العرك الي بينها وبين مصطفى..
اول مرة اشوف ابو يغار من بنته .

مر الايام والاشهر وطلع اربعين المرحومه .
واني احسب كل شهر وماكو..
استحي احجي ..
بيوم گتله مصطفى اريد اروح للحله اشتاقيت الماما .
گال من اروح للدوام اخذج ومناك اروح .
ومن اجي اخذج .

فرحت . رحت الماما . وطلبت منها تاخذني .
اخذتني للدكتوره سوتلي تحاليل .
گالت ماعندج شي بس راح انطيج منشطات ومساعدات للحمل .
وگالت تبلشون من يوم 15 وان شاء الله يصير حمل ..

رجعنا من الدكتوره .
صار احمد بوجهي .
خليت ماما تدخل .
هو يضحك بمكر . ويگول حليانه ع الزواج .
ماحجيت شي . بس گتله تف 💦بوجهك ..
اريد الله ليسعدك مثل ماجبرتني اتزوجك بكذبه وخليتني تعيسه .
الله لينطيك .
وتركته ودخلت حسيت روحي ارتاحيت .

مرن كم يوم واجه مصطفى اخذني ورجعنا .
التزمت بالي گالته الدكتوره .
وفعلا سويت ع الجدول .
والحمد لله طلعت حامل .
الفرحه ماسايعتني .
ومصطفى شالني ويعيط فضحنا .
عمتي فرحت .
وگالت الله لاينطيني الفرقتكم .
كلما اشوف فرحتكم وسعادتكم اموت قهر .

اوووف عمه الفات مات لتشيلين هم .

بدآ الدوام . سويت استضافه للناصريه .
وگمت اداوم بجامعه ذي قار .
اجرت وي خط .

صحيح اشتاق الحياتي هناك وي سارة ووسن .
بس وسن گالت بس يتزوجون هم يسوون استضافه ويجون للناصريه .

الدوام والطريق تعبوني واني حامل .
بطني كبيره واداوم .
بس لابسه جبه او عبايه اسلاميه .
حتى ماازعل مصطفى.  يغار حيل .

ملوكه بدت تكبر وتحجي .
وتگلي ماما . هذا الشي يقهرني لان انحرمت من امها بس يفرحني .
لان الله رزقني ببنيه وواحد جاي بالطريق ..

گمت احسب يوم يوم حتى اولد ..
ولادتي كانت صعبه . المي مخلص والطفل قليل نبضه .
ومصطفى تخبل .
گال هسا تسوين عمليه .
حولوني للاهلي .
واجانا . قسور ..
اصر مصطفى يسميه قسور .. يگول من زمان احب هذا الاسم .
وصار ابو قسور .
وصرنا حزبين .
هو وابنه واني وبنوتي .

ملوكه تغار هواي من قسور . وماتخليه يتقربلي .
ومن ارضعه لو انيمه بحضني .
تدفعه وتنام بمكانه ..

كبرت عائلتنا . وصارت مليانه سعاده .
رغم دوامي ماخليت شي يأثر على حياتنا . او يخليني اهمل اولادي وزوجي وبيتي .

مصطفى يريد بعد طفل .
بس اني ماقبلت . گتله اكمل جامعه يله .

وفعلا كملت جامعه .
وكبروا اولادي .
قسور سنه ونص  . وملوكه راح تدخل بالسنه الرابعه .
نادره تخبل . فلفل تشتغل وياي .
وتسكت اخوها اذا بجى .

مصطفى افندي . مخلاني اتنفس گبل سوه الطفل لاخ .
ويگول لازم اسوي فريق ضدجن .

وبدأت معاناة الحمل والتعب .
بس هالمره احنه كبر فريقنا . واجتنا جنة.
صارت ملوكه وجنة حياتي كلها .
ملوكه ابد مغارت منها .
وتگول احب البنيات نااحب الوليدات .
هههههه عنصريه مثل ابوها ..

شگد حاول مصطفى يعيني . وبسبب معارفه وموقعه .
تعينت بعد سنتين من تخرجي . معلمه جامعيه
اولادي عندي عمتي .
وملوكه بالروضه .. اخذها واجيبها وياي .

بنفس السنه الي تعينت بيها .
توفت بيبي هديه ..
رحت كم يوم للحله .
ماما خطيه بقت وحدها ..

شفت مرت احمد بيدها طفل . تعجبت هاي شوكت حملت شوكت جابت .
سألت باجي .
گالت لا هذا ابن اخوها . تبنوه
لان ميصير عندهم .

-ليش السبب بمنو .

-مرت ماهر تگول منها السبب بس احمد يحبها ومايگدر يستغنى عنها .

-هههههه علينا عمه . اكيد تگول هيج مثل ماكانت تگول عليه .
مبين السبب بأبنها ..

مرت الفاتحه .
وماما فاتحتني بموضوع .
گالت اني وحدي .
ماتجون تگعدون وياي انتي ومصطفى والجهال .

-ماما ماادري اشوف مصطفى بس مااعتقد يوافق .
لان تدرين بمصطفى وتفكيره مستحيل يگعد عند واحد .

-انتي شوفيه وگليلي ..

سألت مصطفى گال.  انسي الموضوع ماسه ..
مستحيل اروح لهناك وعايف ناسي واهلي .
تريد امج تجي لهنا واخليها على راسي .

-تدري بماما مترتاح عند احد .

-عادي أاجرلها بيت هنا يمنا ..
وتكون قريبه علينا ..

بس ماما مقبلت . واصرت تبقى بالحله .

بعد فترة خوالي طالبوا ببيع البيت .
وكل واحد ياخذ حصته .

البيت كان كبير وموقعه حلو . كان سعره غالي .
اخذت ماما حصتها .
ولان هناك البيوت غاليه مجابت سعر .
فأتصل عليها مصطفى وگله اكو بيت يمنا نضيف وبناء حديث وصاحبه اعرفه .
تعالي يمنا وهنا ماسه يمج . احسن مماتبقين وحدج .
وفعلا بعد ما الكل ضغط عليها وافقت وقدمت نقل للناصريه .
واخيرا راح تكون ماما قريبه عليه ..
#بقلمي_شمس
يتبع….

………………… ..

حبايب اعرف القصه هوايه طولت . بس لان احداثها هوايه ادري قصرت وياكم مرات .
بس رغم كلشي اعرفكم تحبوني ومتزعلون عليه ..
انتضروني باجر . ونهايه القصه .
تصبحون على ماتتمنون 😘😘