رواية عشق وإبتلاء الفصل السادس 6 - بقلم الكاتبة شمس السعدي

البارت السادس
#عشق_وإبتلاء💔
#بقلمي_شمس

احسك غامض .. گ غموض النهر ..
مانعرف بشنو داخله الا اذا غصنا بي ..
والي مايعرف يسبح يغرگ بقاعه ..

ههههه وشنو جابرج تغوصين بي..
وانتي متعرفين تسبحين ..

مجرد فضول ..

الفضول يكتل صاحبه ..

خليج دووم واثقه بخطواتج حتى ماتغرگين بيوم وتندمين ..

امممم كلامك حكم .. صدگني راح اخذ بيها ..

ههههه السوالف وياج حلوه ..
بس صرنا بتوالي الليل ..
وعيب گعدتنا الوحدنا ..

گمت امسح بملابسي وهو واگف يباوعلي .

روح انت لاتنتظر هسا اجي  ..

لا مااروح الا تجين انتي .. النهر مسافه عن البيت والماره هواي وميتأمنون ..
انفضي ههدومج بسرعه وامشي گدامي ..

اني امشي وهو يمشي وراي ..
احسه يراقب خطواتي ..
التفتت لگيته منصي راسه ويبتسم ..

عجيب المعقد يبتسم .. بس الحلو بي ..
ميباوع بغير طريقه .. ومحترم ..

مو مثل حمودي .. كنت من امشي گدامه يباوع من فوگ لجوه ويتفحص جسمي ..

دخلت للبيت ..
لگيت ماما منتظرتني ..
وين رحتي مااسه .. ماما ميصير تطلعين بكيفج وتدخلين بكيفج .. هنا مو مثل الحله ..

ماما كنت گاعده ع النهر .. والجو حلو ..

ياحلو ولج .. متشوفين البرد ..
هسا تتمرضين ..

تعالي نامي جهزت فراشج ..

بيبي ماسه .. سحلي فراشج يمي ماسه اني ماجايني نوم تعاي نسولف ..

سحبت فراشي ونمت بصف بيبي ..
گالت شعنده صويفان وياج ..

ههههه ياصويفان بيبي ..

ولج لاتلاعبيني شفتج گاعده وي مصطفى ..

هاااا مصطفى .  هيج كنا گاعدين ع النهر ويسولف وياي ع اسمه وليش سمو قلعه سكر بهذا الاسم وهيج ..

بس ???

ههههه بس .. بس ليش هيج تگولين غير ابن عمتي واسولف وياه بيها شي ..

لا يمه مابيها .. بس هو الي معجبني .
مايحب يگعد وي النسوان .. شگعده وياج ..

ترى انتو ماخذين عليه فكره ..
بالعكس احسه انسان واعي وتفكيره كبير ..
بس انتو ممجربين تاخذون وتنطون وياه بالحجي وتفهموه .
يبيبي اني شيوخ اگدر اسايرها واحجي وياها ..
الا صويفان مااگدرله ..

هههههه ..

دنامي يمه نامي اني هم نعست ..

تصبحين ع خير بيبي ..

وانت من اهل الخير يمه ..

بقيت افكر بصوته من يغني وكلامه .. الى ان غفيت ..

مر كم يوم بين البيت وناس داخله وناس طالعه ..
عبالك سوگ مو بيت وماكو راحه ..
بس الاطلاله الي ع النهر رائعه تنسيتي وتعيشني جو هادئ ..

لان اعمامي واهلنا كلهم ضايجين ع الوضع ..
الاخبار مطمن .. والقصف مستمر ..
واحتمال بغداد تسقط ..

طلعت وقت الغروب الجو يخبل والشمس حمرا بالغروب .
والنهر ساكن ..

كنت صافنه اتأمل ..

اكو ورى هذا السكون عاصفه .. ( سمعت صوت ورايه )

التفتت .. مصطفى ..

لا ماكو عاصفه .. بس حسد ..

ياساتر .. منو وگع بعينج الشهبه 😂

ههههه انتو 😂#شمس

الله يستر ليش

احسدكم ع حياتكم .. حلوه وبسيطه ..
والنهر والغروب يخبل هنا ..

اي صحيح .. وهذا الي مخليني ساكن بيت جدي وماافارگه ..

ليش انتو بيتكم مو هنا ..

لا كنا گاعدين .. بمركز الناحيه ..
وبعدين جدي الشيخ اشترى هذي المزرعه وبنى المضيف واحنا بقينا بذاك البيت ..
ولأن اني متعلق بي هواي اجيت وياه وسكنت ..
اتذكر انتي اجيتي البيتنا ذاك ..

مااتذكر ..

بزواج عمتي نوال من خالج معتز .. وحتى گرصت من خدج ..

اي صحيح .. بخجل 😇..

انت شلون تتذكر ..

كل تفصيل يخصج اتذكره من وانتي صغيره ..

بس احنه ماكنا نلتقي او اشوفك ..

اي بس بقت ببالي ذيج الطفله الي شفتها اول مره وبرائتها ..
ولو هسا متغيره هواي ..

يعني شنو قصدك هسا ضاعت البرائه ..

البنيه حتى اذا ضاعت برائتها تبقى عفتها واخلاقها تجملها
انت شنو .

بكيفج ..

بداخلي ..( بعد كل هذي السنين ويتذكر تفاصيل عني شي عجيب )

بقينا صافنين ع النهر وبلا كلام ..
ماكو حجي بينا .. بس يمكن دواخلنا هي الي تحجي بمكانه ..

معقوله ماسه .. انتي الي احلامج ورديه ..
تفكرين بشخص من الريف .
ومنو مصطفى المعقد مثل ميسموه ..

الآذان اذن اروح اصلي .. وهسا وقت عشا ..
ادخل لتبرد ..

شويه واجي روحي انتي ..

دخلت للبيت واتلفت اشوفه گاعد ومالتفت ابد ورايه ..
صارت مقابيلي حلا ..

وين عينج ماسه ..

ها ماكو شي ..

اگلج حلا .. مصطفى يدرس ..

اي يدرس محامي بس بالاصل المفروض يخلوه قاضي لان يحكم ومايدافع ..

هههههه لا دا احجي صدگ .. شنو يدرس

اي والله گتلج يدرس محامي هاي اله اخير سنه يمكن ..

يعني قصدج قانون ..

اي هو قانون ..

معقوله ..

اي جدي شجعه وگاله انت ماتحب الظلم . ومن هاي اختار المحامي احسن الك ..

وحتى جدي يشيره بكل شغله وياخذ رايه ..

امممم حلو .. مااتصورت يدرس كل يوم اكتشف شغله حلوه بي 😇

شگلتي ..

لاهيج ماكو شي ..

مرت بنت عمتي انتصار .. اسمها حنين ..
اشو هاي حسيتها ضاجت .. وعبست وجهها ..

مااهتميت ودخلت للمطبخ توضيت ورحت صليت ..
وبعدين گمنا جهزنا العشا للمضيف وديناه ..
وحظرنا السفره لحتى نتعشا ..

گاعدين ناكل .. مسوين بتيته وطماطه وباذنجان وخيار وخضره وخيرات الله هواي ..
ولمه وسوالف ..

ومناوشات بيبي ماسه وبتول الي ماتگضي ..
وكل ساعه تشمر كلمه ع ماما ..
وبيبي تحجي ..
وحتى عماتي ميرضن ع ماما ويحبنها ..

بعدني بأول لفه واني طبعي اكل ع كيفي ..
دخل مصطفى ..
گام يكح .. عدلنا حجاباتنا ..

گال .. الجماعه هناك اجيت لگيتهم مسوين هجوم ع الاكل ومامخلين الي عشا ..

بيبي .. تعال يمه هنا هذا خير من الله ..

ماحسيت الا تقرب وقرفص يمي وسحب لفتي واكلها .
#بقلمي_شمس
يتبع ..