رواية عشق وإبتلاء الفصل السادس عشر 16 - بقلم الكاتبة شمس السعدي

البارت السادس عشر
#عشق_وإبتلاء💔
#بقلمي_شمس

اضطريت البس جبة واطلع ..
مصطفى يضحك .. لان يعرفني سافره .

طلعت من باب المطبخ ..
لگيت مصطفى واگف بالباب يجهز بسيارتهم ..

گال طالعه تخبلين بالصدريه . بس هيج احلى .

اي طبعا انت اكثر واحد فرحت لمن لبست جبه .

هههههه اي والله وياريت تلبسيها دائما ..

من عيوني وابتسمتله ..(بقلمي الكاتبه شمس)

ولج انتي شنو راح تخبليني . فد مره عاندي وگولي لا

مستحيل . لان اعرفك تحبني وتريد مصلحتي .

ويگلك لاتحب وحده صغيره ..
يروحلج فدوه بنات الجامعه كلها .

ليش انتو عندكم بنات 😲😡

ههههه هستوج دريتي .. يله روحي لاتتأخرين .

من ارجع اخابرك . هاي ماادري بيها مال بنات بالقانون عبالي بس ولد ..

هههههه اشتغلت الغيره .. وربج مااشوف بس وحده بگلبي وعيوني وهي انتي .
اطمأني مااحب ولااحب غيرج .

الا اروح قانون اني هم ..

هههههه غير انتي علمي بعد شلون ترحين قانون .
وذيج المره بالقلعه .
هم گلتي اريد اصير بالقانون .
وسكتت مااريد احرجج .
بس مو تحجيها بمكان عام وتفشلينا.

هههه شمدريني ..

معقوله انتي هيج فطيره . رحمتك ربي

ودعته ورحت وكل ساعه اتلفت اباوعله .
يخبل والله ..

شفت بابا طلع واجدادي ..

ركضت للمدرسه من غير مااباوع ..

مر اليوم عادي . امتحنت الامتحانات الشفهيه كلها بيوم حتى اخلص منهن واگعد اقرأ .
ونطونا الجدول .

والاسبوع الجاي امتحانات التحريري ..
فقررت مااداوم بعد واگعد اراجع بالبيت .

انشغلت بالامتحانات .
وكلما اتصل ع مصطفى شويه ويگلي روحي اقري لاتلتهين .(بقلمي الكاتبه شمس)

كان حريص عليه اكثر من نفسي ..
ويگلي اريدج تطلعين معدل زين وترفعين راسي .
وكنت ادرس علموده .
وحتى اخلص بسرعه ونتزوج .
حلمي انجمع اني وياه بغرفه وحده .
ونعيش حياتنا سويه.

امتحنا وكنت بأغلب الامتحانات ممتازه بس الكيمياء شويه صعبه .

واخيرا راح ارتاح من ضغط الامتحانات..

بدينا بالتحضيرات الاربعين جدوا .
ومابقى وقت ..

صار اربعينه . وهم هوسه وناس هواي وعشا واهم شي يجون اهل الناصريه .
گمت اعشقها للناصريه من ورى حبيبي ..

هم بقوا يومين وراحوا ..
بس هالمره ماشفتة هواي ولاسولفنا .
كانت بس نضرات ..
وثاني يوم اخذ بيبي وراح لان عنده امتحانات .

مرت الايام بين قضيه جدو الله يرحمه .
والمشيات .
وتالي لزموا اغلبيتهم والباقي انهزموا ..
لانه فقير وماله اذيه لهذا حقه ماضاع ..

استلمت النتيجه وكانت درجاتي كولش زينه .
وفرحت حيل .. رغم الضروف والفاتحه بس كان معدلي كلش زين ..

ومصطفى هم نجح وتخرج وبتقدير جيد جدا ..
وكان عنده طموح يكمل دراسات ..

العطله كلها گضيناها بالبيت لاطلعه ولا زياره .
ماما دايما مريضه .
السكر ماجاي يستقر . وبيبي هديه هم مريضه .
يعني حتى مااگدر اتركهم واروح للناصريه .
مشتاقه المصطفى كلش .
وصار هوايه مشايفته .
وبالتلفون مانگدر نحجي هوايه .
بس سلام وشلونج ومشتاقلج .
اكثر الاحيان ماما او بيبي گاعدات بالصاله .
ومااگدر اخذه واروح للغرفه يشكون ..

بقينا العطله كلها هيج .
ماشفته غير بس مره وحده اجه هو بابا ..
ومحجينه هواي .
بس يوم عن يوم حبنا يزيد ويكبر .
گمت اجازف بالليل واخذ التلفون بالاستقبال .
ونسولف للفجر . كانت احلى ايام .

قريب الدوام ..(بقلمي الكاتبه شمس)
تفاجأت بخوالي مجتمعين وي بيبي وماما بالغرفه .
ويسولفون .
بس ماافتهمت شي .
ومقبلوا احد يدخل ..

حاولت افهم شكو مافهمت .
مر يومين على اجتماعهم ..
اجت ماما .
گالت ماسه حبيبتي .. خالج ماهر خطبج الاحمد ..
واني گلتله اسألها .واشوف .

هههههه صدگ تحجين يووم . اني اريد اكمل دراستي وبعدين هو شنو احمد واوافق عليه .

اي يمه بس انتي تعرفين من انتو صغار محجوزين والكل يعرف هذا الشي ..

يعني انتي مقتنعه بهذا الحجي ماما ..
انتي تقبلين واحد يجبرج على بابا .

لاتخلطين الامور ..
ابوج شي وهذا شي ..

ماما اني ماراغبته ولااريده . ودراستي اهم من الزواج حاليا ماافكر بس بدراستي ..

حجيتها واتورطت بس ردت اخلص من احمد ..

وبعدين جدو مصار هواي من توفى شلون يفكرون بزواج
لا حاليا بس حجوا بيج ويلبسون حلقات .
وبعد السنه تتزوجون .
وخالج عامر هم راد رنا المرتضى .
بس مرتضى رافض يگول اريد اكمل ..
لهذا گالوا بس خطوبه .
الى ان تكملون ورنا هم عندها دراسه ..

اي زين لعد سدي الموضوع ماما ولتجيبين اسم حمودي بعد..

گالت خوش اني راح اگول الخالج .. الى ان تكملين سادس ..(بقلمي_الكاتبه_شمس)

ضجت بيومها حيل ..
وردت اگول المصطفى بس ترددت ..
گلت خاف احرجه وهو بعده ممتعين .
واخاف يجي يخطب ويگولوله جاي تكمل ..
لان اني كلت اريد اكمل ومااريد اتزوج واذا وافقت عليه اكيد راح يشكون ..

سكتت ماحجيت وخاصه هسا قنعت ماما بهذا الشي .

لليل اجه مرتضى .
گال ماسه انتي موافقه ع حمودي ..

گتله مرتضى اني دراستي اهم وماافكر لابحمودي ولاغيره ..

بس حمودي ميفيدج .

وانت ليش هيج تحجي المفروض هو ابن عمك وتسانده .

بس انتي بنت عمتي وتهميني اكثر ..

عزاااا هذا بدا يلمح ..

تسلم مرتضى وانت هم سمعت خطبت رنا ..
رنا حبابه  وتحب….  قاطعني .

ابوي وحده قرر اني رنا اعتبرها اخت الي ..
الي ببالي وحده ثانيه ..

فهمت تلميحاته بس سويت نفسي مافهمت ..

بس لو تدور الدنيا كلها ماتلگي مثل رنا .
تحبك من الصغر واكيد راح تسعدك .
انت اخويه وتهمني مصلحتك .

من. گلت اخويه .. حسيته ضاج اترخص وطلع .
#بقلمي_شمس
يتبع…