رواية عشق وإبتلاء الفصل الثامن والأربعون 48 - بقلم الكاتبة شمس السعدي

#البارت الثامن والاربعون
#عشق_وإبتلاء💔
#بقلمي_شمس

أاتصل مصطفى على عمتي ..
گالها اخذي ملوكة ساعه  ورجعيها . مو تبقيها هناك

گلتلي عمتي حظرتها وبدلتلها ..
گلتلها العمتي اروح وياج اشوفها ..

عمتي .. يمه مااريدج تسمعين كلمه تغثج ..
ادري بيج طيبه وماتشيلين حقد على واحد ..
بس يمه مو كلها مثل گلبج ..
بس اني هم اگلها العمتج ردتي تجين وياي ..

عادي عمه ميخالف . بس سلميلي عليهم ..

اخذت عمتي ملوكه وطلعت ..
شويه اجت حلا وسجاد ..

سلمت ودخلت .
گالت وين امي ..

عمتي اخذت ملوكه وراحت تشوف حنين حالتها كلش .

-ياااا وشعجب مصطفى قبل تروح ملوكه ..

-وليش ميقبل امها ومريضه وصارلها شگد مشايفه بنتها مو حرام ..

-ماسه انتي متعرفين شي .. حنين ماحمدت ربها وگعدت بقت تحوس ع المشاكل .
واخر شي خانته وبعين وكحة تگله مثل ماانت تخوني وي ماسه اني هم اخونك ..

-اي گلي مصطفى بس مافهمت شي . شلون خانته .

-بس عليج الله لتگولين اني گتلج .

-لا والله ..

- مصطفى اشترالها موبايل يگول خطيه تخابر امها لو تحتاج شي ..
تالي هو يروح للدوام وهي بغرفتها الليل كله تسهر تسولف وي واحد .
حتى بنتها ذابتها على امي ..

وبالنهار تنام . لاشغل ولاعمل..
وبيوم الله سلط امي عليها . وسمعت حجيها .
وماحجت . راحت گالت الخالتي .
وخالتي ماصدگت امي وتعاركت وياها.
تالي من اجه. مصطفى سمع موبايلها يرن بالليل مسويته هزاز.
واخذته وطلعت بي . گام وراها .
لگاها بالحمام تگله اليوم هذا هنا مااگدر احجي وياك .
عاد دفر الباب ودخللها سحب الموبايل . بس گال الولد غلقه وبعد مافتحه..
ولگينا رسائل اشكال الوان وسوالف ماتسولف .
گعد امي وابوي . وهي ماندمانه بعين وكحه تحجي وتگله مثل متخوني اخونك
گالها ولج سلام ماتسلم عليه ماسه . وانتي هيج تحجين لان اشرف منج وماتدور ولد .
هي تحبني واخذها ابن خالها . وماحجت وياي ولا راسلت .
وانتي على ذمتي وهيج تسوين . طلگها بيومها .
واجتمعوا ابوي وجدو مهدي وابوها وراواهم المحادثات .
ابوها شبعها ضرب ولو ممتلاحگيه جان ميته بيده .

-اووووف الله يساعده المصطفى شلون تحمل .
الخيانه صعبه .
بس حنين تحبه المصطفى انه ادري بيها .
يعني متسوي هيج الا اذا قطعت الامل من مصطفى.

-يوووه ماسه ترى راح تخبليني . لو انتي طيبه زياده عن اللزوم لو ثوله وماتفهمين الحجي .

-ياااا لج شنو ثوله ..
- اي والله موتيني . تدافعين للرايح والجاي كافي .

-هههه دگومي خلي نشوف شنسوي عشا 

اجت عمتي هي وملوكه وعيونها وارمات من البجي .
تگول ماتبقى باجر عگبه تموت ماتطول ..
وهاي بنتها ماتقبل تروحلها تبجي ماتريدها .

-دمعت عيوني . عمه ليش هيج مياخذوها الدكتور يطلعوها بره .

-عمه ابوها ع گد حاله . وماعنده . والغسل هواي يكلف والعلاج هم .
بس الغسل مايفيد يگلهم الا يبدلون الكليه .

-اوووف ربي يباوعلها ان شاء الله.

والله بحياتي مااتمنيت الشر الها وتكسر گلبي لان هي حبت شخص ميحبها . واكيد عانت وتمرضت بسبب حزنها .
صحيح هي مريضه من هي بنيه وتشكي من كلاتها .
بس كانت زينه مو هيج .

ثاني اجه مصطفى . وكلنا مجموعين وسهرانين وعمتي سولفتله ع ملوكه وشلون متعرف امها .

-مصطفى .. احسن ماتعرفها شتسوي بهيج ام .

-ماسه .. ترى زودتها مصطفى البنيه بين الحياة والموت وانت هيج تحجي . فهمنا جرحتك بس مو هيج .

-ماسه الخاطر ربج لتتدخلين .

بيومها تعاركنا اني وياه . وهاي اول مره نتعارك بيها .
بالليل ضجت من كلامه وشلون يصيح عليه گدام اهله .
نمت ونطيته ظهري .
حسيت بي اجه من وراي وحظني .
مامانعت بالعكس كنت مشتاقتله . وفرحت من تقربلي .
درت اله وخليت وجهي بصدره وغفيت .

وماحسيت الا على صوت عياط . وبجي .
طفر مصطفى من مكانه .
طلعت وراه . گال وين استري روحج .

لبست روب وطلعت ..

شفت عمتي تملخ بروحها .

نزلنا .  هاي يمه شكو شبيج . جدي بيبياتي بيهن شي .

عمتي .. ولك يمه حنين راحت بعز شبابها راحت .
سوده عليه حالتها كلش حضنت بنتها وتوصيني ..
تدري بروحها ميته .

گال عمو .. يله حظري روحج انتي والبنات اخذجن .

گلتلها عمه اني اروح وياج .

مصطفى..  انتي وين رايحه . اگعدي هنا . الف واحد يسمعج حجي وماتتحملين.

-والله عجيبه انتو الماتت بنت عمتي والي يحجي خلي يحجي اني واثقه بروحي .
خلص .

-علمودج والله اني مااريدج تنقهرين .

صعدت بدلت وهو يحجي وراي.

-گتله خلص بعد بدلت وراح اروح لتمنعني مصطفى.
هم اذا مااروح . يگولون مااجت وفرحانه الموتها .
هي بالحالتين يحجون خليني اروح الخاطر عمتي وبيبتي وخلي الي يحجي يحجي .

-يله يعمي روحي هو اني اگدر احجي اذا عاندتي ..

-يمه فدوه للحنين بوسته وحظرت ملابسه .
لبس دشداشه وستره وخله غترة ع كتفه .
ونزلنا .

شلت ملوكه ومصطفى شال غراضها .
وعمو والبنات . طلعنا وقفلنا الباب .

وصلنا الساعه خمسه الفجر .
الزلم كلها راحت للمستشفى وصلونا للبيت وراحوا .
دخلت عمتي تعيط گدامي .
واني شايله ملوكه .
دخلت وشفتها كلها تعيط . نزلت دموعي بين رهبه وخوف من شفتها كلها تعيط اقشعر جسمي .

تلگتنا اخت حنين الوسطانيه رؤى ..  سحبت مني ملوكه .
وگالت . شعندج جايه . تقتل القتيل وتمشي بجنازته .

محجيت شي بس حلا وعلا ماسكتن ردنها ..

رحت حضنت عمتي انتصار . تبجي وتگلي ماسه يمه ماتت وتگول هاي حوبة مصطفى وماسه .
يمه ابريلها الذمه خلي ترتاح بگبرها .
يمه بنيتي شابه وراعت مني بعز شبابها .

حضنتها واشهگ من البجي .
#بقلمي_شمس
يتبع….