رواية ابناء الحسوم "شمسون" الفصل الرابع عشر 14 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

هلي وعيونكم ضايع
هلي أنسدت بوجهي الدنيا والبيبان
ويذبني العمر من شارع لشارع

━━━━━━  ━━━━━━

وگفت بباب المكتب ثانيتين قابضة على اليدة بأيدي بقوة، ما گدرت ابقى واگفة اتفرج على قتل انسان مهما يكون السووا بينا مستحيل راح اتحمل تأنيب الضمير والندم بعدين.. فتحت الباب ارجع للمكتب وانضربت بصدره واگف قريب الباب مبين ديريد يلحگني واني سبقته.. ابتعد مني فوراً ولسه ملامحه قلقة..

-مسرة: تگدر توصلني للبيت؟

-شُهيب: اكيد اكيد

-مسرة: هاي البصمة عفية احمي السيارة علما اجي راح امشي على كيفي لان دايخة

-خلينا نروح سوه لا يصيرلچ شي

-لا بس ارتاح هنا شوية علما تحمى السيارة

-تمام

اخذ بصمة سيارتي وطلع بسرعة، تابعته من الكامرات لحدما وصل للگراج فوراً اخذت كوب القهوة المسموم وذبيته بالسنك وسويت واحد جديد وحطيته بمكانه خاف يحس بشي، حذفت التسجيلات مرة ثانية تحسباً وطلعت وراه..

تمشيت على كيفي علما وصلت للگراج لگيته گاعد بالسيارة ينتظرني، شفت سيارته مركونة راح يضطر يعوفها هنا حتى يوصلني، فتحت الباب وگعدت بدون صوت مالي عين اباوعله حتى..

-شلون صرتي؟

-احتاج انام

حرك بسرعة وما حچينا أي شي الطريق كله على الصامت، احس بي كل شوية يدير عيونه يتطمن عليَّ ويرجع يركز بالطريق، ظليت اخذ شهيق وزفير اهدأ نفسي اريد الرجفة تروح بقينا على هالحال لحدما وصلني لفرعنا دليته بيتي وين وسفط بالباب..

-شكراً

-العفو

-سيارتك ظلت بالشركة راح ترجعلها؟

-لا اخذ تكسي للبيت

فتحت الباب اطلع وهمست..

-تصبح على خير

-مسرة

رجعني صوته، سديت باب السيارة واللتفتت عليه هاي اول مرة يصيحلي بأسمي الصريح بدون لا يسبقه بـ مدموزيل او آنسة او ليدي واذا راد يصيحلي يگول مسرات وبس بالضحك يحچيها..

-شُهيب: يمكن هسة مو وكتها بس جبتلچ شي

-شنو هو؟

مد ايده بجيب السترة وطلع حافظة كلش صغيرة، مدها الي وگال وعيونه مركزة بيه..

-هذا الرام

-يا رام؟

-بأبتسامة: الي تعاركنا علموده ودچيتيني

-الاخذته من بلاك؟؟؟؟

-اي هو

-زين شنو تريد؟ تراويني وتحرگ گلبي بي؟!

-لا طبعاً جبته الچ

-شنو يعني

-جبت الرام الچ اخذته من فاهد

-عزززه بعيننك ولك شلوون

صرختها بفرحة ما مصدگة الديگوله ضحك وحرك راسه مأيس مني ومن لساني..

-اسفة عزه بعين اكرم مو بعينك يله اشرحلي حبااب شلون اخذته؟؟

-اخذته وخلص وهو الچ هسة

-لا تچذب عليَّ حبااب والله گلبي خللصص

-ما مچذب هذا گدامچ وتأكدي منه اذا تردين

طلعه من الحافظة يحطه بيدي الترجف اخذته منه وما احتاجيت افحصه لان متأكدة مدا يچذب عليَّ، درت وجهي عنه بسرعة دموعي بعد ماگدر اسيطر عليها تمنيت اضرب نفسي وأعاقبها على الردت اسوي بي اريد اكتله وهو راح يجيبلي الرام الي دچيته بالسچينة علموده؟؟ عمت عيني!!

-مسرة: تمام

همستها همس وطلعت بسرعة من السيارة قبل لا يشوف دموعي، لا تشكرته مثل الاوادم ولا ابتسمتله تركته هيچ ودخلت للبيت ودموعي عشرة عشرة اشهگ وكاتمة صوتي بأيدي خاف يسمعوني ابوية ومارلي ويجون..

باوعت من الشباك شفته يعدل سفطة السيارة ويطلع منها ويتقدم على باب البيت، مسحت دموعي وعگدت حاجبي اتسائل شنو ديسوي؟ شفته يحط شي بالنبتات الي بالباب خفت وانخمش گلبي شنو حط هنا؟!

ثواني واجاني اشعار على موبايلي من "اشهب ابو شعر الحلو" فتحت الرسالة شفته كاتبلي..

"حطيت بصمة سيارتچ بالسندانة البرة، تصبحين على خير"

صعدت فوگ بسرعة قبل لا انفجر هنا قفلت الباب عليَّ ووگعت ابچي بحرگة اتذكر كلام ابوية واتذكر امي وميس وانوب اتذكر شُهيب والي ردت اسوي بي.. ردت اكتله بيدي بكل جرأة وحقارة معقولة لهدرجة وصلت وياچ مسرة؟ الزمن وصلچ تقتلين نَفَس؟!..

بعد ساعتين من البچي نشفت عيوني، دخلت اسبح بمي بارد ممهتمة لبرودة الجو، لفلفت نفسي بالبرنص وگعدت على سريري اخذت موبايلي وطلعت اسم اشهب بالتلفون وكتبتله رسالة..

"شكراً هوايه ما انسى معروفك"

وللغريب شاف الرسالة رغم الساعة عبرت 2:30 بالليل، جاوبني بسرعة..

"صرتي احسن؟"

"مسرة: اي"

"باچر لا تداومين اذا تعبانة ارتاحي"

"ادري تره اني هم المديرة"

دزيت وراهة ايموجيات ضاحكة وهو جاوبني بـ ضحكة بالكتابة تخيلتها وسمعتها بصوته الهادئ والله..

"مسرة: سهران تنتظرني اجاوبك مووو"

كتبتها وگرصت ايدي على هالخفية خرب روحچ مسرة ثگلي بنتي ثگلي ماما الثگل حلوو طااح حظچ هستوچ ردتي تكتلي يا غبرة!..

"شُهيب: لا"

"شنو چان صار لو كاتب اي وما مفشلني"

"هههههههه جاي اشتغل"

"تشتغل بالـ 2:30 بالليل؟!"

"عندي تصاميم لازم اكملهن"

"ما تابعات للشركة مو؟"

"اي شغل فردي خاص"

"عفية بالمجتهد، اگلك اريد اسألك شي"

"تفضلي"

"شلون جبت الرام من فاهد شلون قنعته؟"

"قنعته وخلص"

"شسويت؟"

"قدمت تنازلات"

فطسستت وره جملته متتت من الضحك ذبيت التلفون گمت ارفس مادري هاي اثار السهر مادري جملته تضحك صدگ لو اني تافهة واضحك على كلشي يگوله لو يكتبه، رجعت اشوف شكاتب وراهة وضحكت بالزايد من شفت الرسايل..

"شو سكتي؟"

"لا يمعودة مو هيچ قصدي"

"وينچ لاا"

"لاااا"

"مو تنازلات تنازلات اقصد قدمت عرض مغري اله"

"لا مو عرض مغري مو هذاك"

"خرب روحك فااهد"

"اني گمت امسلت من النعاس"

"تصبحين على خير"

"مسرة: وانتَ من اهل الخير"

سديت التلفون ولحدما نمت اني اضحك ما اشوفه مرتبك ولا متوتر الا نادر دائماً مسيطر على نفسه وميچفص بس هسة مادري شبي يله المهم ضحكت..

ثاني يوم ما شفته ابد حتى ما طلب نشتغل سوه رغم مخطط مشترك عدنا كله هو اشتغله وحده بس حتى ميشوفني يابة كلما اتذكر اموت ضحك لهدرجة ميتقبل الفشلة وميتعايش وياهة؟ اني اچفص واللوص واتفشل واتخزه واعيش حياتي طبيعي ولا كأن مسوية شي حتى ما استحي من فشلاتي..

رجعت للبيت واخذت الرام لابوية الضحكة تارسة وجهي ممصدگة اخيراً راح اخلص، دخلت عليه للمكتب وحطيته على الميز..

-فادي: شنو هذا؟

-مسرة: الرام الي ردته

-فادي: ما ردت رام

-مال بلاك بابا شبيك نسيت

-مو اخذه منچ ابن شمسون؟

-اي ورجع جابه الي البارحة

-اي اخذي وطلعي بره بنيتي عندي شغل

-شنووو

-باباتي شغل عندي مو فارغ بعدين نسولف

-والرام؟؟؟ انتَ مو گلت اذا جبته الك معناها خلصت مهمتي وراح ترجعلي ميس؟؟

-انتِ من كل عقلچ مسرة؟

-طبعاااً

-تجيبلي الرام وره اسبوعين؟! وره ما كملوا شغلهم بي واخذوا اليردوا صايرة لوتية براسي؟؟

-لااا اكييد ما اخذوا منه شي اصلاً شُهيب گال اخذه من اخوه وقدملهم شي بالمقابل!

-شهيبچ يچذب عليچ

-شُهيب ميچذب!!!

-وهسة چذب

-انتَ تچذب عليَّ!! بكل مرررة تچذب واني مثل الغبية اصدددگكك

-مسرررررة كااااافي!! الرام ما راح يفيدنااا بشييي بعد ميردوا!! وره كل صفقة ينطونااا مهلة ميصيرر نتأخر عليهم ونتعدااهاا استوعبيي

-حاول وياهم حباااب ابوس ايددك باباا

-ميفيدد بابا اني اريد الرام محتااجه بس ميفيد بعد خلص راح وكته خلينا نركز بشي اهم وهو المهمة الجاية مسرة ايااچ تخربطين بيها

-خربطت

-شنو؟؟

-ذبيت السم وما سممت شُهيب

-ليييييييييش؟؟؟؟؟

عاطها بعلو صوته وشمر الملفات والفايلات بالگاع شال الگلاص الي گدامه وشمره على الباب تهشم تخبل، ابوية ينگلب انسان ثاني من يعصب..

-مسرة: ماكدرت اقتله باباا هو رجال زينن

-ولچ هذااا الحقييير ابن شمسووون لا تخلي يضحك علييييچ شبيچ خربتييي مسرررة وصايرة تتأثرين وتاخذچ العاطفة!!

هزأني تهزيء بالرزايل غسلني غسل، تعاركت وياه وانگلب المكتب جحيم بكل كلمة والثانية يذكرني بموت امي وميس مليت وطلعت من المكتب وره ما هجمناه على روسنا..

مشت الايام والمعاناة نفسها كلشي ما تغير اروح للدوام اشتغل وارجع للبيت للمشاكل ولكلام ابوية القوي وتأنيبه ليش ما سممت شُهيب وليش صايرة رقيقة ومتغيرة، يوصفني بالمهملة وتاركة بنتي ومدا احارب علمود ترجعلي كل كلمة يحچيها طلق حر ويصوبه بصدري كل كلمة تموتني وتاخذ من حيلي بس ميحس بيه وميهتم يريدني بس امشيله شغله..

طلعت للدوام بعدما بزعت من العراك حتى مارلي المساعدة راح تهج من البيت، اخيراً اتفق ويايه اتفاق اخير يخص اولاد شمسون همزين تنازل عن سالفة اموت شُهيب واستبدلها بشي ثاني..

گاعدة حول طاولة الاجتماعات وبالي مشغول بكلامه الاخير، قاطع صفنتي صوت كيان تگول بحماس..

-لك لا شبيك تجيبه للبيت بحجة ماريا تعبانة وبعدين نفاجأه

-نشوان: غير ينهبط ويروح من بين ايدينا الرجال وينگلب عيد ميلاده فاتحة

-كيان: اسم الرحمن شبيك نشوان هذا هم حچي

-نشوان: لعد اللگولنا حجة ثانية غير ماريا

-صبا: دوختونا هو عيد ميلاد

-كيان: عندچ افكار حلوة؟ اطربينا ولتظلين تتنعوصين

-صبا: راح اغلط

-مروان: استغفر الله ياربي

-صبا: تره ما گلت راح اغلط عليك!

-مروان: سويتي فضل والله

-صبا: اصلاً انتَ شكو تحط روحك بسوالف البنات لو الا اغردلك؟؟

-مروان: الغلط والمسبات صارت سوالف بنات؟! والله هاي معلومة جديدة

-صبا: انتَ فد واحد...

-مسرة: طوووط

-صبا: لتقاطعيني مسرة اني متحملة من هذا ال...

-مسرة: طوووووط

-صبا: اهووو لا تصيرين....

-مسرة: طووووووطات الدنيا كلها نحتاجها وياچ صبا لزمي لساانچ لخاطر لون حمرتچ المميز!!

-صبا: بله عليكم مو حمرتي لونها مميز اليوم؟

-كيان: صراحة يموت كلش حبيته لا هو نيود ولا وردي لا بنفسجي ماعرف شايفين هذا اللون المثالي؟

-مسرة: اي حتى اني حبيته وردت اسألچ منين ماخذته ويا ماركة؟

-ميادة: احسه هدى بيوتي؟

-صبا: عززه شلون عرفتي؟ باع هاي البنية تعجبني احب ذوقها تدرون شگد افتريت ياله لگيت هاللون

-كيان: لا مستتحيل

-فاضل: مروان حلو رباطك من يا ماركة؟

-نشوان: احسه جبار ابو الشربت؟

-مروان: عزززه هاي شلون عرفتو

-فاضل: بس گلي شلون لگيت هذا اللون المميز؟

-مروان: تدري شگد افتريت ياله لگيت هاللون؟

-نشوان: لا موووستااحيييل

ضحكنا كلنا على تعليقهم علينا عدى صبا طبعاً بوزت وكتفت ايدها لصدرها..

-صبا: بيك خير اشتري مثله مروان مو بس حاضر تستهزأ بيه!

-مروان: اني مستهزأ بيچ؟ حشى وروح امي استهزأت بيچن كلچن

-صبا: انتَ بس تغار

-مروان: وليش عصبتي مني اني بالتحديد؟ مو نشوان وفاضل هم عيّبوا لو مروان حايط نصيص كل التزعل تتعارك وياه!

-صبا: لا تصييح علييَّ

-مروان: اني صيحت؟؟ هاي شووكت؟؟

-صبا: كله بسببك كلشي بسببك!!

-مروان: صح تعاستچ كلها مني

-صبا: عززه هاي شلون عرفت؟؟

-مروان: وطبعاً اليوم هم ما مصبغة اظافرچ اكيد السبب مروان بلا منازع

-كيان: شو اني مانتبهت صبا ما مصبغة اليوم انتَ شلون انتبهت؟

-مروان: لان مگابلها وگاعد ليش ما انتبه!

-صبا: اشش اششش لتسوي حلاوة بگد مزروف اي نعمم ما لحگت حتى اصبغ اظافري اليوم خبصتني بالاتصالات واگف بباب بيتي حضرته يموت لو ينتظرني فد خمس دقايق علما اصبغ!

-مروان: خمس دقايق؟؟ صبا البارحة انتظرتچ ساعة ضبطط اني مزروع بالباب لان چنتي تخطين ايلاينر مادري شسمه على حواجبچ!

-صبا: اولاً الايلينر على جفن العين ينحط ثانياً واذا هسة وين منتظرني هو انتَ گاعد بالسيارة تلعب بتلفونك اكيد

-مروان: قصدچ غفيت بالسيارة اي وراح علينا نص الاجتماع من وره مكياجچ الماله ام داعي كل يوم!

-صبا: وانتَ شيخصك بمكياجي لتخليني اغلطط مرواان!

-مروان: يلا غلطيي خليني اسمع يلاا شو سكتتي

-صبا: اسكت؟؟ اني اسكت؟؟ والله فلا اسكت انتَ اكبر....

-نشوان: طوووووووط

-مسرة: يمعودين شبيكم صدگ چذب تره كيان چانت تحچي بعيد ميلاد شهاب اليوم شبيكم گلبتوها مناگر وعرايك؟

-صبا: لان هذا البني ادم مدا اگدر اطيقه والنبي حرام عليچ تاركتنا نشتغل سوه ماريد مااريد

-مروان: اليسمعني كاتل روحي على حضرتچ صبااا ام حمرة هدى بيوتي!

-فاضل: اخي هاي شبسرعة حفظت اسمها؟

-مروان: لان خبصتني بيها ليش ما احفظ اسمهاا كرهت اسم هدى بسببهاا!

-صبا: خلينا نفترق لعد! اي اي شكو لازگلي اتركني ماما اتركني وليداتي خليني اشوف حياتي واكمل طريقي بدونك!

-مروان: ليش محسستني احنه مصاحبين؟؟ ثانياً شعليه بيچ عيشي حياتچ شيخصني اني!!

-صبا: وين اعيش حياتي وانتَ نايم على خوانيگي؟؟ الصبح بوجهك الظهر بوجهك الغدا وياك المغرب وياك العشا وياك حتى من ارجع للبيت ما اخلص منك تتصل حتى نكمل الشغل وتريد كام حضرتك حتى تتأكد ما اچفصص والصبح تجي انتَ توصلني للشركة حتى نتناقش بالطرريق يبوووو عليك وعلى اليوم الشتغلت بي وياك حجرتني حجرر لا طلعة لا طبه لا صديقات لا حفلااات!!

-مروان: لانچ مهملة وبدال ما نكمل شغل بساعة تخلينا نشتغله بأربع ساعات لان حضرتچ كل ربع ساعة وگمتي تفترين بالمكتب تصيحين تعبت اريد اللعب رياضة لو تصيحين مروااان جيبلي گهووة، مروااان مكياجي عدل؟؟ مروااان احس المسكارة لغمطتني احتاج مزيل مكيااج؟! مروان تعال احس احتاج ارتاح خلينه نگعد بنص الشاارع!! مروان خلينه نجيب فراش بالمكتب حتى انام من اتعب!! مروان مروان مروان مروان ماات مروان وخلص ان شاء الله!!!

-صبا: امين! تدري انتَ شريك مو زين ابدد ابدد هذا شُهيب مسرة مكرهته عيشته والرجال ميفتح حلگه!!

-مسرة: انييي مكرهه شُهيب عيشته؟؟؟

-فاضل: عذراً مدموزيل لكن اتوقع كلنا جاي نشوف هالشي لو شتگول نشوان؟

-مسرة: والله حرام عليكم كلشي ممسويتله لحظة لحظة! هو شاكيلكم منيي؟؟؟

-نشوان: حشى والله شُهيب يا يوم شكى من احد بس احنه نشوف هالشي لو شتگول فاضل؟

-فاضل: نعم صحيح لكن لا بأس كلشي بأجره

-صبا: اي ونرجع ونگول مروان مو خوش شريك ابددد

-مروان: اني مو زين؟؟؟ وخليتيني اصبغ اطافرچ اول البارحة!!!

شهگنه كلنا مكممين حلگنا حتى نشوان فاتح عيونه مصدوم، حضرة جناب مروان الثگيل الرزن الي ميبتسم لبشر وتحسه يمشي جسد بلا روح يصبغ اظافر صبا اول البارحة! خرب عرضچ صبا على هالجرأة يا فاسقة!

-مروان: هاچ تفضلي سويتيني مضحكة!

-صبا: راح اسكت بس لانك خوش تصبغ وايدك ثابتة خاف اچفص وبعد متصبغلي

-فاضل: استعيذ بالله من الخبث والخبائث استجير بالله من المعاصي العظام

-نشوان: مروان شنو هالحركات خووية ولا عرفتك

-مروان: اسكت لا تلغي لغوة زايدة

-نشوان: يصبغ اظافرهاا وكذااا

-مروان: نشوان انلصمم چنت بس اريد اختصر الوقت لانها فاهية وتطول بكلشيي

-صبا: اني فاهية؟؟

-كيان: اهوووووو الكل ينچب وياكل نععل يلاااا

الكل خنس بعد جملتها اللاذعة، عضت شفتها وغمضت عيونها بقوة تداري چفصتها بس شتداري وعيون مروان راح تنط من العصبية..

-كيان: وروح امي وروح ابوية وغلاتك مروان وغلاة صبغ اظافر صبا طلعت من حلگي اني الي راح اكل النعل مو انتَ يا حبيب اختك وروحها

-مروان: كيان لسانچ ينرادله....

-مسرة: طوط.. بس صغيرة هالمرة مروان عادي طلعت من حلگ البنية واعتذرت خلص

سكت بس لاني حچيت يحترمني وميحب يتجادل ويايه بس ويه صبا يومية تصير بالنعل والسبب يعود شغلهم دائماً سوه لان كل الامور الادارية بيدهم لدرجة اغلب الاوقات بنفس المكتب يگعدون واكيد لاحظتو هالشي من دردمة صبا وكبت مروان..

-نشوان: بعدين مروان شگد مكبوت من صبا انتَ سودة عليّ عليك فاكهة حياتي

-كيان: هاي اول مرة اسمع مروان يحچي هالگد دفعة وحدة وبكل هاي المشاعر الجياشة

-مروان: لانها تطلع الواحد من طوره!

-صبا: انييي اطلعك من طورك؟؟ تدري انتَ فد واحد...

-مروان: اي اي ادري بس سكتي

فعلاً سكتت وضمت كفوف ايدها ويه بعض وگعدت مثل الحبابة بعدما فورت دمه وخلته يطلع حباية گرط من جيبه ويبلعها..

-وئام: هسة راح تسوون عيدميلاد لمسيو شُهيب لو لا؟

-كيان: اي مثل ما اتفقنا تمام نشوان؟

-نشوان: تمام ولو اليوم شوية الوضع ميساعد لان بنات عم شُهيب راح يجن

-كيان: بنات عمه؟

-نشوان: اي افتهمت من شمسون گال هنه ثلاثة راح يجن

-كيان: حلو لعد حتى يحضرن الحفلة هم.. بنات انتو معزومين مسرة صبا وميادة حبابات مو تگولن منجي

-ميادة: اكيد راح اجي

-مسرة: اني ماگدر اسفة حبيبتي

-صبا: اذا مسرة متروح اني هم ماروح

-كيان: لا بنات حبابات هاي شبيكم شُهيب راح يفرح من يشوفكم هناك

-مسرة: لو اگدر اجي ليش لا بس صدگيني عندي شغل ويه ابوية

تفهمت الوضع صح انقهرت بس بعد ما لحت عليَّ، طلعنا من غرفة الاجتماعات چان عدنا اجتماع من دون شُهيب هالمرة و كيان شافتها فرصة تفتح موضوع حفلة عيد ميلاده وتاخذ رأينا بيها تريد تسويها ببيت امه ولحد يسألني ليش هو وامه عايشين ببيوت متفرقة لان جوابي هو ماعرف..

ركبت سيارتي وطرت للبيت اسبح وارجع اطلع اكمل شغلي بس من دخلت للبيت وشفت ابوية بهذا الوضع واگف وبيده ظرف بني چبير خربت مخططاتي..

-فادي: هذا شنو؟

-مسرة: شنو

-فادي: هذا ليش لسه هنا؟

-ما صارت فرصة حتى...

-لييييش للان ما موقع هاي الاوراق شُهيب شمسووون مسرررة؟؟؟؟

-ما صارت فرصة هو دقيق وأي اوراق انطي يقراهن بالكامل ياله يوقع ويبقى يسألني على محتواهن

-خلي يقراهممم خلييي يسأل عنهممم كلشيي مضبووط وما راح يشُك مسرررة ليش جاي تتهاونين ويه هذا الرجال شبيچ خربتيي!!؟؟

-ما خربت! بعدني مسررة نفسها ما تغيرت بس انطيني فرصة اجر نفففس

-جرري كل الانفاس الترديها بس لا تتهاونيين ولا تماطلييين اريد ابن شمسون يوقع على هااي الاوراق ويغررگ بديوونه اريد اشوفه محكووم مؤبددد واكبر سلطة بالدنيااا ما تطلعه فهمتتتي لو لااا!؟؟؟

انطيته ظهري اعوفه واصعد فوگ لزمني من زندي يجرني عليه يخزر بيه وينتر بين سنونه..

-لتنسين اني الطلعتچ من ذاك المكان واني الغيرت حياتچ! چان قضيتي كل عمرچ بالغرف الفارغة تسولفين ويه الحياطين والهدوء ياكل راسچ! چان باقيلچ خييط واحد بس خيييط وتفقدين عقلچ الحلو لا ترجعين لنقطة الصفر!

-بابا

-اني القنعت الدكاترة انتِ صاحية وعقلج مابي شي! زورت اوراقچ ودفعت فلوووس يابو فلووس علمود اطلعچ من هاي الورطة مسرة تذكري هالشي زين وحطي بين عيونچ بكل مرة اطلب منچ تكمليلي شغل!

-شكراً بابا لانك تذكرتي بالماضي وتهددني بكل فرصة تصير گدامك

-بنيتي لا تزعلين بس هاي الحقيقة

-الحقيقة هي كذب! بأذني سمعت الدكتور يگلك هي صاحية وعقلها مابي شي الف تحليل والف اختباار دخلوني واكدووا ماااابيه شي واني مو مخبببلة!!!

-بس اكرم اثبت انتِ مخبلة بفلوسه وگدام المحكمة وصدر امر القاضي وانتهى محد يهتم بكلام الاطباء بعد صدور امر القاضي مسرة

-خلص عوفني باباا

-راح تقوين گلبچ وتدوسين على مشاعرچ الغبية مثلما ربيتچ راح ترجعين سرور بنيتي الشيطانة الي اكبر زلمة ميگدرلها تطب بين ظبة زلم تلوفهم لوف ولمسة متخليهم يلمسون ايديها! تالي يجي هذا ابن شمسون المجرم يلعب بعقلچ ويغير الخطة؟ لا ما ارضاها عليچ وهاي اهانة بحقچ

-تمام

-اعتمد عليچ مثل كل مرة لا تخيبين ظني

-ما راح يخيب ظنك

هز راسه موافق وحط الظرف على الطاولة گدامه، شال كوب العصير بيده تجرعه وگال بهدوء وهو يباوعلي من فوك ليجوه..

-فادي: چان گدرنا نختصر هاي الاحداث لو متجرأة ومسممته

-وهالمرة اني اروح مؤبد

-محد راح يحس سرور انتِ شريكته وبسهولة نفض هذا الموضوع

-ماگدر اقتله افهمني تعبت واني اشرحلك

-لو بس تبطلين هاي الانسانية المفرطة چان انتِ بخير

-انسانية مفرطة بس لأني ما اقبل اقتل انسان؟

-عوفچ من هالموضوع المفروض هو خاتم بأصبعچ هسة ليش للان ما حبچ؟!

-مااادري لا تضغط عليَّ زااايد ماااعرف ليييش ابن شمسوون مااا حب بنتك الرخيييصة!!!

-لا تحچين على روحچ بابا

-لعد شتفسر وگفتي هنا گدامك؟ شتفسر الخطط والمؤامرات الي ادخل بيها! شتفسر لبسي ونمط حياتي؟؟

-كافي سرور انتِ تعبانة روحي ارتاحي

-وين ارتاح؟ بيا فندق هالمرة؟ لو هالمرة بيت؟ لو ملهى؟ لو مطعم؟ لا يجوز تريدني ارجع للشركة اغوي مالك شمسون واقنعه يتزوجني!!

زفر نفس متضايق وعافني ودخل للمكتب مالته، صعدت لغرفتي نزعت ملابسي وفتت اسبح اريح عظامي جوه المي الحار، طردت كل فكرة سلبية براسي وكملت تحميمي النظيف.. طلعت اللف روحي بالبرنص وگعدت اتصفن وراسي يدور بالافكار الهدوء كتلني اتخبببل من الهدوء ماتحمله گمت افتح موسيقى وخليتها على اعلى شي..

مرت ساعة سريعة على گعدتي طلعني من افكاري صوت طرقات ابوية على الباب يگول..

-سرور عندچ شغل اليوم؟

-اي بس مالي واهس ما راح اطلع

-تعالي اريدچ بشغلة لعد

-شنو هي؟

-راح يجي للبيت ميخائيل وابنه اريدچ...

-تذكرت لازم اطلع

-شنو؟ وين؟

-اليوم عيد ميلاد شُهيب وعزموني على الحفلة خليني اخذ الأوراق يمكن تصيرلي فرصة اخلي يوقعهن واخلص

-عفية ببنيتي البطلة!!

هزيت راسي اجاري حماسه بينما هو راح على كنتوري يطلعلي لبسة على ذوقه..

-بابا حاطه ببالي شنو راح اللبس

-لعد يلا بسرعة لا تتأخرين تره سام مو هنا اليوم

-ادري

طلع من الغرفة واتصلت بـ صبا ابلغها راح اروح حتى تجي ويايه، بدلت بجمبسوت لونه ازرق ملكي بأكمام طويلة منفوخة، شسورت شعري ولفيت نهاية خصلاته ويه مكياج ناعم وكعب عالي كالعادة..

گلبت بموبايلي شوية واخذت كم صورة ونزلتهم انستا احب الصور واحب اخذ صور لملابسي لدرجة كل يوم قبل لا اطلع للدوام اخذ صورة لتنسيقاتي هَوس عندي من عمر الـ 15..

نزلت الصور ستوري واني بالطريق، طلبت من السايق يوصلني مابيه اسوق وما اندل، بعد فترة مو قليلة وصلت لبيت امه بيت حلو وفخم مثل ما توقعته بالضبط، دخلت فوراً الباب مفتوح واستقبلني صوت الموسيقى واجواء الاحتفال..

جايين هوايه ناس بس كلهم ماعرفهم الوحيدة الميزتها هي كيان من سلمت عليَّ بحرارة تتشكر مني لان اجيت..

-مسرة: لعد وينه شُهيب؟

-كيان: بعده ما اجه ياااي متحمسة كللش گلتله صديقاتي اجن حتى يسويلنا اكل خطية المسكين

-خطية هسة يگول بيوم ميلادي وهم يكربون عليَّ

ضحكت متحمسة تصفگ بيدها، ابتسمت ادور عيوني بالبيت اتعرف عليه اكثر وكيان ويايه تاخذني جولة حول المكان..

-مسرة: ليش شُهيب معايش ويه امه؟

-كيان: ماريا طلبت هالشي اول ما سجل شُهيب جامعة گلتله اريد اعيش وحدي هيچ فجأة من دون اسباب مقنعة

-وهو فوراً قبل؟

-اي

-يعني ما فكر يفتهم شنو السبب؟

-اكيد حاول وياهة بس...

سكتت تدور على جملة مناسبة تشرح الوضع بس الواضح ما لگتها لان كملت بنفس الارتباك..

-كيان: بس ماريا وضعها خاص شوية

قررت ما اللح بأسألتي وامرر الموضوع بدون لا اسأل عن وضع ماريا "الخاص" لان ببساطة ما احتاجيت بأقل من دقيقة اجت مرأة اقل ما يقال عنها جميلة، تملك شعر اشقر طويل وعيون عسلية تقربت من كيان تگول بزعل طفولي..

-زاعلتچ كيان بعد لا تحاچيني اني مو امچ بعد!

-كيان: ليش حبي شسويت؟

-ما احب هذا الفستان ما اريده ماا اريدد

-كيان: والله حلو وشُهيب راح يحبه عليچ

-صدگ؟ يعني متضحكين عليَّ؟

-كيان: والله هسة تشوفين من يجي راح يگلچ الله شنو هالجمال حبيبتي

-ههههههههه والله؟؟

-كيان: والله هسة تشوفين

ضحكت بفرحة وراحت تهرول تدخل لوحدة من الغرف الموجودة، بقيت اللاحقها بعيوني بفضول عجيب..

-كيان: هاي ماريا تصير ام شُهيب

فتحت عيوني متفاجأة لا بل مصعوقة وما گدرت اخفي ملامحي المتفاجئة بسهولة..

-كيان: اي.. هذا وضعها الخاص الي چنت اگلچ عنه

-مسرة: لا احم.. ما اقصد شي بس تفاجأت بشكلها وعمرها مبينة صغيرة ممبين عدها ولد بعمر شُهيب

-كيان: صحيح صغيرة هي حتى من جابته چانت مراهقة

-مسرة: وجميلة كلش هم

-كيان: اي شهوبي يشبهها مو صح؟

-اي صح

خنست بعد ما شفتها ماعرف ليش وبدون مبالغة حسيت بأحساس غريب، اتمنى اگدر اشرح شلون الطريقة الچانت تحچي بيها حرفياً مثل الاطفال وحتى حركاتها وزعلها وشلون تمد شفتها السفلية مقهورة وعيونها الدامعة شلون هذي ام؟ شلون تزوجت وصارت ام اصلاً!

كملت السهرة من اجت صبا كاشخة على اخر حباية ليگول عرسها فستانها قصير منفوش وكله تول طنگرت من شافت لبسي بس ما اهتمت من لاحظت نظرات البنات المعجبة عليها نفخت روحها وگعدت..

-مسرة: صبا احس اني مو بخير راح ارجع للبيت

-ليش شبيچ ولج

-تعبت ماريد ابقى

گمت بسرعة ما الي عين اگلها اجيت هنا حتى اورط صاحب العيد ميلاد بـ سندات وهمية، ماعرف شبيه ليش صاير گلبي رهيّف وليش مدا احقد عليه هو بالذات رغم كل السووا بينا وهمه غافلين او ناسين او يغلسون!

بالباب اني وصاحت كيان اجه شُهيب سفطت سيارته بالگراج، ردت اطلع قبل لا يوصل واندفعت من وحدة محجبة..

-تسنيم: اسفة حبيبتي خوما اذيتچ؟

-مسرة: لا اني بخير

-كيان: مسرة، تسنيم وين واگفات بالباب تصيرن بوجهه تعالن هناا فدوة

رجعت خطوة وره صار مقابيلي عامود ما ابين زين وطفت كيان الاضواء متحضرين للمفاجأة، سكون تام صوت الموسيقى اختفى والاضوية مطفية صارت الصالة هندس ما اسمع غير انفاسي الغير منتظمة، انفتحت الباب بخفة حتى بفتح البيبان مو همجي وقاسي كلشي عنده هادئ..

-شُهيب: يمة.. ماريا انتِ هنا؟ ليش الاضوية مطفية يمعوديـ.....

جفل من انفتحت موسيقى عيد الميلاد والاضوية والكل صاح surprise، اعجز اشرح عن ابتسامته الواسعة لو ضحكته السعيدة وهو متفاجأ الامر اشبه بطلوع شمس دافية بعد ليلة مظلمة باردة..

كل اهله واصدقائه راحوا يعايدو والاحضان والبوس صار بفلس، تقربت منه امه تضحك فرحانة وعيونها متروسة دموع قهرتني..

-ماريا: ابني هذا ابنييي

تصيح بفرحة وتحضنه وهو يبادلها هذا الحضن الدافي، بوسته هوايه ولعبت بشعره مثل الطفل وجهه كله صار حمرة من وره شفايفها بس ما اهتم ولا مسحه خلاهة براحتها، ابتسمت من لفت ايدها حول ذراعة وكلما تشوف احد يباوعلهم تگول بفرحة غمرت المكان..

-ماريا: هذا ابني شهوبي ابني اني امه اني

بالمقابل المعازيم يكتفون بإيماءة بسيطة وابتسامة، حضنته من خصره وحطت راسها على صدره تتنهد، لسبب غريب ما گدرت ابعد عيوني عنهم وعلى التناغم البيناتهم ولا كأنها امه، شكلها صغير جداً صغير ومعتنية بروحها وشعرها، جسمها رشيق مثالي وبشرتها خالية من التجاعيد شي مبهر ما شاء الله..

-شُهيب: حبيبتي اكلتي شي؟

-ماريا: لا انتظرك

-تعالي نشوف هنا شنو اكو

تقدموا على البوفيه جرلها صحن ويحطلها من الاكل تأشرله شنو تريد ومن يحطه بالماعون تهز راسها ضايجة متريده بعد وتخلي يرجعه، بس صب الاكل الها استغرق فوگ الـ 15 دقيقة بسبب مزاجها المتقلب صدگوني حسبت دقيقة دقيقية بس عود ضاج لو انزعج منها؟ بالعكس يتقبل الموضوع بأبتسامة ويلاطفها ويرجع الاكل ويجيبلها غير نوع..

-ماريا: انتَ ابني

-شُهيب بأبتسامة: اي اني ابنچ

-احبك

-واني احبچ

-انتَ احسن ولد بالدنيا

-وانتِ احلى ام بالدنيا

شنو تگله يجاوبها بشي اجمل اگدر اسمعهم بوضوح بسبب قربي عليهم لكن للان هو ما انتبهلي مكتفي بعالم امه وغرگان بي..

-ماريا بتلاعب: شهوبي

-شُهيب: هاا شعندچ هالمرة

-ماريا: ههههههه ماعندي هههههههههههه

تضحك بصوت عالي ضحكة رنانة مغرية خلت الرجال يلتفتون عليها، لزمها من ايدها بخفة يهمسلها بشي ضحكت مرة ثانية وعضت شفتها مبين گللهه نصي صوتچ لانها هزت براسها موافقة..

-ماريا: اشوف عيون البنات الحلوات على شهوبي

-شُهيب: اگول ضحكتچ مو خالية

-ماريا: والله والله باوع حتى طيبة جاي تباوعلك

-شُهيب: كافي ماريا حبابة

-والله باوعهااا

تأشر على بنية فعلاً طول ما هو هنا هي صافنة عليهم تذكرتها هاي طيبة صديقة كيان الكاتلة روحها على شُهيب، عض اصبعها الدتأشر بي وفتح عيونه ينبهها..

-شُهيب: لا تأشرين لا تأشرين

-ماريا: بس تحبك هي

-يمة ميصير عيب نأشر على الناس

-ليش

-ميصير وبس

-اي ليش

-لان.. لان عبالهم جاي نحچي عليهم

-بس احنه صدگ جاي نحچي عليها

-اي بس ميصير امي خلص تعالي وياي

-ما اكلت

-هذا ماعونچ بيدي خلينا نروح بره ناكل

-شهوبي

-ها

-اني احبك

-واني ماحبچ

-لاااا ليييش

مال حاضر عيونها دمعت ووجهها صار احمر، باس ايدها وگال بمزاح..

-لا تبچين اتشاقه وياچ اموت عليج امي

باسته للمرة المية وطلعها للحديقة وياه، رخه جسمي المتشنج وبطلت ماريد اطلع منا بعد انتبهت لروحي مبتسمة مثل الخبلة وصافنة عليهم من فترة وناسية الدنيا..

-صبا: كافي اكلتيهم بعيونچ كافي

-مسرة: شنو منو

-شُهيب وامه صارلچ ساعة صافنة عليهم

-حلوين

-صبا: اتفق بس امه شبيها يا ترى؟

-مسرة: ماعرف اول مرة اشوف هيچ حالة

-صبا: المهم هسة جبتي هدية وياچ؟

-مسرة: اي ورايحة انطي هسة ماطوله طلع من هالزحمة

-ليش خو حطيها على الطاولة مو الكل حاط هديته هناك

-لا هديتي مختلفة اني

تركتها قبل لا تسأل زايد شنو اگولهه رايحة اوقعه على اوراق هلاكه؟ اوراق راح تدمر مستقبله؟ اوراق راح تنهي شنو شي بداه وتعب عليه؟ اوراق راح تودي وره الشمس وماكو قوة بالدنيا راح تطلعه من عقوبتها؟ بطني مغصتني من التوتر ما اللوم ابوية من يگول تغيرتي اني دا احس بتغيري وانحيازي لـ شُهيب من دون الكل ماگدر اأذيه وگلبي يوجعني من اوجعه يمكن لانه الانسان الوحيد الي عاملني على أني بشر طبيعي وما استغلني؟ بس خلص مسرة ليغرچ شكله واسلوبه الناعم يبقى نفس الشخص يبقى ابن شمسون ولو شيسوي ميغير حقيقته والي سواه، انتِ وعدتي نفسچ ووعدتي امچ غمضي عيونچ وكملي البديتي بي، وعدت امي انتقم من شمسون واولاده.. اجرهم لـ ناري واطفي لَهيبها بجثثهم..

وگفت على بُعد منه گاعد على المرجوحة الچبيرة وامه بجانبه تسولفله عن شنو سوت اليوم، دورت عيوني بالمكان الناس بعيدين عنهم ومتوزعين بعشوائية بأنحاء الحديقة..

-ماريا: وبعد اكلت لفة جبن العصر وراهة نشوان دز السايق يجيبلي فطيرة بالتفاح.. اممم وبعد سوينا اني وكيان اظافرنا شوف شوف حلوات مو؟

تمد ايدها گدامه باس كفها وهز راسه يأيدها..

-شُهيب: كلش حلوات بس ليش كله احمر غيري شوية

-ماريا: كيان تگول يلوگ لبياض بشرتي واني احب كيان واسمع كلامها

-شُهيب: زين وبعد شنو سويتي؟ هم اجه احد اليوم؟ ابوية... مثلاً؟

-ماريا: لا لا ابد شمسون ما اجه اليوم اجه گتلك اول البارحة وباسني هنا (تأشر على خدها) وگال شلونچ ماريتي

-شُهيب: اها

-ماريا: گتله زينة اني انتَ شلونك ابو النسوان

ضحك شُهيب وهي وياه تضحك على ضحكته حضنته وباست خده تضم وجهها بصدره حتى يحضنها، رقت عيوني لتصرفاتهم وعلاقة الام والابن وحبهم الواضح شي وجع گلبي..

-شُهيب: وشنو جاوبچ من گلتيله هيچ؟

-ماريا: گال اني ابو النسوان ماريا؟ ليش مو اني احبچ شلون تحچين عليَّ! گتله روح روح طبعاً تحبني اذا انتَ تحب كل النسوان

تحچي وشُهيب ميت ضحك ومركز بكل حواسه وياهة حتى من تقربت منهم ما انتبهلي..

-شُهيب: عفيية بأمي ام لسان

-ماريا: انوب گلي امشي للغرفة اراويچ شلون احب النسوان

-شُهيب: ورحتي وياه؟!!

-ماريا: ابددد ولا رحت گتله روح شمسون لبيتك اني ماحبك

-عفية

-بس شهوبي ابوك شگد حليان صاير يخبل

-يممة

-والله حلو يعني هسة شعليّ اني قابل گتله صير حلو؟

-كافي يلا وبعد شنو صار؟

كملتله السالفة واني تقربت منهم صرت وراهم مباشرةً، خطف يلتفت يشوف منو ورجع انظاره على امه ممنتبه هاي اني، ثانية وحدة مرت ليستوعب و فز من مكانه يوگف على حيله ويگول بتفاجئ..

-شُهيب: مسرة قيثارة!

-مسرة: Hi

لوحت بأيدي بخفة مبتسمة، تغيرت ملامحه المتفاجئة لأبتسامة برزت أسنانه البيضاء ولحد يسأل شلون اسنانه بيض وهو مدمن قهوة وجگاير صدگوني حتى اني متفاجئة لدرجة وصلت بيه اسأل كيان هو مسوي تبيض لو لا وصدمتني من گالت لا هو من يوم يومه اسنانه بيض ضروري نسأل عن الوصفة بس مو هسة خلوني اكمل الاجيت علموده..

-شُهيب: اهلاً وسهلاً

-مسرة: اعتذر اذا قاطعت شي مهم بس اجيت حتى اسلم على الـ birthday boy بعدما ترك معازيمه جوه وطلع ويه مرأة جميلة خطفته من عدنا

كبرت ابتسامته وهو يباوع لأمه الوگفت على حيلها فرحانة بكلماتي تغطي وجهها بأناملها الناعمة خجلانة..

-شُهيب: المرأة الجميلة هي امي

-ماريا: هلو اني اسمي ماريا

-مسرة: هلو ماريا واني مسرة

مديت ايدي اصافحها صارت تضحك اكثر وعيونها العسلية تلمع ويه اضوية المكان زادتها جمال..

-مسرة: شُهيب يشبهج كلش تدرين؟

-ماريا: اي اي ادري لان هو ابني يصير ابني اني

-مسرة: هنياله على هيچ ام

ما احچيلكم على الابتسامة الزينت وجهها والدموع الترست عيونها وكأن شمس ثانية اشرقت من مغربها لتنير الدنيا كلها..

-ماريا: شكراً انتِ كلش حلوة دائماً عندي فضول اشوفچ

-مسرة: يعني تعرفيني؟

-شُهيب: يمة شنو رأيچ ترحين لكيان تنطيچ كيكة

-ماريا: اي بس اوگف، اعرفچ اني وشُهيب يحبچ

-شُهيب: يممةةة!!!

اندار عليَّ بسرعة يحرك بأيده ناهي كلام امه ويبرر..

-شُهيب: نهائياً لا ماكو هيچ شي امي تفهم غلط عذريني

-ماريا: بس كيان گالت عنها حلوة وانتَ گلت اي؟

-شُهيب: مو معناها اذا وافقت يعني احبها يا حبيبتي

يهمس وياهة همس بس اگدر اسمع، ملاحظة سمعي ممتاز املك اذانات فارة..

-ماريا: صدگ؟

-شُهيب: اي حبيبتي، يلا روحي لـ كيان تنطيچ كيك

-ماريا: بس حلوة ليش متحبها؟

-شُهيب: يمة حبابة روحي هناك

-ماريا: هاي شنو بسنچ؟

سألتني على الالماسة التلمع بـ ناب سني تقربت تشوفها ورادت تلمسها تحط ايدها بحلگي وشُهيب جرها ويهمسلها بلطف..

-شُهيب: امي ميصير نطبب ايدنا بحلگ الناس

-ماريا: بس شگد حلوة حبيتها كلش اريد منها

-شُهيب: ميخالف يله حبي طبي جوه

-ماريا: حتى مسرة حلوة باوع شعرها شگد طويل لازم تحبها

-مسرة: مو بله؟

-ماريا: اي لازم

-مسرة: ابنچ ماعنده ذوق عوفي يمعودة

-ماريا: كلش اصلاً شلون متحب هيچ بنية باوع شگد حبابة وجاية لعيد ميلادك

-مسرة: عادي خالة هاي الزلم ميعجبهم العجب

-ماريا: لتزعلها شهوبي حبها خطية

-مسرة: اي شهوبي خطية اني

-ماريا: شوفها بس شوفها

-مسرة: بس شوفني يمعود

-ماريا: راح يشوفچ معليچ اني ادعيلكم

-مسرة: حبيبتي خالة يعني ان شاء الله راح اصير چنتچ قريباً؟ اعتمد عليچ؟

-ماريا: اي اي

-مسرة: راح احضر فستان العرس خالة مو يكسر گلبي

-ماريا: ابد ما اخلي انتِ حلوة اريدچ يمي

-مسرة: اعيش وياچ؟ الله شگد حلو حبيت الفكرة

-ماريا: اي اييي نعيش سوه وشهوبي يعيش ببيته معلينا بي

-مسرة: يااا رجلي يعيش بره لا ماقبل اريده ويايه

-ماريا: وتجيبولنا ولد وبناات صغار

-مسرة: قنعي شهوبي خاف ميقبل نتزوج

-ماريا: هو بكيفه؟؟ معليچ اني اقنعه

-مسرة: خلص اعتمد عليچ

هزت راسها فرحانة وراحت تهرول جوه، طول المحادثة وياهة گوة كاتمة ضحكتي وشُهيب مبتسم وصافن علينا بس ابتسامته مو استغراب چانت متعة على ما اظن تعود على خبالاتي وصارت عنده مناعة من الصدمات..

-شُهيب: اني اسف على هالموقف الغريب

-مسرة: ماكو شي غريب امك خطبتني الك واني موافقة وراح نتزوج

ضحك يهز راسه يجاريني..

-شُهيب: أي بنية تشوفها تريدني اتزوجها راح تتعبين

-مسرة بضحك: موافقة

-شُهيب: ومن هسة راح تطلب منچ تباتين عدها بدوني وتسهرچ للصبح تتابعون افلام ابيض واسود

-مسرة: نجيبك ويانه غصباً عليك

ابتسم يمسح على لحيته ويرجع خصلات شعره وره مثل عادته، حمحم ووگف عدل يگول بنبرة اقرب للجدية..

-شكراً مزدموزيل

-على شنو

-لانچ ما خجلتيها وكملتي وياهة بدون ما تقهريها

-ولو تدلل عمتي

ضحك من جديد مستمتع ما گدرت اخفي ابتسامتي احس صار عندي تشنج بوجهي من كبر الابتسامة..

-مسرة: المهم اجيت اگلك Happy Birthday ان شاء الله عمر النسر

-Thank you my lady

گعدت على المرجوحة بمكان امه وهو بقى واگف بجانبي رغم اكو مكان بصفي هواي بس ما گعد..

-مسرة: حلو البيت

-صحيح

-وامك هم حلوة شكل وروح اشهب

ابتسم موافق ومادري بروحي چفصت بأسمه كالعادة، شرد بالفضاء بنظراته وبلل شفايفه قبل لا يگول بهدوء وبطئ..

-شُهيب: امي عدها خلل بخلايا الدماغ

-مسرة: ماكو علاج؟

-شُهيب: للاسف لا، اغلب الاطباء ما عرفوا يشخصون مرضها، قسم گالو حالة نفسية وقسم الاخر گالو صدمة وقسم گالو خلل يصيب خلايا الدماغ تخلي عقلها ميناسب عمرها

-يعني المشكلة ولادية؟

-لا، لحد عمرها 13 سنة يگول خالي الله يرحمه هي مابيها شي چانت كأي مراهقة طبيعية بس الصار وياهة فجأة ومنعرف السبب من وين

-ممكن فعلاً صدمة؟

-ماعرف بعد

-زين هي متتذكر؟ يجوز متعرضة لشي مأذيها؟

-ماعرف متحچي عجزت وياهة والاطباء كذلك، هوايه سفرتها علمود علاج ودزيت تحاليلها وفحوصاتها لكل دكتور شاطر انطوني اسمه بس محد انطانه حل

-شوكت صارت هيچ؟

ذب نفس متعب واخذله موقع بجانبي على المرجوحة يفصل بيناتنا مسافة نفر..

-شُهيب: من وعيت على هالدنيا

-من وعيت؟؟ يعني امك جابتك وهي هيچ وضعها؟؟ اقصد ابوك تزوجهاا وهي هيچ؟؟؟

سكت يبلع ريگه، نزل راسه يمسح على جبينه المتعرق رغم برودة الجو..

-شُهيب: اي

-مسرة: شلون؟ اقصد شلون حملت وهي بهذا الوضع؟؟

ابتسم بدون لا يجاوب وباقي منزل راسه، مرارة تشكلت بحلگي حسيت بالالم واني مالي علاقة شلون بنية بهذا العقل گدرت تستوعب فكرة الزواج والولادة وتربية طفل؟ اساساً شلون ربت الطفل شلون كبرته؟!

-شُهيب: اوقات هي تكون طبيعية مو طبيعية كأي امرأة بعمرها بس تفتهم وتستوعب واهم شي تسمع الكلام اما ايام لا تكون مثل عقل الاطفال او المراهقين ماخدها الهوا ويجذبها كل ما هو جميل وجذاب ولامع

-مسرة: على الاقل تعرف انتَ ابنها

-شُهيب: بس ما واعية ان اني ابنها

-شلون؟

-انسي.. شنو هذا بيدچ؟ حتى بوقت راحتچ ووناستچ تشتغلين آنسة قيثارة!

رافع حاجبه وابتسامة جانبية مرسومة على ثغره، ابتسمت منزلة عيوني على الظرف الكبير البيدي ويجول بفكري سؤال واحد واحتاجيت اعرف جوابه ماعرف سبب احتياجي شنو بالضبط بس قررت اسأل حتى اكتشف..

-ابوك ليش انفصل عن امك؟ معقولة بسبب وضعها؟

تغيرت ملامحه مرة ثانية رجعهم للجدية، مسح على خصلات شعره الناعم وحمحم قبل لا يجاوب..

-ماعرف السبب الرئيسي

نبرة صوته تغيرت وتوتره والحمرة الي توزعت على وجهه واضح ديچذب وخافي شي واني ما اللومه ولا انزعجت من هالتصرف لانه حُر وسؤالي غير مؤدب فضولي وتدخل بخصوصيات ناس..

-مسرة: هذي هدية عيد ميلادك

-شُهيب: ما چان اكو داعي صدگيني جيتكم كافية

-جيتنا؟

ابتسم يحرك راسه بقلة حيلة ضحكت واردفت فوراً ماريد احرجه..

-لتخاف ما جبتلك شي هذا الملف اجه ببريد الشركة اليوم ووصل الي لسبب مجهول رغم عليه اسمك

اخذه من ايدي بعدما انرسمت تعابير الفضول على وجهه، فتح الظرف وطلع الاوراق الي بداخله يقراهم لدقائق..

-مسرة: اخبار حلوة؟

-شُهيب: ليش جبتي هنا بالتحديد؟

-لان قريته

رفع حواحبه ثنينهم متفاجئ ابتسمت وريحت ظهري على ظهر المرجوحة، قاطعت الجدية من اشرت على رجليه اگله..

-مسرة: مرجحنا ما انوش

صار يحرك المرجوحة برجله ورجليه طايرة بالهوا متوصل للگاع بينما رجلين شُهيب معقوفات شطولهن ليگول مجاذيف..

-شُهيب: قريتيهم؟

-مسرة: يب قريتهم

-شُهيب: وجاية مسوية نفسچ متفاجئة

-مسرة: اي لان.. اني مسرة قيثارة

عض على شفته السفلية يخفي ضحكته بس ما غابت عني شفتها واحس بالنصر، شلت شعري بذيل حصان عالي ازعجني بالهوا وتربعت بينما هو بقى يمرجحنا..

-باوع اني صح فتحته وقريت محتواه وفرحت كلش كلش بس صدگني ما وقعت بدالك يعني چان گدرت اسويها واني حافظة توقيعك كلش زين بس ما سويتها ولازم تتشكرني لاني انطيتك هاي الفرصة شُهيب شمسون

-شكراً مسرة قيثارة اني ممتن على هاي الفرصة

-انتَ لان عزيز عليَّ انطيتك شوية حرية غيرك چان وقعت بداله من زمان

-محظوظ اني

-جداً جداً

ضحك هالمرة بدون لا يخفيها وضم الاوراق بالظرف يگول..

-بما انچ قريتهم شنو رأيچ؟

نبض قلبي بقوة، بلعت ريگي ونزلت عيوني اسرح ثواني تنهدت بألم قبل لا اگول بأبتسامة مزيفة..

-اوقع بدون لا افكر او لحظة انتظر.. راح افكر شوية لان راح اشتاق لوجهك وريحة القهوة مالتك كل يوم بالمكتب بس غيرها لا فـ راح اوقع

-اممم

-اي وانتَ شنو تگول؟

-بخصوص المن راح اشتاق لو ليش راح اوقع؟

-ثنينهن

-صراحة ماعرف عندي هوايه شغلات راح اشتاقلها

-منهن؟

-امي، كيان، نشوان.. وحتى مروان و.. يعني..

-واني؟؟؟ عزه بعينيي شُهيب ما راح تشتاقلي!!

-دخليني اكمل

-چذااب والقران حراماات على الوقت الاقضي وياك كل يوم واحنه وجه بوجه حرامات على حب امك الي وهي تريد تخطبني الك ان شاء الله ما راح تخطبني؟؟ اموتك اگلب الدنياا عليك تكسرون بگلوب البنات وتعوفوهن يعنسنن

ضحك بقوة يأشرلي بيده حركة "على كيفچ" ضميت ايدي لصدري اطنگر بالچذب واكيد هو يعرف دا امثل حفظني هذا الرجال وعرف طبعي اكثر من ابوية نفسه لدرجة يجاريني وياخذني على گد عقلي كل مرة..

-شُهيب: يمعودة اكيد اشتاقلچ صدگ چذب غير انتِ خطيبتي

-مرتك رجاءً!! مرتك اني!!

-مرتي يله كلشي ولا تزعلين

-نشوان: هاي شنو عيني؟

اللتفتنا ثنينا على نشوان الواگف متخصر وينظرلنا نظرات مبطنة..

-نشوان: ضحككم واصل للبيت جوه والوجوه متفحة موردة بالخير ان شاء الله والعيون متشابگة شوكت العرس؟؟

-شُهيب: استغفر الله نشوان

-مسرة: نشوان حاول تنام وقت فراغك

-شُهيب: او تتابع شي يونسك اكثر من عدنا

-مسرة: فلم مثلاً؟

-شُهيب: او مسلسل هو يفضل المسلسلات

-مسرة: حلوة الفكرة تابع ويايه اني دا اتابع مسلسـ...

-نشوان: اهووووو افتهمنااا افتهمناااا امشو جوه نريد نقطع الكيك

-مسرة: يلا اني اروح بعد كل عام وانتَ...

-نشوان: ماكو واحد يروح بعدها ما بدت الحفلة امشي طبي گدامي

-شُهيب: نشوان شبيك

-نشوان: اسف مسرة بس محد راح يطلع خلينا نتونسس لعبت نفسي من جماعتك الفيطية مگابلهم وگاعد چنهم مطلقات وارامل مع احترامي الشدديد للمطلقات والأرامل اموت عليچن وعلي

-مسرة: هو انتَ بقيت احترام نشوان افندي؟

-نشوان: احبچن والعباس تشگن شگ اصلاً احبهن وعلي فد احبهن وفد حبابات بلسم على الجرح بلسمم والحسين الشهيد.. شايفة ذني الـ.....

تركناه ندخل جوه وهو ورانه يسولف ويبرر ميقصد الاهانة للمطلقات والارامل، افتهمنا عليه وعرفنا ميقصد استهزاء بس اني وشُهيب "كالعادة" حبينا نلعب عليه ونضحك شوية..

دخلنا جوه سوه واختفت ابتسامة شُهيب وتصنم بمكانه من شاف ابوه واخوانه ثنينهم موجودين وبيدهم كاسات عصير وكأن البيت بيتهم..

-نشوان: والله العظيم مادري بيهم هنا هاي شوكت اجو ذولة؟؟

-شمسون: كل عام وانت بخير نمري، معقولة تسوي عيد ميلادك ومتعزم ابوك واخوانك؟

ابتسم شُهيب ابتسامة مجاملة صرت افرق بين ابتسامته الحقيقية ومال تسليك، تقرب منهم يگول بهدوء شديد..

-شُهيب: چانت مفاجأة

-فاهد بأستهزاء: وجيتنا سوتهن مفاجأتين وووييييي

گلبت عيوني بملل شگد غثة هذا اخو الصغير مينجرع، تكترت على جهة اوگف بجانب صبا ومروان بصفها مادري بشنو ديحچون او لحظة ادري بالضبط شنو ديصير هنا.. ببساطة ديكملون عركة اليوم..

-صبا: ما غلطت بالشغل شبيك مروان تره تعبت بي!!

-مروان: غلط بابا شبيچ انتِ جاي تشوفين لو مغلسة مثل عادتچ

-صبا: عندي ضعف نظر

تركتهم يتجادلون وابتعدت قبل لا تعلى اصواتهم وانفضح وياهم، گعدت على قنفة مخملية لتقابلني ثلاث بنات محجبات مختلفات جداً..

وحدة لابسة شال بني وملامحها كلش نازكة والي بجانبها لابسة حجاب ولبس مستور وعريض اتذكر كيان صاحتلها تسنيم هاي اذا ما غلطانة بالاسم والثالثة مبينة صغيرة وجهها طفولي وبشرتها بيضة كلش وعيونها خضراء واسعة..

-تسنيم بلطف: انتِ نفسچ الي انرطمت بيچ قبل شوية مو؟

-مسرة: اي

-تسنيم: خوما تأذيتي؟ حسيت دست على رجلچ

-مسرة: لا لتخافين ما تأذيت شكراً لسؤالچ

-تسنيم: اني تسنيم وهاي ايات وهاي جنات نصير بنات عم شُهيب

رحبت بيهن وعرفت عن نفسي، اكتشفت اليوم اجن من العراق مبين على جنات تعبانة رغم طنگورتها الواضحة..

-تسنيم: چان المفروض نجي قبل اسبوع بس ڤيزتنا تأخرت

-مسرة: صحيح اوقات الڤيزا تطول شهر واكثر

-ايات: لا عمو شمسون عنده معارف وكملت خلال اسبوعين بس تأخرنا لاسباب عائلية

-مسرة: اها

-ايات: گلتي انتِ شريكة شُهيب مو؟

-مسرة: صحيح

-تسنيم: مبنية صغيرة ما توقعت عندچ شركة ما شاء الله

-مسرة: اني اشتغل قبل لا ادخل جامعة بمجال الهندسة من عمري 17 سنة بشركة ابوية بس هسة قررت افتح شركتي الخاصة وشُهيب شريكي

-تسنيم: كلش حلو هالشي تتهنين

-مسرة: شكراً حبيبتي

-ايات: هم زايرة العراق من قبل؟

-مسرة: اي رايحة ثلاث مرات

-ايات: لاحظت لغتچ العربية ممتازة

-مسرة: اي واعرف اكتب عربي هم اعتبره انجاز صراحة

-تسنيم: ههههه اكيد انجاز العربي كلش صعب وياچ مدرسة لغة عربية

-مسرة: وااو حبيت يعني ممارسة مهنتچ؟

-تسنيم: اي هستوني تعينت بمدرسة اهلية وتركت رأساً لان بعد اجيت هنا

-مسرة: مطولين هنا؟

-ايات: راح نعيش هنا

زفرت الي سموها جنات بقوة وكتفت ايدها ابتسمت على حركتها الطفولية مبينة ما طايقة جيتهم هنا، بقيت اسولف ويه البنات محبوبات لبسهم كلش عجبني وحجابهم لطيف حبيت احتشامهن شفت بيهن شي ناقصني للاسف..

**

"كيان"
الجو متوتر بين شُهيب واهله ما توقعتهم يجون وماعرف شلون عرفوا مسوين حفلة بس ما انكر راح اطير فرح بشوفة مالك الي باقي على الصامت من دخلو لسه واگف على جهة ساند جسمه على الحايط وبس عيونه تفتر بالمكان..

-نشوان: شجابهم ذولة؟؟ شوفي شلون عكروا مزاج شُهيب!

-كيان: ماعرف معقولة وحدة من بنات عم شُهيب گالت؟

-نشوان: هو الا هيچ لعد شلون عرفوا

ضجت كلش خصوصاً من بنت عمه اسمها "ايات" ما بلعتها ولا بلعت نظراتها على مالك ما شلعت عينها عنه ابد!! وكلما تلتقي عيونهم تبتسم ويرجعلها الابتسامة واني باقية هنا اتفرگع من القهر..

زاد قهري رسالة اجتني من ثامر الحقير، حطيت ايدي على گلبي صار فترة ممارسل نسيته.. فتحتها وشفتها عبارة عن فيديو وكلام جواه، انتظرت الفيديو يحمل وقريت شكاتب..

"لو تعرفين شنو وصلني.. هاي كونتينرات كلها (^^^^) ومواد ممنوعة العنوان واضح بالفيديو اريدچ ترحين تجيبيلي منهن كمية مرتبة وبعد اعوفچ بحالچ كيان وعد"

فتحت الفيديو المكان بمنطقة نائية وكله عبارة عن گرفانات وحدة بصف الثانية وشاحناتين كبيرة وكونتينرات هوايه كلش هوايه مصطفات بصف بعض وفوق بعض وبآخر الفيديو مصورين ورقة صغيرة واحد شايلها بيها العنوان، رديتله بسرعة بدون لا افكر..

"اكيد سكران انتَ لتصير غبي وتطلب هيچ طلبات مرة ثانية!"

جاوبني بنفس الدقيقة..

"روحي شوفي الفيديوات بموبايلات اخوانچ وكل المواقع"

دگ گلبي بقوة خوف وندم عنده فيديوات عني واني ادخن وعنده فيديو اني اتصرف تصرفات غريبة ماعرف ليش رغم گلي ما چنت متعاطية بس ماعرف ليش هيچ چنت اتصرف.. وعنده نفس الفيديو واني احچي بحبي لمالك وكلامي الفاسق عنه.. وفيديو واني اسبح بحمام بيت مروة والفيديو واضح كللش لدرجة الكامرا عبالك چانت مشكلة بالحمام بدون لا اعرف وبعد وبعد وبعد وبعد فيديوات صديقاتي مصوراتني وخايناتني دازاتهم اله يبتزني بيهن!

قريت رسالته روحي تفور وعيني على مالك اكثر فيديو ماريده يطلع بسبب كلامي المينلبس عليه ثوب، انقمتت روحي اكثر من شفت ايات راحت تريد تحچي وياه، قطع نظراتي الهم رسالة جديدة من ثامر كاتب..

"الچ مهلة لباچر بالليل يحلوة"

بلحظتها سوالي بلوك ضميت موبايلي بجيبي بسرعة وطلعت بالحديقة الخلفية اجر نفس، اختنگت وظلمت الدنيا بعيوني شسوي يا ربي شسووي والله مروان يذبحني اذا شاف الفيديوات..

-هاي شنوووووو

نطيت مخترعة من العياط انداريت وچان اشوفه فاهد المسودن طامسة رجله بفضلات چلب جيراننا..

-فاهد: هو اني حظي خ*** انوب اطمس بخ***

-كيان بهمس: شگد مكروه

-ولج هاي منو هنا تعالي ساعديني شبيكمم ما تهتمون بظيوفكم

ما ميزني منو الحديقة الخلفية ظلمة نوعاً ما..

-كيان: ما مرحب بيكم هنا شكو جايين

-فاهد: اكيد انتِ كوري من اللسان عرفتچ خرب روحچ

-كيان: خرب روحك انتَ عفونة امشيي ريحتتك صاارت خايسة وانتَ طامس بالفضلاات

-فاهد: تعالي نظفيني جلفيني عطريني شتسوين سوي تعالي لعبت نفسيي اشتعلت امچ

-انچببب لك لاا تغلط على امييي المرحوومة

-ولچ هاي عليمن انچب بت ال*****

-والله الا اربيك اني اعلمك

هجمت اتعارك وياه ولزم ايدي ثنينهن فوگ الجاكيت يقيدني، يحرك حواجبه ويمدلي لسانه مثل الزعاطيط ويضحك..

-فاهد: هَي هَيي هَيي هَيي متنوشينن

-كيان: وللك هدددني مسووودن

-ههههههههههه كوري شگد عصبية انتِ

-هددددنيييي يالطامسس بالخيسسة

-صح يله تعالي نظفيني تعالييي

جر راسي ينزلني يوگعني بالگاع ويحط راسي قريب حذائه گمت ازاگط واعيط واگرص برجله وهو يضحك ويگول..

-لحسي الحذاء لحسي حبي انظف من وجه اخوانچ

-ولك يبوووووو هددددنييي الا اگول لأبوووك عليييك حققييير

-لا حبابة لاا اخاف لتحچيله فدوة ابوس ايدچ حباابة والله اصير حباب

-مااا الا احچيله اخلي يربيك من اول وجديد

-لااا حبابة والله يكتلني اخاف شبيچ اعتبريني زعطوط وغلط شنو الزعاطيط متسامحوهم؟

-منيلك زعطووط بگد البغغغل خررب ماتت ايدي الله ياخذذك والله الا اشكي لابوك منك

ضحك بصوت عالي واخيراً هدني سوه حركة عود ديرجف بأيده وفتح عيونه الصفر بطريقة تخوف..

-فاهد: باعي جاي ارجف ولچ راح اموت سامحيني بروح امچ الحبابة

عرفته ديستهزأ بيه بسبب ابتسامته الكاتمها شگد تلعب نفسي منه اكره فاهد اكررهه!!

-فاهد: هيووو كوري

-شكووو سليمة

-اگلچ ماعدكم ويسكي هنا؟

-تأدددب

-شكو هم راح تصيرين شريفة براسي وتگليلي احنه منشرب

-اي احنه منشرب لا اني ولا اخواني!!

-يا چذابة

-بكيفك لتصدگ اساساً ميهمني رأيك المسربت

-هاي شبيچ متتحملين حچايتين گبر چنچ سليمة

وللاسف ما تحملت وضحكت انطيته ظهري بسرعة حتى ميشوفني اضحك طاح حظك شگد شاخط هذا، ابتعدت كم خطوة عنه وحسيت بي يمشي ورايه ويدردم بسبب الوصخ الي برجله..

-فاهد: ناس متستحي هسة شطلبت منچ اني هي لحسة

-ولللك

-لحسة لحذائي شبيچ بابا

-لعبت نفسي فاهد روح مناا....

ثانية واقل من ثانية وما اشوف غير شي وگع من شباك الطابق الثاني هبوطاً علينا.. جرني فاهد عليه يحاوطني انتفضت مرعوبة اعيط واشوف شاشة بلازما گدامنا مشتعلة تخبلت من الموقف چان وگعت على راسي لوما متحركة..

-فاهد: ما صار شي اهدأي كوري ولچ شبييچ ترجفين

-ردنا نمووووت

-ايع

-شنوووو

-ايع اموت وياچ؟ لا ياربي كلشي ولا هاي مستعد اموت بمزبلة ولا اموت وكوري بحضني

انتبهت على نفسي بعدني بين ايده، دفعته عني بسرعة اضرب بصدره واغلط عليه وعلى الي ذب الشاشة من فوگ كل جسمي يرعش وهذا واگف ينكت وماخذ الموضوع ضحك؟؟؟

-كيان: ولك منو شمره هذا منو يريدك تمووووت

-شبيچ هذا هارون حب يشاقيني

-منووو

-هارون ابن عمي الجايب همي

-الله يااااخذكم سوووه يا مخابيييل شنو ارواح الناس لععبة عدكمممم

-اي

-وخررر عني هدنييي خليني ارووح

-مترحين هو منو لازمچ

ردت انجلط والله عفته والنار بعدها مشتعلة بالبلازما ماعرف شوصل ذاك النذل فوگ ما شفته من اجه وياهم وماعرف شلون شمر شاشة البلازما هيچ علينا..

اللتفتت اشوف شديسوي فاهد لگيته طلع جگارة من جيبه وشعلها من النار مال البلازما ووگف يدخن يتفرج عليها هالانسان مو طبيعي هذا مو بس مخبل هذا عابر مرحلة الخبال!!

رجعت جوه بالبيت البعض سمعوا طبة بسيطة ما اهتموا والبعض ما سمع بسبب صوت الموسيقى العالي، شفت نشوان يباوعلي وعاگد حاجبه تقرب مني لزمني من ايدي وهمس..

-نشوان: فاهد طلع وراچ بره؟!

-هاا..

انلصمت من شفت مروان يجي علينا تركني نشوان يبتعد حتى ميثير الدجل ومروان استلمني يتسائل ليش ملامحي معبسة وضايجة..

-مروان: شبيچ كيان؟

-كيان: مابيه شي

-مروان: تمام، اگلچ عندي سؤال

-كيان: شنو گول

-مروان: هاي اكو فد بنية.. اءء..

ابتسمت على ارتباكه شجعته بنظراتي يكمل هز راسه وگال..

-اكو بنية عبالها اني احبها وجاي تحاول تتقرب مني شلون اشرحلها ماعندي مشاعر تجاهها بدون ما اجرحها؟

-صار بيناتكم شي يعني؟

-لا ابد بس ماعرف.. مادري كيان ساعديني

-هالبنية صبا؟

-لااا اكيد!!

-احلف

-وروح امي لا شنو صبا غير تموتني لو بس تحس بيه ممكن احبها تفضحني وتشهرني

-هههههه ليش

-لانها هيچ تحب تفضح وتشهر بالعالم، المهم عوفچ من صبا حليلي هاي السالفة

-خو عوفها ليش تريد توضحلها هالشي؟ ماطولها ما حچت وياك اتركها

-هيچ رأيچ؟

-اي لان عيب احس وخطية هم

-ماشي هذا هو

-بشرفك منو هي حباب گول

-وئام

-وئام الويانة بالشركة؟؟؟

-اي والمشكلة نشتغل سوه وجاي احس بيها وهالشي موترني لاول مرة بحياتي

-عادي حبيبي شبيك واذا بنية تنعجب بيك ليش مزعوج

-خلص انسي الموضوع

ضحكت على توتره وارتباكه خصوصاً وئام هنا اليوم معزومة واتوقع هذا السبب مخلي ينزعج، عافني وراح لسبب غريب بأتجاه مالك بس ليش؟؟

الفضول كتلني ماگدرت ابقى واگفة تقدمت كم خطوة عليهم وسويت روحي ملتهية اصب عصير وآكل كيكة واذني وياهم..

-مالك: بخير وانتَ شلونك

-مروان: بخير، شلونها امورك، شغلك؟

-ماشي الحال الحمدلله

مالك ومروان ميحچون ويه بعض نهاائياً اصلاً ماتذكر يوم سلموا على بعض حتى هسة مالك مستغرب من سؤال مروان اكثر مني بس لان مالك مؤدب ومحترم ديجاوب بدون لا يحسس مروان بهذا الاستغرب..

-مروان: شفت شي وما متأكد منه بصراحة فضلت اجي اسألك شخصياً

-مالك: وهو؟

-مروان: عندي زميل حقوقي البارحة چنت عنده وسألني عن شُهيب و هاي اول مرة يسألني عنه

-مالك: امم؟

-وسألني عن اخوانه وبالتحديد فاهد شمسون، سألني اذا چان شُهيب يشبه فاهد ما فهمت سؤاله واختصاراً الك والي گلي فاهد شمسون متورط اسمه بقضية تهريب واسمه مطلوب بدولتين ولسبب غريب ما جاي ينلزم ومحد عنده شي ضده حتى الحكومة

-انتَ تگول فاهد متورط بقضية تهريب وهسة جاي تگول ماكو شي ضده كلامك متناقض

-هذا كلام زميلي وحچاهة لانه متعجب ومتفاجئ بنفس الوقت هو شرحلي الفكرة وچانت طويلة بس اني ما افتهم بالامور القانونية هواي و...

ابتسم مالك يستمع لمروان يكمل بس ابتسامته چانت مبطنة لا هي مستمتعة ولا هي مجاملة ولا هي خوف چانت ابتسامة مختلفة مجهولة المعنى..

-مالك: ماكو هيچ شي مروان اتطمن 

-مروان: بس شفت القضية بعيني

-مالك: قضية شنو؟

-مرفوعة قضية ضد اخوك عند المحامي بخصوص هذا الموضوع

جاوبه بعد صمت لحظات بالمغربي ممنتبه على نفسه..

-مالك: هذره خاويه (كلام فارغ)

-ليش؟

-لان چان اكيد عرفت او وصلني خبر اذا اخوية متورط بقضية من هذا النوع

-گتلك شفت كلشي بعيني

-شنو اسم صديقك؟

-ليش تسأل؟

-فضول

-ما اتوقع تحتاج تعرف اسمه واني مجرد قلقت على اخواني والسبب شُهيب اسمه مرتبط ويانه لان امه للاسف تكون زوجة ابوية

-مالك: واضح للان ما متقبل فكرة شُهيب صار اخوكم مروان

-مروان: شُهيب مو اخونا! هو ابن زوجة ابوية!

-مالك: للاسف هو يعتبركم اخوان اظن كلامك راح يوجع گلبه

-ميهمني گلبه وشُهيب يعرف كلش زين بمشاعري تجاهه ما احتاج نصايح منك

-زوين (حلو)

وهيچ انختم حديثهم بكلام مروان اللاذع وجاوب مالك الهادئ، تفرقوا كلمن بمكان لاحظت مالك يروح لأبوه ويأشرله راح يطلع بره ثواني واشر شمسون لبنات اخوه يطلعن وياهم وفاهد وهارون هم واخيراً خلى البيت منهم وشُهيب جر نفس مرتاح..

اللتهيت ويه صديقاتي اسولف وياهن، مر وقت قليل وشفت خزرات صارت بين شُهيب ومروان ركضت قبل لا تگب عركة بس شفت مسرة واگفة قريب منهم مصدومة من شي وطلعت هي وصبا بسرعة گالن ياخذن تكسي سايق مسرة ما راح يجي بطلب منها فـ اقترح نشوان مروان يوصلهن حتى متگب بينه وبين شُهيب اكثر، وافق بدون مماطلة بس لانه راد يطلع من حفلة منا ولگاله حجة اخيراً..

**

"صبا"
ودعنا شُهيب وتمنيناله عمر مديد بالصحة والسعادة وطلعنا من حفلته اللطيفة نفسه بالضبط، من اباوع لـ شُهيب استشعر السكون والهدوء والرقاوة احس بيها واسمعها بنبرة صوته الرسمية واشوفها بـ لبسه الانيق..

گعدت بالصدر بسيارة مروان ولا واحد بينا نطق كلمن سارح بأفكاره، مسرة ساكتة ما حچت ابد وتباوع من الشباك تتنهد من حين لاخر وتغمض عيونها تريحهم او تبعد فكرة من راسها ماعرف..

بينما مروان فاتح شوية من الجامة وينقر بأصبعه على الستيرن وعقله رايح مو ويانه و اني افكر شنو راح اللبس باچر للدوام واصبغ اظافري اسود لو احمر؟ مرة مروان گلي الاحمر حلو عليَّ وهالمعلومة بصعوبة اخذتها منه بعدما لحيت عليه وكرهته الدنيا ياله اعترف بيها واحس اي لازم باچر اصبغ احمر لان راح اللبس احمر واشوفه لون مناسب جداً لبشرتي البيضة..

زين مكياج؟ شنو احط سموكي لو هادئ؟ احس مزاجي مايل للسموكي وحمرة طوخ وظلال هيچ بارز و... لصمت حبل افكاري وركزت ويه صوت الاغنية الي انفتحت هسة مروان علگ اغنية وبدون لا اطلب منه؟؟؟ علگ اغنية بدون لا اشلع گلبه بالملحة مالتي؟؟؟ علگ اغنية ورومانسية؟؟؟؟

-صبا: هاي شسامع اغاني رومانسية وكذا

-مروان: ليش الموضوع ازعجچ؟

-صبا: لا بس استغربت لا اكثر

-اذا ما حبيتيها اطفيها

-لا عوفها حلوة علّي بله

علّا الصوت وعم الهدوء مرة ثانية، هدوء لطيف ومريح بنفس الوقت.. تعلمت على مروان وتعلمت عليه يوصلني دائماً ونتجادل طول الطريق او نشتغل او نتعارك على الاغاني الاختارهم بكلشي مختلفين احنه شخصيتين متناقضتين والشغل بيناتنا ورطة حقيقية!

-صبا: سرور

-مسرة: هممم

-صبا: وين بالك اغاتي

-مسرة: وياكم

-صبا: ما اسمع صوتك ليش ضلع

-مسرة: بس تعبانة مابيه شي

اللتفتت عليها حتى اباوعلها، همست بيني وبينها..

-صبا: عيني بعينچ مسرة

-ها

-صبا: عينچ على مالك شمسون طول الحفلة ليش؟

-هيچ

-هيچ؟ اني الاعرفه مسرة متصفن على رجال ابد شمعنى عيونچ على مالك

-افف كافي صبا يتهيألچ

-هو هم چان يباوعلچ للمعلومة

-ادري

-عبالي بس اني انتبهت اكثر من مرة عيونه انحرفت ناحيتچ

-احس شاك بيه هذا الرجال

-شاك بشنو؟

-بخطتنا

-ماعرف صراحة بس اني لاحظت ولاحظت واحد كلش چان مزعوج بنظراتكم

-منو؟؟

-شُهيب

-چذااابة!!!

-صوتچ يمعووودة

-صدگ تحچين؟؟

-شبيچ والله كلش مزعوج من نظرات اخو عليچ اكله اكل بعيونه

صفنت مسرة تبلل شفايفها وتتنهد ضحكت على حركتها وگرصت معصم ايدها..

-حقيرة حاطه الاخوان ثنينهم جوه ابطها

-صبا كم مرة گتلچ بطلي من هالتخيلات الفاسقة والمصطلحات المقرفة

-ادري ادري بس احبه

-اگلچ صبا الاحم احم (تأشر بعيونها على مروان) شبي ويه شُهيب؟

-صبا: يموتون من بعض

-ليش؟؟

-بهمس اهدأ: ماعرف بس دائماً مروان يحجي على شُهيب ويتعارك ويه كيان من يشوفها متعلقة بي

-عجيب

-صبا: عرفتي سبب العركة الصارت قبل لا نطلع؟

-مسرة: ماعرفت شنو بالضبط بس لقطت اذني الاحم يعاير شُهيب بأهله يگول كلكم مافيات ومجرمين وراح تورطونا وياكم يا ولد الزنا

همست "ولد الزنا" همس ما لقطتها اذني قريتها من شفايفها، فتحت عيوني مصدومة من كلمته الحقيرة وضجت منه كلش..

-مروان: وين بيتكم بالضبط مدموزيل؟

دلته مسرة على بيتها ورجعت تسرح بالشارع، عليت على صوت الاغنية اكثر ابعد الافكار الصارت براسي انقهرت من مروان كلش وانقهرت لان حط شُهيب بهيچ موقف گدام معازيمه حرام عليه يتهم الناس بهيچ امور ويقذف امهاتهم ما لگه مسبة ارقى من ولد الزنا!!

-مروان: هاي شكو

ركزت اتبع انظاره عگدت حاجبي متسائلة من شفت مجموعة سيارات سودة عالية وجام مظلل معترضات طريقنا وسادات الشارع الفارغ..

اشر واحد من الواگفين گدام السيارة لمروان يسفط على جهة بس مروان ما استجاب وفر السكان يغير طريقنا نروح من غير اتجاه، صار يسوق سريع والسيارات تمشي ورانه يتزابگون ويه سيارتنا ويحصرونا بينهم، التوتر يقره الف طلع منهم مروان اتخذ طريق الغابات حتى نتيههم ونخلص منهم..

صرخت خايفة من حسيت بـ اطلاق نار من سلاح مكتوم صار قريب علينا يتبعه عدة طلقات يحاوطون سيارة مروان، داس بريك قوي انرطمت بالجامة..

-صبا: شديييصيرررر؟؟؟

-مسرة: شكوو ذولة منو؟؟؟

-مروان: بنات اهدأوا خلوني انزل اشوف شيردون

كمشت بذراعه بقوة ميتة خوف..

-صبا: تخبلتتت شلون تروحلهمم برجلييك وانتَ وحدددك وما مسلححح

-مروان: خليني افتهم شبيهم وشيردون صباا ما راح يصير شي

-مسرة: لا مروان اگعد لحد يطلع من السيارة

قفل البيبان كلهن ومسرة نزلت نفسها تگعد جوه الكشن طلعت تلفونها تتصل بأحد، ثواني وسمعتها تگول بسرعة وبأختصار..

-اني بطريق مقطوع بشارع ^^^^^^ اكو سيارات مصفحة معترضات طريقنا دزلي احد

عيوني عليها وعيون مروان على الزلم الواگفين محد بيهم تحرك عبالك منتظرينا احنه نروحلهم، نزلت راسي احطه بين رجليه خايفة وانتفضت اعيط بصوت اعلى من اجه واحد ملثم وبيده سلاح يدگ على جامتي يأشر حتى انزلها..

-مروان: الحقير ابن الكلببب

فتح الباب مالته ينزللهم واني ومسرة ثنينا جريناه هالمرة حتى يگعد، الرجال غير اتجاهه على شباك مروان يأشرله ينزله عقلي صار وياهم وويه الطريق شلون لافوها علينا وحصرونا جابونا هنا بطريق مقطوع متمر منه السيارات بكثرة والشرطة واضح نيتهم ابد مو خير!!

حطيت ايدي على گلبي انضم دقاته من نزل مروان الجامة ويحچي بلغة البلد..

-مروان: منو انتَ؟؟!

-الرجال: انزل من السيارة

-مروان: منو انتَ گلت؟؟؟

-انزل من السيارة لو انتَ والبنات الوياك تموتون والان!

-مروان: جاي هنا تطلب اذني حتى تكتلني حضرتك؟!

-نقتلكم جميعاً.. نعم

يحچي ببرود قاااتل گلبي وگف من اسلوبه شبي هذا وليش دياخذ وينطي ويانه! بلعت شهقتي ونزلت دموعي من ثبت المسدس براس مروان ويگول بجمود..

-الرجال: بيمن تحبون نبدي؟

-مروان: اني انزل وعوفو البنات شتريد من عدهن؟!!

-الكم حق تختارون طريقة موتكم هيچ گال سَيدي

-مسرة: ومنو هذا نعالك؟؟

جسمي تصلب وعيوني نطت ويه نبرة صوته الخاوية الباردة الخالية من الحياة، نَفسي انقطع ويه جوابه الصادم وهو يگول...
 
-الرجال: كابيتان شُهيب شمسون....

يتبع... 💀

━━━━━━  ━━━━━━

دخيييلك يا علي اي والله دخيلك يابو الحسنين يا علي 😍💔
عمي شنو هالعالم شنو هالدنيا احنه وين عايشين ذولة وين عايشين والعياذ بالله 🥲

ملاحظة شباب وشبابات: كل حدث ينكتب ضروري وليس فقط تحشية للبارت كل حدث اله ربط بمستقبل الرواية وهذا السبب ما اگدر اطير بالأحداث او اختصر لان اذا عبرت مشهد ما راح تفهمون المشاهد المستقبلية فـ اعذروني من الاختصار (ولو محد طلب اختصر بس كتبولي ليش متستعجلين تزوجين الكبلات 😂 هو بكيفييي شباببر 😂🙈 بس لتستعجلون على رزقكم راح تكتفون من الكبلات وتتونسون وياهم ان شاء الله 😂💕🦋)
والي يتذكر التحذير بالبداية ذكرت القصة بيها اكثر من ثنائي وقصة ببطن قصة چنت واضحة من البداية 🩷

واخيررراً شنو توقعاتكم 💀🩷