رواية ابناء الحسوم "شمسون" الفصل الثاني وثلاثون 32 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

بعض الفراشات كيدهن رحيق.. 🦋

━━━━━━  ━━━━━━

"كيان"
صمت.. ما صار غير الصمت بعدما المدعي "صقر ريماس" رحب بولد شمسون بطريقة استفزازية.. فجأة ضيگ عيونه وكأن ظلام الليل حجب عنه الرؤية بوضوح وتقدم خطوتين ناحيتنا او خليني اگول لنحاية شخص واحد..

-صقر: مسرة قيثارة!

نطق اسمها بتعجب، توجهت انظار الجميع لـ مسرة الواگفة بثقتها المعتادة ما جاوبته ولا ابدت ردة فعل، تقدم خطوتين جديدة صار قريب من عدنا.. حك ذقنه بالمسدس الي بيده وگال بعدما ضحك بصوت..

-صقر: ما جاي اصدگ انتِ هنا!

-مسرة: صدگ

-صقر: اكتملت سعادتي

-شُهيب: صقر انتَ مشكلتك ويانه لا تظل تگمز على النسوان!!

-صقر: تمام، كتلوهم

شهگت اني وجنات من الرهبة ومن صوت الاسلحة الي تصوبت علينا، صاح شُهيب ومالك راد يهدأ الوضع وفاهد فشر وهمس الي ولجنات وبقى وجهه مستقيم الي يشوفنا ميگول دنحچي..

-فاهد: أي شي يصير تهربن بدون لا تلتفتون علينا

-كيان بهمس: انتَ مخببلل ما اعوفكم لو اموت!

-فاهد: كياان لا تعاندين!

-كيان: ماروح ماروح

-فاهد: جنات انتِ اخذيها وركضن ولا تلتفتون لو صلوكم صلي بالرصاص وما راح اعيد كلامي فهمتن لو لا!

سكتت جنات هادئة تبحلق بعيونها الچبيرة، هزت راسها بعدما كرر جملته الاخيرة بعصبية مكتومة والمحادثة للان قائمة بين مالك وشُهيب وصقر، حولوا يحچون بالاسباني بس عصبية مالك تفسر صقر جاي يستفز بيهم والاسلحة للان موجهة علينا..

وگف گلبي من سحبوا اقسام تشهدت وغمضت عيوني بقوة مرعوبة من الموقف، انتهينا راح نموت هنا وراح يرتاح شمسون لانه خلص من عدنا.. ثانية ثانيتين وفتحت عيوني على صرخة قوية من مسرة تگول بعصبية..

-مسرة: صقققر!!

-صقر: مسرة؟

-مسرة: انتَ مشكلتك ويه الزلم لا تخوف البنات!!

-صقر: ماعندي شي ويه البنات عيوني يگدرن يروحن وانتِ من ضمنهن اكيد

اشرلنا مالك نوگف شوية ظلينا وحدة تباوع للثانية ونتراعش كمشت اني وجنات ببعض هي موتة وحدة لو نموت كلنا لو نعيش كلنا..

-شُهيب: لحد تتحرك!

-صقر: ها تريدهن يموتن وياكم يلا حلو

-فاهد: بطل سووالفك صقر عبالك الگدامك غشم؟!!

-مسرة: انتو مو اصدقاء؟؟ صقر انتَ مو گتلي فاهد شمسون صديقك شنو تغير هسة؟!!

-فاهد: نعالي صقر ريماس صديقي؟؟ اطم روحي احسننن

بلحظة سريعة ضرب صقر طلقة بجانب فاهد مرت من يمه بدون لا تطخه، صرخت ميتة خوف ما تحملت هالرعب تعبت منه احسني بكابوس تكرر عليَّ مشهد الكونتينرات وثامر وكل لحظة تعيسة عشتها.. گبت الهوسة من جديد واكثر من طلقة ضرب يم رجلين الولد كـ تهديد طلقات مكتومة من سلاح مكتوم مابي صوت..

-مسرة: صقر اريد احچي وياك بموضوع مهم غير قابل للتأجيل!!

وگف الطلقات ومرة ثانية توجهت الانظار عليها، تقدمت خطوتين صارت مقابيله ضبط وعادت جملتها ببطئ وجَدية خلت ابتسامة خبيثة تنرسم على وجه صقر ريماس..

-صقر: صار

-شُهيب: مسرة رجعيي مالچ علاقة انتِ!!

-مسرة: أنطوني مجال

سحبها شُهيب من ايدها بقوة يرجعها اله واندار عليها لزمها من اكتافها يغطيها بجسمه ويحچي بحرگة..

-شُهيب: مسررة لا تدخلين بشغلنا اني اتصررف

-مسرة: تمام ميخصني بيك اني اريد احچي ويه صقر بشي خاص

-شُهيب: مسرة!!

-مسرة: لا عبالك تزوجنا صرت تگدر تتحكم بيه وبحياتي؟! لا تنسى روحك شُهيب زواجنا على ورق وبسسس!!!

دفعت ايده بقوة وابتعدت منه ترجع لـ صقر المبتسم بينما شُهيب وجهه بعد ميتفسر والصدمة الي اعتلت ملامحه اذتني.. حسيت وگف گلبه من جابو سيارة مصفحة وركب بيها صقر واشر لـ مسرة تركب وياه، راحتلهم تمشي يا جبل ميهزك ريح ودخلت السيارة وانطلقت بيهم.. حركتها خلت كل جماعة صقر ينسحبون وكأنه ربح واخذ الي يريده ونسى الباقي..

-فاهد: مشهد مؤثر

-مالك: فاهد مو وكتها!

-فاهد: والله شبيك عيوني دمعت

-جنات: شنو صار؟؟ ليش عافونا وراحوو؟؟؟

-كيان: اخذو مسرة!! شُهيب اخذو مسررة شلون تسكت!!

تمشى مبتعد بدون لا يجاوب احد، ملامحه احتلها الجمود بعد كلامها الاخير ولا كأنه متأثر ولا كأن اخذو شريكته وزوجته وياهم بسيارة واحد مجرم راد يكتلنا قبل ثواني!

-مالك: امشوا

-جنات: وتعوفون مثرة! شلوون!!

-فاهد بهمس: اذا زوجها ما مهتم احنه شبيدنا قابل

تمشينا للشارع العام توقعت راح نرجع للفندق بس ظلينا واگفين هنا بالخمس دقايق واجت اربع سيارات مصفحة تشبه السيارة الركبت بيها مسرة.. فرحت وتوقعتها بوحدة بيهن بعدين اكتشفت هذا "ليو" وجماعة مالك وياه اشرولنا نركب..

صعدنا كلنا بسيارة وحدة وروحي مفرفحة على مسرة كلما اني وجنات نگول شي ونعترض شلون عافوها وحدها محد يجاوبنا ونبقى ندردم وحدنا من القهر..

بقينا على هالحال لطريق دام 45 دقيقة ابتعدنا عن الفندق متوجهين لقرية ريفية بيوتها صغار، سفطت السيارة گدام بيت صغير كلش ومالك گال..

-نزلو

نزلنا جميعاً واني وجنات بعدنا وحدة لازگة بالثانية ونتسائل وين جابونا؟ جماعة مالك بقوا بره ودخل ويانه بس ليو وجهه بشوش ويضحك للهوا ومبينة علاقته قوية بـ فاهد لان من حركاتهم ونبرة صوتهم مبينين ديتداهرون..

استوعبت هذا البيت تابع لـ ليو يجيله بوقت الاجازات ويستمتع بالحياة الريفية ويه زوجته، فرنا البيت عبارة عن غرفتين صغار وصالة ومطبخ وحمام حچى ويه الولد شوية يوجههم على كم شغلة وعافنا وطلع..

-كيان: ومسرررة؟؟؟؟

-مالك: ندزلها اللوكيشن تجينا

-جنات: تره احنه بدولة غريبة شلون تعوفون مرة وحدهاا بين الزلم؟!!

-فاهد: مرة عن مرة تفرق عزيزتي جنات

طريقته بالكلام مو للاستهزاء وانما توحي على ان مسرة مو امرأة عادية وهي گد نفسها بس ما اقتنعت لا والله ما اقتنعت ولا راح اقتنع شُهيب شلون عافها هناك وحدها!

-شُهيب: جماعة ليو راحو وره صقر ريماس من اخذو مسرة؟

سأل ببرود شديد برود لمسته وجمد عظامي، نفى مالك براسه وگال بنفس الاسلوب..

-لا ما لحگوهم

-شُهيب: تمام

-مالك: اشوفك ما مهتم؟

-فاهد: اي والله ضارب الدنيا بعرض الحايط

-شُهيب: دايخ طالع شوية افتر واشم هوا نظيف

-مالك: تروح لمسرة؟!

-شُهيب: ليش اني اندل وينها حتى اروحلها؟ خليها هي ترجع وحدها ادري بيها قوية

-مالك: يعني صدگ زواجكم على ورق!

-شُهيب: قابل چذب؟

-مالك: توقعتكم...

-شُهيب: بطل توقعات

-فاهد: صدگ چذب ثلاث ايام بالغرفة وحدكم شتسوون؟!

-شُهيب: للمرة المية اكرر چان عدنا شغل وكملنا جرة وحدة!

-مالك: تكملون شغلكم بدال ما تتونسون وتغيرون جو؟

-شُهيب: عفنا الشركة هوسة وچان لازم نرتب الامور واني ضغطت عليها هي ما رادت تبقى بس من اكو شي يدگ براسي لازم اسوي

-جنات: خطية مثكينة اكيد ضاجت

ما اهتم عافنا وراح وضعه مو بس طبيعي فوق الطبيعي وهالشي زعلني كلش وجرحني من الداخل من ترجع مسرة بالسلامة شنو نگللهة؟ نگلهة شُهيب ما اهتملچ وراح يتمشى وتركچ بهذا الوضع لانه دايخ؟!

-فاهد: انصدمت

-كيان: اني هم

-جنات: ليش؟

-مالك: شُهيب لو فعلاً يحبها وعنده شي وياهة ميعوفها دقيقة هناك وحدها بس فعلاً طلعت مشاعره باردة تجاهها

-فاهد: وزواجهم على ورق مثل ميگولون

-جنات: يمكن راح يدورها وانتو متدرون؟

-مالك: مستحيل يلگاهة صار قريب الساعة من راحت وهو ميندل مدريد زين ما جاي بس مرتين هنا

-فاهد: حرامات خابت توقعاتي

-كيان: يعني شلون؟

-مالك: خابت توقعاته لان طلع ماكو حب بيناتهم علاقتهم صداقة وشغل وبس!

ذب نفس متنهد مرتاح بعد جملته مسح على وجهه وهمس "الحمدلله" ونزع ساعته ومحاسبه يحطهم على الطاولة وبقى لابس زنجيل السوار النسائي بمعصم ايده ملاحظته مينزعه ابد...

**

"مسرة"
شفت عيونه.. شفت الصدمة بيهن وره جملتي القاسية الشلعت گلبي شلع من گلتها، انكسرت بدلاً عنه واني انطقها بس احتاجيت اگولها بصوت عالي واذكره احنه گدام الكل زواجنا على ورق ولا ينسى هالشي حتى لو راح يتأذى من كلامي اهم شي متنفضح علاقتنا گدام اخوانه وگدام صقر ريماس بالتحديد!

اخذو تلفوني للامان وگعدت بالسيارة وصقر گدامي واحد مگابل الثاني، عيوني على الشارع تتابع الطريق احفظه وهو عيونه النگسة عليَّ، بقينا على هذا الهدوء لحدما وصلنا للفندق الساكن بي..

-صقر: تفضلي جميلتي

فتحولي الباب نزلت وهو يمشي ورايه ضبط لو يتقرب خطوة اضافية يطخ بيه، مشيت بخطوات متزنة وببالي فكرة وحدة وهي.. شنو الموضوع الي راح احچي بي وياه؟ شنو هالموضوع الغير قابل للتأجيل الي ما گدرت اخلي يكمل مهمة قتل ولد نعلون علموده؟ ااااخ يا نقطة ضعفي الجديدة اااخ يا شُهيب!!

فتحلي باب غرفة واشرلي ادخل، اوكي هل هي مجازفة مني اجي لمكان "غرفة بالتحديد" ونكون اني وصقر ريماس وحدنا؟ اي هي مجازفة بس راح اجازف واكمل النويت ابدي بي واقنعه يترك ولد شمسون بأي طريقة كانت..

-صقر: افييييشش هسة ردت روحي

گالها بصوت عاشق وتقرب مني رفعت ايدي مقابيل وجهه اعيق حركته عن التقدم شيحس؟ وشنو متوقع مني اقدمله وجابني هنا؟ راحت روحك لجهنم گولو امين!

-صقر: هههههه بعدچ على هالسالفة توقعت طخيتي راس وتنازلتي

-مسرة: هم گال تنازلتي انتَ ملاحظ هالكلمة شگد مقرفة لو مملاحظ؟

-صقر: لا تفكرين بهاي الطريقة اكيد تعرفين قصدي بالكلمة

-المهم.. اجيت احچي وياك بموضوع

-قبل الموضوع، تشربين شي يا معذبة الفؤاد؟

كشولت بوجهه لعبانة نفسي شگد اتقزز من هالعبارات السخيفة خصوصاً من تكون طالعة من واحد اسمه يبدي بحرف "صقر ريماس"..

-صقر: تمام تمام اني اشرب وحدي

صبله كاس واني گعدت على الكرسي احط رجل على رجل، ثواني واجه گعد مقابيلي يتكمع من كاسته وعيونه الصلفة تنتظرني احچي..

-مسرة: ردت تكتل ولد شمسون؟

-صقر: يمكن

-من الاخر ما انصحك بهالخطوة الغبية

-امم

-وبكيفك بعد

گمت من مكاني بمعنى اكتفيت بالحديث وياك، عبرته ولزم ايدي بحركة سريعة يريد يجرها وما لحگ سحبني من ردن البلوز فوراً جريتها منه وخزرته..

-مسرة: كم مرة گتلك بطل هالطبع!!

-صقر: لا تگومين قبل لا اكمل كلامي!

-لا بله؟!

-مسرة جاي نحچي على كيف ونتفاهم لا نضوج بعض واني اسف لان جريتچ بهاي الطريقة

تنهدت مالي نفس اباوع لوجهه مو انوب احچي وياه بس شبيدي لازم اكمل هالاتفاقية السخيفة، رجعت لمكاني وبنفس وضعيتي السابقة طابگة رجل على رجل..

-صقر: سمعت انتِ وشُهيب شمسون تزوجتوا صدگ هالشي لو اشاعة؟!

-وانتَ ليش ضايج

-ضايج لان سمعت بالخبر من الغريب مو منچ! مو عيبب ما اباركلكم؟!!!

-لا حبيبي ارتاح منريد مباركاتك زواجنا مصلحة

-هههههههههههههههههههههه

-خير اللهم اجعله خير

-ادري على ورق مسرة اني مو غبي

-ها همزين

-بس شعندچ وياه بمدريد يا ترى؟!

-اتونس براسه

ضحك بصوت عالي وصك الكاسة للاخير، طلع جگارة يدخنها ويلعب بجگارة ثانية بيده محضرها وره هاي..

-صقر: احب روحچ الرياضية بس جاي احچي صدگ

-اي شبيك اتونس واستفاد براسه

-شوكت تنفصلون وشگد تستفادين منه؟

-الانفصال مادري بس الافادة خيييير من الله

-ثگيل؟

-كلش

-چنت حاس جاي ترسمين على هيچ خطة اول ما اشتغلتي وياه

-لا

-لعد؟

-چنت اريد اكتله

-حلووو

-فكرت بيها بس بعدين شفت لا خليني ابوگه احسن شحصل اذا مات

-وجهة نظر

-فـ كلامي الك هالمرة صقر ولد شمسون مو سهلين يودوك للشط ويرجعوك عطشان وحركتك اليوم اغبى حركة بالتاريخ

-ليش يابة

-جايب چلابك همه واسلحتهم وتردون ترمونا بنص شارع؟! الشرطة تبعد عنه بشارعين راح يجونا طايرين

-المسدس بي كاتم مسرة لو ما واصلچ هالتحديث

-واصل عيوني واصل بس ذولة ولد شمسون مو عقل شايلين طراگيع الف شغلة يبتكرون ويجيبولكم الشرطة وتسحلكم وهمه يطلعون منها مثل الشعرة من العجين مثل كل مرة

-هواي عندچ معلومات عنهم؟

-تاريخهم حافظته بصم

-تدرين بشمسون متعادي ويه 11 عشيرة؟ او خليني اگول صخامات مو عشاير عادية

-وتدري شمسون متعاقد ويه 16 عشيرة وموقعهم على حياته وحياة ولده؟ لو صارلهم شي القاتل والي مر على جريمة القتل والي شهد جريمة القتل والي شم دم الضحية راح يتمثل بجثته وينسحل هو والخلفه؟!

-اممممم معلومة جديدة

-افيدك وفيدني

-شمعنى شُهيب شمسون؟

-تريد الصراحة اني ردت المَلِك بس شوية نفسية وميحبني عاد شهوبي زين وحباب

-ههههههههههههههههههههه لا تخدعچ ملامحه البريئة سرور

-بعده حباب بعيوني انقهر اأذي واقطه بس يلا طُزز

-على گولتچ "طُزز"

سكتنا ثنينا وحل محل اللغوة الفارغة الطلعت مني قبل شوية بخصوص شُهيب تاج راس صقر الهدوء.. صبله كاسة جديدة وگال بجدية..

-اربعة مليون دولار

-تداين مني؟

-هدية الچ

-اووي شكراً بس لا ممحتاجة

-اربعة مليون دولار بحسابچ البنكي الان! اذا رضيتي تكونين الي مسرة قيثارة...

-هم عادلي هالسالفة

-اربعة مليون دولار و ميس، خلال 12 ساعة ميس تجيچ هنا وبحضنچ وخلي طليقچ يعترض اشگ حلگه بالنص

-امممم

-شگلتي؟

-رجعت تغريني بـ بنتي

-ولآخر عمري

-لا شكراً

-على شنو؟

-جوابي، لا شكراً اگدر ارجع ميس لحضني واشگ حلگ اكرم بنفسي انتَ استريح

-راح يجي يوم وتقبلين بعرضي مسرة

-يلا نشوف عود

-نرجع لموضوعچ المهم الشغلني عن ذبح ولد شمسون

-ها شوف نسيت

-ليش مترديني اكتلهم؟

-گتلك مو سهلين بس لحظة انتَ ليش تريد تكتلهم؟

-ثار يجمعنا فاهد شمسون سبب شلل دائم لابن اخوية وشُهيب شمسون الكلب شَل الاطراف السفلية لابن اختي من خلال طلقة بالعامود الفقري

-اف عنيف هموسي

-منو هموسي؟

-معليك كمل ليش سووا هيچ؟

-نگول دفاعاً عن النفس ردنا نكتلهم

-يعني ردتوا تكتلوهم ومتردوهم يدافعون عن نفسهم؟ لا صقر هاي ما حبيتها منك شبيك وياهم؟

-مسرة ممكن تبطلين تدافعيلهم لان بديتي تنرفزيني!

-وشعليك انتَ والله حلوة هم زوجي على ورق وهم ميحقلي ادافعله بالچذب؟

زفر متنرفز اوكي مسرة كافي لا تروحين زايد هذا طگة ونص وهسة يحطچ ويكتلچ، رجعت ملامحي للجدية وبدون ابتسامة نطقت بهدوء..

-مسرة: ما ردت اتورط واكون احد الشهود على الجريمة

-ما راح تنضرين وانتِ تعرفيني مستحيل....

-ادري ادري مستحيل تكتلني لان بينك وبين ابوية اتفاقية تخص حياتي ما نسيت! بس راح يتلوث اسمي وتصير عليَّ علامات استفهام ليش بقيت عايشة من دون الكل والموضوع يكبر من يكتشفون اني وشُهيب متزوجين راح تورطني وياك وعبالهم متفقين ويه بعض نكتلهم وننهزم ويه بعض مثل المراهقين

-وجهة نظر

-سوي كلشي يطلع بيدك حتى تتخلص منهم بطريقتك بس لا تسوي شي واني ما موجودة خليني حاضرة موتهم صقر اريد اتونس على الدم الراح ينسفك

-هستوچ گلتي ما تردين تكونين حاضرة بمسرح الجريمة؟

-خليني حاضرة بس مو حاضرة وانتَ فهمتني

هز راسه هزات خفيفة نعم هو فهمني.. القصد من حاضرة بس مو حاضرة ان اكون موجودة بس العين مو عليَّ وما انشاف ولا يدخل اسمي من ضمن التحقيق لو صار شي واكيد طلبت اكون حاضرة بكل عملية يقوم بيها حتى اخربها بطريقتي بس يا خوفي يغدرني وميمشي بوصيتي ويكتلهم بالسكتة!

-صقر: نشف ريگچ شاركيني كاس

-عود غير مرة

-باتي هنا اليوم

-واحط علامة استفهام جديدة على روحي؟ هو اني اجيت وياك ومتأكدة الف فكرة صارت براسهم وراح يحطوني في خانة الخائنين

-مو لهدرجة

-لهدرجة ونص ولد شمسون ميطيقوني خصوصاً چبيرهم

ديجاوب واندگت الباب علينا، سمحلهم بالدخول اجه واحد من حمايته ومدله تلفوني ديرن..

-صقر: المتصل "أشهب ابو شعر الحلو"؟

باوعلي بطرف عينه شاك بيه، گلبت عيوني مزعوجة من نظراته ونفخت هوا..

-مسرة: ابن شمسون شبيك

-صقر: مو چان اسمه شُهيب؟

-نفس الشي

-وبخصوص "ابو شعر الحلو"؟

-هم گول شعره مو حلو؟!

قبض على فكه بقوة مزعوج من كلامي كملت واني اغيض بي..

-انتَ بس تغار لان شعره احلى من شعرك

-بيدددي ازين شعرره بس انطيني صبر

رجع دگ مرة ثانية وثالثة ورابع وخامسة مَل صقر وطلعت روحه گام وغلق جهازي وشمره على الطاولة البيناتنه وعيونه عليَّ يشوف ردة فعلي راح اضوج لو لا.. سويت روحي ممهتمة وبداخلي احترگ حرگ بس اريد اجاوبه واطمنه اني بخير واشرحله كلشي متأكدة هسة ميت قهر وغيرة وحقه شيگول وشيسوي حقه..

-مسرة: مليت وتعبت اريد اروح بس قبلها عندي طلب

-تأمرين انتِ

-اريدك بمصادرك الخاصة تعرفلي شُهيب شمسون وين چان بين سنة الـ 2001-2002

-ليش؟

-سألته وحسيته يچذب عليَّ واريد اتأكد من صحة كلامه

-ههه معقولة مصادرچ ما دبروها؟

-ما گلتلهم اريد مساعدتك الك

ابتسم بمكر وهز راسه موافق، اعرف نقطة ضعف صقر يعشق التملك ويعشق واحد يعظمه هسة لو انفخ بي شوية وراهة اگله انطيني عيونك بنطيني بدون تردد..

-صقر: صار، انطيني ساعة

-اتوقع تحتاج اكثر من ساعة

رمقني بنظرة جانبية فسرتها "لا بلة" ورفع تلفونه يخبر رجاله يعرفوله وين چان شُهيب بهاي السنتين وهكذا گعدت انتظر وهو مقابيلي يتجرع من كاسته ويدخن بهدوء..

52 دقيقة ضبط مرت وجابوله الخبر الاكيد! انصدمت شلون بهالسرعة؟ بس لحظة اني هم مادري شلوني هذا صقر ريماس لخاطر الله طبعاً يگدر يجيب المعلومات اليريدها بسهولة تامة!

دخل حمايته بيده ملف مجرين عليه بحث كامل، گلبي ينبض بعنف احسه راح يطلع من صدري حطيت ايدي على معصم ايدي اتحسس نبضاتي عروقي راح تشق جلدي وتطلع وتنفجر من التوتر.. فتح الملف يقره بي وگال بلا مبالاة..

-صقر: روسيا چان بروسيا تحديداً "كازان" من سنة 2001 الى 2003 ما طلع منها

-ابد ما طلع؟

-ابداً

عضيت على شفتي السفلية اسيطر على دموعي لا تفضحني، كمل صقر يقرا بالملف بأهتمام ماگدرت اگعد اكثر راح افضح روحي حمحمت وگمت بمكاني اجذب انتباهه..

-اريد اروح للحمام من رخصتك

-تفضلي

تمشيت مثل الفراشة للحمام بس قفلت القفل عليَّ انهاريت اوگع بالگاع، اضحك بصوت ناصي مثل المجنونة بفرح بسعادة براحة وكأن حمل ثگيل فوگ صدري وانزاح معناها وصلت للخبر الاكيد اخيراً وصلت!!

**

"Flash back (قبل شهر ونصف)"

-سام: متأكدة تردين تعرفين سرور؟

-مسرة: اي سام

-واذا طلع اله ايد شنو تسوين مسرة؟!

-اسجنه بيدي!

-بس علاقتكم ممتازة هالفترة واشوف صداقة قوية تربطكم بنيتي فكري زين قبل لا تخطين أي خطوة متهورة

-لو مو صديقي لو حبيبي هم ما اتنازل عن روح امي سام!! ناري مدا تطفى كلما اصفن واتذكر شُهيب مشترك بموت امي اكره نفسيي اكره نفسي لان دا انساهة وانسى ثارهة وانسحر بهدوئه ولطافته ويايه! سام اريدك تدورلي وين چان شُهيب بتاريخ موت امي ضروري!

-صار

-لا لحظة

-شنو گولي؟

-اريد تشوفلي وين چان قبل وبعد وفاتها بين سنة 2001 الى نهاية 2002

-تم راح احاول اجيب المعلومات

هزيت راسي متوترة واطگ بأصبيع ايدي، احتاجيت اتربع احتاج افكر.. لميت رجليه اتربع على كرسي المكتب وعيوني على شاشة الكاميرات اراقب شُهيب گاعد بمكتبه يشتغل..

هاي ثاني مرة راح ندور على مكان شُهيب بهاي السنتين دور ابوية قبل كم سنة بس سجله يطلع فارغ مابي معلومات كافية خصوصاً بين سنة 1995 للـ 2006 بس هسة قررت ادور بنفسي وادخل جماعتي واعوف ابوية..

اربعة ايام سام يدور لا ليلي ليل ولا نهاري نهار شُهيب ما طايقة شوفته واتهرب منه اخاف افضح نفسي وتوتري گدامه واتعارك وياه من لا سبب..

يوم الخامس رجعلي سام ووياه ولد شاب بوقت شُهيب طلع لاجتماع بره، شايل الولد بيده حاسبة وگعد على الكرسي گدامي بدون لا يحچي شي..

-سام: هذا الولد هكر ممتاز ولگالنه المعلومات اللازمة بعد بحث دام لخمسة ايام

-مسرة: ممتاز!

اشر سام للولد حتى يبدي وصار يحچي بلغة البلد..

-الهكر: صعب ياله وصلتله معلوماته مخفية وسجله فارغ

-مسرة: اعرف اي حتى ابوية گال

-الهكر: هذا الوصلتله، شُهيب، الاسم الاوسط نمر اسم الاب جعفر واسم الام ماريا، اسم العشيرة شمسون.. مواليد الثمانينات يملك اخوان ثنين من غير ام و......

كمل جميع المعلومات الاكيدة بما معنى احنه ماشين صح والي وصلناله مضبوط.. بلعت ريگ ناشف جرح بلاعيمي من گال..

-كان متواجد بـ روسيا مدينة "كازان" سنة 2001-2002

-مسرة: ما طلع منها؟؟؟؟

-لا ما طلع بقى هناك الى 2003

حطيت ايدي على گلبي انضم دقاته راح اموت، طلبت منهم يطلعون متهمني باقي المعلومات احتاج ابقى وحدي اريد ابچي!! اريد ابچي من الفرح اخيراً ارتاح گلبي اخيراً وصلت للخبر الاكيد! شُهيب ماله ايد بموت امي!! شُهيب چان مو بنفس البلد حتى!!

**

"الحاضر"
رغم تأكدي من المعلومة قبل شهر ونص بس بعدما قوت علاقتي بي وتزوجنا الوسواس بده يلعب بعقلي واغالط نفسي اخاف.. اخاف اني سلمت نفسي لـ كتّال امي بيا عين اروح لقبرها وازورها واسولف وياهة؟

بس هسة انعاد فرحي واني مو بس سعيدة اني مسرورة لدرجة عندي استعداد اروح لصقر ريماس وابوس رااسه على هالخبر.. لا ايع اسحب كلامي ما راح ابوس راس احد غير هموسي بس المهم اني فرحانة!!

مسحت دموع الفرح الخانوني ونزلو ورتبت نفسي على الاخر وطلعت مرفوعة راس واحس روحي خفيفة وكأن هم الدنيا كله انزاح عن صدري من عرفت هالخبر ومعلومات صقر مو بس دقيقة معلوماته فوق الدقة..

-صقر: خوش معلومات حصلتهن على شُهيب

-مسرة: وبشنو راح تفيدك؟

-صقر: كلشي يفيد مسرة گالو رجالي سجله فارغ ومحجوب

-برأيك ليش؟

-ضامين شي

-مثل شنو؟

-مادري بس هنا مكتوب درس بمدرسة داخلية بـ روسيا وانتقل بعدها لغير دولة يكمل دراسته والاغرب كانت تربطه علاقة صداقة بـ موزس (موسى) وهالشي مثير للاهتمام

-منو موزس؟

-فد واحد عار يشبه شُهيب شمسون

-بعالم المافيا؟

-اي

-المهم يله اني رايحة عود ما اوصيك ارجع لخطتك الغبية واكتل شُهيب واخوانه گدام الشرطة

ضحك بصوت عالي مستهزأ وگام من مكانه اعرف هو مو من الشخصيات الي واحد يعلمهم طرق مبتكرة للاجرام هو استاذ بيهن بس بعد لازم احط روحي وانطي رأيي وهو تعود على اسلوبي..

-صقر: تلفونچ ما تردي؟

-مسرة: يا شوف نسيته والله طلعت شريف

ابتسم وسرح بوجهي ايع شبي هذا شو دولي عن خلقتي خليني ارجع لهموساتي ابررله وابيض صفحتي گدامه..

-صقر: الجو بارد بالليل لبسي هاي

نزع جاكيته يريد يلبسني ودفعتها بخفة انفي براسي..

-مو باردة سبحت بالبحر بهيچ جو وكلشي ما صار بيه

-اليوم الطقس تغير اكو عاصفة ومطر بره

-ما محتاجتها

قهقه بخفة وراح للكنتور يطلع جاكيت جديد، طلعه من كيس شفاف وانطانياه..

-هذا جديد ما لابسه من قبل لبسي

تنهدت واخذته من ايده اعرفه راح يبقى يلح عليَّ ويشلع گلبي اكره صقر بس اعترف هو حنون كلش وهالشخصية ميظهرها لأيٍ كان بس للي يهموا، لبست الجاكيت گدامه ونويت انزعها بالسيارة من اصعد وطلعنا بره الغرفة نتمشى بالممر..

-صقر: انتظر طلاقچ من ابن شمسون على نار

-خير

-بس ما فهمت ليش ردتي تكتلي؟

-ثار قديم بيناتنا

-راح تگليلي لو اعرف بطريقتي؟

-لا اگلك ولا تعرف بطريقتك حير بشغلك انتَ

-انتِ اهم من شغلي

-صقر!

-ههههههههههه ها نسيت انتِ بحسبة المتزوجة عيب اتحارش

-باي

-انتبهي على نفسچ أي مشكلة تصير وياچ لا تترددين اتصلي بيه

تركته وصعدت سيارة مصفحة تابعة اله، بس دخلت السيارة نزلت اكتافي اريحهن طول ما اني گاعدة جوه ويه صقر متشنجة ومتوترة بس ما بينت كالعادة لان لو حس بيه متوترة ولو واحد بالمية راح ياخذ هالنقطة لصالحه ويتجاوز..

ريحت راسي على الكرسي وغمضت عيوني ارتب افكاري.. شُهيب ما موجود بالسنة الماتت بيها امي بس اخوانه موجودين.. فاهد ومالك ثنينهن چانو متواجدين وعرفت هالشي لان بحثت عنهم من زمان كلش وسجلهم بهاي الفترة بي معلومات معناها موت امي اقتصر على ذولة الثنين واحد منهم سواها وفلت من العقاب بس وراكم وراكم وين ترحون؟!

تذكرت تلفوني مغلق فتحته ودگيت على شُهيب طلعلي جهازه مغلق بدون تفكير اتصلت بـ كيان فوراً جاوبتني والقلق مالي اوتارها الصوتية..

-كيان: مسررة؟؟؟

-شلونچ كيان

-اني زينة انتِ شلونچ طمنيني انتِ بخير؟؟

-اي حبيبتي، شُهيب وين اتصل بي وجهازه مغلق؟

-طالع شهوبي صارله هواي ولسه ما رجع

-اها، شعجب سهرانة كنوو الوقت تأخر

-انتظرچ ما گدرت انام ردت اموت والله حتى هاي جنات بصفي هم تنتظرچ

-جنات: هلو هلو مثرة شلونچ انتِ زينة؟؟

-مسرة: زينة حبيبتي الحلوة.. يله اني نص ساعة واوصل للفندق

-كيان: لا حبي احنه مو بالفندق ببيت ليو صديق مالك هسة ادزلج الموقع وتعاليلنا

-تمام

سديته منها ودزتلي لوكيشن بيت ليو، انطيته للسايق يتبع المسار واني ريحت نفسي على الكشنات الوره الوقت تأخر وتعبت الصار اليوم هبطني شوية واكثر شي خفت على كيان وجنات خفت جماعة صقر الكلاب يستفردون بيهن من يعرفوهن تابعات لـ ولد شمسون..

وصلت للموقع الدزته كيان واستغربت من شفتها قرية، هنا كلش باردة فرق عجيب بالطقس وبدت تمطر خفيف بس ما اهتميت وطلبت من السيارة توگف على بُعد من البيت ونزلت اتمشى آملة شُهيب يكون راجع للبيت او نايم او هادئ وراح يتفهم الصار بدون لا يعصب وميروح باله بعيد و....

تبسمرت بمكاني ابلع بريگي واني اشوف شُهيب واگف بباب بيت بهالبرد شعره مبلل من المطر و ايده بجيوب بنطرونه الجينز وباقي بطرگ التيشرت النيلي.. گطوف جگاير كومة جوه رجليه وحواليه دليل على كم جگارة دخن بغيابي وهو ينتظرني هنا..

-شُهيب

رفع عيونه بسرعة ناحيتي ملامحه تقرا تفاجئ وقريت الراحة بيهن لـ جزء من الثانية وهالشي خلاني ابتسم شهوبي قلق عليَّ وسهر هنا ينتظرني، فوراً تغيرت نظرته للبرود وركز يباوعلي تقربت منه صرت مقابيله ضبط واردفت بأبتسامة..

-ليش سهران؟

-وين رحتي؟

-اني بخير چنت ويه صقر نتناقش بموضوع يخص ابوية اكو مشكلة صايرة عنده بالشغل وبس صقر يگدر يساعدنا

نظرلي نظرة "تشوفيني غبي گدامچ؟" بلعمت ماعرف شحچي لاول مرة بحياتي نظرته ذبحتني ونظرته وهو يباوع لجسمي خلتني استغرب، نزلت عيوني اباوع شبيه وطخت عندي اني لابسة حاكيت صقر ونسيت انزعه بالسيارة!!

-شُهيب: الحمدلله انچ بخير، تصبحين على خير مسرة

-شُهيب لحظةة

لزمته من ايده بسرعة اوگف حركته، اندار عليَّ يباوع بعيوني نظرته الباردة دمرتني وكأنه لابس درع على عيونه يمنع يكوّن بيها أي مشاعر.. تلمست اطراف اصابعه المثلجة ولاحظت شعر جسمه كاش من البرد..

-مسرة: هذا الجاكيت اخذته من صقر جديد والتاگ بي (العلامة) بس لان كلش باردة چانت وحسيت راح يوگف گلبي لبسته وقسماً بالله هو ما لابسه قبلي

-تمام زين تسوين

-شُهههيب

-نعم؟

-شُهيب شبيك بارد ويايه جاي اگلك رحت ويه صقر لان ابوية عنده شغل وطلب مني احچي وياه اول ما احصله انتَ تعرف صقر ريماس صعب يتحصل وصارلي ايام انتظره يجاوب اتصالي وهسة شفته گدامي وطلبت منه نحچي

-اي زين

تخبلت ديسلكلي ويريد بس يروح من عصبيتي والنار التچوي گلبي صرخت بنتر..

-قسماً بجااه الله ورااس بنتي ميس وماكو اعز منها بحيااتي ماكو أي شيي ببالك بيني وبين صقر مجرد طلبت منه مسااعدة وهو قبل يساعدني واكيد راد مقابل بس مو نفس المقابل الي براسك احرگ روحي ولا يلمسني رجال غيررك افهمم عااد!!

عيونه غيمت وذاب الجليد الي بيها دفع ايده مني بقسوة ولزمني من ياخة الجاكيت اللابستها يقربني عليه يلزگ وجهي بوجهه وينتر بيناتنا..

-احرگه قبل لا يفكر يلمسچ مسررة ونزعي هاي السترة ال***** لا اشگهاا علييچ

نترها متقزز وعافني ودخل للبيت بقيت هنا مثل الغبية بالمطر والجو البارد صافنة بكلماته، شنو ديفكر بي؟ صدگني؟ بعده معصب؟ شلون اقنعه ما صار شي وشلون اثبتله؟ بالحقيقة ما ضجت منه ولا زعلت اني لو بمكانه وصاير هيچ موقف هم اتخبل عليه ومليون فكرة تجي براسي لذلك تنهدت ونويت اهدأ وادخل جوه وهي تصفى..

طبيت للبيت اظلم تمشيت بي الى ان وصلت لغرفة بدون تفكير طبيت بيها ولگيت جنات وكيان گاعدات وواضح ينتظروني..

-كيان: اخيييراً

-جنات: الحمدلله على الثلامة حبيبتيي والله ظل بالنا عليج

-مسرة: الله يسلمكم بنات

حضنوني ثنينهن بحنية وحدة تمسح على ظهري والثانية على شعري تفاجأت من حركتهن بس ابتسمت وشاركتهن الحضن..

-مسرة: اسفة لان راح اقطع هالحضن الهوت بس احتاج اروح للحمام لا اسويها على روحي هنا

ضحكن وتركني يوگفن على جهة، دلوني الحمام ورحت بسرعة كملت وغسلت ايدي احس بعطش فضييع عرفت المشكلة من سكري ارتفع، شربت دولكة مي وما ارتويت راحت جنات ترجع تعبي الدولكة من جديد وهم شربت منها تمددت بمكاني تعبانة وعيوني مغوشة ما شوف زين وما جايبة علاجي..

-كيان: مسرة تحتاجين علاجچ رايحة للولد اگلهم

-مسرة: لا بس انام اصير زينة

-جنات: بث مو زين عليچ تبقين هيچ

-اني بخير بنات

ارتاحيت من ما لحوا عليَّ ولا سألوني شنو صار من رحت ويه جماعة صقر، غفيت وحسيت مرة ثانية على دفو وايدين حنونة تحاوط خصري حسيته حلم بس عطره غلف خشمي وعرفته حقيقة من تنغز خدي من لحيته..

ابتسمت واني نايمة عرفته ميعوفني وحدي وما اهون عليه حطيت ايدي فوگ ايده المحاوطة خصري وتمتمت بأسمه مسح على ايدي بلطف وهمس..

-شُهيب: ارتاحي

همست بخفوت وعيوني باقية مغمضة..

-شكو اجيتني ماحبك

-حبيني بس اليوم

-ليش

-ماگدرت اسمع بيچ تعبانة وما اجي اتطمن عليچ

-من وراك

-اني اسف

فتحت عيوني وانداريت اواجهه، تلمس خدي وداعب انفي بأبهامه..

-شُهيب

-ارتاحي مسرة ولا تشيلين هم لشي

-ما اگدر ارتاح وانتَ ضايج مني وما مصدگني

-مصدگچ اني ومصدگچ لدرجة خفت يسويلچ شي هذاك الكلب وقضيت اربع ساعات افتر بشوارع مدريد مثل التايه ادور ريحتچ

-ما سوالي شي والله

-استغربت بس الحمدلله

-استغربت لان صقر ما اذاني؟

-اي

-ابوية دافعله حتى يبتعد مني ويحاميني بنفس الوقت وميأذوني لا هو ولا رجاله

-وصلت الفكرة

-شُهيب

-عيوني

-اعرف عندك هواي اسئلة بس اريدك تعرف شي واحد

حرك راسه بأهتمام يشجعني اكمل، دايخة كلش ووضعي مو تمام بس ما ردت احسسه واقلقه غمضت عيوني وتلمست خده امسح على لحيته وهمست بيني وبينه..

-اريدك تعرف اني مستحيل اأذيك اطلب منك تثق بيه ربع من ثقتي بيك لاني مستعدة اسوي المستحيل حتى تبقى بخير مو علمود شي بس لان مابيه حيل ابچي عليك اذا متت

تنهد وعلى اثر تنهيدته المتعبة فتحت عيوني وجهه ميبشر بخير والاسئلة تنطط على راسه وجبينه احسه مهموم ومغموم واتوقع عرفت السبب.. السبب اخوانه ونظراتهم المليانة شَك الي، ابتسم من شافني صافنة عليه وگال..

-يومية عايدتها صدگ راح اموت من وراچ

-اسم الله عليك يوم صقر قبل يومك ان شاء الله

-ارتاحي مسرات نامي وخلي راسچ بارد

-تعبانة

-عسى كل تعب الدنيا بيه ولا بيچ اموت ولا اشوف احد يأذيچ مسراتي

ابتسمت على جملته الاخيرة ورجعت اغفى بهدوء وسلام مرتاحة...

**

"كيان"
خفت على مسرة لا تتخربط بالليل ورحت لـ شُهيب ابلغه، گال راح ينام هناك يمها ويفرش بالگاع يمكن تحس بالليل وتحتاج شي، فرحت لانه ابدى اهتمام واخذت جنات وطلعنا ننام بالصالة..

الصبح حسيت قبل الكل وگمت اسوي الريوگ، دقيقة دقيقتين وفزت جنات من ما شافتني بصفها ابتسمت على شكلها حجابها اعوج وعيونها بيها النوم بعدها نعسانة وتعبانة بس گامت..

-كيان: لو مكملة نومتچ بعد وكت تره

-جنات: ماگدر بعد

راحت للحمام ورجعتلي تساعدني بولا شي بس واگفة وتدردم ما عاجبها العجب، سكتت من سمعنا صوت گحة فاهد القوية من الممر حطيت البيضة بالطاوة واللتفتنا عليه جاي من ورانه..

-فاهد: صباح القرف على وجوهكم

-جنات: صباح الحموضة

-فاهد: حبيبتي حبيبتي شكراً

-كيان: فاهد كم بيضة تريد؟

-فاهد: وجع هاي بدال صباح الخير حبيبي صباح الخير ابو بيتي صباح الخير يا منقذ شرفي وعفتي صباح الخير ابو ز***

-كيان: صباح الخير وحط اخر كلمة گلتها وياهة

-فاهد: طاح حظچ فوگ حظي الطايح

-كيان: ولي لعد لو تموت ما اسويلك بيضة

-فاهد: لا تسويلي هسة الملك يسويلي

طلع مالك من الممر صبح علينا وفاهد چيت على ظهره يطفر عليه يخلي مالك يشيله..

-فاهد: وللللك ماي بيگ براااذررر

-مالك: فاهد ظهري انخسفف فاااهد

-فاهد: البارحة احلى نومة نمتها ولچ كيان اني ومالك نمنا بنفس الغرفة تخيليي

-مالك: ولك انززل باباا

-فاهد: شيلني حمل باشي مَلك شيلنيي

-مالك: فااهد راح اشمرك بالگااع

-فاهد: حممل بااشيي جنات سوت بولة بفرااشي

-جنات: ووووولك

-فاهد: احبچ جنات

رگعه مالك بالحايط حيل فاهد فوراً هد ايده وصاح متألم ويضحك بنفس الوقت ويمسح على چتفه الي تأذى..

-فاهد: خلي روحك رياضية مالك واذا احب مرتك تره عادي

-مالك: انچببب فاهد لا تنرفزني من الصبح

-فاهد: عود انتَ هم حب مسرة قيثارة ويه شُهيب اني اقبل

-كيان: وانتَ منو وتسمحله يحب بمسرة؟!

-فاهد: حماها والي كامل الحرية

-جنات: خوو خلي يحب مرتتك

-فاهد: لااااا الا شرفي وعرضي الا كوريتي ما اسمح لاحد يحبها

-جنات: مو حق هذا!

-مالك: جنات! هو مخبل وعقله ضارب انتِ هم تتخبلين مثله؟؟

-فاهد: اي جنات اني مخبل وعقلي ضارب انتِ هم تتخبلين مثلي؟

-جنات: اووووووف راح اطططگ كياان شلون متحملته هذااا

-كيان: حظي المصخم ربطني بي

-فاهد: هلا هلا هلا كورية يا كورية شحلاها الجنية

يطگ اصبعتين ويغني ضحكت اهز براسي مأيسة منه وجنات مكشولة لعبانة روحها ومالك يضحك علينا..

بينما احنه الثلاثي ضد فاهد انفتح باب البيت وظهر منه شُهيب بيده علاگة بيها خبز وعصير والعلاگة الثانية مال صيدلية..

-كيان: هلو شهوبي صباح الخير مچنت ادري بيك گاعد وطالع

-شُهيب: صباح النور حبيبتي، طلعت اجيب خبز وعلاج لـ مسرة

صارت لحظة صمت بعدما نطق اسمها، مالك وفاهد واحد ظل يباوع للثاني وشُهيب ما اهتم وعبرهم يروح للغرفة النامت بيها..

-فاهد: مسرة رجعت؟!

-مالك: رجعت بدون اضرار؟!

-كيان: اي البارحة رجعت بالليل بس چانت كلش متخربطة سكرها معلگ

-مالك: شلون طلعت من صقر ريماس سالمة؟!!

-فاهد: سؤال وجيه صعب يستحق صفنة ابو صابر

-مالك: شنو الي صار وخلى صقر يعوفها بحالها؟!

-فاهد: سؤال صعب اخر هذا ترك

-مالك: تتوقع بيناتهم شغل؟! شوف اني گتلك هاي البنية مو خالية بس اذا طلع اكو شغل مشترك بينها وبين صقر معناها انلاست!

-فاهد: "انلاصت" عزيزي شنو مشكلتك ويه حرف الصاد؟

-مالك: فاهد انتَ جاي تتخيل خطورة الوضع لو لا؟ اذا ايد مسرة بـ ايد صقر معناها شُهيب انتهى! راح بين الرجلين فاهد شاركني رأيك بسرعة!

-فاهد: مالك شو اسئلتك صعبة ما قريت هيچ شي بالمرشحات

-جنات: ههههههههههههههههه حلوة فاهد حلوووة

-فاهد: جنات مو وكت تحشيش حبيبتي راح ارسب سكتي خليني اركز

-جنات: صوچك ما قريت الوزاريات

-فاهد: اي والله بس شمعرفني راح ينچلبون علينا بالاسئلة

-جنات: كلشي توقع منهم تدري اني بسنتي طيحو حظنا جابولنا اسئلة من جوه الگاع

-فاهد: يعني نفس أسئلة مالك؟!

-جنات: ياااا اصعب

-فاهد: لا انلاست

-مالك: اني ويييين وذولة ويننن

سكت الكل من طلعو مسرة وشُهيب من الغرفة نظرات مالك الها تجدح جدح حتى ريوگ ما قبل يتريگ گام وطلع من البيت بقينا وحدنا ناكل وفاهد يداهر جنات وهي ترده بكل مرة رد اقوى..

يومين بقينا ببيت ليو ومحد فتح الموضوع ويه مسرة حتى مالك سوه الموضوع عادي وطبيعي، يوم الثالث ليو رجعلنا واكد صقر ريماس سافر لـ بلجيكا واحنه مو بباله بعد ضحكت جنات بقوة تصفگ بيدها وتگول..

-جنات: شمثوون راح يتخبل من يعرف ما صارلنا شيي ههاااهههاااهههااههاا

-فاهد: اي وشرفي هههااههااهههاا

-كيان: على كيفكم لا تتونسون زايد بعد النا يومين هنا الله يستر شنو يصير

-مالك: عادي خلي يصير مسرة تطلعنا منها بسهولة

رفع حاجبه وهو يگول هالجملة الي استفزت شُهيب بس واضح ما اثرت بـ مسرة لانها ردته..

-مسرة: تدلل حمايه العزيز

-مالك: يعني تگدرين تطلعينا من الخطر؟

-مسرة: مو اكيد بس احاول

-مالك: شلون صقر ريماس اقتنع يعوفنا؟!

-مسرة: والله مادري روح سئله

-مالك: ما يتحصل حتى اسئله

-مسرة: راح اتوسطلك بلكت يحن عليك ويجاوب اتصالاتك

-فاهد: بوووووووووم حلوة حلوة

-مالك: مو وكتها فااهد! مسرة انتِ شلون طلعتي من صقر بدون اضرار جانبية؟! لا تعب نفسي ولا جسدي؟؟

-شُهيب: ابو مسرة دافع لـ صقر وبيناتهم اتفاقية تخص حياتها

-فاهد: واااااااه؟؟؟

-مالك: ليش متفقين وياه هيچ اتفاقية؟! وشمعنى صقر ريماس بالتحديد؟؟

-مسرة: مالك ولا چنك رجل اعمال بديت اشك بيك تره

-مالك: ما فهمت؟

-مسرة: اغلب رجال الاعمال المعروفين يدفعون، محد يمشي على طوله طبيعي بدون اتفاقيات بين العصابات ويترس حلگهم فلوس حتى يعوفوه بحاله ويعوفون اولاده بدون لا يخطفوهم او يعترضون طريقهم؟

-مالك: اعرف بهذا الشي

-مسرة: وهذا الصار ويه ابوية وصقر او بالاحرى ويه ابو صقر لان ابوه چان موجود بوكتها من انخطفت ورجعوني لابوية ااااه اتذكر هذا اليوم زين واتذكر ابو كشة مكوكش على راسه الذبان وهو يگلي لو تدفعولنا كذا مبلغ لو...

لزم ايدها شُهيب بسرعة يعصرها حتى تتوقف عن الكلام، ما فهمنا ليش هيچ سوه ولا من مسرة ضحكت وگالت..

-شبيك هموسي ما راح اذكر ذاك الموضوع چنت دا اگول گلي تدفعولنا كذا مبلغ لو اذبحچ وابيع اعضائچ

-جنات: يممممممة صدگ تحچين؟؟؟

-مسرة: نعم نعم

-كيان: وشنو سويتي؟؟؟

-مسرة: تفلت بوجهه

-كيان: مستحححيل!

-مسرة: وراهة تقيأت عليه

-جنات: وشصار وراهة؟؟؟

-مسرة: كفخني لحدما تزلغت خدودي والله ايام جميلة چانت

-مالك: ومنا ابوچ اتفق ويه ابو صقر؟

-مسرة: يب لان همه الي رجعوني لو باقية على ابوية يظل ينوح ويبچي عليَّ لحدما اموت

-فاهد: ما مبين ابوچ فاهي؟

-مسرة: مو فاهي بس متعلق بيه وتخبل من عرفهم خطفوني عباله متت لولا تدخل ابو صقر الله لا يرحمه ولا يغفرله وكرف كومة فلوس وطلعني ومن هذاك اليوم لهذا اليوم ابوية يدفع لصقر وره ما ابوه مات حتى يحافظ على حياتي

-مالك: مثير للاهتمام

-مسرة: كلش مو؟

-جنات: مالك خو انتَ هم ادفع لهذا صقر مادري بلبل حتى يحافظ على حياتك

-فاهد: لا مترهم

-جنات: ليش؟

-فاهد بغمزة: مو كلنا عدنا وجه حلو مثل مسرة قيثارة

خزره شُهيب بحدة ضحك فاهد يصفگ بيده وضحكت مسرة وياه..

-مسرة: اوووي فهود فديتك شگد غثيث

-فاهد: يروحلچ سحل شُهيب

-شُهيب: انتَ الراح تنسحل اليوم!!

لزمه من خوانيگه وجره ينزله انضرب وجهه بالطاولة بقوة صاح فاهد متوجع وديريد يرفع نفسه ورجع ضربه شُهيب بنفس القوة يرگع راسه من جديد..

-فاهد: ااااااخ اشتعلتتت امممك

-مالك: كافي گعدو راحة

-شُهيب: ربي اخوك الزعطوط خلي يبطل رعونية

-مالك: تمام

-فاهد: مااالك هاي بدال ما تفزعليي!!

-مالك: انتَ تتحارش گوة

-فاهد: اكرهكممم وانتَ شُهيب ابن ماريا العااار اني اعرف شلون اضغطك الا ابووس اختك!!

-شُهيب: ولي هناك لا تراويني وجهك

-فاهد: تعالي كيان ابوسچ على عنااده

-كيان: يوووه دگعد فاهد مو وكتها

بقى يدردم ويضرب بالكوشات والقنفات ويفشر ويغلط ويسب يتعارك ويه روحه، غلس عليه شُهيب يكمل يشرب قهوته ومسرة تبرد بأظافيرها جايبة المبرد وياهة وجنات تعلس بـ جلاتين مسرة الجابه الها شُهيب ومالك يطگطگ بالتلفون واني صافنة على الكل..

رجعنا للفندق لليل شمسون اتصل بـ فاهد يريده يبشره شصار ما صار وفاهد ما سكت رزل ابوه رزالة غسسسل ولبسس..

-فاهد: شنو تريدها ترجع حامل؟؟ يعني گوووة؟؟ بعد اذا الله يريدها تحبل راح تحبل لو حتى على امر الله تعترض وتريد تحط خشمك الچبير؟؟

-شمسون: تممت زواجك منها لو لا حاوب بدون لغوة زايدة

-فاهد: وانتَ شكوو؟؟ انتَ منو وحاط روحك وياي بابا دروووح

-شمسون: فهدي لا تتعصب واحچي بأدب ويه ابوك عيب هاي التصرفات انتَ متربي

-فاهد: كيان لا تخترعين

-كيان: ليش؟

-فاهد: اريد أجره بزيج

-شمسون: بابا بعدك على هاي سوالفك؟! المهم نريد نشوف جهالك شد حيلك

-فاهد: مو خاف ينگطع

-شمسون: هههااههااههااههاا ما ينگطع ما ينگطع انتَ سبع

-فاهد: عود خوش

-شمسون: شخبار مالك؟

-فاهد: ما تتصل بي شمعرفني اني نايم وياهم بالغرفة!

-شمسون: ما يجاوب مزاعلني

-فاهد: ههههااهههااههااهههاا حيل بيك

-شمسون: هاا تتشمت بأبوك فاهد وبگت حتى ضحكته

-فاهد: ابوگك كلك بس اصبرلي

-شمسون: عسل على گلبي وليدي السبع، شوفلي مَلك وبشرني

-افحصه؟

-اذا تگدر ياريت

-كيان: شتفحص ولك؟!!

-فاهد: حبيبتي كيان كوريتي الجميلة هاي امور خاصة عيب اسولفها الچ بس راح اسولفها اروح لـ مالك واجر....

-كيان: اشششش اشششش شبييك اسكت ماريد اسمعع

-فاهد: ماذا دهاها يا ترى؟

-كيان: كمل ويه ابوك وعوف مالك لا تلعب نفسي

-فاهد: ردت اگلچ اروح لمالك واجري معه محادثة صراحة وافتهم سالفته انتِ وين راح بالچ؟

-شمسون: كيان بالك وصخ ابني بس مو جديدة عليك هالسوالف

ضحك وره جملته المبطنة، بلعت ريگ واحس خدودي ولعت من فاهد غمزلي وهمس يضم السماعة بأيده..

-شنو قصده؟

-كيان: شمدريني فاهد مادري انيي راح ابدل حتى نطلع

دخلت للحمام وقفلت عليَّ الباب گلبي يدگ بقوة حتى النفس راح مني خفت شمسون يحقر ويايه ويحچي لفاهد عن فيديو مالك..

بدلت ملابسي وطلعت للغرفة شفته مكمل ويه ابوه وواگف يتأمل روحه بالمراية..

-كوري تعالي تعالي

-ها

-مو چني اشبه مالك شوية؟

-لا منيلك

-لا والله شوفي احس ملامحي تنطي شبه شوية

-لا فاهد متشبه مالك شُهيب شوية ينطي شبه اي خصوصاً....

-لا!! اني اشبهه باعيليي زييين عيوني تشبه عيوونه موو؟؟؟

ابتسمت واني اباوع لعيونه المترقبة جواب شافي مني، فاهد مابي ذرة شبه من مالك الي يشوفهم مستحيل يگول عنهم اخوان..

-كيان: صح والله ما انتبهت تدري هسة ياله لاحظت

ابتسم ابتسامة واسعة يحرك براسه فرحان، ضحكت بگلبي يربي بكلمتين ينضحك عليه عيونهم متشبه بعض ولا نتفه مالك عيونه واسعة ولونهم بني غامق وفاهد عيونه حادة وكلش صفر..

-فاهد: يا بختي يااا بختييي ههههههههههههه

حضني يعصرني فرحان، ضحكت وياه على الواهس من باس خدي قوي وگال..

-انتِ احسن صديقة بالدنيا كوري حتى لو نتطلگ ما راح اعوفچ بحالچ راح ابقى لازگ بيچ واضغط اخوانچ الجرب

-هههههه خوش

كملنا تبديل وطلعنا كلنا سوه نتعشى وانوب رحنا لحفلة على البحر گعدنا بيها خمس دقايق وشُهيب ما قبل نبقى بسبب الاستهتار الصار شرب ورگص وناس متفصخة وعريانة وسوالف طيحان حظ اخذ البنات وياه وگال لمالك وفاهد اذا يحبون يبقون براحتهم بس ما قبلوا وگالو يجون ويانه..

احس بـ تعب وكل دقيقة اتلفت اشوف وراية خاف اكو احد يلحگنا، بالي مشغول وافكر لا ننغدر مرة ثانية وبنص تفكيري شهگت بصوت عالي من حسيت بأيد تحاوط كتفي..

-فاهد: على كيفچ

-كيان: خفت فاهد

-ادري لاحظت، لا تخافين اني يمچ

ابتسمت ممتنة وملت براسي على صدره العريض، تمشينا على هالوضع وچانت الاجواء اجمل من الجمال بنفسه قبل لا يگول..

-فاهد: مو راح يصير بيچ كساح من هالمشية العوجة

-كيان: لاازم يخرب الأجواء لازم

-فاهد: ههههههه اختصاص تخريب اني كوري اخرب كلشي حلو

-لا تحچي هيچ على نفسك

-ليش؟

-لان كلامك مو صحيح ووجودك مهم سواء عندي او عند اخوانك

خنس صوته رفعت راسي اشوف ملامحه جامدة عكس فاهد المفرفش الفرحان اليضحك للهوا..

-فاهد

-عيونه الصفر

ابتسمت وهمست بخفوت وكأني خايفة احد يسمعنا..

-تدري بـ مالك يحبك هواي

ابتسم ونزل عيونه عليَّ مترقب مني المزيد، نويت انطي الي عرفته والسمعته خلي يفرح شوية..

-والله جنات تسولفلي مالك يشوفك ابنه مو بس اخوه يموت عليك وميقبل احد يزعلك ويضوجك وگالت اوقات يسوي شغلك بدون لا يحچيلك حتى يخليك ترتاح وهو يتعب نيابة عنك

هز راسه مبتسم ابتسامة واسعة، اللتفت يباوع لـ مالك المشغول يحچي ويه جنات ويأشرلها على المباني واضح ديحچون على شوارع مدريد ورجع وياي على الخط..

-فاهد: ادري بهذا الشي لگفته كم مرة مسوي شغل نيابة عني هارون يگلي

-محظوظين ببعض انتو

-كلش

-شكراً فاهد

عگد حاجبه مستفهم سبب شكري اله بس مادري ليش تشكرته حسيت احتاج اگله شكراً واعبرله عن السعادة الغريبة الي اجتاحتني..

-فاهد: على شنو شكراً؟

-لانك ما ضغطت عليَّ بموضوع الاطفال ووگفت ابوك عند حده

-هاا على هاي

-اي

-يمعودة عادي شمسون وحده يمض***

-ههههه اي شكراً فهود

-كافي تتشكريني

-ليش

-مو گتلچ ماحب

-تعود لان اني احب اشكر الناس

-شلون تعلوم راح تعلميني بعد اليسبني اگله شكراً

-هههههه مو لهدرجة ولك

-انعل ابوك لابو الجابك فاهد.. واني اگله شكراً انوب يجي واحد يصيحلي ابن ال***** واني اگله شكراً وراهة يكتلوني ويشگوني نصين واروح اگلهم شكراً لان كتلتوني

-ولك مو هيييييچ

وصلنا لـ محل مفتح بين كل المحلات المعزلة وفاهد ومالك وگفو گدامه، واحد باوع للثاني وضحكو ومالك اندار على شُهيب الي ابتسم..

-مالك: تتذكرون شباب؟

-فاهد: شلون انسى اول وشم وشمته هنا

-مالك: بوكتها اني وشُهيب وشمنا عنده وفاهد گام يبچي مثل الجهال يريد هو هم

-فاهد: اي غرت منكم بيومها وخليتهم يوشمولي اربع وشوم نفس وشوم مالك

-مالك: شُهيب؟

-شُهيب: لا يمعود

-مالك: بشرفك

-شُهيب: لا البنات ويانه

ما فهمنا بشنو ديحچون بس وصلت الفكرة من فاهد دگ رجل الا يفوت ويوشم شي عرفت مالك ديقنع شُهيب حتى يوشمون سوه بس احنه صرنا عقبة بطريقهم..

-مسرة: فوت شُهيب انتَ هم اوشم شي

-شُهيب: لا ماريد اوشم

-كيان: خلينا نفوت حبابين بس اريد اشوفه من جوه

من بعد تقنيعات قبل شُهيب ندخل المحل مو كلش چبير ومابي كادر نسائي بس ثلاث رجال كبار بالعمر سلموا عليهم الولد وذكروهم بنفسهم واحد بيهم تذكرهم واكثر واحد ميزه شُهيب لان وشم عدهم اكثر من مرة وشكله ما متغير عن قبل هواي..

-جنات: اريد اوشم

-مالك: انتِ؟؟

-جنات: اي اريد

اعترض وگال ماكو نساء هنا وشلون يوشمولها بس أصرت توشم سوتلي واهس وحبيت اني هم اوشم بس ما حچيت لان ادري بـ شُهيب يطيح حظي، اخير شي مالك اقتنع هو يوشم لـ جنات لانه رسام وايده ثابتة.. دخلو بغرفة صغيرة واني ومسرة صار عدنا فضول نشوف ورحنا وياهم..

گعدت جنات على كرسي وتمددت بمكانها رافعة راسها، ضربتها على خدها من گالت تريد الوشم على عظام ترقوتها توشم نفس الجملة الواشمها مالك على رگبته من وره..

-كيان: ادبسززز

-جنات: شببيچ عجبتني الجملة حبيت معناها

-كيان: مو انتِ متدينة حرام توشمين!

-جنات: لا الوشم مو حرام عدنا يا فهيمة

تمددت عدل ووخرت القميص عن كتفها، حضر مالك الجهاز الي عبارة عن ابرة دقيقة جداً ونصى نفسه عليها يهمس بخفوت..

-جاهزة؟

بلعت ريگها وحسيتها توترت واتوقع السبب من قربهم توترها خلانا كلنا نتوتر واني ومسرة ظلت وحدة تباوع للثانية..

-جنات: على كيفك مو توجعني

-مالك: اطلع القضى والمضى

-جنات: ماااااااااالك

-مالك: وسمممم بعدنا ما بدينا

-جنات: والزهرة افضحك هنا لو ترعنت ووجعتنيي على كيفك لا تضغط حيل على رهاوة ايدك

-مالك: شوف منو يحچي بالرعونية بعدچ بطول زري وتدور وشوم

-تره انتَ وشمت وعمرك 14 سنة!!

-لان حياتي زبالة انتِ المن واشمة

-تضامناً ويه حياتك الزبالة شبيك

-اويلي يالحنينة

-حنينة لو خنينة ههههههههههه

-ناميي ناامي لا تسمعيني صوتچ

-شبيك تعيط عليَّ گدام البنات مو عيب عليك؟

-صبري حبابة جنة يله حبيبتي

-ماا وخر بعد ماريد زعلت

-بعد احسن

-لاا وين اتشاقى شبيك ملاك روحك بخشمك چنك مرة حبلة بشهر التاثع

-تسكتين لا اطلعچ حا...

سكت بعدما ادرك چفص چفصة شكبرها عاف جنات الصافنة واندار يباوع علينا عاض على شفته واحنه الصلفات بقينا ممهتمات نريد نشوف وشم جنات..

-جنات: خو شفتنا شگد ثاقط وثرثري وفاثق وثافل شفتنا؟؟؟

-مالك: شافن بس ثبتي

-جنات: يله ثبتت اي.. يا علي يا محمد يا فاطمة الزهراء يا ام الحثن يا ام البنين يا خديجة بنت خويلد يا فاطمة بنت مـ...

-گومي جنات

-ها شبيك

-وترتيني شبييچ

-مو اخاف

-تخافين شكو توشمين لو هي هيلگة؟!

-اي

-وجعييي

-راح ازعل عليك وما انيمك يمي اليوم

-هااا حلووو

-لا لا يمعود صدگ چذب اتشاقة ههه اوگف افكر بغير عقاب

-سكتي وثبتي خليني اركز

سكتت عاصرة عيونها ومگزگزة على اسنانها منظرها يخرب من الضحك مجرد وگفنا يمهم دقايق متنا من الضحك على سوالفهم والله مبينة حياتهم وناسة..

رش على جلدها كحول يعقمه وبده يوشم على جلدها بكل تركيز جملة عميقة المعنى مكونة من ثلاث كلمات "𝐉𝐔𝐒𝐓 𝐎𝐍𝐄 𝐋𝐈𝐅𝐄"..

سواها صغيرة كلش وناعمة كمل وفتحت عيونها جنات تريد تشوفها بالمراية متحمسة، جرت المراية تطلع وشمها وصرخت بهمسة..

-الله ياااااخذك هاي شنوووو

-مالك: وشم

-وشمه بعيننك هذاا شنو هذا مال زعاطيططط شگدووته اصلاً ما مبين!!

-بالعكي كلش حلو لعد شتردين؟!

-اريده چبيير وواضح هيچ مال شقاوات شلون انتَ!!

-حتى تصيرين صاحبي حيدر سكتي سكتي

-ماا ماا مالك ماحبيته مااريد

-مسرة: جناوي بالعكس كلش حلو نازك وناعم سويتيلي واهس اوشم

-كيان: حتى اني بس خايفة لا شُهيب يطيح حظي

-جنات: يعني حلوو؟

-مسرة: يجنن

-كيان: يخبل

-جنات: اي والله حلو الله عاشت ايدك ملوكي

-مالك: مو علساس مو حلو؟؟

-جنات: لا هثة صار حلو ما طول البنات عجبهن

-مالك: مسطية

ضحكت بخفية تحرك بچتافها وهو يضحك وياهة، شكل الوشم كلش حلو ومغري بنفس الوقت حتى مالك ابدى اعجابه بي وهمس بخفوت لقطته اذاني..

-مالك: تعرف وين تحط الوشوم بنت الكلب

-جنات: ولك لا تغلطط على ابووية گدام احد

-مالك: محد سمع بس انتِ فضحتينا هسة!

-جنات: اگلك عليك الزهرة ام الحثن مو حلو الوشم ويرعط؟؟

-مالك: كلش

-جنات: اويلااااي يملخخ

غطى الوشم بشاش يمسح الدم ما تأذت اصلاً ومكيفة وگالت ايده خفيفة، غطت نفسها وعدلت حجابها وطلعنا وياهة بره الغرفة، صار دور الولد كلمن گعد على كرسي وبدو يوشمولهم كل وحدة بينا اختارت وشم معين لزوجها وسووا على هذا الاساس..

مسرة اختارت لـ شُهيب يوشموله على صدره نص جنح فراشة والنص الثاني حية طالعة من الفراشة تخترقها، گالت بضحكة وهي تتأمل الرسمة..

-مسرة: تعبر عنك هاي الرسمة بالوجه مراية وبالگفه سلاية مثل الحياية

ضحك وخلاهم يبدون يرسموله، بينما فاهد اختاريتله جمجمة اسد الرسمة فخمة كلش وجذبتني، بس الوشام حار وين يوديها فاهد جسمه كله وشوم من فوگ ليجوه فـ وشموها صغيرة كلش بالفراغات بين وشوم رگبته واذانه..

ومالك جنات اختارتله شبكة عنكبوت وقبل يوشمه، مينسمع غير صوت الالات الحادة تخترق جلدهم ترسم الرسمات الي عجبتنا، الاجواء ولا اروع ومن كملو رسماتهم تخبلت وردت اوشم بس مترددة وخايفة همست بيني وبين فاهد بخفوت..

-فهيد اريد اوشم

-فاهد: شنووووووووو كياااااااااان ترديييييين توشميييييين وشممممم وتخربييييين تربيييييية شُهيبببببب التعب عليچ بيهاااااا مو حراااامااااات

-شُهيب: صدگ تردين توشمين كيان؟!

-كيان: لا لا هذا چذاب معليك بي ماريد اوشم

-فاهد: هااا يجوز لعد اني سمعت غلط

-كيان: اي اكيد سمعت غلط

-فاهد: اي اي اكيد كوريتي الحلوة اكيد

سويتله اني اعلمك بيدي وخزرته ضحك مستمتع وطلعنا من المحل وبنفسي بقى الوشم، طنگرت مزعوجة من تصرف فاهد الغبي قبل شوية، حط ايده على كتفي وهمس بيناتنا..

-لا تضوجين كوري لا تشوهين جسمچ بالوشم

-جنات سوته ويجنن!

-جنات غبية صارت چنها صاحبي جعفر بس انتِ كلچ انوثة

-تره جنات وشمته يخبل والله فد يجذب وحلوو حتى مالك انعجب بي

-والله؟

-اي والله بس اوگف

-شنو

-جنات محجبة خاف حرام هيچ احچي؟

-لا عادي عادي مثل بنتي هاي الگملة

-لا ولك خاف متقبل هي بس غلس لا تگوللهة ولا تگول لمالك تره يطيح حظك

-اني شعليه انتِ حچيتيلي!!

-اي بس ميحچي ويايه مالك شي انتَ راح تترزل نيابة عني

-شگد چلبة

-ههههههههههههه شكراً

-هههههههههههههه غبية انتِ هم شكراً

-لا انتَ شكراً

-اشو الا انتِ شكراً

-ماكو انتَ شكراً واسكت

-يله راح اسكت

تمشينا نكمل طريقنا للفندق توادعنا ويه البقية وصعدنا لغرفتنا، لبست تراك وطفرت على الچرباية وفاهد راح يصبله مشروب..

-ليش تشررررب

-راسي يوجعني

-وخر ممنوع تنام بصفي تلعب نفسي

-بس كاس كوري لا تبالغين

-لو كمعة هم تلعب نفسي وخر

-يله عمي ذبيناه

حطه على الميز بدون لا يشرب منه واجه يگعد على الچرباية بصفي، تمددت اريح نفسي والله دنتعب هنا بس وناسة والاجواء حلووة كلش..

-شبيك فهيد

-مابيه شي

-شو عبالك ضايج

-مالك

-شبي؟؟

-گلي عنده موضوع مهم وياي غير قابل للتأجيل

-ما لمحلك على شي؟؟

-لا گال من نرجع نسولف بس گلبي ناغزني احس اكو شي غلط

-لا يمعود لتفكر زايد اكيد شي يخص شغلكم

-لا مالك حچه وياي بجَدية ما ضحك ولا شاقاني مو نفس كل مرة

-ميخالف اهدأ متأكدة مو شي يضرك مالك ما راح يسمح لاحد يضوجك

-اي

-يله نام ولا تفكر زايد

تمدد وسرح بسقف الغرفة، نمت على جانبي الايمن اباوعله وبداخلي افكر شنو من موضوع هذا الي خلى فاهد هيچ متردد ومزعوج، قاطع صفنتي بي من اللتفت ينام على جهته اليسره يقابلني ويگول بأبتسامة نابعة من القلب..

-فاهد: نسيت اگلچ راح اروح للمغرب

-ياا حلوو

-تجين وياي كوري؟

نبض گلبي بقوة من اخذ ايدي بين ايده القوية جعصها على كيف وتقرب مني اكثر احس روحي جاي تنسحب مني من حسيته راح يبدي بحركة تجاهي، نزلت عيوني ماگدر احطها بعيونه تايهة وخايفة بنفس الوقت..

-شگلتي؟

-شتسوي هناك؟

ابتسمت وره ما همست هاي الكلمتين وكبرت ابتسامته، عيونه ترجمت حب ولهفة واشتياق غصة تكونت ببلعومي من گال ولمعة عشق زينت عيونه الصفر..

-اروح اشوف حمرتي......

يتبع...

━━━━━━  ━━━━━━

المغررررب 🫢؟؟؟

رأيكم بصقر ريماس؟؟ شسالفتنا ويه المجرمين احنه؟ 🥲

توقعاتكممم 💀🩷؟؟؟